1. Ohakalala taani ni ekari taani nryaahuno?

HIYAANO ninnahakalala vancipale okhalano ekari yeela ya okhala mmoha a Anamoona a Yehova! Ninnakuxa nsina na Muluku nave ninnooniherya wi na Anamoona awe vaavaa nnapakaahu makupa mmuteko woolaleerya ni waapaka oohuserya. Ninnahakalala vancipale vaavaa nnaweryaahu omukhaviherya muchu ‘yoowo aalakhanyeryiwe waakhela okumi woohimala’ wi akhale mulapeli a Muluku. (Saw. 13:48) Ninniisoona ntoko Yesu, yoowo ‘aahakalanle mwa munepa waweela’ vaavaa oohuserya awe yaakonkaaya mmukipici woolaleerya yoowo yaakhumelenlaaya phaama.—Luka 10:1, 17, 21.

2. Nni nooniherye hai wi ninnavaha esisapo muteko ahu woolaleerya?

² Hiyaano ninnavaha esisapo muteko ahu woolaleerya. Murummwa Paulo aamulopola Timóteo: “Wiikhapelele meekhaa. Okhapelele mahusiheryo.” Nave Paulo aahaaceererya: “Weerano hiihaa, onamwiivulusha weyaano vamoha ni yaawo anoowiriyana.” (1 Tim. 4:16) Ikumi sincipale siri va yawoopiha. Woona wi nnachuna nlamuleliwaka ni Omwene wa Muluku, hiyaano ninniikhapelela mukhatiihu, nave ninneerano yeela moorweela wa waakhulela phaama mmukhalelo onamvaha ncicimiho Yehova ni okhala mwawiiwanana ni michaka saphaama seiho nnalaleeryaahu. (Fil. 1:27) Ninnooniherya wi ‘ninnakhapelela mahusiheryo ahu’ moorweela wa wiirehererya phaama mmuteko woolaleerya ni omveka Yehova wi anreelihe nihaakumve waalaleerya akina.

3. Tuuvi ori moonelo wa achu vooloca sa michaka sa Omwene? Mvahe yootakiherya.

³ Naamwi nipakaka owetha wahu mmuteko woolaleerya, achu ananwerya wooniherya nchuno vakhaani naari akina ohipwacharu michaka sa Omwene mu ekulucu ahu. Moone yootakiherya ya munna awiichaniwa Georg Lindal yoowo aalaleerya mukhateiye mmakupa oohiyanahiyana a Islandiya mu 1929 ophiyerya eyaakha ya 1947. Owo aanakawa soolaleeryiwa sincipale, nyenya haavo naari muchu mmoharu eemerenrye eparipari. Owo oorepa: “Akina yaaniica eparipari, nyenya ancipale annatitelela ohooniherya nchuno.” Mamisiyonaariyo akina yaawo yaavyakihiwe mu exikola ya OKiliyati yaahirumiheliwa weiwo. Naamwi hiihaa,  ancipale yaahititelela ohooniherya nchuno ntakhara eparipari. Ivinrevo iyaakha 9 ohoolo waya achu akina a Oslandes yaahiveleela ikumi saya ophiyerya opatisiwa. *

4. Ti mwawiihai nniisoonaahu vaavaa akina ahinakhulelaaya michaka saphaama?

⁴ Ninnuukhuwa vaavaa achu ahinaakhulelaaya michaka saphaama vaavaa nnaalaleeryaahu. Nnamukhala ntoko Paulo, yoowo ‘aathananasha nave murima awe hiwaamaala omwiicela’ vaavaa ancipale a Ayuta yahaachunaaya weemererya wi Yesu aari Mesiya. (Aro. 9:1-3) Akhweya nyuwaano munniilipixerya vancipale ovekela ntakhara oohuserya a Piipiliya, nyenya owo hanaya vahoolo nave munnalakelela ohiyererya yoohuserya. Naari akhweya nyuwaano hamwintonko omukhaviherya muchu ophiyerya opatisiwa. Apwanne munaphwanela wiisoonaka okhalano nthowa, muupuwelaka wi Yehova hanareeliha muteko anyu woolaleerya? Mmwaha yoola, nnahaala waakhula makoho meeli: (1) Tiheeni eneeriha wi muteko woolaleerya okhumelela phaama? (2) Tiheeni nnaphwanelaahu oweherya vaavaa nnalaleeryaahu akina?

