1. Bulagurhe rhugwerhe omwishingo rhunachivugire okuba Bahamirizi ba Yehova?

RHUGWERHE mwishingo gunene n’olukengo l’okuba Bahamirizi ba Yehova! Rhuli bantu ba Yehova, kandi rhunayerekana oku rhuli Bahamirizi bage omu kuhubiri n’okuyigiriza abandi oku bimulolere. Rhunagwarha omwishingo amango rhwamarhabala muntu mulebe “ogwerhe oborhere b’omurhima bukwanene eju y’akalamo k’esiku n’amango” abe Muhamirizi wa Yehova. (Mdo. 13:48) Rhunachiyunva kuguma na Yesu, “wagwarhaga mwishingo gunene kugerera eroho lichesibwa” amango abanafunzi bage bagaluka, n’okumubwira oku bintu bisimisize bachibwenere omu kasi k’okuhubiri.​—Lu. 10:1, 17, 21.

2. Nka gurhe rhwakayerekana oku akasi kerhu k’okuhubiri kali k’akamaro bwenene?

² Rhunabona oku akasi k’okuhubiri kali k’akamaro bwenene. Entumwa Paulo alihebere Timoteo omurhima ntya: “Ogenderere kuchigerereza woyo wenyine n’okuyigiriza kwawe.” Paulo ayongera ntya: “Omu kujira ntyo, wachiyokola woyo wenyine n’abali bakuyunviriza.” (1 Ti. 4:16) Che chirhumire akasi kerhu k’okuhubiri kanayokola akalamo k’abantu. Rhugenderere kuchigerereza rhwewe rhwenyine bulala rhurhegekerwe n’Obwami bwa Mungu. Buli mango rhunalonza kuchigendesa omu kuntu kwalerhera Yehova obukuze kunafarhene n’emyazi minja rhunahubiri. (Flp. 1:27) Rhunayerekana oku ‘rhuli rhwagerereza okuntu rhunayigiriza’ omu kurheganya bwinja ebirhwashambala n’abantu n’okuhema Yehova arhugishe embere rhuhubiri.

3. Ka buli yeshi akasimiswa n’oburhumwa b’Obwami? Lerha omufano.

³ Chiro n’amango rhwamajira okwerhu koshi rhugalire omu kuhubiri abandi, bantu banene omu eneo yerhu, bakayerekana oku barhasimisizwe n’emyazi minja y’Obwami. Rhuganirage oku mufano gwa Mwene-werhu Georg Lindal, waliri wahubiri yenyine omu maeneo me Islande kurhangira mwaka gwa 1929 kugera mwaka gwa 1947. Alihere abantu ebihumbi by’ebitabu; aliko, ntaye n’ omuguma wabere Muhamirizi wa Yehova. Aliyandikire ntya: “Baguma mubo balibonekene nka bapingire oburhumwa bwe Biblia, na banene mubo barhalisimisizwe.” Chiro na bamisionere  bamalaga Amasomo mabo me Gileadi, baja kurhabala kw’akola kasi eyola munda. Aliko nabo bahubiri myaka minene buzira kubona abantu basimisizwe; buzinda, enyuma ya myaka mwenda, bantu baguma b’eyola munda bachihaana emwa Yehova n’okubatizwa. *

4. Nka gurhe rhwakachiyunva amango abantu barhasimisizwe n’emyazi minja?

⁴ Rhunayunva rhuvunikire omurhima amango abantu barhasimisizwe n’emyazi minja. Rhwakachiyunva nk’oku Paulo naye achiyunvaga, aliyunvirhe “mugayo gunene na malumwa manene” bulala Bayahudi banene balilahire kuyemera oku Yesu ye Masiya walaganywaga. (Ro. 9:1-3) Gurhe wakajira akaba wajirire okwawe koshi wanasalirire eju y’omwanafunzi we Biblia aliko arhali ajira amaja-mbere, onabwene oku byakahema oleke kuyiga naye? Changwa gurhe si akaba orhasaga kurhabala chiro muntu muguma ahikire obubatizo? K’echola chiyerekene oku lili gosa lyawe n’oku Yehova arhali agisha akasi kawe k’okuhubiri? Mu gunola mwazi rhwashubiza ku binola bibazo bibiri: 1) Bichi binayerekana oku rhwakolere bwinja akasi kerhu k’okuhubiri? 2) Bichi rhukwanene kulangalira amango rhulirhwahubiri abantu?

