1. Wetin mek wi gɛt gladi-at ɛn si am as big big ɔnɔ fɔ bi Jiova Witnɛs?

WI RILI gladi ɛn de si am as big big ɔnɔ fɔ bi Jiova Witnɛs. Wi na Jiova in pipul dɛn, ɛn wi de pruv se wi na in witnɛs dɛn bay we wi de prich to ɔda pipul dɛn ɛn tich dɛn bɔt am. Wi kin gladi we wi kin ɛp pɔsin we “rili sho se [i] want fɔ gɛt layf we go de sote go,” fɔ mek i biliv di Masta. (Akt 13:​48) Wi de fil di sem we aw Jizɔs bin fil. “Di oli spirit mek [i] gladi pasmak” we in disaypul dɛn bin tɛl am di gud tin dɛn we apin we dɛn bin go prich.—Lyuk 10:​1, 17, 21.

2. Aw wi go sho se wi prichin wok rili impɔtant to wi?

² Wi de si di prichin wok as sɔntin we rili impɔtant. Apɔsul Pɔl bin ɛnkɔrej Timoti se: “Kɔntinyu fɔ pe atɛnshɔn to yusɛf ɛn di we aw yu de tich.” Pɔl bin tɔk bak se: “Bikɔs we yu de du dɛn, yu go sev yusɛf ɛn di wan dɛn we de lisin to yu.” (1 Tim. 4:​16) So wi prichin wok de sev pipul dɛn layf. Wi de kɔntinyu fɔ pe atɛnshɔn to wisɛf bikɔs wi na sitizin dɛn na Gɔd in Kiŋdɔm. Wi want fɔ du sɔntin ɔltɛm we go briŋ prez to Jiova ɛn sho se wi biliv di gud nyuz we wi de prich. (Fil. 1:​27) Wi de sho se wi de ‘pe atɛnshɔn to di we aw wi de tich’ bay we wi de pripia fayn fayn wan fɔ fil savis ɛn aks Jiova fɔ ɛp wi bifo wi prich to ɔda pipul dɛn.

3. Na ɔlman go want fɔ lisin to di Kiŋdɔm mɛsej? Gi wan ɛgzampul.

³ Pan ɔl we wi kin du wi bɛst fɔ prich to ɔda pipul dɛn, sɔntɛm bɔku pipul dɛn nɔ go want fɔ lisin to di gud nyuz bɔt di Kiŋdɔm. Lɛ wi tɔk bɔt Brɔda Jɔj Lindal in ɛkspiriɛns. In wan bin prich difrɛn difrɛn say dɛn na Aysland  frɔm 1929 to 1947. I bin gi bɔku pɔblikeshɔn dɛn, bɔt nɔbɔdi nɔ bin kam fɔ bi Jiova Witnɛs. I bin rayt se: “I tan lɛk se sɔm pipul dɛn de agens wetin di Baybul de se, bɔt bɔku pan dɛn jɔs nɔ want fɔ no di trut.” Pan ɔl we sɔm mishɔnari dɛn we dɛn tren na Giliad Skul bin go de fɔ ɛp wit di wok, dɛnsɛf bin prich fɔ sɔm tɛm, ɛn dɛn nɔ bin si ɛnibɔdi we sho se i want fɔ no mɔ. Bɔt afta nayn ia, sɔm pan dɛn bin gi dɛn layf to Jiova ɛn baptayz. *

4. Aw wi kin fil we pipul dɛn nɔ want fɔ lisin to di gud nyuz?

⁴ Wi nɔ kin gladi we pipul dɛn nɔ kin want fɔ stɔdi di Baybul. Sɔntɛm wi go fil lɛk Pɔl, we in ‘at bin pwɛl bad bad wan, ɛn gɛt pen na in at ɔltɛm’ bikɔs bɔku pan di Ju dɛn nɔ bin want fɔ biliv se Jizɔs na di Mɛsaya. (Rom. 9:​1-3) Sɔntɛm yu de stɔdi pɔsin di Baybul. Yu de wok tranga wan fɔ bi gud ticha, ɛn yu de pre fɔ yu studɛnt ɔltɛm. Bɔt i nɔ de du wetin i de lan, ɛn yu nid fɔ stɔp fɔ stɔdi wit am. Ɔ sɔntɛm yu nɔ wande stɔdi pɔsin te i baptayz. Fɔ se dis min se na yu fɔlt ɛn Jiova nɔ gladi wit yu prichin wok? Insay dis atikul, wi go ansa tu kwɛstyɔn dɛn: (1) Wetin de mek Jiova gladi fɔ wi prichin wok? (2) Wetin wi fɔ ɛkspɛkt we wi de prich to ɔda pipul dɛn?

