1. Etɛwu mǐ ka nɔ hun xomɛ, bo nɔ lɛ́ gó ɖó Kúnnuɖetɔ́ Jehovah tɔn e mǐ nyí é wu?

XOMƐ nɔ hun mǐ tawun, bɔ mǐ nɔ lɛ́ gó ɖó Kúnnuɖetɔ́ Jehovah tɔn e mǐ nyí é wu! Mǐ ɖó nyikɔ Mawu tɔn ɖò ta bo nɔ ɖè enɛ xlɛ́ gbɔn wɛnɖagbe ɔ jijlá kpo nǔ kplɔnkplɔn mɛ lɛ bonu ye na huzu ahwanvu kpo sín azɔ̌ ɔ gblamɛ. Enyi mǐ kpéwú bo kplɔ́n nǔ “mɛ e ɖó ninɔmɛ ayi mɛ tɔn e jɛxa gbɛ̀ mavɔmavɔ” é ɖé bonu é huzu nǔɖitɔ́ ɔ, é nɔ dó xomɛhunhun nú mǐ. (Mɛ. 13:48, nwt) Lee nǔ cí nú Jezu é wɛ é nɔ cí nú mǐ lɔmɔ̌; “[gbigbɔ mímɛ́] dó xomɛhunhun ɖaxó” n’i hwenu e ahwanvu tɔn lɛ wá ɖó lee azɔ̌ Mawuxóɖiɖɔ tɔn yetɔn kpa ye gbɔn é sín gbè n’i é.—Luk. 10:1, 17, 21.

2. Nɛ̌ mǐ ka sixu nɔ ɖexlɛ́ ɖɔ mǐ nɔ wlíbo nú sinsɛnzɔ́ mǐtɔn ganji gbɔn?

² Mǐ nɔ wlíbo nú sinsɛnzɔ́ mǐtɔn tawun. Mɛsɛ́dó Pɔlu dó wusyɛn elɔ lanmɛ nú Timɔtée: “Hɛn ayixa dó hwiɖée wu, bo hɛn ayixa dó nǔ e kplɔ́n mɛ wɛ a ɖè ɔ wu.” É lɛ́ ɖɔ gɔ́ na ɖɔ: “Nú a ɖò nǔ wà gbɔn mɔ̌ wɛ ɔ, a na hwlɛn hwiɖée gán, bo na hwlɛn mɛ e ɖò tó ɖó we wɛ lɛ bǐ gán.” (1 Tim. 4:16) Hǔn, azɔ̌ Mawuxóɖiɖɔ tɔn mǐtɔn nɔ hwlɛn mɛ lɛ gán. Mǐ nɔ hɛn ayixa dó mǐɖée wu, ɖó toví Axɔ́suɖuto Mawu tɔn tɔn lɛ wɛ mǐ nyí. Hwe lɛ bǐ nu wɛ mǐ nɔ ba na wà nǔ ɖò ali ɖé nu b’ɛ na kpa susu nú Jehovah, bo lɛ́ sɔgbe xá wɛnɖagbe e jlá mɛ lɛ wɛ mǐ ɖè é. (Fili. 1:27) Enyi mǐ nɔ sɔnǔ nú sinsɛnzɔ́ mǐtɔn ganji, bo nɔ lɛ́ byɔ alɔdó Jehovah tɔn cobo nɔ yì jlá wɛn ɔ mɛ ɖevo lɛ hǔn, xlɛ́xlɛ́ wɛ mǐ ɖè ɖɔ ‘mǐ nɔ hɛn ayixa dó nǔ e kplɔ́n mɛ ɖevo lɛ wɛ mǐ ɖè é wu’ nɛ.

