1. ¿Mbaʼérepa ñande javyʼaite ha jahecha peteĩ priviléhioramo haʼe haguére testígo de Jehová?

¡ÑANDE ningo javyʼaiterei haʼe haguére testígo de Jehová! Upéva ningo peteĩ priviléhio ñandéve g̃uarã. Ñande jagueraha Jehová réra ha jahechauka haʼeha Itestígo japredika ha ñamboʼe jave umi héntepe oikuaa hag̃ua chupe. ¡Ha ajépa javyʼaite ñaipytyvõ jave peteĩ ‘ipyʼaporãvape ohupyty hag̃ua jeikove opaveʼỹva’! (Hech. 13:48). Ñañeñandu voi Jesús oñeñandu haguéicha. Haʼe ovyʼaiterei vaʼekue idisipulokuéra omombeʼúrõ guare chupe umi mbaʼe porãite ohasa vaʼekue hikuái predikasiónpe (Luc. 10:1, 17, 21).

2. ¿Mbaʼéichapa ikatu jahechauka pe predikasión iñimportantetereiha ñandéve g̃uarã?

² Pe predikasión ningo iñimportanteterei ñandéve g̃uarã. Apóstol Pablo heʼi vaʼekue Timotéope: “Siémprekena eñatende reiko lájare ha remboʼe lájare”. Ha heʼi chupe mbaʼérepa: “Pórke rejapóramo péicha rejesalváta nde ha avei umi nerendúva” (1 Tim. 4:16). Upéicharõ, umi hénte rekove odepende hína pe predikasiónre. Ñande siémpre ‘ñañatende porã jaiko lájare’ ñaime rupi Ñandejára Rréino poguýpe. Upévare siémpre jajapose umi mbaʼe omombaʼeguasútava Jehovápe, ha ohechaukáva ñamombaʼeha umi notísia porã japredikáva (Filip. 1:27). Avei ‘ñañatende ñamboʼe lájare’ jajeprepara porã jave japredika hag̃ua, ha jajerure jave Jehovápe tañanepytyvõ predikasiónpe.

3. ¿Mbaʼéichapa umi hénte orreaksiona jepi oñeñeʼẽ jave chupekuéra umi notísia porãre? Emombeʼu peteĩ ehémplo.

³ Péro sapyʼánte ñañehaʼãvéramo jepe, umi hénte oĩva ñande territóriope noñeinteresaguasúi umi notísia porãre. Ha oĩ umi ndoikuaaséiva voi mbaʼeve. Ñapensamíntena ermáno Georg Lindal rehe. Haʼe ningo haʼeñoite opredika vaʼekue Islandia tuichakuére 1929 guive 1947 peve. Haʼe okolokáramo jepe hetaiterei puvlikasión, ni peteĩ persónagui ndoikói Testígo. Haʼe omombeʼu vaʼekue: “Oĩ umi persóna odesidíma vaʼekue oñemoĩtaha la verdáre. Péro la majoríape ndoúi ni ndohói umi notísia porã”. Upe rire og̃uahẽ upe paíspe heta misionéro oho vaʼekue Eskuéla de Galaádpe, péro la hénte lomímonte nohenduséi chupekuéra. Upéi 9 áño haguépe,  hasypeve oĩ umi persóna oñemeʼẽva Jehovápe ha ojevautisa. *

4. ¿Mbaʼéichapa ñañeñandu jepi umi hénte nohenduséi jave umi notísia porã?

⁴ Ñande ningo ñañeñandu vai jepi umi hénte nohenduséi jave umi notísia porã japredikáva chupekuéra. Ikatu voi ñañeñandu Pablo oñeñandu haguéicha. Haʼe heʼi vaʼekue ‘oñembyasyetereiha ha tódo el tiémpo ojopyha chupe ikorasõ’, pórke la majoría umi judío ndogueroviaséi vaʼekue Jesús haʼeha pe Mesías (Rom. 9:1-3). Ikatu oime ñande jastudia hína la Biblia peteĩ persónandi, ñañehaʼãmbaite ñamboʼe porã chupe ha heta ñañemboʼe hese. Péro haʼe lomímonte ndojapói umi mbaʼe oaprendéva, ha jahejámante vaʼerã chupe. Térã ikatu oime núnka nañaipytyvõiva peteĩ persónape oprogresa ha ojevautisa hag̃ua. ¿Ñañeñandu vaʼerãpa kulpávle upe haguére, ha ñapensa Jehová ndoguerohoryiha umi mbaʼe jajapóva predikasiónpe? Ko artíkulope ñambohováita koʼã mokõi porandu: 1) ¿Mbaʼépa ohechauka jajapo porãha hína ñane rembiapo predikasiónpe? 2) ¿Mbaʼépa jareko vaʼerã enkuénta ani hag̃ua ñañentrega?

