1. ¿Ndáa xa̱ʼa̱ kúú ña̱ kúsi̱íní-ini miíyó na̱ testigo Jehová?

KÚSI̱ÍNÍ-INIYÓ xa̱ʼa̱ ña̱ ndásakáʼnuyó Ndióxi̱. Testigo Jehová naníyó, ta náʼa̱yó ña̱ ndixa kúúyó testigora tá nátúʼunyó xíʼin na̱ yiví xa̱ʼa̱ra ta sánáʼa̱yóna. Kúsi̱íní-iniyó tá chíndeétáʼanyó xíʼin na̱ yiví na̱ kúni̱ “kutaku ndiʼi tiempo” ña̱ xa̱a̱na ndasakáʼnuna Jehová (Hech. 13:48). Ndóʼoyó nda̱a̱ táki̱ʼva ndo̱ʼo ta̱ Jesús saáchi “ni̱kusi̱íní-inira i̱xaa ña̱ espíritu santo”, tá nda̱ndikó na̱ discípulora ña̱ ni̱xa̱ʼa̱nna na̱túʼunna xíʼin na̱ yiví xa̱ʼa̱ Ndióxi̱, ta na̱túʼunna xíʼinra xa̱ʼa̱ ndiʼi ña̱ ndo̱ʼona (Luc. 10:1, 17, 21).

2. ¿Ndáa ki̱ʼva náʼa̱yó ña̱ chíndayáʼviyó ña̱ nátúʼunyó xíʼin na̱ yiví?

² Ña̱ ndáyáʼvi va̱ʼaka nu̱úyó kúú ña̱ natúʼunyó xíʼin na̱ yiví xa̱ʼa̱ Ndióxi̱. Ta̱ apóstol Pablo ta̱xira consejo yóʼo ndaʼa̱ ta̱ Timoteo, ka̱chira: “Kiʼin va̱ʼún kuenta xíʼin ña̱ kéʼún ta saátu ña̱ sánáʼún”. Ta ni̱ka̱ʼa̱nkara: “Chi saá kúú ña̱ sakǎkún miíún ta saátu na̱ xíniso̱ʼo ña̱ káʼún” (1 Tim. 4:16). Xíʼin ña̱ ni̱ka̱ʼa̱n ta̱ apóstol Pablo kúnda̱a̱-iniyó ña̱ ndáyáʼviní sakúaʼa na̱ yiví xa̱ʼa̱ Ndióxi̱, chi saá kivi ka̱kuna. Kíʼinníyó kuenta xíʼin ña̱ kéʼéyó, saáchi nátúʼunyó xa̱ʼa̱ Reino Ndióxi̱. Ta saátu viíní íyo ña̱ kéʼéyó chi kúni̱yó ná ndukáʼnu ki̱vi̱ Jehová, ta xíʼin ña̱ kéʼéyó náʼa̱yó ña̱ kándíxayó ña̱ nátúʼunyó xíʼin na̱ yiví (Filip. 1:27). Tá xa̱a̱ ya̱chi̱ka káʼviyó xa̱ʼa̱ ña̱ natúʼunyó xíʼin na̱ yiví, ta káʼa̱nyó xíʼin Jehová ña̱ ná chindeétáʼanra xíʼinyó ña̱ natúʼunyó xíʼinna xa̱ʼa̱ra, saá náʼa̱yó ña̱ kíʼin va̱ʼayó kuenta xíʼin ña̱ sánáʼa̱yó.

3. ¿Ndáaña kéʼé sava na̱ yiví tá nátúʼunyó xíʼinna xa̱ʼa̱ Reino Ndióxi̱? Ka̱ʼa̱n xa̱ʼa̱ iin ejemplo.