3. Mɛ lɛ bǐ na yí wɛn Axɔ́suɖuto ɔ tɔn e jlá wɛ mǐ ɖè é wɛ à? Nǎ kpɔ́ndéwú ɖé.

³ Enyi mǐ na bo tlɛ nɔ wà nǔ e wu mǐ kpé é bǐ dó jlá wɛn Axɔ́suɖuto ɔ tɔn mɛ ɖevo lɛ ɔ, mɛ gegě sixu nɔ ma yí. Ð’ayi tan Nɔví sunnu Georg Lindal tɔn wu; éɖokponɔ ɖekúnnu gbɔn Islande tò ɔ bǐ mɛ sín 1929 jɛ 1947. Wema afatɔ́n donu wǒ wɛ é má, mɛ ɖokpo vɔ́vɔ́ ka huzu Kúnnuɖetɔ́ ǎ. É wlán ɖɔ: “Mɛɖé lɛ tíìn bɔ é cí ɖɔ ye kún nɔ ba na sè wɛn ɔ ó ɖɔhun, amɔ̌, mɛ gegě tíìn bɔ yedɛɛ lɛ tlɛ nɔ ba na sè ɖó tó wu ǎ.” Nɔví e yí kúnnuɖewema Galadi tɔn lɛ é ɖé lɛ wá finɛ  bo wá vlɔ́nkan nú azɔ̌ ɔ, amɔ̌, xwè tɛnnɛ ko wá yì, có mɛ e ɖò Islande é ɖé lɛ wá zé yeɖée jó nú Jehovah bo bló baptɛm. *

4. Nú mɛ lɛ ma yí wɛnɖagbe ɔ ǎ ɔ, nɛ̌ nǔ ka sixu cí nú mǐ?

⁴ Nú mɛ lɛ ma yí wɛn mǐtɔn ǎ, alǒ nú Biblu kplɔntɔ́ mǐtɔn lɛ ma ɖò nukɔn yì wɛ ǎ ɔ, wǔ nɔ kú mǐ. Lee nǔ cí nú Pɔlu é sixu cí mɔ̌ nú mǐ lɔ; ɖó Jwifu lɛ gegě gbɛ́ ɖɔ é kún nyí Jezu wɛ nyí Mɛsiya e sín akpá e è dó é ó wutu ɔ, Pɔlu jɛ ‘aluwɛ ɖaxó mɛ, bo nɔ mɔ wuvɛ̌ hwebǐnu.’ (Hlɔ. 9:1-3) Enyi a dó gǎn e wu a kpé lɛ é bǐ, bo lɛ́ xoɖɛ vívɛ́ lɛ dó Biblu kplɔntɔ́ ɖé sín takúnmɛ, b’ɛ ma yì nukɔn ǎ, b’ɛ byɔ ɖɔ a ni ɖó Biblu kplɔnkplɔn ɔ te ɔ ka ló? Alǒ, enyi a ma ko kplɔ́n Biblu xá mɛɖé tawun lě kpɔ́n kaka b’ɛ yì nukɔn bo bló baptɛm ǎ ɔ ka ló? A na dóhwɛ hwiɖée, bɔya bo na lin ɖɔ Jehovah kún kɔn nyɔna dó sinsɛnzɔ́ emitɔn jí ó wɛ à? Ðò xóta elɔ mɛ ɔ, mǐ na na xósin nú nǔkanbyɔ we elɔ lɛ: (1) Etɛ lɛ ka nɔ xlɛ́ ɖɔ sinsɛnzɔ́ ɔ kpa mɛ? (2) Linlin e ɖò jlɛ̌ jí é tɛ lɛ mǐ ka ɖó na nɔ ɖó?

