1. I musangal kaay ni luumw bitudy naaby?

TUDY ni musangal muvul ni luumw mutudy Batemw ba Yehow! Bumwiitubiibiikanok mu diijin dya Mawej ni tuloolong myand yihehetangan ni diijin eedy, hakudiil baat musah ni kwiibaalabul bwa bashaal biiyij. Naak tusaasangal ha twambambulwiish “baat bady balongolol micim yaababw bwa kuhetobw buumy bwa mwendelel” bwa bashaal biiyij. (Yil. 13:48, NWT) Tumvumvw teng bu Yeez “umvwiil musangal ku bukash bwa spirit mujilang,” haakady biiyij bindiy bahingomw kudyey balukil mu mudimw a kudiil baat musah.​—Luuk 10:1, 17, 21.

2. I mushind kaay utudy mwa kuleej neey: mudimw iitut a bukajaady udy ni buseeb buvul?

² Mudimw iitut a bukajaady udy ni buseeb buvul kutudy. Mupostol Pool wambiil Timoteh neey: “Wiilam uw mwiin ni ulam bilengel bulongweesh bwiibuh.” Uleebel cikwaabw neey: “Awiikal ulong naak, wiikuukuuloh uw mwiin, ukuuloh ni boos bumvumvw malongweesh miibuh.” (1 Tim. 4:16) Nook, mudimw a kudiil baat musah ukuukuul baat. Twiilaalam tut kaayeet bwaal tudy biin dya Bukaleng bwa Mawej. Tudy bakat kulong myand yitutumbish Yehow mudyumvwaangan ni musah utudiidiil baat. (Fili. 1:27) Tuleeleej neey: ‘tulaalam bilengel bulongweesh bwiitut’ hatwiiloolongolol bilengel kuuhal kwa kuy mu mudimw iitut a bukajaady ni hatuloolomb Yehow dyambulwiish kuuhal kwiitut kadiil baat bakwaabw musah.

3. I mushind kaay udy baat batal musah a Bukaleng utwiibadiidiil? Twaal cileejel.

³ Ning mutwiikaakashishomw, baat bady mwa kwiitab eecy kulek musah a Bukaleng utwiibadiidiil mu teritwaar iitut. Twangat cileejel cya mwiin-kweet Georg Lindal, waakady kayend mudiil baat musah mu cibunj cya Island mu 1929 teng ni mu 1947. Waakady mwaabany mikand yit ku cinun; kady, muut ning waakaabumw kaakadyoh bend mushaal Temw. Bimweek neey: “Baat baakady balwiish musah a mu Bibl, ki bakwaabw kabaakadyoh bend bamwiitab.” Ni hafikil bamisiioneer baakadyobw balongweesh mu kalaas ka Kalaad bakadil mudimw muvul ha kudiil baat musah, mu mivw  citemb yikwaabw yilongelobw biin Island bakwaabw baakady biilambul kudy Yehow ni kutambulobw. *

4. I mushind kaay utwiiyumvumvw hady baat balek kwiitab musah mulengel utwiibadiidiil?

⁴ Tudy ni kakunying hady baat balek kwiitab musah a Bukaleng utwiibadiidiil. Twiiyumvumvw teng mwaakady Pool mwiiyumvw haleebeley neey: “nady ni kaakunying kavul ni kajaabal ku micim” bwaal biin Yuud baakady balek kwiitab Yeez bu Mesih mulay. (Rom 9:1-3) Misang yikwaabw uloolong Bibl ni muut ni usambil bwa diitabij dindiy, ki kiin ukooyel ku myand yiloolongey, bikaam wiimanyik diilong dya Bibl eedy eeny? Eecy i biny biwudy mwa kulong hawudy kuy mwambulwiishoh bend muut ni mumufikish ku baatiisumw? Eeby byumvumvwiij neey: i cilem diibuh ni Yehow kiin usangal bwa mushind uwudiidiil baat musah eeny? Mu ciin bwaal eecy, twiiyiiy kwaalabul majooj mabidy aam: 1) I biny bitujaajaadikil neey: mudimw iitut a bukajaady wiitwaakaakish musangal? 2) I myand kaay yitudy mwa kutakamim hatudiidiil baat musah?

