1. Kisangusangu kyadikota ni ujitu webhi wonene utwala nawu?

KISANGUSANGU kyadikota ni ujitu wonene kukala Mbangi ya Jihova! Etu tu mundu wa Jihova, tulondekesa kwila tujimbangi jê mukubokela akwetu ni kwalonga yalungu ni mwene. Tusanguluka kyavulu kyoso kitukwatekesa muthu wa “fwamena o mwenyu ki wabhwa” kukituka Mbangi ya Jihova. (Ika. 13:48) Etu tudivwa kala Jezú wa ‘sangulukile kyavulu mu nzumbi Ikôla’ kyoso o maxibulu mê kyavutukile ni njimbu yambote yalungu ni kyebhi kyaditundile m’ukunji wâ.—Luka 10:1, 17, 21.

2. Kyebhi kitutena kulondekesa kwila o kikalakalu kya kuboka kima kyabetakota phala etu?

² Phala etu o kikalakalu kya kuboka kima kyabetakota. Poxolo Phawulu waswinisa Timote: “Dilange eye-mwène, ni ulongelu wé.” Phawulu wabandekesaku dingi: “Mu kubhanga kiki, wanda kwila ni eye-mwène u bhuluka, ni ene we a bhuluka oso a kwivwa.” (1 Tim. 4:16) Kyenyikiphe, o kikalakalu kyetu kya kuboka kibhulula athu. Tusota kuditonginina kyambote mudyetu mukonda twamubhanga kikalakalu kya Utuminu wa Nzambi. Mu ithangana yoso tubhanga o ima m’ukexilu uximanesa Jihova, tulondekesa kwila tukumbidila o njimbu itwene mulonga kwa akwetu. (Fil. 1:27) Tulondekesa kwila ‘twamudilanga etwene ni ulongelu wetu’ mukudipelepalala kyambote phala kuya kuboka ni mukubhinga o dibesá dya Jihova andi dya kubokela akwetu.

3. O kwila athu oso andaxikina o njimbu ya Utuminu? Bhana phangu.

³ Né mwene se tubhanga nguzu yavulu mukubokela o athu, avulu mudyembu dyetu nange kandaxikina o njimbu yambote ya Utuminu. Tala o phangu ya Georg Lindal, waboko ubheka we mu ixi ya Islândia tunde 1929 kate 1947. Mwene wabhana jimidi ni jimidi jamadivulu ku athu, maji né ngó muthu umoxi kakituka Mbangi ya Jihova. Mwene wasoneka: “Amoxi edile kala andaxikina o kidi, maji o abeta dingi kota kabhana matwi munjimbu yambote.” Akunji ajixi abhangele o xikola ya Ngiliyadi a atumikisa mu ixi ya Islândia phala kukwatekesa mu kikalakalu  kya kuboka, maji ene we abokele mu mivu yavulu kasangele muthu wamesena kwijiya o kidi, kudisukilu dya divwa dya mivu sayi athu ku ixi ya Islândia adibhakula ya abatizala. *

4. Kyebhi kitudivwa kyoso o athu kyadituna kudilonga netu?

⁴ Etu tuluwala kyoso athu kyadituna kudilonga o Bibidya netu. Tutena kudivwa kala dyadivwile Phawulu wabhiti mu “malamba mavulu mwene, o kukata kwê ki kwene kubhwa” mukonda dya Jijudé aditunine kuxikina Jezú kala mwene o Mexiya amukanene. (Loma 9:1-3) Nange eye wamudilonga o Bibidya ni muthu, eye wabhange nguzu phala kukala mulongexi wambote, wamutumbula veji javulu mu misambu, ne kiki mwene kamukumbidile o ima yamudilonga, kindala eye wabhingi kweha kumulonga o Bibidya. Abha se nuka walongele muthu kate kyabhixila kubatizu? O kwila eye watokala kuxinganeka kwila kiwamuditunga kyambote mu kikalakalu kya kubhanga maxibulu? Mu milongi yiyi twandatambwijila ibhwidisu iyadi: (1) Ihi ilondekesa kwila twamuditunda kyambote m’ukunji? (2) Ihi itwatokala kukingila kyoso kitubokela akwetu?

5. Mukonda dyahi sayi bhabha o ikalakalu yetu kwa Jihova ki itundu kala kitwexile mukingila?

⁵ Yalungu ni muthu ubhanga o vondadi ya Nzambi, o Bibidya yamba: “O kyoso kya bhanga, kitunda ni kubhanduluka.” (Jisá. 1:3) Maji kiki kikilombola kwila ima yoso itubhanga phala Jihova yandatunda kala kitwamesena, kane. O mwenyu wamuthu “wa vula malamba” mukonda tu akwa ituxi, kikale etu kikale o athu utwene mubokela. (Jobe 14:1) Kumbandu yengi o jinguma jetu, sayi ithangana atufidisa kuboka mu ukexilu utwejidila kya. (1 Kol. 16:9; 1 Tes. 2:18) Kyenyikiphe, kyebhi Jihova kyamona se twamuditunda kyambote mu kikalakalu kya kuboka mba kana? Tala ihi izwela o Bibidya itukwatekesa kutambwijila o kibhwidisu kiki.