5. Etɛwu azɔ̌ e wà nú Jehovah wɛ mǐ ɖè é ka sixu nɔ ma kpa mǐ hwebǐnu lee ba gbɔn wɛ mǐ ɖè é?

⁵ Biblu ɖɔ dó mɛ e nɔ wà jlǒ Mawu tɔn é wu ɖɔ, “nǔ e é nɔ wà ɔ, bǐ nɔ nyɔ́ n’i.” (Ðɛh. 1:3) Amɔ̌, enɛ ɖò xlɛ́xlɛ́ wɛ ɖɔ nǔ e mǐ nɔ wà dó Jehovah takúnmɛ lɛ é bǐ na yì lee mǐ lin gbɔn é ǎ. “Nǔxámɛ wɛ gɔ́” gbɛzán gbɛtɔ́ tɔn, ɖó mǐ bǐ wɛ nyí hwɛhutɔ́. (Jɔb. 14:1) Gɔ́ na ɔ, mɛ e ɖò gbè klán xá mǐ wɛ lɛ é sixu kpéwú hweɖelɛnu bo ɖó gǎn e dó wɛ mǐ ɖè, bo na wà sinsɛnzɔ́ mǐtɔn lee mǐ nɔ ko wà gbɔn hwɛhwɛ é te. (1 Kɔ. 16:9; 1 Tɛ. 2:18) Nú mɔ̌ wɛ ɔ, etɛ lɛ jí Jehovah ka nɔ zɔn dó bo nɔ kpɔ́n nú sinsɛnzɔ́ mǐtɔn kpa mǐ alǒ, gbɔ à jí? Mi nú mǐ ni gbéjé nǔgbododó Biblu tɔn ɖěɖee sixu d’alɔ mǐ, bɔ mǐ na mɔ xósin nú nǔkanbyɔ enɛ é ɖé lɛ kpɔ́n.

6. Etɛ lɛ jí wɛ Jehovah ka nɔ zɔn dó bo nɔ kpɔ́n ɖɔ azɔ̌ e wà n’i wɛ mǐ ɖè é kpa mǐ alǒ gbɔ?

⁶ Jehovah nɔ ɖ’ayi gǎn e dó wɛ mǐ ɖè lɛ é kpo dɛ e dɛ wɛ mǐ ɖè é kpo wu. Ðò nukún Jehovah tɔn mɛ ɔ, nú mɛ lɛ na bo ma tlɛ yí wɛn e jlá wɛ mǐ ɖè é ǎ, bɔ mǐ ɖókan d’ewu bo jlá hǔn, azɔ̌ e é zɔ́n mǐ é ɖò mǐ kpa wɛ nɛ. Pɔlu wlán ɖɔ: “Mawu nɔ dóhwɛ agɔ ǎ; é na wɔn azɔ̌ e mi wà é ǎ; wanyiyi e mi ɖexlɛ́ ɛ gbɔn alɔ e mi dó nɔví Klisu [tɔn] lɛ é gblamɛ, bo ka lɛ́ kpo ɖò didó ye wɛ ɔ, é na wɔn ǎ.” (Ebl. 6:10) Enɛ wu ɔ, enyi mǐ wà nǔ e wu mǐ kpé é bǐ có, azɔ̌ mǐtɔn ma ka na sínsɛ́n e ɖó nukún wɛ mǐ ɖè é ǎ hǔn, awakanmɛ ni ma kú mǐ ó. Jehovah na wɔn gǎn e dó wɛ mǐ ɖè é, kpo wanyiyi e mǐ nɔ ɖexlɛ́ é kpo gbeɖé ǎ. Mǐ sixu lɛ́ hɛn xó elɔ lɛ e Pɔlu ɖɔ nú Kɔlɛntinu lɛ é ayi mɛ: “Azɔ̌ e wà wɛ mi ɖè ɖò bǔ e mi ɖè xá Aklunɔ mɛ ɔ . . . na gú mi” ǎ.—1 Kɔ. 15:58.

7. Etɛ nǔ e mɛsɛ́dó Pɔlu ɖɔ dó sinsɛnzɔ́ tɔn wu é ka sixu kplɔ́n mǐ?

 ⁷ Mɛsɛ́dó nukúnɖeji ɖé wɛ nú Pɔlu, b’ɛ ɖó agun yɔyɔ̌ gegě ayǐ ɖò tò gegě mɛ. É ɖò mɔ̌ có, hwenu e mɛɖé lɛ mɔ xó ɖɔ dó Pɔlu wu ɖɔ é kún nyí nǔkplɔnmɛtɔ́ ɖagbe ɖé ó é ɔ, é ɖɔ mɛ nabi lě wɛ emi ko d’alɔ bɔ ye huzu Klisanwun ǎ. É nyɔ́ wà ɔ, é gbɛ́ susu e mɛ ɖěɖee ɖò yeɖée zé dó jí wɛ lɛ é ɖò xixɔ wɛ lɛ é; é wlán ɖɔ: “Un wà azɔ̌ hú ye.” (2 Kɔ. 11:23) Pɔlu ɖɔhun ɔ, mi nú mǐ ni nɔ flín ɖɔ gǎn e dó wɛ mǐ ɖè é kpo dɛ e dɛ wɛ mǐ ɖè é kpo nɔ xɔ akwɛ nú Jehovah tawun.

