1. Ami Jehovache Sakxi asat hem khuxalkaiechem ani manachem mhunn ami kiteak lekhtat?

AMI Jehovache Sakxi zaun asat mhunn ami khub khuxal. Hem khub manachem mhunn ami lekhtat. Karonn ami Jehovache lok ani tachea vixim ami porgottʼttat ani xikoitat. Ani “sasnik jivit zoddunk favo aslolo” konnui amchem aikon Jehovacho Sakxi zata tednam ami khub khuxal zatat. (Itihas 13:48, NW) Amkam Jezu sarkem dista. Tache xis porgottnni korun porot aile tednam tanche bore onubhov aikon to ‘povitr atmeachea dennean khuxalkaien bhorlo.’—Lukas 10:1, 17, 21.

2. Ami porgottnnechem kam mhotvachem mhunn vollkhon ghetat, hem ami koxem dakhounk zata?

² Amchem porgottnnechem kam khub mhotvachem mhunn ami vollkhon ghetat. Karonn hea vorvim ami dusreancho jiv salvar korunk xoktat. Hea vixim, apostl Paulun Timotak oxem sanglem: “Kitem kortai ani kitem xikoitai tache vixim chotrai dhor; oxem korun, tuji ani tujem utor aikotoleanchi soddvonn tum zoddtoloi.” (1 Tim. 4:16) Tor hanga apostl Paulun ami kitem kortat tea vixim chotrai dhorunk sanglem. Tea pasot, Devachea Rajeachea adhin asloli porza zalolean, taka vakhannʼnni melltta ani ami kitem porgottʼttat tea pormonnem ami jieunk zai. (Filp. 1:27) Toxench Paulun, ‘kitem xikoitai tache vixim chotrai dhor’ mhunn sanglem. Tor, ami porgottnne pasot sodanch bori toiari korunk zai ani dusream lagim ulounchea poilim Jehovachi modot magonk zai.

3. Soglinch zannam bore khobrek kan ditolim kai? Ek udharonn diat.

³ Porgottnnechea kamant amchean zata tem soglem kelear pasun, thodde pavtti lok ghoddie amchea sondexak kan dinant.  Udharonnak, Iceland-ant, bhav Georg Lindal-an, 1929 tem 1947 meren ektteanuch porgottnni keli ani tannem lokank hozaramnim prokaxonam dilim. Punn konnunch sotant ieunk na. To oxem sangta: “Thoddeamnim sotacho virodh kelo punn choddxeank bori khobor aikonkuch naka asli.” Tachea uprant, Gilead kors korun ailolea thoddea mixinoreamnim pasun Iceland-ant porgottnnechem kam kelem. Punn nnov vorsam uprantuch Iceland-antle thodde lok somorponn korun bautizm gheunk pavle. *

4. Lok bore khobrek kan dinant tednam amkam koxem disonk puro?

⁴ Lok bore khobrek kan dinant tednam ami niraxi zaunk xoktat. Pauluk pasun oxench bhoglem. Jezu Mesias mhunn Judevamnim manun gheunk na tednam taka “vhodd khont ani thar dina tosli dukh” bhogli mhunn to sangta. (Rom. 9:1-3) Tor chintat, tumi khub proitn korun magnnem kelear pasun tumcho Bible videarthi to xikta tem apnnaina, ani tachea sangata Bible obheas korop bond korcho poddtta. Vo tumi zancho Bible obheas ghetla, tanchea modlea konnench atam meren bautizm gheunk na. Haka lagon tumi zobabdar ani Jehovan tumchea porgottnnecher besanv ghalunk na oxem ghoddie tumi chintunk puro. Tor hea lekhant, ami hea don prosnanche zobab polloitolim: (1) Ami amchi porgottnni bore toren kelea mhunn ami kiteak mhunnonk zata? (2) Amche porgottnne vixim ami kitem monant dhorunk zai?

5. Jehovache sevent ami kortat tem soglem amkam zai toxench ghoddttolem mhunn ami kiteak chintunk zaina?

⁵ Devachi khuxi kortolea munxa vixim Bible oxem sangta: “Soglleo tacheo kornnio sufoll!” (St. 1:3) Punn hacho orth, Jehovache sevent ami kortat tem soglem amkam zai toxench ghoddttolem oxem nhoi. Karonn ami soglim opurnn aslolean, amchem toxench dusreanchem-i jivit ‘koxttamnim bhorlam.’ (Job 14:1) Tea bhair, lok amchea kamacho virodh korta dekhun ami amkam zai tea toren porgottnni korunk xokonant. (1 Kor. 16:9; 1 Tes. 2:18) Tor Jehova, kiteacher adarit ami amchi porgottnni bore toren kelea mhunn lekhta? Hem zannam zaunk ami Bible-antlim thoddim totvam polloum-ia.

