1. Ki lònò é ki lajwa nou gen ?

NOU vréman kontan é nou fyèr paské nou Témwen Jéova ! Nou sa pèp Jéova-a, é nou ka montré ki nou sa so témwen, lò nou ka préché, é lò nou ka anprann ròt-ya konnèt li. Nou kontan lò nou pouvé idé roun moun so ‘tchò paré pou asèpté lavérité-a ki ka pèrmèt gen lavi pou tout-tan’ divini roun sèrvitèr Jéova (Actes 13:48). Nou ka rousanti menm bagaj-a ki Jézi jou-a so disip vin rakonté li tout bèl bagaj ki té rivé yé lò yé té ka préché. Labib-a ka di ki « lèspri sen-an té plen li ké lajwa » (Luc 10:1, 17, 21).

2. Kouman nou pouvé montré ki prédikasyon-an enpòrtan pou nou ?

² Prédikasyon-an vréman enpòrtan pou nou. Men sa Pòl ankourajé Timoté fè : « A tout-tan pou to véyé to pròp kò ké sa to ka ansényé-a. » Pòl ka di dèyè sa : « Paské si to ka fè sa, to ké sové ni to menm ni sa-ya ki ka kouté to » (1 Tim. 4:16). Donk, travay prédikasyon-an ka sové lavi moun. A tout-tan nou ka panga sa nou ka fè, paské nou sa sitwayen rwayonm Bondjé-a. Nou toujou lé aji roun fason ki ka louwé Jéova é ki k’alé ké bon nouvèl nou ka préché-a (Phil. 1:27). Nou ka panga fason nou ka ansényé, lò nou ka byen préparé nou kò anvan nou alé préché, é lò nou ka doumandé Jéova béni tout éfòr nou ka fè.

3. Détan kouman moun-yan ka réyaji lò nou ka préché mésaj Rwayonm-an ? Bay roun èkzanp.

³ Menm si nou ka fè tousa nou pouvé pou préché pou ròt-ya, pitèt nou pa ké jwenn bokou moun annan nou téritwar ki ké lé kouté mésaj Rwayonm-an. Annou wè èkzanp frè Georg Lindal, ki préché li rounso an Islann dipi 1929 jik 1947. I bay plizyèr milyé liv, mé i pa gen rounsèl moun ki divini Témwen. Men sa i ékri : « I gen sa ki té kont mésaj Labib-a menm, mé laplipar pa té entérésé.  » Menm apré plizyèr misyonèr ki té fè lékòl Galaad vini é koumansé préché ké bokou balan annan sa koté-a, nèf lannen pasé ankò anvan roun ran moun Islann divini Témwen Jéova *.

4. Kouman nou pouvé santi nou kò lò moun-yan pa lé tandé bon nouvèl-a ?

⁴ Nou tchò gro lò moun-yan pa lé étidyé Labib-a. Pitèt nou pouvé santi nou kò kou Pòl. I té gen « roun gran lapenn ké roun doulò ki pa té ka fini » paské près tout Jwif-ya pa té lé asèpté Jézi kou Mési Bondjé té promèt-a (Rom. 9:1-3). É si roun étidyan pa ka vansé é nou divèt arété léson-an, menm si nou fè bokou éfòr é nou priyè pou li ? Ouben, si nou pa janmen idé roun moun vansé jistan i batizé ? Ès nou divèt santi nou kò koupab, ouben pansé ki Jéova pa ka béni nou prédikasyon ? Annan sa artik-a, nou ké réponn sa dé késyon-yan : 1) Asou kisa nou ka wè ki nou prédikasyon ka byen maché ? 2) Kisa nou divèt antann lò nou ka préché pou ròt-ya ?

5. Poukisa a pa tout tan travay nou ka fè pou Jéova ka bay sa nou lé ?

⁵ Men sa Labib-a ka di asou roun moun ki ka fè sa Bondjé lé : « Tousa i ka fè ké byen maché » (Ps. 1:3). Mé sa pa lé di ki tousa nou ké fè pou Jéova ké bay sa nou lé. A vré paské Labib-a ka di ki nou « néyé anba traka » paské, ki a nou, ki a ròt-ya, nou pyès pa parfè (Job 14:1). Anplis di sa, détan, sa-ya ki pa kontan nou ka anpéché nou préché kou nou lé (1 Cor. 16:9 ; 1 Thess. 2:18). Atò, asou kisa Jéova ka désidé si prédikasyon-an ka byen maché ? Annou wè déztrwa prensip annan Labib-a ki ké idé nou réponn sa késyon-an.