5. Bwabiny mudimw utukaakadil Yehow kiin teng mwa kuhatul bihet byaabwiin bitwaakady batakamin?

⁵ Bibl uleeleeb bwa muut uloolong lukat lwa Mawej neey: “Myand yoos yiloolongey yiyaay teng kuuhal.” (Mus. 1:3) Nook, kabiin byumvwiij neey: myand yoos yituloolong bwa lukat lwa Yehow yiiyiiy yikumban teng mutudy bakat. Shikacil a muut udy teng wa “makab ni mal” bwaal​—tut boos katwiishoh bend bawaakan. (Yoobw 14:1) Cikwaabw, tudy mwa kuhet bulwiish ni bady mwa kwiimanyik mudimw iitut a kudiil baat musah. (1 Kor. 16:9; 1 Tes. 2:18) Nook, i mushind kaay udy Yehow mwa kutal neey: mudimw iitut a bukajaady uhahatul bihet bilengel? Tutalaayaak mamw may matam ma mu Bibl mady mwa kwiitwambulwiish bwa kwaalabul diijooj eedy.

6. I mushind kaay udy Yehow utal mudimw mukasakan utumukaakadil?

⁶ Yehow utaatal kwiikashishomw kwiitut ni kutaatameen. Yehow usaasangal bwa mutumukaakadil mudimw ni cisumy ni lukat, ning baat biitab eecy balek musah utwiibadiidiil. Pool ufundil neey: “Mawej kiishoh bend ni kabow. Kiish uvulamin midimw yiinun. Kiish uvulamin ning lukat lwiinun lunwaakady bamuleej bwa diijin dindiy ku midimw yinukadil ni yinukakadil biin Krist neen.” (Ebr. 6:10, NWT) Yehow uvuuvuluk mudimw utumukaakadil ni lukat lutumuleeleej, ning mutudy ni diilong dya Bibl didy kadiy ditambul. Nook, udy mwa kulond byeeb mubel waakady mupostol Pool mwaakish Biin Korent wa neey: “Mudimw unukaakal baswiikakan ni Fumweet kiishoh bend wa bituh,” ning mudimw iibuh mukasakan uwaakady mukal kay muhatul cihet ciwaakady mutakamin.​—1 Kor. 15:58.

7. I biny bitudy mwa kulongel ku mushind waakady mupostol Pool muleeb bwa mudimw indiy a bukajaady?

⁷ Mupostol Pool waakady misiioneer mulengel weeh, waakady mulong bisumbw bihyaabihy mu bibunj bivul. Ning mwaakady baat batobolol Pool  ni baleeb neey: kiinoh bend mulongweesh mulengel wa diiy dya Mawej, kaakadyoh bend muleeb mwaakadyey mwambulwiish baat bavul bwa kushaalobw biin Krist. Nook, ulekel kulond may maakady baat baleeb baakady biitumbish bwindiy. Pool ufundil neey: “Nady mukal mudimw mwiibahitok.” (2 Kor. 11:23) Teng bu Pool, vuluk neey: kwiikashishomw kwiibuh ni kutaatameen bidy ni buseeb buvul ku mees kwa Yehow.

