1. U mulandu ci uno tukauvwila ningo ukuya ya Nte Yakwe Yeova?

TUKAUVWA ningo sana ukuya ya Nte Yakwe Yeova. Sweswe yantu yakwe Yeova nupya tukalanga ukuti sweswe ya Nte lino tukusimikila yauze nu kuyasambilizya pali aliwe. Tukauvwa ningo sana nga twazwa aakulondesya ukuya “umu nzila ya ku umi wa pe” ukutaila. (Mili. 13:48) “Umupasi wa muzilo walenzile Yesu ukutemwa sana,” lino asambi yakwe yamusimikile pa visuma ivyacitike lino yawezile umu kuomba umulimo wa kusimikila lino wayatumile yaili yaili, vikwene avino naswe tukauvwa.—Luka 10:1, 17, 21.

2. Tungalanga uli ukuti umulimo wa kusimikila wacindama sana kuli sweswe?

² Tukaika sana amano uku mulimo witu. Umutumwa Paulo wanenyile Timoti ati: “Lyonsi uwaika amano kuli wemwineco na kuli vino ukusambilizya.” Nupya watiile: “Ndi cakuti ukucita vivyo ulaipususya wemwineco alino na aakukuvwa.” (1 Tim. 4:16) Fwandi umulimo wa kusimikila ukapususya antu. Tukaika amano kuli sweineco pa mulandu wakuti tukateekwa nu Wene Wakwe Leza. Lyonsi tukalondesya ukucita ivintu ivingalenga Yeova ukucindikwa nupya tukalanga ukuti twazumila ilyasi lisuma lino tukasimikila. (Filipi 1:27) Tukalanga ukuti ‘tukaika amano kuli vino tukasambilizya’ ndi cakuti tukupekanya ningo nu kulenga Yeova ukuti atwazwe lino tutatala twasimikila yauze.

3. Uzye yonsi yangatemwa ukuvwa ukwi lyasi lisuma ilya Wene? Langililini.

³ Nanti sile alino tukwezya na maka ukusimikila kuli yauze, antu aingi mu cifulo cino tukasimikilamo limwi yatanga iike mano ukwi lyasi lisuma ilya Wene. Uvwini ivyacitikiile Umwina Georg Lindal uwasimikilanga wenga sile uku Iceland ukufuma umu 1929 ukufika umu 1947. Wapeelanga antu impapulo izingi, nomba kusi nanti umwi uwizile aaya Nte. Watiile: “Yamwi yakanyanga ilyasi lisuma ilyaya muli Baibo, lelo aingi yatalondanga sile.” Nanti sile alino ya Misyonali yamwi aafumile uku Gilyadi yaile umu kwazwako umulimo uu, nayo kwene yasimikiile pa  myaka iingi ukwaula ukuti antu iikeko amano. Lino papisile imyaka 9, alino yamwi yaipeezile kuli Yeova nu kubatiziwa. *

4. Uzye tukayuvwa uli ndi cakuti antu yakukana ukuvwa ukwi lyasi lisuma?

⁴ Tusiuvwa ningo ndi cakuti antu yakukana ukusambilila Baibo. Naswe tungayuvwa wakwe vino Paulo wayuvwanga, wali sana nu ‘ulanda nupya umwenzo wakwe wacululukanga’ pa mulandu wakuti Ayuda aingi yakanyile ukuzumila Yesu ukuti wali a Mesiya. (Loma 9:1-3) Nomba mungacita uli ndi cakuti mukasambilila na umwi Baibo nupya mukamupepelako sana nomba asiomvya vino akusambilila nupya mwalola ukuti mulinzile ukuta ukusambilila nawe Baibo? Nga ndi cakuti mutatala mwazwa umwi ukusambilila Baibo ukufika uku lubatizyo? Uzye cii cikupiliula ukuti musiomba ningo umulimo wa kusimikila nupya Yeova atatemwa vino mukaomba? Mu cipande cii, tumaasuka mauzyo yaili: (1) I cani cikalenga tusininkizye ukuti tukuomba ningo umulimo wa kusimikila? (2) I vyani vino tulinzile ukwenekela lino tukusimikila?

5. U mulandu ci uno insita zimwi lino tukuombela Yeova ivintu vitanga viye wakwe vino twenekelanga?

⁵ Baibo ikalanda pa muntu aakacita ukulonda kwakwe Leza ukuti: “Vyonsi vino akacita asiposiwa.” (Masa. 1:3) Nomba cico cisikupiliula ukuti vyonsi vino tukucita lino tukuombela Yeova vilaya sile vivi kwene vino tukwenekela. Umi wa antu “wavulisya amalanda” pa mulandu wakuti swensi kwene tutamalilika. (Yobo 14:1) Nupya insita zimwi yayo aakakanya umulimo witu uwa kusimikila yangatukanya ukusimikila ukuli antu aingi. (1 Kol. 16:9; 1 Tesa. 2:18) I vyani vikalenga Yeova alola ukuti tukuomba ningo umulimo wa kusimikila? Lolini ivisinte vimwi ivya muli Baibo ivimatwazwa ukwasuka iuzyo lii.

