1. Apay a naragsaktayo ken ipagpannakkeltayo a maysatayo kadagiti Saksi ni Jehova?

NARAGSAK ken ipagpannakkeltayo a maysatayo kadagiti Saksi ni Jehova! Aw-awitentayo ti nagan ti Dios, ken agbibiagtayo maitunos iti dayta a nagan babaen ti pannakipasettayo iti trabaho a panangasaba ken panagaramid kadagiti adalan. Agragsaktayo no matulongantayo nga agbalin a manamati ti maysa nga “addaan iti umiso a kababalin nga umawat iti agnanayon a biag.” (Ara. 13:48) Kasta met idi ti narikna ni Jesus. “Napno . . . iti nasantuan nga espiritu isu a napalalo ti ragsakna” idi nagsubli dagiti adalanna manipud iti naballigi a panangasabada.​—Luc. 10:1, 17, 21.

2. Kasanotayo nga ipakita a nakapatpateg kadatayo ti ministeriotayo?

² Nakapatpateg kadatayo ti ministeriotayo. Imbalakad ni apostol Pablo ken Timoteo: “Kanayon nga asikasuem ti bagim ken ti isursurom.” Innayon pay ni Pablo: “No kasta ti aramidem, maisalakanmonto ti bagim ken dagiti dumngeg kenka.” (1 Tim. 4:16) Biag ngarud ti nakataya. Kanayon nga as-asikasuentayo ti bagitayo gapu ta agpaspasakuptayo iti Pagarian ti Dios. Kayattayo nga amin nga ar-aramidentayo ket mangyeg iti pakaidayawan ni Jehova ken maitunos iti naimbag a damag nga ikaskasabatayo. (Fil. 1:27) ‘Kanayon nga as-asikasuentayo ti isursurotayo’ babaen ti panagsaganatayo a naimbag iti ministeriotayo ken babaen ti panagkiddaw iti pamendision ni Jehova sakbay a mangasabatayo.

3. Aginteresto kadi ti amin a tattao iti mensahe ti Pagarian? Mangted iti pagarigan.

³ Uray no ar-aramidentayo ti amin a kabaelantayo, mabalin a bassit wenno awan pay ketdi ti aginteres iti mensahe ti Pagarian iti teritoriatayo. Usigentayo ti kapadasan ni Brother Georg Lindal nga agmaymaysa a nangasaba iti intero  nga Iceland manipud 1929 agingga iti 1947. Pinullo a ribu a publikasion ti naipaimana. Ngem awan man la uray maysa ti nagbalin a Saksi. Insuratna: “Dadduma ti nangbusor iti kinapudno, ket ti kaaduan saanda a nangikankano.” Uray no adda dagiti naibaon a misionero a naggraduar iti Gilead tapno tumulong iti panangpalawa iti trabaho, limmabas pay ti siam a tawen sakbay nga adda dagiti taga-Iceland a nangidedikar iti biagda ken Jehova ken nagpabautisar. *

4. Ania ti mabalin a mariknatayo no negatibo ti reaksion dagiti tattao iti naimbag a damag?

⁴ Maupaytayo no negatibo ti reaksion dagiti tattao. Mabalin a kaslatayo ken Pablo a nakarikna iti ‘napalalo a ladingit ken saan nga agsardeng nga ut-ot’ gapu ta kaaduan a Judio ti saan a nangawat ken Jesus kas ti naikari a Mesias. (Roma 9:1-3) Kasanon no ar-aramidem ti amin a kabaelam ken ikarkararagam pay ketdi ti iyad-adalam iti Biblia ngem saan latta a rumangrang-ay ken masapul nga isardengyon ti panagadalyo? Wenno kasano ngay no awan pay ti iyad-adalam iti Biblia a nabautisaran? Pabasolem kadi ti bagim ken panunotem a saan a bembendisionan ni Jehova ti ministeriom? Iti daytoy nga artikulo, sungbatantayo ti dua a saludsod: (1) Ania ti pakakitaan a naballigi ti ministeriotayo? (2) Ania dagiti masapul a realistiko nga ekspektarentayo?

5. Apay a mabalin a saan a kanayon a mapasamak ti namnamaentayo a resulta iti trabaho nga ar-aramidentayo para ken Jehova?