8. Bikaam tuvuluk biny bwa mudimw iitut a bukajaady?

⁸ Mudimw iitut usaasangeej Yehow. Yeez waakady mutum biiyij bindiy 70 bwa kudiil baat musah a Bukaleng, hamanyinobw mudimw a kudiil baat musah “bahingilomw kwiibatuminobw ni musangal.” Bwabiny baakady ni musangal muvul nook? Baleebel neey: “Teng ni bademoh baakady bakooyel ku may matwaakady twiibatumin mu diijin diibuh.” Yeez waakady mulongolol lungeny lwaakadyobw nalw iibambiiley neey: “Kanusangalaay bend bwa ney bademoh yibaakooyel ku may miinun. Ki sangalaay bwa ney majin miinun i mafund mwiiwul.” (Luuk 10:17-20, NWT) Yeez waakady mumanyik neey: kabiin teng mwa kumanyik myand yoos ya mu mudimw a bukajaady. Biin-biin, katwiin bamanyik buuny bwa baat baakady bakun biiyij ba Yeez mat ni kushaalobw biin kwiitabij. Biiyij baakady bakaam teng kwiikal ni musangal, kiin bwa mwaakady baat mwa kwiibakun mat, ki bwaal bwa buseeb, baakady bakaam kusangeej Yehow hakumukadil mudimw ni cisumy.

9. Bilondeshil mukand a Kalatih 6:7-9, i biny bitwiikal mwa kuhet tut batungunuk ni kudiil baat musah?

⁹ Tut bataatameen mu mudimw iitut, twiiyiiy kuhet buumy bwa mwendeleel. Mutwendend ni kukun ni mucim woos tet ya biin-biin ya Bukaleng, tukuukun “biit bidy spirit mujilang mukat” hatwiitaatabil spirit mujilang a Mawej ukal neet mudimw mu shikacil iitut. Bu mutudy katuy ‘tuhing haanyim’ eecy “tukooyel,” Yehow wiitujaajaadikil neey: twiiyiiy kwaanun buumy bwa mwendelel, ning mutudy katuy banj kwambulwiishoh muut bwa kutambuley.​—Bal Kalatih 6:7-9.

10. Bwabiny baat bakwaabw bakukun musah a Bukaleng mat ni bakwaabw bamulek?

¹⁰ Kwiitab eecy kulek myand ya biin-biin, i bwaal butaatal muut kaayend. Yeez umvwiijil bwaal bwa biin-biin oobw mu kasumw ka cidim waakady umiin tet mu malab mashil-shilangan, ki tet yikunyinobw ha bulab bwa bufuk yibadikil (Luuk 8:5-8) Yeez uleebel neey: malab mashil-shilangan, maleeleej baat bumvumvw “diiy dya Mawej” mu mishind yishiil-shilangan. (Luuk 8:11-15) Teng bu cidim ukuukun tet, katwiin bamanyik baat batuloolong naab Bibl biikal mwa kuy kuuhal, ki i bwaal butaatal mucim a muut kaayend. Bujit butudy naabw i bwa kutungunuk ni kukun tet yilengel ya musah a Bukaleng. Mupostol Pool uleebel neey: “Woos wa ku bab uhehet bulang kudy Mawej bwa ha mudimw waakadyey mukal,” kabiinoh bend bwa bihet byalaalukil ku mudimw oow.​—1 Kor. 3:8.

11. Bwabiby Yehow waakady musangal bu mwaakady Noweh “ulongweesh myand ya biin-biin”? (Tal cifwaatul cya hacizubw.)

¹¹ Batemw ba Yehow ba kal, baakady badiil baat baakady balek kukun musah mulengel mat. Cileejel, Noweh “waakady ulongweesh myand ya biin-biin,” mu mivw makumy manaay eecy makumy mataan. (2 Py. 2:5) Diifuk dikwaabw, waakady mutakamin neey: baat biiyiiy kwiitab malongweesh ma myand ya biin-biin, ki Yehow kaakadyoh bend muleeb neey: bidy mwa kulongek nook. Ki, haakady Mawej mwambil Noweh bwa kusong bwaat, uleebel neey: “Tweel mu bwaat ni mukaj iibuh, baan biibuh ni baheel biibuh.” (Kbwa. 6:18) Ni hakutal bul ni bunen bwa bwaat bwaakady Mawej mumwambil bwa kusong, Noweh utadil neey: baat bavul kabakumukunoh bend mat, bwaal kakwaakadyoh bend cyaab mu bwaat. (Kbwa. 6:15) Muut ning waakaabumw wa mu ciisang aacy, kaakadyoh bend mukun Noweh mat. (Kbwa. 7:7) Yehow utadil neey: Noweh kaakadyoh bend mudiil baat musah bilengel eeny? Waakweeh! Mawej waakady ni musangal  muvul, bwaal Noweh ulongel byoos byaakady Yehow mumwambil.​—Kbwa. 6:22.

