1. Ọkẹkẹnị bala ihi nya ẹlịyẹ ahị tị́ la?

ỌKẸKẸNỊ bala ihi ọtụka ọ ri hahị nyọka ri Alibeenu nya iJihova lẹ! Ahị ri Alibeenu nya iJihova, ahị tị kaa mẹjẹ nyori ahị ri Alibeenu nyamwụ ịlẹhị bwula o-ya ẹla nya Ohe je angịnyị bala ọ-họ kị ka ri angịjụgbẹyị. Ahị kaa chị ọkẹkẹnị kori kahị jẹ́ da ọngọhẹ ọlẹ kọ “chịla-chịla nyọka la ọhịhị ọmyịmyị-ka” ụbwọ wẹ ka la ọmyịmyị. (Ụkụr. 13:48) Ọ kaa lahị jaabwọ kọ la iJisọsị. Ọ “chị ọkẹkẹnị ọtụka-ọtụka bwula ọngịrị nya Olegu Ịgọgọ” ụka ọlẹ ká angịjụgbẹyị nyamwụ kpa oja ọnyịịla nyà bwu ẹgẹlẹ kị kaka kpa ẹrụ ọnyịịla pyẹ.​—Luk. 10:1, 17, 21.

2. Ányị ahị tị́ ka bwu mẹjẹ nyori áhị hu ụkụrwọ nya ẹrụ ọnyịịla ọ-kpa pyẹ nyahị nya ẹla nya ayịlọ ka?

² Áhị kaa hu ụkụrwọ nya ẹrụ ọnyịịla ọ-kpa pyẹ nya ẹla nya ayịlọ ka. Ọlẹrụ ịPọlụ byi iTimoti yẹkẹẹ: “Kpahị ju ọgụ-ẹpẹtẹ nya ịlọng, ká juwa kpahị ju ụma nya ang ọlẹ ká juwa mẹjẹ angịnyị chajị nya Ohe Oluhye ịnyịnyị mẹ.” ỊPọlụ myịmyị yẹkẹẹ: “O-bwula ụgbẹyị ọlịịwẹ, ahụ ayịdang bala angịlẹ ká juwa mẹ ẹla nya Ohe Oluhye jẹ, a ka bwu wu ọchịda nya Ohe Oluhye ọyị myị́ lẹlẹ.” (1 Tim. 4:16) Lẹ, ẹrụ ọnyịịla ọ-kpa pyẹ nyahị kaa chị ọhịhị da. Ahị kaa kpahị ju ịlọhị ụka myị́ ụka chajị ahị ji ekpeleji nya Ịpyị-Adịrahụ nya Ohe. Ụka myị́ ụka wuu, ahị kaa tịtọ nyọka họ ẹla ụ-ụgbẹyị ọlẹ kọ ka kpa ogbo wẹ ẹnyị nya iJihova bala ọ-ka pwoku ẹrụ ọnyịịla ọlẹ kahị kaa kpa pyẹ. (Filip. 1:27) Ahị kaa ‘kpahị ju ẹla ọlẹ kahị kaa mẹjẹ’ bwula ọ-nwụlanọ yẹẹyẹẹ ene kahị ka kpehe nya ẹla Ohe bala ọ-raabwọ ká iJihova ka dahị ụbwọ ene kahị ka ya ẹla je angịkịla.

3. Ọng myị́ ọng à ka ye ẹrụ ọnyịịla nya Ịpyị-Adịrahụ myị lẹẹ? Ya ọ-cụ pwokwita ọhẹ wẹẹ.