⁵ Kuna ti Biblia maipapan iti tao a mangar-aramid iti pagayatan ti Dios: “Agballigi ti amin nga aramidenna.” (Sal. 1:3) Ngem saan a kaipapanan dayta nga amin nga ar-aramidentayo para ken Jehova ket agresulta iti namnamaentayo a mapasamak. Ti biag ti tao ket “napno iti riribuk” gapu iti kinaimperpektotayo ken ti sabsabali. (Job 14:1) Mabalin met a temporario a mapasardeng dagiti bumusbusor dagiti panagreggettayo a mangitultuloy iti pangpubliko a ministeriotayo. (1 Cor. 16:9; 1 Tes. 2:18) Ania ngarud ti pangrukodan ni Jehova iti balligi ti ministeriotayo? Usigentayo ti dadduma a prinsipio ti Biblia tapno masungbatan dayta.

6. Ania ngarud ti pangrukodan ni Jehova tapno ibilangna a naballigi ti trabahotayo para kenkuana?

⁶ Kitkitaen ni Jehova dagiti panagregget ken ti panagibturtayo. Para ken Jehova, naballigi ti trabahotayo no aramidentayo dayta a napakuyogan iti kinagaget ken ayat, aniaman ti reaksion dagiti tattao. Insurat ni Pablo: “Saan a nakillo ti Dios tapno lipatenna ti aramidyo ken ti ayat nga impakitayo iti naganna, babaen ti panagserbiyo ken agtultuloy a panagserbiyo kadagiti nasantuan.” (Heb. 6:10) Silalagip ni Jehova iti panagregget ken ayattayo uray no awan ti positibo a resulta dagita a panagregget. Agaplikar met ngarud kenka  ti imbaga ni Pablo kadagiti taga-Corinto: “Napateg [wenno, saan a sayang] ti panagbannogyo mainaig iti Apo,” mapasamak man wenno saan ti namnamaem a resulta dayta a panagbannogmo.​—1 Cor. 15:58.

7. Ania ti masursurotayo maipapan iti imbaga ni apostol Pablo maipapan iti ministeriona?

⁷ Nagpaiduma a misionero ni apostol Pablo, ta nakabuangay kadagiti baro a kongregasion iti adu a siudad. Ngem idi nariknana a masapul nga idepensana ti kualipikasionna kas ministro ni Kristo kadagidiay nangibilang iti bagida a nangatngato ngem isuna, dina impaganetget ti bilang dagiti tattao a natulonganna nga agbalin a Kristiano. Imbes ketdi, insurat ni Pablo: “Ad-adu ti naaramidak.” (2 Cor. 11:23) Kas ken Pablo, laglagipentayo a ti kapatgan ken Jehova ket dagiti panagreggettayo ken ti panagibturtayo.

8. Ania ti masapul a laglagipentayo maipapan iti ministeriotayo?

⁸ Maay-ayotayo ni Jehova iti ministeriotayo. Nangibaon ni Jesus iti 70 nga adalan a mangikasaba iti mensahe ti Pagarian. Idi nagsublida, “maragragsakan[da].” Apay? Imbagada: “Uray dagiti demonio nagtulnogda kadakami idi inusarmi ti naganmo.” Ngem kinorehir ni Jesus ti panagpampanunotda: “Dikay agragsak gapu ta nagtulnog kadakayo dagiti demonio. Agragsakkayo ketdi gapu ta naisuraten idiay langit dagiti naganyo.” (Luc. 10:17-20) Ammo ni Jesus a saan a kanayon a maaddaanda kadagiti napintas a kapadasan iti ministerioda. Kinapudnona, ditay ammo no mano kadagidiay dimngeg kadagiti adalan ti nagbalin a Kristiano. Masapul a maawatan dagiti adalan a ti ragsakda ket saan laeng a nakadepende kadagiti nagapuananda, no di ket kangrunaanna, iti pannakaammoda a maay-ayo ni Jehova kadagiti panagporsegida.

9. Sigun iti Galacia 6:7-9, ania ti masagraptayo no ditay agsardeng iti ministeriotayo?

⁹ No ditay agsardeng iti ministeriotayo, masagraptayo ti biag nga agnanayon. Bayat nga ar-aramidentayo ti amin a kabaelantayo nga agmula ken mangkultibar kadagiti bukel ti kinapudno maipapan iti Pagarian, ‘agimulmulatayo met para iti espiritu’ ta ipalpalubostayo a ti nasantuan nga espiritu ti Dios ti mangimpluensia iti biagtayo. No ditay “sumuko” wenno “mabannog,” ipasigurado ni Jehova a biag nga agnanayon ti apitentayo, adda man wenno awan ti matulongantayo nga agdedikar iti Dios.​—Basaen ti Galacia 6:7-9.