³ Ni chíka̱a̱níyó ndee̱ ña̱ natúʼunyó xíʼin na̱ yiví xa̱ʼa̱ Ndióxi̱, soo savana va̱ása xíínna kuniso̱ʼona ña̱ nátúʼunyó xíʼinna. Ná ka̱ʼa̱nyó xa̱ʼa̱ ña̱ ndo̱ʼo ta̱ hermano Georg Lindal, iinlá miíra na̱túʼun xa̱ʼa̱ Ndióxi̱ chí Islandia tá ku̱i̱ya̱ 1929 nda̱a̱ ku̱i̱ya̱ 1947. Ku̱a̱ʼání  tutu nda̱koora ndaʼa̱ na̱ yiví, soo nda̱a̱ ni iinna va̱ása níxa̱a̱ koo testigo Jehová. Ña̱yóʼo ni̱ka̱ʼa̱nra: “Savana xi̱sa̱a̱na xíʼi̱n, soo ku̱a̱ʼánína va̱ása níxi̱kutóona kuniso̱ʼona xa̱ʼa̱ Ndióxi̱”. Tá ni̱ya̱ʼa tiempo ni̱xa̱a̱ sava na̱ misionero na̱ ka̱ʼvi ti̱xin escuela ña̱ Galaad, ña̱ va̱ʼa chindeétáʼanna xíʼinra ña̱ natúʼunna xíʼin na̱ yiví, soo ni saá va̱ása níxi̱kutóo na̱ yiví kuniso̱ʼona. Ta tá ni̱ya̱ʼa i̱i̱n ku̱i̱ya̱, saáví ni̱xa̱a̱ sava na̱ yiví nda̱taxina miína ndaʼa̱ Jehová ta nda̱kuchina. *

4. ¿Ndáaña ndóʼoyó tá va̱ása xíín na̱ yiví kuniso̱ʼona ña̱ nátúʼunyó?

⁴ Tá va̱ása xíín na̱ yiví kuniso̱ʼona ña̱ nátúʼunyó xíʼinna ndákava-iniyó. Sana ndóʼoyó táki̱ʼva ndo̱ʼo ta̱ Pablo, chi ta̱yóʼo ni̱ka̱ʼa̱nra ña̱ ndeéní ku̱suchí-inira ta ni̱xo̱ʼvi̱ra xa̱ʼa̱ ña̱ va̱ása níxiin na̱ judío kandíxana ña̱ xi̱kuu ta̱ Jesús ta̱ Mesías (Rom. 9:1-3). Sana íyo iin na̱ yiví na̱ káʼviyó xíʼin xa̱ʼa̱ Ndióxi̱, soo va̱ása chíka̱a̱na ndee̱ ña̱ kuaʼnuna xíʼin tu̱ʼunra, ni chíka̱a̱nívayó ndee̱ xíʼinna ta kéʼéyó oración xa̱ʼa̱na. Ta xa̱ʼa̱ ña̱ va̱ása chíka̱a̱na ndee̱ xíniñúʼu sandákooyó kaʼviyó xíʼinna. Á sanatu ta̱ʼán chindeétáʼanyó xíʼin nda̱a̱ ni iinna ña̱ xa̱a̱na ndakuchina. ¿Á xíniñúʼu ndakava-iniyó ta ndakanixi̱níyó ña̱ va̱ása chíndeétáʼan Jehová xíʼinyó? Nu̱ú artículo yóʼo ndakuiinyó u̱vi̱ pregunta yóʼo: ¿ndáaña náʼa̱ nu̱úyó ña̱ va̱ʼava íyo chiñu ña̱ kéʼéyó? ta ¿ndáaña xíniñúʼu kundatuyó tá nátúʼunyó xíʼin na̱ yiví xa̱ʼa̱ Ndióxi̱?

5. ¿Nda̱chun va̱ása vií kána ndiʼi chiñu ña̱ kéʼéyó nu̱ú Jehová?

