1. Itusu tino mudakaro wapi?

KWATIRI imudakaro mukuru maningi kuva umwe wo Zvapupu zva Jehovha. Itusu tino zina ra Mwari. Tinovonesa kuti tiri Zvapupu zvake ngo kuita basa ro kucumaera no kubesera vandhu kuti vave vajiji vake. Tinodakara maningi patinokwanisa kubesera mundhu ano “cido co kuwana upenyu hucikaperi,” kuti ave mutendi. (Mabasa o Vapostori 13:48) Tinozwa inga ndi Jesu uwo ‘wakadakara maningi’ vajiji vake povakabudirira pa basa rovakaita.—Ruka 10:1, 17, 21.

2. Tingakhombijisa kudini kuti tinoreremeja basa redu ro kucumaera?

² Tinoreremeja maningi basa ratinoita ro kucumaera. Mupostori Pauro wakavhunja Timoti kuti: “Jingwarirei ushoni pamwepo no majijisiro ako.” Iyena wakaengejera eciti: “Ngo kuita kudaro unozojiponesa iwewe, na vayani vanokupurutana.” (1 Timoti 4:16) Kucumaera kwatinoita kunoponesa upenyu hwo vandhu. Zvecivoneka kuti tinoda kutongwa ngo Umambo hwa Mwari, itusu tinojingwarira pacedu kamare. Tinoita izvi ngo njira inokuja Jehovha mukuzwirana no zvatinocumaera. (Vafiripi 1:27) Tinokhombija kuti ‘tinongwarira majijisiro edu’ ngo kunasa kunasirira patinoenda kocumaera no kukumbira makomborero a Jehovha ticito taita basa iri.

3. Vandhu vangavona kudini masoko atinocumaera? Ipanyi muezaniso.

³ Pikija kuti tinovangisira pa basa redu ro kucumaera, zvingaita kuti vandhu vo mundharaundha mwedu avadakariri kuzwa masoko atinocumaera. Vonanyi muezaniso wa hama George Rindhari vakacumaera vega mu mativi akasiyana-siyana mu nyika yo Israndiya, kuvhira mu makore o 1929 mbhera 1947. Hama iyi yakakovanisa zviuru zvo mabhuku edu asi akuna na umwe wakatendera cokwadi. Iyona yakatara kuti: “Vamweni vainga vecitonyenya cokwadi, kuveni vamweni vainga vacikatoashiri.” Mamisionario amweni akapeja cikora co Giriadhi, akatumihwa kondhono. Pikija zvakadaro, vakaenderera mberi vacikadakariri cokwadi. Asi pasure po makore mafumbhamwe vandhu vanganani  vo ku Israndiya vakajipira kuna Jehovha no kubhabhatijwa. *

4. Tinojizwa kudini vandhu pavanotama kudakarira masoko akanaka atinocumaera?

⁴ Tinosuruvara maningi vandhu pavanotama kuashira masoko atinocumaera. Tingajizwa inga ndi Pauro, uwo “wakasuruvara maningi ecihwajihwa” ngokuti Vajudha vazinji vainga vacikatendi kuti Jesu wainga Mesiya. (Varoma 9:1-3) Kangaije imwimwi muri kuvangisira maningi no kuita mukumbiro ngo pamusoro po mujiji wenyu wo Bhaibheri, asi iyena aaripi kuita ciri cese kuti abudirire motogumira pa kurangarira kuimisa jijoyo. Zvingaitazve kuti imwimwi amuzivi kumbobesera mundhu kuti agume pa kubhabhatijwa. Kureva kuti munodikana kujipa ndava, mecirangarira kuti Jehovha aaripi kukumborera basa renyu ro kucumaera? Pa musoro uno tinozovona mupinguro wo muvhunjo muviri: (1) Ngozvapi zvinoita kuti basa redu ro kucumaera ribudirire? (2) Ngozvapi zvatingavetera patinoenda kocumaera?