5. ¿Mbaʼérepa umi mbaʼe jajapóva Jehovápe g̃uarã nosẽi jepi ñande jaipotahaichaite?

⁵ La Biblia heʼi peteĩ persóna ojapóramo Ñandejára volunta ‘opa mbaʼe osẽ porãtaha chupe’ (Sal. 1:3). Péro upéva ndeʼiséi opa mbaʼe jajapóva Jehovápe g̃uarã osẽtaha ñande jaipotahaichaite. ¿Mbaʼérepa? Pórke ñande ñaneimperfékto ha umi oĩva ñande jerére iñimperféktonte avei. Upéicha rupi ñande rekove “henyhẽte provlémagui” (Job 14:1). Avei oĩ umi oñemoĩva ñanderehe, ha sapyʼánte ikatu voi ojoko hikuái pe predikasión, ha upévare ndaikatuvéi jajapo ñane rembiapo ñandéve ñandegustaháicha (1 Cor. 16:9; 1 Tes. 2:18). ¿Mbaʼépa upéicharõ Jehová oreko enkuénta heʼi hag̃ua ñakumpli porãha hína la ñane rembiapo? Jahechamína unos kuánto konsého bíblico ñanepytyvõtava ñambohovái hag̃ua ko pregúnta.

6. ¿Mbaʼépa Jehová oreko enkuénta heʼi hag̃ua jajapo porãha hína ñane rembiapo predikasiónpe?

⁶ Jehová ohecha mbaʼeichaitépa ñañehaʼã ha nañañentregaiha. Ñande ñañehaʼãmbaitéramo predikasiónpe ha jajapóramo upéva mborayhúpe, Jehovápe g̃uarã ñande jajapo porã hína ñane rembiapo, umi hénte nañanerenduséiramo jepe. Pablo oskrivi vaʼekue: “Ñandejára ningo ihústo hína ha ndahesaraimoʼãi umi mbaʼe pejapo vaʼekuégui ha mbaʼéichapa pehayhu héra. Peẽ pehechauka koʼã mbaʼe pesegívo peservi umi ermánope, yma guive koʼág̃a peve” (Heb. 6:10). Ndajarekóiramo jepe rresultádo porã predikasiónpe, Jehová lomímonte imanduʼa umi mbaʼe jajapo vaʼekuére ha mbaʼéichapa jahayhu chupe. Upévare ikatu jaʼe oñekumpliha avei ñanderehe umi mbaʼe Pablo heʼi vaʼekue umi coríntiope: ‘Umi mbaʼe pejapóva ñande Ruvicha servísiope ndopytareimoʼãi’ (1 Cor. 15:58). Ha upéva ningo upeichaite hína, umi mbaʼe jajapóva predikasiónpe nosẽiramo jepe ñande jaipota hagueichaite.

7. ¿Mbaʼépa heʼi vaʼekue apóstol Pablo ipredikasiónre, ha mbaʼépa ñanemboʼe upéva?

 ⁷ Apóstol Pablo ningo haʼe vaʼekue peteĩ misionéro ivaletereíva, ha omoñepyrũ vaʼekue heta kongregasión hetaiterei siudápe. Péro oĩrõ guare hénte oñeʼẽ vaíva hese ha heʼi haʼe nomboʼekuaaiha, Pablo ndoikói omombeʼu mboy persónapepa oipytyvõ oiko hag̃ua chugui kristiáno. Upéva rangue, haʼe heʼi: “Hetave ambaʼapo” (2 Cor. 11:23). Pábloicha avei ñanemanduʼa vaʼerã Jehovápe g̃uarã iñimportanteveha mbaʼeichaitépa ñañehaʼã predikasiónpe ha nañañentregaiha.

8. ¿Mbaʼe rehepa ñanemanduʼa vaʼerã japredika jave?

