1. Gari baani ni ohagalala baani ninnihuna?

OKALA Namona a Yehova gari enlubale! Iyo nnowithaniwa Anamona a Yehova ni nnowakihedha ndina na Mulugu, wodhela muthenga nnalaleyihu. Nnakala oohagalalene naanda omukavihera muthu ‘anna efunelo yapama yegumi yohimala’ okala mudhaari a Mulugu. (Atos 13:48) Nnokala ninga Yesu, ‘ahagalale vanlubale wodhela muzimu wotxena’ anamaharaye nuhogolowa mmabasani oolaleya dhewa dhaweddeliwa pama.​—Lucas 10:1, 17, 21.

2. Nnonihe addi wihina nnovaha thima muthenga nnalaleyihu?

² Iyo kannaavudhuwana mabasa ehu oolaleya. Murumiwi Pawulo ahimukongomedha Timotiyu egihina: ‘Wilibihere opendda ele onahudhihiwe vamodha ni weya.’ Teto Pawulo ahenjhedhedha egi: ‘Werana ndo, ommaavulusa aliba enuvuruwana vamodha ni weya.’ (1 Tim. 4:16) Dhigumi dhowinjhiva dhiri vangovini. Woona wi nnofuna othongiwa ni Omwene wa Mulugu, iyo nnowilibihera wipendda. Iyo nnowipendda wihina nimuhagalase Yehova, ni nnowipendda akala nde nnalaleyihu nnovirihamo. (Fil. 1:27) Iyo nnowoniha wihina ‘nnowilibihera opendda dhohudhiha dhehu’ wodhela wiwegeredha pama nihinadhowe mmalaleyelo, ni wodhela omuloba Yehova wihina anreelihe nihinathi owoga ni muthu wodhela muthenga.

3. Ethu baani enapadduwa athu yavuruwana muthenga wOmwene? Owoge yotajhiha.

³ Naari nere wilibihera mmabasani oolaleya, podi wera athu nnalaleyihu kinapwatha obe enapwatha vang’no muthenga ninnihuna. Kasugwa yotajhiha ya ddibila Georg Lindal, alaleye mudhidhi wowinjhivene elabo yo Islanda yaka ya 1929 ofiyera yaka ya 1947. Oliye ahagawa malivuru owinjhivene, mbwenye newene muthu mmodha kaarumedhe ebaribari, oliye ohuleba egi: “Amodha yofuna ohudhera ebaribari mbwenye owinjhiva ofiyera peeno newene kinapwatha.” Amisiyonariyu esuzile eskola yo Gileyade orumiwa wewule, naari egafile Amisiyonariyu ale athuya kayapwatha ebaribari, mbwenye nuuvira yaka 9 a  Islandegi amodha wivelela wa Yehova ni ebaddiziwa. *

4. Nnakala aavi athu yahirumedhaga muthenga dhapama nnalaleyihu?

⁴ Sowukuliha, athuya yahirumelaga pama muthenga nnalaleyihu. Iyo podi okala ninga Pawulo, afiyere owoga egi: ‘Gihukuwa vanlubale ni ginowoona widdela’ mwaha maJudewu owinjhiva yamukoddiliwa Yesu ninga Mesiya. (Rom. 9:1-3) Podi wera we onowilibihera vanlubale ni onolobela mwaha wa namahudhera a Bibliya, mbwenye oliye newene kanunnuwelavo, vano we othoma wi ohiye ohudhera nuliye, obe niwoge wi kunawedhege omukavihera muthu ofiyera obaddiziwa. Eyo yapadduwa enohoweleya wivaha nibili wubuwelaga wi Yehova kanaareliha mabasaawo? Yohudhera ela nnere wawakula makoho menli: (1) Nnaanone addi wihina mabasihu oolaleya enowedda pama? (2) Dhithu baani dhinapadduwa ni mabasihu oolaleya?

5. Mwahaya bwaddi mabasihu oolaleya, malabo mamodha kinedda pama ninga nnafunelihu?

⁵ BiBliya anowoga wodhela ole anerana efunelo ya Mulugu egi: ‘Dhatedhene oliye aneriyena dhinere omweddela pama.’ (Sal. 1:3) Mbwenye eyo kinatapulela wi dhatedhene nnerihuna mwaha wa Yehova dhinerege oneeddela pama, ninga nnafunihu, mwaha wi egumi yehu ni yaathu ehimala ‘odhaala makathamiho owinjhiva.’ (Jó 14:1) Ohiya eyo amwiddanihu podi oniwadeliha mwana mudhidhene wapara mabasa oolaleya. (1 Cor. 16:9; 1 Tes. 2:18) Ki nnaanone addi wihina mabasihu oolaleya enowedda pama? Wihina nakule nikoho nna kabeni nawone malagano amBibliyani enanikavihera addi.