6. I vyani vikalenga Yeova alola ukuti tukuomba ningo lino tukumuombela?

⁶ Yeova akalola ukuti tukaombesya nupya tusitoovoka. Yeova akauvwa ningo nga tuli acincile umu mulimo wa kusimikila pa mulandu wakuti twamutemwa nanti cakuti yauze yasiuvwa lino tukuyasimikila. Paulo walemvile ukuti: “Pano Leza asi wa lufyengo uwakuti ailile umulimo winu nu kutemwa kuno mwalanzile api zina lyakwe pa kuombela antu amuzilo nupya mwatwalilila ukuyaombela.” (Aeb. 6:10) Yeova asiilila vino tukaombesya na vino tukalanga ukutemwa nanti cakuti tutakweti isambililo lya Baibo ilikulunduluka ukufika uku lubatizyo. Fwandi vino Paulo wanenyile aina Kolinto avino caya na kuli mwemwe, “umulimo winu umu Mwene usi wa sile sile” nanti cakuti imilimo inu itaombikwe wakwe vino mwalondanga.—1 Kol. 15:58.

7. I vyani vino twasambilila kuli vino umutumwa Paulo walanzile pa mulimo wakwe uwa kusimikila?

⁷ Umutumwa Paulo waombanga ningo sana umulimo wa umisyonali nupya wapanzile  ivilongano umu misumba iingi. Nomba lino antu yamwi yalandanga iviipe pali Paulo nu kulanda ukuti ataali kasambilizya musuma, atalanzile pa antu uwingi yano wavwile ukuya aina Klistu. Nomba Paulo walemvile ati: “Naombesya ukuyacila.” (2 Kol. 11:23) Wakwe Paulo, tulinzile ukwiusya ukuti icintu cicindame sana kuli Yeova u kuombesya nu kukanatoovoka lino tukumuombela.

8. I vyani vino tulinzile ukwiusya pa mulimo witu uwa kusimikila?

⁸ Mulimo witu uwa kusimikila ukazanzya Yeova. Yesu watumile asambi yakwe 70 umu kusimikila ilyasi lisuma ilya Wene nupya “yawezile nu luzango.” I cani icalenzile yaye sana nu luzango? Yatiile: “Ni viwa kwene vikutuvwila nga twalumbula izina lyako.” Nomba Yesu wayalungike nu kuyanena ukuti: “Mutazanga pa mulandu wakuti imipasi ikumuvwila, lelo zangini pa mulandu wakuti mazina inu iyalembwa umwi yulu.” (Luka 10:17-20) Yesu wamanyile ukuti asi lyonsi lino ivya musango uu vyali nu kucitika lino yakuomba umulimo wa kusimikila. Tutamanya impendwa ya antu yano asambi yakwe Yesu yasimikiile aizile iyaya aina Klistu. Asambi yalondekwanga ukumanya ukuti uluzango luno yakweti lutizanga sile pa mulandu wakuti antu yuvwanga nga yayasimikila, lelo lwizanga pa mulandu wa kumanya ukuti Yeova watemilwe pali vino yaombesyanga.

9. Ukulingana na Galatiya 6:7-9, i vyani ivilacitika ndi cakuti tutatoovwike lino tukusimikila?

⁹ Nga tukuzizimizya lino tukuomba umulimo wa kusimikila, tulakwata umi wa pe. Ndi cakuti tukwezya na maka ukuomba umulimo wa kusimikila nu kusambilizya ilyasi lisuma, ala tukukomela “uku mupasi” lino tukulenga umupasi wakwe Leza ukutwazwa. Ndi cakuti “tutatoovwike,” Yeova watulaya ukuti alatupeela umi wa pe nanti cakuti tutazwilizye aliwensi ukubatiziwa.—Belengini Galatiya 6:7-9.