6. Kyebhi Jihova kyamona se twamuditunda kyambote mu kikalakalu kya kuboka mba kana?

⁶ Jihova utala o nguzu itubhanga ni kukolokota kwetu. Kumesu a Jihova, o kikalakalu kyetu kiditunda kyambote kyoso kitukibhanga ni nguzu yoso ni henda yoso, kikale se athu axikina mba kana. Phawulu wasoneka: “Kuma Nzambi ki mukwa kaxixi. Mwene kalanduka wila sedivisu imwabhange imujimba, mba o henda imwedikisa o dijina dyê mu kubhindumuna jinga an’ê a ngene, ni kiki hanji enu mubhindumuna o jikidistá.” (Jihe. 6:10) Jihova kajimbi o nguzu ni henda itulondekesa né mwene se athu utubokela kamuxikina o kidi. Kyenyiki o izwelu ya Phawulu ku akwa Kolindu itena kudikumbidila kokwe, kyoso kyambe: “Ngana se mwa mutalela hadi, o hadi  ki ikala ya ki ngó.” Kikale se o hadi iwatale kiyakubhekela o kima kiwexile mukingila.—1 Kol. 15:58.

7. Ihi itutena kudilonga ni ukexilu wajimbulula poxolo Phawulu o ukunji wê?

⁷ Poxolo Phawulu wexile mukunji wambote  wajixi, wajikula ilunga yavulu mu jimbanza javulu. Né kiki, kajimbulula o muxinda wa athu akwatekesa mwene kukituka abhezi a Nzambi, kyoso kyabhingile kulondekesa kwila mwene wexile mukitala kyakukala mukunji wa Kidistu. Muveji dya kiki, o mwene mukutambwijila yó exile muxinganeka kwila abetakota mwene ndenge, Phawulu wasoneka: “Mu kukalakala eme kot’élele.” (2 Kol. 11:23) Kala Phawulu twatokala kulembalala kwila o kyabekota phala Jihova etu kukalakala ni nguzu yoso se kubhwila.

8. Ihi itwatokala kulembalala yalungu ni ukunji wetu?

⁸ O ukunji wetu usangulukisa Jihova. Jezú watumikisine 70 amaxibulu mê phala kuboka o njimbu ya Utuminu, ene kyazubha o kuboka “avutaka ni kisangusangu.” Ihi ya abhangesa kusanguluka? Ene ambe: “Katé ni madimonyo a tu tolokela, kyoso etu ki twa a tumu kutunda mu dijina dyê!” Maji Jezú wa abazela mukonda dya kuxinganeka kiki, mukwa tangela: “Kana ku sangulukila madimonyo ma mi tolokela; inda mu sangulukila o majina menu kuma a ma soneka ku dyulu.” (Luka 10:17-20) Jezú wejidile kwila o maxibulu mê kejidibhana ni ima yiyi ya asangulukisa mu ithangana yoso. Mukidi kitwejiya se athu akuxi evu o maxibulu a Jezú abokela ya akituka Jikidistá. O maxibulu kabhingile ngo kusanguluka mukonda exile mukumbidila o kikalakalu kyawu, maji o kyabetakota, o kwijiya kwila Jihova wasangulukile ni nguzu yexile mubhanga m’ukunji.

9. Kala kilondekesa Ngalásya 6:7-9, mbote yahi itwandatambula se tukolokota mu ukunji wetu?

⁹ Se tukolokota mu ukunji wetu twandatambula mwenyu kiwabhwa. Kyoso kitubhanga yoso itutena phala kuboka ni kulonga o njimbu yambote, kifwa twamu “kunina ku ima yandala o nzumbi ya Nzambi” mukwehela o nzumbi ya Nzambi kwendesa o mwenyu wetu. Se tubhanga yoso phala kitukale ni “usudi” mba “kubhwila,” Jihova wandatubhana o mwenyu wakalelaku, né mwene se kitutena kukwatekesa muthu kubhakula mwenyu we kwa Nzambi.—Tanga Ngalásya 6:7-9.