8. Etɛ mǐ ka ɖó na hɛn d’ayi mɛ, b’ɛ kúnkplá sinsɛnzɔ́ mǐtɔn?

⁸ Sinsɛnzɔ́ mǐtɔn nɔ kpa susu nú Jehovah. Jezu sɛ́ ahwanvu 70 dó bonu ye na yì jlá wɛnɖagbe Axɔ́suɖuto ɔ tɔn, bɔ ahwanvu lɛ lɛkɔ wá “kpodo xomɛhunhun kpan.” Etɛ wu awǎjijɛ yetɔn ka sín? Ye ɖɔ: “Mǐ ylɔ́ nyikɔ towe lě ɔ, yɛ nyanya lɛ ɖesu nɔ jó ta nú mǐ.” Amɔ̌, Jezu jlá linlin yetɔn ɖó, bo ɖɔ nú ye ɖɔ: “Yɛ nyanya lɛ e jó ta nú mi é wu wɛ xomɛ na hun mi ǎ; loɔ, xomɛ ni hun mi ɖó nyikɔ mitɔn e è wlán ɖó [jixwé] é wu.” (Luk. 10:17-20) Jezu tuùn ɖɔ é kún nyí hwe lɛ bǐ nu wɛ sinsɛnzɔ́ yetɔn na kpa ye mɔ̌ ó. Nǔgbo ɔ, mǐ tuùn mɛ nabi e wá huzu nǔɖitɔ́ ɖò mɛ e ahwanvu Jezu tɔn lɛ ɖɔ xó na ɖò bǐbɛ̌mɛ é mɛ lɛ é ǎ. Enyi nǔ e wu ahwanvu lɛ kpé bo wà é kɛɖɛ wu wɛ ye ɖó awǎjijɛ ǎ, loɔ, nǔ e zɔ́n bɔ ye ɖó awǎjijɛ hugǎn é wɛ nyí tuùn e ye tuùn ɖɔ gǎn e dó wɛ emi ɖè lɛ é sù Jehovah nukúnmɛ é.

9. Sɔgbe xá Galatinu lɛ 6:7-9 ɔ, enyi awakanmɛ ma kú mǐ dó sinsɛnzɔ́ mǐtɔn wu ǎ ɔ, ajɔ tɛ mǐ ka na mɔ?

⁹ Enyi awakanmɛ ma kú mǐ dó sinsɛnzɔ́ mǐtɔn wu ǎ ɔ, mǐ na mɔ gbɛ̀ mavɔmavɔ. Enyi mǐ wà nǔ e wu mǐ kpé é bǐ bo dó kwín nǔgbo Axɔ́suɖuto ɔ tɔn tɔn ɔ, “jlǒ [gbigbɔ] tɔn” wà wɛ mǐ lɔ ɖè nɛ; enɛ na hun ali nú gbigbɔ mímɛ́ Mawu tɔn, b’ɛ na w’azɔ̌ ɖò gbɛzán mǐtɔn mɛ. Enyi “awakanmɛ ma kú mǐ ǎ” ɔ, Jehovah d’akpá ɖɔ emi na na mǐ gbɛ̀ mavɔmavɔ, enyi mǐ na bo ma tlɛ kplɔ́n nǔ mɛɖé bonu é zé éɖée jó nú Mawu ǎ ɔ nɛ.—Xà Galatinu lɛ 6:7-9.

