1. Kifer nou kontan ek nou fier ki nou enn Temwin Zeova?

NOU kontan ek nou fier ki nou enn Temwin Zeova! Nou bann serviter Zeova, ek nou montre ki nou so bann temwin kan nou prese ek ansegn bann dimounn. Nou bien kontan kan nou kapav ed enn kikenn ki “ena enn bon kondision leker pou gagn lavi eternel.” (Zist. 13:48, NW) Nou ena mem santiman ki Zezi. Li ti “ranpli dan lazwa Lespri Sin” kan so bann disip ti rakont li bann bon rezilta ki zot ti gagne kan zot ti al prese.​—Lik 10:1, 17, 21.

2. Kouma nou kapav montre ki travay predikasion bien inportan pou nou?

² Travay predikasion bien inportan pou nou. Lapot Pol ti ankouraz Timote: “Vey lor twa ek lansegnman ki to done. . . . Koumsamem to pou sov tomem anmemtan ki to sov bann ki ekout twa.” (1 Tim. 4:16) Nou travay predikasion sov lavi bann dimounn! Nou ‘vey bien lor noumem,’ parski nou bann sitwayen Rwayom Bondie. Nou touletan anvi azir dan enn fason ki donn laglwar Zeova ek ki an-akor avek bonn nouvel ki nou prese. (Fil. 1:27) Nou montre ki nou ‘vey bien lor nou lansegnman’ kan nou prepar nou bien pou nou minister ek nou priye Zeova avan ki nou al prese.

3. Eski tou dimounn pou interese ar mesaz Rwayom Bondie? Donn enn lexanp.

³ Mem si nou fer tou seki nou kapav pou prese, boukou dimounn kitfwa pa interese ar mesaz Rwayom Bondie. Anou get lexanp Frer Georg Lindal, ki ti prese tousel dan Island depi 1929 ziska 1947. Li ti plas plizir milye piblikasion, me personn pa ti vinn dan laverite. Li ti dir: “Ena sertin ki ti opoze ar laverite ek laplipar pa ti interese.” Kan bann misioner ki ti fer lekol Galaad ti al pres laba, zot osi zot ti prese pandan plizir lane san ki zot gagn bann rezilta. Finalman, apre nef-an, sertin dimounn ti aksepte laverite ek zot ti pran batem. *

4. Ki nou kapav resanti kan bann dimounn pa ekout nou mesaz?

 ⁴ Nou kapav dekouraze kan bann dimounn pa interese pou etidie Labib. Kitfwa nou kapav ena mem santiman ki lapot Pol. Li ti dir ki li ti “ena enn gro sagrin dan [so] leker ek enn soufrans ki pa fini,” parski laplipar Zwif pa ti aksepte Zezi kouma Lemesi. (Rom. 9:1-3) Kitfwa to pe etidie Labib avek enn kikenn ek to fer boukou zefor pou vinn enn bon ansegnan, ek to priye boukou pou li. Me li pa met an pratik seki li pe aprann ek to bizin aret so letid. Ouswa, kitfwa zame to pa’nn etidie Labib avek enn kikenn ki’nn progrese ziska batem. Eski savedir ki to pa enn bon proklamater ek ki Zeova pa pe beni to minister? Dan sa lartik-la, nou pou reponn de kestion: (1) Ki kitsoz montre ki nou pe reisi akonpli nou minister? (2) Kifer nou bizin realist?

5. Kifer nou pa touletan gagn rezilta ki nou atann dan nou minister?

⁵ Labib dir ki enn kikenn ki fer volonte Bondie, “li toultan prospere.” (Ps. 1:3) Selman, sa pa vedir ki tou seki nou fer pou Zeova, pou reisi dan fason ki nou nou anvi. Kifer? Parski nou lavi ek lavi bann dimounn “ranpli ar problem,” ek nou tou nou inparfe. (Zob 14:1) Anplis, sertin dimounn ki opoz ar nou, kitfwa kapav anpes nou pou pres dan fason ki nou abitie prese. (1 Kor. 16:9; 1 Tes. 2:18) Alor, ki kitsoz montre ki Zeova kontan seki nou pe fer dan nou minister? Anou get de-trwa prinsip Labib ki pou ed nou reponn sa kestion-la.