⁵ Tá káʼa̱n Biblia xa̱ʼa̱ na̱ ndásakáʼnu Ndióxi̱, káchiña: “Ndiʼi ña̱ keʼéna va̱ʼa kanaña” (Sal. 1:3). Soo ña̱yóʼo va̱ása kúni̱ kachiña ña̱ ndiʼi ña̱ kéʼéyó nu̱ú Jehová kanaña táki̱ʼva kúni̱ miíyó. Saáchi ndiʼiyó kúúyó na̱ yiví ku̱a̱chi ta xa̱ʼa̱ ña̱yóʼo íyoní tu̱ndóʼo nu̱úyó (Job 14:1). Ta saátu, na̱ sáa̱-ini xíni miíyó kivi kasina nu̱úyó ña̱ natúʼunyó xa̱ʼa̱ Ndióxi̱ (1 Cor. 16:9; 1 Tes. 2:18). Tá saá, ¿ndáaña kíʼin Jehová kuenta xíʼin tá nátúʼunyó xíʼin na̱ yiví xa̱ʼa̱ra? Ná kotoyó sava texto ña̱ chindeétáʼan xíʼinyó ndakuiinyó pregunta yóʼo.

6. ¿Ndáaña kíʼin Jehová kuenta xíʼin tá nátúʼunyó xíʼin na̱ yiví?

⁶ Jehová xítora tá chíka̱a̱yó ndee̱ ta kúndeé-iniyó. Ni xíniso̱ʼo na̱ yiví ña̱ nátúʼunyó xíʼinna á va̱ása, ña̱ ndáyáʼvika nu̱ú Jehová kúú ña̱ chíka̱a̱yó ndee̱ ña̱ keʼéyó chiñu yóʼo, ta kéʼéyóña xa̱ʼa̱ ña̱ kúʼvi̱-iniyó xíniyó na̱ yiví. Ta̱ Pablo ka̱ʼyíra ña̱yóʼo: “Ndióxi̱ nda̱kúní-inira, va̱ása nándósó-inira xa̱ʼa̱ ndiʼi chiñu ña̱ ke̱ʼéndó, saátu ña̱ ni̱na̱ʼa̱ndó ña̱ kúʼvi̱ní-inindó xínindó ki̱vi̱ra xa̱ʼa̱ ña̱ ka̱chíñundó nu̱ú na̱ nda̱kaxinra ta ndákundeéndó káchíñundó nu̱úna” (Heb. 6:10). Va̱ása nándósó-ini Jehová xa̱ʼa̱ ña̱ chíka̱a̱níyó ndee̱ ña̱ natúʼunyó xíʼin na̱ yiví, ta kúʼvi̱-iniyó xíniyóna ni va̱ása xíínna kuniso̱ʼona. Ña̱kán kiviva kandíxayó ña̱ ni̱ka̱ʼa̱n ta̱ Pablo xíʼin na̱ ñuu Corinto, tá ka̱chira: “Keʼéndó chiñu tátayó [...]  chi kúnda̱a̱-inindó ña̱ íyo iin ña̱ ndakiʼinndó xa̱ʼa̱ ña̱yóʼo” (1 Cor. 15:58). Ña̱kán, ni tá va̱ása xíín na̱ yiví kuniso̱ʼona ña̱ nátúʼunyó, soo íyo iin ña̱ va̱ʼa ndátuyó ndakiʼinyó.

7. ¿Ndáaña sákuaʼayó xíʼin ña̱ ni̱ka̱ʼa̱n ta̱ apóstol Pablo xa̱ʼa̱ chiñu ña̱ xi̱keʼéra?

⁷ Iin misionero va̱ʼaní xi̱kuu ta̱ apóstol Pablo, ta saátu chi̱ndeétáʼanra xíʼin ku̱a̱ʼání ñuu ña̱ ki̱xáʼa íyo congregación. Soo ni saá, sava na̱ cristiano xi̱ndakanixi̱nína ña̱ xi̱xini̱níkana nu̱úra ta ni̱ka̱ʼa̱nna ña̱ va̱ása va̱ʼa xa̱ʼa̱ra, ta saátu ni̱ka̱ʼa̱nna xíʼinra ña̱ va̱ása va̱ʼa sánáʼa̱ra. Soo va̱ása níka̱ʼa̱nra xíʼinna nda̱saa na̱ yiví chi̱ndeétáʼanra xíʼin ña̱ ni̱xa̱a̱na nda̱kuchina, chi ña̱yóʼova ni̱ka̱ʼa̱nra xíʼinna: “Ku̱a̱ʼáníka chiñu kéʼé yi̱ʼi̱” (2 Cor. 11:23). Ná kundiku̱nyó yichi̱ ta̱ apóstol Pablo, ta ná ndakaʼányó chi ña̱ ndáyáʼvika nu̱ú Jehová kúú ña̱ chíka̱a̱yó ndee̱ ta kúndeé-iniyó.

