1. ¿Keyej semi tiyolpakij tiitaixpantijkauan Jiova?

¡SEMI tiyolpakij porin tiitaixpantijkauan Jiova! Timoteixmatiltiaj ika itokay uan tiknextiaj ke tiitaixpantijkauan keman tikinmatiltiaj oksekin akoni yejuatsin uan keman tikinmachtiaj. Semi techyolpaktia tikpaleuiskej maj mochiua itekitikauj Jiova ‘akin kiyolnejneki kiselis tein melauak tein kichiua maj se nemi nochipaya’ (Hech. 13:48, TNM). Timomachiliaj kemej Jesús, akin moyolpaktij “ika in uelilis den [y]ektikatsin [e]spíritu” keman imomachtijkauan kitapouijkej nochi tein kuali tein kinpanoka keman kiteixmatiltitoj iTajtol Dios (Luc. 10:1, 17, 21).

2. ¿Keniuj tiknextiaj ke semi moneki tikteixmatiltiskej tein Biblia tamachtia?

² Tiitaixpantijkauan Jiova tikitaj ke semi moneki tikteixmatiltiskej tein Biblia tamachtia. Tatitanil Pablo kiyolmajxitij Timoteo: “Xikita ox kuali timonejnemiltijtok uan ox kuali titamachtijtok”. Uan no kiluij: “Ijkon timomakixtis tejua uan no tikinmakixtis akin mitskakij” (1 Tim. 4:16, TNM). Nejin tajtolmej kinextiaj ke tein tikteixmatiltiaj uelis kinmakixtis taltikpakneminij. Kemej tikteixmatiltiaj iTekiuajyo Dios tein techixyekanas ‘tikitaj ox kuali timonejnemiltijtokej’. Nochipa tiknekij tikchiuaskej tein kiueyitalis Jiova uan tein kinextis ke tikneltokaj tein tikteixmatiltiaj (Filip. 1:27). Uan ‘tikitaj ox kuali titamachtijtokej’ keman kuali timomachtiaj achto ke titanojnotsatiuij uan keman tiktajtaniaj Jiova maj techpaleui keman tikteixmatiltiaj iTajtol.

3. ¿Toni kichiuaj seki taltikpakneminij keman tikinnojnotsaj ika Biblia? Xikonijto se neskayot.

³ Sayoj ke maski semi timochikauaj tikteixmatiltiskej tein Biblia  tamachtia, akin tikinnojnotsaj xa amo semi kinekij techkakiskej oso senkis techixtopeuaj. Maj itech titanemilikan ineskayo tokniuj takat Georg Lindal, akin iselti tanojnotsak itech altepet Islandia itech xiujmej 1929 hasta 1947. Miakej taltikpakneminij kinmakak amaixmej, sayoj ke nion akin mochiuak itaixpantijkauj Jiova. Tokniuj kijkuiloj: “Sekin senkis kiixtopeuaj tein Biblia tamachtia, sayoj ke miakej sayoj amo kiuelkakij”. Satepan, ompa tapaleuitoj seki misioneros. Maski ijkon, taltikpakneminij kisentokayaj amo kuali tanankiliayaj. Hasta chiknaui xiujmej satepan, seki taltikpakneminij motemaktijkej iuan Jiova uan moauijkej. *

4. ¿Keniuj xa timomachiliaj keman taltikpakneminij amo kinekij techkakiskej?

⁴ Keman taltikpakneminij amo kinekij techkakiskej, amo kuali timomachiliaj. Xa timomachiliaj kemej Pablo, akin kijtoj ke semi motayokoltiaya uan semi moyolkokouaya porin miakej judíos amo kinekkej kineltokaskej ke Jesús katka Mesías (Rom. 9:1-3). Maj tiknemilikan ke tikmachtiaj ika Biblia se taltikpaknenkej, sayoj ke maski semi timochikauaj uan tiktataujtiaj Jiova maj kipaleui, amo kichiua tein momachtia uan yejua ika moneki tikauaskej, oso maj tiknemilikan ke amo tikpaleuianij nion akin maj moaui, ¿kijtosneki ke amo tikyekchiujtokej totekiuj uan ke Jiova xa amo techtatiochiuijtok? Itech nejin tamachtilis tiknankiliskej nejin ome netajtanilmej: ¿Toni kinextia ke kuali tikchiujtokej totekiuj? Uan ¿toni moneki tikelnamikiskej keman tikteixmatiltiaj iTajtol Dios?

5. ¿Keyej tein tikchiuaj itech itekiyo Jiova amo nochipa kuali kisa?

