1. Чь ԛәдьр у шабун мәрʹа һатийә дайине?

ӘМ ЧЬԚАС ша нә у чьԛас фьрнаԛ дьбьн, ԝәки әм Шәʹдед Йаһоԝа нә! Наве Хԝәде сәр мә йә у әм ви нави бь дьл у щан әʹлам дькьн у мәрьва дькьн шагьртед Иса Мәсиһ. Гава әм али кәсед дьлпʹак дькьн ԝәки әԝана бенә сәр рʹийа рʹастийе, әм гәләк ша дьбьн (Кʹаред Шандийа 13:48). Чахе шагьртед Иса жь хьзмәте вәгәрʹийан у бәʹса ԛәԝьмандьнед баш кьрьн, Иса «бь рʹӧһʹе пироз ша бу», у әм жи жь хьзмәте шабунәкә мәзьн дьстиньн (Луԛа 10:1, 17, 21).

2. Әм ча дькарьн нишан кьн, ԝәки хьзмәти бона мә гәләк фәрз ә?

² Хьзмәткьрьн бона мә гәләк фәрз ә. Паԝлос Тимотʹейорʹа ӧса готьбу: «Һаш жь хԝә у һинкьрьна хԝә һәбә. . . . бь ви тьһәри те хԝә жи хьлаз ки у ԝан жи, кʹижанед гӧһдарийа тә дькьн» (1 Тимотʹейо 4:16). Демәк, жийина мәрьва шьхӧле хьзмәткьрьнева гьредайи йә. Жь бо ԝе йәке кӧ әм бьнәлийед Пʹадшатийа Хԝәде нә, әм һәр гав дина хԝә дьдьн рʹабун-рʹуньштьна хԝә. Әм дьхԝазьн пе кьред хԝә рʹумәте бьдьнә Йаһоԝа у анәгори рʹастийе бьжин (Филипи 1:27). Бь ве йәке кӧ әм бона хьзмәте хԝә рʹьнд һазьр дькьн у пешийа кӧ мьзгине бәла кьн, әм кʹәрәма жь Йаһоԝа дьхԝазьн, әм нишан дькьн ԝәки әм «һаш жь хԝә у һинкьрьна хԝә» һәнә.

3. Гәло һәр кәс ԝе гӧһ бьдә мьзгине? Мәсәләке бинә.

³ Ле щарна әм чьԛас бь дьл у щан хьзмәт дькьн жи, диса жи тʹәне һьнә мәрьв гӧһ дьдьн мьзгинийа Пʹадшатийе. Дина хԝә бьдьнә сәрһатийа бьре Щорщ Линдал, йе кӧ жь сала 1929 һʹәта сала 1947 Исландйайеда тʹәне хьзмәт дькьр. Әԝи бь һʹәзара әʹдәбйәт бәла кьр, ле йәкә тʹӧ кәс нәбу Шәʹде Йаһоԝа. Әԝи ӧса ньвиси: «Һьнә кәс мьԛабьли рʹастийе бун, ле һʹәчʹи зәʹф мәрьв гӧһ нәдьданә рʹастийе у бетʹалаш бун». Паши ԝе йәке ча мисйонер, йед кӧ Мәкʹтәба Гиләде хьлаз кьрьбун,  һатьн Исландйайе, диса нәһ сал дәрбаз бун һʹәта кӧ һьнә мәрьвед Исланди бунә Шәʹдед Йаһоԝа. *

4. Гава мәрьв мьзгине ԛәбул накьн, дьбәкә әм хԝә ча тʹәхмин дькьн?

⁴ Гава мәрьв гӧһ надьн мьзгине, әм һьлбәт хәмгин дьбьн. Әм дьбәкә мина Паԝлосе шанди хԝә тʹәхмин дькьн, йе кӧ бәрхԝә дькʹәт, чьмки һʹәчʹи зәʹф Щьһуйа, Иса ча Мәсиһе создайи ԛәбул нәдькьрьн. Әԝи ӧса гот: «Әз гәләки бәр хԝә дькʹәвьм у кӧла дьле мьн жи кʹур ә» (Рʹомайи 9:1-3). Соз мәсәлә, хԝәндәкʹарәки тә һәйә у тӧ бона пешдачуйина ԝи һәр тьшт дьки у дӧа дьки. Ле әԝ диса жи рʹӧһʹанида пешда начә у лазьм ә тӧ ве һинбуне бьди сәкьнандьне. Йан жи, дьбәкә һʹәта ньһа тʹӧ хԝәндәкʹаре тә нәһатийә ньхӧмандьне. Гәло лазьм ә тӧ хԝә сущдар бьки у бьфькьри ԝәки Йаһоԝа хьзмәта тә кʹәрәм накә? Ве готареда әме щабед дӧ пьрса бьстиньн: (1) Чь нишан дькә ԝәки хьзмәта мә пешдачуйи йә? (2) Гава әм мьзгине бәла дькьн, гәрәке әм һивийа чь бьн?

