MWAHA WOOSOMIYA 43
Nhoocye!
“Nihihiyerere upanka itthu yomaana.”—AKALAS. 6:9.
NCIPO 68 Semear a Semente do Reino
NINHALA WIITTHUCANI? *
1. Iparakhani yoonitteeliha nrima cinene irineehu?
UNAANITTEELA nrima nlattu woparakha irineehu yookhala Masaahiti a Yehova! Hiiva nincisa ncina na Nluku ni ninthoonyera wiira nikhanle Masaahityaawe neekurumicaka uvara nteko wo waapanka eetthuci. Ninaakhala ootteeliya cinene nakhitiriki unkavihera ntthu ‘noonihera uratteene uphavela ukumi woohimala’ ukhala Saahiti a Yehova. (Mite. 13:48) Hi nineecoona khampa Yesu ‘aatteeliye nrima cinene’ ukati waawonnyaawe attharyaawe yaturuwaka wuulalyaani ihapari unaatteelale nrima.—Luka 10:1, 17, 21.
2. Ninhala uthoonyera cani wiira ninaalemeliha nteko wa Nluku unvareehu?
2 Hi ninaalemeliha cinene nteko wa Nluku unvareehu. Apostolu Paulu ahomwiirela Timotiyu co: “Uhihiye wiiwehaweha ni uwacera mananna cineetthucihaa.” Ni ahomwiirela-tho: “wapanka commo unaahala uyoopola weeva ni unaahala uwoopola atthu anooviriyana.” (1 Tim. 4:16) Atthu enci anaapheela woopoliya. Ukhala wiira nimpheela ukhala ukati unhaleehu uhooleliya nuumwene wa Nluku, hi ninaawehaweha makhalelweehu. Nimpanka iyo itthwiiyo neekurumicaka ukhalana meettelo anonttitthimiha Yehova ni neettelaka ihapari comaana cinlalyeehu. (Afili. 1:27) Hiiva ninwacera mananna cineetthuciheehu neetthenkacaka ratta wiira nirwee wuulalyaani ni nalepelaka ukaviheriya ni Yehova nihinarwaa nwo wuulalyaaninwo.
3. Atthu anwehera cani nteko unvareehu woolalya ihapari ca Nluku? Nttonkace ntakihero.
3 Hataa niikurumica cinene wuulalyaani, pooti ukhalaka wiira ncoko unlalyeereehu ahaavo atthu cihinaacivela ihapari comaana cinlalyeehu awula ankhotta. Moone ntakihero naamunna Georg Lindal, atokale ukhala mapuro menci o ilapo yo Islândia yalalyeeraka veekha, ukhuma mwaakha wo 1929 mpaka 1947. Ayo amunnaayo yahokawa ilivuru cinci, masi khaavo ntthu aaphenle weettela ikhweeli co mbiiblyani. Amunna Georg yahantikha uyo ukatyuuyo co: “Ahaavo atthu athoonyenre waarusa ikhweeli co mbiiblyani, ni ahaavo akhwaawe nanlelo ahimpheela uviriyana.” Uvira waya myaakha, iyo ilapweeyo yahoveleelihiya mamisiyonaariyu yaasomile icikola yo Gileade. Masi hataa ukhalaka commo, iyo ilapweeyo khaavo aathoonyera uncivela ikhweeli co mbiiblyani. Masi uvira waya myaakha 9, phancenryaaya ukhumelela atthu o Islândia yaavaherera ukumyaaya wa Yehova ni yaapattisiya. *
4. Nineecoona cani atthu yaahaakheleleke saana ihapari ca Nluku cinlalyeehu?
4 Unaariipiha nrima atthu yaahaakheleleke saana ihapari ca Nluku cinlalyeehu. Atthunaka toko apostolu Paulu, hiiva ninneeraka “unaakiriipa nrima ni khummaala ukiwerya.” (Aroo. 9:1-3) Nyuuva atthunaka munneekurumica ni munnolompa cinene wiira mumphwanye ntthu onsomiha Ibiiblya. Ni pooti ukhalaka wiira nhomphwanya ntthu onsomiha Ibiiblya, masi uyo khaneekurumica urwaa uhoolo ni nhaana nhiyaka unsomiha Ibiiblya. Awula atthunaka khannatoka unsomiha ntthu Ibiiblya mpaka wampattisiyaawe. Niireke ihaavo isariya nyuuva yo wuuriipani nrima ni wuupuwela wiira Yehova khancaaliha nteko woolalya unvareenyu? Nhina ula mwahoola, ninaahala wiiwa cinaakhuliyaaya makoho meeli: (1) Isiyani inthoonyera wiira nteko woolalya ihapari unaanikhumela saana? (2) Ukati wo waalalyeera akhwiihu isiyani inlamuliyeehu uweherera?
