1. Vim li cas ua Yehauvas ib tug Timkhawv ho yog ib lub cij fim zoo?

PEB zoo siab tau txais lub cij fim los ua ib tug ntawm Yehauvas Cov Timkhawv. Vim li no peb thiaj tuav Yehauvas lub npe thaum peb qhia txhua leej txhua tus txog nws. Peb yeej zoo siab heev thaum peb nrhiav tau cov uas muaj lub siab xib nrhiav Yehauvas. (Tes Haujlwm 13:48) Thaum Yexus cov thwjtim mus tshaj tawm, nws “zoo siab kawg li” vim lawv piav txog tej yam zoo uas lawv tau ua. (Lukas 10:1, 17, 21) Peb los yeej zoo siab tib yam nkaus li Yexus.

2. Ua li cas peb tsis txhob lam qhia Vajtswv Txojlus ua dog ua dig?

² Tes haujlwm tshaj tawm tsis yog lam tau lam ua dog ua dig xwb. Yog li ntawd Paulus thiaj hais rau Timautes li no tias: “Koj yuav tsum ua tib zoo saib, saib koj ua koj lub neej zoo li cas thiab saib tej uas koj qhia koj qhia li cas.” Paulus hais ntxiv tias: ‘Koj yuav tsum ua tej ntawd mus li, rau qhov tej ntawd yuav pab tau koj thiab pab tau cov neeg uas mloog koj qhia kom nej dim nej lub txim.’ (1 Timautes 4:16) Peb tes haujlwm tshaj tawm no yuav cawm tau tibneeg txojsia. Yog tias peb ua tib zoo coj raws li Vajtswv lub siab nyiam, ces peb yuav pab tau lwm leej lwm tus los nrog peb qhuas Yehauvas. (Filipis 1:27) Thaum peb thov Yehauvas foom koob hmoov rau peb tes haujlwm thiab peb npaj ua ntej mus tshaj tawm ces twb yog peb saib tej uas peb qhia ntag.

3. Piav seb puas yog txhua leej txhua tus yuav mloog Vajtswv Txojlus.

³ Txawm tias peb rau rau siab mus tshaj tawm los tej zaum haj tseem tsis muaj tibneeg xav mloog Vajtswv Txojlus quj qees. Xws li xyoo 1929 txog 1947 muaj ib tug kwvtij npe hu ua Ntsauj Leedaus (Georg Lindal) tau mus tshaj tawm nyob rau tebchaws Aixalees (Iceland). Txawm nws tau tseb qas txhiab phau ntawv Vajlugkub los tsis muaj ib tug twg xav los teev tiam Yehauvas li. Nws hais tias: “Muaj ib co neeg tsis kam lees yuav Vajtswv txoj lus ho muaj ib co neeg tawm tsam.” Ces tom qab no mam li muaj ib co kawm  tiav Kile-a tuaj pab tshaj tawm hauv lub tebchaws ntawd. Txij thaum ntawd los twb tau 9 lub xyoos mam li muaj ib co tibneeg hauv tebchaws Aixalees los ua kevcai raus dej.

4. Thaum tibneeg tsis xav mloog txoj xov peb qhia ces peb yuav xav li cas?

⁴ Peb xav tsis tag li thaum muaj ib tug twg tsis xav kawm Vajlugkub. Tus tubtxib Paulus yeej xav tib yam nkaus li no. Nws thiaj “nyuaj siab kawg li” vim cov Yudais tsis ntseeg tias Yexus yog tus Mexiyas. (Loos 9:1-3) Tej zaum peb twb kawm Vajlugkub nrog ib tug neeg tau ntev loo los lawm. Txawm peb rau siab ntso qhia nws npaum li peb qhia tau thiab thov Yehauvas rau nws tsis tseg tsis tu los nws pheej hloov tsis tau nws lub neej los ua Yehauvas ib tug Timkhawv. Lossis yog peb ho mob mob siab mus qhia tibneeg tiamsis ho coj tsis tau ib tug los ua kevcai raus dej, peb puas yuav xav tias yog tim peb tsis muaj peevxwm qhia, lossis yog Yehauvas tsis foom koob hmoov rau tes haujlwm peb ua? Hauv zaj kawm no peb yuav teb 2 lo lus nug no: (1) Ua cas peb ho paub tias Yehauvas txaus siab rau peb txojkev tshaj tawm? (2) Peb yuav tau nco ntsoov li cas thaum peb mus tshaj tawm?