5. Wetin mek wi nɔ de si di rizɔlt we wi kin op fɔ ɔltɛm insay wi prichin wok?

⁵ Di Baybul tɔk bɔt pɔsin we de du wetin Gɔd want se: “I go bɛtɛ pan ɔl wetin i de du.” (Sam 1:​3) Bɔt dat nɔ min se ɔl wetin wi de du fɔ Jiova go apin lɛk aw wi want. Mɔtalman layf “gɛt bɔku bɔku waala” bikɔs wi ɛn ɔda pipul dɛn nɔ pafɛkt. (Job 14:​1) Dɔn bak, sɔntɛnde, di wan dɛn we de agens wi kin stɔp wi fɔ mek wi nɔ prich di we dɛn aw wi dɔn yus fɔ de prich. (1 Kɔr. 16:​9; 1 Tɛs. 2:​18) So aw Jiova de disayd if wi de du wi prichin wok fayn? Lɛ wi tɔk bɔt sɔm Baybul prinsipul dɛn we go ɛp wi fɔ ansa dis kwɛstyɔn.

6. Wetin go mek Jiova gladi we wi de wok fɔ am?

⁶ Jiova de pe atɛnshɔn to aw wi de wok tranga wan ɛn we wi nɔ de giv-ɔp. Jiova kin gladi we wi de prich wit zil bikɔs wi lɛk am, ilɛksɛf pipul dɛn nɔ want fɔ lisin. Pɔl bin rayt se: “Gɔd nɔ de du wetin nɔ rayt, so i nɔ go fɔgɛt una wok ɛn di we aw una dɔn sho se una lɛk in nem bay we una de wok ɛn kɔntinyu fɔ wok fɔ di oli wan dɛn.” (Ibru. 6:​10) Jiova de mɛmba wi wok ɛn wi lɔv, ilɛksɛf wi nɔ gɛt Baybul stɔdi we dɔn baptayz. So, yu kin ivin aplay to yusɛf wetin Pɔl bin tɛl di brɔda dɛn na Kɔrint. I bin se: “Di wok we una de wok fɔ di Masta nɔto fɔ natin,”  ilɛksɛf yu nɔ si di rizɔlt we yu de op fɔ.—1 Kɔr. 15:​58.

7. Wetin wi lan frɔm wetin apɔsul Pɔl bin tɔk bɔt in prichin wok?

⁷ Apɔsul Pɔl na bin gud mishɔnari. I bin de mek nyu kɔngrigeshɔn dɛn na bɔku siti dɛn. Bɔt we sɔm pipul dɛn bin de tɔk agens Pɔl ɛn se in nɔto gud ticha, i nɔ bin tɔk bɔt di bɔku pipul dɛn we i bin dɔn ɛp fɔ bi Kristian. Bifo dat, Pɔl sho se i nɔ gri wit di wan dɛn we bin de tray fɔ put dɛnsɛf ɔp bay we i rayt se: “A dɔn wok pas dɛn.” (2 Kɔr. 11:​23) Jɔs lɛk Pɔl, wi fɔ mɛmba se wetin impɔtant mɔ to Jiova na we wi de wok tranga wan ɛn nɔ giv-ɔp.