6. Ami kelam tem kam borem asa mhunn Jehova kiteacher adarit lekhta?

⁶ Ami thir ravon Jehovachi seva korunk khub vavurtat tem to polloita. Lok amchem aikonant zalear pasun, Jehovachea mogak lagon ami porgottnni korit ravtat tednam to khub khuxal zata. Ani amche Bible videarthi bautizm ghenant zalear pasun Jehova amcho vavr kednanch visorchona. Tor apostl Paulun Korintkarank sanglolim utram ami ugddas dovrunk zai. Tannem mhunnttlem: “Tumcho koxtti vavr Somi bhov follabhorit kortolo.” (1 Kor. 15:58) Toxench, tannem oxem-i mhunnttlem: “Dev onit korina. Tachea Nanvacho man rakhun tumi mog dakhoila to, bhoktank tumi adar dila ani ozun tumi adar diit asat to, hem sogllem tumi kelam tem Tachean visrunk zaina.” (Heb. 6:10)  Tor hantuntlean, ami kortat tea vavracho ani ami dakhoitat tea mogacho Jehova valor korta mhunn amkam kollon ieta.

7. Apostl Paulu add prosn ubarloleank, tannem dilʼlea zobabantlean amkam kitem xikonk melltta?

⁷ Apostl Paulu add thoddeamnim prosn ubarle tednam tannem kitem mhunnttlem tachea vorvim hem sarkem dison ieta. Paulu ek urbebhorit mixinori zaun aslo ani tannem zaitea xaramnim sobha sthapon kelʼleo. Punn thoddea zannamnim to ek boro xikoupi nhoi oxem mhunnttlem tednam, tannem kitlea zannank Jezuche xis zaunk modot kelʼli tem sangchea bodlek tannem oxem mhunnttlem: “Odik koxtti zala mhozo vavr.” (2 Kor. 11:23) Tor Pauluchea hea utrantlean, ami thiraien Jehova pasot kortat tea kamacho to chodd valor korta mhunn amkam kollon ieta.

8. Ami porgottnne vixim kitem ugddas dovrunk zai?

⁸ Amchi porgottnni Jehovak manvota. Jezun aplea 70 xisank porgottunk dhaddle. Ani te “khuxalbhorit zaun” porot aile. Te kiteak khuxal zale? Tannim Jezuk mhunnttlem: “Saiba, Tujea nanvan devchar porian amkam khalte zale.” Punn Jezun tanchem chintop nittaier haddun tankam sanglem: “Devchar tumkam khalte zatat mhonn khuxi zaunche bhaxek, tumchim nanvam sorgar boroilʼlim asat mhonn khuxal zaiat.” (Lukas 10:17-20) Tor lok tanchem aikotat tednam tachea xisank khuxalkai mellttali ti khori. Punn aplea xisank porgottnnent sodanch bore onubhov mellche nant mhunn Jezu zannam aslo. Khorem mhunnttlear, tea disa xisanchem aikolʼlem tantuntle kitle zann Jezuche xis zale tem amkam khobor na. Punn Jezu tankam hem sangonk sodhtalo ki tanchea vavracho Jehova valor korta hem zannam zaun ghevop odik khuxalkai haddtta.

9. Galasiekarank 6:7-9-a pormonnem, ami soddun dinastana porgottnnechem kam korit ravlear amkam kitem mellttolem?

⁹ Porgottnnechem kam korit ravlear amkam sasnachem jivit mellttolem. Ami zata titlea bore toren Devachem utor porgottʼttat ani xikoitat tednam ami ‘atmeant vomptat.’ (Gal. 6:8, Povitr Pustok – Novo Korar) Hacho orth, ami amchea jivitant Devache povitr xoktek kam korunk ditat. Amcho Bible videarthi bautizm gheum vo na gheum, ami ‘thoko-nastana borem tem kortat’ vo ‘borem korchem soddun dinant’ zalear, Jehova amkam sasnachem jivit ditoloch mhunn to amkam utor dita.—Galasiekarank 6:7-9 vachat.