5. Bulagurhe akasi rhunakolera Yehova karhalerha buli mango amalehe nk’oku rhwalilangalire?

⁵ Ebiblia ederhere ntya oku bilolere onajira obulonza bwa Mungu: “Buli chintu anajira chagenda bwinja.” (Zb. 1:3) Aliko, arhali k’okuderha oku buli chintu rhwakolera Yehova, chajirika nk’okurhulonzeze. Akalamo k’abantu “kayunjwire emilago” eju y’okurhashinganana kwerhu n’okw’abandi. (Yob 14:1) Kandi mango maguma balala bali barhupinga bakarhubuza rhurhayinjaga rhwalambagirira abantu eju y’okubahubiri. (1 Ko. 16:9; 1 Te. 2:18) Bobo si, bichi bija byayereka Yehova oku rhwakolere bwinja akasi kerhu k’okuhubiri? Rhushambale ku makanuni maguma me Biblia marhurhabala kushubiza echola chibazo.

6. Bichi binasimisa Yehova oku bilolere akasi rhunamukolera?

⁶ Yehova anabona obushiru n’okulembera kwerhu. Yehova anasima amango rhwamahubiri n’obushiru bulala rhumuzigiire chiro akaba abantu bakalahira kurhuyunviriza. Paulo aliyandikire ntya: “Mungu arhali mulyalya mpu ayibirire akasi kenyu n’obuzigire mwayerekene oku bilolere ezino lyage omu kukolera abachesibwa, munagenderere kubakolera. (Ebr. 6:10) Yehova anayibuka obushiru n’obuzigire bwerhu, chiro akaba rhurhagwerhe omwanafunzi we Biblia wahikire oku bubatizo. Che chirhumire, ebinwa Paulo abwiraga abanya-Korinto nawe bikulolere: “Akasi kenyu karhali kabusha oku bilolere Waliha,” chiro akaba akasi kawe kakomere karhayeneze ebi walilangalire.​—1 Ko. 15:58.

7. Bichi ebi entumwa Paulo aderhaga oku bilolere akasi kage k’okuhubiri byarhuyigiriza?

⁷ Entumwa Paulo aliri misionere mwinja bwenene, alihwanzisize ebibaga bihyahya mu mavile manene. Aliko amango bantu baguma bakwaranga Paulo, n’okuderha oku arhali mwigiriza mwinja, arhaderhaga oku bilolere bantu  bangana gurhe alirhabere. Ahali h’okuchiheba enyanya, Paulo ayandika ntya: “Nakolere kasi kanene.” (2 Ko. 11:23) Kuguma na Paulo, rhukwanene kuyibuka oku Yehova abwene obushiru n’okulembera kwerhu bye by’akamaro bwenene emwage.