10. Enyi mǐ ɖò wɛn ɔ jlá wɛ ɔ, etɛwu mɛɖé lɛ ka nɔ sè bɔ mɛ ɖevo lɛ ka nɔ gbɛ́?

¹⁰ Nǔ nukɔntɔn e wu é na sín bɔ mɛ lɛ na ɖótó mǐ é wɛ nyí ninɔmɛ ayi mɛ tɔn yetɔn. Jezu tinmɛ nǔgbo enɛ ɖò nǔjlɛdonǔwu e é na dó nǔkúndótɔ́ e dó nǔkún dó ayikúngban vovo jí é wu é mɛ. Nǔkún e jɛ ayikúngban ɖagbe jí é kɛɖɛ jɛn na sínsɛ́n. (Luk. 8:5-8) Jezu ɖɔ ɖɔ ayikúngban lɛ nɔte nú ayixa mɛ ɖěɖee “sè Mawuxó ɔ” bo yí gbè na ɖò ali vovo nu lɛ é tɔn. (Luk. 8:11-15) Nǔkúndótɔ́ ɔ ɖɔhun ɔ, mǐ ɖ’acɛ dó sínsɛ́n e azɔ̌ mǐtɔn na na é jí ǎ, ɖó ninɔmɛ ayi mɛ tɔn mɛ e ɖò tó ɖó mǐ wɛ lɛ é tɔn wu wɛ é nɔ sín. Azɔ̌ mǐtɔn wɛ nyí ɖɔ mǐ na ɖò wɛn Axɔ́suɖuto ɔ tɔn jlá mɛ ɖevo lɛ wɛ. Mɛsɛ́dó Pɔlu ɖɔ ɖɔ “mɛ ɖokpo ɖokpo na mɔ lee é wà nǔ gbɔn ɔ sín ajɔ yí ɖò Mawu sí.” É nyí sínsɛ́n e azɔ̌ tɔn na é jí wɛ Mawu na zɔ́n dó dó d’ajɔ ɛ ǎ.—1 Kɔ. 3:8.

11. Mɛ e Nɔwée ɖɔ Mawuxó na lɛ é ɖótó ǎ có, aniwu xomɛ ka hun Jehovah dó wǔ tɔn? (Kpɔ́n ɖiɖe ɖò akpa ɔ jí é.)

¹¹ Mɛ e Kúnnuɖetɔ́ Jehovah tɔn bǐbɛ̌mɛ tɔn lɛ ɖekúnnu na lɛ é bǐ wɛ yí wɛn ɔ ǎ. Ði kpɔ́ndéwú ɔ, nú xwè gegě ɔ, Nɔwée ‘ɖɔ lee Mawu ba ɖɔ è ni zán gbɛ̀ gbɔn é sín xó nú mɛ lɛ.’ (2 Pi. 2:5) É ɖò wɛn ɖɔ, é na ko ɖó nukún ɖɔ mɛ ɖevo lɛ na yí gbè nú wɛn emitɔn, amɔ̌, Jehovah ɖɔ nǔɖe n’i dó ali enɛ nu ǎ. É nyɔ́ wà ɔ, hwenu e Mawu ɖɔ nú Nɔwée ɖɔ é ni bló tɔjihun ɖé é ɔ, é ɖɔ n’i ɖɔ: “A na byɔ tɔjihun ɔ mɛ, hwi kpo vǐ towe lɛ kpo, kpo asì towe kpo, kpodo vǐ towe lɛ sín asì lɛ kpo.” (Bǐb. 6:18) Gɔ́ na ɔ,  enyi Nɔwée lin tamɛ dó gblǒ e tɔjihun e Mawu ɖɔ é ni bló é ɖó é jí, kpo nǔ e tɔjihun ɔ sixu hɛn é kpo jí ɔ, é sixu mɔ nǔ jɛ wu ɖɔ mɛ kaka ɖé kún na yí wɛn emitɔn ó. (Bǐb. 6:15) Lee mǐ ko tuùn gbɔn é ɔ, mɛ ɖokpo vɔ́vɔ́ ɖótó Nɔwée ǎ. (Bǐb. 7:7) Jehovah mɔ ɖɔ Nɔwée hwe dó nǔ wu wɛ à? Ðebǔ ǎ! Nú Jehovah ɔ, wɛnɖagbejijlazɔ́ ɔ kpa Nɔwée, ɖó é bló nǔ e è zɔn ɛ é kpo gbejininɔ kpo.—Bǐb. 6:22.

