1. Ɛbɛ yɔɔ pɩkɛnɩ-ɖʋ taa leleŋ nɛ hɩɖɛ ɖʋʋ se ɖɩkɛ Yehowa Aseɣɖe Tɩnaa?

PƖKƐNƖ-ÐƲ taa leleŋ nɛ hɩɖɛ ɖʋʋ siŋŋ se ɖɩkɛ Yehowa Aseɣɖe Tɩnaa. Ɛsɔ hɩɖɛ wɛ ɖɔ-yɔɔ, nɛ ɖɩcakɩ wezuu nɛ pɩlakɩ nɔɔ kʋɖʋmaɣ nɛ hɩɖɛ nɖɩ, ɖɩɖʋʋ nesi tɔm susuu nɛ kpɛlɩkɩyaa labʋ tʋmɩyɛ. Ða-taa lakɩ leleŋ alɩwaatʋ ndʋ ɖɩsɩɣnɩ ɛyʋ nɔɔyʋ, weyi ɛwɛnɩ ‘laŋɩyɛ kɩbanɖɛ se ehiɣ wezuu maatɛŋ yɔ’ se ɛwɛɛnɩ tisuu yɔ. (Tʋma 13:48) Pɩlakɩ-ɖʋ ɛzɩ pɩɩlabʋ Yesu yɔ. Alɩwaatʋ ndʋ ɛ-tɔmkpɛlɩkɩyaa kɔm nɛ pɛkɛdɩ-ɩ pee kɩbana wena pɔ-tɔm susuu lʋlaa yɔ, ɛmɛyɩ “amɛya fezuu kiɖeɖeu taa.”—Luka 10:1, 17, 21.

2. Ɛzɩma ɖɩpɩzɩɣ nɛ ɖɩwɩlɩ se ɖiileɣyiɣni ɖɔ-tɔm susuu tʋmɩyɛ?

² Ðiileɣyiɣni ɖɔ-tɔm susuu tʋmɩyɛ. Apostoloo Pɔɔlɩ seɣti Timootee se: “Paa ɛzɩmtaa lɛ, cɔnɩ ña-tɩ yɔɔ nɛ ñɔ-tɔm wɩlʋʋ yɔɔ camɩyɛ.” Pɔɔlɩ sɔzaa se: “Ye ŋlakɩ mbʋ yɔ, ŋkaɣ yabʋ ña-maɣmaɣ ña-ñʋʋ nɛ mba pewelisiɣni-ŋ yɔ pa-ñɩŋgʋ.” (1 Tim. 4:16) Ye mbʋ, ɖɔ-tɔm susuu tʋmɩyɛ yakɩ ɛyaa ñʋʋ. Paa ɛzɩmtaa lɛ, ɖɩcɔŋnɩ ɖa-tɩ yɔɔ camɩyɛ mbʋ pʋyɔɔ yɔ, ɖɩkɛ Ɛsɔ Kewiyaɣ lɩmɖʋyaa. Ðɩsɔɔlaa se paa ɛzɩmtaa lɛ, ɖa-lakasɩ ɛkɔnɩ Yehowa samtʋ nɛ sɩla nɔɔ kʋɖʋmaɣ nɛ tɔm kɩbandʋ ndʋ ɖisusuu yɔ. (Fil. 1:27) Ye ɖɩñɔɔzʋʋ ɖa-tɩ camɩyɛ pʋcɔ nɛ ɖɩlɩɣ tɔm susuu, nɛ ye ɖɩpɔzʋʋ Yehowa se ɛsɩnɩ-ɖʋ pʋcɔ nɛ ɖisusuu ɛyaa lalaa tɔm yɔ, ɖɩwɩlɩɣ se ‘ɖɩcɔŋnɩ ɖɔ-tɔm wɩlʋʋ yɔɔ camɩyɛ.’

3. Ɛzɩ paa weyi lɛ ɛkaɣ tisuu se ɛmʋ Kewiyaɣ tɔm na? Ha kɩɖaʋ nakʋyʋ.

³ Paa ɖɩlakɩ ɖo-ɖoŋ ɖeɖe se ɖisusi ɛyaa lalaa tɔm yɔ, pɩtɩla ɖe-egeetiye taa ɛyaa sakɩyɛ iitisiɣ se pamʋ Kewiyaɣ tɔm kɩbandʋ. Iyele nɛ ɖɩna koobu Georg Lindal kɩɖaʋ. E-ɖeke eesusi tɔm lona ndɩ ndɩ taa Ayɩsɩlandɩ ɛjaɖɛ taa kpaɣnɩ pɩnaɣ 1929 piwolo pɩnaɣ 1947. Ɛha takayɩsɩ kudokiŋ hiŋ sakɩyɛ; paa mbʋ yɔ, paa ɛyʋ kʋɖʋm maɣmaɣ tɩmʋ toovenim. Ɛyɔɔdaa se: “Pɩɩwɛ ɛzɩ ɛyaa nabɛyɛ kaɖaɣnɩ Bibl taa tɔm yɔ, ɛlɛ ɛyaa hɔɔlʋʋ sɔsɔʋ ñataasɔɔlɩ se pewelisi-tʋ.” Halɩ pafalɩsɩ Ɛsɔtɔm tiyiyaa nabɛyɛ Galaadɩ sukuli taa nɛ powolo nɛ  paɖʋ nesi tɔm susuu tʋmɩyɛ peeɖe lɛ, pɩnzɩ nakʋ ɖɛwa pʋcɔ nɛ Ayɩsɩlandɩ ñɩma nabɛyɛ ha pa-tɩ Yehowa nɛ pamɩyɩsɩ-wɛ lɩm. *