³ Ụka kahị dọmwụ maga nyọka ya ẹla nya Ohe je angịkịla wẹwẹ, angịnyị lụmẹ-lụmẹ o-oye nyahị á ka ke ụrụ wo la ẹrụ ọnyịịla nya Ịpyị-Adịrahụ ka myị́. Kụ irya nya ẹla ọlẹ kọ họ ẹ-ẹga  nya Ọọnahị Georg Lindal, ọlẹ kọọwa ụbwọọmwụ ya ẹla nya Ohe Iceland bwu 1929 ka 1947 wẹẹ. Ọ ya apwụ ụnọ ịmanyị tị́ ha angịnyị, ma ọngọ ookpokpo á tị ye ẹlịlẹhị myị ka. Ọ da ụpwụ yẹkẹẹ: “Angịhyẹ ji ká ẹlịlẹhị waa ẹjẹ, ma angịkịla tị ji kị tịtọ nyọka wo ẹla nya Ohe ka ịịwẹ kem.” Nyọlẹ kpá kị dọmwụ ya aanahị ịlẹ kị ka ube-ụpwụ nya Gilead du ka ụwa nyọka da ụbwọ ẹ-ẹpwụ nya ụkụrwọ nya ẹrụ ọnyịịla ọ-kpa pyẹ wẹwẹ, ẹka ihikichu ọkịla chịpwụru ene ká angịhye bwu Iceland lẹẹ hu ịlaa ju iJihova ụ-ụbwọ bala ọ-hụ enyi Ohe. *

4. Ányị ọ tị́ ka lahị myị́ kori ká angịnyị á myị ke ụrụ wo la ẹrụ ọnyịịla ka?

⁴ Ọ kaa jụ́ụhị ụka ká angịnyị á myị ke ụrụ wo lahị ka. Ọ ka lahị jaabwọ kọ la ịPọlụ myị́, dudu kọ ya nyori ọwa nyị “la ujujwo ọtụka-ọtụka bala ọ-kaa juwa ẹ-ẹpwụ nya ang ọjụjụ ịnyịnyịịnyị ẹ-ẹpwụ ọkịlẹtụ” chajị nyọlẹ ká ala iJuu lẹpwụ-lẹpwụ pwa la o-ye iJisọsị ọngọlẹ ko ri iMesaya myị. (Rom. 9:1-3) Ọhẹka à kaa jẹ́ ịBayịbụụ bala ọngịnyị, à kaa maga jwoo yẹẹyẹẹ bala ọ-raabwọ chajị nyamwụ. Ma kori ká ọngọọwa á tị myị kpa ẹla ọlẹ kọ wẹẹ jẹ́ họ ụkụrwọ ka, dudu ká wẹẹ ka hwabwọ la ịBayịbụụ ọjẹ́jẹ ọọwa bẹẹ? Lee ọ́ tị ri ká ahụ lịlọng á da ọngọhẹ ụbwọ kpụ ọ nwà ka hụ ẹnyi Ohe ẹnẹhẹ lẹka bẹẹ? À ka me irya nyori ọwa nyị la abyị lee ọ-yọọ lala o-ri iJihova nyị́ wahị kụrụ ụkụrwọ nya ẹrụ ọnyịịla ọ-kpa pyẹ nyọwa ka? Ẹ-ẹpwụ nya ang ọjẹ́jẹ ọlẹ, ahị ka wẹ ịtọ ẹla imiiye ịlẹ: (1) Ịyẹ à tị́ kaa mẹjẹ nyori ọngịnyị jụ ụkụrwọ nya ẹrụ ọnyịịla ọ-kpa pyẹ họ? (2) Ẹlịyẹ ahị tị́ ka ya ahị guru gbe ụka kahị ja ya ẹla nya Ohe je angịkịla?

5. Ịyẹ tị́ du ká ụkụrwọ ọlẹ kahị kaa họ ha iJihova ka la jaabwọ kahị yahị mẹ ka ụka ọhẹ myị́?

