1. Ngatta magayayya ittam, anna anni i pribilehio tam?

FERMI i ayayya tam nga mabbalin tu tadday ta Saksi ira ni Jehova! Pribilehio tam nga magalan ta ngagan na Dios anna itaddaggan yatun nga ngagan gukaban na pakiparte ta pallayyagayya anna pangngua tu disipulos. Magayayya ittam nu egga i moffunattam nga “mepangngo nga mangalawa tu mannanayun nga inango” tapenu mappabawtiso. (King. 13:48, NW ) Matageno tam i natageno ni Jesus nga “nepallo i pagayaya” na tagga ta nipakoli na disipulos nga makasta i nattuppalan na pallayyagayya da.​—Luc. 10:1, 17, 21.

2. Kunnasi tam mepasingan nga importante ta nittam i ministerio tam?

² Importante nittam i ministerio tam. Kunnaw i nitabarang ni apostol Pablo kani Timoteo: “Immuguram-mu i agguyu-guyum tuange ta attuttuddum.” Ngatta kinagi ni Pablo yatun? “Ta nu kunnaw i kuam-mu, mapaliag ka kunne na ta magginna ira nikaw.” (1 Tim. 4:16) Makepaliag gafu tu inango i ministerio tam. Iimmugurattam i agguyu-guyu tam megafu ta sakup ittam na Pappatulan na Dios. Kayà tam nga kanayun nga makedayaw kani Jehova i kukukuattam anna mekunnay yatun ta ilayyagayya tam. (Fil. 1:27) ‘Memmugurattam gapa i attuttuddu tam’ nu mapprepara ittam tu mapia anna nu kiddawattam i uffun ni Jehova nige tam nga layyagayyan i tanakuan.

3. Ekspektattam kari nga interesadu i ngamin ta mensahe tam? Mangistoria tu ekspiriensa.

³ Maski nu kukukuattam ngana i adde na mawayya tam tapenu layyagayyan i totolay, awayya na tu aru lagapa ta teritoria tam i ari nga interesadu. Kunnatun i naekspiriensa ni Brother Georg Lindal. Magitetadday yayya nga nallayyagayya ta Iceland namegafu ta 1929 adde ta 1947. Nakepalima yayya tu rinivu nga libru ngem awan tu maski tadday tu nabbalin tu Saksi. Kunnaw i nitura na: “Kokkontran na karuan i kinakurug, ngem magaru ta nira ay ari talaga nga interesadu.” Egga ira misionero nga naggradua ta Gilead nga minay tari tapenu manguffun nga mallayyagayya,  ngem awan lagapa tu nangulian na. Nappasa labbi i siam paga nga dagun nige nga egga i karuan nga taga-Iceland nga naddedika kani Jehova anna nappabawtiso. *

4. Anni i matageno tam nu ari nga gigginnan na totolay i mensahe tam?

⁴ Dismayadu ittam nu ari nga gigginnan na totolay i mensahe tam. Awayya na gapa nga matageno tam i natageno ni Pablo tagga ta ari nga mangurug i magaru ta Judio nga si Jesus i nepromesa nga Mesias. Kinagi na: “Kuruga nepallo i daddam ku, anna ari nga mari i dammo na gakò.” (Roma 9:1-3) Awayya na tu egga i Bible studym, kukukuammu gapa i ngamin tapenu tudduan yayya tu mapia, anna kanayummu yayya nga ipakimallo. Ngem kunnasi nu ari lagapa yayya nga mapprogreso tapus mawag tu iyemmammu ngana i Bible studym ta nisa? Kunnasi nu awan paga vuluvuga tu Bible studym nga nappabawtiso? Liwa mu kari yatun? Nonopammu kari nga ari nga bebbendisionan ni Jehova i ministeriom? Tabbagattam taw nga artikulo yaw nga dua nga pakkiavu: (1) Kunnasi tam makagi nga makasta i nattuppalan na ministerio tam? (2) Anni nakuan i ekspektattam nu layyagayyattam i tanakuan?

5. Ngatta ari tu kanayun nga mesimmu segun ta ikaya tam i kukukuattam para kani Jehova?

⁵ Kunnaw i kagian na Biblia meyannung ta tolay nga kukukuan na i uray na Dios: “Ngamin i kuan na ay mattuppal ta mapia.” (Sal. 1:3) Ngem ari nga nakadepende ta ekspektattam i pattuppalan na ngamin nga kuattam para kani Jehova. Ngatta? “Napannu tu problema” i pattolay tam megafu ta imperfekto ittam kunne na gapa i tanakuan. (Job 14:1) Fuera paga tatun, egga ira i kumokkontra ta trabahu tam nga pallayyagayya anna nu mittan, pagimmangadda ittam. (1 Cor. 16:9; 1 Tes. 2:18) Anni gafu ira i pabbaseyan ni Jehova tapenu makagi na nga makasta i nattuppalan na ministerio tam? Ammuattam ngana i karuan nga prinsipio na Biblia tapenu matabbag yatun.