10. Lok Devachea Utrak kan ditat vo na tem kiteacher adarit asa?

¹⁰ Lok sot manun ghetat vo na tem chodd korun tanchem kalliz koxem asa tacher adarit asa. Hem somzaunk Jezun eka vompʼpiachi vopar dili. Tantunt to vompʼpi, veg-vegllea torechea zomnir bim vompta. Punn jem bim borea zomnir poddtta tench kirlota, vaddtta ani pik dita. (Lukas 8:5-8) Teach bhaxen, ami ‘Devachea utranchem’ bim veg-vegllea torechea zomnir vompunk puro, mhunnche veg-vegllea lokank porgottunk puro. Punn jim borea kallzachim asat tinch tem sot manun ghetolim. (Lukas 8:11-15) Punn ami hem porgottnnechem kam korit ravop amchi zobabdari zaun asa. Karonn apostl Paulun sanglolem toxem, ami zoddlolem pik vo follam pormonnem nhoi, punn amchea ‘zonn-ekleachea kamam pormonnem amkam mozuri mellttoli.’—1 Kor. 3:8.

11. Lokamnim Noahchem aikonk na zalear pasun tannem apli porgottnni bore toren keli oxem Jehovak kiteak dislem? (Masikachem fuddlem chitr polloiat.)

¹¹ Jehovachea adlea visvaxi sevokam vixim ami zannam zalim zalear, tim porgottnni kortalim tednam zaitea lokamnim tanchem aikon gheunk na mhunn amkam kollon ieta. Ek udharonn mhunnttlear, Noahchem. To ‘Devak manta toslea jivitacho porgottnnar’ aslo. (2 Ped. 2:5) Ani tannem sumar 40 tim 50 vorsam, Devachea Rajea vixim dusreank sanglem. Lok ghoddie aplem aikon ghetolo oxem taka distalem. Punn  Jehovan taka oxem kainch sangonk na. Jehovan taka arkpett bandunk laili tednam taka oxem sanglem: “Tum ani tuji potin, tuje put ani tancheo potini hea tarvant bhitor rigat.” (Ut. 6:18) Tea bhair, tea arkpettichi lambai ani rundai kitli asonk zai tem Jehovan taka sanglem tednam, choddso lok tachem aikon gheuncho na mhunn taka kollon ailem astolem. Karonn taka bandunk lailolea arkpettint, itlea lokank ravonk zago naslo. (Ut. 6:15) Ani toxench zalem! Jehovan buddtti haddum porian, Noahchea kallar jietolea eklea munxan pasun tachem aikonk na. (Ut. 7:7) Punn haka lagon, Noahn bore toren porgottnni korunk na oxem Jehovak dislem kai? Na! Jehovache nodren, Noahn apli porgottnni ekdom bore toren keli karonn Jehovan sanglolem tem soglem tannem visvaxiponnan pallʼllem.—Ut. 6:22.

12. Jeremias provadiak virodh soscho poddlo tori astana to khuxalkaien apli porgottnni kiteak korunk pavlo?

¹² Dusrem udharonn mhunnttlear, provadi Jeremiasachem. Tannem 40-a poros chodd vorsam porgottnni keli tednam lokamnim tachem aikonk na ani tacho virodh kelo. Taka “okman ani kenddnnio” soscheo poddleo. (Jer. 20:8, 9) Tori astana, tannem niraxi zaun soddun diunk na. Kiteak? Tannem don vixoi-ancher dhean dilem. Ek mhunnttlear, to porgottʼttalo to sondex lokank “bhorvanxean bhorlolo boro fuddar” diunk xoktalo. (Jer. 29:11) Ani dusrem, tem kam korunk Jehovan taka vinchun kaddlolo. (Jer. 15:16) Teach bhaxen, ami porgottʼttat to sondex lokank bhorvonso dita ani Jehova vixim sakx diunk tannem amkam vinchun kaddleant, hacher ami dhean ditat tednam lok amchem aikom vo na aikom, ami niraxi zainastana khuxalkaien porgottit ravonk pavtolim.

13. Marku 4:26-29-ant, Jezun dilʼlea voparintlean ami kitem xikonk zata?

¹³ Aplo bhavarth ghott korunk eka munxak zaito vell lagta. Hem somzonk, Jezun dilʼlea vaddttea bim-achea vopare vixim ami pollounk zata. To vompʼpi aplea xetant bim vompta ani ratchea vellar to nhidlolo astana tem bim sovkas-sovkas vaddtta. (Marku 4:26-29 vachat.) Teach bhaxen, amchea Bible videartheank tim xiktat tem apnnaunk vo aplo bhavarth ghott korunk zaito vell lagonk puro. Ani hea vixim ami kainch korunk xokonant. Tor amchim Bible videarthi, amkam zai titlea begin vaddavoll korinant zalear pasun ami niraxi zainastana vo soddun dinastana tea vompʼpia bhaxen pasiens dakhounchi goroz asa.—Jak. 5:7, 8.