12. Mɛ lɛ ɖótó Jelemíi ǎ, bo lɛ́ klán gbè xá ɛ có, nɛ̌ é ka mɔ awǎjijɛ ɖò sinsɛnzɔ́ tɔn mɛ gbɔn?

¹² Gbeyiɖɔ Jelemíi lɔ ɖekúnnu nú xwè 40 jɛji, có mɛ lɛ ka ɖótó è ǎ, bo lɛ́ klán gbè xá ɛ. Gbeklánxámɛtɔ́ lɛ nɔ ‘cá Jelemíi ko, bo nɔ bɔ zun nyi gǒ mɛ n’i,’ bɔ enɛ zɔ́n bɔ awakanmɛ kú i bǐ, kaka bɔ é lin na jó azɔ̌ tɔn dó. (Jel. 20:8, 9) Amɔ̌, Jelemíi jó gbè ǎ! Etɛ ka d’alɔ ɛ b’ɛ ɖu ɖò linlin masɔgbe tɔn lɛ jí, bo mɔ awǎjijɛ ɖò sinsɛnzɔ́ tɔn mɛ? É zé ayi ɖó nǔgbo taji we elɔ lɛ jí. Nukɔntɔn, wɛn Mawu tɔn e jlá wɛ Jelemíi ɖè é na bló bɔ mɛ lɛ na ɖó nukún ɖɔ “sɔ na nyɔ́.” (Jel. 29:11) Wegɔ́, Jehovah sɔ́ Jelemíi b’ɛ na nyí gbeyiɖɔ tɔn, bo na dó jlá wɛn tɔn mɛ lɛ. (Jel. 15:16) Mǐ lɔ nɔ jlá wɛn e nɔ na mɛ nukúnɖiɖó é ɖé mɛ lɛ, bɔ nyikɔ Jehovah tɔn ɖò ta nú mǐ, bɔ è nɔ ylɔ́ mǐ ɖɔ Kúnnuɖetɔ́ tɔn lɛ. Enyi mǐ zé ayi ɖó nǔgbo taji we enɛ lɛ jí, bonu mɛ lɛ na bo ma tlɛ yí wɛn mǐtɔn ǎ ɔ, mǐ nɔ j’awǎ.

13. Etɛ lǒ e Jezu dó b’ɛ ɖò Maki 4:26-29 mɛ é ka kplɔ́n mǐ?

¹³ Kpɛɖé kpɛɖé wɛ è nɔ yì nukɔn ɖò gbigbɔ lixo. Jezu kplɔ́n mɛ nǔgbo enɛ, ɖò lǒ e é dó dó nǔkúndótɔ́ e ɖò amlɔ dɔ́ wɛ é wu é mɛ. (Xà Maki 4:26-29.) Kpɛɖé kpɛɖé wɛ nǔkún e nǔkúndótɔ́ ɔ dó é sù, é ka sixu bló bɔ nǔkún e é dó é yawǔ sù bléblé ǎ. Enyi hwiɖesu ɖò Biblu kplɔ́n xá mɛɖé wɛ ɔ, a sixu nɔ ma ɖ’ayi wu ɖɔ é ɖò nukɔn yì wɛ, ɖó kpɛɖé kpɛɖé wɛ è nɔ yì nukɔn ɖò gbigbɔ lixo wutu. Glesi ɖé sixu bló bɔ nǔkún e é dó lɛ é na yawǔ sù bléblé lee é ba gbɔn é ǎ. Mɔ̌ ɖokpo ɔ, mǐ sixu bló bɔ Biblu kplɔntɔ́ mǐtɔn lɛ yawǔ yì nukɔn ɖò gbigbɔ lixo lee mǐ ba gbɔn é ǎ. Enɛ wu ɔ, enyi Biblu kplɔntɔ́ towe lɛ ma yawǔ yì nukɔn lee ba gbɔn wɛ a ɖè é ǎ ɔ, awakanmɛ ni ma kú we ó. Glesi ɖé ɖɔhun ɔ, nǔ kplɔnkplɔn mɛ lɛ bonu ye na huzu ahwanvu sín azɔ̌ ɔ nɔ byɔ suúlu.—Ja. 5:7, 8.