12. I mushind kaay waakady muprofet Jeremih muhet musangal mu mudimw indiy ning haakady baat bamusek ni bamulwiish?

¹² Muprofet Jeremih waakady mudiil byend baat musah mukacy mwa mivw yihit ha makumy anaay. Mu ciisang cyaakady baat kabay bakat kumukun mat ni bamulwiish, ukooyel bikasakan mu mabok bu mwaakady balwiish bindiy ‘bamusek ni bamwand matooh’ bwa mudimw indiy waakadyey ulong. (Jer. 20:8, 9) Ki Jeremih kaakadyoh bend muhing haanyim! I bingany byaakady bimwambulwiish bwa kutungunuk ni kulam meej malengel, ni bwa kwiikal ni musangal mu mudimw indiy? Waakady mutum meej mindiy ku myand yibidy ya buseeb. Bwaal bwa kuuhal, Musah a Mawej waakady Jeremih wambil baat waakady mwiimanyin ha “bwaal bukwaabw kuuhalook bunudy batakamin bikasakan.” (Jer. 29:11) Bwaal bwiibiidy, Yehow waakishil Jeremih musah indiy bwa kwambiley baat. (Jer. 15:16) Tut byeet, tutwaatwaal musah ushiishikik baat talal mu bulongolody bubiih oobw, ni tudy ni diijin dya Yehow bu Batemw bindiy. Tut balam myand yibidy ya buseeb eey mu meej, twiiyiiy kuhet musangal ning iikal baat mwa kwiitab eecy kulek musah utwiibatwaatwaadil.

13. I biny bituloolongel ku kasumw katwaadil Yeez katusaasangan mu Mark 4:26-29?

¹³ Byangangat diib divul bwa muut kukasakaney mu myand ya mu spirit. Yeez waakady mulongweesh biin-biin eeby mu kasumw katwaadiley ka cidim waakady mulaal tul. (Bal Mark 4:26-29.) Haanyim a cidim muman kukun tet indiy, kaakadyoh bend mumanyik mwaakadyey yikasakan. Teng bu cidim ukukun tet, uw byeeb, kwiin mwa kutal musang umw muyaay mulony iibuh wa Bibl kuuhal mu myand ya mu spirit, ki biloolongek bikeeh-bikeeh. Teng bu cidim udy kay mwa kukashish biit bidyey mukun mu mushind udyey mukat, katwiin mwa kusak balony ba Bibl bwa kuyeb kuuhal mu mushind utudy bakat. Nook, kukooyeloh bend mu mabok eecy kuhingoh bend haanyim. Teng bu cidim, bikaam tutukij mu diis batakamin bwa mulony iitut i yangacil dihangadik dya kukadil Yehow mudimw.​—Jak 5:7, 8.

14. I cileejel kaay cileeleej neey: bihet bya mudimw a bukajaady bimweemweek bikeeh-bikeeh?

¹⁴ Mu teritwaar yikwaabw, byangangat mafuk mavul bwa muut kutambuley. Twangat cileejel cya Gladys ni Ruby Allen, baan ba muut baakadyobw bakiish mudimw a buseeb aa njil bwa haciibidil mu tawuny wa mu provens wa Kanadah udyobw babiikan neey: Quebec *; mu muvw a 1959; Bwaal baat baakady baciin biin mutumb naabw ni bafumw ba bitendeleel biin Katolik baakady bibalekesh bwa kabakun mat ku musah a Bukaleng. Gladys uvuuvuluk neey: “Twaakady tukadiil baat musah ku cibel ni ku cibel ni tulong meeb 8 ku diifuk mukacy mwa mivw ibidy ni kakwaakadyoh bend muut ning waakaabumw waakady mukat bwa twiisamb nend! Haakady baat biiy ku cibel ciitut, bab bitusanganok, baakady bahingomw musang umw. Katwaakadyoh bend bahing haanyim.” Ku bikeeh ku bikeeh, twaakady bady bulund ni baat ni kutwaadijobw kwiitukun mat. Mu ka tawuny aak, mukady kaabaak bisumbw bisat.​—Ye. 60:22.

