1. ¿Ñobätä kätä juto nibätä aune ja ruin kwin nun testiko Jehovakwe ie?

¡NI TESTIKO Jehovakwe ye käi juto nibätä aune ütiäte ni kräke! Nita kukwe driere aune Jehová yebätä blite ni madabe ngwane, nita Jehová ye kä ngwen jabätä aune ni testiko kwe ye nita bämike. Nire nire tö nünanbätä kärekäre ye nita dimike ne kwe rabadre Ngöbö mike täte ye käita nemen juto nibätä (Hech. 13:48, TNM). Nitre ja tötikaka Jesukwe janamane kukwe driere aune kukwe meden kwin namani bare ye niebare kwetre Jesús ie ngwane, “Ngöbö Üai Deme namani täte Jesubtä, köböire kä namani nuäre kri btä” ye erere jata nemen ruin nie (Luc. 10:1, 17, 21).

2. ¿Kukwe drieta nikwe ye ütiäte ni kräke ye nita bämike ño?

² Kukwe drie ye ütiäte ni kräke arato. Apóstol Pablo käkwe mäträbare krörö Timoteobätä: “Mata nüne ño, yebtä makwe töbika kuin ja käne amne, kukwe diri makwe”. Aune niebare kwe: “Ni kwati ma kukwei nuaka abko Ngöbökwe dianditari siba mabe gwaire” (1 Tim. 4:16). Ni raba nitre kwati dimike nemente nire ye mikata gare kukwe nebiti. Nita ja ngwen ño ye ni tö ngibiarebiti käre ñobätä ñan aune nita nekete gobran Ngöbökwe yekri yebätä. Nita ja ngwen ño yebiti käre ni tö Jehová mikabätä ütiäte jai aune kukwe drieta nikwe ye era ni kräke ye ni tö bämikai (Filip. 1:27). Nita ja ükete kwin kukwe driekäre aune blitakäre Jehovabätä ni madabe, yekäre nita ja di kärere Jehovai yebiti nita töbiketari kwin ja käne kukwe drieta nikwe yebätä ye nita bämike.

3. ¿Nitre raba ja töi mike ño kukwe gobran Ngöbökwe drieta nikwe ye kräke aune kukwe meden tä bämike?

³ Nita ja di ngwen kukwe driekäre akwa kukwe kwin gobran Ngöbökwe drieta nikwe ye nitre ñan tä töibikaire o ñaka töibikaire jire ruäre ngwane. Ja mräkä Georg Lindal, käkwe kukwe driebare kä 1929 nemen 1947 juta Islandia yekänti, yebätä ani töbike. Täräkwata kabre krubäte tuanimetre kwe nitre kisete akwa ni iti ñaka käkwe ja mikani testiko. Tikabare kwe: “Nitre ruäre käkwe ja mikani kukwe metre rüere, akwa nitre kwati krubäte ñan tä kukwe kwin gobran Ngöbökwe ye töbikaire jire”. Ye bitikäre nitre misionero graduabare Galaad nükani kukwe driekäre juta yekänti, akwa nitre ñan nämene kukwe drieta ye kain ngäbiti jire. Kä nikani  kwä ökän ta ye bitikäre, nitre ruäre käkwe ja dianinkä mento Jehová kräke aune ja ngökani ñöte. *

4. ¿Nitre ñan tä ni kukwe kain ngäbiti ngwane ja raba nemen ruin ño nie?

⁴ Kukwe drieta nikwe ye nitre ñan tä kain ngäbiti ngwane ja raba nemen ruin ulire nie. Nitre Judío käkwe ñaka Jesús kani ngäbiti Mesías käbämikani erere ye ngwane, ja namani ruin ño Pablo ie ye erere ja raba nemen ruin nie arato, niebare kwe: “Tita ulire krubäte aune käre ti brukwä tä tare tie” (Rom. 9:1-3, TNM). Mä tärä ja di ngwen aune orare krubäte ni tötikakäre Bibliabätä, ¿mrä mada mä ñaka tä tötike jankunu Bibliabätä ben? ¿Mä ngämi ni iti dimike ja ngökö ñöte? ¿Ja rabadre ruin ngite mäi aune Jehová ñaka kukwe kwin mike nemen bare mä kräke kukwe driebätä rabadre ruin jabätä mäi? Kukwe ketebu ngwantarita mikai gare jai kukwe ja tötikara nekänti: ¿Kukwe kwin tä nemen bare ni kräke kukwe driebätä ye ñobätä gare nie? ¿Aune nita kukwe driere ngwane dre tädre gare metre nie?