5. Ntakhara heeni muteko ahu woolaleerya tahi wi ilukuluku soothene onnakhalano sookhumelela saphaama seiho naaweheryaahu?

⁵ Piipiliya onnaloca sa yoole oneerano yookhwela ya Muluku: “Soothene oneereiye eere ikanamuhakalaliha.” (Sal. 1:3) Nyenya ela henataphulela wi soothene nneeraahu nipake ntakhara Yehova sinahaala okhalano sookhumelela seiho nnachunaahu. Okumi wa muchu woosareya ni “wuukhuwa” nthowa na ohiphaameya—wa hiyaano ni wa akina. (Yobi 14:1) Ohiya yeeyo, amwiicani ahu ilukuluku ikina anneererya onihiiha olaleerya vanlakani. (1 Kor. 16:9; 1 Tes. 2:18) Vano tiheeni eneeriha orummwa wa muchu okhumelela phaama? Hankooni noone malakiheryo makina a Mpiipiliyani yaawo ananikhaviherya waakhula nikoho nenla.

6. Tiheeni enamweeriha Yehova woona muteko ahu woolaleerya okhala wasisapo?

⁶ Yehova onnoona wiilipixerya ni ovilela wahu. Yehova onnoona wi muteko ahu onnakhumelela phaama vaavaa nnalapaahu mwawiiveleela ni moosivela, moohipwacha mukhalelo achu anaakhulelaaya. Paulo oorepa: “Muluku hari oohookololowa; harwa acuwalaru muteko anyu mweenraanyu woosivela nsina nawe, vawi munnaakhaviherya aweela murima, nave ninleelo munnaakhaviherya.” (Ahe. 6:10) Yehova onnuupuwela wiilipixerya ni osivela wahu, naamwi muteko ahu ohikhumelelaka phaama. Mwa yeeyo masu a Paulo ntakhara Akorinto annaphariheleya wa hiyaano. Owo oorepa: “Musuwelaka wi mwa Apwiya hamuneeteteya siyo ene,” naamwi muteko anyu ohaakhwaniheryeyaka ntoko mwaaweheryaanyu.—1 Kor. 15:58.

7. Tiheeni nnahuseryaahu wa yeeyo murummwa Paulo olonceiye ntakhara muteko awe woolaleerya?

⁷ Murummwa Paulo aari Misiyonaariyo aphaama, owo aatikitherya miloko mivyaani mu ipooma soohiyanahiyana. Nyenya  akina yaanamwaakaaha elocaka wi owo haari muhusiha aphaama. Wi iisaakihe, owo haalonce waaca wa achu yaawo aakhavihenryeiye okhala Akristu. Ohiya yeeyo, owo oorepa: “kìhapwaha mwa miteko.” (2 Kor. 11:23, BNM) Hiihaa ntoko Paulo, nnaphwanela wuupuwela wi, wa Yehova, echu eri yoochuneyaxa ori wiilipixerya ni ohivelavela.