10. U mulandu ci uno yamwi yakakutikila nga tukusimikila yamwi nayo foo?

¹⁰ Umwenzo wa muntu uukalenga azumile nanti ukukana icumi. Yesu walondolwile icumi cii mu cilangililo cakwe kata wa mbezu uwatiile imbezu mu misili ipusanepusane, lelo imbezu sile izyaponiile mu musili usuma izyaseesile ivizao. (Luka 8:5-8) Yesu walanzile ukuti imisili ipusanepusane imililangako antu aelenganyanga ivipusanepusane api “iizwi lyakwe Leza.” (Luka 8:11-15) Wakwe kata wa mbezu, tutange tulenge icumi ukukula umu myenzo ya yantu yano tukasimikilako. Umulimo witu u kutwalilila ukuta imbezu zya Wene. Wakwe vino Paulo walanzile, “cila muntu alapokelela icilambu kulingana nu mulimo wakwe,” asi kulingana ni vikafuma umu mulimo uwo.—1 Kol. 3:8.

11. U mulandu ci uno Yeova watemiilwe pali vino Nowa wasimikilanga nanti cakuti antu yatakutikanga kuli aliwe? (Lolini icikope icili pa nkupo.)

¹¹ Ukufuma na mpiti aomvi yakwe Yeova yakasimikila uku yantu aasilonda ukukutika. Wakwe, Nowa wali a “kasimikila wa ulungami” pa myaka 40. (2 Pet. 2:5) Ukwaula nu kutwisika, wenekelanga ukuti antu yali nu kukutika kuli aliwe, nomba Yeova atalanzile ukuti vii i vyali nu kucitika. Lino wanenyile Nowa ukukuula iciwato, Leza watiile: “Ingila mu cange [ciwato] pamwi nu muci wako na ana yako na aci yao.” (Utan. 6:18) Nupya lino Yeova wamunenyile pali vino iciwato cali nu kuya, Nowa afwile wilwike ukuti asi antu aingi ali nu kuvwa pano iciwato cali icinono. (Utan. 6:15) Wakwe vino twamanya, kusi umuntu nanti wenga uwakutike kuli vino Nowa wasimikilanga. (Utan. 7:7) Uzye Yeova waweni ukuti Nowa ataombanga ningo umulimo wa kusimikila? Awe foo. Yeova watemilwe sana pali vino Nowa wacisile pano wacisile vyonsi vino wamunenyile ukucita.—Utan. 6:22.

12. Uzye kasesema Yelemiya watwalilile uli ukuya nu luzango lino waombanga umulimo wa kusimikila asi mulandu na vino yamusekanga nu kumukanya?

 ¹² Kasesema Yelemiya wasimikile ukucila pa myaka 40 nanti cakuti antu yatakutikanga kuli aliwe nupya yamucuzyanga. Wakasi atoovoke pa mulandu wakuti yano yamukanyanga yamutukanga nu kumuseka icakuti watandike nu kwelenganya pa kuta umulimo uno waombanga. (Yele. 20:8, 9) Nomba Yelemiya atatoovwike. I cani icamwazwile ukutwalilila ukuya nu luzango lino wasimikilanga? Welenganyanga pa visinka viili ivicindame. Ica kutandikililapo icakuti, lyasi lisuma ukufuma kuli Leza lino Yelemiya wasimikilanga antu lyali nu kuyapeela “umi usuma uku nkoleelo alino nu upalilo.” (Yele. 29:11, NWT.) Cakwe ciili icakuti, Yeova wamusoolwile ukunena antu amazwi afumile kuli aliwe. (Yele. 15:16) Naswe kwene tukasimikila antu ilyasi lisuma ilikalenga yaye nu upaalilo, nupya Yeova watusoolola ukuti twanenako yauze api zina lyakwe. Nga tukwika mano pa visinka vii viili ivicindame, tulaya nu luzango asi mulandu antu yakuvwa nanti yakukana.

13. I vyani vino tukusambilila uku cilangililo cakwe Yesu icalembwa pali Mako 4:26-29?

¹³ Cikasenda insita itali sana pakuti umwi akwate utailo. Yesu wasambilizye icisinka cii umu cilangililo cakwe kata wa mbezu uwaizi. (Belengini Mako 4:26-29.) Pa cisila cakuti kata wa mbezu wata imbezu, zyatandike ukukula panono panono nupya pasi vino kata wa mbezu wali nu kucita pakuti zyakula zuwa. Namwe kwene pangapita insita pakuti mulole umusambi winu uwa Baibo watandika ukucita vino akusambilila. Wakwe vino umulimi atange apatikizye ivilimwa ukukula ukulingana na vino akulonda, avino naswe tutange tupatikizye umusambi witu ukulunduluka zuwa ukulingana na vino tukulonda. Fwandi mutalinzile ukutoovoka ndi cakuti umusambi asikulunduluka zuwa wakwe vino mwenekelanga. Wa mulimi, tulinzile ukutwalilila ukuya ateekele ukufikila umusambi witu akapingulepo ukutandika ukuombela Yeova.—Yako. 5:7, 8.