6. Anni i tadday nga pabbaseyan ni Jehova tapenu makagi na tu makasta i nattuppalan na trabahu tam para nisa?

⁶ Masingan ni Jehova i pallallappo tam anna ammu na nga ari ittam nga magiggimmang. Para kani Jehova, makasta i nattuppalan na ministerio tam nu malallappo ittam anna nu kingngua tam yatun megafu ta aya, magginna man i totolay onu ari. Nitura ni Pablo: “I Dios ay matunung. Arian na nga kattaman i kingngua nu, onu i pangaya nu sa, nga nipasingan nu ta panguffun nu ta kakavvulu nu ta angngurug anna paddaggunan nu nga ipasingan adde sangoye.” (Heb. 6:10) Ari nga kattaman ni Jehova i kingngua tam ira anna i aya nga nipasingattam, maski nu awan tu nappabawtiso nga Bible study tam. Nonopammu nga kagittam gapa i taga-Corinto ira. Kinagi ni Pablo nira: “Agga-mavvunga ngamin i passerbi nu” maski nu ari nga nesimmu i inekspekta nu nga resulta na ministerio nu.​—1 Cor. 15:58.

7. Anni i mala tam ta kinagi ni apostol Pablo meyannung ta ministerio na?

 ⁷ Malalaki nga misionero si apostol Pablo. Nanguffun yayya ta pabbuu ta aru nga kongregasion ta nadduruma nga siudad. Ngem turi ta egga ira i manguestion ta kualipikasion na bilang ministro ni Cristo, nidefensa na i baggi na, ngem arian na nga nipasigo nu piga ngana nga totolay i noffunan na ngana nga mabbalin tu Cristiano. Kunnaw lallagu i kinagi na ta nira: “Mas aru i nipabbanna-bannag ku.” (2 Cor. 11:23) Kagitta ni Pablo, daddammattam nakuan nga i pallallappo tam anna i ari tam pagiggimmang ta pallayyagayya i pinaka-appresian ni Jehova.

8. Anni i daddammattam meyannung ta ministerio tam?

⁸ Mamagayayya kani Jehova i ministerio tam. Zinog ni Jesus i 70 nga disipulos na tapenu ilayyagayya i mensahe na Pappatulan tapus ‘nanoli ira nga sigga-pagayayya.’ Ngatta? Kinagi da: “Maski i demonio ira ay siminulu nikami turi ta minanduam-mi ira ta ngagam-mu!” Ngem nitunung ni Jesus yatun nga appana-panono da. Kinagi na nira: “Ari kamu nga magayaya megafu ta tumulu nikamu i marakay ira nga espiritu, nu ari magayaya kamu megafu ta netura i ngaga-ngagan nu ta langi.” (Luc. 10:17-20) Ammu ni Jesus nga ari tu kanayun nga makapabbaw i metuppal da ira ta ministerio da. Kakurugan na, awan tu makekagi nu sinni turi ira ta nagginna ta pallayyagayya da i nabbalin talaga tu disipulos. Magayayya nakuan gafu i disipulos ira megafu ta mapagayayya da si Jehova ta pallallappo da, ari tu megafu laman ta netuppal da ira.

9. Segun ta Galacia 6:7-9, anni noka i gatabattam nu ari ittam nga magimmang nga mallayyagayya?

⁹ Nu ari ittam nga magimmang ta pallayyagayya, mattolay ittam noka tu mannanayun. Nu kukukuattam i adde na mawayya tam nga mammulu-mula tu kinakurug na Pappatulan anna tangngawattam danatun, gitta na ‘pammulu-mulattam gapa i karagatan na Espiritu’ gukaban na pangipamavulun ta masanto nga espiritu na Dios nga influwensian i ngamin nga aspeto na pattoletam. Nu “ari ittam nga molang” onu “ari nga makkafi i nono tam,” garantiyan ni Jehova nga gatabattam noka i mannanayun nga inango, egga man i mappabawtiso nga Bible study tam onu awan.​—Bibbigan i Galacia 6:7-9.