⁸ Ñane predikasión ombovyʼa Jehovápe. Peteĩ vuéltape, Jesús omondo vaʼekue 70 idisípulope opredika hag̃ua umi notísia porã oñeʼẽva Ñandejára Rréinore. Omohuʼã rire ipredikasión haʼekuéra “vyʼápe ou”. ¿Mbaʼérepa ovyʼaite raʼe hikuái? Haʼekuéra heʼi Jesúspe: “Roipurúvo nde réra, umi demónio jepe oñemoĩ ore poguýpe”. Péro Jesús oipytyvõ chupekuéra okambia hag̃ua opensa lája heʼívo: “Ani pevyʼa umi demónio opyta haguére pende poguýpe, síno pevyʼa vaʼerã Ñandejára oskrivi haguére pende réra yvágape” (Luc. 10:17-20). Jesús oikuaa vaʼekue idisipulokuéra ndahaʼemoʼãiha ku siémpre orekótava koʼãichagua experiénsia ndaijojaháiva predikasiónpe. Añetehápe oĩramo jepe heta ohendu porãva umi disípulope, amo ipahápe ndajaikuaái umíva apytégui mboy persónaguipa oiko raʼe kristiáno. Upévare umi disípulo tekotevẽ kuri ontende haʼekuéra ovyʼa vaʼerãha, ndahaʼéi umi hénte ohendu porã haguérente chupekuéra, síno oikuaágui ombovyʼaha Jehovápe ombaʼapo jejopy haguére predikasiónpe.

9. Ohechaukaháicha Gálatas 6:7-9, ¿mbaʼépa jahupytýta nañañentregáiramo ha jasegíramo japredika?

⁹ Jasegíramo japredika jahupytýta vída etérna. Ñande ñañehaʼãmbaite jave japredika ha ñamboʼe umi notísia porã, ñañotỹ hína ‘jaiko hag̃ua pe espíritu sánto oipotaháicha’. Upéva heʼise japredika jave jahechaukaha hína jaipotaha ñandegia pe espíritu sánto. Ñande nañañentregáiramo térã “nañanekaneʼõiramo” ha jasegi japredika, Jehová oasegura omeʼẽtaha ñandéve vída etérna, nañaipytyvõiramo jepe ni peteĩ persónape oiko hag̃ua chugui Testígo (elee Gálatas 6:7-9).

10. ¿Mbaʼe rehepa odepende hína umi hénte ñanerendu porã hag̃ua?

¹⁰ Umi hénte ñanerendu porã hag̃ua nodependéi ñanderehénte, síno odepende ikorasõre. Jesús omyesakã vaʼekue upéva omombeʼúrõ guare pe ehémplo oñeʼẽva pe agrikultór rehe. Upe istóriape peteĩ agrikultór oñotỹ vaʼekue semílla diferénte kláse yvýpe, péro umi semílla hoʼa vaʼekue pe yvy porãmente la osẽ porãva ha hiʼa (Luc. 8:5-8). Jesús heʼi vaʼekue umi diferénte kláse yvy orrepresentaha umi hénte korasõ, pórke káda uno idiferénte la orreaksiona lája ohendu jave “Ñandejára ñeʼẽ” (Luc. 8:11-15). Pe agrikultórcha avei, nodependéi hína ñanderehénte pe semílla okakuaa hag̃ua umi hénte korasõme, síno odependéma hesekuéra ha pe oĩvare ikorasõme. Ñande traváho hína ñañotỹ pe semílla ha jaikuaauka pe mensáhe oñeʼẽva Ñandejára Rréinore. Heʼi haguéicha apóstol Pablo: “Káda únope ojepagáta hembiapokuére”, ha ndahaʼéi asegún pe rresultádo jarekóva (1 Cor. 3:8).

11. ¿Mbaʼérepa Jehová opensa vaʼekue Noé ojapo porã hague hembiapo, umi hénte nopenáiramo jepe hese? (Ehecha pe taʼanga oĩva ko rrevísta apére).

¹¹ Ymaite guive oĩ vaʼekue umi hénte nohenduséiva Jehová siervokuérape opredika jave chupekuéra. Por ehémplo, Noé hetaiterei áñore “opredika vaʼekue umi mbaʼe ihústova” (2 Ped. 2:5). Haʼe ningo katuete oipotaitereíne raʼe umi hénte ohendu porã chupe, péro Jehová ndeʼíri vaʼekue upéva oikotaha. Upéva rangue haʼe omandárõ guare Noépe ojapo hag̃ua pe árka, heʼi chupe: “Reike vaʼerã pe árkape, nde, ne rembireko, nde raʼykuéra ha hembirekokuéra reheve” (Gén. 6:18). Avei Jehová heʼírõ guare chupe  mbaʼe medídapa oreko vaʼerã pe árka, Noé oiméne opilláma rakaʼe ndahetamoʼãiha umi hénte ohendúva chupe (Gén. 6:15). Ha jaikuaaháicha ni peteĩ persóna nopenái vaʼekue Noére (Gén. 7:7). ¿Opensa piko rakaʼe Jehová Noé ndojapoporãi hague hembiapo predikasiónpe? ¡Ni mbaʼevéicharõ! Ñandejára oguerohory vaʼekue Noépe, pórke haʼe ifiél ha ojapo opa mbaʼe heʼi hagueichaite chupe (Gén. 6:22).

