1. Ki kabakalañi halutabile ni haluitebuha tohonolo ya kuba Lipaki za Jehova?

LUTABILE hahulu mi lunani tohonolo yetuna ya kuba Lipaki za Jehova! Lubizwa ka libizo la Mulimu, mi lubonisa kuli lu lipaki zahae ka kukutaza ni kutusa batu kuba balutiwa. Lubanga ni tabo haiba lutusize mutu yomuñwi ‘wa pilu yende yabata bupilo bobusa feli’ kuba mulumeli. (Lik. 13:48) Luikutwa sina mwanaaikutwezi Jesu ‘yanaawabezwi ka moya okenile’ muta balutiwa bahae neba mutaluselize lika zende zene bapetile mwa bukombwa bwabona.—Luka 10:1, 17, 21.

2. Lukona kubonisa cwañi kuli luunga bukombwa bwaluna kuba bwa butokwa hahulu?

² Luunga bukombwa bwaluna kuba bwa butokwa hahulu. Muapositola Paulusi naasusuelize Timotea kuli: “Uzwelepili kutokomela mikwa yahao ni tuto yahao.” Paulusi naaekelize kubulela kuli: “Ka kueza cwalo ukaipilisa ni kupilisa baba kuutwa.” (1 Tim. 4:16) Taba yeo ibonisa kuli musebezi waluna wa kukutaza wapilisa. Luswanela kuzwelapili kutokomela mikwa yaluna bakeñisa kuli luipeya mwatasaa Mubuso wa Mulimu. Kamita lubata kueza lika zetahisa tumbo ku Jehova ni kupila ka nzila yebonisa kuli lwalumelelana ni taba yende yelukutaza. (Mafil. 1:27) Lubonisa kuli ‘lutokomela tuto yaluna’ ka kuitukisezanga hande pili lusikaya kale mwa bukombwa ni halukupa kuli alufuyaule pili lusikayo kutaza kale ku babañwi.

3. Kana ki batu kaufela babaka amuhela lushango lwaluna lwa Mubuso? Mufe mutala.

³ Fokuñwi, niha lukona kueza molukonela kaufela kukutaza ku babañwi, batu babañata babapila mwa sibaka selukutaleza ku sona bakona kusaamuhela lushango lwaluna lwa Mubuso. Halunyakisiseñi mutala wa muzwale yabizwa Georg Lindal, yanaakutalize anosi mwa naha kaufela ya Iceland, kuzwa 1929 kuisa 1947. Naafile lihatiso zeñata-ñata mwa bukombwa, kono hakuna nihaiba mutu alimuñwi yanaaamuhezi niti. Naañozi kuli: “Batu babañwi balwanisa taba yende, kono buñata bwa  batu bona haba itabeli feela.” Kusina taba kuli balumiwa bane bakeni Sikolo sa Giliadi nebalumilwe kwa Iceland, nekufitile lilimo ze 9 kuzwa fo kuli batu babañwi ba kwateñi baneele bupilo bwabona ku Jehova ni kukolobezwa. *

4. Lukona kuikutwa cwañi haiba batu habaamuheli taba yende yelukutaza?

⁴ Luikutwanga bumaswe batu habasa amuheli taba yende yelukutaza. Mwendi lukona kuikutwa sina mwanaaikutwezi Paulusi, yanaabile ni “maswabi amatuna ni butuku bobusa feli” bakeñisa kuli buñata bwa Majuda nebasika lumela kuli Jesu ki yena Mesia yanaasepisizwe. (Maro. 9:1-3) Mukona kueza cwañi haiba mulikile momukonela kaufela kutusa muituti wamina wa Bibele ni kumulapelela, kono haaezi zwelopili mi muikutwa kuli muswanela feela kutuhela kuituta ni yena? Kamba kucwañi haiba hamusika tusa nihaiba mutu alimuñwi kueza zwelopili ni kukolobezwa? Kana muswanela kuikutwa mulatu ka kunahana kuli Jehova mwendi haasika fuyaula bukombwa bwamina? Mwa taba ye, lukanyakisisa lipuzo zepeli zelatelela: (1) Ki lika mañi zebonisa kuli mutu ukondisize mwa bukombwa bwahae? (2) Luswanela kulibelelañi halukutaza kwa batu?