5. ¿Nita dre nuainne Jehová kräke ye ñobätä ñaka tä nemen bare ni tö ie ye erere?

⁵ Nitre tä Ngöbö töi nuainne yebätä Biblia tä blite ngwane tä niere: “Jondron jökrä nuaindi kwe ye rabai bare kwin ie” (Sal. 1:3). Nita kukwe jökrä nuainne Jehová kräke ye rabadre bare ño ie ni tö, ye erere rabai bare ye ñan ai gärätä kukwe nebiti. Ni töi ngite aune nitre mada töi ngite yebätä kukwe tare keta kabre tä nemen bare nibätä (Job 14:1). Ne madakäre, nitre ja mikaka ni rüere raba kukwe mike ni jiete ne kwe nikwe ñaka kukwe driere töi jämebiti raba ruin nie (1 Cor. 16:9; 1 Tes. 2:18). Ye medenbätä, ¿kukwe drieta nikwe ye tä nemen bare kwin ye ñokänti nüke gare Jehovai? Kukwe ja jie ngwankäre tä Bibliabätä ye ruäre käkwe ni dimikai kukwe ngwantarita ne mike gare jai ye ani mike ñärärä.

6. ¿Kukwe drieta nikwe ye tä nemen bare kwin ye ñokänti nüke gare Jehovai?

⁶ Nita ja di ngwen aune kä ngwen nüke jai ye Jehovata mike ñärärä. Nita kukwe driere ye nitre tä kain ngäbiti ño akwa yebiti ta ja tare yebiti aune sribi ye nuainta nikwe jötrö ngwarbe ngwane, kukwe drieta nikwe ye tä nemen bare kwin ye erere tuin Jehovai. Hebreos 6:10 yete Pablokwe tikabare: “Munkwe sribibare ja tarebiti Ngöbö kräke nitre deme dimikakäre aune mun täbe dimike ye niara ñaka käi kwitekä jabiti”. Nita ja di ngwen aune ja tare bämike aune kukwe ñaka kwin nemen bare, akwa yebiti ta Jehová ñaka kukwe ye käi kwitekä jabiti. Kukwe niebare Pablokwe nitre kristiano Corinto ie ye ni kräke arato, ye erere nikwe mikadre tuin jai: “Ñan munta sribire ngwarbe ni [Dänkien] kräke” (1 Cor. 15:58). Nita ja di ngwen aune kukwe kwin ñaka nemen bare ni tö ie erere, akwa nikwe ñaka ja di ngwain ngwarbe.

7. ¿Kukwe niebare apóstol Pablokwe kukwe drie nämene kwebätä ye tä dre driere nie?

⁷ Apóstol Pablo sribibare kwin krubäte misionero erere aune juta keta kabre te konkrekasion ükaninte kwe. Nitre kristiano ruäre ie ja nämene  ruin bäri ütiäte Pablo kräke käkwe ñäkäbarebätä aune niara ñaka nämene dirire kwin niebarebätä ngwane, yebiti ta Pablokwe nitre nibe dimikanina ja ngökö ñöte yebätä ñan blitabare kwe, ñakare aune kukwe ne niebare kwe ja dokwäre “ti abko bäri sribikä” (2 Cor. 11:23). Nikwe ja ngwandre Pablo erere aune nita ja di ngwen bätä kä ngwen nüke jai ye bäri ütiäte Jehová kräke ye nikwe ngwandre törö jai.

8. ¿Kukwe drieta nikwe yebätä nikwe dre ngwandre törö jai?