4. Alɩwaatʋ ndʋ ɛyaa kiziɣ se paamʋ tɔm kɩbandʋ yɔ, ɛzɩma pɩpɩzɩɣ nɛ pɩlabɩ-ɖʋ?

⁴ Alɩwaatʋ ndʋ ɛyaa kiziɣ se paamʋʋ tɔm ndʋ ɖisusuu yɔ, pitiki-ɖʋ yɔɔɔ. Pɩpɩzɩɣ nɛ pɩlabɩ-ɖʋ ɛzɩ pɩɩlabʋ Pɔɔlɩ yɔ. ‘Ɛɛwɛ laŋwɛɛkɩyɛ sɔsɔɖɛ taa nɛ ɛnɩɣ siziŋ kaahɛzaɣ ɛ-laŋɩyɛ taa’ mbʋ pʋyɔɔ yɔ, Yuuda ñɩma hɔɔlʋʋ sɔsɔʋ taatisi se Yesu kɛnɩ Mesiya weyi ɛ-tɔm paayɔɔdaa yɔ. (Roma 9:1-3) Pɩtɩla ŋwɛɛ nɛ ŋkpɛlɩkɩɣnɩ ɛyʋ nɔɔyʋ Bibl. Ŋñakɩ pana siŋŋ se ŋkɛ wɩlɩyʋ kɩbanʋ, nɛ ŋtɩmɩɣ ñe-Bibl kpɛlɩkɩyʋ yɔɔ siŋŋ. Ɛlɛ, ɛɛɖɔŋ tɔm ndʋ ɛkpɛlɩkɩɣ yɔ tɩ-yɔɔ nɛ pɩwɛɛ se ŋyebi-i kpɛlɩkɩnʋʋ. Yaa pɩtɩla, wiɖiyi ŋtɩkpɛlɩkɩnɩ ɛyʋ nɔɔyʋ Bibl nɛ ɛɖɛɛnɩ ɛsɩndaa nɛ pamɩyɩsɩ-ɩ lɩm. Ɛzɩ pɩwɩlɩɣ se ñɔ-cɔlɔ pɩlɩnaa, nɛ Yehowa ɛɛwazɩɣ ñɔ-tɔm susuu yɔɔ? Tɔm ñʋʋ kʋnɛ kɩ-taa, ɖɩkaɣ cosuu tɔm pɔzʋʋ naalɛ yɔɔ: (1) Ɛbɛ wɩlɩɣ se ɖɔ-tɔm susuu lʋlʋʋ pee? (2) Alɩwaatʋ ndʋ ɖisusuu ɛyaa lalaa tɔm yɔ, pɩwɛɛ se ɖɩɖaŋ se ɛbɛ pɩzɩɣ nɛ pɩla?

5. Ɛbɛ pɩzɩɣ piyele nɛ tʋmɩyɛ nɖɩ ɖɩlakɩ Yehowa yɔ, ɖɩɩlʋlʋʋ pee paa ɛzɩmtaa ɛzɩ ɖɩsɔɔlʋʋ yɔ?

⁵ Bibl yɔɔdʋʋ ɛyʋ weyi ɛlakɩ Ɛsɔ sɔɔlɩm yɔ ɛ-tɔm se: “Mbʋ ɛlakɩ yɔ pɩɖɔŋnɩ-ɩ.” (Keɣa 1:3) Ɛlɛ tɔm ndʋ tɩɩwɩlɩɣ se mbʋ payɩ ɖɩlakɩ Yehowa yɔ, pɩkaɣ ɖɔm ɛzɩ ɖɩsɔɔlʋʋ yɔ. Ɛyʋ wezuu caɣʋ taa lɛ, “kʋñɔŋ kɩlɩna” mbʋ pʋyɔɔ yɔ, ɖa-maɣmaɣ nɛ ɛyaa lalaa ɖɩtɩtalɩ pilim. (Yɔɔb 14:1) Pɩtasɩ lɛ, nabʋyʋ taa ɛyaa mba pakaɖɩɣnɩ-ɖʋ yɔ, papɩzɩɣ nɛ paɖɩɣ-ɖʋ nʋmɔʋ se ɖitaasusi tɔm. (1 Kɔr. 16:9; 1 Tes. 2:18) Ye mbʋ, ɛbɛ Yehowa naɣna se ɖɔ-tɔm susuu tʋmɩyɛ lʋlʋʋ pee yaa pɩɩlʋlʋʋ? Iyele nɛ ɖɩna Bibl paɣtʋ kila naayɛ, wena asɩɣnɩ-ɖʋ se ɖicosi tɔm pɔzʋʋ mbʋ pɩ-yɔɔ yɔ.