8. ¿Ndáa xa̱ʼa̱ kúú ña̱ kúsi̱í-iniyó tá nátúʼunyó xíʼin na̱ yiví?

⁸ Ña̱ nátúʼunyó xíʼin na̱ yiví sákusi̱íníña-ini Jehová. Iin yichi̱ chi̱ndaʼá ta̱ Jesús 70 na̱ discípulora ña̱ ni̱xa̱ʼa̱nna na̱túʼunna xa̱ʼa̱ Reino Ndióxi̱. Ña̱ Biblia káʼa̱nña ña̱ ku̱si̱íní-inina tá nda̱ndikóna. ¿Nda̱chun ku̱si̱íní-inina? Ña̱yóʼo ni̱ka̱ʼa̱nna: “Nda̱a̱ na̱ ta̱chí ndi̱va̱ʼa xíniso̱ʼona ña̱ káʼa̱nndi̱ tá xíniñúʼundi̱ ki̱vi̱ún”. Soo ña̱yóʼova ni̱ka̱ʼa̱n ta̱ Jesús xíʼinna: “Va̱ása kusi̱í-inindó xa̱ʼa̱ ña̱ xíniso̱ʼo na̱ ta̱chí ndi̱va̱ʼa ña̱ káʼa̱nndó. Va̱ʼaka kusi̱í-inindó saáchi xa̱a̱ ni̱ka̱ʼyi̱ ki̱vi̱ndó chí ndiví” (Luc. 10:17-20). Ta̱ Jesús xi̱kunda̱a̱-inira ña̱ su̱ví ndiʼiví na̱ yiví kuniso̱ʼo ña̱ natúʼunna. Ta saátu va̱ása kúnda̱a̱-iniyó nda̱saa na̱ yiví na̱ na̱túʼunna xíʼin ni̱xa̱a̱ ndu̱u discípulo ta̱ Jesús. Ña̱kán va̱ása níxiniñúʼu kusi̱í kuití inina xa̱ʼa̱ ña̱ va̱ʼaní xi̱xiniso̱ʼo na̱ yiví, chi saátu xi̱niñúʼu kusi̱í-inina xa̱ʼa̱ ña̱ xi̱kusi̱í-ini Jehová xíʼin chiñu ña̱ xi̱keʼéna.

9. Nda̱a̱ táki̱ʼva káchi Gálatas 6:7-9, ¿ndáaña va̱ʼa ndakiʼinyó tá ndákundeéyó nátúʼunyó xa̱ʼa̱ Ndióxi̱?

⁹ Tá ná ndakundeéyó natúʼunyó xa̱ʼa̱ Ndióxi̱ saá kúú ña̱ ni̱ʼíyó ña̱ kutakuyó ndiʼi tiempo. Tá chíka̱a̱yó ndee̱ ña̱ chiʼiyó ña̱ nda̱a̱ níma̱ na̱ yiví ta kóso̱yóña, saá kúú ña̱ kéʼéyó ña̱ kúni̱ espíritu santo, saáchi táxiyó ña̱ chindeétáʼanña xíʼinyó. Tá ná “va̱ása kunaáyó”, Jehová káʼa̱nra taxira ña̱ kutakuyó ndiʼi tiempo, ni tá va̱ása níchindeétáʼanyó xíʼin iin na̱ yiví ña̱ xa̱a̱na ndakuchina (kaʼvi Gálatas 6:7-9). *

10. ¿Nda̱chun su̱ví ndiʼi na̱ yiví xíniso̱ʼo ña̱ nátúʼunyó?