12. ¿Mbaʼépa oipytyvõ vaʼekue proféta Jeremíaspe osegi hag̃ua opredika vyʼápe?

¹² Proféta Jeremías ningo ohasa vaʼekue avei peichagua situasión. Umi hénte itiempopegua nohenduséi vaʼekue chupe ha oñemoĩ voi hese. Upéicharõ jepe, haʼe lomímonte opredika vaʼekue mas de 40 áño. Jeremíaspe odesanimaiterei vaʼekue umi hénte ‘otrata vai haguére chupe ha oñembohory haguére hese’. Upéicha rupi, haimete oñentrega ha oheja iñasignasión (Jer. 20:8, 9). ¡Péro Jeremías noñentregái! ¿Mbaʼépa oipytyvõ raʼe chupe osegi hag̃ua opredika vyʼápe? Haʼe oñekonsentra mokõi mbaʼe iñimportantetereívare. Primero, pe mensáhe haʼe ogueraháva oipytyvõta kuri umi héntepe oikuaa hag̃ua ohaʼarõha chupekuéra heta mbaʼe porã, ha avei omeʼẽta chupekuéra esperánsa (Jer. 29:11). Segundo, Jehová oiporavo vaʼekue Jeremíaspe ogueraha hag̃ua héra (Jer. 15:16). Ñande avei japredika peteĩ mensáhe omeʼẽva esperánsa umi héntepe, ha jagueraha avei Jehová réra haʼe rupi Itestígo. Ñañekonsentráramo koʼã mokõi mbaʼe iñimportantetévare, ñande avei javyʼáta umi hénte nañanerenduséiramo jepe.

13. ¿Mbaʼépa ñanemboʼe pe ehémplo Jesús omombeʼu vaʼekue Marcos 4:26-29-pe?

¹³ Umi hénte oikotevẽnte voi tiémpo oprogresa hag̃ua. Jesús omboʼe vaʼekue upéva omoĩrõ guare pe ehémplo oñeʼẽva pe kuimbaʼe oñemitỹvare ha upe rire ohóvare oke (elee Marcos 4:26-29). Pe kuimbaʼe oñotỹ rire umi semílla, umíva okakuaa mbeguekatu ha haʼe ndaikatúi ombyapura umi kóga okakuaa pyaʼeve hag̃ua. Upéicha avei, ñande sapyʼánte ñahaʼarõ vaʼerã heta tiémpo jahecha hag̃ua ñane estudiánte ojapo umi mbaʼe oaprendéva. Pe kuimbaʼe oñemitỹva ningo ndaikatúi ombyapura umi kóga raʼýpe okakuaa hag̃ua haʼe oipotaháicha. Ha upéicha avei, ñande ndaikatúi ñambyapura ñane estudiantekuérape oprogresa hag̃ua ñande jaipotaháicha. Upévare, aníkena ñañedesanima ni ñañentrega oiméramo ñane estudiánte mbegueterei oprogresa. Peteĩ agrikultórcha ñande ñanepasiénsia vaʼerã jajapo jave disípulo (Sant. 5:7, 8).

14. ¿Mbaʼe ehémplopa ohechauka ikatuha ohasa heta tiémpo umi hénte oñepyrũ meve ñanerendu porã?

¹⁴ Oĩ umi lugár ojepredikaha heta tiémpore, péro upéi ae umi hénte oñepyrũ oñeinteresa pe mensáhere. Ñapensamíntena la ohasa vaʼekuére Gladys ha Ruby Allen. Haʼekuéra ningo oñoermána ha 1959-pe oñeasigna vaʼekue chupekuéra de prekursóra rregulár peteĩ siudaʼípe opytáva Quebec, Canadápe. * Upépe umi hénte noñeʼẽséi vaʼekue umi Testígondi okyhyjégui ivesinokuéragui ha umi paʼígui. Gladys imanduʼa: “Ore ningo ropredika vaʼekue ogahárupi 8 óra al día 2 áño pukukuére, ha avavete naorerenduséi vaʼekue. Rog̃uahẽ jave peteĩ ógape umi hénte orerecha pe ventána guive, ha ojere ohopa hese hikuái. Péro ore noroñentregái”. Upéi umi hénte okambia ohóvo mbeguekatúpe. Haʼekuéra oñepyrũ horyve ha ohendu porãvéma ojepredika jave chupekuéra. Ha koʼág̃a g̃uarã oĩma mbohapy kongregasión upe siudápe (Is. 60:22).