⁵ Biblia kijtoua ke taltikpaknenkej akin kichiua tein Dios kiyolpaktia “kuali kisas nochi tein kichiuas” (Sal. 1:3). Sayoj ke nejon amo kijtosneki ke nochi tein tikchiuaskej itech itekiyo Jiova kuali kisas, porin kemej tinochin titajtakolejkej uelis tikpiaskej kuejmolmej tein amo tikchiayaj oso oksekin uelis kichiuaskej maj tikpiakan (Job 14:1). Uan no, akin techtauelitaj xa kichiuaskej maj amo ueli titanojnotsakanok kemej ipa tikchiuaj (1 Cor. 16:9; 1 Tes. 2:18). Maj tikitakan itech Biblia seki taman tein techpaleuis maj tikmatikan toni kinextia iixpan Jiova ke kuali tikchiujtokej tekit tein techmakatok.

6. ¿Keniuj tikmatij ke iixpan Jiova tikchiujtokej se kuali tekit?

⁶ Jiova kiita ke timochikauaj titanojnotsaskej uan ke amo timosenkauaj. Yejuatsin kiita ke tikchiujtokej se kuali tekit komo tiksentokaj titanojnotsaj uan tikchiuaj ika netasojtalis, maski taltikpakneminij amo techkakiskej. Pablo kijkuiloj: “Dios Yejuatsin Yolmelauaktsin. lka ya nojon Yejuatsin amo keman kelkauatiu de keniu namejuan nanmotekitiltijke para Dios. Uan [...] keniu nankitasojtajtinemij  Dios kuak namejuan nankinpaleuijtiualayaj in taneltokani yolchipauke. Uan namejuan nankinpaleuijtiyoue ok” (Heb. 6:10). Jiova amo kielkaua tekit tein tikchiuaj uan netasojtalis tein tiknextiaj, hasta komo amo tikpaleuianij nion se taltikpaknenkej maj moaui. Yejua ika, maj tikelnamikikan tein Pablo kiniluij tokniuan akin nemiaj Corinto: “Amo nenkajtis nochi namotekiu ten nankichiutinemiske” (1 Cor. 15:58). Uan nejin melauj, maski tekit tein tikchiuaskej amo kisas kemej tikchiayaj.

7. ¿Toni techmachtia tein kijtoj tatitanil Pablo keman sekin kijijtojkej?

⁷ Tatitanil Pablo katka se kuali misionero uan tapaleuij maj moajsinij yankuik nechikolmej itech miak xolalmej. Maski ijkon, keman sekin kijijtojkej uan kijtojkej ke amo kuali tamachtiaya, amo motenpaleuij uan kijtoj kanachimej kinpaleuijka maj moauianij, ta sayoj kijtoj: “Nejua kachi ok nitekititinemi” (2 Cor. 11:23). Ijkon kemej Pablo, maj tikelnamikikan ke Jiova okachi kiita ke timochikauaj titanojnotsaskej uan ke amo timosenkauaj.

8. ¿Toni moneki tikelnamikiskej ika tekit tein tikchiuaj?

⁸ Keman titanojnotsaj tikyolpaktiaj Jiova. Se tonal, Jesús kintitanik 70 imomachtijkauan maj kiteixmatiltitij iTekiuajyo Dios. Uan Biblia kijtoua ke “mokuepke [...] de nintanojnotsalis ika ueyi pakilis”. ¿Keyej semi yolpakiaj? Yejuan kijtojkej: “Hasta ne amokuali ejekame techtakamatiaj ika in chikaualis de motokaytsin”. Sayoj ke Jesús kiniluij: “Amo ximoyolpaktikan sayo porin in amokuali ejekame namechtakamatij san. Ta, kachi ok moneki ximoyolpaktikan porin Totajtsin Dios kijkuiloj ya namotokay ya tech ilista nepa eluiyaktsinko” (Luc. 10:17-20). Jesús kimatia ke amo nochipa kuali kinyaskia itech tanojnotsalis. Tein melauj, amo tikmatij kanachimej akin kinkakkej nejon tonal satepan mochiujkej itatojtokakauan Cristo. Imomachtijkauan Jesús monekia yolpakiskej porin Jiova kiyolpaktiaya tein kichiuayaj, uan amo sayoj porin taltikpakneminij kuali kinkakiaj.

9. Kemej kijtoua Gálatas 6:7-9, ¿toni tikseliskej komo tiksentokaj titanojnotsaj?

⁹ Komo tiksentokaj titanojnotsaj, uelis tinemiskej nochipaya. Keman timochikauaj tikteixmatiltiskej iTajtol Dios uan titamachtiskej, no timoyekanaj ika espíritu porin tikauaj maj iyektikatsin espíritu Dios techpaleui itech tonemilis. “Komo amo tisiouij”, Jiova kijtoua ke tinemiskej nochipaya, hasta komo amo ueli tikpaleuiaj nion se taltikpaknenkej maj moaui (xikonixtajtolti Gálatas 6:7-9, TNM).