¹⁰ Va̱ása inkáchi ndákuiin na̱ yiví tá nátúʼunyó xíʼinna saáchi xa̱a̱ síín síín íyo ña̱ ndíka̱a̱ níma̱na. Ta̱ Jesús chi̱ndeétáʼanra xíʼinyó kunda̱a̱-iniyó xa̱ʼa̱ ña̱yóʼo tá na̱túʼunra xa̱ʼa̱ iin ta̱ chíʼi. Ta̱ ta̱a yóʼo xa̱a̱ síín síín ñuʼú chi̱ʼira, soo ña̱ chi̱ʼira nu̱ú ñuʼú va̱ʼa kúú ña̱ ni̱ndu̱ta (Luc. 8:5-8). Ta̱ Jesús ni̱ka̱ʼa̱nra ña̱ ñuʼú yóʼo kúú níma̱ na̱ yiví, saáchi xa̱a̱ síín síín ndákuiinna tá nátúʼunyó xíʼinna (Luc. 8:11-15). Nda̱a̱ táki̱ʼva ndóʼo ta̱ chíʼi yóʼo chi va̱ása xíni̱ra ndáa si̱ʼva̱ kúú ña̱ kuaʼnu, saátu miíyó va̱ása xíni̱yó ndáa na̱ yiví kúú na̱ xa̱a̱ ndasakáʼnu Ndióxi̱, saáchi xa̱a̱ síín síín íyo níma̱na. Ta chiñu ña̱ kúúmiíyó kúú ña̱ ndakundeéyó natúʼunyó xíʼin na̱ yiví xa̱ʼa̱ Reino Ndióxi̱. Nda̱a̱ táki̱ʼva íyo ña̱ ni̱ka̱ʼa̱n ta̱ apóstol Pablo “Ndióxi̱ taxira ña̱ va̱ʼa ndaʼa̱ iin iinna xa̱ʼa̱ chiñu ña̱ ke̱ʼévana” ta su̱ví nda̱saa na̱ yiví chi̱ndeétáʼanna xíʼin (1 Cor. 3:8).

11. ¿Nda̱chun káʼa̱nyó ña̱ va̱ʼava ka̱na chiñu ña̱ ke̱ʼé ta̱ Noé? (Koto na̱ʼná ña̱ va̱xi chí sa̱tá tutu yóʼo).

¹¹ Ku̱a̱ʼání na̱ xi̱ndasakáʼnu Jehová xi̱natúʼunna xíʼin na̱ yiví na̱ va̱ása níxiin kuniso̱ʼo. Tá kúú, ta̱ Noé ku̱a̱ʼání ku̱i̱ya̱ na̱túʼunra xíʼin na̱ yiví xa̱ʼa̱ Ndióxi̱ (2 Ped. 2:5). Ta̱yóʼo xi̱kuni̱vara ña̱ ná kuniso̱ʼo na̱ yiví ña̱ xi̱natúʼunra xíʼinna, soo va̱ása níka̱ʼa̱n Jehová xíʼinra ña̱ kuniso̱ʼonara.  Saáchi tá ni̱ka̱ʼa̱nra xíʼinra ña̱ ná ixava̱ʼara tú arca, ña̱yóʼo ni̱ka̱ʼa̱nra xíʼinra: “Xíniñúʼu ndi̱ʼviún ini tú arca xíʼin se̱ʼún, xíʼin ñá síʼún ta saátu xíʼin xa̱nuún” (Gén. 6:18). Ta tá ni̱ka̱ʼa̱n Jehová xíʼinra ndáa ki̱ʼva koo tú arca, sana ki̱ʼinra kuenta ña̱ su̱ví ndiʼiví na̱ yiví kuniso̱ʼo ña̱ natúʼunra (Gén. 6:15). Ta ndixa saá ku̱uva, saáchi nda̱a̱ ni iin na̱ yiví na̱ ni̱xi̱yo tiempo kán va̱ása níxiniso̱ʼona ña̱ na̱túʼunra (Gén. 7:7). ¿Á nda̱kanixi̱ní Jehová ña̱ va̱ása va̱ʼa íyo chiñu ña̱ ke̱ʼé ta̱ Noé? Va̱ása, chi nu̱ú Jehová va̱ʼava íyo chiñu ña̱ ke̱ʼéra, saáchi sa̱xínuva ta̱ Noé ña̱ ni̱ka̱ʼa̱nra xíʼinra (Gén. 6:22).