8. Wetin wi fɔ mɛmba bɔt wi prichin wok?

⁸ Wi prichin wok de mek Jiova gladi. Jizɔs bin sɛn 70 disaypul dɛn fɔ prich bɔt di Kiŋdɔm mɛsej, ɛn dɛn bin “gladi” we dɛn bin kam bak. Wetin bin mek dɛn gladi? Dɛn bin se: “Ivin di dimɔn dɛn bin de obe wi we wi yuz yu nem.” Bɔt Jizɔs bin kɔrɛkt di we aw dɛn bin de tink, we i bin tɛl dɛn se: “Una nɔ fɔ gladi bikɔs di dimɔn dɛn de obe una; una fɔ gladi bikɔs Gɔd dɔn rayt una nem dɛn na ɛvin.” (Lyuk 10:​17-20) Jizɔs bin no se nɔto ɔltɛm dɛn go gɛt dɛn fayn ɛkspiriɛns dɛn de na dɛn prichin wok. Infakt, wi nɔ no ɔmɔs pan di pipul dɛn we Jizɔs in disaypul dɛn bin prich to, we bin leta bi Kristian. Di disaypul dɛn bin nid fɔ ɔndastand se nɔto we di pipul dɛn lisin to dɛn go mek dɛn gɛt gladi-at nɔmɔ. Dɛn go gɛt tru tru gladi-at we dɛn kam fɔ no se Jiova gladi wit dɛn tranga wok.

9. Wetin Galeshians 6:​7-9 se go apin if wi nɔ giv-ɔp fɔ du di prichin wok?

⁹ If wi nɔ giv-ɔp fɔ du di prichin wok, wi go gɛt layf we go de sote go. We wi du wi bɛst fɔ prich ɛn tich di gud nyuz, wi de du bak “wetin di spirit want” bay we wi de alaw Gɔd in oli spirit fɔ wok na wi layf. If wi nɔ “giv-ɔp” ɔ “taya,” Jiova prɔmis se i go gi wi layf we go de sote go, ilɛksɛf wi nɔ ɛp pɔsin fɔ baptayz.—Rid Galeshians 6:​7-9.

10. Wetin mek sɔm pipul dɛn kin lisin we wi prich to dɛn ɛn ɔda wan dɛn nɔ kin lisin?

¹⁰ Na wetin de na pipul dɛn at na in na di men tin we go mek dɛn lisin to wi. Jizɔs bin ɛksplen dis tru tin insay in parebul bɔt wan fama we bin de plant sid na difrɛn grɔn dɛn, bɔt na di sid nɔmɔ we fɔdɔm na gud grɔn bin bia frut. (Lyuk 8:​5-8) Jizɔs bin se di difrɛn grɔn dɛn tinap fɔ di difrɛn we dɛn aw di tin we de na pipul dɛn at de mek dɛn lisin to “Gɔd in wɔd.” (Lyuk 8:​11-15) Jɔs lɛk di fama, wi nɔ go ebul mek sɔntin gro na pipul dɛn at we wi prich to dɛn. Wi wok na fɔ kɔntinyu fɔ plant di fayn sid we na di Kiŋdɔm mɛsej. Jɔs lɛk aw apɔsul Pɔl se, “ɔlman go gɛt in yon pe akɔdin to aw i wok,” nɔto akɔdin to di rizɔlt fɔ in wok.—1 Kɔr. 3:​8.

11. Wetin mek Jiova bin gladi fɔ di prichin wok we Noa bin de du pan ɔl we pipul dɛn nɔ bin lisin to am? (Luk di pikchɔ na di frɔnt pej.)

¹¹ Trade trade, bɔku pan Jiova in savant dɛn bin de prich to pipul dɛn we nɔ bin want fɔ lisin. Fɔ ɛgzampul, Noa na pɔsin “we bin de prich bɔt wetin rayt,” fɔ lɛk 40 ɔ 50 ia so. (2 Pit. 2:​5) Wan dawt nɔ de se i bin de op se pipul dɛn go lisin to am, bɔt Jiova nɔ bin se dat go apin. Bifo dat, we Gɔd bin tɛl Noa fɔ bil di ak, i bin se: “Yu go go insay di ak wit yu wɛf, yu bɔypikin dɛn, ɛn dɛn wɛf.” (Jɛn. 6:​18)  Ɛn we Jiova bin tɛl Noa bɔt di ak in sayz we i fɔ mek, Noa go dɔn no se bɔku pipul dɛn nɔ go lisin to am, bikɔs spes nɔ go de fɔ dɛn insay di ak. (Jɛn. 6:​15) As wi no, ivin wan pɔsin sɛf nɔ bin lisin to Noa. (Jɛn. 7:​7) Fɔ se Jiova bin tink se Noa nɔ bin du di prichin wok fayn wan? Nɔ, nɔto so i bi. Jiova bin rili gladi fɔ Noa bikɔs i bin du wetin I tɛl am fɔ du.—Jɛn. 6:​22.