10. Mukonda dyahi amoxi evwa o njimbu itwabokela amukwa kana?

¹⁰ O ima yala kumuxima ya athu yene yabhangesa kuxikina mba kudituna o njimbu itwabokela. Jezú wajimbulula o kidi kiki mukifika kyê kya kidimakaji, watakula o jimbutu jê mumavu kadifu, o jimbutu jakulu ngó jojo jatula mumavu ambote. (Luka 8:5-8) Jezú wambe kwila o mavu alombolola o muxima wa athu avulu atambula “o maka ma Nzambi,” mu maukexilu kadifu. (Luka 8:11-15) Kala we o kidimakaji etu we kitutena kubhanga kima phala o njimbu ikule kumuxima wa muthu utwamubokela. O kikalakalu kyetu ngó o kusuluka ni kukuna o njimbu ya Utuminu. Kala kya jimbulula Phawulu, “kala muthuphe hinu wa kà tambula o nganyu yê kwa Nzambi, kyoso kya tokala mu kukalakala kwê,” kana mu athu akwatekesa kukituka kidistá.—1 Kol. 3:8.

11. Mukonda dyahi Nowé waditundu kyambote mukalakala kala “mujimbwidi wa maka mayuka” mu mivu yavulu? (Tala ofoto yakapa.)

¹¹ Tunde ukulu jiselevende javulu ja Jihova abokela we athu kamesenene kwa evwa. Mukifika, Nowe wexile “mujimbwidi wa maka mayuka,” nange mumakwinyi awana mba atanu amivu. (2 Phe. 2:5) Se phata mwene wamesenene kwila akwa evwa o njimbu yeji kwabokela, maji Jihova kamutangela kwila kiki kyeji bhita. Muveji dya kiki kyoso kyamubhana o itendelesu phala kutunga o alaka Nzambi wamwambela: “Wa kà bokona mu álaka, eye, ni an’é a mala, ni mukaji’é, ni akaji a an’é, kumoxi.” (Dim. 6:18) O kyoso kyamutangela o kulebha, kukoma ni kitala kya alaka, Nowe nange watonginina  kwila athu ofele ejikwivwa o njimbu yê mukonda mu alaka kimweji kala kididi phala athu avulu. (Dim. 6:15) Kala kitwejiya ne ngó muthu umoxi kevu o njimbu yaboko Nowé. (Dim. 7:7) O kwila Jihova waxinganeka kuma Nowé kaboko ni uhete wasoko? Kana! Kumesu ma Nzambi Nowe waditundile kyambote mukonda wabokele ni ufiyele woso wabhangele yoso yamubhingile Jihova o kubhanga.—Dim. 6:22.

12. Kyebhi o polofeta Jelemiya kyasange o kusanguluka mu ukunji wê sumbala o athu kaxikina o njimbu yaboko ya amuzukutisa?

¹² Polofeta Jelemiya waboko mu makwinyi awana mivu ndenge, maji o athu kamuxikina, amuzukutisa. Mwene waluwalele kyavulu mukonda dya “malebhu” a yó exile kumuzukutisa, kate waxinganekene kuxisa o kikalakalu kyê. (Jel. 20:8, 9) Maji Jelemiya kabhwila! Ihi yamukwatekesa kutolola o ixinganeku yê yayibha ni kusanga o kusanguluka mu ukunji wê? Mwene walungu o muxima wê mu ima iyadi yabetakota. Kyadyanga o njimbu ya Nzambi yexile muboka Jelemiya ku athu, yalungile ni “dizubhilu di mwene ku kinga.” (Jel. 29:11) Kayadi, Jihova wasolele Jilemiya phala kuzwela ni kutudila o njimbu yê ku athu. (Jel. 15:16) Etu we twene muboka njimbu ibhekela kidyelelu kumundu yú wayibha, twambata o dijina dya Jihova, kala tu Jimbangi jê. Kyoso kitulunga o muxima wetu mu ima iyadi yiyi, tutena kusanga o kusanguluka né mwene se athu kevu o njimbu yetu.

13. Ihi itutena kudilonga mukifika kya Jezú kitusanga mudivulu dya Máluku 4:26-29?

¹³ Kubhinga kithangana kyavulu phala muthu kukula munzumbi. Jezú walongo o kidi kiki mukifika kyamukuni wexile muzeka. (Tanga Máluku 4:26-29.) Kyoso o mukuni kyakunu o jimbutu, jene jakulu bhofelebhofele o mukuni katenene kubhanga kima phala o jimbutu jikule ni lusolo. Kala o mukuni ajimbutu, eye wabhingi kukingila phala kumona o dixibulu dyé dya Bibidya katé kyandamateka kukumbidila o ima yamudilonga. O kidimakaji katena kubhanga kima phala o jimbutu kukula ni lusolo, etu we kitutena kubhangesa dixibulu dyetu dya Bibidya kukala ni kixikanu mukithangana kitwamesena. Kyenyikiphe, kana kuluwala mba kubhwila se o dixibulu kidyamukula munzumbi kala kiwaxingenkene. Kala o kidimakaji etu twabhingi kukala ni mwanyu ni kukingila katé o dixibulu kyanda solo kumuxima wê kumubatizala.—Tiya. 5:7, 8.