ISIYANI INTHOONYERA WIIRA NTEKO WOOLALYA IHAPARI UNAANIKHUMELA SAANA?
5. Kontha isiyani nteko woolalya ihapari khunnikhumelaka saana ukati nkiina?
5 Ibiiblya ineera co imwaacaka ntthu nopanka impheelaawe Nluku: “Yotheene inhalaawe upanka inaahala unkhumela ratta.” (Isaa. 1:3) Masi ayo moolumwaayo khanapheelaka uhimya wiira citthu cotheene cinhaleehu umpankela Yehova cinaahala unikhumela khampa cimpheeleehu. Muukumini wihu ‘khacimala citthu coonikhaliha isukhuli’ nlattu woopahuwa wihu awula waatthu akhwaawe. (Jó 14:1) Uhiya commo, awananiihu pooti ukhitiri unihiiha ulalya ihapari ca Nluku waatthuni. (1 Akor. 16:9; 1 Atesal. 2:18) Vano, isiyani inthoonyera wiira nteko wa Nluku unvareehu unaanikhumela saana? Nttwee noopele mwaha mattharelelo o mbiiblyani anhala unikavihera waakhula nno nikohonno.
Yehova nawoona wiikurumica wihu wiira naalalyeere atthu co ni co, niiwarakha awula nitelefooni (Nwehe iparaagarafu 6)
6. Maweherwaawe Yehova, isiyani inthoonyera wiira ntekweehu unaaneettela saana?
6 Yehova nawoona wiikurumica wihu ni uvilela wihu. Maweherwaawe Yehova, nteko woolalya ihapari unnikhumela saana neevahereraka uvara uyo ntekooyo niiraati ni ninifento, hataa atthu yakhottaka univiriyana. Apostolu Paulu hantikha co: “Nluku khanakhala ootakhala nrima wiira aliyale miteko cinyu ni inanna cifentaleenyu ncina nawe, waakavihera winyu ale akhanle owaarya ni uhihiyerera winyu waakavihera.” (Mabere. 6:10) Yehova khanliyala wiikurumica wihu ni nifento nihu, hataa nuupuwelaka wiira ntekweehu khuneetta saana. Phimaana, moolumo apostolu Paulu yaawantikhenlyaawe akorintu ciicammo annaaca hiiva. Uyo hantikha co: “Nteko mwinci unaavareleenyu Apwiiya khunakhala wo mahala.” Ayo moolumwaayo ciicammo anaaca nteko hiiva unvareehu ilelo, hataa ukhalaka wiira nteko uneekurumiceehu uvara khunneettela saaan khampa cimpheeleehu.—1 Akor. 15:58.
7. Isiyani inniitthucihaaya inanna apostolu Paulu coolumalyaawe nteko woolalya waavaraawe?
7 Apostolu Paulu aari misiyonaariyu omaana. Uyo ahokavihera utthenkaca maloko ophiyaaru isittatti cinci. Masi yahaavo atthu yaamuuluma pusya apostolu Paulu yiiraka wiira uyo kheetthuciha ratta. Woowaakhula, apostolu Paulu khaattonkacale atthu akavi yaakavihenryaawe ukhala makristau, masi uyo enre: “Mi kihovara nteko cinene.” (2 Akor. 11:23) Toko apostolu Paulu, nihiliyale wiira maweherwaawe Yehova, itthu yuulupale cinene ukhanle hiiva wiikurumica ni uhoocya uvara ntekwaawe.