5. Vim li cas muaj tej thaum peb ua Yehauvas tes haujlwm los tsis mus raws li peb lub siab xav?

⁵ Phau Vajlugkub sau tias cov neeg ua raws li Vajtswv lub siab nyiam “txhua yam uas lawv ua puavleej tiav.” (Phau Ntawv Nkauj 1:3) Raws li nqe no tsis txhob rawm maj xav yuam kev. Tsis yog txhua zaus peb ua Yehauvas tes haujlwm yuav mus raws li peb lub siab xav. Peb yog neeg txhaum, yog li ntawd peb thiaj muaj ntau yam “kev ntxhov siab.” (Yauj 14:1) Tsis tas li ntawd, kuj muaj tej tug neeg txhob txwm tawm tsam thiab xav txwv peb txojkev tshaj tawm. (1 Kauleethaus 16:9; 1 Thexalaunikes 2:18) Ua li cas peb ho paub tias Yehauvas txaus siab rau peb tes haujlwm thiab suav tias peb ua tau haujlwm tiav? Cia peb kawm tej nqe Vajlugkub uas yuav pab peb teb lo lus nug no txuas ntxiv.

6. Piav seb Yehauvas saib peb tes haujlwm li cas.

⁶ Yehauvas tsuas saib seb peb rau siab npaum li cas. Thaum Yehauvas pom tias peb rau rau siab ua nws tes haujlwm, nws yuav zoo siab heev tab txawm tibneeg yuav mloog los tsis mloog. Paulus sau tias: “Vajtswv yog tus ncaj ncees! Nws yeej yuav nco ntsoov tej haujlwm uas nej tau ua los lawm thiab qhov uas nej pab cov ntseeg ib yam li niaj hnub no nej tseem pab. Nej ua li ntawd twb yog vim nej muab siab npuab Vajtswv.” (Henplais 6:10) Raws li nqe Vajlugkub no, txawm tias peb tsis tau kawm Vajlugkub nrog ib tug twg thiab pab tsis tau nws los ua kevcai raus dej los Yehauvas yeej nco qab peb tes haujlwm thiab qhov uas peb hlub nws. Nco ntsoov Paulus cov lus nws hais rau cov ntseeg hauv Kauleethaus tias: “Tej haujlwm uas nej ua rau tus Tswv ntawd puavleej muaj nqis tsis muaj ib yam uas tsis muaj nqis li.” (1 Kauleethaus 15:58) Raws li nqe no Vajtswv saib txhua yam peb ua rau nws muaj nuj nqis heev.

7. Tus tubtxib Paulus hais li cas txog nws tes haujlwm?

⁷ Tab txawm tus tubtxib Paulus coj tau coob leej ntau tus los teev tiam Yehauvas thiab tsa muaj ntau lub koom txoos los haj tseem muaj tej  tug thuam tias nws tsis txawj qhia. Paulus yeej tsis tau khav theeb tias nws twb coj tau coob leej ntau tus los ntseeg, lossis nrog luag sib cam thaum lawv thuam nws. Tiamsis nws tsuas hais tias: “Kuv ua haujlwm khwv dua lawv.” (2 Kauleethaus 11:23) Peb coj zoo tib yam li Paulus thiab peb nco ntsoov tias Yehauvas yeej txaus siab thaum peb ua nws tes haujlwm tsis tseg tsis tu.

8. Yexus qhia tias kom peb nco ntsoov li cas thaum mus tshaj tawm peb thiaj muaj kev zoo siab?

⁸ Yehauvas txaus siab heev rau peb txojkev tshaj tawm. Xws li thaum Yexus xa 70 leej thwjtim mus qhia Vajlugkub thiab lawv rov los txog mas lawv “zoo siab kawg li.” Vim li cas lawv ho yuav zoo siab ua luaj? Lawv hais tias: “Thaum peb tuav koj lub npe ntiab dab, dab kuj mloog peb lus thiab!” Tiamsis Yexus qhia kom lawv txhob rawm maj xav yuam kev nws thiaj hais rau lawv li no: “Nej tsis txhob zoo siab rau qhov uas dab mloog nej lus ntawd; nej cia li zoo siab rau qhov uas Vajtswv twb sau nej lub npe cia rau saum ntuj ceebtsheej lawm.” (Lukas 10:17-20) Yexus paub tias thaum mus tshaj tawm yeej yuav tsis mus raws li lawv lub siab xav txhua txhua zaus. Tsis tas li ntawd, peb tsis paub xyov cov thwjtim puas qhia tau peb tsawg tus los ntseeg Yehauvas hnub ntawd. Yexus xav kom cov thwjtim totaub tias qhov ua rau lawv zoo siab tsis yog nyob ntawm seb puas muaj neeg mloog lawv qhia, tiamsis yog qhov uas lawv ua npaum li lawv ua tau es Yehauvas txaus siab.