5. Ki kabakalañi fokuñwi lika zelubata kuezeza Jehova halisa bangi sina molubatela?

⁵ Bibele ibulela cwana ka za mutu yaeza tato ya Mulimu, ili: “Zaeza kaufela likakonda.” (Samu 1:3) Kono taba yeo haitalusi kuli lika kaufela zelubata kuezeza Jehova likaba sina molubatela. Bupilo bwa mutu “butezi liziyezi” bakeñisa kuli luna ni batu babañwi halusika petahala. (Jobo 14:1) Hape balwanisi fokuñwi bakona kulupaleliswa kukutaza fa nyangela sina moluezezanga kamita. (1 Makor. 16:9; 1 Mates. 2:18) Kacwalo, ki lika mañi zelutokwa kueza kuli Jehova aange kuli lukondisize mwa bukombwa bwaluna kamba kutokwa? Halunyakisiseñi likuka za mwa Bibele zekona kulutusa kualaba puzo yeo.

6. Ki lika mañi zelutokwa kueza kuli Jehova aange kuli lukondisize mwa bukombwa bwaluna kamba kutokwa?

⁶ Jehova walemuhanga buikatazo ni buitiiso bwaluna. Jehova uunga kuli lukondisize mwa musebezi waluna haiba luueza ka molukonela kaufela ni kueza musebezi wo ka lilato, ibe kuli batu baamuhela lushango lwaluna kamba kutokwa. Paulusi naañozi kuli: “Mulimu haki yasika luka kuli alibale musebezi wamina ni lilato lemubonisize kwa libizo lahae, ka kusebeleza babakenile ni kuzwelapili kubasebeleza.” (Maheb. 6:10) Jehova haalibalangi buikatazo ni lilato laluna kusina taba kuli halusika kona kutusa muituti wa Bibele kuunga muhato wa kukolobezwa. Kacwalo, muhupule manzwi anaabulezi Paulusi kwa Bakreste ba kwa Korinte, hanaaize: “Musebezi wamina haki osina tuso ku Mulena,” ibe kuli mukonile kutusa mutu kuunga muhato wa kukolobezwa kamba kutokwa.—1 Makor. 15:58.

7. Luitutañi ku zanaabulezi muapositola Paulusi ka za bukombwa bwahae?

 ⁷ Muapositola Paulusi naali mulumiwa yanaanani tukufalelo, mi naatomile liputeho zenca mwa mileneñi yemiñata. Kono batu hane bamunyazize ka kubulela kuli naasi muluti yomunde, Paulusi naasika bulela za palo ya batu banaatusize kuba balumeli. Kono ka kualaba batu bao bane babonisa inge kuli bamufita, Paulusi naañozi kuli: “Niezize misebezi yemiñata.” (2 Makor. 11:23) Sina Paulusi, luswanela kuhupula kuli Jehova uitebuha hahulu buikatazo ni buitiiso bwaluna.

8. Ki nto mañi yeluswanela kuhupula ka za bukombwa bwaluna?

⁸ Bukombwa bwaluna butabisa Jehova. Jesu naalumile balutiwa bahae ba 70 kuyo kutaza lushango lwa Mubuso, mi hamulaho wa kukutaza, “bakuta inze batabile.” Ki kabakalañi hane batabile? Nebaize: “Nihaiba madimona aluutwa ka kuitusisa libizo lahao.” Nihakulicwalo, Jesu abahakulula ka kubulela kuli: “Musike mwataba kabakala kuli mioya yamiutwa, kono mutabe kabakala kuli mabizo amina añozwi mwa mahalimu.” (Luka 10:17-20) Jesu naaziba kuli ka linako zeñwi balutiwa bahae nebasike bapeta lika zetuna mwa bukombwa bwabona. Mane haluzibi kuli ki batu babakai bane bakutalizwe ki balutiwa ba Jesu bane babile balumeli hasamulaho. Balutiwa nebatokwa kulemuha kuli nto yetuna yeneswanela kubatahiseza tabo ki kulemuha kuli Jehova naaitebuha buikatazo bwabona isiñi feela kabakala musebezi one baeza.