8. Isiyani ihinlamuliyeehu uliyala yo muntekoni wihu woolalya ihapari?
8 Nteko woolalya unvareehu unantteeliha nrima Yehova. Yesu ahaaruma attharyaawe 70 urwaa ulalya ihapari. Umaliha waya ulalya, ayo “yahohokolya unaatteelale nrima.” Isiyani yaatteelihale nrima ayo attharyaayo? Ayo yaheera: “Pwiiya, hataa maciini anaaniiwelela nlattu wo ncina ninyu.” Masi Yesu ahaakavihera urukunusa moopuwelwaaya, awiirelaka co: “Uhuutteeleni nrima nlattu wowoona maciici yuwiiwelelakani, masi wuutteeleni nrima nlattu wowantikhiya macineenyu wiirimu.” (Luka 10:17-20) Yesu ancuwela wiira waanaahala uphiya ukati attharyaawe cahaahalaaya waakhumelela citthu comaana wuulalyeerani. Ni khweeliini, hiiva ilelo khanincuwela atthu akavi yaaviriyanne atthari a Yesu ule nkwahoole ni yaalakenle ukhala makristau. Atthari a Yesu khayaalamuliya utteeliya nrima nlattu wooweettela saana ntekwaaya. Masi yaalamuliya utteeliya nrima nlattu woocuwela wiira wiikurumica waya ni wiivaherera waya uvara nteko waanantteeliha nrima Yehova.
9. Toko cinthoonyeraaya Akalasiya 6:7-9, isiyani inhala unikhumelela naahihiyerereke uvara nteko woolalya ihapari ca Nluku?
9 Naahihiyeke uvara ntekweehu woolalya ihapari, ninaahala uphwanya ukumi woohimala. Ntthu neekurumica ulalya ni wiitthuciha ihapari comaana ninrima wotheene, ‘nawaala attharihelaka nnepa wowaarya.’ Upanka iyo itthwiiyo maanaaya wiira ninaahiya nnepa wowaarya wa Nluku weettiheraka makhalelweehu. “Naahoolwaaneke” uvara nteko ni ‘naahihiyerereke’ wiikurumica, Yehova enre wiira naahala unitthuvela ukumi woohimala, hataa ukhalaka wiira khaavo ntthu nsomihileehu Ibiiblya mpaka wampattisiyaawe.—Nsome Akalasiya 6:7-9. *
UKATI WO WAALALYEERA AKHWIIHU ISIYANI INLAMULIYEEHU UWEHERERA?
10. Isiyani inhala uwiiriha atthu utthuna awula ukhotta ihapari cinlalyeehu?
10 Mirima caya atthwaayo phinwiiriha utthuna awula ukhotta ihapari cinlalyeehu. Munlattaniheroni nawe, Yesu ahomuuluma namalima nomorihela ipyo ntthayani coovirika. Masi itthaya imoca paasi phaari yooreera ni pheemihile mihokorokho; itthaya cikhwaawe cotheene caari coohiloka. (Luka 8:5-8) Yesu enre wiira nnyo itthaya coovirikanacannyo akhanle atthu arina mirima coovirikana. Ayo atthwaayo yaahala waakhelela “Nuulumo na Nluku” nimananna oovirikanaca. (Luka 8:11-15) Toko ule namalimoole, hiiva khiivo inhaleehu ukhitiri upanka wiira nuunuwihe ipyo yanleehu wanrimani wa ntthu; nrimaawe ntthuuyo phinhala umwiiriha urwaa uhoolo ni wiimiha mihokorokho co munnepani. Ntekweehu hiiva ukhanle paasi uhihiya umwarusela ipyo awula ihapari co Umwene wa Nluku. Apostolu Paulu aheera: “Khula ntthu naahala uvahiya itthuvo uweheriyaka nteko uvanryaawe,” kahi nlattu wonkhumela saana uyo ntekooyo.—1 Akor. 3:8.
