1. ¿Tleka tiyolpakij tiiTlaixpantijkauan Jehová?

TIYOLPAKIJ tiyetoskej tiiTlaixpantijkauan Jehová uan se ueyi tlateochiualistli tikinpaleuiskej oksekimej ma kixmatikan toTajtsin Dios. Noijki tikinpaleuiaj akinmej kinekij kitekichiuiliskej uan kinekij yoltoskej nochipa (Hech. 13:48). Tejuan timomachiliaj ken Jesús, iespíritu santo Jehová okipaleui uan ye oyolpakik ijkuak imachtijkauan okiluijkej tlen okinpanok ijkuak otetlapouitoj (Luc. 10:1, 17, 21).

2. ¿Ken tikteititiaj tikpatioitaj titetlapouiskej?

² Tejuan sapanoua tikpatioitaj titetlapouiskej. Apóstol Pablo okilui Timoteo: “Ximotlachili te monewia iwa kuali xikita tlan tiktemachtia, iwa ayik ximosojsotlawa”. Noijki okilui: “Tla ijkó tikchiwas, amo san te timomakixtis, yej noiwa momakixtiskeh akimeh mitskakiskeh” (1 Tim. 4:16). Nin techititia miakej uelis momakixtiskej. Nochipa timochijchikauaj tikpiaj kuali tonemilis porque tiktematiltiaj iTekiuajkayo toTajtsin Dios. Nochipa tiknekij tikchiuaskej tlen ma kiueyichiua Jehová uan tlen ma kiteititi tlen ye kichiuas (Filip. 1:27). Uan kuali timoyektlaliaj uan tiktlatlaujtiaj Jehová ma techpaleui para kuali titetlapouiskej.

3. ¿Tlen kichiuaj miakej ijkuak titetlapouiaj?

³ Maski timochijchikauaj titetlapouiaj xamo miakej amo kinekij techkakiskej. Ma tikitakan tlen okipanok tokni Georg Lindal, ompa Islandia opejki iselti tetlapouia 1929 hasta 1947. Okintemakak miak amatlajkuilolmej pero amikaj omochi iTlaixpantijka Jehová.  Ye okijto: “Miakej techixnamikij porque titetlapouiaj uan oksekimej amo kinekij techkakiskej porque amo kinpaktia”. Satepan oajsitoj tokniuan tlen omomachtitoj ompa Patterson, yejuan noijki otetlapouijkej miak xiuitl pero amikaj okinkak. Opanok chiknaui xiuitl uan ijkuakon sekimej omotemakakej ixpan Jehová uan omoapolaktijkej. *

4. ¿Xamo ken timomachiliaj ijkuak oksekimej amo kinekij techkakiskej?

⁴ Timoyolkokouaj ijkuak oksekimej tiknekij tikintlapouiskej tlen kijtoua Biblia uan amo kinekij techkakiskej, xamo techpanoua ken Pablo, ye okijto sapanoua omoyolkokouaya porque judíos amo okineltokayaj Jesús okatka Mesías (Rom. 9:1-3). Xamo ikaj tikmachtiaj, timochijchikauaj kuali tikititiaj tlen kijtoua Biblia uan nochipa tiktlatlaujtiaj Jehová ma kipaleui pero tikitaj amo kichiua tlen momachtia uan satepan tikitaj ayakmo moneki tikmachtiskej. Xamo akinmej otikinmachtijkej amikaj omoapolakti, ¿tikijtoskiaj tejuan totlajtlakol uan Jehová amo techteochijtok? Itech nin tlamachtil tikitaskej ome tlamantli: ¿Ken tikmatij ijkuak titetlapouiaj tikchiuaj tlen kuali? ¿Tlen moneki tikmatoskej ijkuak titetlapouiaj?

5. ¿Tleka ijkuak tiktekichiuiliaj Jehová amo panoua ijkon ken tejuan tiknekij?