6. Ɛbɛ Yehowa naɣna se tʋmɩyɛ nɖɩ ɖɩlakɩ-ɩ yɔ, ɖɩlʋlʋʋ pee yaa ɖɩɩlʋlʋʋ?

⁶ Yehowa cɔŋnɩ ɖa-pana ñaɣʋ nɛ ɖa-laŋɩyɛ ɖɔkʋʋ na. Paa ɛyaa iwelisiɣni-ɖʋ yaa paawelisiɣni-ɖʋ yɔ, ye ɖɩlakɩ tɔm susuu tʋmɩyɛ camɩyɛ nɛ sɔɔlɩm yɔ, Yehowa ɛsɩndaa lɛ ɖa-tʋmɩyɛ lʋlʋʋ pee. Pɔɔlɩ mawa se: “Ɛsɔ tɩkɛ weyi ɛfɛyɩ siɣsiɣ yɔ se ɛsɔɔ mɩ-tʋmɩyɛ nɛ sɔɔlɩm mbʋ ɩwɩlɩ ɛ-hɩɖɛ yɔɔ alɩwaatʋ ndʋ ɩɖʋ ɛyaa kiɖeɖema lɩm nɛ ɩwɛɛ ɩɖʋʋ-wɛ lɩm yɔ pɩ-yɔɔ.” (Ebr. 6:10) Yehowa tɔzʋʋ ɖa-pana ñaɣʋ nɛ ɖɔ-sɔɔlɩm yɔɔ, paa ɖɩtɩkpɛlɩkɩnɩ ɛyʋ nɔɔyʋ Bibl nɛ ɛha ɛ-tɩ nɛ pamɩyɩsɩ-ɩ lɩm yɔ. Ye mbʋ, tɔm ndʋ Pɔɔlɩ heyi Kɔrɛntɩ mba yɔ, tɩkɛ toovenim ñɔ-hɔɔlʋʋ taa ɖɔɖɔ, paa ña-pana ñaɣʋ ɩtɩlʋlɩ pee ɛzɩ ŋmaɣzʋʋ yɔ. Pɔɔlɩ yɔɔdaa se: “Pana wena ɩñakɩ yɔ, atɩkɛ falaa Kɩbaɣlʋ taa.”—1 Kɔr. 15:58.

7. Tɔm ndʋ apostoloo Pɔɔlɩ yɔɔdɩ ɛ-Ɛsɔ sɛtʋ tʋmɩyɛ yɔɔ yɔ, lɔŋ weyi tɩpɩzɩɣ nɛ tɩkpɛlɩkɩ-ɖʋ?

⁷ Apostoloo Pɔɔlɩ kaakɛ Ɛsɔtɔm tiyiyu weyi ɛwɛ niye siŋŋ yɔ. Eeyeba nɛ agbaa  kɩfana ñɔ tɛtʋ ndɩ ndɩ taa. Paa mbʋ yɔ, alɩwaatʋ ndʋ ɛyaa nabɛyɛ kaɖaɣnɩ Pɔɔlɩ nɛ pɔyɔɔdʋʋ se ɛtɩkɛ wɩlɩyʋ kɩbanʋ yɔ, Pɔɔlɩ tɩyɔɔdɩ ɛyaa sakɩyɛ mba ɛsɩnaa nɛ papɩsɩ Krɩstʋ ñɩma yɔ pɔ-tɔm. Ɛlɛ Pɔɔlɩ mawa se: “Malabɩ tʋmɩyɛ nɛ pɩkɩlɩ.” (2 Kɔr. 11:23) Ɛzɩ Pɔɔlɩ yɔ, tɔzɩ se ña-pana ñaɣʋ nɛ ña-laŋɩyɛ ɖɔkʋʋ kɛnɩ mbʋ pɩmʋ ñɩm Yehowa ɛsɩndaa nɛ pɩkɩlɩ yɔ.