6. Asou kisa Jéova ka wè ki prédikasyon-an ka byen maché ?

⁶ Jéova kontan lò i ka wè ki nou ka travay rèd é ki nou ka kontinyé tchenbé. Pou Jéova, travay nou ka fè annan prédikasyon-an ka maché si nou ka kontinyé préché ké balan paské nou kontan li, menm si ròt-ya pa lé kouté nou. Men sa Pòl ékri : « Bondjé pa enjis pou i bliyé sa zòt fè pou li ni lanmou zòt montré pou so non lò zòt idé sen-yan, kou zòt ka fè l’ jis jòdla » (Héb. 6:10). Jéova ka sonjé nou lanmou ké tout éfòr nou fè, menm si moun-yan pa lé kouté nou mésaj. Donk, sa Pòl ékri pou Korentyen-yan vré pou nou osi : « Travay zòt ka fè pou Sényèr-a, a pa travay pou bon tchò », menm si gro travay to fè-a pa ka bay sa to té lé i bay (1 Cor. 15:58).

7. Kisa fason Pòl palé di so prédikasyon ka anprann nou ?

⁷ Pòl té sa roun misyonèr ki té vayan. I fè plizyèr asanblé annan plizyèr vil. Mé  lò roun ran di ki i pa té ka byen ansényé, i pa palé di kantité moun i té ja idé divini krétyen. Men sa i ékri pou réponn sa-ya ki té ka di ki yé té miyò pasé li : « Mo travay pasé yé » (2 Cor. 11:23). Kou Pòl, annou pa bliyé ki sa ki pi enpòrtan pou Jéova, a wè ki nou ka fè éfòr é ki nou ka tchenbé.

8. Kisa ki divèt fè nou plis kontan ?

⁸ Nou prédikasyon ka fè Jéova plézi. Jézi voyé 70 disip préché mésaj Rwayonm-an, é apré yé fin préché, yé « rouvini, yé té tou kontan ». Poukisa yé té kontan ? Yé di : « Menm démon-yan ka kouché plat douvan nou lò nou ka sèrvi to non. » Mé Jézi korijé fason yé té ka pansé lò i di yé : « Pa fè lafèt paské lèspri-ya ka kouché plat douvan zòt ; fè lafèt pito paské zòt non marké annan syèl-a. » (Luc 10:17-20). Jézi té savé ki a pa tout tan yé té ké gen bon bagaj konsa ki té ké rivé yé annan yé prédikasyon. Anfèt, annan sa-ya ki kouté disip-ya sa jou-a nou pa menm savé konmyen ki divini disip Jézi. Disip-ya té pou konprann ki si moun-yan té ka kouté a té roun bon bagaj mé a pa sa rounso ki té divèt fè yé tchò kontan. Sa ki té divèt fè yé plis kontan, a té savé ki travay yé té ka fè-a té ka fè Jéova plézi.

9. Dapré Galates 6:7-9, kisa nou ké gen, si nou pa ka moli annan prédikasyon-an ?

⁹ Si nou pa ka moli annan prédikasyon-an, nou ké gen lavi pou tout-tan. Lò nou ka fè tousa nou pouvé pou préché ké ansényé, nou ka sonmen « pou lèspri-a » osi, sa lé di ki nou ka lésé lèspri Bondjé fè travay i divèt fè annan nou lavi. Si nou « pa ka arété », é si nou « pa ka moli », Jéova ka promèt nou ki i ké rékonpansé nou. I ké bay nou lavi pou tout-tan, menm si nou pa idé pyès moun batizé (li Galates 6:7-9).