⁵ ỊBayịbụụ ya nyori ọngịnyị ọlẹ kọọ họ irya nya Ohe nyị ka ‘kịlahị ẹ-ẹpwụ nya ang myị ang ọlẹ kọọ họ.’ (Eje. 1:3) Ma, ọọwa-á tị ri, ang myị́ ang ọlẹ kahị kaa họ ha iJihova ka la jaabwọ kahị yahị me pyii ka. Ọhịhị nya angịnyị ehe wuu tụ́ ịnyahị ịnyịnyị ‘myị la akama’ ọọlajị nya ọ-la kpẹẹkpẹẹ-ka. (Job 14:1) Ịnyịnyị, angị tụ́ụhị pyịpyị ka dudu ụka ọhẹ kahị ka jẹ́-ẹ ya ẹla nya Ohe jaabwọ kahị kaa họ ene-ene ka myị́. (1 Kọr. 16:9; 1 Tẹs. 2:18) Ányị iJihova à tị́ tịtị kaa bwu me ụkụrwọ ọ-jụ họ nyahị ori? Kụ ẹhị yẹ itiwe nya ehile ịlẹpwụ nya ịBayịbụụ ịhyẹ ịlẹ kị ka dahị ụbwọ wẹ ịtọ ẹla ọwẹ wẹẹ.

6. Ányị iJihova à tị́ kaa me ụkụrwọ ọlẹ kahị wẹẹ họ họọ ori?

⁶ IJihova kaa yẹ jaabwọ kahị wẹẹ maga bala ọ-bọhụ. IJihova kaa chị ọkẹkẹnị balahị kori kahị ya ẹla nya Ohe la ila ọchịchị chajị nyori ahị la ọháha ẹ-ẹga nyamwụ, ó-ri ká angịnyị á dọmwụ myị ke ụrụ ka wẹwẹ. ỊPọlụ da ụpwụ yẹkẹẹ: “Ohe Oluhye ayịdang á ri ọlabwẹla onyobyi kpong-kpong ka. Lẹ, ụkụrwọ ọlẹ kanụ wẹẹ họ wuu bala ọháha nya ịlẹhị-ịlẹhị ọlẹ kanụ wẹẹ la ẹ-ẹga nya Ohe Oluhye bwula ẹrụ ọmyịmyị ha angị ịgọgọ nya Ohe Oluhye wuu ịnyịnyịịnyị pyịyọọ daalẹ lẹ, Ohe Oluhye á ka jẹ́-ẹ deeri nyaa  kpong-kpong kaka.” (Hib. 6:10) IJihova kaa kpịtịya nya ụkụrwọ bala ọháha nyahị, kori ká angịlẹ kahị kaa mẹ ịBayịbụụ jẹ á dọmwụ nwà ka hụ enyi Ohe ka wẹwẹ. ỊPọlụ byi Angịnyị nya ịKịrayịsị nyori ‘ụkụrwọ nya Ọngọlahị ọlẹ kanụ wẹẹ họ á ka ri ang ododu kpong-kpong ka.’ Lẹ, à ka jẹ́-ẹ kpa ẹlẹwẹ họ ụkụrwọ ẹ-ẹga nya ịlọng myị́, ó-ri ká ụkụrwọ nyang á dọmwụ la jaabwọ ká yahị me ka wẹwẹ.​—1 Kọr. 15:58.

7. Ịyẹ ahị tị́ ka jẹ́ bwu ụgbẹyị ọlẹ ká ọlẹrụ ịPọlụ chabwọ nya ụkụrwọ nya ẹrụ ọnyịịla ọ-kpa pyẹ nyamwụ?

⁷ Ọlẹrụ ịPọlụ ri ọngọ kpa ẹrụ ọnyịịla pyẹ ọlẹ kọ kaa jụ ụkụrwọ họ yẹẹyẹẹ, kpụ ọ kaa ya ọjịra-jịra yeji e-epweji lụmẹ-lụmẹ. Ma, ụka ọlẹ ká angịhyẹ kpụ ịPọlụ abyị, kị ya nyori nyị́ ri ọngọmẹjẹ ọlam ka lẹ, ọ́ ya ẹla u-uhye nya angị ịmanyị ịlẹ kọ da ụbwọ wẹ ka ri Angịnyị nya ịKịrayịsị nyọka gba ịlọmwụ kpehe hi ẹpwụ nya abyị ka. Ọkọkọ nya ọọwa, ịPọlụ kpa angịlẹ kị wẹẹ tịtọ nyọka hu ịlaa hwaa weji bwula o-ya nyori ọwa nyị “họ ụkụrwọ ọnyọọngịrị ha ịKịrayịsị gwaa.” (2 Kọr. 11:23) Lala ịPọlụ, kpịtịya nyori aga ọmama bala ọhụ ọbaba nyahị à kaa kpụ iJihova ịpyọ lẹ.