⁵ Ijkuak ikaj kichiua tlen toTajtsin Dios kineki, Biblia kijtoua: “Nochi tlen kichiuas kuali kisas” (Sal. 1:3). Pero non amo kijtosneki panos ken tejuan tiknekij porque tinochtin titlajtlakolejkej uan non kichiua ualeua ma titlajyouikan (Job 14:1). Xamo akinmej techkokoliaj amo techkauiliskej ma titetlapouikan (1 Cor. 16:9; 1 Tes. 2:18). Ik non, ¿ken kita Jehová ijkuak titetlapouiaj? Ma tikitakan seki principios bíblicos.

6. ¿Ken tikmatij Jehová kiyolpaktia titetlapouiaj?

⁶ Jehová kita ijkuak timochijchikauaj uan titlaxikouaj. Ye kiyolpaktia ijkuak titetlapouiaj, timochijchikauaj uan techpaktia, maski sekimej amo kinekiskej techkakiskej. Apóstol Pablo okijto: “ToTajtsin Dios yolmelauak, ik non, amo kilkauas tlen onankichijkej uan onankiteititijkej nankitlasojtlaj itoka porque onankinpaleuijkej uan nankinpaleuijtokej akinmej santos” (Heb. 6:10). Jehová nochipa kilnamiki timochijchikauaj uan tiktlasojtlaj, maski amo ma moapolakti akin tikmachtiaj. Noijki techpaleuis tlen Pablo okinmilui tokniuan tlen ochantiayaj Corinto, ye okijto: “Tekitl non tiksepanchiwah,  amo sanenka” (1 Cor. 15:58). Maski amo panoua ken otiknekiayaj, Jehová kiteochiua tlen tikchiuaj.

7. ¿Tlen techmachtia tlen okijto apóstol Pablo?

⁷ Apóstol Pablo kuali otetlapoui uan kuali otlamachti, ik non, miakej oualmonechikojkej itech miakej altepemej. Ye amo okijto keski okinpaleui ma moapolaktikan sekimej okitenejkej, okijtojkej amo kuali otlamachtiaya. Ye okijto: “Ne okachi yonitekitik” (2 Cor. 11:23). Ma tikchiuakan ken Pablo uan ma tikilnamikikan Jehová kipatioita ijkuak timochijchikauaj uan titlaxikouaj.

8. ¿Tlen moneki tikilnamikiskej?

⁸ Jehová yolpaki tiktekichiuiliaj. Se tonal Jesús okintitlanki 70 imachtijkauan ma titetlapouitij tlen kichiuas iTekiuajkayo toTajtsin Dios. Biblia kijtoua sapanoua oyolpakej. ¿Tleka? Yejuan okijtojkej: “Espíritus amokualteh techtlakitah ijkuak [tikijtouaj] Motoka”. Pero Jesús okinmilui: “Amo xipakikah porke nomechtlakitah n espíritus amokualteh, yej xipakikah porke nomotokah ya ijkuilitok ilwikak” (Luc. 10:17-20). Jesús okimatiaya amo nochipa kinkakiskiaj. Noijki amo tikmatij keski okinkakej uan opejkej kichiuaj ken Cristo. Imachtijkauan Jesús omonekiaya yolpakiskej maski amo kinkakiskiaj ijkuak tetlapouiskiaj. Noijki omonekiaya kilnamiktoskej ijkon okiyolpaktiayaj Jehová.

9. Ijkon ken kijtoua Gálatas 6:7-9, ¿tlen panos tla nochipa titetlapouiaj?

⁹ Tla nochipa titetlapouiaj, Jehová kichiuas nochipa ma tiyoltokan. Ijkuak timochijchikauaj titetlapouiaj uan titlamachtiaj tlen toTajtsin Dios kichiuas, tikkauiliaj iespíritu santo ma techyekana. Tla amo timosotlauaj, Jehová techiluia nochipa tiyoltoskej maski amo ma moapolaktikan akinmej tikinmachtiaj (xiktlajtolti Gálatas 6:7-9).

10. ¿Tleka sekimej techkakij ijkuak titetlapouiaj uan tleka oksekimej amo?