8. Tiheeni nnaphwanelaahu wuupuwelela vooloca sa muteko ahu woolaleerya?

⁸ Muteko ahu woolaleerya onnamuhakalaliha Yehova. Yesu aahaarumiha oohuserya 70 ntakhara mukipici wa muteko woolaleerya. Omakuchuwelo wa mukipici yoola, awo “yaakooka ehakalalaka.” Tiheeni yaaweerinhe oohuserya yaala okhala oohakalala? Awo yaaloca: ‘Ni minepa ene soonanara saananiiwelela mu nsina nanyu!’ Nyenya Yesu aavaanya mukhalelo aya wa wuupuwela: “Muhihakalale vawi minepa sinnawiiwelelaani; muhakalale masina anyu orempwa wirimu.” (Luka 10:17-20) Yesu aasuwela wi oohuserya tahi wi ilukuluku soothene yaahaala okhalano saweereya sootikhiniha mmuteko woolaleerya. Mweeparipari, hannasuwela akavi a yaawo yaawiriyanne ni ekhala Akristu. Nthowa noochuneyaxa nenlo naahaala oweeriha arummwa okhala oohakalala hinaaphwanela okhala nthowa na sookhumelela sa mmuteko aya woolaleerya. Ohakalala waya woothene waaphwanela okhala wa osuwela wi wiilipixerya ni wiiveleela waya waanamuhakalaliha Yehova.

9. Mwawiiwanana ni Galasya 6:7-9, tiivi enahaala okhala yookhumelela wakhala wi hinivelavenle mmuteko ahu woolaleerya?

⁹ Wakhala wi noovilela mmuteko woolaleerya, nnahaala waakhela okumi woohimala. Yoole onalapa ni murima awe woothene wi alaleerye michaka sa Omwene, mweeparipari, “onamisa mwa munepa.” Eyo enavolowela weemererya wi munepa wa Muluku ophare muteko mookumini mwahu. ‘Nahivela’ naari “naahiviliwaru,” Yehova oolaiherya wi nnamuhepha ekumi yoohimala, naamwi nihimukhavihenrye muchu ophiyerya opatisiwa.—Mwaalakhanye Galasya 6:7-9.

10. Ntakhara heeni akina annawiriyana vaavaa nnalaleeryaahu nave akina hooye?

¹⁰ Waakhulela wa achu eri mwa yeeyo aryaayano mmurimani. Yesu oothariha yeela mu niphwanaphwaniho nawe vooloca sa namalima yoowo onamisa mmiso mu ichaya soohiyanahiyana, nyenya ichaya soothene sa mu niphwanaphwaniho, emoha ti yiiminhe sawiima. (Luka 8:5-8) Yesu ooloca wi ichaya seiha soothene sinaweemelela achu a mikhalelo ni a mirima soohiyanahiyana yaawo anaakhulela mmikhalelo soohiyanahiyana “masu a Muluku.” (Luka 8:11-15) Hiihaa ntoko namalima yoole, hinnawerya wunnuwiha mmiso wa eparipari mmurimani mwa muchu. Ela enahaala okhala mwawiiwanana ni mukhalelo wa murima awe. Murici ahu ori otitelela omisa mmiso wa muchaka wa Omwene. Ela eri ntoko yeeyo murummwa Paulo olonceiye: “Mmoha ni mmoha onarwa aakhela yoochuwela ntoko malapelo awe,” ohiya moorweela wa sookhumelela wa muteko awe.—1 Kor. 3:8.

11. Ntakhara heeni Nowa aareiye ntoko “mulipa oolaleerya a sawookololowa”? (Moone eruku va ekaapa.)

¹¹ Ovinyerya khalai, alapeli ancipale a Yehova yaahaalaleerya achu ancipale yaawo yahaachuna owiriyana. Ntoko yootakiherya, Nowa aari “mulipa oolaleerya a sawookololowa,” mwawooneya mu iyaakha 40 naari 50. (2 Ped. 2:5) Moohikhwa minikwa, Nowa aachuna wi achu enwiriyane, nyenya Yehova haalonce wi achu yaahaala onwiriyana. Ohiya yeeyo, vaavaa owo amvanheiye sooleeliherya wi Nowa ampake mwaaceya, Muluku aaloca: “Onarwa ovolowa mmwaaceyani vamoha ni mwaaraa, anamwanaa  ni asaaraya.” (Map. 6:18) Nave vaavaa Muluku aamutharihenleiye Nowa mannuwelo a mwaaceya, owo aahiiwexexa wi haahaala owiriyaniwa ni achu ancipale, woona wi hiyaahaala waakhwanamo. (Map. 6:15) Ntoko nsuwenlaahu, naari muchu mmoharu a elapo yeele yootakhala hanwiriyanne. (Map. 7:7) Apwanne Yehova aahoona wi Nowa aari ooceecheya ntoko mulaleeryi a sawookololowa? Hooye! Nowa aari oororomeleya nave aari oolakelela weera soothene Yehova aamulamulenleiye.—Map. 6:22.