14. I cilangililo ci icikulangilila ukuti pangapita insita pakuti antu yatandike ukuvwa?

¹⁴ Uku ncende zimwi, pakapita sana insita pakuti umwi abatiziwe. Lekini tulande pali vino vyacitikile ya nkazi yaili avyalwa inda yonga lino yaile umu kuomba upainiya wa nsita yonsi umwi tauni ilyayela umu citungu ca Quebec, uku Canada umu 1959. * Pa mulandu wakuti antu yatiinanga ainamupalamano na vino ya simampepo yao yali nu kuyacita ndi cakuti yuvwa ukuti yakulanzyanya na ya Nte, yakananga ukukutika nga yayasimikila. Ya Gladys yalanzile iyati: “Twayanga uku ng’anda ni ng’anda cila wanda pa maawazi 8 pa myaka iili ukwaula ukuti umwi atuyulile nga twakonkonsya. Iizanga sile iyasungamila nga yazana ati a sweswe iyaswilila. Nomba tutatoovwike.” Lino papisile insita, antu yatandike ukuyapokelela nupya yamwi yatandike ukuvwa nga yayasimikila. Ndakai umwi tauni lili mwaya ivilongano vitatu.—Eza. 60:22.

15. I vyani vino ilembo lyakwe 1 Kolinto 3:6, 7 likutusambilizya pa mulimo wa kupanga asambi?

¹⁵ Antu aingi aakalondekwa ukwazwa umuntu ukuya umusambi. Yonsi umu cilongano yalinzile ukuombela pamwi pakuti yazwe umwi ukubatiziwa. (Belengini 1 Kolinto 3:6, 7.) Tuti umwina umwi wasiila umuntu aakulonda ukusambilila pali Leza kapepala kilandwe nanti magazini. Lyene umwina wazana ukuti atalakwanisya ukuswilila uku muntu wiyo, fwandi wanena umwina muze ukuti akaswilileko. Umwina wino waswililako wakwanisya  ukutandika isambililo lya Baibo. Nawe lyonsi lino waya mu kutungulula isambililo akasendako umwina nanti nkazi, nupya cila muntu akakomelezya umusambi umu nzila izipusanepusane. Umwina wensi nanti nkazi uwalondela ukwi sambililo lii alazwilizyako umuntu wiyo ukusambilila ivingi pali Yeova. Umu nzila iyo, yonsi aombisye ukwazwa umuntu wiyo yangaya ni nsansa lino wabatiziwa.—Yoa. 4:35-38.

16. U mulandu ci uno mungatwalilila ukuya ni nsansa umu mulimo wa kusimikila nanti cakuti mutanga mukwanisye pa mulandu nu kulwalilila nanti ukukanakwata amaka ya kucita vivyo?

¹⁶ Mungacita uli ndi cakuti pa nsita ii mutanga musimikile nu kusambilizya wakwe vino cali mpiti pa mulandu nu kulwalilila nanti ukukanakwata amaka ya kucita vivyo? Mungatwalilila ukuya ni nsansa pa mulandu ni milimo inono ino mukuomba iikutungilila umulimo wa kupanga asambi. Elenganyini pali vino vyacitikile Devedi na onsi yakwe lino yapokolwile indupwa zyao ni viya uku ina Amaleke. Aonsi 200 yatonsile sana icakuti yafizilwe ukulwako, fwandi yasyazile yakulinda iviya. Pa cisila ca kucimvya ulwi uu, Devedi wapeezile isunde lyakuti iviya vino yapokolwile uku ina Amaleke vyankanyiziwe uku onsi yonsi kumwi na yano yataile umukulwako ulwi. (1 Sam. 30:21-25) Vikwene avino caya nu ku mulimo witu uwa kupanga asambi umu nsi yonsi. Nanti cakuti mutanga mukwanisye ukuombesya umu mulimo wa kusimikila nu kusambilizya, mungaya ni nsansa lino umwi watandika ukusambilila pali Yeova nupya wabatiziwa.

17. I vyani vino tulinzile ukutaizizyapo Yeova?

¹⁷ Tukataizya pali vino Yeova akaya ni nsansa pa mulimo uno tukaomba. Wamanya ukuti tutanga tupatikizye antu ukuvwa lino tukuyasimikila nanti ukutandika ukupepa Yeova. Nomba akalola vino tukaombesya na vino twamutemwa nupya akatupaala. Nupya akatusambilizya vino tungacita pakuti tuye ni nsansa muli vyonsi vino tukuomba lino tukuomba umulimo wa kusimikila. (Yoa. 14:12) Fwandi twasininkizya ukuti Leza akatemwa ndi cakuti tutatoovwike lino tukumuombela!