5. Чьма хьзмәтийа мә щарна пешдачуйи нинә?

⁵ Кʹьтеба Пироз дәрһәԛа кәсед кӧ хԝәстьна Хԝәде пек тиньн, ӧса дьбежә: «Чь жи дьхԝазә мийасәр дьбә» (Зәбур 1:3). Диса жи, әв йәк найе һʹәсабе, ԝәки һәр тьште кӧ әм хьзмәтеда бона Йаһоԝа дькьн, ԝе ль гора дьле мә бе сәри. Жь бо ԝе йәке кӧ һәр кәс гӧнәкʹар ә, жийин «тʹери тәнгасийе» йә (Ибо 14:1). Ӧса жи щарна рʹуйе пәйкʹәтьнада чәтьн дьбә рʹьһʹәт хьзмәт бькьн (1 Корьнтʹи 16:9; 1 Тʹесалоники 2:18). Гәло бәр чʹәʹве Йаһоԝа хьзмәта мә чьчах пешдачуйи йә у чьчах на? Ԝәрә әм дина хԝә бьдьнә чәнд принсипед Кʹьтеба Пироз, йед кӧ ԝе али мә бькьн щаба ве пьрсе бьстиньн.

6. Гәло бәр чʹәʹве Йаһоԝа хьзмәта мә чьчах пешдачуйи йә?

⁶ Йаһоԝа дина хԝә дьдә хирәт у сәбра мә. Бона Йаһоԝа, тьште һәри фәрз әв ә, ԝәки әм шьхӧле ԝи бь дьл у щан бькьн, фьрԛи тʹӧнә мәрьв гӧһ бьдьнә мә йан на. Паԝлос ӧса ньвиси: «Хԝәде сәр нәһәԛийе нинә, ԝәки кьред ԝә у әԝ һʹьзкьрьна кӧ ԝә бона наве ԝи да кʹьфше бир бькә, йа кӧ ԝә щьмәʹта Хԝәдерʹа хьзмәткʹари кьр у дькьн жи» (Ибрани 6:10). Һәгәр хирәта мә хьзмәтеда бәред баш найнә, диса жи Йаһоԝа хирәт у һʹьзкьрьна мә тʹӧ щар бир накә. Чаԝа Паԝлосе шанди готьбу, ахьрийа шьхӧле хьзмәтийе чь бә жи, һун дькарьн дӧдьли нәбьн, ԝәки «хәбата ԝә бош-бәтал нинә ль бәр Хӧдан» (1 Корьнтʹи 15:58).

7. Жь гьлийед Паԝлос дәрһәԛа хьзмәта ԝи, әм дькарьн чь һин бьн?

 ⁷ Паԝлосе шанди мьзгинванәки гәләк хирәт бу у әԝи гәләк шәһәрада щьватед тʹәзә саз кьрьн. Диса жи, гава һьнә кәс ԝи нәһәԛ дькьрьн ԝәки әԝ дәрсдарәки баш нинә, әԝи дина ԝан нәдькʹьшанд сәр ве йәке кӧ әԝи чәнд мәрьв кьрьн шагьртед Иса Мәсиһ. Дәԝсе әԝи ӧса гот: «Жь ԝан зәʹфтьр хәбьтимә» (2 Корьнтʹи 11:23). Мина Паԝлос, тӧ жи бир нәкә ԝәки бона Йаһоԝа хирәт у сәбра мә, тьште һәри фәрз ә.

8. Әм чь гәрәке бир нәкьн дәрһәԛа хьзмәтийе?