8. Ẹlịyẹ ahị tị́ ka kpịtịya u-uhye nya ụkụrwọ nya ẹrụ ọnyịịla ọ-kpa pyẹ nyahị?

⁸ Ẹrụ ọnyịịla ọ-kpa pyẹ nyahị kaa kpụ iJihova ịpyọ. IJisọsị du angịjụgbẹyị nyamwụ angị 70 ẹrụ kaka ya ẹrụ ọnyịịla nya Ịpyị-Adịrahụ, ị tị “nyà la ọkẹkẹnị ọchịchị” la ocheju nya ụkụrwọ nyaa ọọwa. Ịyẹ tị́ du kị chị ọkẹkẹnị? I yẹkẹẹ: “Ọngọlahị ee, ahị kpa ọngịrị nya ẹnyị nyang kụrụ alegu inyibyi chẹẹ-chẹẹ lẹ!” Ma, iJisọsị tị nwụ irya nyaa rịrị nyọlẹ kọ byaa yẹkẹẹ: “Anụ juwa chị ọkẹkẹnị chajị nya ụkụrwọ ẹbyẹbyị ịlịịwẹ wuu koo! Ma, anụ tụtụ juwa chị ọkẹkẹnị chajị nyọlẹ kị da ẹnyị nyanụ ụ-ụwa e-epwoohe lẹ mẹ.” (Luk. 10:17-20) IJisọsị jẹ́ nyori ụkụrwọ nya ẹrụ ọnyịịla ọ-kpa pyẹ nyị́ ka lịịwẹ ụka myị́ ụka ka. Áhị dọmwụ jẹ́ ụmụmẹ nya angịlẹ ká angịjụgbẹyi nya iJisọsị ịwẹ ya ẹla je, kị wẹ ka ri Angịnyị nya ịKịrayịsị ka. Angịjụgbẹyị ịwẹ baba nyọka jẹ́ nyori a-angịnyị o-ke ụrụ wo laa kem à ka ya ọkẹkẹnị haa ka. Ọkẹkẹnị nyaa ọgụgụ wuu ka bwula ọ-jẹ́ nyori ụkụrwọ ọlẹ kị wẹẹ họ la ọngịrị nyaa wuu kpụ iJihova ịpyọ.

9. Jaabwọ ká ụpwụ nya Ala ịGalatiya 6:7-9 ya, ịyẹ à tị́ ka họ kori kahị kịnyaa la ọ-bọhụ ẹ-ẹpwụ nya ẹrụ ọnyịịla ọ-kpa pyẹ?

⁹ Ó-ri kahị bọhụ ẹ-ẹpwụ nya ẹrụ ọnyịịla ọ-kpa pyẹ, ahị ka ye ọhịhị o-gboyi myị́ oyi. Jaabwọ kahị wẹẹ maga bwu ọkịlẹtụ nyahị wuu nyọka ya ugbe nya ẹlịlẹhị nya Ịpyị-Adịrahụ nya Ohe tọ bala ọ-kpahị jwọọ, ahị wẹẹ “tọ ugbe nya abwẹla ọhọhọ ha Olegu Ịgọgọ” bwula ọ-ya iwe da ká Olegu Ịgọgọ nya Ohe Oluhye ka họ ụkụrwọ ẹ-ẹpwụ nya ọhịhị nyahị. Ó-ri ká abwọ á “chị́ịhị pyẹpyẹ” ka lee ó-ri “kahị kpụ ịbwọ” kaka lẹ aalẹ, iJihova myị ọnụ nyọka ya ọhịhị ọmyịmyị-ka hahị, nanana nyori áhị dọmwụ jẹ́ da ọngịnyị ụbwọ kpụ ọ wẹ ka hu enyi Ohe ka.​—Wa Ala ịGaletiya 6:7-9.