5. Ngenyi basa redu ro kucumaera nguva jese aribudirire inga zvataida?

⁵ Bhaibheri rinonanga kudari ngo pamusoro pa wiya anoita kuda ka Mwari: “Bzese bzaanoita” zvinozobudirira. (Nduyo 1:3) Asi izvi azvirevi kuti zvese zvatinoita kuna Jehovha zvinozobuda ngo njira yatinoda kamare. Upenyu hwo vandhu “wakazara ngo matambujiko” ngo ndava yo kutama kukwana kwedu no ko vamweni. (Jobe 14:1) Kunja kwa izvi, vavengi vedu vangakwanisa kutikamisa kucumaera ko cinguva cidoko. (1 VaKorinte 16:9; 1 Vatesaronika 2:18) Waro zvicinyi zvinoita kuti kucumaera ko ari wese kubudirire? Ngatende tivone ndhungamiriro nganani jo Bhaibheri jingatibesera kudavira muvhunjo uwu.

6. Jehovha anovonesa kudini kuti basa redu ro kucumaera riri kubudirira?

⁶ Jehovha anosotesesa kuvangisira kwedu no kutama kwedu kuremba. Jehovha anovona kuti basa redu ro kucumaera riri kunasa kubudirira kudari tikariita ngo kujipira kwese no rudo. Azvinenyi kuti vandhu vamweni vari kurivona kudini. Pauro wakatara kuti: “Mwari asipi mundhu acizivi kururama kuti akanganwe basa renyu no rudo hwamakakhombija ku zina rake, ngo kushandira vakasanwa no kuenderera mberi mecivashandira.” (Vahebheru 6:10) Jehovha anoceukija kuvangisira kwedu no rudo hwedu, pikija basa ratiri kuita ariripi kuva no muviyo waushoni. Ngo kudaro, magama a Pauro ku Vakorinte anoshandavo kwatiri: “Kuvangisira kwamunoita mecishandira Mambo asipi ko mahara.” Izvi ndizvonadi, pikija kuvangisira kwatinonga teciita akuripi kuviisa muviyo jotaida.—1 VaKorinte 15:58.

7. Tinojijenyi ngo zvakananga mupostori Pauro ngo pamusoro po mushando wake?

⁷ Mupostori Pauro wakava misiyonariyo waushoni maningi. Iyena wakabesera kuumba ungano mu madhorobha akasiyana-siyana.  Asi vamweni vaimuphikiza, vecinanga kuti iyena aacaengepi mujijisi waushoni. Kuitira kujijivirira, Pauro aazivi kunanga mutengo wo vandhu vaakabesera kuti vave Makristu. Kunja kwa izvi, iyena wakatara kuti: “Inini ndakashanda maningi.” (2 VaKorinte 11:23) Inga ndi Pauro, tinodikana kuceukija kuti kuna Jehovha cinosisira maningi i kuvangisira no kutama kuremba.

8. Tinodikana kuceukijenyi ngo pamusoro po basa redu ro kucumaera?

⁸ Basa redu ro kucumaera rinodakajisa Jehovha. Jesu wakatumira makumanomwe o vajiji kuti vaende ku fafanya yo kucumaera. Pakupera ko fafanya iyi, ivona “vakaviya vakadakara.” Ngozvapi zvakaita kuti vajiji vadakare? Ivona vakati: “Pikija madhimoni aitizwira ngo kushandisa zina renyu.” Asi Jesu wakarungamisa murangariro wavo eciti: “Mucadakara ngokuti mujimu iri kumuthya. Asi dakaranyi ngokuti mazina enyu atahwa kumatenga.” (Ruka 10:17-20) Jesu waizviziva kuti vajiji vake avacaizobudirira mu basa ro kucumaera nguva jese. Zvokadi itusu atizvizivi kuti vandhu vangana vakazwa masoko akacumaehwa ngo vajiji vakava Makristu. Vajiji avacaidikana kudakara maningi ngo muviyo wo vakava nawo mu basa ro kucumaera. Ivona vaidikana kudakara ngo kuziva kuti kuvangisira kwavainga veciita no kujipira, kwaidakajisa Jehovha.