14. Kpɔ́ndéwú tɛ ka xlɛ́ ɖɔ cobonu mɛ lɛ na jɛ nǔ kplɔ́n xá mǐ jí ɔ, é sixu ɖu hwenu?

¹⁴ Ðò xá ɖé lɛ mɛ ɔ, sínsɛ́n e na wɛ Mawuxóɖiɖɔzɔ́ mǐtɔn ɖè é sixu nɔ ma jɛ wě nú xwè gegě. Ð’ayi kpɔ́ndéwú nɔví nɔví we elɔ lɛ tɔn wu. Gladys Allen kpo Ruby Allen kpo wɛ ye nɔ nyí. Ðò 1959 ɔ, è sɛ́ ye dó tokpɔn Canada tɔn ɖé mɛ, ɖò Québec bɔ ye nyí gbexosin-alijitɔ́ hwebǐnu tɔn lɛ. * Kɔ e mɛ lɛ nɔ gbidí nú mɛ é, kpo acɛ e sinsɛn Katolika tɔn ɖó ɖò tò ɔ mɛ é kpo zɔ́n bɔ xɛsi nɔ ɖi mɛ lɛ dó wɛn Axɔ́suɖuto ɔ tɔn sise wu. Gladys flín ɖɔ: “Mǐ nɔ ɖekúnnu sín hɔn ɖé kɔn jɛ hɔn ɖé kɔn nú ganxixo tantɔn gbè bǐ gbè nú xwè we, bɔ mɛɖé ka yí gbè bá kplɔ́n nǔ ǎ. Enyi mǐ xúxú hɔn nú mɛɖé, bonu é hun hɔn bo mɔ mǐ ɔ, é nɔ lɛ́ dɔn hɔn ɔ sú. É ɖò mɔ̌ có, awakanmɛ kú mǐ ǎ.” Hwenu ɖò yiyi wɛ é ɔ, mɛ lɛ jɛ linlin ɖyɔ jí, bɔ mɛɖé lɛ jɛ tó ɖó mǐ jí. Agun atɔn wɛ ɖò toxo enɛ mɛ dìn.—Eza. 60:22.

15. Etɛ 1 Kɔlɛntinu lɛ 3:6, 7 ka kplɔ́n mɛ dó nǔ kplɔnkplɔn mɛ lɛ bonu ye na huzu ahwanvu sín azɔ̌ ɔ wu?

¹⁵ Nǔkplɔnkplɔn mɛ lɛ bonu ye ni huzu ahwanvu sín azɔ̌ ɔ nyí mɛ ɖokpo zɔ́ ǎ. É nɔ byɔ ɖɔ agun ɖé blebu ni d’alɔ mɛɖé bonu é na dó kpéwú bá bló baptɛm. (Xà 1 Kɔlɛntinu lɛ 3:6, 7.) Wɛnjlatɔ́  ɖé sɔ́ tlati ɖé nú mɛ e ɖó jlǒ é ɖé. Enɛ gudo ɔ, nɔví sunnu ɔ mɔ ɖɔ tuto emitɔn lɛ kún lɔn nǔ nú emi bonu emi na lɛkɔ yì flɔ́ zo dó glɔ̌ nú jlǒ e mɛ ɔ ɖó é ó. Enɛ wu ɔ, é byɔ wɛnjlatɔ́ ɖevo ɖɔ é ni yì bló mɛbakpɔ́n ɔ nú emi. Wɛnjlatɔ́ enɛ kpéwú bo bɛ́ Biblu kplɔnkplɔn ɖé. Enɛ gudo ɔ, é nɔ byɔ wɛnjlatɔ́ vovo lɛ bɔ ye nɔ kplá ɛ yì Biblu kplɔnkplɔn ɔ domɛ. Nɔví enɛ lɛ ɖokpo ɖokpo nɔ dó wusyɛn lanmɛ nú nǔkplɔntɔ́ ɔ ɖò ali vovo nu. Nɔví sunnu kpo nɔví nyɔnu kpo enɛ lɛ e nɔ kplá ɛ yì nǔkplɔnkplɔn ɔ domɛ é na d’alɔ nǔkplɔntɔ́ ɔ, b’ɛ na kplɔ́n nǔ gegě dó Jehovah wu. Ðò ninɔmɛ mɔ̌hun mɛ ɔ, lee Jezu ɖɔ gbɔn é ɔ, nǔkúndótɔ́ ɔ kpo nǔkúnyatɔ́ ɔ kpo bǐ na j’awǎ ɖó kpɔ́, ɖò nǔkúnyiya gbigbɔ tɔn enɛ mɛ.—Jaan 4:35-38.