10. Ịyẹ tị́ du ká angịhyẹ kaa ke ụrụ wo lahị ụka kahị ya ẹla nya Ohe jaa, ká angịkịla tị kaa ke ụrụ ka?

¹⁰ Angịnyị ọ-ka ke ụrụ lee ọ-ka kẹ ụrụ ka kpụnịrọ ọkịlẹtụ nyaa. IJisọsị da ẹlịlẹhị ọwẹ wụlẹ ẹ-ẹpwụ nya oja ọ-chụ pwokwita nya ọlẹrụ ọlẹ kọ ya ajẹ nya ang-ẹrụ hụ ọ-ọpyị ụma ịdatị-datị, ma ajẹ ịla ọpyị ọnyịịla kem à nwụ́ egbe lẹ. (Luk. 8:5-8) IJisọsị ya nyori ọpyị ụma ịdatị-datị nyị ku ọmwakpa nya angịnyị ịlẹ ká ọkịlẹtụ nyaa kpa họ ẹla ịdatị-datị u-uhye nya “ẹla nya Ohe Oluhye” ọlẹ kị wo. (Luk. 8:11-15) Lala ọngọ hụ ajẹ ọwẹ, áhị ka jẹ́-ẹ họ ẹla nyahị ka nwà ẹ-ẹpwụ ọkịlẹtụ nya angịlẹ kahị ya ẹla je ka. Ụkụrwọ nyahị ri ọ-ka kịnyaa la ọ-ya ajẹ ịnyịịla, kọ ri ẹla nya Ịpyị-Adịrahụ hụ. Jaabwọ ká ọlẹrụ ịPọlụ ya, Ohe ka “nwụ ọng myị́ ọng lẹpwarịrị nya angịịwa uri nya ụkụrwọ jaabwọ kị bwu họ ụkụrwọ ọọwa kaka ba” ịnyị, ma a-abwọlẹ ká o-ya dodehe nya ụkụrwọ nyaa la ka.​—1 Kọr. 3:8.

11. Ịyẹ tị́ du ká iJihova chị ọkẹkẹnị bala iNuwa nanana nyori angịnyị-ị́ myị ka ụrụ wo lọọ ka? (Yẹ ifoto ọla ẹbẹ nya ọgbanyẹ.)

 ¹¹ Ego mẹjẹ nyori anchẹ nya iJihova kaa ya ẹla je angịnyị ịlẹ kị myị-ị̀ ke ụrụ ka lụka ọtata lẹ. Ọ-chụ pwokwita, iNuwa kaa ya ẹla . . . rụ́ abwẹla ọnyịịla ọhọhọ” ẹ-ẹpwụ nya ẹka lala iwo ine lee iwo ịrụ. (2 Pit. 2:5) Ịwẹẹ ọdada á juwa ka, ọ ka yẹhị rịrị nyori angịnyị ka ke ụrụ wọ lọọ ịnọ, ma iJihova á tị ya nyori nyị ka lịnyị ka. Ọkọkọ nya ọọwa, ụka ká Ohe wẹẹ byi iNuwa nyị kọ ụmwụ lẹ, Ohe yẹkẹẹ: “Ahụ ayịdang bala ahụ nyang, anyị alẹng nyang wuu bala ịhụ nyaa wuu, . . . ka rụ ju ka ẹpwụ nya ụgbọ nya enyi.” (Ọmwụ. 6:18) Ụka ká iJihova ya jaabwọ ká ụgbọ nya enyi ọọwa ka ju ẹpwụ kaka ba lẹ, iNuwa ka jẹ́ pyii nyori angịnyị nyị́ ka ke ụrụ lọọ gbuu ka, chajị ụgbọ ọwẹ á ka jẹ́-ẹ nwaa wuu ka. (Ọmwụ. 6:15) Jaabwọ kahị jẹ́, ọngọ ookpokpo á dọmwụ ke ụrụ wo la ẹla nya iNuwa ka. (Ọmwụ. 7:7) IJihova yẹ iNuwa lala ọngọ jụ ụkụrwọ họ ka? Ọ́ họ ịnyị kpong-kpong ka! IJihova chị ọkẹkẹnị bala iNuwa chajị ọ họ ụkụrwọ ọlẹ ká Ohe byoo nyị họ jịra.​—Ọmwụ. 6:22.