10. Nakadepende iti ania ti reaksion dagiti tattao iti ministeriotayo?

¹⁰ Agdepende ti reaksion dagiti tattao kangrunaanna iti kasasaad ti pusoda. Inlawlawag ni Jesus daytoy a kinapudno iti ilustrasionna maipapan iti nagmula a nangiwaris kadagiti bin-i iti nadumaduma a klase ti daga. Ngem dagiti laeng naimula iti nasayaat a daga ti nagbunga. (Luc. 8:5-8) Imbaga ni Jesus a ti nadumaduma a klase ti daga irepresentarda dagiti tattao a nagduduma ti reaksion ti pusoda iti “sao ti Dios.” (Luc. 8:11-15) Kas iti nagmula, saantayo a kontrolado ti bunga ti trabahotayo, ta agdepende dayta iti kasasaad ti puso dagiti tattao. Ti responsabilidadtayo ket itultuloytayo ti agmula iti nasayaat a bin-i ti mensahe ti Pagarian. Kas iti imbaga ni apostol Pablo, “umawatto iti gunggona ti tunggal maysa sigun iti panagtrabahona,” saan a kadagiti resulta ti panagtrabahona.​—1 Cor. 3:8.

11. Apay a naballigi ni Noe a “nangikaskasaba iti kinalinteg”? (Kitaen ti ladawan iti akkub.)

¹¹ Naipasango idi dagiti nagkauna a saksi ni Jehova kadagiti saan nga interesado. Kas pagarigan, ni Noe ket “nangikaskasaba iti kinalinteg,”  posible nga iti adu a dekada. (2 Ped. 2:5) Sigurado a ninamnama ni Noe a dumngeg koma dagiti tattao iti panangasabana, ngem awan ti imbaga ni Jehova a kasta ti mapasamak. Imbes ketdi, imbaga ti Dios idi imbilinna ken Noe a mangaramid iti daong: “Sumrekkayo iti daong​—sika, ti annakmo a lallaki, ti asawam, ken ti assawa dagiti annakmo.” (Gen. 6:18) No pinampanunot ni Noe ti rukod ken malaon ti daong nga impaibangon ti Dios kenkuana, mabalin a naamirisna a talaga a limitado ti bilang dagiti mangipangag iti panangasabana. (Gen. 6:15) Kas ammotayo, awan uray maysa iti dayta a naranggas a lubong ti nangipangag iti panangasaba ni Noe. (Gen. 7:7) Imbilang kadi ni Jehova a napaay ni Noe? Saan a pulos! Para ken Jehova, ni Noe ket naballigi a manangaskasaba ta simamatalek a sinurotna dagiti naipaaramid kenkuana.​—Gen. 6:22.

12. Apay a naragsak latta ni propeta Jeremias iti ministeriona uray naipasango iti panangyaleng-aleng ken ibubusor?

¹² Adu met a dekada a nangasaba ni propeta Jeremias uray naipasango iti panangyaleng-aleng ken ibubusor. Naupay unay kadagiti ‘panangin-insulto ken pananguy-uyaw’ dagiti bumusbusor nga uray la kayatnan ti agsardeng a mangasaba. (Jer. 20:8, 9) Ngem saan a simmuko ni Jeremias! Ania ti nakatulong kenkuana a mangiwaksi iti negatibo a pampanunotna ken agtalinaed a naragsak iti ministeriona? Nagpokus iti dua a napateg a banag. Umuna, ti mensahe ti Dios nga ipakaammo ni Jeremias kadagiti tattao ket mangyeg iti “nasayaat a masakbayan ken namnama.” (Jer. 29:11) Maikadua, inkabil ni Jehova ti naganna iti nagan ni Jeremias. (Jer. 15:16) Ikaskasabatayo met ti mensahe a mangyeg iti namnama iti lubong a napnuan iti liday, ken aw-awitentayo ti nagan ni Jehova kas dagiti Saksina. No agpokustayo kadagita a dua a napateg a banag, naragsaktayo latta aniaman ti reaksion dagiti tattao.

13. Ania ti masursurotayo iti ilustrasion ni Jesus iti Marcos 4:26-29?

¹³ In-inut ti naespirituan nga irarang-ay. Insuro ni Jesus daytoy a kinapudno iti ilustrasionna maipapan iti agmulmula ken ti pannaturogna. (Basaen ti Marcos 4:26-29.) In-inut ti panagtubo dagiti immulana ken dina makontrol ti panagdakkel dagita. Kastaka met. Mabalin a saanmo a makita a dagus dagiti resulta ti panagaramidmo iti adalan gapu ta tiempo ti kasapulan iti naespirituan nga irarang-ay. No kasano a saan a mabalin nga apuraen ti maysa a mannalon ti panagdakkel dagiti mulana iti kapartak a kayatna, saantayo met a mabalin nga apuraen ti naespirituan nga irarang-ay dagiti iyad-adalantayo iti Biblia iti kapartak a kayattayo. Dika ngarud maup-upay wenno sumuksuko no medio nabumbuntog ti irarang-ayda ngem iti ekspektarem. Kas iti panagmula, anus ti kasapulan iti panagaramid kadagiti adalan.​—Sant. 5:7, 8.