6. Ethu baani enamuthukulele Yehova wawonaga mabasihu wi enowedda pama?

⁶ Yehova onowoona wilibihera wehu ni ntidi nehu. Yehova onowawona mabasa ehu wi enowedda pama, nilibiheraga vanlubale ni naaparaga nuudhivela podi athuya ehivuruwanaga muthenga nnalaleyihu. Pawulo ohuleba egi: ‘Mulugu dororomeleya, bumwahaya kadha aaddiwala mabasa enyu ni odhivela mutonyihedhinyu ndina naaye, mwaha walabela ni ohuhiya walabela oweela.’ (Heb. 6:10) Yehova kadha adduwala wilibihera wehu ni odhivela wehu, naari mabasihu oolaleya eheddaga pama ninga nnafunelihu. Bumwahaya madhu aawogile Pawulo alebelaga mulogo woKorintiyu ofiyera peeno enolabela mwigumini mwehu, oliye ohuleba egi: ‘Mabasinyu kahiyo ebewene wa Nabuya.’ Teto madhu ala beebaribari mwigumini mwehu naari mabasa nnaparihu eheddaga pama ninga mwafunelihu.​—1 Cor. 15:58.

7. Nnahudhera ddi ni ele awogile murumiwi Pawulo wodhela mabasaye oolaleya?

⁷ Murumiwi Pawulo aali misiyonariyu apama, oliye ahifugula mulogo dhowinjhiva, Sidadi dhohiyana-hiyana, mbwenye podi dhigarive  ndo amodha yowoga yegihina, oliye kaali namahudhiha apama, wihina avanyihe dhowoga nde Pawulo kawogile athu angasi aakaviheriye onona ebaribari. Ohiya erena yeyo oliye ere oleba egi: ‘Miyo gihithabwa olaba.’ (2 Cor. 11:23) Ninga Pawulo nubuwelege wihina Yehova anavaha thima wilibihera wehu ni ntidi nehu.

8. Ethu baani nnafunihu ohuddiwala wodhela mabasihu oolaleya?

⁸ Mabasa ehu oolaleya enomuhagalasa Yehova. Yesu aharuma anamaharaye 70, wihina yapare mabasa oolaleya mbwenye, ‘yahihogolowaga ehagalalaga.’ Yathukulele anamahara ale okala ohagalalene yaali ddi? Aliwa yahisoriha yegi: ‘Naademoniyuya enoniwelela mwaha olabihedha ndina nenyu.’ Mbwenye Yesu wasumulula egi: ‘Kamuhagalale mwaha ademoniyu enoowiwelelani, mbwenye muhagalale mwaha mandina enyu ehilebiwa odhulu.’ (Lucas 10:17-20) Mwaha wi oliye ahinona wihina, kahiyo Malabo amatene dhewa dhaweddelegiwa pama mmabasani oolaleya. Ebaribariya sowi, iyo kaanonne athu angasi yaavuruwane anamahara a Yesu nlabo nenne ni yaathomile okala anamahara. Ethu yafuna wathukulela aliwa okala ohagalalene, kiyakale mareeliho yanniwana mwaha wolaleya labonenne, mbwenye ohagalala wewa waadhele mwaha onona wi, wilibihera wewa wahimuhagalasa Yehova.

9. Mowiwanana ni Gálatas 6:7-9, nahiselela olaleya nnaakele ddi?

⁹ Nahiselela olaleya nnere wakela egumi yohimala. Muthu analaleya ni anahudhiha muthenga wapama ni murima watene mwebaribarene ‘anere ohadda dhithu dhomuzimuni.’ Eyo enatapulela weenya muzimu wa Mulugu weddiha egumi yehu. ‘Nahiselela’ newene ‘nahikwerebeya’ Yehova ohupaganya onivaha egumi yohimala naari nihimukavihere muthu ofiyedha obaddiziwa.​—Omwileri Gálatas 6:7-9.

10. Enaathukulela athu orumedha muthenga nnalaleyihu ddi?

¹⁰ Athu enarumedha muthenga mwaha efunelo enniwana mmurimani. Eyo ebaribari mwaha nladdaniho awogile Yesu na namadhala, adhanle bewu dhaye mathaka ohiyana-hiyana, mbwenye mburo mmodha wamathaka ale bwafiyedhe omela ni ovaha dhowima. (Lucas 8:5-8) Yesu ohutapulela wihina mathaka ala ohiyana-hiyana enaatonyihedha athu enna murima dhohiyana-hiyana yarumedha ‘madhu a Mulugu’ mwamakalelo ohiyana-hiyana. (Lucas 8:11-15) Ninga namadhala ole, iyo kaninna makalelo owunnuwiha thanga dha madhu eebaribari mmurimani mwa muthu, eyo enowedheya mwaha efunelo eri mmurimani mwa muthuya. Mutholo wehu fuuhuselela odhala bewu ya muthenga wOmwene. Eyo enoligana ni ele awogile murumiwi Pawulo ‘kadda muthu anna yowakela yaye, mowiwanana ni mabasa aapariliye.’ Ohiya wodhela mareeliho amabasihuya.​—1 Cor. 3:8.