10. Ta sitaw nga nakadepende i pangalawa na totolay ta kinakurug?

¹⁰ Nakadepende ta affutu-futuan na totolay i pangalawa da ta kinakurug. Nipakanawag ni Jesus yatun nga kinakurug ta ilustrasion na mabbini nga nammula ta nadduruma nga klase na davvun ngem yuri laman nemula ta mapia nga davvun i navvunga. (Luc. 8:5-8) Nadduruma i klase na davvun segun kani Jesus megafu ta nadduruma gapa i pangalawa na affutu-futuan na totolay ta “uvovug na Dios.” (Luc. 8:11-15) Kagitta natun nga mabbini, ari tam gapa nga kontroladu nu mavvunga i trabahu tam megafu ta nakadepende yatun ta affutu-futuan danuri na layyagayyattam. I trabahu tam laman ay tulu-tuloy nga pangimula ta mensahe na Pappatulan nga negitta ta mapia nga bini. Daddammattam gapa i kinagi ni apostol Pablo nga ‘bala-balattan noka na Dios i kada tolay segun ta kingngua na’ ari tu segun ta resulta ira na trabahu na.​—1 Cor. 3:8.

11. Ngatta makagi tam nga netuppal ni Noe i annungan na nga mallayyagayya? (Innan i letratu ta vungun.)

¹¹ Maski ta ollu nga tiempo, aru gapa i ari nga nagginna ta pangilayyagayya na aripan ira ni Jehova. Angngarigan na, maggi 40 onu 50 dagun nga ‘nilayyagayya ni Noe i matunung nga attolay.’ (2 Ped. 2:5) Siempre, ekspektan na nakuan nga ginnan yayya na totolay, ngem awan mabba tu kinagi ni Jehova tu kunnatun ta nisa. Kunnaw laman i kinagi na Dios kani Noe turi ta nibilin na nga mamadday yayya tu arka: “Tullukkamu  ta arka—sikaw, i ána mu, i atawam, anna i gi-attawan na ána mu.” (Gen. 6:18) Turi ta nammuan ni Noe nu kunnasi kadakal i arka nga paddayan na, awayya na tu nanono na nga baddi laman talaga i magginna nisa megafu ta ari tu makalanno i aru nga totolay ta arka. (Gen. 6:15) Ammu tam mabba i nesimmu nga awan vuluvuga tu maski tadday nga tolay nga nagginna kani Noe. (Gen. 7:7) Kayà kari kagian natun nga ari tu makasta i nattuppalan na pallayyagayya ni Noe? Ari! Para kani Jehova, netuppal ni Noe i annungan na megafu ta matalo nga kingngua na nu anni nepakua ta nisa.​—Gen. 6:22.

12. Ngatta magayayya lagapa si profeta Jeremias maski nu ari nga interesadu i totolay anna kokkontradda yayya?

¹² Maturu tu 40 nga dagun nga nallayyagayya si profeta Jeremias maski nu ari nga interesadu i totolay anna kokkontradda yayya. Nakkafi i nono na megafu ta ‘panginsulto anna panguyu-uyaw’ danatun nga kumokkontra. Nanono na paga lagu nga iyemmang na ngana i annungan na. (Jer. 20:8, 9) Ngem ari yayya nga nagimmang! Anni i nakoffun tapenu tulu-tuloy yayya ta pamministerio na anna magayayya lagapa tatun? Egga i dua nga ninonono na. Ollu, ammu ni Jeremias nga mangiyawa tu makasta nga “mappange anna iddanama” i mensahe na Dios nga ilayyagayya na ta totolay. (Jer. 29:11) Mekadua, ninonono ni Jeremias nga yayya i pinili ni Jehova tapenu ipakannammu i mensahe na. (Jer. 15:16) Danatun nakuan gapa i nononopattam sangawe meyannung ta pallayyagayya tam. Mamaggiddanama i mensahe tam ta totolay taw nga magulu nga mundo anna sittam gapa nga Saksi i pinili ni Jehova tapenu ipakannammu i mensahe na. Nu kuattam yatun, magayayya ittam lagapa maski nu anni paga i pangalawa na totolay.

13. Anni i magigiammu tam ta ilustrasion ni Jesus ta Marcos 4:26-29?

¹³ Sisinu i papprogreso ta espiritual. Nituddu ni Jesus yatun nga kinakurug ta ilustrasion na meyannung ta minakkoman nga nakkatrug kabalin na nga nabbini. (Bibbigan i Marcos 4:26-29.) Sisinu laman i paddakal na nimula na anna ari na ngana nga kontroladu yatun. Kunnatun gapa i papprogreso ta espiritual na Bible study tam ira. Sisinu laman yatun. Ari nga mefuersa na kusetcheru nga dumakal insigida i mulu-mula na segun ta kalistu nga kayà na. Kunnatun gapa i Bible study tam ira. Ari tam puede nga ifuersa nga mapprogreso ira ta espiritual segun ta kalistu nga ekspektattam. Ariammu nakuan gafu pakkafian i nono mu nu mas mabayag ira nga mapprogreso anne ta inekspektam. Kawagan i pappasa-pasensia ta pakkusetcha. Kunnatun gapa ta pangngua tu disipulos.​—Sant. 5:7, 8.