6. Ki kitsoz montre ki Zeova kontan seki nou pe fer dan nou minister?

⁶ Zeova trouv nou landirans ek bann zefor ki nou fer. Zeova bien kontan kan Li trouv nou prese avek zel parski nou kontan Li, ek Li kontan nou, mem si nou pa gagn bann bon rezilta. Lapot Pol ti dir: “Bondie pa inzis pou bliye seki zot inn fer ek lamour ki zot finn montre pou so nom, kan zot finn servi bann sin ek ki zot pe kontign servi bannla.” (Ebre 6:10, NW) Zeova trouv nou lamour ek nou bann zefor, mem si nou pena enn letid Labib ki’nn progrese ziska batem. Alor, bann parol ki lapot Pol ti dir bann Korintien aplik osi ar nou. Li ti dir ki nou travay “pa dan vid devan nou Segner,” mem si nou pa’nn gagn rezilta ki nou ti pe atann.​—1 Kor. 15:58.

7. Ki nou kapav aprann lor fason ki lapot Pol ti koz lor so minister?

⁷ Lapot Pol ti enn bon misioner, ek li ti form bann nouvo lasanble dan plizir lavil. Me kan bann dimounn ti kritik Pol ek zot ti dir ki li pa ti enn bon ansegnan, Pol pa ti atir latansion lor kantite dimounn ki li ti amenn dan laverite. Okontrer, Pol ti dir  zot: “Mo finn travay plis ki zot.” (2 Kor. 11:23) Parey kouma Pol, nou bizin rapel ki seki pli inportan pou Zeova, se nou bann zefor ek nou landirans.

8. Ki nou bizin rapel konsernan nou minister?

⁸ Nou minister fer Zeova plezir. Zezi ti avoy 70 disip pres mesaz Rwayom Bondie, ek kan zot ti fini prese, zot ti “retourne dan lazwa.” Ki kitsoz ti fer zot gagn lazwa? Zot ti dir: “Mem bann demon soumet kan nou servi to nom!” Selman, Zezi ti koriz zot fason panse kan li ti dir zot: “Pa gagn lazwa akoz bann lespri soumet devan zot, me gagn lazwa parski zot nom finn anrezistre dan lesiel.” (Lik 10:17-20) Zezi ti kone ki pa touletan zot ti pou gagn bann bon rezilta dan zot minister. An realite, parmi bann dimounn ki ti ekout bann disip, nou pa kone ki kantite ti vinn bann Kretien. Alor, bann disip ti bizin zwaye parski zot ti fer Zeova plezir gras-a zot bann zefor, pa zis akoz bann rezilta ki zot ti gagne.

9. Dapre Galat 6:7-9, ki pou arive si nou pa dekouraze dan nou minister?

⁹ Si nou pa dekouraze dan nou minister, nou pou gagn lavi eternel. Kan nou fer nou best pou prese ek ansegn bonn nouvel, nou pe osi “sem dapre Lespri,” setadir nou pe les lespri sin Bondie azir dan nou lavi. Si nou “pa dekouraze” ek nou “pa bes lebra,” Zeova promet ki Li pou donn nou lavi eternel, mem si nou pa’nn amenn personn dan laverite.​—Lir Galat 6:7-9.

10. Kan nou prese, kifer sertin ekoute ek sertin pa ekoute?

¹⁰ Pou ki enn kikenn aksepte laverite, sa pou depann lor seki ena dan so leker. Zezi ti explik sa dan enn lexanp ki li ti servi konsernan enn planter. Sa planter-la ti sem bann lagrin lor diferan kalite later, me bann lagrin-la ti zerme ek donn bann frwi lor zis enn sel kalite later. (Lik 8:5-8) Zezi ti dir ki sa bann diferan kalite later-la ti reprezant leker bann dimounn ki reazir dan diferan fason kan zot tann “parol Bondie.” (Lik 8:11-15) Parey kouma sa planter-la, ki pena kontrol lor rezilta ki li pou gagne kan li fini sem bann lagrin, nou pa kapav fer laverite grandi dan leker bann dimounn. Nou responsabilite se pou kontign sem bann lagrin Rwayom Bondie. Kouma lapot Pol ti dir, “Bondie pou rekonpans sakenn dapre so travay,” pa dapre rezilta so travay.​—1 Kor. 3:8.