12. Ányị ọlọmwụ iJeremaya à tị́ bwu yé ọkẹkẹnị nanana nyori angịnyị á ke ụrụ wo lọọ ka bala o-ri ị kaa tọọ pyịpyị?

¹² Ọlọmwu iJeremaya ịnyịnyị ya ẹla nya Ohe kpoye nya ẹka 40 nanana nyori angịnyị á kaa ke ụrụ wo lọọ ka bala o-ri ị kaa tọọ pyịpyị. Ọkịlẹtụ kpọọ enyi ọọlajị nyọlẹ ká aluji kaa ‘kpọọ họ utunguru bala ọ-kpọọ do’ gbee kọọ tịtọ nyọka hwabwọ la ụkụrwọ nyamwụ ịnọ. (Jer. 20:8, 9) Ma abwọ á tị chị iJeremaya pyẹpyẹ ka! Ịyẹ à tị́ dọọ ụbwọ nyọka kịnyaa la ụkụrwọ bala ọ-ka yé ọkẹkẹnị ẹ-ẹpwụ nyamwụ? Ọ ya ẹhị rịrị u-uhye nya ẹla ịkpọnchị imiiye. Ọhọhẹ, ẹla nya Ohe ọlẹ ká iJeremaya wẹẹ ya je angịnyị ya ahị ọ-dahile haa nya ‘ijuju ọ-ka hiigu.’ (Jer. 29:11) Oheeye, iJihova à chụ iJeremaya nyọka ya ẹla ku ọmwakpa nyamwụ je angịnyị lẹ. (Jer. 15:16) Ahị ịnyịnyị wẹẹ ya ẹla ọlẹ kọọ ya ahị ọ-dahile ha angịnyị alẹ, ahị tị kaa myị ẹnyị nya iJihova lala Alibeenu nyamwụ ịnyịnyị. Ụka kahị ya ẹhị nyahị rịrị u-uhye nya ẹla ịkpọnchị ịwẹ, ahị ka jẹ́-ẹ chị ọkẹkẹnị kori ká angịnyị á ke ụrụ lahị wẹwẹ ka.

13. Ẹlịyẹ ahị tị́ jẹ́ bwu oja ọ-chụ pwokwita nya iJisọsị ọlụpwụ nya ịMakị 4:26-29?

¹³ Ọ kaa tata ene ká ọngịnyị ka la ọmyịmyị. IJisọsị mẹ ẹlịlẹhị ọwẹ jẹ ụka ọlẹ kọ joja ọ-chụ pwokwita nya ọngọ hụ ajẹ ọlẹ kọ rụ ka nune. (Wa ịMakị 4:26-29.) Nyọlẹ ká ọlẹrụ ọọwa ya ajẹ hụ kpá, ịwa à nwà dụmwọ-dụmwọ lịlaa lẹ, ma ọọwa à kpaa nwà ka. Ọhẹka ahụ ịnyịnyị ka dayị tata ene ká ọngọlẹ ká mẹ ịBayịbụụ jẹ ka kpa ẹla ọlẹ kọ jẹ́ họ ụkụrwọ myị́. Jaabwọ ká ọlẹrụ ọwẹ á ka jẹ́-ẹ chị ẹrụ nyamwụ agaga nyọka nwà ka, ahị-ị́ ka jẹ́-ẹ chị angịlẹ kahị kaa mẹ ịBayịbụụ jẹ agaga nyọka nwà ẹ-ẹpwụ nya ang nya olegu ka ịnyịnyị. Lẹ ọkịlẹtụ a kpụng enyi lee abwọ a chịng pyẹpyẹ kori kị myị nwà kịlahị jaabwọ ká yahị me ka lẹ ka. Lala ụkụrwọ nya ẹrụ, ọ-họ ká angịkịla ka ri angịjụgbẹyị baba nya ọhụ ọ-da pịlẹ.​—Jem. 5:7, 8.