⁸ Хьзмәта мә Йаһоԝа хԝәш те. Иса Мәсиһ 70 шагьрт шандьн мьзгине бәла кьн у хьлазийа ве хьзмәте, әԝана «ша вәгәрʹийан». Гәло сәбәба шабуна ԝан чь бу? Ԝана гот: «Щьн жи сайа наве тә ельми мә дьбун». Ле Иса ньһерʹандьна ԝан рʹаст кьр: «Бь ԝе йәке ша нәбьн кӧ щьн ельми ԝә дьбьн, ле ша бьн, кӧ навед ԝә ль әʹзмана ньвисар ә» (Луԛа 10:17-20). Иса Мәсиһ заньбу ԝәки хьзмәти ԝе һәртʹьм һаԛас хԝәш у һʹәԝас дәрбаз нәбә. Әм ньзаньн чьԛас мәрьв йед кӧ серида гӧһ дабунә шагьрта, бунә баԝәрмәнд. Ләма жи, лазьм бу ԝәки шагьрт нә тʹәне ве йәкерʹа шабуна, кӧ чьԛас мәрьв мьзгинийе ԛәбул дькьрьн, ле һәри зедә гәрәке ве йәкерʹа ша буна, ԝәки Йаһоԝа жь хирәта ԝан рʹази йә.

9. Ль гора Галати 6:7-9, һәгәр әм хьзмәтеда сәбьр бькьн, әԝ йәк ԝе чь ахьри бинә?

⁹ Һәгәр әм хьзмәтеда сәбьр бькьн, әме жийина һʹәта-һʹәтайе бьстиньн. Гава әм тʹохьмед мьзгинийа Пʹадшатийе дьчиньн, әм ӧса жи ‹бона рʹӧһʹ дьчиньн›, демәк әм изне дьдьн ԝәки рʹӧһʹе Хԝәде сәр мә һʹӧкӧм бькә. Фьрԛи тʹӧнә, мә али кәсәки кьрийә кӧ бьбә Шәʹде Йаһоԝа йан на, һәгәр әм «ащьз нәбьн» у нәԝәстьн, Йаһоԝа ԝе жийина һʹәта-һʹәтайе бьдә мә (Галати 6:7-9 бьхунә).

10. Әв йәк кӧ мәрьв ԝе гӧһ бьдьнә мә йан на, чьва гьредайи йә?

¹⁰ Әв йәк кӧ мәрьв рʹастийе ԛәбул бькьн йан на, дьле ԝанва гьредайи йә. Иса мәсәледа дәрһәԛа тʹохьмед кӧ кʹәтьн щурʹә-щурʹә әʹрда, гот ԝәки тʹәне тʹохьме кӧ кʹәтә әʹрде ԛәнщ, мәзьн бу (Луԛа 8:5-8). Тʹохьм те һʹәсабе «хәбәра Хԝәде», әʹрд жи те һʹәсабе дьле мәрьва (Луԛа 8:11-15). Мина шьхӧле щоткʹар, ахьрийа шьхӧле мә жи дәсте мәда нинә, ле дьле мәрьвава гьредайи йә. Щабдарийа мә тʹәне әв ә кӧ әм тʹохьмед мьзгина Пʹадшатийе бәрдәԝам кьн бьрʹәшиньн. Чаԝа кӧ Паԝлосе шанди готьбу, «һәр кәсе һәԛе хԝә бьстинә, ԝәкә хәбата хԝә» (1 Корьнтʹи 3:8).

11. Нӧһ пʹехәмбәр чьма пешдачуйи бу? (Бьньһерʹә шькле рʹуйе журнале.)

¹¹ Ԝәʹде бәре жи, һәр кәси гӧһ нәдьда хьзмәткʹаред Йаһоԝа. Мәсәлә, Нӧһ пʹехәмбәр «рʹасти даннасин дькьр», у әԝи әв йәк ԝәкә 40 йан 50 сала дькьр (2 Пәтрус 2:5). Бешьк әԝ баԝәр бу ԝәки мәрьв ԝе гӧһ бьдьн готьнед ԝи, ле Йаһоԝа ԝирʹа нәготьбу кӧ мәрьв ԝе гӧһ бьдьнә ԝи. Гава Хԝәде готә Нӧһ ԝәки гәмийе чекә, әԝи гот: «Тӧ тʹәви кӧрʹед хԝә у тʹәви жьна хԝә у букед хԝә бькʹәви гәмийе» (Дәстпебун 6:18). Чахе Нӧһ гәми чедькьр, дьбәкә әԝи фәʹм дькьр ԝәки гәми нә һаԛас мәзьн ә кӧ гәләк мәрьв бькарьбьн теда щиһ бьн (Дәстпебун 6:15). Ахьрийеда, тʹӧ кәси гӧһ нәда хәбәра Нӧһ (Дәстпебун 7:7). Гәло Йаһоԝа дьфькьри кӧ Нӧһ хьзмәтийеда  пешдачуйи нибу у щәфе ԝи бош-бәтал бу? Һьлбәт на! Бь ньһерʹандьна Хԝәде, Нӧһ даннасинкʹарәки пешдачуйи бу, чьмки әԝи щабдарийа хԝә бь амьни ани сери (Дәстпебун 6:22).