8. Bichi rhukwanene kuyibuka oku bilolere akasi kerhu k’okuhubiri?

⁸ Akasi kerhu k’okuhubiri kanasimisa Yehova. Yesu alirhumire banafunzi bage 70 bajihubiri oburhumwa b’Obwami, n’enyuma y’okukola akola kasi “bagaluka n’omwishingo.” Bichi byarhumaga bagwarha mwishingo gunene? Baderha ntya: “Chiro n’abazimu bali barhukenga amango rhuli rhwakolesa ezino lyawe.” Aliko, Yesu abarhabala kuhindamula amawazo mabo omu kubabwira ntya: “Murhagwarhaga omwishingo mpu bulala amaroho mabi (bamalaika babi) babakengere, s’aliko mugwarhe omwishingo bulala amazino menyu mayandikirwe omu mbingu.” (Lu. 10:17-20) Yesu alimenyere oku barhakagenderere kubona ebintu bisimisize omu kasi kabo k’okuhubiri. Kweri, rhurhamenyere bantu banga omu bantu abanafunzi ba Yesu baganiraga nabo bahikiraga kuba Bakristu. Abanafunzi ba Yesu balikwanene kumenya oku barhakagwarhire omwishingo bulala abantu babayunvirhe konyine, si bakagwarhire mwishingo gunene omu kumenya oku Yehova asimisizwe n’akasi kakomere bakolere.

9. Bichi olwandiko lwa Wagalatia 6:7-9 luderhere nji byarhengerera, akaba rhurhalekere kuhubiri?

⁹ Rhukagenderera kulembera omu kasi kerhu k’okuhubiri, nji rhwapata akalamo k’esiku n’amango. Amango rhwamakola okwerhu koshi rhugalire omu kasi k’okuhubiri n’okuyigiriza abantu emyazi minja y’Obwami, eyi “rhuli rhwarhwera oku bilolere eroho” omu kuleka eroho lichesibwa lya Mungu likole bwinja omu kalamo kerhu. Akaba “rhurhalekere chiro n’akatyu” changwa “kuluha bwenene,” Yehova arhulaganyize oku, nji rhwashalula akalamo k’esiku n’amango chiro akaba oku nta muntu rhwarhabere kuhikira obubatizo.​—Osome Wagalatia 6:7-9.

10. Bulagurhe bantu baguma banarhuyunviriza n’abandi barharhuyunviriza amango rhuli rhwahubiri?

¹⁰ Abantu bakayemera okuli changwa nanga, okola kwa yumangira ahanene okuntu emirhima yabo enali. Yesu alifasiriye obola bukweri omu mufano g’omuhinzi wabyalaga emburho omu budaka bulengene, na buguma mubo bonyine bobwaburhaga amalehe. (Lu. 8:5-8) Yesu aliderhere oku obola budaka bulengene, bushushanyize n’emirhima y’abantu enakola omu bulyo bulengene amango bamayunva “Echinwa cha Mungu.” (Lu. 8:11-15) Kuguma n’omuhinzi, rhurhakagala kukuza omu mirhima y’abantu Echinwa cha Mungu rhwabayigirize. Akasi kerhu kuli kugenderera kurhwera emburho zinja z’oburhumwa b’Obwami. Paulo aliderhere ntya, “Buli muguma nj’ahabwa oluhembo nk’oku anakolere akasi kage” s’arhali kufarhana amalehe menja rhwapatire omu kasi kerhu.​—1 Ko. 3:8.

11. Bulagurhe akasi k’okuhubiri Nowa akolaga kalisimisize Yehova chiro akaba oku abantu barhamuyunvirizaga? (Olole efoto eli oku chiganda.)

¹¹ Kurhenga mira, abakozi ba Yehova baliri bahubiri abantu barhalilonzeze kubayunva. Omufano, Nowa “aliri muhubiri w’okunali,” nkabaga mu myaka 40 changwa 50. (2 Pe. 2:5) Nta ngangane, Nowa alilangalire oku abantu aliri ahubiri bakayemerere emyazi aliri ababwira, Yehova arhaliderhere oku ntyo ku nji byaba. Aliko amango amubwira oku ayumbake e safina, Mungu amubwira ntya: “Okwanene kuja omu safina, woyo, bagala bawe, mukawe, na bazana bawe.” (Mwa. 6:18) N’amango Yehova amubwiraga gurhe obunene bw’esafina bwakabere, nkabaga Nowa alirhegerere oku bantu banene barhamuyunviriza bulala boshi barhakayenere  omu safina. (Mwa. 6:15) Nk’okurhunamenyere nta muntu chiro n’omuguma waliyunvirize Nowa amango aliri ahubiri mw’elyola gulu ly’abantu b’ebigamba. (Mwa. 7:7) Ka Yehova alibwene oku Nowa arhalikolere akasi k’okuhubiri nk’okubikwanene? Nanga chiro! Yehova alisimisizwe na Nowa bwenene bulala alikolere byoshi amuhemaga akole.​—Mwa. 6:22.