9. Raws li Kalatias 6:7-9, peb yuav txais dabtsi yog tias peb tshaj tawm tsis tseg?

⁹ Yog tias peb ua siab ntuj ntev qhia Vajtswv Txojlus tiag ces ib hnub peb yuav tau txojsia nyob mus ib txhis. Thaum peb cia Yehauvas lub hwj huam dawb huv coj peb thiab rau siab ntso qhia lwm tus txog Yehauvas, ces twb yog peb tseb tej uas Yehauvas nyiam. Ntxiv ntawd txawm tias peb yuav coj tau tibneeg los ua kevcai raus dej lossis tsis tau, Yehauvas yeej yuav pub txojsia nyob mus ib txhis rau peb yog tias peb tsis “qaug zog” lossis “tsaug leeg.”​—Nyeem Kalatias 6:7-9.

10. Vim li cas thaum peb mus tshaj tawm tsuas muaj qho tus mloog xwb?

¹⁰ Tus neeg peb qhia rau yuav mloog thiab tsis mloog los nyob ntawm seb nws lub siab puas xib nrhiav Yehauvas. Yexus qhia ib zaj lus piv txwv txog qhov no. Xws li muaj ib tug txivneej tseb noob nplej rau hauv ib daim teb tiamsis tsuas muaj qee lub noob poob rau qhov av zoo xwb. (Lukas 8:5-8) Cov av piv txwv txog tibneeg lub siab xib nrhiav “Vajtswv Txojlus.” (Lukas 8:11-15) Yog li ntawd peb zoo ib yam li tus tseb noob. Peb yuav hloov tsis tau lwm tus lub siab kom xib nrhiav Yehauvas. Tiamsis peb tsuas tseb nkaus nkaus xwb uas yog mus tshaj tawm. Tus tubtxib Paulus hais tias, “txhua tus yuav tau nqe zog raws li nyias tes haujlwm,” tsis yog seb nws ua tau ntau npaum li cas.​—1 Kauleethaus 3:8.

11. Txawm tias tsis muaj leejtwg mloog Nau-es los vim li cas Yehauvas suav tias Nau-es yog ib tug “uas qhia txojkev ncaj ncees”? (Saib daim duab ntawm lub khaum.)

¹¹ Txheej puag thaum ub cov teev tiam Yehauvas los kuj qhia rau coob leej ntau tus uas tsis txais yuav Vajtswv tej lus. Nau-es yog ib tug “uas qhia txojkev ncaj ncees” tau 40 lossis 50 lub xyoos diam los twb tsis pom leejtwg nrog nws. (2 Petus 2:5) Tom qab ntawd tej zaum Nau-es mam paub tseeb tias yuav tsis muaj coob leej ntau tus mloog vim lub nkoj uas Yehauvas qhia kom nws txua ntawd ntim tsis tag sawvdaws rau hauv. (Chivkeeb 6:15) Yehauvas tsis tau hais tias coob leej yuav los nrog Nau-es mus rau hauv lub nkoj tiamsis Yehauvas tsuas hais li no tias: “Koj cia li coj koj tus pojniam, koj cov tub thiab koj cov nyab mus nyob hauv lub nkoj.” (Chivkeeb 6:18) Thaum kawg tsis muaj ib tug neeg hauv lub qab ntuj phem ntawd mloog Nau-es tej lus tshaj tawm li. (Chivkeeb 7:7) Yehauvas puas xav tias Nau-es ua haujlwm tsis tiav? Yehauvas tsis xav li  ntawd rau qhov Nau-es ua txhua txhua yam raws li Vajtswv tau hais.​—Chivkeeb 6:22.