8. Tɔm ndʋ yɔɔ pɩwɛɛ se ɖɩtɔzɩ pɩlɩɩnɩ ɖɔ-tɔm susuu tʋmɩyɛ yɔɔ?

⁸ Ðɔ-tɔm susuu tʋmɩyɛ kɛdɩɣnɩ Yehowa. Alɩwaatʋ natʋyʋ Yesu kaatiyi ɛ-tɔmkpɛlɩkɩyaa 70 se powolo nɛ posusi Kewiyaɣ tɔm. Posusi tɔm nɛ pɩtɛ lɛ, papɩsɩ “pɔkɔmnɩ taa leleŋ.” Ɛbɛ kaayeba nɛ pa-taa wɛɛ leleŋ? Pɔyɔɔdaa se: “Halɩ aleewaa luzi pa-tɩ ɖɛ-tɛɛ alɩwaatʋ ndʋ ɖɩlabɩnɩ ña-hɩɖɛ tʋmɩyɛ yɔ.” Ɛlɛ Yesu ñɔɔzɩ pa-lɩmaɣza nɛ eheyi-wɛ se: “Mɩ-taa ɛtaala leleŋ se feziŋ luzi ɩ-tɩ mɩ-tɛɛ, ɛlɛ mɩ-taa ɛla leleŋ se pama mɩ-hɩla ɛsɔdaa.” (Luka 10:17-20) Yesu kaanawa se pɩtɩkɛ paa ɛzɩmtaa pɩkaɣ-wɛ ɖɔmnʋʋ camɩyɛ mbʋ tɔm susuu tʋmɩyɛ taa. Toovenim taa lɛ, ɖɩɩsɩŋ se ɛyaa mba paawelisini Yesu tɔmkpɛlɩkɩyaa mba kiɖe tɛɛ yɔ, pa-taa ɛzɩma kɔm nɛ papɩsɩ Krɩstʋ ñɩma. Pɩɩwɛɛ se tɔmkpɛlɩkɩyaa mba panɩɩ pɩ-taa se pɩtɩkɛ ɛzɩma ɛyaa welisini-wɛ yɔ pi-ɖeke pɩwɛɛ se pɩha-wɛ taa leleŋ. Ɛlɛ, pɩɩwɛɛ se pa-taa ɩla leleŋ siŋŋ mbʋ pʋyɔɔ yɔ, panawa se Yehowa taa labɩ leleŋ nɛ pa-pana ñaɣʋ.

9. Ɛzɩ Galaatii mba 6:7-9 yɔɔdʋʋ yɔ, ye ɖɩɖɔkɩ ɖa-laŋa tɔm susuu tʋmɩyɛ taa yɔ, ɛbɛ kaɣ lɩʋ pɩ-taa?

⁹ Ye ɖɩɖɔkʋʋ ɖa-laŋa ɖɔ-tɔm susuu tʋmɩyɛ taa yɔ, ɖɩkaɣ hiɣu wezuu maatɛŋ. Alɩwaatʋ ndʋ ɖiɖuu Kewiyaɣ toovenim ɖomaɣ nɛ ɖa-laŋɩyɛ pilim nɛ ɖɩcɔŋnɩ kɔ-yɔɔ yɔ, ɖɩwɛɛ ɖiɖuu ɖɔɖɔ se “pɩwazɩ fezuu,” nɛ ɖɩtɩŋɩɣnɩ pɩ-yɔɔ nɛ ɖiyeki se Ɛsɔ fezuu kiɖeɖeu ɛla tʋmɩyɛ ɖe-wezuu caɣʋ taa faaa. Ye ‘ɖitiyele’ yaa “pɩtɩnɩɩ-ɖʋ” nɛ tɔm susuu yɔ, Yehowa labɩ-ɖʋ tamaɣ se ɛkaɣ-ɖʋ haʋ wezuu maatɛŋ, halɩ paa ɖɩtɩpɩzɩ nɛ ɖɩsɩnɩ ɛyʋ nɔɔyʋ nɛ ɛha ɛ-tɩ nɛ pamɩyɩsɩ-ɩ lɩm yɔ.—Kalɩ Galaatii mba 6:7-9.