12. ¿Ndáaña ke̱ʼé ta̱ Jeremías ña̱ va̱ʼa kusi̱í-inira natúʼunra xíʼin na̱ yiví?

¹² Saátu ta̱ profeta Jeremías ku̱a̱ʼání tiempo na̱túʼunra xíʼin na̱ yiví ni va̱ása níxiinna kuniso̱ʼona á ni xi̱sasina nu̱úra ña̱ natúʼunra. Nda̱kavaní-inira xa̱ʼa̱ ña̱ xi̱ka̱ʼa̱n-ndi̱va̱ʼana xíʼinra ta xi̱xaku̱ndaanara, ta xa̱ʼa̱ ña̱yóʼo ni̱xa̱a̱ra nda̱kanixi̱níra ña̱ va̱ása keʼékara chiñu ña̱ ta̱xi Jehová ndaʼa̱ra (Jer. 20:8, 9). Soo nda̱kundeévara ke̱ʼéraña. ¿Ndáaña chi̱ndeétáʼan xíʼinra ña̱ na̱samara ña̱ ndákanixi̱níra, ta ku̱si̱í-inira na̱túʼunra xíʼin na̱ yiví? Ña̱ ni̱ndi̱ʼi̱-inira xa̱ʼa̱ u̱vi̱ ña̱yóʼo. Ña̱ nu̱ú: ña̱ xi̱natúʼunra xíʼin na̱ yiví kivi chindeétáʼanña xíʼinna ña̱ kundatuna ndakiʼinna iin ña̱ va̱ʼa chí nu̱únínu (Jer. 29:11). Ta ña̱ u̱vi̱: mií Jehová kúú ta̱ nda̱kaxinra ña̱ natúʼunra xa̱ʼa̱ra (Jer. 15:16). Saátu miíyó, nátúʼunyó xíʼin na̱ yiví xa̱ʼa̱ ña̱ va̱ʼa ña̱ ndakiʼinna chí nu̱únínu, ta saátu nátúʼunyó xa̱ʼa̱ ki̱vi̱ Jehová chi kúúyó testigora. Tá ná kundi̱ʼi̱-iniyó xa̱ʼa̱ u̱vi̱ ña̱yóʼo, saá kúú ña̱ kusi̱íka-iniyó natúʼunyó xíʼin na̱ yiví ni xíniso̱ʼona ña̱ nátúʼunyó xíʼinna á va̱ása.

13. ¿Ndáaña sákuaʼayó xíʼin ña̱ na̱túʼun ta̱ Jesús nu̱ú Marcos 4:26-29?

¹³ Va̱ása kamaví xáʼnu na̱ yiví xíʼin tu̱ʼun Ndióxi̱. Ta̱ Jesús chi̱ndeétáʼanra xíʼinyó kunda̱a̱-iniyó xa̱ʼa̱ ña̱yóʼo tá na̱túʼunra xa̱ʼa̱ iin ta̱a ta̱ chíʼi ta kísi̱ra (kaʼvi Marcos 4:26-29). * Kǒo ña̱ níkivi keʼé ta̱ chíʼi yóʼo ña̱ va̱ʼa kama kuaʼnu ña̱ chi̱ʼira, saáchi xi̱niñúʼu kundatura ña̱ kúee kúee ná kuaʼnu miíña. Ta ki̱ʼva saá ndóʼo miíyó xíʼin na̱ káʼviyó xíʼin, saáchi xíniñúʼu kundatuyó ña̱ kúee kúee ná kuaʼnuna xíʼin tu̱ʼun Ndióxi̱, ta kixáʼana keʼéna ña̱ sákuaʼana. Iin ta̱ chíʼi va̱ása kívi ixandúxara xíʼin ña̱ʼa ña̱ chíʼira ña̱ kama kuaʼnuña, ta saátu miíyó va̱ása kívi ixandúxayó xíʼin na̱ káʼviyó xíʼin ña̱ kama kuaʼnuna xíʼin tu̱ʼun Ndióxi̱. Ña̱kán, ná va̱ása ndakava-iniyó ta ná ndakundeéyó chindeétáʼanyó xíʼinna, ni tá va̱ása kama va̱xi kuaʼnuna xíʼin tu̱ʼun Ndióxi̱. Xíniñúʼu kúee koo iniyó ña̱ va̱ʼa chindeétáʼanyó xíʼin na̱ yiví ña̱ xa̱a̱na ndakuchina, ta kachíñuna nu̱ú Jehová (Sant. 5:7, 8).