⁸ Nita kukwe driere ye tuin kwin Jehovai. Bati Jesukwe nitre ja tötikaka 70 juani kukwe gobran Ngöbökwe yebätä driere nitre madai. Kukwe driebare ünä kwetre ye ngwane jatani nüketa mada ngwane kä nämene “nuäre krübäte btätre” nieta Bibliakwe. ¿Ñobätä kä nämene juto krubäte bätätre? Niaratre niebare: “Ma käbti üai käme nibi nun kukwei mike täte jökrä kore”. Akwa Jesukwe töi ükaninte kukwe nebiti: “Üai käme käta mun kukwei mike täte, ye munkwe ñan käi ngwian nuäre bäri jabtä, [...] mun käi nena tikani täräbtä kä käinbti, ye abko bäri käi ngwian nuäre jabtä munkwe” (Luc. 10:17-20). Kukwe drieta ngwane kukwe kwin ñaka rabai bare käre ye nämene gare Jesús ie. Ñodre, nitre käkwe nitre ja tötikaka kukwe nuabare ye nibe namani kukwebätä ye ñaka gare nie. Nitre käkwe nitre ja tötikaka kukwe nuabare ye ñan ai käkwe kä mikadre juto nitre ja tötikaka yebätä, ñakare aune nämänentre ja di ngwen kukwe driekäre ye nämene tuin kwin Jehovai ye käi ngwandre juto kwetre jabätä.

9. Gálatas 6:7-9 tä niere erere, ¿nikwe kukwe driei jankunu ngwane dre kwin rabai bare?

⁹ Nikwe kukwe drie jankunu ngwane ja nire kärekäre ye rabai nikwe. Nita ja di ngwen kukwe metre ye nökakäre aune sribikärebätä ngwane nita nura nökö töbikabätä kukwe ja üairebätä arato ñobätä ñan aune üai deme ye nita tuenmetre ja jie ngwen. Ni iti dimikadre nikwe ja ngökö ñöte ye ñan raba nemen bare nie, akwa nikwe ñaka ja di ngwain nekä ngwane Jehovakwe ja nire käre biandi nie ye käbämikata kwe nie (ñäkädre Gálatas 6:7-9 yebätä). *

10. ¿Dre ai köböire nitre raba ni kukwe kain ngäbiti o ñakare?

¹⁰ Dreta nitre brukwäte ye ererebätä tä kukwe kain ngäbiti. Ni nura nökaka yebätä Jesukwe kukwe bämikani, yebiti kukwe ye mikani gare kwe. Kukwe tanbare Jesukwe yete ni nura nökaka käkwe nura nökani dobo bätäkä ngwarbe te, akwa nura matani dobo kwin te ye aibe ngwä namani niebare kwe (Luc. 8:5-8). Dobo bätäkä ngwarbe ye abokän nitre brukwä bätäkä ngwarbe tä ja töi mike jene jene kukwe Ngöbökwe ka ngäbitikäre ye meden gäräbare Jesukwe (Luc. 8:11-15). Tä nemen bare ni nura nökaka yebätä erere, sribi nuainta nikwe ye ngwä rabadre kwin ye ñan tä nuaindre nie ñobätä ñan aune nitre ni kukwe nuaka ye brukwä ño ye ererebätä kukwe kwin raba nemen bare o kukwe kwin ñaka raba nemen bare. Gobran Ngöbökwe nurai ye nikwe driedre jankunu ye tä nuaindre nie. Apóstol Pablo kukwe niebare erere “ni itire itire käta sribire ño, ye erere Ngöbökwe ütiä biandi jene jene nie” aune kukwe meden tä nemen bare sribi nuainta nikwe ye ñan aibätä ütiä biandi nie (1 Cor. 3:8).

11. ¿Noé käkwe kukwe driebare kwin ni kukwe metre driekä erere ye ñobätä ni raba niere? (Üai kena täräkwatabätä ye mikadre ñärärä).

¹¹ Kukwe drieta ye nitre ñan tä kain ngäbiti ye ie nitre Jehová mikaka täte tärä kukwe driere mekerabe nükebe kä nengwane. Ñodre, Noé ni kukwe metre driekä käkwe kukwe driebare kä kwati krubäte te raba ruin nie (2 Ped. 2:5). Erametre nitre käkwe Noé kukwe nuai nämene ruin  ie, akwa ye erere rabai bare ye Jehovakwe ñaka niebare ie. Ñakare aune ru sribedre ño kwe yebätä Jehovakwe kukwe niebare ie ngwane, kukwe ne nuain mananbare kwe ie: “Aisete ma ngäbriänkätre, ma jüdekäntre btä meri makwe, ye abko näin mabe rute” (Gén. 6:18, JK). Arka sribedre nuäi näre ye Jehovakwe niebare Noé ie ngwane, nitre braibe krubäte käkwe kukwe nuai ye nükani gare Noé ie raba ruin nie (Gén. 6:15). Aune ye erere namani bare. Kukwe driebare kwe ye nitre ñaka jire iti käkwe kukwe nuabare (Gén. 7:7). ¿Noé ñaka sribibare kwin nütübare Jehovakwe? Ñakare, ye ñan ai niebare kwe. Noé käkwe sribibare kwin krubäte namani tuin ie ñobätä ñan aune dre nuain mananbare kwe Noé ie, ye erere nuainbare kwe yebätä (Gén. 6:22).