10. ¿Keyej seki taltikpakneminij kuali techkakij uan sekin amo?

¹⁰ Taltikpakneminij kiixpejpenaj ox techkakiskej oso amo. Jesús kinextij ke melauj nejin keman ika tajtoj se takat akin kitokak tatet itech tataman tal, sayoj ke kitemakak takilot tatet tein uetsik itech kuali tal (Luc. 8:5-8). Jesús kijtoj ke ininyolo taltikpakneminij kemej yeskia nejon tataman tal, porin tataman kemej tanankiliaj keman kikakij “Tajtoltsin de Dios” (Luc. 8:11-15). Ijkon kemej takat akin tatoka amo ueli kichiua maj kitemaka takilot nochi tein kitoka, tejuan no amo ueli tikchiuaj maj tamachtilis tein kipia Biblia ajsi itech ininyolo nochin akin techkakij. Tejuan moneki tiksentokaskej tikteixmatiltiskej iTajtol Dios. Kemej kijtoj tatitanil Pablo, “Totajtsin Dios kintaxtauis sejse ijkon keme yejuan motekitiltijke”. Yejuatsin amo kiitas ox uelik tikpaleuijkej aksa maj moaui (1 Cor. 3:8).

11. ¿Keyej Jiova kiyolpaktij tekit tein kichiuak Noé itech tanojnotsalis maski taltikpakneminij amo kikakkej? (Xikonita taixkopin ipeujyan amaix).

¹¹ Ijkon kemej panouanij xiujmej, miakej itekitikauan  Jiova kiteixmatiltianij iTajtol, sayoj ke amo kinkakinij. Kemej neskayot, Noé “tanojnotstinemia ika ten melauak tajtoltsin” xa kemej 40 oso 50 xiujmej (2 Ped. 2:5). Noé xa kichiaya maj taltikpakneminij kikakinij, sayoj ke Jiova amo kiajsikamatiltij ke panoskia nejon, ta keman kiluij maj kichijchiuani arca, kinauatij: “Moneki tikalakis itech arca iniuan mokoneuan, mosiuatsin uan mosiuamouan” (Gén. 6:18). Uan Noé xa kiajsikamatik ke amo miakej kikakiskiaj, porin keman Jiova kiluij keniuj chijchiujtoskia arca xa kiitak ke amo miakej akiskiaj (Gén. 6:15). Uan ijkon panok, porin nion se taltikpaknenkej kikakik Noé (Gén. 7:7). ¿Kinemilij Jiova ke Noé amo kuali kichiujka itekiuj? Amo. Yejuatsin kiitak ke tekit tein Noé kiselijka kuali kisak porin kichiuak ijkon kemej yejuatsin kinauatijka (Gén. 6:22).

12. ¿Toni kipaleuij Jeremías maj kisentokani tanojnotsani ika yolpakilis maski taltikpakneminij amo kinekkej kikakiskej uan semi kiixnamikkej?

¹² Tanauatijkej Jeremías no tanojnotsak panoua 40 xiujmej maski taltikpakneminij amo kinekkej kikakiskej uan semi kiixnamikkej. Kemej kiuijuikaltiayaj uan kipijpinaujtiayaj kinekia mosenkauas uan amo tanojnotsasok (Jer. 20:8, 9). Sayoj ke amo mosenkauak. ¿Toni kipaleuij maj kisentokani tanojnotsani ika yolpakilis? Itech tanemilij ome taman tein semi moneki. Yekinika, ke tein kiteixmatiltiaya ueliskia kinpaleuis taltikpakneminij maj kichianij kuali nemiskej satepan (Jer. 29:11). Uan ojpatika, ke Jiova kiixpejpenka maj kiteixmatiltiani itokay (Jer. 15:16). Tejuan no tikinmatiltiaj taltikpakneminij ke uelis kichiaskej kuali nemiskej satepan, uan tikteixmatiltiaj itokay Jiova porin tiitaixpantijkauan. Keman itech titanemiliaj nejin ome taman, tiksentokaj titanojnotsaj ika yolpakilis maski taltikpakneminij amo techkakij.

13. ¿Toni techmachtia neskayot tein moajsi itech Marcos 4:26-29?

¹³ Se taltikpaknenkej yolik peua takuaujtamati. Jesús tamachtij nejin itech neskayot kampa ika tajtoj se takat akin tatoka uan kochi (xikonixtajtolti Marcos 4:26-29). Satepan ke tatokak amo uelik kichiuak maj itatok ijsiujka moskaltiani, ta yolik moskaltijtiaj. No ijkon, akin tikmachtiaj xa amo niman peuas kichiuas tein momachtia porin yolik peua takuaujtamati. Ijkon kemej tatokkej amo ueli kichiua maj ijsiujka moskalti tein kitokak, tejuan amo no ueli tikchiuaj maj akin tikmachtiaj ijsiujka peua takuaujtamati. Yejua ika, maj amo timosenkauakan komo akin tikmachtiaj amo niman kiixtalia kitekitilis Jiova. Moneki timochiaskej uan amo tiyolijsiuiskej (Sant. 5:7, 8).