10. Alɩwaatʋ ndʋ ɖisusuu tɔm yɔ, ɛbɛ cɔlɔ pɩlɩɣna nɛ ɛyaa nabɛyɛ welisiɣ nɛ ɛyaa lalaa ñaawelisiɣ?

¹⁰ Pʋcɔ nɛ ɛyaa mʋ toovenim yaa pekizi-tʋ lɛ, mbʋ pɩwɛ pa-laŋa taa yɔ pɩ-cɔlɔ pɩkɩlɩɣ lɩnʋʋ. Yesu lɩzɩ toovenim tɔm ndʋ tɩ-taa ɖomaɣ ɖuyu eduuye taa. Eduuye nɖɩ ɖɩ-taa, ɛyɔɔdaa se ɖomaɣ ɖuyu ɖu ɖomaɣ tɛtʋ ndɩ ndɩ yɔɔ, ɛlɛ ɖomaɣ ŋga kɔtɔlɩ tɛtʋ kɩbandʋ yɔɔ yɔ, ke-ɖeke kalʋlɩnɩ pee. (Luka 8:5-8) Yesu yɔɔdaa se tɛtʋ ndɩ ndɩ ndʋ, tɩsɩŋnɩ ɛyaa laŋa nɛ ɛzɩma ɛyaa mba pamʋʋ “Ɛsɔ tɔm” yɔ, pɩwɛ ndɩ ndɩ. (Luka 8:11-15) Ɛzɩ ɖomaɣ ɖuyu yɔ, ɖɩɩpɩzɩɣ ɖiyele nɛ tɔm ndʋ ɖisusi ɛyaa yɔ, tɩpaɣlɩ pa-laŋa taa. Ða-tʋmɩyɛ lɛ se ɖiwolo pɩ-yɔɔ nɛ ɖiɖuu Kewiyaɣ ɖomaɣ. Ɛzɩ Apostoloo Pɔɔlɩ yɔɔdʋʋ yɔ, “paa weyi ɛkaɣ mʋʋ ɛ-maɣmaɣ ɛ-kɩhɛyʋʋ ɛzɩ ɛlabʋ ɛ-tʋmɩyɛ yɔ,” ɛtɩyɔɔdɩ se ɛzɩ ɛ-tʋmɩyɛ lʋlʋʋ pee yɔ.—1 Kɔr. 3:8.

11. Ɛbɛ yɔɔ Yehowa taa kaalabɩ leleŋ nɛ Noowa tɔm susuu, paa ɛyaa itaawelisini ɛlɛ yɔ? (Cɔnɩ takayaɣ huyuu yɔɔ kɩlɛmʋʋ.)

¹¹ Kpaɣnɩ ɖooo caanaʋ taa nɛ pɩtalɩ sɔnɔ, Yehowa sɛyaa sakɩyɛ susi tɔm ɛyaa mba patɩsɔɔlɩ se pewelisi yɔ. Kɩɖaʋ nakʋyʋ yɔ: Noowa kaakɛ “siɣsiɣ wɛtʋ tɔm susuyu” nɛ pɩtʋʋ fɛyɩ se ɛlabɩ tʋmɩyɛ nɖɩ pɩnzɩ hiŋ sakɩyɛ. (2 Pɩy. 2:5) Pɩtʋʋ fɛyɩ se ɛtaɣaɣ liu se ɛyaa kaɣ mʋʋ tɔm ndʋ esusaɣ yɔ camɩyɛ, ɛlɛ Yehowa taayɔɔdɩ tɔm natʋyʋ nɛ pɩwɩlɩɣ se pɩkaɣ labʋ mbʋ. Ɛlɛ alɩwaatʋ ndʋ Ɛsɔ heyi Noowa se ɛsaɣ aɖakaɣ yɔ, ɛyɔɔdaa se: “Ŋkaɣ sʋʋ mɛlɛ taa ña nɛ ña-pɩyalaa, ña-halʋ nɛ ño-wolaa.” (Kiɖe 6:18) Nɛ alɩwaatʋ  ndʋ Noowa maɣzɩ aɖakaɣ ŋga Ɛsɔ heyi-i se ɛsaɣ yɔ ka-walanzɩ yɔɔ yɔ, pɩtɩla eɖiɣzinaa se ɛyaa sakɩyɛ ɩɩkaɣ-ɩ welisinuu. (Kiɖe 6:15) Mbʋ pɩlabɩ pʋwayɩ yɔ, pɩwɩlaa se ɛjaɖɛ kɩdɛkɛdɩyɛ nɖɩ ɖɩ-taa ɛyʋ kʋɖʋm maɣmaɣ taawelisini Noowa. (Kiɖe 7:7) Ɛzɩ Yehowa kaamaɣzaa se Noowa kɛ kaapɩzaɣ na? Aayɩ! Yehowa taa kaalabɩ leleŋ siŋŋ nɛ Noowa mbʋ pʋyɔɔ yɔ, ɛlɛ labɩ mbʋ ɛpɔzɩ-ɩ se ɛla yɔ.—Kiɖe 6:22.

12. Ɛbɛ kaasɩnɩ nayʋ Yereemii nɛ ehiɣ taa leleŋ ɛ-Ɛsɔ sɛtʋ tʋmɩyɛ taa, paa ɛyaa itaawelisini-i nɛ pakaɖɩnɩ-ɩ yɔ?