Hataa ukhalaka wiira Nowee ahokhala myaakha cinci alalyaaka moolumo a Nluku, khaavo anviriyanne. Masi amucyaawe paahi phaamwiiwelenle ni phankavihenre uteka ikalawa. Waahookhalaru commo, Nowee ahomwiiwelela Nluku! (Nwehe iparaagarafu 11)
11. Kontha isiyani Nowee wahonkhumela saana ntekwaawe ‘woolalya isariya’? (Nwehe ilatarato yo wakaapani.)
11 Ukhuma nenne nokhalayi, aswali a Yehova anawaalalyeera moolumo a Nluku atthu ahimpheela wiiwa. Wootakihera, Nowee aari “namalalyeera isariya”; uyo atthunaka ahokhala myaakha 40 awula 50 alalyeeraka. (2 Pet. 2:5) Khweeliini, Nowee aaweherera wiira atthu anviriyane, masi Yehova khenre wiira ayo yanhala unviriyana. Uhiya commo, Yehova ahonruma Nowee uteka ikalawa. Nluku enre co: “Weeva uhaana ukelaka nkalawani wamoca naasaanaa, amwaaraa, ni asaaraya asaanaa.” (Upha. 6:18) Ni ukati Nowee waahimyeeriyaawe ni Nluku yuunuwelo yokalawa, uyo atthunaka ahocuwela wiira atthu enci yaahalaawe waalalayeera khayaahala umwiiwelela. (Upha. 6:15) Toko cincuweleehu, nhina ile ituninya yoohinamaaneele khaavo ntthu aamwiiwelenle Nowee. (Upha. 7:7) Niireke Yehova oopuwenle wiira Nowee khaavanre ratta nteko woolalyeera isariya? Mena vakaani! Nowee ahovara saana ntekwaawe ni ahopanka citthu cotheene caarumiyaawe ni Yehova. Maweherwaawe Nluku, Nowee wahonkhumela saana ntekwaawe woolalya ihapari.—Upha. 6:22.
12. Isiyani yankavihenre porofeeta Jeremiya uhihiya utteeliya nrima hataa atthu yakhottaka unviriyana?
12 Porofeeta Jeremiya yahonkhumelela itthu toko iyo. Atthu yaakhala ukatyaawe khayaaphenle umwiiwelela ni yahonrukunuwela. Hataa ukhalaka commo, Jeremiya ahokhala ukati woovikana myaakha 40 alalyeeraka. Ukhala wiira uyo ‘ahoruwaniya ni utarawaciya’, iyo itthwiiyo yahomwiiriha ulolovaca ni upheela uhiya ulalyeera. (Jer. 20:8, 9) Masi Jeremiya khoocyaale! Isiyani yankavihenre uvilela isukhuli caarinaawe ni uhihiya utteeliya ukati waalalyaawe moolumo a Nluku? Uyo ahohela mmuru citthu piili. Yoopacera, moolumo yaalalyaawe yaanawaavaha atthu “nweherero woohoolo”. (Jer. 29:11) Yonayeeli, Jeremiya aalalya mwancina na Yeohva awula yaalalyaawe yaakhuma wa Yehova. (Jer. 15:16) Hiiva ciicammo moolumo anlalyeehu anawaavaha atthu nweherero woohoolo ni ninlalya nincina na Yehova, khampa masaahityaawe. Naahiliyaleke nnya citthu piilinnya, unaahala unitteela nrima wuulalyeerani hataa ukhalaka wiira ahaavo atthu ankhotta univiriyana.
13. Ntakihero na Yesu nimphwanyannya nhina Markus 4:26- 29, ninniitthuciha isiyani?
13 Ntthu noonuwa munnepani vakaani-vakaani. Yesu ahottonkaca nlattanihero na nlopwana anle ipyo cawe ni aarweele urupa. (Nsome Markus 4:26-29. *) Ipyo canlyaawe caamenle ni coonuwale vakaani-vakaani, ni khiivo itthu inhalaawe ukhitiri upanka wiira nnyo ipyonnyo cimele ni cuunuwe wowaakuvyaaca. Toko uyo nlopwanooyo, nyuuva atthunaka nhaana nwehereraka ukati mwinci wiira nkhitiri woona wiira ntekweenyu woolalya unaaweettelani saana, kontha ntthu noonuwa munnepani vakaani-vakaani. Namalima khiivo inhalaawe ukhitiri upanka wiira icoolya cawe cuunuwe woowaakuvyaaca ukati umpheelaawe. Inanna imocaaru, hiiva khaninlamuliya unkhanyereriha ntthu nonsomiheehu Ibiiblya wiira oonuwe munnepani wowaakuvyaaca. Moonaka wiira ntthu nonsomiheenyu Ibiiblya naapica wuunuwa munnepani, nhinyoonyiye ni nhaakuve umoocya. Nihaana nivilelaka khampa namalima ukati woovara nteko wo waapanka eetthuci.—Tiya. 5:7, 8.
