1. ¿Kenke tlauel tiyolpakij nochi katli tijtekipanouaj Jehová?

¡TLAUEL tijpatiitaj pampa tielij Jehová itlajtoltemakauaj! Uan kiampa tijnextiaj, kema titlajtolmoyauaj uan tikinmachtiaj sekinok tlen ya. Tiyolpakij kema tijmachtiaj se akajya katli kipia “kuali iyolo” pampa kema mochiuas se tlen Jehová itlajtoltemajka, kipaleuis ma kipia nemilistli tlen axkema tlamis (Hech. 13:48, TNM). Nojkia tijyolmatij kej Jesús, “itonal toTeko kimakak [...] miak pakilistli” kema itokilijkauaj tlakuepilijkej kampa tlajtolmoyauatoj uan kipouilijkej nochi tlamantli kuali tlen kinpanotoya (Luc. 10:1, 17, 21).

2. ¿Kenijkatsa tijnextiaj tlauel tijpatiitaj titlajtolmoyauasej?

² Tlauel tijpatiitaj titlajtolmoyauasej. Apóstol Pablo kiiljuik Timoteo: “Ximotlachili para san tlen xitlauak tijchiuas uan para san tlen kuali titlamachtis. [...] Intla kej ni tijchiuas, toTeko mitsmakixtis ta uan inijuantij tlen mitstlakakilisej” (1 Tim. 4:16). Tlen Pablo kiijtok techmachtia moneki nojua tikinpaleuisej maseualmej ma momanauikaj. Yeka, nochipa tijchiuaj kampeka kuali timonejnemiltisej pampa techyakana toTeotsij iTlanauatijkayo. Nojkia, tijnextiaj tijtlepanitaj Jehová ipan tonemilis uan tijneltokaj tlen titlamachtiaj (Filip. 1:27). Uan kuali timokualchijchiuaj uan tikiljuiaj Jehová ma techpaleui kema titlajtolmoyauasej.

3. ¿Nochi kinekij kitlakakilisej tlen Biblia tlamachtia? Xikijto se neskayotl.

³ Maske tijchiuaj kampeka titlajtolmoyauasej, sekij amo kinekij tlauel techtlakakilisej uan sekij amo techtlakakiliaj. Ma tikitakaj tlen kipanok toikni Georg Lindal, ya tlajtolmoyajki iselti nochi altepetl Islandia ipan 1929 uan tlanki  ipan 1947. Maske kikajki tlauel miak pilamochtsitsij, yon se maseuali amo mochijki se tlen Jehová itlajtoltemajka. Ya kiijtok: “Sekij kualanij pampa titlamachtiaj tlen Biblia uan sekij amo kinekij techtlakakilisej”. Teipa, maske asitoj misioneros tlen Galaad nojkia amo kinejkej kintlakakilisej. Kema panok chiknaui xiuitl, se keskij maseualmej motemaktilijkej ika Jehová uan moatsonpoliuiltijkej. *

4. ¿Kenijkatsa tijyolmatij kema amo kinekij techtlakakilisej?

⁴ Tlauel amo kuali tijyolmatij kema maseualmej amo techtlakakiliaj. Uelis kemantika tijyolmatij kej Pablo kema judíos amo kinejkej kiselisej Jesús, kej Mesías. Ya kiijtok: “Nijpia ueyi kuesoli ipan noyolo uan nitlaijiyouia” (Rom. 9:1-3). Kemantika uelis tijchiuaj kampeka tijmachtisej se akajya uan tikiljuiaj Jehová ma kipaleui. Maske kiampa tijchiuaj, ya amo kichiua kampeka kipatlas inemilis, uan yeka teipa monekis ayokmo tijmachtisej. Nojkia, uelis amo aka tijpaleuijtokej ma moatsonpoliuilti. Tlaj kiampa techpanotok, ¿kinamiki timotlajtlakoltisej uan timoiljuisej Jehová amo kiteochiua tlen tijchiuaj? Ipan ni tlamachtili, tijnankilisej ome tlajtlanili: 1) ¿Kenijkatsa tijmatij Jehová kuali kiita kema tijtekipanouaj? 2) ¿Tlake kinamiki tikilnamikisej kema titlajtolmoyauaj?

5. ¿Kenke kema tijtekipanouaj Jehová amo nochipa kisa kej tojuantij tijnekij?