¹² Nayʋ Yereemii ɖɔɖɔ kaasusi tɔm nɛ pɩcɛzɩ pɩnzɩ 40, paa ɛyaa itaawelisini-i nɛ paa paakaɖɩnɩ-ɩ yɔ. Mba pakaɖaɣnɩ-ɩ yɔ, ‘patʋwaɣ-ɩ nɛ pɔyɔɔdʋʋ ɛ-yɔɔ tɔm kɩdɛkɛdɩtʋ.’ Piyeba nɛ pitibi-i yɔɔɔ kpem nɛ halɩ ɛmaɣzɩ se eyeki tɔm susuu. (Yer. 20:8, 9) Ɛlɛ Yereemii taalɔ lidaʋ! Ɛbɛ kaasɩnɩ-ɩ nɛ ɛwa lɩmaɣza kɩdɛkɛda wena ɛwɛna yɔ nɛ ehiɣ taa leleŋ ɛ-Ɛsɔ sɛtʋ tʋmɩyɛ taa? Ɛɛkam ɛ-lɩmaɣza toovenim tɔm kɩcɛyɩtʋ naalɛ yɔɔ. Kajalaɣ lɛ, tɔm ndʋ Ɛsɔ tiyi Yereemii se eheyi ɛyaa yɔ, tɩkaɣ yebu nɛ pɛwɛɛnɩ “liɖe [yaa cee wayɩ kɩbaŋʋ ] nɛ lidaʋ.” (Yer. 29:11) Nabʋlɛ lɛ, Yehowa hɩɖɛ kaawɛ Yereemii yɔɔ. (Yer. 15:16) Ða ɖɔɖɔ ɖisusuu ɛyaa lidaʋ tɔm, nɛ Yehowa hɩɖɛ wɛ ɖɔ-yɔɔ nɛ ɖɩkɛ ɛ-Aseɣɖe Tɩnaa. Ye ɖɩkaŋ ɖa-lɩmaɣza toovenim tɔm kɩcɛyɩtʋ ndʋ tɩ-naalɛ tɩ-yɔɔ yɔ, ɖɩpɩzɩɣ nɛ ɖihiɣ taa leleŋ paa ɛyaa iwelisiɣni-ɖʋ yaa paawelisiɣni-ɖʋ yɔ.

13. Yesu eduuye nɖɩ ɖɩwɛ Maarkɩ 4:26-29 taa yɔ, lɔŋ weyi ɖɩkpɛlɩkɩɣ-ɖʋ?

¹³ Pʋcɔ nɛ ɛyʋ nɔɔyʋ wɛɛnɩ tisuu lɛ, pɩkpakɩɣ alɩwaatʋ. Yesu wɩlɩ toovenim tɔm ndʋ, ɖomaɣ ɖuyu weyi eɖou yɔ e-eduuye taa. (Kalɩ Maarkɩ 4:26-29.) Ðomaɣ ɖuyu ɖu ɖomaɣ nɛ pɩtɛ lɛ, ɖomaɣ ŋga kɔñɔ nɛ kɛwɛɛ kapaɣlɩɣ pazɩ pazɩ, nɛ ɖomaɣ ɖuyu taapɩzɩɣ se ɛla nabʋyʋ nɛ ɖomaɣ paɣlɩ lɛɛ lɛɛ nɛ pɩkɩlɩ. Ña ɖɔɖɔ, pɩpɩzɩɣ nɛ pɩpɔzɩ se ŋɖaŋ alɩwaatʋ sakɩyɛ pʋcɔ nɛ ñe-Bibl kpɛlɩkɩyʋ paɣzɩ ɖɔm tɔm ndʋ ɛkpɛlɩkɩɣ yɔ tɩ-yɔɔ. Haɖʋ ɛɛpɩzɩɣ nɛ ɛñɩɣ e-ɖomaɣ yɔɔ se kapaɣlɩ ɛzɩ ɛsɔɔlʋʋ yɔ, mbʋ ɖɔɖɔ ɖa ɖɔɖɔ ɖɩɩpɩzɩɣ nɛ ɖɩñɩɣ ɖe-Bibl kpɛlɩkɩyaa yɔɔ se pɛɖɛɛnɩ ɛsɩndaa fezuu taa ɛzɩ ɖɩsɔɔlʋʋ yɔ. Pʋyɔɔ lɛ, pitaatibi-ŋ yɔɔɔ yaa taalɔ lidaʋ, ye ñe-Bibl kpɛlɩkɩyaa ɩɩɖɛɣnɩ ɛsɩndaa lɛɛ lɛɛ ɛzɩ ŋŋmaɣzʋʋ yɔ. Ɛzɩ pɩwɛʋ haɖaʋ hɔɔlʋʋ taa yɔ, pɩpɔzʋʋ-ɖʋ suuɖu kpɛlɩkɩyaa labʋ tʋmɩyɛ taa.—Yak. 5:7, 8.