14. ¿Katiyejua neskayot kinextia ke uelis panos miak xiujmej achto ke taltikpakneminij peuas techkakiskej?

¹⁴ Itech seki xolalmej, tokniuan miak xiujmejya tanojnotsanij uan amo akin mochiua itekitikauj Jiova. Maj tikitakan tein kinpanok Gladys uan Ruby Allen, akin iknimej uan kayomej Canadá. Itech xiuit 1959 tapaleuitoj kemej precursoras regulares itech se xolal tein moajsi Quebec. * Taltikpakneminij kinmouiliayaj tiopixkamej uan tein kijtoskiaj oksekin, yejua ika amo kinkakiaj. Gladys kielnamiki: “Ome xiujmej mojmostaj titanojnotskej kajkalpan chikueyi horas uan amo akin technankiliaya. Taltikpakneminij technalitayaj, uan keman kiitayaj ke tejuan, amo tatapouayaj. Sayoj ke amo timosenkaujkej”. Satepan taltikpakneminij mopatakej uan peuak kinkakij tokniuan. Axkan moajsij eyi nechikolmej ompa (Is. 60:22).

15. ¿Toni techmachtia tein kijtoua 1 Corintios 3:6, 7?

¹⁵ Miakej tapaleuiaj maj se taltikpaknenkej  mochiua itatojtokakauj Cristo. Nochin tokniuan itech nechikol uelis tapaleuiskej maj akin momachtijtok Biblia moaui (xikonixtajtolti 1 Corintios 3:6, 7). Kemej neskayot, se tokniuj xa kikauilij se tratado oso se revista se taltikpaknenkej akin kuali kikakik. Sayoj ke kiita ke amo uelis oksepa kikalpanos, yejua ika kiluia okse tokniuj maj kikalpano. Nejin tokniuj peua kimachtia ika Biblia uan kinyoleua okseki tokniuan takamej uan siuamej maj iuan yakan keman kimachtiti, uan sejse tokniuj tataman kemej kiyolchikaua akin momachtijtok. Nochin nejin tokniuan kipaleuiaj maj mochikaua itakuaujtamatilis. Yejua ika, nochin uelis yolpakiskej keman taltikpaknenkej moauis, porin nochin tapaleuijkej. Ijkon kemej kijtoj Jesús, akin tatoka uan akin kiteki takilot uelis yolpakiskej (Juan 4:35-38).

16. ¿Keyej uelis tionyolpakis ika tein tikonchiua itech tanojnotsalis maski tionmokokoua oso amo semi tikonpiaok chikaualis?

¹⁶ Komo tejuatsin amo semi ueli tiontanojnotsaok nion tiontamachtiaok kemej achto porin tionmokokoua oso porin amo semi tikonpiaok chikaualis, uelis tionyolpakis ika tein ueli tikonchiua itech tanojnotsalis. Maj tikitakan tein panok keman seki tachtekinij amalequitas kinkuilijkej David uan takamej akin iuan yajtinemiaj nochi tein kipiayaj uan kinuikakej ininchankauan. Doscientos takamej semi sioujtoyaj uan amo uelik yajkej keman kintojtokakej nejon tachtekinij, yejua ika kinkaujteujkej maj tajpiakan. David uan takamej akin iuan yayaj kintankej amalequitas uan David kijtoj ke tein kinkuilijkej nochin kinxejxelouiliskiaj, hasta akin amo yajkaj (1 Sam. 30:21-25). Axkan no ijkon panoua ika tekit tein tikchiuaj itech tanojnotsalis. Maski xa amo semi ueli titanojnotsajok nion titamachtiajok kemej achto, komo timochikauaj tikchiuaskej nochi tein tiueliskej, uelis tiyolpakiskej keman se taltikpaknenkej kiixmati Jiova uan moauia.

17. ¿Keyej uelis timotasojkamatiskej iuan Jiova?

¹⁷ Tiktasojkamatiliaj Jiova porin kipatiuita tekit tein tikchiuaj. Yejuatsin kimati ke amo ueli tikchiuaj maj se taltikpaknenkej techkaki oso maj peua kitekitili, sayoj ke kiita ke semi timochikauaj uan ke tikchiuaj ika netasojtalis, yejua ika techtatiochiuia. No techmachtia maj tiyolpakikan ika tein ueli tikchiuaj itech tanojnotsalis (Juan 14:12). Uelis titakuaujtamatiskej ke tikyolpaktiskej Dios komo amo timosenkauaj.