14. Matakiheroni anthoonyera wiira atthu enci pooti uviriha ukati mwinci ahinalakela uviriyana ihapari?
14 Mapuro makhwaawe, ntthu nosomihiya Ibiiblya pooti uvira ukati mwinci hinalakela upattisiya. Moone itthu yaakhumelenle arokorihu Gladys Allen wamoca ni anuunnwaaya aneehaniya Ruby Allen. Mwaakha wo 1959, ayo yaholattuliya uvara nteko weepiyoneeru owiicaaverya isittatti yankaani yo Quebec, u Canadá. * Ule ukatyuule, atthu o uyo ncokooyo khayaapheela wiiwelela ihapari co Umwene wa Nluku nlattu woowoova aattamanannyaaya ni mapastoryaaya ommakereeca ceettaaya. Arokorihu Gladys aneera: “Nahokhala myaakha miili nivaraka nteko woolalyeera mmawaani iwoora 8 khula nihuku, masi khaavo aanihulela nkhora! Atthwaayo yaanaawa mpaka wankhorani, unithurumela ni uhokoleela mpaani. Masi hi khanoocyaale.” Nuuwakatyaaya, nahoona wiira atthwaayo yahancera urukunusa mirima caya. Yahancera unuulumana saana ni uviriyana ihapari caalalyeehu. Ilelo ahaavo maloko o Masaahiti a Yehova mararu iyo isittattiiyo.—Isai. 60:22.
15. Isiyani 1 Akorintu 3:6, 7 inniitthucihaaya ineerannya nhina nteko wo waapanka eetthuci?
15 Waapanka eetthuci khunakhala nteko unvareehu veekha. Atthu otheene wanlokoni pooti unkavihera namasomihiya Ibiiblya mpaka wampattisiyaawe. (Nsome 1 Akorintu 3:6, 7. *) Muupuwele ila itthwiila: Munna mmoca nanvaha ifolyetu awula irevista ntthu nopheela ucuwela myaha co mbiiblyani. Masi uyo munnooyo nawoona wiira khanhala ukhalana ukati wooturuwela umootola uyo ntthuuyo. Phimaana, munneehu nanlepela munna nkiina wiira arwee umootola. Munna nkiinooyo naarwaa umootola ni nawancera unsomiha Ibiiblya. Nuuwakatyaaya, nawaalattula mayamunna ni miyaanuunu wiira anveleele ukati unrwaawe unsomiha Ibiiblya, ni khula munna awula nrokorihu nonveleela nankurumica ntthu nosomihiya Ibiiblya. Mayamunna otheennyaayo anankavihera uyo ntthuuyo umicera ikhweeli caaliye wanrimani wawe. Phimaana Yesu wenryaawe wiira ntthu apattisiyaka, atthu otheene ankavihenre unawaatteela nrima.—Joau 4:35-38.
16. Hataa nyuuva nhikhitiriki uvara cinene nteko woolalyeera, kontha isiyani nhaana ntteeliyaka nrima?
16 Pooti ukhalaka wiira nlattu wooweryaaciya awula wo wuuluvala, nyuuva khanrina ikuru cowuukhitirihani uvara cinene nteko woolalya ihapari ca Nluku. Hataa ukhalaka commo, nteko vakaani unkhitiriinyu uvara pooti wuutteelihani nrima. Mmuupuwele mwene Davidi. Ikwaha imoca, Davidi ni alopwanaawe yahocisaceriya naamalekita mihakhu caya ni asimucyaaya. Davidi naalopwanaawe yahaana yaatthimakelaka ni uwaattakanana wiira awaakhe mihakhu ni atthu yaacisilyaaya. Masi alopwana 200 Davidi yaarinaawe yahoocya ni yahohala uttuli wiira akhalenle mirintti. Davidi ni alopwana yahoocyaale yahaatthema ayo awanannyaayo ni yahokhitiri uwaakhaca mihakhu cinci cennyilyaaya. Vano Davidi ahoruma wiira nnye mihakhunnye akaweliye alopwana otheene yaarweele ukhottoni hataa ni ale yaahanle yakhalenlaka mirintti. (1 Sam. 30:21-25) Iyo phi itthu ineerannya ukati unvareehu nteko wo waapanka eetthuci. Utteeliya unkhumelela nlattu wo uyo ntekooyo ninaakawelana otheene nineekurumica uvara, ni hataa ale ahikhitiri uvara cinene masi akavihenre.