11. Mwahaya bwaddi Nowe adhe akelege ‘namalaleya a muselu dhowogowa, dhaye dhamweddela pama?’ (Osugwe fotu yavakapani.)

¹¹ Yaka dhowinjhivadhene adhaari owinjhivene a Yehova ehaalaleya athu yahifuna orumedha. Motajhiha Nowe ‘aali namalaleya a muselu dhowogowa.’ Podi wera dhahivira yaka 40 obe 50. (2 Pedro 2:5) Mohanganyedha Nowe ofuna wi athuya erumeedhe muthenga wOmwene, mbwenye Yehova kamwaddele wi eyo yere opadduwa. Ohiya eyo, Yehova omwaddela Nowe makalelo afuniye omaga mwanddeya oliye wera: ‘We onere ovolowa mmwanddeyani vamodha naanaawo, mwariyo ni ahiyana anawo.’ (Gén. 6:18) Teto Mulugu nuumwaddela mataamelo ni marambalalelo a mwanddeya, Nowe ahoonelamo  wihina kahiyo athu owinjhiva yaarumedhe muthenga walaleyiye, mwaha mwanddeya ole wahiyeva. (Gén. 6:15) Ninga nnonilihu, newene muthu mmodha kanvuruwane Nowe. (Gén. 7:7) Kivano niwogege wi Yehova oona wi Nowe kaapara mabasaye ni makalelo apama? Newene. Nowe aali ororomeleya ni aherana dhatedhene Yehova amurumiliye. Vamentoni va Mulugu oliye aali namalaleya dhaye dhamweddela pama.​—Gén. 6:22.

12. Namavuhulela Jeremiya andile addi okanna ohagalala mmabasani aye oolaleya?

¹² Namavuhulela Jeremiya ahifwanyiwa makathamiho mamodhave, athu amudhidhi waye kayafuna onvuruwana ni yahimwidda. Naari dhigarive ndo Jeremiya ahilaleya okwaranya yaka 40, mwaha ‘oruwaniwa ni manyazo’ oliye ahukuuwa vanlubale ni ofuna wahiya mabasaye. (Jer. 20:8, 9) Mbwenye Jeremiya kaaselele. Yamukavihere Jeremiya ddi owanana mubuwelo wa bure ni ofwanya ohagalala mmabasani aye oolaleya? Oliye athuwathuwela dhithu biili dhathima. Yobajha, muthenga awaddeliye athu wowavaha ‘osogolo ni ejhehero.’ (Jer. 29:11) Yanabili, Jeremiya alaleya muthenga wa Yehova. (Jer. 15:16) Ni iyoya nnowawaddela athu muthenga onna ejhehero. Teto nnaapara mabasa a Yehova, ninga Anamona aye, iyo nathuwathuwelaga dhithu dhenda biili nnere okala ohagalala naari athuya erumedhaga obe ehirumedhaga muthenga nnalaleyihu.

13. Nnahudhera ddi ni nladdaniho awogile Yesu va Marcos 4:26-29?

¹³ Wunnuwa epaddi yomuzimuni winereya vang’no vang’no. Yesu ohuhudhiha eyo wodhela nladdaniho naaye na mulobwana anadhala bewu anodhowa ogonaga. (Omwileri Marcos 4:26-29.) Thanga nde mulobwana ole adhanliye dhinunnuwa vang’no vang’no, teto oliye kananda werana ethu-sithu wihina unnuwihe mowaguva. Ninga mulobwana ole, podi wera enere ohoweleya wihina we ojheha mudhidhene wi wone mareeliho a mabasa awo olaleya. Eyo enapadduwela mwaha wunnuwa wa epaddi yomuzimuni winereya vang’no vang’no ni mudhidhiya wakwana. Namalima kananda wunuwiha ele adhanliye ninga munafuneliye, nimakalelo mamodhave kannanda wawaddihedha anamahudherihu wunnuwa epaddi yomuzimuni mwamakalelo owaguva ninga nafunelihu. Akala onona wi nnamahudherawo onolegela wunnuwa epaddi yomuzimuni, kukwerebeye newene kuselele. Bumwahaya ninga namalima wahudhiha athu wihina ekale anamahara mabasa enahoweleya okala muthu ojhedhiha.​—Tia. 5:7, 8.