14. Ania a pagarigan ti mangipakita a mabalin a napaut a tiempo ti kasapulan sakbay a makitatayo dagiti resulta ti ministeriotayo?

¹⁴ Iti dadduma a teritoria, mabalin nga adu a tawen ti lumabas sakbay a makitatayo dagiti resulta ti ministeriotayo. Kitaentayo ti kapadasan ti agkabsat a da Gladys ken Ruby Allen. Idi 1959, naibaonda kas regular pioneer iti maysa nga ili iti Quebec, Canada. * Saan a dimngeg dagiti tattao gapu ta mabutengda iti ibaga dagiti kaarrubada ken ti papadi dagiti Katoliko no makisaritada kadagiti Saksi. Malagip ni Gladys: “Iti unos ti dua a tawen, walo nga oras kada aldaw a nagbalaybalaykami nga awan ti nakasaomi! Sumirip laeng dagiti tattao iti de kurtina a tawa ti ridawda. Ngem dikami  namingga.” Idi agangay, nagbalin a mannakigayyem dagiti tattao ken nabungbungan ti teritoria. Tallo itan ti kongregasion iti dayta nga ili.​—Isa. 60:22.

15. Ania ti isuro kadatayo ti 1 Corinto 3:6, 7 maipapan iti trabaho a panagaramid iti adalan?

¹⁵ Kasapulan ti panagtitinnulong iti panagaramid iti adalan. Naikuna a masapul nga agtitinnulong ti intero a kongregasion tapno agpabautisar ti maysa. (Basaen ti 1 Corinto 3:6, 7.) Kas pagarigan, maysa a kabsat ti nangipaima iti tract wenno magasin iti maysa nga interesado. Ngem gapu iti eskediulna, saanna a masarungkaran ti interesado, isu a kiniddawna iti sabali a kabsat nga isu ti mangsarungkar. Nairugi dayta a kabsat ti panangyadal iti Biblia. Kalpasanna, nangawis iti nagduduma a kakabsat a lallaki ken babbai iti panangyadalna, ket iti nagduduma a pamay-an, naparegtada ti mayad-adalan. Ti tunggal kabsat a naam-ammo ti mayad-adalan ket nakatulong iti pannakasibug ti bin-i ti kinapudno. No kasta, kas iti imbaga ni Jesus, mabalin nga agragsak agpadpada ti nagmula ken agap-apit iti naespirituan a panagani.​—Juan 4:35-38.

16. Apay a naragsakka latta iti ministeriom uray limitadon dagiti maar-aramidam gapu iti sakit wenno kumapkapuykan?

¹⁶ Kasanon no limitadon ti maar-aramidam iti panangasaba ken panangisuro iti naimbag a damag gapu ta adda sakitmo wenno kumapkapuykan? Posible latta nga agbalinka a naragsak gapu ta adda latta maitulongmo iti panagani. Kitaentayo ti napasamak idi napasubli ni Ari David ken dagiti tattaona dagiti pamiliada ken sanikuada manipud kadagiti rimmaut nga Amalekita. Nabannog unay ti 200 a tattaona, isu a nagbatida tapno bantayanda dagiti gargaretda. Kalpasan a nangabakda, imbilin ni David nga agpapada ti bingayda kadagiti nasamsamda. (1 Sam. 30:21-25) Kasta met ti trabahotayo a panagaramid iti adalan iti intero a lubong. Tunggal maysa a mangar-aramid iti amin a kabaelanna ket mabalin a makipagragsak kada adda ti matulongan a magna iti dalan ti biag.

17. Ania ti masapul a pagyamanantayo ken Jehova?

¹⁷ Agyamantayo ken Jehova gapu ta ti pangrukodanna iti panagserbitayo kenkuana ket naibatay iti ayat. Ammona a ditay makontrol ti resulta dagiti panagreggettayo. Ngem makitkitana ti kinagaget ken nasayaat a motibotayo, ket gunggonaannatayo. Isursuronatayo met no kasanotayo nga agbalin a naragsak iti aniaman a maar-aramidantayo iti dakkel a panagani. (Juan 14:12) Sigurado a maay-ayotayo ti Dios no ditay sumuksuko!