12. Ti mwawiihai mulipa a miririmu Yeremiya aawenryeiye ophwanya ohakalala mmuteko awe naamwi achu yahaakhulelaka phaama?

¹² Mulipa a miririmu Yeremiya aahihoolela nikacamiho noolikana. Achu a mu elukuluku awe hiyaachuna onwiriyana nave yaahimurukunuwela yoowo. Naamwi hiihaa, Yeremiya aalaleerya iyaakha opwaha 40. Moorweela wa okhala nthowa na ‘oruwaniwa ni onyemuliwa,’ owo aahiisoona okhala ooceecheya vancipale nave aahuupuwela ohiya murici awe. (Yer. 20:8, 9) Nyenya Yeremiya haavelavenle! Tiheeni yaamukhavihenrye ovilelano muupuwelo yoola wooceecheiha ni ophwanya ohakalala mmuteko awe woolaleerya? Owo aatikitheren’ye mu ichu piili soochuneya. Yoopacerya, muchaka owo aakuxeiye wa achu waanaavaha awo “murecele mahiku ammwaahiyu.” (Yer. 29:11, BNM) Yanaawiili, Yeremiya aaloca mu nsina na Yehova. (Yer. 15:16) Hiyaano ninnakawana ni achu muchaka wa ewehereryo nave ninnakuxa nsina na Yehova ntoko Anamoona awe. Vaavaa nnatikitheryeyaahu mu ichu seiha piili, nnanwerya okhalano ohakalala, moohipwacha waakhulela wa achu.

13. Tiheeni nnahuseryaahu mu niphwanaphwaniho na Yesu nnaphwanyeya mu Marko 4:26-29?

¹³ Winnuwa omunepani oneereya vakhaani-vakhaani. Yesu oohusiha yeela mu niphwanaphwaniho nawe vooloca sa mulopwana yoowo aanle mmiso nave aya akona. (Mwaalakhanye Marko 4:26-29.) Winnuwa wa mmiso mulopwana ole aaminseiye weereya vakhaani-vakhaani, nave owo haawerya weera echu wi owo waakuve winnuwa. Nyuwaano tho munaphwanela owehererya mu elukuluku yoophwanelela wi moone sookhumelela sa muteko anyu woolaleerya. Nna nthowa nawi winnuwa oneereya vakhaani-vakhaani. Namalima hanawerya waakuviha winnuwa wa mmiso ntoko onachuneleiye. Moolikana, hannaphwanela waakhinyererya oohuseryaahu a Piipiliya winnuwa omunepani mwawaakuveya ntoko naachunelaahu. Wakhala wi munnoona wi oohuserya anyu a Piipiliya onnalekela oya vahoolo, muhiceecheye naari ovelavela. Hiihaa ntoko namalima, waapaka oohuserya muteko onachuneya opisa murima.—Tiy. 5:7, 8.

14. Yootakiherya taani enooniherya wi enanwerya oviravo elukuluku yincipale wi achu epacerye oniwiriyana?

¹⁴ Mu ikulucu ikina, enanwerya oviravo elukuluku yincipale wi muchu apatisiwe. Moone yootakiherya ya arokora apiili oomai awiichaniwa Gladys ni Ruby Allen. Mu 1959, awo yaahithanliwa wi yaarumeele ntoko mapiyoneera ookilaatheya mu epooma ekhaani yo Kepeki, * Kanata. Nthowa na woova waakhulela wa amwaacamani ni mapastore, achu a weiwo hiyaachuna owiriyana muchaka wa Omwene. Gladys onnuupuwela: “Naanaya empa ni empa mu iwora 8 vanihikuni, mu iyaakha piili, nihiwenrye omphwanya muchu yoowo aaneemerenrye! Achu yaanahula mikhora nave yaanawala wanaawiili. Nyenya hiyaano hinaavelavenle.” Vakhaani-vakhaani, moonelo wa achu waahitorokeya. Awo yaahikhala oonthamwene nave yaahipacerya owiriyana muchaka. Olelo sookhalawo miloko miraru mu epooma yeele.—Isa. 60:22.