11. Kifer Zeova ti konsider Noe kouma enn bon “predikater lazistis,” mem si bann dimounn pa ti ekout li? (Get zimaz lor kouvertir.)

¹¹ Dan lepase, boukou serviter Zeova ti pres ar bann dimounn ki pa ti anvi ekout zot. Par exanp, Noe ti “enn predikater lazistis” pandan plizir dizenn lane. (2 Pier 2:5) Sirman Noe ti ena lespwar ki bann dimounn ti pou ekout li, me Zeova pa ti dir li ki sa ti pou arive. Parkont, kan Zeova ti dir Noe konstrir lars, Li ti dir: “To bizin rant dan lars, twa, to bann garson, to madam, ek bann madam to bann garson, avek twa.” (Zen. 6:18) Anplis, kan Zeova ti donn Noe bann dimansion lars, Noe sirman ti konpran ki pa ti pou ena boukou dimounn ki ti pou ekout li, parski pa ti pou ena ase plas pou zot dan lars. (Zen. 6:15) Ek kouma nou kone, personn pa ti ekout Noe. (Zen. 7:7) Eski Zeova ti panse ki Noe pa ti fer so travay predikasion bien? Non, Zeova pa ti pans koumsa. Okontrer, Zeova ti konsider Noe kouma enn bon predikater lazistis, parski li ti fer exakteman seki Zeova ti demann li pou fer.​—Zen. 6:22.

12. Kouma profet Zeremi ti gagn lazwa dan so minister, mem si bann dimounn pa ti ekout li ek ti opoze avek li?

 ¹² Profet Zeremi ti prese pandan plis ki 40 an, mem si bann dimounn pa ti ekout li ek ti opoze avek li. So bann opozan ti telman insilte li ek maltret li, ki li ti bien dekouraze ek li ti anvi aret prese. (Zer. 20:8, 9) Me Zeremi pa ti bes lebra! Ki kitsoz ti ed li pou kontign prese ek gagn lazwa dan so minister? Li ti res konsantre lor de kitsoz inportan. Premierman, mesaz ki Bondie ti donn Zeremi, ti pou donn lepep “enn lavenir ek enn lespwar.” (Zer. 29:11) Deziemman, Zeova ti swazir Zeremi pou reprezant Li ek pou anons So mesaz ar lepep. (Zer. 15:16) Nou osi, nou ena enn mesaz lespwar pou bann dimounn, ek nou reprezant Zeova parski nou so bann Temwin. Kan nou res konsantre lor sa de kitsoz inportan la, nou pou gagn lazwa dan nou minister mem si bann dimounn pa ekout nou.

13. Ki nou kapav aprann ar lexanp ki Zezi ti done dan Mark 4:26-29?

¹³ Sa pran letan pou ki enn kikenn so lafwa grandi. Zezi ti explik sa dan so lexanp konsernan enn planter ki dormi. (Lir Mark 4:26-29.) Apre ki planter-la ti sem so bann lagrin, bann plant-la ti grandi dousman-dousman ek planter-la pa ti kapav fer nanye pou fer zot grandi pli vit. Kitfwa twa osi to pou bizin atann boukou letan avan ki to etidian koumans aplik seki li pe aprann. Enn planter pa kapav fer nanye pou fer so bann plant grandi pli vit, ek nou osi nou pa kapav fer lafwa nou bann etidian grandi pli vit. Alor, fode pa to dekouraze ek bes lebra si bann progre to etidian pran plis letan ki to ti pe panse. Parey kouma enn planter, to bizin ena pasians ek to bizin atann ki to etidian desid pou servi Zeova.​—Zak 5:7, 8.