14. Ọ-chụ pwokwita oyina à tị́ mẹjẹ nyori ọ kaa tata ene ká angịnyị ka dọmwụ nya o-ke ụrụ wo lahị?

¹⁴ Ẹ-ẹga ịhyẹ, ọ kaa la ẹka ịmanyị-ịmanyị ene ká ọngịnyị ka myị-ị̀ nwà ka hụ enyi Ohe. Kụ ẹhị yẹ oja nya Gladys bala Ruby Allen, anyịnịna anyang ịlẹ kị ya du kaka ri angị ye ịlahị nya ụgbẹyị e-epweji nya Quebec ẹ-ẹpwụma nya Canada, la ẹka nya 1959 wẹẹ. * Chajị nya ẹla ọlẹ ká alepweji kaa kpa yẹ rịraa bala ẹla ọlẹ ká ala ịchọọchị nya ịfada kaa ya, angịnyị á kaa ke ụrụ wo ẹla nya Ịpyị-Adịrahụ ka. Gladys kpịtịya yẹkẹẹ: “Ahị jẹ bwu ẹpwa ka ẹpwa awa ineku ahyẹẹnụ ọnyị myị́ ọnyị ẹ-ẹpwụ nya ẹka imiiye gbẹgbịlẹ la ọngọngọhẹ ọ-dọnụ wẹẹhị ka! Ụka kị wụrụ ụgbẹyị kị jẹ́ nya ahị lẹ, ị kaa rụ tịrẹkpẹ lẹlẹ. Ma abwọ á tị chị́ịhị pyẹpyẹ ka.” Nyọlẹ kọ nọ chẹẹ, angịnyị yi ẹhị da kpụ angịhyẹ dọmwụ  nyọka ke ụrụ lahị. Ọjịra-jịra ịta juwa o-oye nya ẹga ọọwa lẹẹlẹẹ lẹ.​—Ayị. 60:22.

15. Ẹlịyẹ ụpwụ nya 1 Ala ịKọrịntị 3:6, 7 à tị́ mẹjẹ́ẹhị u-uhye nya ụkụrwọ nya ọ-họ ká angịkịla ka ri angịjụgbẹyị?

¹⁵ Ọ-họ ká angịnyị ka ri angịjụgbẹyị ri ụkụrwọ ọ-ya ụbwọ da awụlẹ họ. Alọjịra-jịra wuu à kaa da ọngịnyị ụbwọ nyọka nwà ka hu enyi Ohe lẹ. (Wa 1 Ala ịKọrịntị 3:6, 7.) Ọ-chụ pwokwita, ọọnahị ọhẹ ka ya ịtịrakị lee ịmagajini ha ọngịnyị ọlẹ kọ ke ụrụ myị́. Ọọnahị ọọwa tị yẹ nyori ọwa nyị́ ka yé ụka tịrẹkpe kaka mẹ ang jọ́ọ kịlahị ka, lẹ ọ ya je ọọnahị ọkịla nyọka tịrẹkpẹ ka ẹga nya ọngọọwa. Ọọnahị ọwẹ dọmwụ nya ịBayịbụụ ọjẹ́jẹ bala ọngọọwa. Ọwa ịnyịnyị tị kaa kpa aanahị alẹng bala anyang ịkịla ba ịlọmwụ kaka mẹ ang jọ́ọ, ọng myị́ ọng nyaa tị kaa ju ọngọọwa ọhụ a-agbẹyị ịdatị-datị ịnyịnyị. Ọọnahị ọnyị myị́ ọnyị ọlẹ kọ wẹ ẹga nya ọngọ wẹẹ jẹ́ ịBayịbụụ kaa dọọ ụbwọ nyọka nwà kịlahị ẹ-ẹpwụ nya ọmyịmyị ọlala. Bwula ụgbẹyị ọwẹ, ọ la jaabwọ ká iJisọsị ya nyori ọngọ ya ajẹ hụ bala ọngọ wụwụ nyị ka chị ọkẹkẹnị lawụlẹ.​—Jọn. 4:35-38.