9. Ka kuya ka Magalata 6:7-9, ki mupuzo mañi oluka fumana haiba luzwelapili kukutaza lusazwafi?

⁹ Haiba luzwelapili kupeta bukombwa bwaluna lusazwafi, lukafumana bupilo bobusa feli. Halueza molukonela kaufela kukutaza taba yende ya Mubuso ni kuluta batu, lubonisa hape kuli ‘lucala ka kuya ka moya,’ ili kutuhelela moya wa Mulimu okenile kuluetelela. Haiba ‘lusakatali’ kamba ‘kuzwafa,’ Jehova usepisa kuli uka lufa bupilo bobusa feli, kusina taba kuli lutusize mutu kuunga muhato wa kuineela ku yena ni kukolobezwa kamba kutokwa.—Mubale Magalata 6:7-9.

10. Ki kabakalañi batu babañwi habateelezanga kwa lushango lwaluna kamba kuluhana?

¹⁰ Batu bakona kuamuhela lushango lwaluna kamba kuluhana kulikana ni moliinezi lipilu zabona. Jesu naatalusize hande taba yeo mwa swanisezo yanaafile ka za mucali yanaacala peu yahae, mi lipeu zahae neliwezi fa mubu oshutana-shutana, kono ki peu iliñwi feela yenewezi fa mubu omunde yenebeile miselo. (Luka 8:5-8) Jesu naabulezi kuli mubu oshutana-shutana uyemela batu babaamuhela “linzwi la Mulimu” ka kushutana kulikana ni moliinezi lipilu zabona. (Luka 8:11-15) Ka kuswana ni mucali yo, halukoni kuhapeleza batu kuamuhela lushango lwa Mubuso bakeñisa kuli kuitingile ku bona mobaangela taba yeo mwa lipilu zabona. Musebezi waluna kwateñi ki kuzwelapili kucala lipeu zende za lushango lwa Mubuso. Paulusi naabulezi kuli: “Mutu ni mutu ukaamuhela mupuzo wahae luli kulikana ni musebezi wahae,” isiñi ka kuya ka zapetile mwa musebezi wahae.—1 Makor. 3:8.

11. Ki kabakalañi Nuwe hanaakondisize ka kuba “mukutazi wa kuluka”? (Mubone siswaniso sesi fa kava.)

¹¹ Kuzwa feela kwamulaho, batanga ba Jehova babañata bakutalize kwa batu bane bahanile kuutwa lushango lwabona. Ka mutala, Nuwe naali “mukutazi wa kuluka” ka lilimo zeñata-ñata. (2 Pit. 2:5) Kusina kukakanya, naatabela kuli batu babañwi baamuhele lushango lwahae, kono Jehova naasika bonisa kuli nekukaba cwalo. Mulimu hanaalaezi Nuwe kuyaha aleka, naaize: “Ukene mwa aleka, wena ni bana bahao babashimani, ni musalaa hao, ni  basali ba bana bahao.” (Gen. 6:18) Jehova hanaa mutaluselize butuna bwa aleka yanaaswanela kuyaha, Nuwe mwendi naalemuhile kuli haki batu babañata bane bakateeleza ku yena. (Gen. 6:15) Mi ki mona mone kubezi honacwalo, hakuna nihaiba mutu alimuñwi yanaapila ka nako yeo yanaateelelize ku Nuwe. (Gen. 7:7) Kana Jehova naanga kuli Nuwe naasika kondisa mwa musebezi wa kukutaza? Batili! Mulimu naanga kuli Nuwe naakondisize bakeñisa kuli naaezize lika kaufela zanaa mubulelezi.—Gen. 6:22.