12. Aw prɔfɛt Jɛrimaya bin gɛt gladi-at pan in prichin wok pan ɔl we pipul dɛn nɔ bin de lisin to am ɛn dɛn bin de agens am?

¹² Prɔfɛt Jɛrimaya insɛf bin prich pas 40 ia, pan ɔl we pipul dɛn nɔ bin de lisin to am, ɛn dɛn bin de agens am. In at bin rili pwɛl bikɔs pipul dɛn bin de “trit [am] lɛk kresman,” te i bin want fɔ stɔp in wok. (Jɛr. 20:​8, 9) Bɔt Jɛrimaya nɔ bin giv-ɔp. Wetin bin ɛp am fɔ kɔntinyu ɛn gɛt gladi-at pan in prichin wok? I bin pe atɛnshɔn pan tu impɔtant tin dɛn. Fɔs, Gɔd in mɛsej we Jɛrimaya bin de prich to di pipul dɛn na mɛsej we go gi dɛn ‘op’ ɛn mek dɛn “bɛtɛ bambay.” (Jɛr. 29:​11) Sɛkɔn, Jiova bin dɔn put in nem pan Jɛrimaya. (Jɛr. 15:​16) Wisɛf de prich bɔt mɛsej we de gi op to pipul dɛn, ɛn wi gɛt Jiova in nem as in Witnɛs dɛn. We wi pe atɛnshɔn pan dɛn tu impɔtant tin ya, wi go gɛt gladi-at ilɛksɛf pipul dɛn nɔ lisin to wi.

13. Wetin wi lan frɔm Jizɔs in parebul we de na Mak 4:​26-29?

¹³ I kin tek lɔng tɛm fɔ lɛ pɔsin gɛt fet. Jizɔs bin tich dis tru tin insay in parebul bɔt wan fama we bin de slip. (Rid Mak 4:​26-29.) Afta di fama dɔn plant in sid dɛn, dɛn bin de gro smɔl smɔl, ɛn di fama nɔ bin ebul fɔ du natin fɔ mek dɛn gro kwik kwik wan. Jɔs lɛk da fama de, sɔntɛm yusɛf go gɛt fɔ wet fɔ lɔng tɛm bifo yu si yu Baybul studɛnt de du wetin i de lan. Jɔs lɛk aw di fama nɔ go ebul fɔ mek in plant dɛn gro fast lɛk aw i want, na so wisɛf nɔ go ebul mek wi Baybul studɛnt dɛn fet gro kwik kwik wan lɛk aw wi want. So nɔ pwɛlat ɔ giv-ɔp if i de tek lɔng tɛm fɔ lɛ yu Baybul studɛnt dɛn go bifo lɛk aw yu de ɛkspɛkt. Jɔs lɛk fama, wi nid fɔ peshɛnt we wi de mek disaypul.—Jems 5:​7, 8.

14. Us ɛgzampul sho se sɔm pipul dɛn kin tek lɔng tɛm bifo dɛn stat fɔ lisin to wi?

¹⁴ Na sɔm tɛritri dɛn, i kin tek lɔng lɔng tɛm bifo pɔsin baptayz. Lɛ wi tɔk bɔt Gladis ɛn Rubi Alɛn dɛn ɛkspiriɛns, we na bin bɛlɛ-bɔn sista dɛn. Insay 1959, dɛn bin asayn dɛn as rɛgyula payɔnia dɛn na wan tɔŋ insay di Kanedian prɔvins na Kyubɛk. * Bikɔs pipul dɛn bin de fred wetin dɛn neba dɛn ɛn prist dɛn go du ɔ se if dɛn tɔk to Jiova Witnɛs dɛn, dɛn nɔ bin de lisin to dɛn. Gladis bin se: “Wi bin de spɛn et awa fɔ prich frɔm os to os ɛvride fɔ tu ia, ɛn nɔbɔdi nɔ bin lisin to wi. Di pipul dɛn bin de kam na dɛn domɔt, we dɛn si se na wi, dɛn de go bak. Bɔt wi nɔ bin giv-ɔp.” Smɔl smɔl, di pipul dɛn bigin tɔk to dɛn fayn, ɛn sɔm bin stat fɔ lisin to dɛn. Naw na tri kɔngrigeshɔn dɛn de na da tɔŋ de.—Ayz. 60:​22.