12. Nitre käkwe ja mikani Jeremías rüere aune ñan niara kukwe töbikaibare, ¿akwa dre nuainbare kwe kukwe drie ye käi ngwankäre juto jabätä?

¹² Nitre nämene ja mike Jeremías rüere aune ñan kukwei töibikaire, akwa yebiti ta niarakwe kukwe driebare kä kwati krubäte te. Nitre nämene ja mike rüere aune kötaire ye käkwe di ganinkä krubäte, yebätä sribi nämene kisete ye ja töi mikani kwe tuanmetrebätä (Jer. 20:8, 9). Akwa niarakwe ñaka ja di ngwani nekä. ¿Dre käkwe dimikani ja tuen töbika ñaka kwin yebe aune kukwe drie ye käi ngwen juto jabätä? Ja töi mikani kwatibe kwe kukwe ketebu ütiätebätä. Kena, kukwe Ngöbökwe drie nämene kwe nitre ie ye raba kä ja känenkäre kwin aune tödeka bien nitre ie yebätä töbikabare kwe (Jer. 29:11). Aune ketebukäre, Jehovakwe dianinkä ne kwe Jehová kä ye ngwandre kwe jabätä yebätä töbikabare kwe (Jer. 15:16). Kukwe kwin tödekakäre ye nita driere nitre tä kädete ye ie kä nengwane arato aune nita Jehová kä ye ngwen jabätä ñobätä ñan aune ni abokän testiko kwe yebätä. Kukwe ketebu ütiäte nebätä nita töbike ngwane nitre tä ni kukwe nuin o ñakare, akwa yebiti ta kukwe drie ye käita juto nibätä.

13. ¿Jesukwe kukwe bämikani Marcos 4:26-29 yete ye tä dre driere nie?

¹³ Nitre ririadre kukwe ja üairebiti yekäre kä rikadre ruäre ta. Ni nura nökaka tä ja düke yebätä kukwe bämikani Jesukwe kukwe ye mikakäre gare metre ta (ñäkädre Marcos 4:26-29 yebätä). Ni nura nökaka ja di ngwani sribikäre ye köböire nura ngwä namani ye jutuabare ie bätärekä bätärekä jatäri aune kukwe ñaka namani ie nura ye mikakäre nirien jötrö. Ye erere arato, kukwe meden nemen gare nitre ja tötikaka ie ye mikadre täte kwe yekäre kä rikadre ruäre ta ñobätä ñan aune tä nirien bätärekä bätärekä kukwe ja üairebiti. Ni nura nökaka ñaka raba kukwe nuainne nura mikakäre nirien jötrö tö ño ye erere. Ye erere arato, ni ñaka raba nitre ja tötikaka nikwe mike nirien jötrö ni tö ño ie ye erere. Aisete kä nuäi te nitre ja tötikaka ririadre ie ni tö ye erere ñaka rabadre bare ngwane, ni ñaka ja di ngwandre nekä aune ni ñan rabadre nainte. Nura nökakäre kukwe ngibiadre bätärekä aune nitre mikakäre ja tötikaka kukwe ngibiadre bätärekä arato (Sant. 5:7, 8).

14. Kä raba niken raire tä ne kwe nitre käkwe ni kukwe kadre ngäbiti, ¿ye kukwe meden tä bämike?

¹⁴ Kä ruäre känti käta niken kwati krubäte tä ne kwe nitre käkwe ni kukwei kadre ngäbiti. Dre namani bare meritre testiko kädekata Gladys aune Ruby Allen, niaratre ye ja eteba jeñe jakwe, yebätä ani blite. Kä 1959 ye ngwane niaratre juani prekursora regular erere juta Quebec yekänti. * Nitre kä yekänti nämene sacerdote Iglesia católica ye jürä ngwen jabätä aune nitre nämene dre niere bätätre ye jürä ngwen jabätä. Aisete meritre testiko nämene kukwe driere ye niaratre ñaka nämene kukwe nuin. Gladys tä niere: “Kä kubu biti ötare te nunkwe kukwe drieba ora krä kwä te köbö kwatire kwatire aune nitre ñan käkwe nun kukwe ka ngäbitiba. Nitre nämä nüke jukwebätä aune nämä nun gain ngwane nämä kämikekä. Akwa nunkwe ñaka ja di ngwanba nekä”. Ja känenkäre nitre käkwe ja töi kwitani aune kukwe drie jatani bäri kwin. Kä nengwane konkrekasion ketamä tä kä yekänti (Is. 60:22).