14. ¿Ndáa ejemplo náʼa̱ nu̱úyó ña̱ ku̱a̱ʼá tiempo yáʼa ta saáví xíniso̱ʼo na̱ yiví?

¹⁴ Ni ku̱a̱ʼání ku̱i̱ya̱ nátúʼunna xa̱ʼa̱ Ndióxi̱ sava ñuu, soo nda̱a̱ ni iin na̱ yiví va̱ása xíniso̱ʼona. Ná kotoyó ña̱ ndo̱ʼo u̱vi̱ ná hermana ná Canadá, ñá Gladys xíʼin kuʼvi̱ñá ñá Ruby Allen. Tá ku̱i̱ya̱ 1959 ndu̱uná precursora regular ta chi̱ndaʼánaná ku̱a̱ʼa̱nná chí Quebec. * Na̱ yiví na̱ ñuu kán xi̱yiʼvínína na̱ su̱tu̱, ta saátu ndáaña ka̱ʼa̱n inka na̱ yiví xa̱ʼa̱na, ña̱kán va̱ása níxi̱xiniso̱ʼona ña̱ xi̱natúʼunná. Ñá Gladys káchiñá: “Ti̱xin u̱vi̱ ku̱i̱ya̱, ki̱ʼva u̱na̱ hora xi̱natúʼunndi̱ xíʼin na̱ yiví veʼe tá veʼe, ta va̱ása níxi̱ndakuiinna yuʼúndi̱. Xi̱xito kuitína ndi̱ʼi̱ chí ventana ta va̱ása níxi̱ndakunána yéʼé nu̱úndi̱. Soo va̱ása níndakava-inindi̱”. Tá ni̱ya̱ʼa tiempo ki̱xáʼa na̱ yiví na̱samana ña̱ kéʼéna ta va̱ʼa ki̱xáʼana xíniso̱ʼona. Tiempo vitin íyo u̱ni̱ congregación ña̱ lugar kán (Is. 60:22).

15. ¿Ndáaña sánáʼa̱ 1 Corintios 3:6, 7 miíyó xa̱ʼa̱ chiñu ña̱ kúúmiíyó?

 ¹⁵ Ku̱a̱ʼávayó xíniñúʼu chindeétáʼan xíʼin iin na̱ yiví ña̱ va̱ʼa xa̱a̱na koona discípulo ta̱ Jesús. Iníísaá congregación kivi chindeétáʼan xíʼin iin na̱ yiví ña̱ xa̱a̱na ndakuchina (kaʼvi 1 Corintios 3:6, 7). * Ná ka̱ʼa̱nyó xa̱ʼa̱ iin ejemplo: iin ta̱ publicador ta̱xira iin tutu ndaʼa̱ iin na̱ yiví na̱ va̱ʼaní xi̱niso̱ʼo, soo ta̱ publicador yóʼo va̱ása kunaʼara ndandikóra nu̱ú na̱ yiví yóʼo. Ña̱kán ni̱ka̱ʼa̱nra xíʼin inka ta̱ publicador ña̱ ku̱ʼu̱nra kotorana. Ta̱yóʼo ki̱xáʼara káʼvira xíʼinna ta xa̱a̱ síín síín na̱ hermano xáʼa̱n xíʼinra, ta na̱yóʼo chíka̱a̱na ndee̱ xíʼin na̱ yiví yóʼo. Tasaá, chíndeétáʼanna xíʼinna ña̱ kuaʼnuna xíʼin tu̱ʼun Ndióxi̱. Ta nda̱a̱ táki̱ʼva ni̱ka̱ʼa̱n ta̱ Jesús, na̱ chíʼi xíʼin na̱ sákée inkáchi kúsi̱í-inina xa̱ʼa̱ chiñu ña̱ kéʼéna (Juan 4:35-38).