9. Mukuzwirana no Vagaratiya 6:7-9, ngowapi unozova muviyo kudari tikatama kuremba mu basa redu ro kucumaera?

⁹ Kudari tikatama kuremba mu basa redu ro kucumaera, tinozowana upenyu hucingaperi. Wiya anoshanda ngo mwoyo wese pa basa ro kujijisa no kucumaera masoko akanaka, zvokadi kamare ‘ari kusima mu mujimu.’ Izvi zvinoreva kuti itusu tiri kutendera kuti mujimu wa Mwari ushande mu upenyu hwedu. Kudari “tikatama kuremba,” Jehovha anotigondesa kuti tinozowana upenyu hucingaperi, pikija atizivi kukwanisa kubesera ari wese kuti abhabhatijwe.—Verenganyi Vagaratiya 6:7-9.

10. Manera anoashira vandhu masoko atinocumaera zvinofira papi?

¹⁰ Kuashira kunoita vandhu masoko atinocumaera zvinofira pa zviya zviri mu mwoyo mo vandhuvo. Jesu wakananga izvi pa muezaniso wake wo mukusi wakakusa mbeu jakasiyana-siyana. Asi mu ndau jese jo muezaniso uwu, ndau imwe basi yainga iri ushoni ndiyona yakabara mucero. (Ruka 8:5-8) Jesu wakananga kuti ndau iji jakasiyana-siyana, jinoimirira vandhu vano mwoyo jakasiyana-siyana vaizozwa “soko ra Mwari” ngo njira jakasiyana-siyana. (Ruka 8:11-15) Inga mukusi wiya, apana zvatingaita kuti cokwadi cikure mu mwoyo mo mundhu, izvo zvinofira mu mwoyo mo mundhuwo kamare. Basa guru ratinaro ngo ro kwenderera mberi tecicumaera masoko o Umambo. Zvakadari inga zvakabhuiwa ngo mupostori Pauro uwo wakati: “Mundhu umwe na umwe anozoashira mupfupo wake mukuzwirana no basa rake,” kuciripi ngo muviyo wo basa rake.—1 VaKorinte 3:8.

11. Ngenyi Nowa wakava “mucumaeri wo ururami” anobudirira? (Vonanyi foto yo pa kapa.)

¹¹ Ko makore akawanda, Zvapupu zva Jehovha zviri kucumaera vandhu vacikadi kuzwa masoko edu. Inga muezaniso, Nowa wakava “mucumaeri wo ururami” ko makore anokhwedera kuita makumarongomuna kana makumashanu. (2 Pedhru 2:5) Pacina kukana-kana, Nowa waida kuti vandhu vapurukire, asi Jehovha andizvopi zvaainga akananga kuti zvaizoitika. Kusiyapo zvondhozvo, Mwari paakapa ndhungamiriro kuti Nowa avake ngarava, iyena wakati: “Unofanera kunghwina mu ngarava no vana vako vese, mukaji wako no majinyamwana ako.” (Genesi 6:18) Mwari paakavhunja Nowa  makurire aidikana kuita ngarava, Nowa wakazwisisa kuti vandhu vazinji avacaizomupurukira, ngokuti avacaizokwana mu ngarava iyi. (Genesi 6:15) Inga zvatinoziva, apana no mundhu umwe hake wainga mu nyika iyi yakashata, wakada kupurukira Nowa. (Genesi 7:7) Kureva kuti Jehovha wakavona Nowa kuva wakarembejeka inga mucumaeri wo ururami? Haiwa. Nowa wainga wakagondeka no kuita zvese zvaakavhunjwa kuti aite. Pa meso a Mwari iyena wakava mucumaeri waibudirira.—Genesi 6:22.