12. Йерәмйа чаԝа һәла һе ԝәʹде пәйкʹәтьн у бетʹалашбуна мәрьва жи, жь хьзмәта хԝә шабуне дьстанд?

¹² Йерәмйа пʹехәмбәр жи, хәбәра Хԝәде бь дәһа сала ԝан мәрьварʹа бәла дькьр, йед кӧ һьндава рʹастийе бетʹалаш бун у пәй ԝи дькʹәтьн. Щарәке, әԝ сәва ԛәрфед ԝан мәрьва һаԛас бәрхԝә кʹәт кӧ дьхԝәст хьзмәтийа хԝә бьда сәкьнандьне (Йерәмйа 20:8, 9). Ле Йерәмйа дьлтәнг нәбу! Гәло чь али ԝи кьр фькред негатив жь һʹьше хԝә дәрхә у жь хьзмәта хԝә шабуне бьстинә? Йерәмйа дина хԝә да дӧ тьштед фәрз: Йа йәке, әʹламәтийа жь Хԝәде һеви дьда мәрьва (Йерәмйа 29:11). Йа дӧда, Йаһоԝа Йерәмйа кʹьфш кьрьбу, ԝәки әԝ пеш ԝива әʹламәтийа ԝи дәрбази щьмәʹте кә (Йерәмйа 15:16). Мина Йерәмйа пʹехәмбәр, әм жи һевийе дьдьнә мәрьва, у наве Хԝәде ль сәр мә йә. Ләма һәгәр мәрьв гӧһ нәдьн мә жи, әм дькарьн жь хьзмәта хԝә шабуне бьстиньн.

13. Әм дькарьн жь мәсәла Иса дәрһәԛа щоткʹаре рʹазайи, чь һин бьн?

¹³ Ԝәхт лазьм ә ԝәки кәсәк рʹӧһʹанида пешда һәрʹә. Мәсәледа йа дәрһәԛа щоткʹаре рʹазайи, Иса дина мә кʹьшанд сәр ве рʹастийе (Марԛос 4:26-29 бьхунә). Паши кӧ щоткʹар тʹохьм рʹәшанд, лазьм бу кӧ әԝ һивийе бьсәкьнә һʹәта тʹохьм шин бьбә. Мина ве йәке, дьбәкә әм жи гәрәке сәбьр бькьн һʹәта хԝәндәкʹаред мә рʹӧһʹанида пешда һәрʹьн.  Чаԝа кӧ щоткʹар нькарә зоре ль тʹохьма бькә ԝәки әԝ дьһа зу мәзьн бьн, әм жи нькарьн зоре ль хԝәндәкʹаред хԝә бькьн ԝәки әԝана дьһа зу пешда һәрʹьн. Ләма жи, һәгәр хԝәндәкʹаре тә зу пешда начә, дьлтәнг нәбә у һевийа хԝә ӧнда нәкә. Чаԝа кӧ бона шьхӧле щоткʹарийе сәбьр лазьм ә, бона шьхӧле һазьркьрьна шагьрта жи сәбьр лазьм ә (Аԛуб 5:7, 8).

14. Сәрһатийа Гладис у Рубийе чаԝа нишан дькә ԝәки щарна ԝәхт лазьм ә кӧ хьзмәтийа мә бәред баш бинә?

¹⁴ Һьнә територийада, хьзмәта мә гәләк сала, ԛә пешда начә. Мәсәлә, ԝәрен әм дина хԝә бьдьнә сәрһатийа хушкед мә Гладис у Руби Аллен. Сала 1959-да, әв дӧ хушк ча пешәнгед һәртʹьм, шандьнә бажаре Кԝебеке (Канада). * Жь бо тьрса бәр мәрьва у һʹӧкӧма дера Католики, гәләка нәдьхԝәст гӧһ бьдьн мьзгина Пʹадшатийе. Гладис гот: «Әм дӧ сала һәр рʹож һʹәйшт сьһʹәт мал бь мал дьчун, ле тʹӧ кәс дәри вәнәдькьр. Мәрьв дьһатьн бәр дәри у чахе дьдитьн кӧ әм Шәʹдед Йаһоԝа нә, пьшта хԝә дьданә мә дьчун. Диса жи, мә хирәта хԝә ӧнда нәкьр». Ԝәʹдә шунда, дьле мәрьва һеди-һеди нәрм дьбу, у һьнә кәса гӧһ да ԝан. Ԝи бажарида ньһа се щьват һәнә (Ишайа 60:22).