16. Enyi lanmɛ towe ma tlɛ lɔn nǔ nú we ǎ, alǒ hlɔnhlɔn kaka ɖé ma sɔ́ kpò ɖò wu we ǎ ɔ, etɛwu a ka sixu kpò ɖò awǎjijɛ mɔ wɛ ɖò sinsɛnzɔ́ towe mɛ?

¹⁶ Nú lanmɛ towe ma lɔn nǔ ǎ, alǒ gǎn ma sɔ́ ɖò wǔ we mɔ̌ bonu a na ɖ’alɔ ɖò nǔkplɔnkplɔn mɛ lɛ bonu ye na huzu ahwanvu sín azɔ̌ ɔ mɛ ǎ ɔ ka ló? Nǔkúnyiyazɔ́ ɔ sixu kpò ɖò awǎjijɛ dó nú we wɛ. Ð’ayi kpɔ́ndéwú Davidi tɔn wu: É kpo mɛ tɔn lɛ kpo yì hwlɛn xwédo yetɔn lɛ ɖò Amalɛkinu e wlí ahwankannumɔ yetɔn lɛ é sí. Mɛ afɔɖé ɖò ye mɛ bɔ nǔ cikɔ nú ye tawun bɔ ye sɔ́ sixu fun ahwan ǎ, enɛ wu ɔ, yedɛɛ lɛ cí agban lɛ kɔn bo ɖò cícɔ́ wɛ. Ee ye ɖu ɖò ahwan ɔ jí gudo é ɔ, Davidi ɖegbe ɖɔ è ni má nǔ e ye yí sín ahwangbenu lɛ é ɖó zɛ̌nzɛ̌n xá mɛ bǐ. (1 Sam. 30:21-25) Nǔ ɖokpo ɔ wɛ é nɔ nyí ɖò nǔ kplɔnkplɔn mɛ lɛ bonu ye na huzu ahwanvu sín azɔ̌ e wà wɛ mǐ ɖè é kɔn. A sixu nɔ ma kpéwú, bo ɖ’alɔ ɖò wɛn ɔ jijla kpo nǔ kplɔnkplɔn mɛ lɛ bonu ye na huzu ahwanvu sín azɔ̌ ɔ kpo mɛ lee a lin gbɔn é. Amɔ̌, enyi a nɔ wà nǔ e wu a kpé é bǐ, hweɖebǔnu bonu mɛ yɔyɔ̌ ɖé kplɔ́n bo tuùn Jehovah, bo bló baptɛm ɔ, a sixu kpò ɖò awǎjijɛ ɖaxó ɖó wɛ.

17. Nɛ̌ Jehovah ka nɔ wà nǔ xá mǐ gbɔn, b’ɛ ɖó na sù nukún mǐtɔn mɛ?

¹⁷ Lee Jehovah nɔ kpɔ́n sinsɛnzɔ́ mǐtɔn kpo wanyiyi kpo gbɔn é nɔ sù nukún mǐtɔn mɛ. É tuùn ɖɔ mǐ kún sixu hɛn mɛ lɛ gannugánnú bonu ye ɖótó mǐ, alǒ jɛ sinsɛn ɛ jí ó. É ɖò mɔ̌ có, é nɔ ɖ’ayi azɔ̌ syɛnsyɛn e mǐ nɔ wà é kpo linlin ɖagbe e mǐ nɔ ɖó é kpo wu, bo nɔ d’ajɔ mǐ ɖ’enu. Gɔ́ na ɔ, é nɔ lɛ́ kplɔ́n nǔ mǐ dó lee mǐ sixu wà nǔ gbɔn bɔ alɔ e ɖó wɛ mǐ ɖè ɖò nǔkúnyiyazɔ́ ɖaxó enɛ mɛ é na lɛ́ d’awǎjijɛ nú mǐ gbɔn é wu. (Jaan 14:12) Mǐ sixu kúdeji ɖɔ nú awakanmɛ ma kú mǐ ǎ ɔ, nǔ mǐtɔn na kpò ɖò nukún Mawu tɔn mɛ nyɔ́ wɛ.