12. Muporofita Jeremiya wakawanisa kudini mudakaro mu basa rake ro kucumaera pikija vandhu avacainasa kuashira masoko ake?

¹² Muporofita Jeremiya wakasongana no mugariro wakatojana. Vandhu vo mu nguva yake vainga vacikadi kuzwa zvaainanga, vamweni vakatanga kumuteverera. Pikija zvakadaro, Jeremiya wakacumaera ko makore anopindirija makumarongomuna. Ngo kujizwa inga “cipserujo no cinyangajo” iyena wakaguma pa kusuruvara, wotorangarira kusiya basa raainga akagajwa. (Jeremia 20:8, 9) Asi Jeremiya aazivi kuremba! Zvicinyi zvakamubesera kuti iyena ahwisane no mazwiro aya acikabesi no kuwanazve mudakaro mu basa rake rokucumaera? Iyena wakabatikana pa zviro zviviri zvinosisira maningi. Cokutanga, masoko aaicumaera vandhu aivapa “makore akawanda o ruvetero.” (Jeremia 29:11) Cocipiri, Jeremiya waibhuya ngo zina ra Jehovha. (Jeremia 15:16) Itusu tinovhunja vandhu masoko o vetero no kushandisa zina ra Jehovha inga Zvapupu zvake. Kudari tikabatikana pa zviro zviviri izvi, tinozodakara, azvinenyi kuti vandhu vanoashirisa kudini masoko atinocumaera.

13. Majijenyi ngo muezaniso wa Jesu unowanika pana Marko 4:26-29?

¹³ Zvinotora nguva yakareba kuti mundhu ave no rutendo hwakavanga. Jesu wakajijisa izvi pa muezaniso wake wo mwanarume wakakusa mbeu woenda kovata. (Verenganyi Marko 4:26-29.) Kukura ko mbeu iji jakakuswari ngo mwanarume uwu kwakaitika padoko ngo padoko. Iyena aacaikwanisa kuita ciri cese kuti mbeu iji jikure ngo kukasika. Mukuezana no mwanarume uwu, kangaije imwimwi mungatodikana kuvetera ko mukuvo wakareba kuti mukwanise kuvona muviyo wo basa renyu ro kucumaera. Izvi zvinoitika ngokuti kukura uku kunoitika padoko ngo padoko. Murimi aakwanisi kuita kuti mbeu jake jikure ngo kukasika inga zvaanoda. Mukufananavo, atikwanisi kuita kuti mujiji wedu wo Bhaibheri, akure ngo kukasika ku divi ro umwari inga zvatinoda. Kudari mukavona kuti mujiji wenyu aaripi kuita cinjo ngo kukasika, mucadosuruvara kana kuremba. Inga basa ro kurima, basa ro kubesera vandhu kuti vave vajiji rinoda kusengerera.—Jakobo 5:7, 8.

14. Muezaniso wapi unokhombija kuti zvingatora nguva kuti vandhu vatange kupurukira masoko atinocumaera?

¹⁴ Mu ndima jimweni, zvingatora mukuvo wakareba maningi kuti mundhu agume pa kubhabhatijwa. Vonanyi muezaniso wo hambzaji mbiri jakabahwa mu ndani yondhoyo, Gredhisi na Rubhi Areni. Mu gore ro 1959 ivona vakagajwa kuti vashande inga mapiyona o nguva jese, ku dhorobha dhokowane ro Kebheki, ku Kanadhaa. * Ngo kuthya zvaizonangwa ngo vocigarisano no mapastori o magerejha, vandhu vazinji vo dhorobha iri vairamba kuzwa masoko o Umambo. Gredhisi anoceukija kuti: “Njiku jese taicumaera muzi ngo muzi kuvha mangwanani mbhera madeko ko makore anokwana kuita maviri, asi akuna na umwe hake wakada kuzwa masoko atainga nawo. Vandhu vaiguma pa musuvo vodongorira, perapo vopinda. Asi itusu atizivi kuremba.” Padoko ngo padoko mugariro wo vandhu waicinja. Vamweni vakatanga kudakarira masoko otaicumaera. Nyamasi uno, kondhoyo kuno ungano ndhatu.—Isaia 60:22.