¹⁰ Akinmej kipiaj kuali inyolo techkakiskej. Jesús non okiyekijto ijkuak okijto se tlakatl okitokak semillas itech tlatlamantli tlali pero san okitemakak itlakilo tlen okitokak itech kuali tlali (Luc. 8:5-8). Jesús okijto non tlatlamantli tlali kineskayotia inyolo akinmej tikintlapouiaj porque tlatlamantli tlanankiliaj (Luc. 8:11-15). Ijkon ken akin otlatokak amo okimatiaya kox tlamochiuaskia, tejuan noijki amo tikmatij kox moapolaktiskej akinmej tikinmachtiaj. Pero moneki nochipa titetlapouiskej uan tikinmachtiskej oksekimej tlen kichiuas iTekiuajkayo toTajtsin Dios. Apóstol Pablo okijto toTajtsin Dios ‘techtlaxtlawis ijkó kemi otitekipanojkej’ uan amo porque miakej otikinpaleuijkej ma moapolaktikan (1 Cor. 3:8).

11. ¿Tleka Noé okiyolpakti Jehová maski amo okikakej ijkuak otetlapoui? (Xikita dibujo tlen kajki itech página 1).

¹¹ Itekipanojkauan Jehová yimiak xiuitl yotetlapouijkej maski miakej amo kinekij kinkakiskej. Xamo Noé otetlapoui miak xiuitl (2 Ped. 2:5). Xamo omokuayejyekouaya kikakiskiaj pero Jehová amo okilui ijkon panoskia. Ijkuak okilui ken kichijchiuaskia arca okilui: “Xikalaki itech arca inuan motelpochuan,  mosiua uan mosiuamonuan” (Gén. 6:18). Ijkuak okilui ken ik ueyi kichijchiuaskia arca, xamo okajsikamatki amo miakej kikakiskiaj (Gén. 6:15). Uan ijkon opanok, amikaj okikak (Gén. 7:7). ¿Jehová okijto amo kuali otetlapoui Noé? Amo. Noé okiyolpakti Jehová porque nochipa okichi tlen ye okilui (Gén. 6:22).

12. ¿Tlen okipaleui Jeremías ma yolpaki ijkuak otetlapouiaya maski amo okikakej?

¹² Profeta Jeremías noijki otetlapoui kanaj 40 xiuitl maski miakej amo okikakej uan okixnamikej. Okipinauijkej uan okiuijuikaltijkej, ik non, omoyolkoko uan okijto ayakmo tetlapouiskia (Jer. 20:8, 9). ¿Tlen okipaleui ma yolpaki uan ma tetlapoui? Se: Tlen otetlapouiaya Jeremías okiteititiaya satepan toTajtsin Dios ‘kinmakaskia tlen okachi kuali’ israelitas (Jer. 29:11). Ome: Jehová okipejpenki Jeremías para ma kitematilti itoka (Jer. 15:16). Tejuan noijki miakej tikintlapouiaj tlen kichiuas toTajtsin Dios uan noijki tikinmatiltiaj itoka porque tiiTlaixpantijkauan Jehová. Ijkuak timokuayejyekouaj non ome tlamantli okachi tiyolpakij titetlapouiaj maski amo kinekij techkakiskej.

13. ¿Tlen techmachtia tlen okijto Jesús itech Marcos 4:26-29?

¹³ Ikaj amo san niman tlaneltoka. Jesús ijkon okiteititi ijkuak okijto tlakatl tlen otlatokak okochki (xiktlajtolti Marcos 4:26-29). Ijkuak okintokak semillas amitlaj ueli okichi para san niman ma ixua. Noijki ijkon akin tikmachtiaj amo san niman kichiua tlen momachtia porque non yolik peua kichiua. Ijkon ken akin tlatoka amo uelis kichiuas san niman itlaj ma ixua, noijki ijkon tejuan amo uelis tikchiuaskej ika san niman ma kichiua tlen tikmachtiaj. Ijkon ken akin tlatoka moneki mochias para ma ixua tlen okitokak, tejuan noijki moneki timochiaskej para akin tikmachtiaj ma kineki ma moapolakti uan ma kitekichiuili Jehová (Sant. 5:7, 8).