14. Phangu yebhi ilondekesa kwila kubhinga kithangana phala o athu kuxikina o njimbu itwatudila?

¹⁴ Sayi ididi kubhinga ithangana yavulu phala o muthu kumubatizala. Tala yabhiti ni phange Gladys ni Ruby Allen, jiphange muxitu, mumuvu 1959 atambula o ujitu wakukalakala kala aboki a thembu yoso mumbanza ya Quebec mu ixi ya Canada. * Mukonda dya woma wa jivizinyu ni ya ngeleja ya Katolika o athu kamesenene kwivwa o njimbu ya Utuminu. Phange Gladys walembalala: “Twexile muboka inzo ni nzo mu dinake dya ola mukizuwa mumivu iyadi, maji ne ngó muthu umoxi kaxikina o njimbu yambote! O athu exile mujikula omabhitu, maji kyatumona kwila tu Jimbangi ja Jihova exile mutubhana dikunda. Maji etu kitwabhwila, kana.” Mukubhita kithangana o athu exile kututala kyá kyambote, amoxi exile mukwivwa onjimbu yetu. Lelo mu mbanza yiyi mwala kya ilunga itatu.—Iza. 60:22.

15. Yalungu ni kikalakalu kya kubhanga maxibulu ihi itulonga o 1 Kolindu 3:6, 7?

¹⁵ O kikalakalu kya kubhanga maxibulu, kikalakalu kya mundu. Ene mukizwela kwila o kilunga kyoso kikwatekesa o muthu kate kyabhixila kubatizu. (Tanga 1 Kolindu 3:6, 7.) O muboki umoxi ubhana kamukanda mba kadivulu kumuthu wamesena kwijiya dingi. O phange mwenyu mukubhita kithangana  utonginina kuma mwene kanda kala ni kithangana phala kukunda o muthu yó wamesena kwijiya dingi, kyenyiki mwene ubhinga kumuboki wengi phala nakunde o muthu wamesena kwijiya dingi. O muboki yú amubhingi kate mwene utena kumateka kudilonga nê o Bibidya. Mwene we wixana aboki avulu mukilunga phala kumuxinjijkila kulonga o Bibidya, kala muboki uxinjikila uswinisa o dixibulu mu ukexilu ki udifu. O jiphange joso jamala ni ja ahatu andakwatekesa kutekela o kidi. Mu ukexilu yú oso akalakala ni nguzu yoso phala kukwatekesa o dixibulu, atena kusanguluka kyoso mwene kyandamubatizala.—Nzwá 4:35-38.

16. Mukonda dyahi eye utena kusanga o kusanguluka mu ukunji wé né mwene se kiwala ni sawidi mba nguzu yasoko?

¹⁶ Nange eye ki utena kuboka mba kulonga kala kiwexile mubhanga mukulu mukonda dya uhaxi mba kukamba nguzu mu mukutu? Né kiki eye utena kusanga o kusanguluka mukikalakalu kyé kya kubhongolola. Tala yabhiti ni Sobha Davidi kyoso mwene ni mayala mê kyabhulula o mwiji wâ ni ima ya atokalele kumaku akwa Amaleke. Hama jiyadi amasoladi mê atohekele kyavulu katenene kubhânga, kyenyiki ene axalele kudima phala kulanga o mabunda. Davidi ni masoladi mê atolola o jinguma, kyenyiki atambula ima yavulu yavalolo. Davidi watumina kuwanene o ima mu ukexilu umoxi kikale phala yó ayile mu ita kikale phala yó axalele kudima phala kulanga o mabunda. (1 Sam. 30:21-25) O musoso yú utulonga kima kyalungu ni kikalakalu kya kubhanga maxibulu kyene mubhita kumundu woso. Nange eye kiwamutena dingi kubhanga yoso iwamesenene mu kikalakalu kya kuboka ni kulonga. Maji se ubhanga yoso i utena, wandakala ni kusanguluka kwavulu kyoso o dixibulu dya Bibidya kejiya Jihova ni kumubatizala.

17. Ihi yatokala kutubhangesa kusakidila Jihova?

¹⁷ Tusakidila Jihova m’ukexilu wahenda utala o sidivisu yetu kwa mwene. Mwene wejiya kwila etu kitutena kujijidika athu kutwivwa mba kumubheza. Maji mwene umona o nguzu itubhanga ni henda itwamukwatela anga mwene utufuta. Mwene utulonga we kyebhi kitutena kusanga o kusanguluka mukubhanga o mbandu yetu mukikalakalu kya kubhongolola. (Nzwá 14:12) Tutena kudyelela kwila Nzambi wandasanguluka netu se tubhanga jinga yoso se kubhwila!