14. Kɩɖaʋ ŋgʋ wɩlɩɣ se pɩpɩzɩɣ nɛ pɩkpaɣ alɩwaatʋ sakɩyɛ pʋcɔ nɛ ɛyaa paɣzɩ welisuu tɔm ndʋ ɖisusuu yɔ?

¹⁴ Lona naayɛ taa lɛ, pɩkpakɩɣ alɩwaatʋ sakɩyɛ pʋcɔ nɛ ɛyʋ nɔɔyʋ ha ɛ-tɩ nɛ pamɩyɩsɩ-ɩ lɩm. Iyele nɛ ɖɩna Koobiya halɩñɩma Gladys nɛ Ruby Allen pa-kɩɖaʋ. Pɛkɛ hɔʋ kʋɖʋmʋʋ taa ñɩma. Pɩnaɣ 1959 taa, petiyini-wɛ Kanadaa, Keebɛɛkɩ egeetiye tɛ tɛtʋ natʋyʋ taa se pala nʋmɔʋ lɩzʋʋ tʋmɩyɛ. * Tɛtʋ ndʋ tɩ-taa ɛyaa taasɔɔlɩ se pewelisi Kewiyaɣ tɔm mbʋ pʋyɔɔ yɔ, sɔɔndʋ kpaɣaɣ-wɛ nɛ mbʋ pɔ-cɔlɔ ñɩma nɛ fadanaa pakaɣ labʋ yaa tɔm ndʋ pakaɣ yɔɔdʋʋ, ye pana-wɛ pɛwɛɛ nɛ pɔyɔɔdʋʋnɩ Yehowa Aseɣɖe Tɩnaa yɔ. Gladys yɔɔdaa se: “Paa evemiye nɖɩ lɛ, ɖɩlakaɣ kpaɣ ɖɩɣa nɛ ŋwolo ɖɩɣa ñɩɣtʋ lutozo, nɛ ɖɩlabɩ mbʋ pɩnzɩ naalɛ, ɛlɛ nɔɔyʋ tiwelisini-ɖʋ! Ɛyaa lɩɣ nɔɔnɔɔ taa nɛ pana se ɖa lɛ, papɩsɩ pɛɖɛɛ. Ɛlɛ ɖɩtɩlɔ lidaʋ.” Pazɩ pazɩ lɛ, peeɖe ñɩma paɣzɩ tisuu nɛ pamʋʋ Yehowa Aseɣɖe Tɩnaa, nɛ pa-taa nabɛyɛ paɣzɩ welisuu Kewiyaɣ tɔm. Lɛɛlɛɛyɔ, agbaa naadozo wɛnɩ peeɖe.—Iza. 60:22.

15. Tɔm ndʋ tɩwɛ 1 Kɔrɛntɩ mba 3:6, 7 taa yɔ, ɛbɛ tɩkpɛlɩkɩɣ-ɖʋ kpɛlɩkɩyaa labʋ tʋmɩyɛ yɔɔ?

¹⁵ Pɩsa nɛ ɛyʋ nɔɔyʋ pɩsɩ tɔmkpɛlɩkɩyʋ lɛ, pɩpɔzʋʋ se ɛyaa sakɩyɛ ɩsɩnɩ-ɩ. Paa ɛgbɛyɛ  taa tʋ weyi lɛ, ɛpɩzɩɣ ɛɖʋ nesi nɛ pasɩnɩ nɔɔyʋ nɛ ɛɖɛɛnɩ ɛsɩndaa nɛ pamɩyɩsɩ-ɩ lɩm. (Kalɩ 1 Kɔrɛntɩ mba 3:6, 7.) Ðɩkpaɣ se tɔm susuyu nɔɔyʋ ha traktɩ nakʋyʋ yaa fenaɣ fenaɣ takayaɣ nakɛyɛ ɛyʋ weyi Ɛsɔtɔm kɛdɩnɩ-ɩ yɔ. Ɛlɛ ɛfɛyɩnɩ alɩwaatʋ se ɛpɩsɩ ɖɩɣdʋ cɔlɔ alɩwaatʋ ndʋ ɛlɛ sɔɔlaa yɔ tɩ-yɔɔ. Pʋyɔɔ lɛ, ɛpɔzɩ koobu lɛlʋ se ɛlɛ ɛpɩsɩ nɛ ɛna ɛyʋ ɛnʋ. Koobu lɛlʋ ɛnʋ ɛpɩsaa nɛ ɛna ɛyʋ ɛnʋ lɛ, ɛ nɛ ɩ papaɣzɩ Bibl kpɛlɩkʋʋ. Pʋwayɩ koobu ɛnʋ ɛyaa koobiya ndɩ ndɩ se pasɩɩ-ɩ kpɛlɩkɩyʋ cɔlɔ, nɛ pa-taa paa weyi lɛ, ɛtɩŋnɩ nʋmɔʋ nakʋyʋ yɔɔ nɛ eseɣti kpɛlɩkɩyʋ. Koobiya mba payɩ pakatɩɣ kpɛlɩkɩyʋ ɛnʋ yɔ, pakaɣ ɖʋʋ nesi nɛ pamɩzɩ lɩm toovenim ɖomaɣ ŋga kɔ-yɔɔ. Ɛzɩ Yesu yɔɔdʋʋ yɔ, nʋmɔʋ ŋgʋ kɩ-yɔɔ pɩtɩŋɩɣna nɛ ɖomaɣ ɖuyu nɛ kʋnɖʋ pa-taa pɩzɩ nɛ pɩla leleŋ fezuu taa kʋmtʋ tʋmɩyɛ nɖɩ ɖɩ-taa.—Yoh. 4:35-38.