12. Ki lika mañi zenetusize mupolofita Jeremia kuzwelapili kuba ni tabo mwa bukombwa nihaike kuli batu nebasa tabeli kuteeleza kwa lushango lwahae mi neba mulwanisa?

¹² Mupolofita Jeremia ni yena naakutalize ka lilimo-limo nihaike kuli batu babañwi nebasa tabeli kuteeleza kwa lushango lwahae mi neba mulwanisa. Naazwafile hahulu kabakala ‘kulwahiwa ni kusheununwa’ ki balwanisi kuli mane naabatile kutuhela musebezi wanaafilwe. (Jer. 20:8, 9) Kono Jeremia naasika zwafa! Ki lika mañi zene mutusize kutiyela muinelo wo ni kuzwelapili kuba ni tabo mwa bukombwa bwahae? Naanahanisisize lika zepeli za butokwa ze. Sapili, lushango lwanaa mufile Mulimu kuli ashaele kwa batu neluka batusa kuba ni “bupilo bobunde kwapili, ni sepo.” (Jer. 29:11) Sabubeli, Jehova naaketile Jeremia kuli amuyemele kwa sicaba. (Jer. 15:16) Ni luna lushaela lushango lolutusa batu kuba ni sepo, mi lubizwa ka libizo la Jehova ka kuba Lipaki zahae. Haiba luzwelapili kunahanisisa litaba za butokwa zepeli zeo, lukaba ni tabo mwa bukombwa ibe kuli batu baamuhela lushango lwaluna kamba kutokwa.

13. Luitutañi kwa swanisezo yanaafile Jesu yeñozwi kwa Mareka 4:26-29?

¹³ Batu baezanga zwelopili ya kwa moya hanyinyani-hanyinyani. Jesu naabulelezi balutiwa bahae taba yeo mwa swanisezo yanaafile ka za mucali yanaalobezi. (Mubale Mareka 4:26-29.) Mucali yo hasaacezi lipeu zahae, zakala kuhula hanyinyani-hanyinyani kono hakuna zanaakona kueza kuli aakufise lipeu zeo kuhula kapili. Ka mukwa oswana, mukatokwa kulibelela ka nakonyana kuli batu bomukutaza kubona baeze zwelopili bakeñisa kuli batu baezanga zwelopili hanyinyani-hanyinyani. Sina feela mulimi hasakoni kuakufisa licalo zahae kuhula ka lubilo lwatabela, ni luna halukoni kuhapeleza baituti baluna ba Bibele kueza zwelopili kapili sina molubatela. Kacwalo, musike mwazwafa haiba baanga nako kueza zwelopili. Sina mulimi, ni luna lutokwa kuba ni pilu-telele kuli lutuse mutu kuba mulutiwa.—Jak. 5:7, 8.

14. Ki mutala mañi obonisa kuli batu babañwi baanganga nako yetelele kuli baeze zwelopili ni kukolobezwa?

¹⁴ Mwa libaka zeñwi, kukona kuunga nako yetelele kuli batu bolukutaza ku bona baeze zwelopili ni kukolobezwa. Halunyakisiseñi mutala wa bo mutu ni munyanaa hae, Kaizeli Gladys Allen ni Kaizeli Ruby Allen, ili bao ka 1959 nebakupilwe kuyo sebeza sina mapaina ba kamita mwa tolopo ya kwa Canada yebizwa Quebec. * Batu nebasa tabeli kuteeleza kwa lushango lwa Mubuso lone bakutaza bakeñisa kuli nebasaba kulwaniswa ki batu babañwi mwa silalanda sabona ni kulwaniswa ki Keleke ya Katolika. Bo Gladys habahupula taba yeo, bali: “Mwa sibaka se siñwi, ne lu ya fa ndu ni ndu lihora ze 8 ka zazi ili ka lilimo ze peli ku si na ku fumana niheba a li muñwi ya lu amuhela! Batu ne ba nangelanga fela ka ku apula masila a fa mangilasi a fa minyako ni ku kuta ku yo itulela. Kono ne lu si ka lisela.” Hamulaho wa nako, batu bao bacinca mubonelo wabona, mi bakala kuamuhela taba yende. Kacenu, sekunani liputeho zetaalu mwa tolopo yeo.—Isa. 60:22.