15. Tiheeni 1 Korinto 3:6, 7 onanihusiheiye vooloca sa muteko wa wapaka oohuserya?

 ¹⁵ Waapaka oohuserya muteko wa achu oothene. Oothene mmulokoni ananwerya okhaviherya ophiyerya muchu opatisiwa. (Mwaalakhanye 1 Korinto 3:6, 7.) Ntoko yootakiherya, munna onnavaha erevista naari efolyeto wa muchu yoowo oonihenrye nchuno. Voocharela owo onniiwexexa wi hawerya opaka oxekurya ntoko aaroromelinheiye. Mwawiihiiha, owo onnamveka mulaleeryi mukina wi amuxekurye muchu yoola. Mulaleeryi mukina yoola onnapaceryiha weeciha yoohuserya ya Piipiliya ni yoowo. Moovira wa elukuluku, owo onnaawopa alaleeryi oohiyanahiyana wi emuhoole va yoohuserya, nave mmoha ti mmoha a yaala onnamuceenyerya oohuserya mmikhalelo soohiyana. Munna naari murokora onnahela mmiso maahi. Mwawiihiiha, vaavaa muchu onapatisiweiye, oothene yaale apanke makupa mu ohepha yoola woomunepani annahakalala vamoha.—Yoh. 4:35-38.

16. Naamwi muhiweraka opaka sincipale mmuteko woolaleerya, ntakhara heeni munaphwanelaanyu ohakalala?

¹⁶ Akhweya nyuwaano himwaano okumi waphaama naari himwaano ikuru wi mpake makupa mmuteko woolaleerya. Naamwi hiihaa, munanwerya ophwanya ohakalala ni yeeyo munaweryaanyu opaka. Moone yootakiherya ya Mwene Tavite. Owo ni alopwana awe yaanachuna owaniha wa alipa oohuhula a Maleke wi yoopole imusi ni sookhalano saya. Nyenya alopwana 200 yaatepa okoma nthowa na owaniha nave yaahala oculi ni maphuta. Tavite ni alopwana awe yaahivootha ekhoco nave yaahiwerya okuxa ichu sincipale soochuneya wa amwiicani aya. Vanonto Mwene Tavite aahilamulela wi ichu seihe soochuneya saaphwanela okawaniwa moolikana ni achu yaale yaakele okhoconi ni yaale yaahanle oculi ni maphuta. (1 Sam. 30:21-25) Emohamoha tho enneereya ni muteko ahu wa waapaka oohuserya. Sookhumelela sa soohakalaliha sinakhalavo sinaphwanela okhala imohamoha, ela tiwi, moolikana ni oothene yaale anapaka owetha waya.

17. Tiheeni enaneeriha omuthamalela Yehova?

¹⁷ Ninnamuthamalela Yehova mmukhalelo woosivela owo onooneiye muteko ahu. Owo oosuwela wi hannaphwanela waakhinyererya achu oniwiriyana wi ekhale alapeli awe. Naamwi hiihaa, owo onnoona wiilipixerya wahu ni osivela nryaahuno wa yoowo, nave onnanreeliha nthowa na yeeyo. Owo tho onnanihusiha okhala oohakalala mwa yeeyo nnaweryaahu opaka mmuteko woolaleerya. (Yoh. 14:12) Nnaphwanela ororomela wi, naahivelavela, Muluku onahaala okhala oohakalala ni muteko ahu.