⁵ Biblia kiijtoua kema se akajya mosentlalia kichiuas tlen Jehová kineki, “nochi tlen kichiua kisa kuali” (Sal. 1:3). Nopa amo kiijtosneki nochi tlen tijchiuasej ipan Jehová itlanechikol kisas kej tojuantij tijnekij. Nochi titlajtlakolejkej, yeka kemantika sekinok kichiuaj ma tijpiakaj tlauel miak “tlaijiyouilistli” (Job 14:1). Nojkia, tokualankaitakauaj uelis kichiuasej ayokmo ma titlajtolmoyauakaj kej achtouia tijchiuayayaj (1 Cor. 16:9; 1 Tes. 2:18). Uajka, ¿ipan tlake tlamantli mosentlalia Jehová kema tijtekipanouaj? Ma tikitakaj se keski textos tlen techpaleuis tijnankilisej ni tlajtlanili.

6. ¿Ipan tlake tlamantli mosentlalia Jehová kema tijtekipanouaj?

⁶ Jehová kiita kema tijchiuaj kampeka tijtekipanosej uan amo tijkuesiuiliaj. Tlauel kipatiita kema tijchiuaj kampeka nochipa titlajtolmoyauasej uan tijchiuasej ika tlaiknelili, maske maseualmej amo kinekisej techtlakakilisej. Pablo kiijtok: “[Jehová] yajaya axkiilkauas nopa tekitl tlen inkichijtokej pampa inkiikneliaj” (Heb. 6:10). Jehová tlauel kipatiita pampa kuali tijtekipanouaj uan tikikneliaj, maske kemantika uelis amo kisa kej tojuantij tijnekiskiaj. Yeka, techyolchikaua tlen Pablo kiijtok: “Xijmatikaj, axsan  tlapik nopa tekitl tlen inkichiuaj” (1 Cor. 15:58). Kej tikitaj, toTeotsij kiampa kiita kema tijtekipanouaj.

7. ¿Tlake tijyekouaj tlen Pablo kiijtok?

⁷ Pablo tlauel kuali tlajtolmoyajki uan ipan miak altepemej tlapaleuik ma momiakilikaj toikniuaj. Maske kiampa kichijki, kema se keskij tlaneltokanij katli moueyimatiyayaj kiijtojkej amo kuali tlamachtiyaya, ya amo kiijtok keskij maseualmej kinpaleuijtoya ma moatsonpoliuiltikaj. Ya san kiijtok: “Nijchijtok ueyi tekitl” (2 Cor. 11:23). Ma tijchiuakaj kej Pablo uan ma tikilnamikikaj Jehová kipatiita tlen tijchiuaj kema tijtekipanouaj ika nochi toyolo.

8. ¿Tlake moneki tikilnamikisej kema tijtekipanouaj Jehová?

⁸ Jehová yolpaki ika tlen tijchiuaj. Se tonali Jesús kintitlanki ma tlajtolmoyauatij 70 itokilijkauaj. Kema tlakuepilijkej, Biblia kiijtoua: “Mokuepkej ika pakilistli”. ¿Kenke tlauel yolpakiyayaj? Inijuantij kiijtojkej: “Iajakauaj Axkualtlakatl techneltokilijkej kema tikinnauatijkej ipan motoka”. Jesús kintlalnamiktik: “Amo xipakikaj miak pampa ajakamej [inmechtlakakiliaj]. Más xipakikaj pampa ya ijkuilijtok inmotoka ipan iama toTeko nepa iluikak” (Luc. 10:17-20). Jesús kimatiyaya amo nochipa kuali kintlakakiliskiaj. Amo tijmatij keskij tlen katli kinkamanaljuikej, mochijkej Cristo itokilijkauaj. Yeka, monekiyaya yolpakisej pampa Jehová kuali kiitayaya tlen kichiuayayaj uan amo san pampa kuali kintlakakilijtoyaj.

9. Kej kiijtoua Gálatas 6:7-9, ¿tlake tijselisej tlaj nochipa titlajtolmoyauaj?

⁹ Tlaj nochipa titlajtolmoyauasej, tijpiasej nemilistli tlen axkema tlamis. Kema tijchiuaj kampeka kuali titlajtolmoyauasej, tijchiuaj kej “itonal toTeko techiljuia” pampa tijkauaj itonal toTeotsij ma techpaleui ika tlen tijchiuaj. Jehová kiijtoua “ma axtikuesiuikaj” tlen tijchiuaj pampa maske amo tijpaleuisej yon se maseuali, ya techmakas nemilistli tlen axkema tlamis (xijpoua Gálatas 6:7-9).

10. ¿Kenke sekij kuali techtlakakiliaj uan sekinok amo?