15. Wetin 1 Kɔrintians 3:​6, 7 tich wi bɔt di wok fɔ mek disaypul?

¹⁵ Bɔku pipul dɛn nid fɔ wok togɛda fɔ ɛp pɔsin fɔ bi disaypul. Ɔlman na di kɔngrigeshɔn kin du wetin dɛn ebul fɔ ɛp pɔsin fɔ baptayz. (Rid 1 Kɔrintians 3:​6, 7.) Fɔ ɛgzampul, wan brɔda go lɛf wan trakt ɔ magazin to pɔsin we sho se i want fɔ no  mɔ. Bɔt i nɔ ebul fɔ du ritɔn visit di tɛm we di pɔsin want am fɔ go, so i tɔk to wan ɔda brɔda fɔ du di ritɔn visit. Da pɔblisha de ebul fɔ stat Baybul stɔdi. Dɔn, i invayt ɔda brɔda ɛn sista dɛn fɔ jɔyn am fɔ du di stɔdi, ɛn dɛn ɔl ɛnkɔrej di studɛnt difrɛn we dɛn. Ɛni brɔda ɔ sista we di studɛnt mit go ɛp am fɔ lan mɔ bɔt Jiova. Bay da we de, ɔl di wan dɛn we wok tranga wan fɔ ɛp pɔsin go gladi we di pɔsin baptayz.—Jɔn 4:​35-38.

16. Wetin mek yu go gɛt gladi-at pan yu prichin wok ilɛksɛf yu gɛt wɛlbɔdi prɔblɛm ɔ yu nɔ gɛt bɛtɛ trɛnk?

¹⁶ Sɔntɛm yu nɔ ebul fɔ prich ɛn tich lɛk aw yu bin de du trade bikɔs yu gɛt wɛlbɔdi prɔblɛm ɔ yu nɔ gɛt bɛtɛ trɛnk. Yu kin stil gɛt gladi-at bikɔs ɔf wetin yu ebul fɔ du. Lɛ wi tɔk bɔt wetin bin apin to Kiŋ Devid, we in ɛn in man dɛn bin go sev dɛn famili ɛn dɛn prɔpati dɛn frɔm di Amalɛkayt dɛn. Tu ɔndrɛd pan in man dɛn bin rili taya fɔ fɛt, so dɛn bin lɛf biɛn fɔ gayd dɛn prɔpati dɛn. Afta we dɛn win di fɛt, Devid bin se dɛn ɔl fɔ sheb di valyu tin dɛn we dɛn bin tek, ikwal wan. (1 Sam. 30:​21-25) Na di sem tin wit di prichin wok we wi de du ɔlsay na di wɔl. Sɔntɛm yu nɔ go ebul fɔ du di prichin ɛn tichin wok lɛk aw yu want. Bɔt if yu du ɔl wetin yu ebul, yu go stil gɛt gladi-at ɛnitɛm we nyu pɔsin kam fɔ no Jiova ɛn baptayz.

17. Wetin wi fɔ tɛl Jiova tɛnki fɔ?

¹⁷ Wi tɛl Jiova tɛnki fɔ di fayn we aw i de si wi savis to am. I no se wi nɔ go ebul fɔ fos pipul dɛn fɔ lisin to wi ɔ fɔ stat fɔ wɔship am. Bɔt i de si di tranga wok we wi de du ɛn aw wi lɛk am, ɛn i de blɛs wi. I de tich wi bak aw wi go gɛt gladi-at fɔ wetin wi de du pan di prichin wok. (Jɔn 14:​12) Wi shɔ se Gɔd go gladi fɔ wi wans wi nɔ giv-ɔp.