16. ¿Nda̱chun kivi kusi̱í-iniún xa̱ʼa̱ chiñu ña̱ kéʼún nu̱ú Ndióxi̱ ni ndeé ndóʼún á ni xa̱a̱ ku̱chéún?

¹⁶ Sana va̱ása kívika sanáʼún á natúʼún xíʼin na̱ yiví xa̱ʼa̱ Ndióxi̱, xa̱ʼa̱ ña̱ ndeé ndóʼún á xa̱ʼa̱ ña̱ ku̱chéún. Soo kiviva kusi̱í-iniún keʼún ña̱ kúchiñu kuitíún keʼún. Ná kotoyó ndáaña ke̱ʼé ta̱ rey David xíʼin na̱ ta̱a na̱ kítáʼan xíʼinra tá ka̱nitáʼanna xíʼin na̱ ñuu Amaleq, ña̱ va̱ʼa ndakindaana na̱ veʼena ndaʼa̱ na̱yóʼo xíʼin ña̱ʼa ña̱ i̱xakúiʼnána. U̱vi̱ ciento na̱ ta̱a ku̱naánína ta va̱ása níxa̱ʼa̱nna kanitáʼanna ta ki̱ndoona kundaana ña̱ʼa. Soo tá ndi̱ʼi ku̱a̱chi, ni̱ka̱ʼa̱n ta̱ David ña̱ inkáchi ndataʼvína ña̱ʼa ña̱ nda̱kiʼinna ndaʼa̱ na̱ ñuu Amaleq (1 Sam. 30:21-25). Ki̱ʼva saá kúu tiempo vitin xíʼin chiñu ña̱ kúúmiíyó ña̱ chíndeétáʼanyó xíʼin na̱ yiví ña̱ xa̱a̱na koona discípulo ta̱ Jesús. Ndiʼiyó chíka̱a̱yó ndee̱ ña̱ taxiyó mií ña̱ va̱ʼaka ndaʼa̱ Jehová, ta inkáchi kúsi̱í-iniyó tá iin na̱ hermano chi̱ndeétáʼanna xíʼin iin na̱ yiví ña̱ ni̱xa̱a̱na sa̱kúaʼana xa̱ʼa̱ Jehová, tasaá kivi ni̱ʼína ña̱ kutakuna ndiʼi tiempo.

17. ¿Nda̱chun kivi taxiyó tíxa̱ʼvi ndaʼa̱ Jehová?

¹⁷ Táxiníyó tíxa̱ʼvi ndaʼa̱ Jehová chi chíndayáʼviníra chiñu ña̱ kéʼéyó nu̱úra. Kúnda̱a̱-inira ña̱ va̱ása kívi ixandúxayó xíʼin na̱ yiví ña̱ kuniso̱ʼona ña̱ nátúʼunyó, soo xítora ña̱ chíka̱a̱níyó ndee̱ ña̱ kachíñuyó nu̱úra, ta nátúʼunyó xíʼin na̱ yiví xa̱ʼa̱ ña̱ kúʼvi̱-iniyó xíniyóna, xa̱ʼa̱ ña̱yóʼo táxira ku̱a̱ʼání ña̱ va̱ʼa ndaʼa̱yó. Saátu sánáʼa̱ra miíyó ña̱ kusi̱íní-iniyó xa̱ʼa̱ chiñu ña̱ kéʼéyó nu̱úra (Juan 14:12). Ña̱kán ná kandíxaníyó ña̱yóʼo: Ndióxi̱ taxira ña̱ va̱ʼa ndaʼa̱yó tá ná va̱ása ndakava-iniyó.