14. Ami kitem porgottʼttat taka kan diunk lokank zaito vell lagonk xokta hem somzaunk ek udharonn diat.

¹⁴ Thoddea vattaramnim, zaito temp porian porgottnni kelear pasun lok sot apnnaunk toiar asonant. Amkam Gladys and Ruby Allen, hea don bhoinninchem udharonn asa. 1959 vorsa, tankam Canada desantlea Quebec xarant, niemit pioneer seva korunk dhaddlim. * Punn thoim konnuch tanchem aikonk toiar naslo, karonn tankam tanchea padrinchi ani xezarianchi bhirant asli. Bhoinn Gladys sangta: “Ami don vorsam porian, dor disak, att voram ghor-ghoramnim porgottnni kortalim. Tori punn konnuch amchem aikonk toiar naslim. Ami aileant tem polloun tim daruch ugoddnaslim. Punn ami soddun diunk na.” Sovkas-sovkas lok amchea lagim ulounk laglo ani amchem aikonk laglo. Ani atam tea xarant tin sobha asat.—Iz. 60:22.

15. 1 Korintkarank 3:6, 7-antlean, xis korchea kama vixim amkam kitem xikonk melltta?

¹⁵ Ekleak xis korunk zaitea zannancho vavr mellon asa. Tor sobhent aslolim dor ek bhav vo bhoinn eka munxak bautizm gheunk modot korunk xokta. (1 Korintkarank 3:6, 7 vachat.) Hem somzonk ami ek udharonn polloum-ia. Ek porgottnnar eka aiknnareak ek trektt vo ek masik dita. Punn to tea aiknnareak porot bhett korunk pavcho na dekhun to anik eka porgottnnarak taka porot bhett korunk laita.  To bhav tea aiknnareak porot bhett korta ani tachea sangata Bible obheas suru korta. Ani hea Bible obheasak to sobhentlea veg-vegllea bhav-bhoinnank apoita. Tea Bible obheasak ailolo dor ek bhav vo bhoinn, tea Bible videartheak veg-vegllea toren urba dita. Hea toren, tim soglim videartheachea kallzant roilolem sotachem bim ximpunk modot kortat. Ani oxe toren, Jezun sanglolem toxem, vompʼpi ani lunvpi, mhunnche tea videartheak bautizm gheunk modot kelolim dor ek bhav vo bhoinn khub khuxal zatat.—Juanv 4:35-38.

16. Tumi poilim bhaxen porgottnni korunk xokonant zalear pasun tumi kiteak khuxal zaunk zata?

¹⁶ Tumchi bholaiki bigoddlea vo tumi rokddinch thoktat dekhun tumi ghoddie poilim bhaxen porgottnni korunk xokonant astolim. Tori punn, tumi porgottnni korunk jem kitem kortat tea pasot tumi khuxal zaunk xoktat. Hem ami kiteak mhunnonk zata? Hea vixim amkam Raza Davidachem udharonn asa. Amalekitkar tanchea familink koidi korun gheun gele tednam Raza David ani tache munis tanchea add zhuzonk gele. Tea vellar, Davidachea munxam modle donxim zann thoklole dekhun te heram sangata zhuzak vochonk nant. Punn David ani tache munis zhuz jikhon porot aile tednam tankam mellʼllolo lutticho mhal, sogleank, mhunnche zhuzant bhag gheunk na tankam pasun diuncho mhunn tannem sanglem. (1 Sam. 30:21-25) Tor hantuntlean amkam kitem xikonk melltta? Eklo munis pasun xis zata tednam ami sogleamnim tea khuxalkaient vantto gheunk zata.

17. Ami Jehovak upkari kiteak asonk zai?

¹⁷ Amchea porgottnechea kamant lok amchem aikon Jehovachi seva korunk lagtolo vo na, hem amchea hatant na mhunn Jehova bore bhaxen zannam. Punn ami tacho kitlo mog kortat ani hem kam korunk ami kitlo vavr kortat tem Jehova polloita ani to amkam inam dita. Toxench, hea kamant amchean zata titlem korun, ami koxem khuxal ravonk zata tem to amkam xikoita. (Juanv 14:12) Jehova hea toren amchem kam lekhta mhunn ami tache khub upkari! Tor ami soddun dinastana hem kam korit ravtat tednam Jehova khub khuxal zata mhunn ami khatri dovrum-ia.