¹⁰ Ininyolo maseualmej kinextis tlaj techtlakakilisej o amo. Jesús kiixtonki ika se tlapoualistli tlen se tlakatl katli milchiua. Nopaya kiijtoua nopa tlakatl kitojki ixinach ipan sejse tlamantli tlali, uan san temakak itlajka katli kitojki ipan kuali tlali (Luc. 8:5-8). Jesús kiijtok sejse tlamantli tlen nopa tlali, kiixnextia ininyolo maseualmej katli amo sanse kiseliaj “iTlajtol toTeko” (Luc. 8:11-15). Kej nopa milchijketl amo uelis kichiuas ma temaka itlajka tlen kitoka kampa ya kinekiskia, tojuantij nojkia amo uelis tijchiuasej ma techtlakakilikaj maseualmej pampa amo kipiaj sanse ininyolo. Yeka, moneki tijchiuasej kampeka nochipa titlajtolmoyajtosej. Kej Pablo kiijtok: “ToTeko techtlaxtlauis sejse tojuantij [tlen] nopa tekitl tlen tijchijtokej” uan amo tlaj tikinpaleuiaj miakej ma moatsonpoliuiltikaj (1 Cor. 3:8).

11. ¿Kenke tikijtouaj Noé tlauel kuali tlajtolmoyajki? (Xikita tlaixkopinkayotl ipan ipantsajka).

¹¹ Miakej toTeotsij itekipanojkauaj katli itstoyaj uejkajkia, nojkia tlajtolmoyajkej uan amo nochi kintlakakilijkej. Se tlen inijuantij, elki Noé. Biblia kiijtoua “kinyolmelauayaya sekinok” tlen panoskia, uan uelis kiampa kichijki tlauel miak xiuitl (2 Ped. 2:5). Maske Noé moiljuiyaya nochi kitlakakiliskiaj, Jehová amo kiampa  kiiljuijtoya. Kema Jehová kiiljuik ma kichijchiua nopa ueyi akali, kiijtok nopaya kalakiskiaj “ikoneuaj, isiua uan iyexuaj” (Gén. 6:18). Uan kema kiiljuik kenijkatsa iuexka eliskia nopa akali, Noé nima kikuamachilik amo miakej kitlakakiliskiaj kema tlajtolmoyauaskia (Gén. 6:15). Uan kiampa panok, yon se maseuali amo kinejki kitlakakilis (Gén. 7:7). ¿Moiljuik Jehová Noé amo kuali kichijki iteki? Amo. Ya kuali kiitak tlen kichijki pampa kineltokak nochi tlen ya kinauatijtoya (Gén. 6:22).

12. ¿Tlake kipaleuik Jeremías tlajtolmoyauas ika pakilistli maske amo kinejkej kitlakakilisej?

¹² Tlajtolpanextijketl Jeremías nojkia tlajtolmoyajki tlauel miak xiuitl, maske maseualmej amo kinejkej kitlakakilisej. Tlauel kitlaijiljuijkej uan kipinajtijkej, yeka moyolkokok uan kiijtok ayokmo tlajtolmoyauas (Jer. 20:8, 9). Maske kiampa kiyolmatki, kichijki kampeka nojua kichiuas nopa tekitl. ¿Tlake kipaleuik moiljuis kej kinamiki uan tlajtolmoyauas ika pakilistli? Mosentlalik ipan ome tlamantli tlen tlauel ipati. Se. Tlen kiniljuiyaya maseualmej ueliskia kinpaleuis ma kiselikaj tlen toTeotsij kitenkajtoya (Jer. 29:11). Ome. Jehová kitlapejpenijtoya ma kichiua nopa tekitl uan kiampa sekinok kiixmatiskiaj (Jer. 15:16). Tojuantij nojkia tijmoyauaj tlen Jehová kitenkajtok kichiuas pampa tielij itlajtoltemakauaj uan pampa nechka kitsontlamiltisej nochi tlen amo kuali. Kema timosentlaliaj ipan ni ome tlamantli, techpaleuia nojua ma titlajtolmoyauakaj ika pakilistli, maske kemantika amo kinekij techtlakakilisej.

13. ¿Tlake techmachtia nopa tlapoualistli tlen Jesús kiijtok ipan Marcos 4:26-29?

¹³ Amo nima tlaneltoka se akajya. Jesús kitekiuik nopa tlapoualistli tlen se milchijketl katli toka uan kochi (xijpoua Marcos 4:26-29). Nopa tlakatl amo uelki kichiua nima ma moskalti tlen kitojki. Kiampa pano ika se akajya katli tijmachtiaj, uelis monekis panos tonali uan kiampa kichiuas tlen momachtijtok. Kej se milchijketl amo ueli kiisiuiltia tlen kitoktok, tojuantij nojkia amo uelis tikisiuiltisej katli tijmachtiaj nima ma tlaneltoka. Yeka, maske ya uejkajtok tijmachtiaj, amo ma timoyolkokokaj yon ma tijkuesiuilikaj tlaj ayamo tlaneltoka. Moneki tijnextisej tijpiaj toyolo, kej kinextia se milchijketl (Sant. 5:7, 8).