15. 1 VaKorinte 3:6, 7, inotijijisenyi ngo pamusoro po basa ro kuita vajiji?

 ¹⁵ Kuti mundhu agume pa kuva mujiji panodikana besero ro vakawanda. Vese vari mu ungano vangabesera ari wese kuti agume pa kubhabhatijwa. (Verenganyi 1 VaKorinte 3:6, 7.) Inga muezaniso, hama ingapekeja mundhu waidakarira taratadho kana revhista. Perapo yozwisisa kuti aicakwanisi kwenda koita hwiririro mukuzwirana no urongwa hwayo. Ngo kudaro, iyona inokumbira mucumaeri umweni kuti aende koita hwiririro. Mucumaeri anoendaya koita hwiririro anotanga kujija no mundhu endhoo. Pa kufamba ko nguva iyena anokoka hama no hambzaji jakasiyana-siyana kuti vaende vese ku jijo yondhoyo. Umwe nga umwe wavo anovangisa mujiji uwu ngo njira jakasiyana-siyana. Ngo kudaro, hama imwe nga imwe kana hambzaji yakabesera pa kudirijira mbeu iyi yo cokwadi. Mundhu uwu paanobhabhatijwa, vese vakabesera pa jijo iyi vanodakara naiyena.—Johani 4:35-38.

16. Pikija kuti imwimwi amukwanisi kuita zvizinji mu basa ro kucumaera, ngenyi mungava no mudakaro?

¹⁶ Kangaije imwimwi amuna uhomi hwaushoni kana amuna simba rinodiwa kuti muite basa ro kucumaera. Pikija zvakadaro, imwimwi mungadakara ngo zviya zvamunokwanisa kuita. Vonanyi muezaniso wa Mambo Dhavhidhi, iyena no masoca ake vakadikana kuhwisana no Vaamareki kuti vakwanise kuwana mbhuri javo no zviro zvavo zvainga zvakatohwa ndivona. Asi masoca ake anokwana kuita 200 ainga aremba maningi. Ngo kudaro, akasara sure ecingwarira mujiyo. Dhavhidhi no masoca amweni vakakwanisa kuwina pa hondo iyi no kukwanisa kutora zvimweni zvakawanda zvainga no vavengi vavo. Dhavhidhi wakananga kuti zvimweni zvovainga vawana ku hondo, zvaidikana kukovaniswa mu njira yakaezana no vamweni vaingaya vasara vakangwarira mujiyo. (1 Samueli 30:21-25) Ndizvonavo zvinoitika pa basa redu ro kuita vajiji. Azvinenyi dangani taita zvizinji kana taita zvishoma mu basa redu ro kucumaera. Mundhu paanoguma pakuziva Jehovha no kubhabhatijwa, tese tinodakara.

17. Tinodikana kubonga Jehovha ngo pamusoro penyi?

¹⁷ Tinobonga maningi Jehovha ngo njira yaanovona ndiyona basa redu. Iyena anoziva kuti atikwanisi kuvangirija vandhu kuti vapurukire masoko atinocumaera no kuita kuti vave vanamati vake. Asi iyena anosotesesa kuvangisira kwatinoita no rudo hwatinahwo naye. Wozotipfupa ndizvona. Anotijijisazve kuva no mudakaro ngo zviro zvatinokwanisa kuita mu basa ro kucumaera. (Johani 14:12) Tingava no cokwadi co kuti kudari tikatama kuremba, Jehovha anozodakara maningi ngo basa redu.