12. Txawm tias Yelemis raug tawm tsam thiab thuam los ua li cas nws thiaj tsis qaug zog?

¹² Yelemis yog ib tug uas cev Vajtswv lus. Nws tshaj tawm tau 40 lub xyoos diam tiamsis cov tibneeg nws qhia rau tawm tsam thiab tsis mloog nws tej lus. Lawv “thuam” thiab hais lus “tso daj tso luag” ua rau nws qaug zog thiab tsis xav ua nws tes haujlwm ntxiv lawm. (Yelemis 20:8, 9) Txawm li ntawd los Yelemis ua tiag tshaj tawm tsis tseg tsis tu. Ua li dabtsi thiaj pab tau nws tshaj tawm tsis tseg tsis tu? Twb yog nws nco ntsoov 2 yam no. Thawj yam yog Yelemis paub tias tej nws tshaj tawm yuav pab cov tibneeg nws qhia muaj “kev cia siab rau yav tom ntej.” (Yelemis 29:11) Yam 2 twb yog Yehauvas xaiv Yelemis ua tus cev Yehauvas lus. (Yelemis 15:16) Nyob rau hauv lub qab ntuj tsaus nti tsis muaj chaw tawm niam no los, Yehauvas twb xaiv peb los ua nws cov Timkhawv tshaj tawm nws txoj xov zoo kom txhua tus neeg mloog thiaj muaj kev cia siab. Txawm tias tibneeg yuav mloog thiab tsis mloog Vajtswv txojlus los, peb yuav tau nco ntsoov 2 yam uas pab tau Yelemis kom tsis txhob qaug zog, thiaj txhawb tau peb zoo siab hlo mus tshaj tawm.

13. Malakaus tshooj 4 nqe 26 txog 29 pab peb li cas thaum peb kawm Vajlugkub nrog ib tug neeg twg?

¹³ Yuav kom ib tug twg txojkev ntseeg loj hlob peb yuav tau siv sijhawm qhia. Yexus qhia ib zaj lus piv txwv txog ib tug txivneej tseb noob rau hauv nws daim teb ces tom qab ntawd los pw tsaug zog lawm. (Nyeem Malakaus 4:26-29.) Tus txivneej tseb noob tsis paub tias xyov yuav ntev li cas lub noob thiaj nthaw taus kaus. Thaum peb mus tshaj tawm los zoo ib yam li ntawd ntag. Peb tsis paub xyov yuav siv sijhawm ntev li cas ib tug kawm Vajlugkub mam li hloov tau nws lub neej los ua raws li tej nws tau kawm. Xav txog thaum peb mus ua teb, peb tsuas tseb noob rau hauv av xwb. Peb ua tsis tau kom lub noob ntawd nthaw kaus. Cov nrog peb kawm Vajlugkub los peb ua tsis tau kom lawv muaj kev ntseeg tib yam nkaus. Yog tias tus peb qhia rau txojkev ntseeg Yehauvas tsis loj hlob, los tsis txhob rawm maj qaug zog. Kav tsij rau siab ntso qhia Vajtswv Txojlus kam tiag rau nws. Peb yuav tau ua siab ntev qhia rau lawv tib yam nkaus li thaum peb mus ua teb.​—Yakaunpaus 5:7, 8.

14. Piav seb yog tibneeg tsis mloog peb qhia, ua li cas ho zoo rau peb rau siab ntso qhia kam tiag.

¹⁴ Nyob rau tej thaj tsam peb mus qhia Vajlugkub, yeej muaj tej tug yuav tau kawm Vajlugkub ntev loo lawv mam ua kevcai raus dej. Xws li xyoo 1959 hauv lub tebchaws Kanada (Canada), muaj ib lub zos nyob hauv lub xeev Khuas Npev (Quebec), muaj 2 tug niam laus niam hluas hu uas Nkadim (Gladys) thiab Lunpim Alees (Ruby Allen). Nkawv yog 2 tug tho kev thiab thaj tsam nkawv qhia ntawd muaj cov ntseeg Kav Tos Liv coob heev. Thaum nkawv mus ncig qhia rau cov neeg zej zog los tsis muaj leejtwg xav mloog vim lawv ntshai nyob tsam lwm tus thiab lawv tus txiv plig tsis txaus siab. Nkadim hais tias: “Wb mus qhia ib hnub nkaus ib lub qhov rooj rau ib lub qhov rooj los tsis muaj leejtwg qheb qhov rooj li. Wb tshaj tawm li no tau 2 lub xyoo diam. Thaum cov neeg zej zog pom wb los lawv tsis tig ntsia wb li. Txawm li ntawd los wb yeej rau siab ntso qhia kam tiag.” Ces ntev mus ntev tuaj, tej neeg zej zog lub siab txawm muag thiab mloog nkawv qhia. Nyob rau hauv lub zos ntawd niam no muaj 3 lub koom txoos lawm.​—Yaxayas 60:22.