15. ¿Mbaʼépa ñanemboʼe 1 Corintios 3:6, 7?

¹⁵ Ñande ñambaʼapo en ekípo jajapo hag̃ua disípulo. Ñambaʼapóramo oñondivepa kongregasiónpe, ikatu hína ñaipytyvõ peteĩ persónape oprogresa ha ojevautisa hag̃ua (elee 1 Corintios 3:6, 7). Por ehémplo, peteĩ ermáno ikatu ontrega peteĩ folléto térã rrevísta peteĩ persóna ohendu porã vaʼekuépe. Upéi pe ermáno ohechakuaa naitiempomoʼãiha ojapo hag̃ua pe  rrevisíta, ha ojerure ótro ermánope ojapo hag̃ua upéva. Ko ermáno oñepyrũ ostudia pe persóna ohendu porã vaʼekuéndi. Upéi haʼe oinvita diferénte ermáno ha ermánape omoirũ hag̃ua chupe ijestúdiope, ha káda uno omokyreʼỹ pe estudiántepe heta hendáicha. Káda ermáno ha ermána haʼe oikuaáva oipytyvõta chupe ojeroviave hag̃ua Jehováre. Upéicha rupi enterove umi oipytyvõ vaʼekue pe persónape ikatu ovyʼa haʼe ojevautisa jave (Juan 4:35-38).

16. Ndaikatúiramo jepe japredika ha ñamboʼe umi notísia porã ñandéve ñandegustahaichaite, ¿mbaʼérepa lomímonte ikatu javyʼa?

¹⁶ ¿Péro mbaʼéichapa reñeñandu vaʼerã ndaikatuvéiramo epredika ha emboʼe umi notísia porã anteve guaréicha, tahaʼe nderasykatu térã ndeedáma rupi? Nde ningo lomímonte evyʼakuaa upe ikatúvare ejapo. Jahechamína rréi David ha isoldadokuéra ehémplo. Peteĩ vuéltape, umi amalequita ou vaʼekue osakea chupekuéra ha oguerahapa hembireko ha ifamiliakuéra mimi jepe. Péro David ha isoldadokuéra ohórõ guare orrekupera entéro mbaʼe ojepeʼa vaʼekue chuguikuéra, 200 kuimbaʼe ikaneʼõitereíma kuri ha opytánte oñatende la ikosakuérare. Ogana rire umi amalequítape, David ha isoldadokuéra oipeʼa chuguikuéra heta mbaʼe iporãva. Péro David omanda umi soldádo oho vaʼekue oñorairõ ha umi opyta vaʼekue, ojorreparti vaʼerãha koʼã mbaʼe peteĩchapaite (1 Sam. 30:21-25). Upeichaite avei oiko jajapo jave disípulo. Enterove jajapo hína opa ikatúva ñakumpli porã hag̃ua ko tembiapo, upévare ikatu javyʼa oñondivepa peteĩ persóna oikuaa jave Jehovápe ha ojevautisa.

17. ¿Mbaʼérepa jaagradese vaʼerã Jehovápe?

¹⁷ Jehová ningo omombaʼeterei entéro mbaʼe jajapóva iservísiope ha siémpre ñandetrata mborayhúpe, upévare jaagradeseterei chupe. Haʼe oikuaa ñande ndaikatuiha jaovliga umi héntepe ñanerendu hag̃ua ni oñepyrũ hag̃ua oservi chupe. Upéicharõ jepe, haʼe ohecha mbaʼeichaitépa ñañehaʼã, jajapoha ñane rembiapo jahayhúgui chupe, ha ñanepremia upévare. Haʼe ñanemboʼe avei mbaʼépa ikatu jajapo javyʼa hag̃ua predikasiónpe, tahaʼe haʼéva pe ikatúva jajapo (Juan 14:12). Upévare ikatu ñaime segúro Jehová katuete ñandeguerohorytaha ñande nañañentregáiramo.