14. Mangistoria tu ekspiriensa nga mangipasingan nga mappasa labbi i piga nga dagun nige nga magginna i totolay ta nittam.

¹⁴ Ta karuan nga lugar, mappasa labbi i aru nga dagun nige nga masingan i resulta ira na ministerio tam. Naekspiriensa yatun na mawwagi nga da Sister Gladys anna Sister Ruby Allen. Ta 1959, narregular payunir ira ta tadday nga ili ta Quebec, Canada. * Manaki na totolay nga makibbida nira megafu ta maganassing ira ta makagi onu kuan na tanakuan anna na papari nu masingadda ira nga makibbida ta Saksi. Istorian ni Gladys: “Kadaggaw nga mamala-balay kami tu walu nga oras ta unag na dua nga ragun, ngem awan vuluvuga tu nangivuka tu puerta nikami! Basta sigiban nakami laman na totolay tapus manaw ngana ira. Ngem ari kami vuluvuga nagimmang.” Ta pappasa na tiempo, nanguli gabbalaman ira. Nabbalin ira tu mas minakkikofun anna nagginna ngana gapa i karuan ta nira. Sangawe, tallu ngana i kongregasion tatun nga ili.​—Isa. 60:22.

15. Anni i mala tam ta 1 Corinto 3:6, 7 meyannung ta pangngua tu disipulos?

 ¹⁵ Madduruffun i ngamin tapenu makangngua tu disipulos. Egga i meyuffun na ngamin ta kongregasion ta tadday nga tolay tapenu mabawtisowan yayya. (Bibbigan i 1 Corinto 3:6, 7.) Angngarigan na, nepaliman na tadday nga brother tu tract onu magazina i tadday nga interesadu. Megafu ta ari ngana nga available i brother ta tiempo nga kayà nari na interesadu nga ma-return visit yayya, nikiddaw na brother ta tanakuan nga publisher nga manoli tatun nga interesadu. Negafu natun nga publisher i pab-Bible study. Tapus nangivulu gapa yayya tu nadduruma nga wawwaragi ta pab-Bible study da anna para-parehu nga egga i nebillay na kada tadday ta nira tapenu mapagaram i Bible study. Nakoffun i ngamin nga brother onu sister nga nammammu na Bible study tapenu dumakal i pangurug na. Sonu mappabawtiso ngana i Bible study, magayayya noka i ngamin nga nanguffun ta nisa. Kunnatun i punto na ilustrasion ni Jesus.​—Juan 4:35-38.

16. Ngatta magayayya ka lagapa nakuan ta ministeriom maski nu mataki ka onu makafi ka ngana?

¹⁶ Kunnasi nu ari ka ngana kuruga makapallayyagayya anna makapab-Bible study megafu ta mataki ka onu makafi ka ngana? Magayayya ka lagapa nakuan ta meyuffummu tatun nga trabahu. Makagigiammu ittam ta ekspiriensa ni Patul David anna na suddalu na ira tagga ta binawi da i familia da anna i pakkukua da ira nga nala na Amalekita ira. Egga i 200 nga suddalu ni David nga nappabattang ngana laman tapenu bantayan i bagahe megafu ta sobra ngana i bannag da. Ngem turi ta nangaffu da David ta laban, nimandu na nga para-parehu laman i billay danuri na nakillaban anna danuri na nabattang. (1 Sam. 30:21-25) Kunnatun gapa ta pangngua tam tu disipulos. Kingngua na kada tadday ta nittam i adde na mawayya tam tapenu makoffun tatun nga trabahu. Megafu tatun, para-parehu nga magayayya ittam ngamin kada egga i tadday nga moffunan tapenu makannammuan si Jehova anna mappabawtiso.

17. Ngatta mappabalo ittam kani Jehova?

¹⁷ Mappappabalo ittam megafu ta appresian ni Jehova i passerbi tam nisa. Ammu na nga ariattam nga mafuersa i totolay nga ginnan i mensahe tam onu maddayaw ta nisa. Ngem masingi-singan na i pallallappo tam anna i pangaya tam ta nisa, yayya nga bala-balattan na ittam. Tudduan na ittam gapa nu kunnasi ittam nga mabbalin tu magayayya ta meyuffuttam ta pallayyagayya anna pangngua tu disipulos. (Juan 14:12) Makasiguradu ittam gafu ta pamendision na Dios adde ta ari ittam nga magimmang nga mallayyagayya!