15. ¿1 Corintios 3:6, 7 tä dre driere nie nitre mikata ja tötikata yebätä?

 ¹⁵ Sribidre ja ñäte nitre mikakäre ja tötikaka. Konkrekasion ribeta keteiti ni iti dimikakäre ja ngökö ñöte ye nie tärä (ñäkädre 1 Corintios 3: 6, 7 yebätä). Ñodre, ni iti tö kukwe mikabätä gare jai ye ie ja mräkä iti käkwe täräkwata chi keteiti o täräkwata keteiti mikadrete. Ye bitikäre kä ñaka nemente ja mräkä ye ie ni ye tuabitikäre rükadre gare ie. Aisete ja mräkä mada käkwe ni ye tuadrebiti ye ribedre kwe ie. Ja mräkä mada ye käkwe ja tötika kömikadre ni yebe aune ja mräkätre aune ja ngwaitre mada nübaidre kwe ni ye tötike jabe. Ja mräkätre itire itire ye raba ni ja tötikaka ye dimike kukwe ruärebiti. Ja mräkätre itire itire tä nemen gare ni ja tötikaka ye ie, kukwe metre tä nura kwrere ni ye brukwäte yebiti ñö metakata kwetre. Ye erere nuaindi kwetre ngwane, ni nura nökaka aune ni nura ötaka raba kä ngwen juto jabätä nura ötata kukwe ja üairebiti yebätä niebare Jesukwe erere (Juan 4:35-38).

16. Mä di ñaka niena o mätä bren akwa mätä dre nuainne kukwe driekäre, ¿ye ñobätä käi tädre juto mäbätä?

¹⁶ ¿Mä di ñaka niena o mata bren yebätä mä ñaka raba kukwe driere o nitre tötike käne erere? Mä raba dre nuainne gwä ngwane nura ötakäre kukwe ja üairebiti ye mä raba kä ngwen juto jabätä. Nitre amalequita käkwe rei David aune nitre rükä kwe yekän mräkätre kwetre aune jondron nämene kwetre ye goibare ngwane, David aune nitre rükä kwe käkwe rübare bentre aune ganainbare kwetre ye ngwane dre namani bare ye ani mike ñärärä. Nitre 200 ñan namani juto rükäre ñobätä ñan aune nämäne dräre yebätä. Aisete ja tuanimetre kwetre jondron nämene kwetre ye ngübabitikäre. Rü ye bitikäre jondron meden dianinkä nitre amalequita kän ye jökrä dräidre ja erebe jabiti niebare Davidkwe (1 Sam. 30:21-25). Kä nengwane sribi nuainta nikwe nitre mikakäre ja tötikaka kä jökräbiti tibien yebätä nemen bare erere arato. Mä aune nitre jökrä tä ja di ngwen sribikäre kwin Jehová kräke batire batire nitre dimikakäre nemente nire aune dimikakäre niken ji niken ni ngwena ja nire kärekäre yebiti, ye kä rabai nemen juto ni jökräbätä ja erebe.

17. ¿Ñobätä ni raba debe bien Jehovai?

¹⁷ Jehovata ni tarere aune nita dre dre nuainne kräke ye ütiäte kräke, yebätä nita debe bien ie. Nita ja di ngwen sribikäre yebätä ni ñaka raba kukwe nuainne ne kwe rabadre bare kwin krubäte ye gare Jehovai, akwa nita sribire jume aune ja brukwä ngöibiti ye mikata ñärärä kwe yebätä tä kukwe kwin mike nemen bare ni kräke. Sribi kri nuainta nura ötakäre kukwe ja üairebiti yebätä ni raba dre nuainne, ye käi tädre juto nibätä ye drieta kwe nie arato (Juan 14:12). Nikwe ñaka ja di ngwain nekä ngwane Ngöbökwe ni kain ngäbiti ye tädre gare metre nie.