17. Nlattuni ninlamuliyeehu unsukhuru Yehova?
17 Hiiva ninansukhuru Yehova nlattu wo manananna cinweheraawe nteko uneekurumiceehu uvara. Yehova naacuwela wiira khaninlamuliya waakhanyereriha atthu univiriyana ni ukhala aswalyaawe. Uhookhalaru commo, Yehova nawoona wiikurumica wihu ni inanna cinonfenteehu, ni naanitthuvela. Yehova ciicammo naaniitthuciha utteeliya nrima neekurumicaka upanka inkhitiriihu wuulalyeerani. (Joau 14:12) Pooti wankupaliihu wiira naahoocyeeke, Nluku unaahala untteela nrima cinene nlattu wonteko unvareehu!
NCIPO 67 Eu Vou Pregar!
^ par. 5 Unaanitteela nrima cinene nawoonaka atthu yaakhelelaka ratta ihapari comaana cinlalyeehu, masi ninkhalaka ooriipiya nrima nawoonaka yakhottaka nnyo ihaparinnyo. Atthunaka haavo ntthu nyuuva nonsomiheenyu Ibiiblya nnava, masi hinrwaa uhoolo. Awula pooti ukhalaka wiira khannapaca unsomiha ntthu Ibiiblya mpaka wampattisiyaawe. Yookhumelelakani iyo itthwiiyo, niireke maanaaya wiira nteko unvareenyu Yehova khunoncivela? Nhina ula mwahoola, ninaahala ukaviheriya cuwela wiira nteko woolalya ihapari unvareehu pooti unikhumela saana ni hiiva pooti uhihiya ukhala ootteeliya nrima hataa atthu yakhottaka uniiwelela.
^ par. 3 Nwehe ilivuru Anuário das Testemunhas de Jeová de 2005, ipaagina 205 mpaka 211.
^ par. 9 Akalasiya 6:7 Nhiithepye: Nluku khanthukenliya. Kontha inaalaawe ntthu, yeeyo phinhalaawe uhepha; 8 kontha ule naala acivelihaka irutthwaawe nkoohepha mwiirutthuni wawe utankanyiya, masi ule naala attharihelaka nnepa wowaarya nhala uhepha munnepani ukumi wohimala. 9 Coo, nihihiyerere upanka itthu yomaana, kontha ninhala uhepha ivanreehu, nahoolwaaneke upanka itthu yomaana.
^ par. 13 Markus 4:26 Vano, aheera-tho: “Phimaana, Umwene wa Nluku unlikanaca ni nlopwana naala ipyo cawe nttimani wawe. 27 Uyo naarupa uhiyu ni wanonwaawe waaseele, nophwanya ipyo caalilyaawe cinamenle ni cinoonuwacile. Masi uyo khancuwela manannani ciirannyeelyaaya iyo itthwiiyo. 28 Itthaya veekha caya, inawiimiha nhokorokho vakaani-vakaani: umpacera ntathi, phiwaaka mphapa, ni wahoolo phinkhumaaya itthaka yookhomaala. 29 Masi, amalakaru woona wiira icoolya cihottokottha, uyo naakela mmattani ninkuttiimaawe kontha uhophiya ukati woohepha.”
^ par. 14 Nsome ihantisi yaarokorihu Gladys Allen nhina mwaha uneera “Eu faria tudo outra vez!” nrevistani Ukhalenla 1 yo Setembro yo 2002.
^ par. 15 1 Akorintu 3:6 Mi kihaala, Apoolu homicera, masi Nluku phoonuwiha; 7 phimaana ule naala ni ule nomicera khanakhala itthu, masi Nluku phimuulupale ukhala wiira phinoonuwiha.