14. Servi enn lexanp pou montre ki sa kapav pran boukou letan avan ki enn dimounn ekout nou mesaz.

¹⁴ Dan sertin teritwar, sa kapav pran boukou letan avan ki enn kikenn aksepte laverite. Anou get lexanp de ser, Gladys ek Ruby Allen. An 1959, zot ti al servi kouma pionie permanan dan enn lavil dan Québec, dan Kanada. * Bann dimounn dan sa landrwa-la ti per tansion zot vwazin ek zot pret trouv zot koz avek bann Temwin Zeova. Akoz sa, zot pa ti ekout nou mesaz. Gladys dir: “Pandan de-z-an, wit er-tan par zour, nou ti al prese lakaz-lakaz san ki personn ekout nou! Kan bann dimounn ti vinn kot zot laport ek zot ti trouv nou, zot ti vir zot ledo zot ti ale. Me nou pa ti dekouraze!” Avek letan, latitid sa bann dimounn-la ti sanze ek zot ti koumans ekout nou mesaz. Azordi, ena trwa lasanble dan sa lavil-la.​—Iza. 60:22.

15. Ki 1 Korintien 3:6, 7 ansegn nou lor nou laktivite pou fer bann disip?

¹⁵ Boukou dimounn bizin travay ansam pou ed enn kikenn progrese ziska batem. Tou dimounn dan lasanble kapav ede pou ki enn kikenn pran batem. (Lir 1 Korintien 3:6, 7.) Anou pran enn lexanp. Enn proklamater kit enn trak ouswa enn magazinn avek enn dimounn ki interese. Me proklamater-la pa pou kapav al fer vizit-la dan ler ki sa dimounn-la disponib. Alor, li demann enn lot proklamater pou fer vizit-la, ek sa proklamater-la koumans enn letid Labib avek dimounn-la. Proklamater-la invit diferan frer ek ser  pou asiste letid avek li, ek sakenn ankouraz etidian-la dan diferan fason. Sak frer ek ser ki asiste letid-la, ed etidian-la pou aprann plis lor Zeova. Se koumsa ki tou dimounn travay ansam ek zot gagn lazwa pou ed enn kikenn pou pran batem.​—Zan 4:35-38.

16. Kifer nou kapav gagn lazwa dan nou minister, mem si nou pena ase lafors ouswa nou pena enn bon lasante?

¹⁶ Kitfwa to nepli kapav prese ek ansegne parey kouma avan, parski to nepli ena ase lafors ouswa to pena enn bon lasante. Kanmem sa, to kapav trouv lazwa dan seki to pe kapav fer dan to minister. Anou get lexanp Lerwa David, kan li ek so bann zom ti bizin sov zot fami ek repran zot bann dibien ar bann Amalekit. Parmi bann zom David, 200 zom ti tro fatige pou al lager. Alor, zot pa ti al lager ek zot ti vey bann bagaz. David ek so bann zom ti gagn sa lager-la ek zot ti repran zot bann dibien. Me zot ti osi pran bann dibien zot bann lennmi. Kan David ti fer partaz sa bann dibien-la, li ti fer an sort ki tou so bann zom gagn parey, mem bann ki ti res par deryer avek bann bagaz. (1 Sam. 30:21-25) Sa lexanp-la ansegn nou enn kitsoz inportan lor nou laktivite pou fer bann disip. Kitfwa to nepli kapav prese ek ansegne parey kouma avan, me si to fer to maximum, twa osi to kapav zwaye kan enn nouvo vinn dan laverite.

17. Pou ki kitsoz nou kapav remersie Zeova?

¹⁷ Nou anvi remersie Zeova pou fason ki Li konsider nou minister. Li kone ki, mem si nou fer boukou zefor, nou pa kapav obliz bann dimounn pou ekout nou ek servi Li. Me Li trouve ki kantite zefor nou pe fer ek ki kantite nou kontan Li, ek Li rekonpans nou pou sa. Li montre nou osi kouma nou kapav gagn lazwa, mem si nou pa pe kapav fer boukou dan nou minister. (Zan 14:12) Alor, nou kapav sir ki Zeova pou donn nou so benediksion, si nou pa dekouraze!