12. Nka gurhe omulebi Yeremiya alipatire omwishingo omu kasi kage k’okuhubiri chiro akaba abantu baliri bamupinga n’okurhamuyunviriza?

¹² Omulebi Yeremiya alihubirire myaka 40, chiro akaba oku abantu barhamuyunvirizaga banaliri bamupinga. Alivunikire omurhima bwenene bulala abashombanyi bage baliri “bamudukanga n’okumukomera changwa kumushekera” n’echola charhuma achiyunva nk’aleke akasi k’okuhubiri. (Yer. 20:8, 9) Aliko Yeremiya arhalekaga akasi kage! Bichi byamurhabalaga alekane n’amawazo mali ntyo anagenderere kugwarha omwishingo omu kasi kage k’okuhubiri? Alisezeze obwenge ku bintu bibiri by’akamaro. Ech’oburhanzi, oburhumwa bwa Mungu Yeremiya aliri abwira abantu bwaliheberemo “amango mayinjre n’obulangalire.” (Yer. 29:11) Echakabiri, Yehova alichishogere Yeremiya abwire abantu oburhumwa bwage. (Yer. 15:16) Konakuguma, nerhu rhunabwira abantu oburhumwa b’obulangalire, rhunahekere ezino lya Yehova, rhwabo rhuli Bahamirizi bage. Amango rhwamaseza obwenge kw’ebyola bintu bibiri by’akamaro, rhwakagwarha omwishingo chiro akaba abantu barhali barhuyunviriza.

13. Bichi omufano gwa Yesu guli omu Marko 4:26-29 gurhuyigirize?

¹³ Binahema bisanzi binene y’omuntu agwarha obwemere. Yesu aliyigirize obola bukweri kugerera omufano g’omuhinzi walyamaga. (Osome Marko 4:26-29.) Enyuma y’omuhinzi okurhwera emburho, zinakula kubuyabuya na ntacho omuhinzi akagala kujira mpu yi zikula juba-juba. Nawe byakakuhema olindire bisanzi binene embere ohwanze kubona gurhe omwanafunzi we Biblia ali akolesa omu kalamo ebi ali ayiga. Nka kulala omuhinzi arhakagala kujira emyaka ekule juba-juba nk’oku alonzeze, ntacho rhwakajira y’obwemere b’omwanafunzi we Biblia bukula juba-juba nk’okurhwalilonzeze. Che chirhumire orhavunikaga omurhima changwa kugaya akaba barhajirire amaja-mbere juba-juba nk’oku walilangalire. Kuguma n’omuhinzi, birhuhemere rhulembere kuhika amango omwanafunzi werhu arhola omuhigo g’okukolera Yehova.​—Yak. 5:7, 8.

14. Mufano guhe guyerekene oku byakahema kasanzi kanene kagere embere abantu bahwanze kurhuyunviriza?

¹⁴ Mu maeneo maguma, binahema bisanzi binene bigere yi muntu mulebe ahikira kubatizwa. Rhushambale oku mufano gwa Gladys na Ruby Allen, bali-berhu ba nda nguma bahaabwaga engabane omu mwaka gwa 1959 y’okuba bapainiya baminuzize omu vile nguma ye provense ye Quebec * omu Kanada. Bulala abantu balilamire mw’eyola vile baliri bayubaha eby’abaturanyi na bapadiri bakaderhere changwa kujira, nka bamashambala n’Abahamirizi ba Yehova, echola charhuma barhayinja bayunviriza emyazi minja y’Obwami. Gladys ayibukire ntya: “Rhwamalaga myaka ebiri eyi rhuli rhwahubiri mahubiri ma nju oku nju sa munane buli lusiku na nta muntu warhuyunviriza! Abantu baliri bayinja oku mulyango konyine bakanabona oku rhwabo, banashuba kugaluka juba-juba omu nju. Aliko rhurhalekaga chiro nakatyu.” Okw’esiku zanaliri zagera, abantu bahwanza kuhindamuka kubuyabuya na baguma bahwanza kuyunviriza emyazi minja. Zene mw’eyola vile mukala muli bibaga bisharhu.​—Isa. 60:22.