15. 1 Корьнтʹи 3:6, 7 дәрһәԛа һазьркьрьна шагьрта чь мә һин дькә?

¹⁵ Сәва кӧ кәсәк бьбә шагьртәки Иса Мәсиһ, һәвкʹарийа гәләк кәса лазьм ә. Бь рʹасти тʹәмамийа щьвате дькарә аликʹарийе бьдә, ԝәки кәсәк бәрбь ньхӧмандьне һәрʹә (1 Корьнтʹи 3:6, 7 бьхунә). Һәла бьфькьрә: Мьзгинванәк бәлавок йан журналәке дьдә кәсәки.  Паше, ԝәʹде ԝи мьзгинвани тʹӧнә ԝәки сәрледана ԝи мәрьви бькә, ләма әԝ мьзгинванәки дьнрʹа дьбежә кӧ сәрледана ви кәси бькә. Әв мьзгинване дьн һинбуна Кʹьтеба Пироз дәстпедькә. Ԝәʹдә шунда, әԝ гази щурʹә-щурʹә хушк-бьра дькә, ԝәки тʹәви ԝи бенә сәр һинбуне. Һәр йәк жь ԝан, жь щурʹә-щурʹә алийава хԝәндәкʹар һелан дькә. Һәр хушк у бьра кӧ рʹасти хԝәндәкʹар  те, тʹохьме рʹастийе ав дьдә. Гава хԝәндәкʹар те ньхӧмандьне, һәр кәсе кӧ али ԝи кьрьбу, ша дьбә (Йуһʹәнна 4:35-38).

16. Һәгәр сьһʹәт-ԛәԝата мә ида нагьһиже мьзгине чаԝа бәре бәла бькьн, әм чьрʹа диса жи дькарьн ша бьн?

¹⁶ Һәгәр сьһʹәт у ԛәԝата тә ида тʹера тә накә, ԝәки мьзгине ча бәре бәла ки, гәло тӧ диса жи дькари жь ви шьхӧли шабуне бьстини? Бәле! Сәрһатийа Даԝьд Пʹадша бинә бира хԝә. Чахе Амалекийа һәбука Даԝьд у әскәред ԝи тʹалан кьрьн у нәфәред ԝан жи рʹәвандьн, Даԝьд тʹәви әскәред хԝә кʹәтә пәй ԝан. Ле 200 әскәр гәләк ԝәстийайи бун, у ԝана нькарьбу шәрʹ бькьра. Ләма, әԝана бәр һур-мура ман. Паши шәрʹ, Даԝьд тʹәми да кӧ тьштед зәфткьри ԝәкә һәв бенә пʹарәвәкьрьн (1 Самуйел 30:21-25). Шьхӧле һазьркьрьна шагьрта жи ӧса йә. Гава кәсәк тʹәзә те сәр рʹийа жийине, һәр кәсе кӧ чь жь дәсте ԝи һат кьр ԝәки али ԝи мәрьви бькә, дькарә ша бә.

17. Әм чьрʹа жь Йаһоԝа рʹази нә?

¹⁷ Әм гәләк жь Йаһоԝа рʹази нә, чьмки чь жи һәбә әԝ хьзмәта мә дьшекьринә. Әԝ занә ԝәки ахьрийа щәфе мә хьзмәтеда, дәсте мәда нинә. Диса жи, әԝ дина хԝә дьдә хирәта мә у занә әм чьԛас ԝи һʹьз дькьн, ләма жи әԝ мә хәлат дькә. Ӧса жи, әԝ мә һин дькә ԝәки ча жь шьхӧле һазьркьрьна шагьрта шабуне бьстиньн (Йуһʹәнна 14:12). Әм дькарьн баԝәр бьн ԝәки Хԝәде ԝе жь мә рʹази бә, сәри әԝ ә әм дьлтәнг нәбьн у нәԝәстьн!