16. Ɛbɛ yɔɔ ŋpɩzɩɣ nɛ ŋhiɣ taa leleŋ ñɔ-tɔm susuu tʋmɩyɛ taa, halɩ paa ŋfɛyɩnɩ tɔnʋʋ taa alaafɩya camɩyɛ yaa paa ño-ɖoŋ ɩhʋwa yɔ?

¹⁶ Pɩtɩla ŋŋpɩzɩɣ nɛ ŋsusuu tɔm nɛ ŋwɩlɩɣ tɔm sakɩyɛ ɛzɩ ŋŋlabʋ nɛ pɩɖɛɛ yɔ mbʋ pʋyɔɔ yɔ, ŋfɛyɩnɩ tɔnʋʋ taa alaafɩya camɩyɛ yaa ño-ɖoŋ hʋwa. Paa mbʋ yɔ, ña-taa pɩzɩɣ nɛ pɩla leleŋ nɛ mbʋ ŋlakɩ nɛ ŋɖʋʋ nesi kʋmtʋ tʋmɩyɛ yɔ. Iyele nɛ ɖɩna Wiyaʋ Daviid kɩɖaʋ. Alɩwaatʋ natʋyʋ ɛ nɛ ɛ-ɛyaa powoba nɛ paya pɔ-hɔŋ ñʋʋ Amalɛɛkɩ mba nesi tɛɛ nɛ pamʋ ɖɔɖɔ pa-ñɩm mbʋ paba kaamɩlaa yɔ. Pɩɩnɩ ɛ-ɛyaa mba pa-taa nasɩlɛ siŋŋ nɛ pataapɩzɩɣ se pala you, pʋyɔɔ lɛ pacaɣ wondu cɔlɔ se pakandɩyɩ tɩ-yɔɔ. Daviid nɛ ɛ-ɛyaa pawabɩ you nɛ pamʋ ñɩm wondu sakɩyɛ po-koyindinaa cɔlɔ. Pʋwayɩ lɛ, Daviid ɖʋ paɣtʋ se mba palabɩ you yɔ nɛ mba pacaɣaa nɛ paɖaŋ wondu yɔɔ yɔ, pɩwɛɛ se pe-kpeekpe patayɩ ñɩm mbʋ kɩmaŋ. (1 Sam. 30:21-25) Mbʋ pɩwɛ kpɛlɩkɩyaa labʋ tʋmɩyɛ nɖɩ ɖɩlakɩ ɛjaɖɛ kpeekpe yɔɔ yɔ, ɖɩ-hɔɔlʋʋ taa ɖɔɖɔ. Pɩtɩla, ŋŋpɩzɩɣ nɛ ŋlakɩ sakɩyɛ ɛzɩ ŋsɔɔlʋʋ yɔ kpɛlɩkɩyaa labʋ tʋmɩyɛ taa, ɛlɛ ye ŋlakɩ ño-ɖoŋ ɖeɖe yɔ, ɖɩnɛ ɛlɛ ŋpɩzɩɣ nɛ ŋhiɣ taa leleŋ siŋŋ alɩwaatʋ ndʋ payɩ ɛyʋ kɩfalʋ nɔɔyʋ tɩlɩɣ Yehowa nɛ ɛha ɛ-tɩ nɛ pamɩyɩsɩ-ɩ lɩm yɔ.

17. Ɛbɛ yɔɔ pɩwɛɛ se ɖɩsɛɛ Yehowa se ɛlabaɣ lɛ?

¹⁷ Ðɩsɛɣ Yehowa se ɛlabaɣ lɛ mbʋ pʋyɔɔ yɔ, ɛwɛnɩ lɩmaɣza kɩbana tʋmɩyɛ nɖɩ ɖɩlakɩ-ɩ yɔ ɖɩ-yɔɔ. Ɛnawa se ɖɩɩpɩzɩɣ nɛ ɖɩñɩɣ ɛyaa yɔɔ se pewelisini-ɖʋ yaa papaɣzɩ-ɩ sɛʋ. Ɛlɛ ɛnaɣ ɛzɩma ɖɩlakɩ tʋmɩyɛ nɛ kpekpeka yɔ, nɛ ɛzɩma ɖɩsɔɔlɩ-ɩ siŋŋ yɔ nɛ ɛwazɩɣ-ɖʋ pʋyɔɔ. Pɩtasɩ lɛ, ɛwɩlɩɣ-ɖʋ ɛzɩma ɖɩla nɛ ɖihiɣ taa leleŋ mbʋ ɖɩlakɩ nɛ ɖɩɖʋʋ nesi kʋmtʋ tʋmɩyɛ sɔsɔɖɛ yɔ pɩ-taa yɔ. (Yoh. 14:12) Ða-taa pɩzɩɣ nɛ pɩtɛ se ye ɖɩtɩlɔ lidaʋ yɔ, ɖɔ-tɔm kɛdɩɣnɩ Ɛsɔ!