10. Poukisa i gen sa ki ka kouté, épi ròt ki pa ka kouté, lò nou ka préché ?

¹⁰ A sa roun moun gen annan so tchò ki ka fè si i ka asèpté lavérité-a. A sa Jézi èspliké lò i pran èkzanp roun moun ki ka sonmen grenn annan diféran kalité latè, é rounsèl annan yé ka bay frwi (Luc 8:5-8). Jézi di ki sa diféran kalité latè-ya ka réprézanté tchò moun-yan ki ka réyaji roun fason diféran lò yé ka tandé « paròl Bondjé-a » (Luc 8:11-15). Kou moun-an ki ka sonmen-an, nou pa pouvé kontrolé kisa sa nou ka sonmen-an ké bay, paské sa ka dépann di ki kalité tchò moun-yan gen. Sa nou divèt fè, a kontinyé sonmen mésaj Rwayonm-an. Kou Pòl di l’, « yé chak ké gen yépa rékonpans dapré travay yé fè-a », pa dapré sa so travay bay (1 Cor. 3:8).

11. Poukisa Jéova té kontan prédikasyon Noé té fè-a, menm si i pa gen pyès moun ki kouté li ? (gadé zimaj-a anlè prémyé paj-a).

¹¹ Dipi tout-tan, Témwen Jéova-ya préché pou moun ki pa té lé kouté yé. Parèkzanp, Noé « préché lajistis » pannan 40 ouben 50 lannen (2 Pierre 2:5). Asiré pa pitèt, i té ké byen kontan ròt-ya kouté l’. Mé Jéova pa té di li ki a sa ki té ké fèt. Lò i doumandé Noé fè arch-a, i di li pito : « To ké divèt antré annan arch-a, to ké to pitit, to madanm ké madanm to pitit-ya » (Gen. 6:18). Épi, pou arch-a Bondjé té doumandé li fè, lò i té ka gadé so grandèr épi kantité moun i té pouvé pran, Noé dèt konprann ki i pa té ké gen bokou moun ki té ké kouté l’ (Gen. 6:15). É nou savé sa ki rivé, i pa menm gen rounsèl  moun ki kouté Noé (Gen. 7:7). Ès Jéova di ki Noé pa té préché asé byen ? Awa, i pa di sa ! Jéova té vréman kontan Noé, paské i té fè sa i té doumandé li fè (Gen. 6:22).

12. Kouman profèt Jérémi kontinyé kontan travay i té ka fè pou Jéova menm si moun-yan pa té lé kouté é té ka baré so chimen ?

¹² Profèt Jérémi préché pannan pasé 40 lannen menm si moun-yan pa té ka kouté li é té ka baré so chimen. I té tèlman dékourajé paské so lèlmi té ka « jouré » l’ ké « méprizé » l’, ki i sonjé lésé sa tonbé (Jér. 20:8, 9). Mé Jérémi pa lagé ! Kisa ki idé l’ kontinyé, épi kontan travay i té ka fè pou Jéova-a ? I mété so lidé asou dé bagaj enpòrtan : Prémyèrman, mésaj Bondjé té voyé Jérémi bay pèp-a té ké bay yé « roun avénir ké roun èspwar » (Jér. 29:11). Dézyèmman, a Jéova ki té chwazi Jérémi pou palé pou li, épi pou fè pèp-a konnèt so mésaj (Jér. 15:16). Nou menm osi, nou ka poté roun mésaj èspwar annan sa monn-an ki anba soukou, é nou ka palé pou Jéova, nou sa so témwen. Si nou ka mété nou lidé asou sa dé bagaj enpòrtan-yan, ki moun-yan kouté nou, ki yé pa kouté nou, nou tchò pouvé kontinyé kontan.

13. Kisa èkzanp Jézi pran annan Marc 4:26-29 ka anprann nou ?

¹³ Sa ka pran tan pou roun moun gen lafwa. Jézi byen èspliké sa lò i pran èkzanp moun-an ki ka sonmen-an é ki ka dronmi (li Marc 4:26-29). Apré i fin sonmen, grenn-yan ka pousé piti piti, san i pa pouvé fè anyen pou yé pousé pi vit. Kou moun-an ki sonmen-an, pitèt nou ké divèt antann lontan anvan nou wè moun-an ki ka étidyé Labib-a apliké sa i ka anprann. Menm fason roun moun ki ka planté, pa pouvé fòrsé sa i planté-a pousé vit kou i lé, nou pa pouvé fòrsé roun moun ki ka étidyé Labib-a fè so lafwa grandi vit kou nou lé. Donk, a pa pou nou dékourajé, ouben lésé tonbé, si nou ka wè ki i ka vansé mwen vit ki sa nou té ka pansé. Kou roun moun ki ka travay latè, nou divèt gen pasyans lò nou ka fè disip (Jacq. 5:7, 8).