14. Yotajhiha baani enoniha wi podi ovira mudhidhene wihina athu ebajhe ovuruwana muthenga?

¹⁴ Murudda dhimodha wihina muthu afiyedhe obaddiziwa podi ovira mudhidhene. Kasugwa yotajhiha yaarogola abili ebaliwe mbani mwimodhave enithaniwa Gladys ni Ruby Allen, Yaka ya 1959 aliwa yahithomiwa wihina elabege ninga apiyonera amudhidhi wamutene Sidadi eng’ono enithaniwa Kebeki, oKanada. * Mwaha wowawoova amwana wanddamani ni apastori athuya kayafuna ovuruwana muthenga wOmwene. Gladys onosoriha egi: “Dhahivira yaka biili neddaga nyumba ni nyumba mawora 8 kadda labo mbwenye kavo muthu afuna wiwa muthenga nannihuna. Athuya yaniturumela vamusiwoni baahi, yamala ohogolowela mba mwankamwene. Podi dhigari ndo iyo kanaselele.” Mudhidhi nuuvira monelo waathu osadduwa, aliwa obajha wandaneyana, ni obajha ovuruwana muthenga. Sidadi yele peeno dhiliwo mulogo miraru.​—Isa. 60:22.

15. 1 Coríntios 3:6, 7, ananihudhiha ddi wodhela mabasa owahudhiha athu wi ekale anamahara?

 ¹⁵ Wahudhiha athu wihina ekale anamahara mabasa owariganela. Addibila ni arogola atene mmulogoni podi omukavihera muthu ofiyera obaddiziwa. (Omwileri 1 Coríntios 3:6, 7.) Motajhiha ddibila mmodha onvaha muthu foyetu obe revista. Vano oliye woona wi kanawedhe omwaredhela muthuule mwaha wa yeyo omuloba namalaleya mmodha wihina adhowewo. Vano namalaleya ole alobiwe wihina adhowewo obajha ohudhera ni muthu ole. Mudhidhi waviraga oliye onowathukulelawo addibila ni arogola ohiyana-hiyana wihina yamuhudhihe vamodha, vano addibila ale enithaneliwa ohudhera wule enomukongomedha namahudhera ole mwamakalelo ohiyana-hiyana. Kadda ddibila obe murogola onokavihera ohela manjhe bewu yeebaribari. Bumwahaya muthu ole abaddiziwa addibila atene yariganele mabasa ala ohadda podi ohagalala.​—João 4:35-38.

16. Mwahaya bwaddi we podi ohagalala ni mabasa oolaleya naari waaparaga vang’ono?

¹⁶ Podi wera egumi yawo ehikanna makathamiho obe kunna kopolo dhowinjhiva dhowaparana mabasa oolaleya. Podi akala muladdu onniwena buyoyo we podi okanna ohagalala ni ele onawedhiwe werana. Kasugwa yotajhiha yamwene Davidi, oliye ni alobwanaye yohowela owana ni akudda Amalekita, wihina yawobole amudhiwa ni dhithu dhimodha. Mbwenye alobwana a Davidi amodha owakwana 200, yahigoma ni kiyanna kopolo wi edhowe yawanegeve vano aliwa ohala esamalelaga dhoobo. Vano Davidi ni alobwanaye amodha oodhowa owana ni ogonjhiha goddo ele, ni yahiwedha odhana dhithu dhowinjhiva ni dhapama. Vano Davidi owoga wihina dhithu nde dhigagaddiwe vaari-ni-vaari dhigaweliwe athu atene naaleya yahalile esamalelaga dhoobo. (1 Sam. 30:21-25) Ethu emodhave enopadduwa ni mabasa ehu owahudhiha athu wi ekale anamahara. Ohagalala nnakanihuna mwaha mabasa ala, okale waathu atene ammulogoni.

17. Dhithu baani dhinanithukulela omutamalela Yehova?

¹⁷ Nnomutamalela Yehova mwaha makalelo anawoniye mabasihu. Oliye ohunona wi kanawedhe wawaddihedha athu ovuruwana muthenga nnawaddelihu ni omwebedha oliye. Podi dhigari ndo oliye onowoona wilibihera wehu ni odhivela ninnihuna ni oliye mwaha wa yeyo ononireeliha. Teto oliye ononihudhiha okala athu ohagalala niile nnawedhihu werana mmabasani olaleya. (João 14:12) Nikanne ebaribari wihina nahiselela Mulugu anere ohagalala ni mabasihu.