14. ¿Tlen techititia tlen okinpanok tokniuan?

¹⁴ Itech seki altepemej panoua miak xiuitl para ikaj ma moapolakti. Ma tikitakan tlen okinpanok ome iknimej Gladys uan Ruby Allen. Itech 1959 okintitlankej Quebec, altepetl Canadá, ma tlapaleuitij ken precursoras regulares. * Miakej tlen ompa ochantiayaj amo okinkakiayaj porque teopixkej okinmojtiayaj uan oksekimej tlen ik ompa ochantiayaj. Tokni Gladys okijto: “Ome xiuitl otitetlapouijkej nochi tonal tekalijtik uan amikaj otechkak. Sekimej san otechitayaj itech ventana uan otlatsakauayaj pero tejuan nochipa otitetlapouijkej”. Satepan yolik opejkej techkakij uan axkan itech non altepetl katej eyi tlanechikolmej (Is. 60:22).

15. ¿Tlen techmachtia tlen kijtoua 1 Corintios 3:6, 7?

¹⁵ Moneki tinochtin ikaj tikpaleuiskej ma moapolakti. Yotikijtojkej tinochtin akinmej san sekan timonechikouaj uelis tikpaleuiskej ikaj ma moapolakti (xiktlajtolti 1 Corintios 3:6, 7). Xamo se tokni kikajteuilia se revista noso se amatsintli ikaj tlen okachi kineki kimatis. Pero satepan amo ueli oksepa kitlapouiti, ik non, kiluia se tokni  ma kitati. Non tokni peua kimachtia uan kinyoleua oksekimej tokniuan iuan ma tlamachtiti uan sejse tokni kiyolchikaua akin kimachtia uan kipaleuia ma ajsi itech iyolo tlen kijtoua Biblia. Ijkon nochtin tokniuan akinmej kipaleuiaj uelis yolpakiskej ijkuak moapolaktia akin kimachtiaj. (Juan 4:35-38).

16. ¿Tleka tejuatsin ok uelis tiyolpakis maski ayakmo tichikajtok noso timokokoua?

¹⁶ Tla tejuatsin ayakmo ueli titetlapouia porque ayakmo tichikajtok noso timokokoua ok uelis tiyolpakis porque ok titlapaleuia. Ma tikitakan tlen okipanok tekiua David iuan isoldados. Yejuan okintlanilijkej amalequitas porque nochi okintlachtekilijkej uan okinuikakej infamilias. Doscientos tlakamej osotlauayaj uan amo inmiuan omoteuitoj, ik non, omokajkej para kimaluiskej tlen okipiayaj. Ijkuak omokopatoj, David okijto nochtin ma kinxexelilikan tlen okiualikayaj (1 Sam. 30:21-25). Ijkon ken yejuan axkan noijki ijkon techpanoua, ijkuak tikinpaleuiaj oksekimej ma kichiuakan ken Cristo. Xamo amo ueli okachi titetlapouiaj pero tla timochijchikauaj, tiyolpakiskej ijkuak ikaj peua momachtia uan moapolaktia.

17. ¿Tleka tiktlasojkamatiliaj Jehová?

¹⁷ Tiktlasojkamatiliaj Jehová porque kiselia ijkuak tiktekichiuiliaj. Ye kimati amikaj uelis tikchiualtiskej ma techkaki nion ma kiueyichiua. Pero ye kita tiktlasojtlaj uan timochijchikauaj tiktekichiuiliaj, ik non, techteochiua. Noijki techititia ken tiyolpakiskej ijkuak titetlapouiaj uan titlamachtiaj (Juan 14:12). Ma tikilnamikikan Jehová nochipa touan yolpakis tla nochipa timochijchikauaj titetlapouiskej.