15. Mukand a 1 Biin Korent 3:6, 7 wiituloolongweesh biny habitaatal mudimw a kwaalabul baat bwa bashaal biiyij?

¹⁵ Mudimw a kwaalabul baat bwa kushaalobw biiyij uloolomb dyambulwiish dya  bavul. Badyaakal baleeb neey: Cisumbw cyoos cidy ni mudimw a kwambulwiish muut bwa kufikey ku baatiisumw. (Bal 1 Biin Korent 3:6, 7.) Cileejel, Kajaady udy mwa kushiil muut udy mukat kumanyik myand ya biin-biin trakt eecy cibij-bij. Mwiin-kweet mwaan mulum oow utaatal mu program indiy neey kiin ni diib dya kakumbuley muut waakady mwiitab myand ya biin-biin, nook uloolomb kajaady mukwaabw bwa kuyey kamukumbul. Kajaady utwaatwaadij kulong nend Bibl. Misang yikwaabw, ubiibiikan biin-kweet baan-balum ni baan-bakaj bwa bamutwaalok bwa kalombol dilong dya Bibl aady, ni muut woos ukaakashish mulony a Bibl mu mushind indiy. Mwiin-kweet mwaan-mulum eecy mwaan-mukaj woos waakady uhetangan ni mulony oow, waakady umwambulwiish bwa kukashishey diitabij dindiy mu myand ya biin-biin. Teng muleebel Yeez, ukuukun ni waanaanun basaasangeel haakaabumw mu kwaanun kwa mu spirit.​—Jah 4:35-38.

16. Bwanbiny udy mwa kwiikal ni musangal mu mudimw iibuh a bukajaady ning uw kuy ni makand ma nyeet makumban?

¹⁶ I biny biwudy mwa kulong hawutaatal neey: kuciin ni makand ma nyeet makumban bwa kudiil ni kulongweesh baat musah mulengel? Udy mwa kutungunuk ni kwiikal ni musangal mu mudimw iibuh wa kwaanun uwuloolong. Twangat cileejel cya Mukaleng David, diib dyaakadyey yiy ni baat bindiy balam bisak byaabab ni biit kudy balongavy, biin Amalek biiyil kuhawul cibunj. Baat nkam ibidy ba ku baat baakady bakal diivit bakooyel bikasakan, bibalombel bwa bashaal haanyim bwa kulam biit. Hamanyinobw kucimun diivit, Davih wambiil baat bwa babanyangan biit bikwaacilobw mu diivit mwaakacyumw ni baat bashaadil. (1 Sam. 30:21-25) I bya mushind aakaabumw ni mudimw iitut utukaakal wa ha bulab butuutul wa kwaalabul baat bwa bashaal biiyij. Baat boos bady mwa kwiikal ni musangal hadyobw batal muut muhyaamuhy udyobw bambulwiish utweel mu njil ufiifikish ku buumy.

17. Bikaam tufwiijok Yehow bwa myand kaay?

¹⁷ Tufwiifwiijok Yehow bwa mudyey mwiitukat hangangatey mudimw utumukaakadil ni buseeb. I mumanyik neey: kutwiin mwa kulongeshoh bend muut ku makand bwa kumukadiley mudimw. Nook, utaatal cisumy ciitut ni mushind utumuleeleej lukat, ni wiiyiiy kwiitwaakish bulang. Wiituloolongweesh cikwaabw mutudy mwa kwiikal ni musangal mu mudimw mutam utukaakal wa kwaanun. (Jah 14:12) Twiikal batwiishiibw neey: Mawej wanyanyish mudimw utumukaakadil hatwiikal katuy bahing haanyim!