15. Raws li 1 Kauleethaus 3:6, 7, leejtwg muaj peevxwm pab tau ib tug kawm Vajlugkub kom muaj kev ntseeg thiab teev tiam Yehauvas?

¹⁵ Sawvdaws sib pab. Txhua tus hauv lub koom txoos yeej muaj peevxwm pab tau ib tug kawm Vajlugkub kom muaj kev ntseeg thiab ua kevcai raus dej. (Nyeem 1 Kauleethaus 3:6, 7.) Xws li muaj ib tug kwvtij tau tso ib phau ntawv  tseb rau ib tug txivneej uas nyiam kawm Vajlugkub. Tiamsis tus kwvtij ntawd mus qhia tsis tau rau lub sijhawm uas tus txivneej xav kawm. Nws thiaj thov kom ib tug kwvtij nyob hauv nws lub koom txoos mus pab qhia rau tus txivneej ntawd. Txhua zaus thaum tus kwvtij ntawd mus kawm Vajlugkub rau tus txivneej, nws coj lwm tus ntseeg hauv koom txoos nrog nws mus. Thaum tus txivneej ntsib cov phoojywg uas tuaj xyuas nws mas txhawb tau nws txojkev ntseeg lawm hov ntau. Txhua tus kwvtij thiab nkauj muam uas ntsib tus txivneej no yeej sib pab nroo ywg dej rau tus txivneej ntawd lub siab. Thaum coj tau ib tug neeg los teev tiam Yehauvas thiab ua kevcai raus dej mas sawvdaws zoo siab kawg nkaus li. Twb yog vim li no ntag Yexus thiaj hais tias muaj ib tug cog thiab muaj ib tug sau.​—Yauhas 4:35-38.

16. Vim li cas tsis tsim nyog rau peb ntxhov siab yog tias peb tshaj tawm tsis tau npaum li peb lub siab nyiam?

¹⁶ Vim peb lub zog ntaug zuj zus lawm lossis muaj mob, tej zaum peb yuav mus tshaj tawm tsis tau npaum li yav tas los. Nco ntsoov tias ua npaum li peb ua tau xwb, tsis txhob tag kev cia siab. Kav tsij koom tes nrog peb cuab kwvtij thoob qab ntuj tshaj tawm kam tiag ua ke. Xws li Vajntxwv Daviv. Muaj ib zaug ib co tub sab Amalej mus txeeb Daviv thiab nws cov tub rog tej pojniam thiab menyuam coj mus tag lawm. Daviv pab tub rog muaj 200 leej uas sab sab lim lim nrog tsis taus nws mus caum cov pojniam menyuam uas tub sab ntes lawm. Thaum Daviv mus caum tau cov yeeb ncuab nws hais kom muab tej khoom lawv lwg tau ntawd faib rau 200 tus uas tsis nrog lawv mus thiab. (1 Xamuyees 30:21-25) Thaum peb mus tshaj tawm, zoo tib yam li zaj peb piav no ntag. Thaum peb pom ib tug neeg twg los ntseeg thiab ua kevcai raus dej los peb cia li nrog sawvdaws zoo siab. Yog peb rau siab ua npaum li peb ua tau ces txhua tus yeej yuav zoo siab.

17. Piav seb ua cas peb ho nco Yehauvas txiaj ntsig.

¹⁷ Yehauvas hlub peb kawg nkaus thiab nws txaus siab rau peb tes haujlwm, peb yuav nco ntsoov nws txiaj ntsig. Nws yeej paub tias peb tsuas ua tau npaum li peb ua tau xwb, peb yuam tsis tau tibneeg los teev tiam nws. Thiab nws paub tias peb hlub nws kawg nkaus thiab nyob rau hauv peb nruab siab peb yeej xav coj kom tau txhua leej txhua tus los ntseeg nws. Tsis tas li ntawd Yehauvas qhia peb tias yuav ua li cas peb thiaj muaj taus kev zoo siab thaum ua nws tes haujlwm. (Yauhas 14:12) Cia peb nco ntsoov tias yog peb rau rau siab ua Yehauvas tes haujlwm tsis tseg tsis tu, nws yeej yuav foom koob hmoov rau peb thiab txaus siab rau txhua yam peb ua.