14. Ki èkzanp ka montré nou ki moun-yan pouvé pran bokou tan anvan yé koumansé kouté nou ?

¹⁴ Annan sèrten koté, moun-yan ka pran plizyèr lannen pou yé batizé. Annou wè èkzanp dé sò, Gladys * ké Ruby Allen. An 1959, yé voyé yé o Kanada kou pyonyé èspésyal annan roun vil o Kébèk. Paské moun-yan té pè yé vwazen ké monpè-ya, yé pa té lé kouté mésaj Rwayonm-an. Men sa Gladys ka sonjé : « Pannan dé lannen, nou fè wit lèr chak jou, ka alé di kaz an kaz, san pyès moun pa jen louvri so lapòt ! Moun-yan té ka yenki vini douvan yé lapòt, yé té ka wè ki a té nou, épi yé té ka routounen annan yé kaz. Mé nou pa lésé tonbé. » Piti piti, moun-yan divini pi janti, é roun ran koumansé kouté. Jòdla, i gen trwa asanblé annan sa vil-a (Is. 60:22).

15. Dapré 1 Corinthiens 3:6, 7, ès rounsèl proklamatèr asé pou fè roun disip ?

¹⁵ A tout roun asanblé ki ka fè roun disip. Yé di ki a tout roun asanblé ki ka idé roun moun vansé jistan i batizé (li 1 Corinthiens 3:6, 7). Roun proklamatèr ka bay roun moun ki entérésé roun dépliyan ouben roun journal. Mé i pa pouvé routounen wè sa moun-an jou-a ki pi bon pou li. Donk, i ka doumandé rounòt frè alé pou li. Sa proklamatèr-a ka koumansé roun  léson biblik. Apré sa, i ka envité plizyèr frè ké sò vini ké li annan sa léson-an, é yé chak ka ankourajé étidyan-an a yépa fason. Chak frè ouben chak sò étidyan-an ké kontré, ké idé li fè so lafwa grandi, kousidiré i té ka rozé grenn-an ki planté-a. A konsa, kou Jézi di l’, ni sa-la ki sonmen ni sa-la ki rékòlté, ké pouvé ‘fè lafèt ansanm’ lò moun-an ké batizé (Jean 4:35-38).

16. Poukisa nou pouvé kontan menm si nou pa pouvé fè tousa nou té ké lé annan prédikasyon-an akoz di nou lasanté, ouben paské nou pa gen bokou fòrs ?

¹⁶ Poukisa nou pouvé kontan menm si nou pa pouvé fè tousa nou té ké lé annan prédikasyon-an akoz di nou lasanté, ouben paské nou pa gen bokou fòrs ? Paské nou ka fè noupa kanmenm. Sonjé sa ki rivé rwa David ké wonm-yan ki té ké li lò yé alé libéré yé fanmi annan lanmen Amalésit-ya. I gen désan wonm ki té tro las pou briga. Donk, yé rété dèyè pou véyé tout bagaj yé té gen. Lo yé rouvin, apré yé ganyen lagèr-a, David di ki ni sa ki té rété dèyè, ni sa ki té alé briga, té divèt partajé tout bagaj ki té gen valò yé té pran annan lanmen yé lèlmi. Yé chak té divèt rousouvwè menm kantité-a (1 Sam. 30:21-25). A menm bagaj-a annan travay pou fè disip nou ka fè jòdla. Pitèt to pa pouvé fè tousa to té ké lé annan travay prédikasyon-an ké ansèyman-an. Mé si to ka fè tousa to pouvé, chak kou roun moun ka soti di sa monn-an épi ka koumansé maché asou chimen ki ka bay lavi, to pouvé kontan.

17. Kouman Jéova ka wè nou prédikasyon ?

¹⁷ Nou ka di Jéova mèrsi paské i ka wè tousa nou ka fè pou li ké bokou lanmou. I savé ki nou pa pouvé fòrsé pyès moun kouté nou épi koumansé adoré l’. Mé i ka wè kouman nou ka travay rèd ké tout nou tchò. É i ka rékonpansé nou pou sa. I ka fè nou sonjé osi ki nou pouvé kontan sa nou ka fè annan gran travay prédikasyon-an ki ka fèt jòdla (Jean 14:12). Nou pouvé sir ki Jéova ké kontinyé béni nou si nou pa ka lésé tonbé !