14. ¿Tlake neskayotl kinextia kemantika maseualmej amo nima techtlakakiliaj?

¹⁴ Ipan se keski altepemej, kemantika pano miak xiuitl uan amo aka techtlakakilia. Ma tikitakaj tlen kinpanok omej siuaiknimej, Gladys uan Ruby Allen, tlen Canadá. Ipan 1959, kintitlankej ma tlatekipanotij kej precursoras especiales ipan se pilaltepetsi tlen Quebec. * Maseualmej tlauel kinmakasiyayaj sacerdotes tlen nopa Iglesia católica, uan nojkia kintekipachouayaya tlake kiijtoskiaj sekinok. Gladys kiijtoua: “Ipan ome xiuitl, mojmostla titlajtolmoyauayayaj kajkalpa se ocho horas uan amo aka techtlakakiliyaya. San tlachiayayaj ipan ventana uan nima kaltsakuayayaj. Maske kiampa kichiuayayaj, tojuantij nojua titlajtolmoyajkej”. Teipa, maseualmej kipatlakej kej moiljuiyayaj, uan sekij pejkej techtlakakiliaj. Nama, ipan nopa altepetl onka eyi tlanechikoli (Is. 60:22).

15. ¿Tlake techmachtia 1 Corintios 3:6, 7 kema tijpaleuiaj se akajya ma mochiua Cristo itokilijka?

¹⁵ Kema se akajya mochiua Cristo itokilijka moneki miakej tlapaleuisej. Nochi tlanechikoli tlapaleuiaj uan kiampa  moatsonpoliuiltia se akajya (xijpoua 1 Corintios 3:6, 7). Kemantika uelis se toikni kimaka se pilamatsi o se pilamochtsi se maseuali katli kuali kitlakakilik. Teipa, nopa toikni amo ueli sampa kipaxaloua ipan nopa tonali kema mokajkej, uan yeka kiiljuia seyok toikni ma kipaxalo. Nama ni toikni peua kimachtia nopa maseuali uan kintlaneui sekinok toikniuaj ma tlamachtikaj iuaya, uan nochi kipaleuiaj. Nochi toikniuaj katli iuaya tlamachtiaj, kipaleuiaj nopa maseuali ma kineltoka tlen melauak. Kiampa kej Jesús kiijtok, katli toka uan katli pixka, sansejko yolpakij (Juan 4:35-38).

16. ¿Tlake mitspaleuis nojua tiyolpakis titlajtolmoyauas maske uelis timokokoua o ayokmo tijpia chikaualistli?

¹⁶ Tlaj ta ayokmo tlauel tiueli titlajtolmoyaua yon tikinmachtia sekinok pampa timokokoua o ayokmo tijpia chikaualistli, uelis tiyolpakis ika tlen kena ueli tijchiua. Ma tikitakaj tlen panok kema David uan itlateuijkauaj kinteuijkej amaleqeuanij pampa kinichtekilijtoyaj ininchampoyouaj uan sekinok tlamantli. Doscientos tlakamej ayokmo yajkej tlateuiaj pampa tlauel siajtoyaj, yeka mokajkej kimokuitlauiaj tlen eliyaya ininaxka. Teipa, David kiijtok tlen kitlankej nochi kinmajmakaskiaj maske sekij ayokmo yajkej tlateuitoj (1 Sam. 30:21-25). Ipan ni tonali, nojkia kiampa pano kema tijpaleuiaj se akajya ma mochiua Cristo itokilijkaj. Nochi katli tijtekipanouaj Jehová ika nochi toyolo, maske ayokmo ueli tijchiuaj miak tlamantli, uelis tiyolpakisej kema se maseuali mochiua se Cristo itokilijkaj, uan kiampa uelis kiselis nemilistli tlen axkema tlamis.

17. ¿Kenke kinamiki tijtlaskamatilisej Jehová?

¹⁷ Tlauel tijtlaskamatiliaj Jehová pampa ya kipatiita tlen tijchiuaj. Ya kuali kimati tojuantij amo uelis tijchiuasej se akajya ma mochiua se Cristo itokilijkaj. Yeka, san mosentlalia kema tijchiuaj kampeka kuali titlajtolmoyauasej uan tijchiuasej kej kinamiki, uan ya techteochiua. Nojkia, techmachtia uelis tiyolpakisej ika tlen kena tiuelij tijchiuaj (Juan 14:12). Yeka, nochipa ma tikilnamiktokaj: ¡Jehová nochipa kuali kiitas tlen tijchiuaj tlaj amo tijkuesiuiliaj toteki!