15. Bichi olwandiko lwa 1 Wakorinto 3:6, 7 lurhuyigirize oku bilolere akasi k’okujira abanafunzi?

¹⁵ Bihemere bantu banene omu kurhabala muntu  muguma abe mwanafunzi. Buli muntu omu chibaga anarhabala yi muntu mulebe ahikira obubatizo. (Osome 1 Wakorinto 3:6, 7.) Omufano, mwene-werhu muguma analekera etragte changwa echitabu muntu muguma osimisizwe. Oyola mwene-werhu anabona oku eprograme yage y’akasi erhayemerere agalukire oyola muntu osimisizwe, anajabwira owindi muhubiri yewe amugalukire. Oyola muhubiri anagala kuhwanzisa efunzo lye Biblia. Oyola windi muhubiri naye anahamagala bene-berhu na bali berhu bamuherekeze kuongoza elyola funzo, na buli muntu anahira omwanafunzi omurhima omu njira yage-yage. Buli mwene-werhu changwa mwali-werhu wabuganene n’oyola mwanafunzi, amurhabala akuze obwemere bwage mu Yehova. Omu kujira ntyo, boshi bakolaga bwenene omu kurhabala muntu mulebe bagwarha omwishingo amango oyo muntu amahikira obubatizo.​—Yoh. 4:35-38.

16. Bulagurhe wakagwarha omwishingo omu kasi kawe k’okuhubiri chiro akaba orhakachigala kukola binene eju y’amagala mabi changwa bulala orhachigwerhe misi minene?

¹⁶ Nkabaga orhachigala kuhubiri n’okuyigiriza nka kulala waliri wajira mira bulala orhachigwerhe amagala menja changwa orhachigwerhe misi minene. Aliko wakachingenderera kurhabala omu kasi k’okushalula. Rhushambale oku mufano g’Omwami Daudi amango yewe n’abalume aliri nabo bachungulaga emilala yabo yabaga yahekerwe n’ebishambo by’Abaamaleki. Balume magana mabiri babaga barhamire bwenene eju y’okulwa entambala, baja babera enyuma eju y’okulanga emizigo. Aliko Daudi n’abalume bage bahima eyola ntambala, banarhola bintu binene by’akamaro kurhenga emw’abashombanyi babo. Daudi aj’aderha oku balala balwaga entambala na balala bayorhaga enyuma, boshi bagabana ebintu kungana-ngana. (1 Sa. 30:21-25) Eyola ngani erhuyigirize chintu chilebe oku bilolere akasi kerhu k’okujira abanafunzi. Buli yeshi wakolere okwage koshi agalire y’arhabala, akasangira k’ogola mwishingo, amango muntu mulebe amahikira kumenya Yehova n’okubatizwa.

17. Bichi rhwakabwirako Yehova koko?

¹⁷ Rhubwirire Yehova koko oku bilolere obuzigire bwage n’okuntu anabona akasi rhunamukolera. Ayinji oku rhurhakaseza abantu barhuyunvirize changwa bahwanze kumuharamya. Aliko anabona okuntu rhuli rhwakola bwenene, na kangana gurhe rhumuzigire, kandi anaja arhuhemba. Anarhuyigirize kandi okuntu rhwakagwarha omwishingo oku bilolere ebi rhwakagala kukola omu kasi k’okushalula. (Yoh. 14:12) Rhwakachizera oku Yehova achivugira rhwabo akaba rhurhalekere chiro nakatyu!