16. Ịyẹ tị́ du ká ka jẹ́-ẹ chị ọkẹkẹnị myị́ kori ká jẹ́-ẹ kpa ẹrụ ọnyịịla pyẹ gbuu ka ọọlajị nya ẹdụrụ lee ịnyịrọ ọ-la gogo ka?

¹⁶ Ó tị ri ká jẹ́-ẹ kpa ẹrụ ọnyịịla pyẹ bala ọ-mẹ ang jẹ jaabwọ ká kaa họ ene kaka ọọlajị nya ẹdụrụ lee ịnyịrọ ọ-la gogo ka bẹ? À ka jẹ́-ẹ chị ọkẹkẹnị chajị nya ọlẹ ká wẹẹ jụ họ ẹ-ẹpwụ nya ụkụrwọ nya ang ọwụwụ myị́. Kụ irya nya ẹla ọlẹ kọ họ ụka ọlẹ ká Adịrahụ iDevidi bala alẹwụ nyamwụ kaka kpa alugbiyegu nyaa nyà bwu ụbwọ nya ala Amalẹkị wẹẹ. Ịnyịrọ chị angị ohu imiiye lẹpwụ nyaa pyẹpyẹ kpoye nyọka jẹ́-ẹ ma uya, lẹ ịwa dayị ẹ-ẹkpẹ nyọka kpẹhị rịrị olo nyaa. Ụka kị kụrụ ẹwụ ọọwa kpá, iDevidi ya nyori nyị ga ang ịlẹ kị kpa nyà bwu ẹwụ gịlaa wuu memeeme. (1 Sam. 30:21-25) Ịnyịnyị ọ la ẹ-ẹga nya ụkụrwọ nya ọ-họ ká angịnyị ka ri angịjụgbẹyị ọlẹ kahị wẹẹ họ chị odehe ọnụ wuu lẹ. Ọng myị́ ọng ọlẹ kọ họ jaabwọ kọ ka jụ họ ba myị́ lẹ aalẹ, ọ ka chị ọkẹkẹnị lala angịkịla ụka kị jẹ́ da ụbwọ chị ọngọ ookpokpo da wẹpwụ nya ụgbẹyi ọlẹ kọ da ka ọhịhị.

17. Ẹlịyẹ ahị tị́ ka ji iJihova obe chajị nyamwụ?

¹⁷ Ahị ji iJihova obe chajị nya ẹhị ọnyịịla ọlẹ kọ kaa kpa yẹ ụkụrwọ ọlẹ kahị wẹẹ họ họọ. Ọ jẹ́ nyori ahị nyị́ ka jẹ́-ẹ họ angịnyị ka ke ụrụ wo lahị bala ọ-gbịgba họọ la agbụrụ ka. Ọ lịnyị odu lẹ, ọ jẹ́ jaabwọ kahị wẹẹ maga kaka ba bala irya ọnyịịla ọlẹ kahị la, ọ tị ka wahị kụrụụhị ịnyịnyị. Ọ tị kaa mẹjẹ́ẹhị jaabwọ kahị ka bwu chị ọkẹkẹnị u-uhye nya ọlẹ kahị họ myị́ ẹ-ẹpwụ nya ẹrụ ọnyịịla ọ-kpa pyẹ. (Jọn. 14:12) Ahị jẹ́ myị̀myị̀ nyori iJihova ka chị ọkẹkẹnị balahị kori ká abwọ á chị́ịhị pyẹpyẹ ka!