15. Liñolo la 1 Makorinte 3:6, 7 lilulutañi ka za musebezi wa kuluta batu kuba balutiwa?

 ¹⁵ Kuli mutu abe mulutiwa, utokwa kutusiwa ki batu babañata. Mañi ni mañi mwa puteho wakona kutusa mutu kueza zwelopili ni kukolobezwa. (Mubale 1 Makorinte 3:6, 7.) Ka mutala, muhasanyi yomuñwi ukona kufa trakiti kamba magazini ku mutu yatabela. Muhasanyi yo ukona kupalelwa kukutela ku mutu yatabela kuli ayo zwelapili kuikambota ni yena; kacwalo, ukupa muhasanyi yomuñwi kukutela ku yena. Muhasanyi yo ukalisa tuto ya Bibele. Umema mizwale ni likaizeli babashutana-shutana kwa tuto yeo, mi yomuñwi ni yomuñwi wabona ususueza muituti wa Bibele. Bahasanyi bao kaufela bakopana ni bona muituti bamutusa kuzwelapili kuhula kwa moya. Kabakaleo, sina Jesu mwanaabulelezi, mucali ni mukutuli, bona batu kaufela babatusize muituti yo, bataba hamoho haeza zwelopili ni kukolobezwa.—Joa. 4:35-38.

16. Ki kabakalañi hamukona kuba ni tabo niha mupalelwa kueza zeñata mwa bukombwa kabakala mapongo kamba kutokwa maata?

¹⁶ Mukona kueza cwañi haiba mupalelwa kueza zeñata mwa musebezi wa kukutaza ni kuluta batu taba yende kabakala mapongo kamba kutokwa maata? Musakona kuba ni tabo mwa musebezi wa kukutaza. Halunyakisiseñi mutala wa Mulena Davida muta yena ni baana bane bali ni yena nebalamulezi mabasi abona ni kukutisa tutu yene bahapile Maamaleke. Baana ba 200 ku bona nebakatezi hahulu kuli mane nebapalezwi kuya kwa ndwa; kacwalo, basiyala kuli bababalele libyana. Davida ni baana banaali ni bona hase batuzi mwa ndu, alaela kuli bona ni baana bane basiyezi kaufela baikabele tutu yene bahapile yeo ka kulikanelela. (1 Sam. 30:21-25) Musebezi wa kuluta batu kuba balutiwa oezwa mwa lifasi kaufela ni ona ucwalo. Muhasanyi kaufela yaeza mwakonela kaufela mwa bukombwa wakona kuba ni tabo hakuba ni mutu yaamuhela niti ni kukala kuzamaya mwa nzila yeisa kwa bupilo.

17. Ki kabakalañi haluswanela kuitumela ku Jehova?

¹⁷ Luitumela hahulu ku Jehova kabakala mwaangela sebelezo yaluna ku yena. Waziba kuli halukoni kuhapeleza batu kuteeleza kwa lushango lwaluna kamba kumusebeleza. Nihakulicwalo, walemuhanga buikatazo bolueza ni lilato laluna ku yena, mi walufuyaulanga. Hape ubata kuli lube ni tabo kabakala zelueza mwa musebezi wa kukutaza. (Joa. 14:12) Haiba lusazwafi, lukatabisa Mulimu!