1. Hadia mbörö wa omuso dödöda?

OMUSO dödöda me no tebeʼe khöda döi si sökhi tobali Samaduhuʼö Yehowa. Börö me no taʼotöigö döi Lowalangi, omasi ita tafalua halöwö fanuriaigö hegöi fombaliʼö nifahaʼö. Omuso dödöda na tola tatolo ”niha si sökhi amuata somasi manöndra faʼauri si lö aetu” enaʼö tobali ia Samaduhuʼö Yehowa. (Hal. 13:48) Fagölö nirasoida simane nirasoi Yesu. Me latutunö khönia ira nifahaʼönia wa no mofozu ira wamalua halöwö fanuriaigö, ”omuso dödö Yesu”.​—Luk. 10:1, 17, 21.

2. Hewisa wangoromaʼöda wa taʼameʼegö tödö halöwö fanuriaigö nifaluada?

² Moguna taʼameʼegö tödö sibai halöwö fanuriaigö nifaluada. Ifarou dödö Dimoteo Faulo, ”Faigi-faigi hewisa ndraʼugö hegöi famahaʼöu . . . börö me teʼorifi ndraʼugö awö zamondrongo yaʼugö.” (1 Ti. 4:16) Daʼa zangoromaʼö wa tola möi fangorifi niha halöwö fanuriaigö nifaluada. Moguna tafaigi-faigi hewisa ita börö me barö Wamatörö Lowalangi so ita. Omasi ita na lö tebulö tafolakhömi Yehowa ba nifaluada, ba tafaudugö waʼaurida ba duria somuso dödö nifaʼemada. (Fil. 1:27) No taforomaʼö wa ’tafaigi-faigi hewisa wamahaʼöda’ na tahaogö wamaʼanö yaʼita ba taʼandrö wanolo moroi khö Yehowa fatua lö möi ita manuriaigö.

3. Hadia hasambalö adöni dödö niha ba duria nifaʼemada? Beʼe duma-duma.

³ Hewaʼae na no tafalua wondrege zi sökhi ba wanuriaigö, tola manö lö ato niha ba mbanuada somasi manemaʼö turia somuso dödö sanandrösa ba Wamatörö Lowalangi. Nehegö atö zi no irai alua khö dalifusöda Georg Lindal. Iʼotarai me döfi 1929 irugi 1947, ha yaʼi-yaʼia zanuriaigö ba mbanua si faböʼö-böʼö si so ba Islandia. So ngafulu ribu publikasi si no irai ibeʼe ba niha. Hizaʼi, samösa lö somasi tobali Samaduhuʼö. Imane, ”So ösa niha si fatuwu ba duria si so ba Zura Niʼamoniʼö, ba abölö ato nasa zi lö adöni tödö  ba daʼö.” Hewaʼae na so ösa utusan injil lulusan Gilead si möi manuriaigö ba daʼö, lö ato niha sadöni tödö. Ba gafuriata, me no siwa fakhe, awena so ösa niha Islandia somasi molulu faʼaurira khö Yehowa ba tebayagö idanö. *

4. Hewisa dödöda na lö hadöi niha somasi manemaʼö turia somuso dödö nifaʼemada?

⁴ Tatu afatö dödöda na lö hadöi niha somasi manemaʼö turia somuso dödö nifaʼemada. Tola manö tarasoi zimane nirasoi Waulo. ’Abu sibai dödönia ba lö aetu-aetu tefakao ia’ börö me ato niha Yahudi si lö faduhu tödö wa Yesu andrö Mesia si no mufabuʼu. (Rom. 9:1-3) Tola manö no öforege wanolo niha nifahaʼöu ba Zura Niʼamoniʼö, ba asese öʼohe ia ba wangandrö. Hizaʼi, lö tedou ia ba wamati irege moguna öböhöli wamahaʼö yaʼia. Mazui, te lö irai mofozu ndraʼugö ba wanolo si samösa niha irege tebayagö ia idanö. Hadia moguna ötahigö ndraʼugö ba öwaʼö tödöu wa lö ifahowuʼö Yehowa halöwö fanuriaigö nifaluamö? Ba artikel daʼa, taʼalui wanema li moroi ba wanofu si dombua andre: (1) Hadia dandra wa no mofozu ita ba wanuriaigö? (2) Hadia zinangea tatörö tödöda na möi ita manuriaigö?

5. Na tafalua halöwö fanuriaigö, hana wa itaria lö tatema mbua simane nitötönada?

⁵ Imane Sura Niʼamoniʼö sanandrösa ba niha samalua oroisa Lowalangi, ”Fefu nifaluania ba mofozu.” (Si. 1:3) Hizaʼi, tenga daʼö geluahania wa hasambalö tatema mbua simane nitötönada ero na tafalua halöwö fanuriaigö. Börö me lö moʼahonoa ita hegöi niha böʼö, ”afönu fangarö-ngarö” waʼauri niha gulidanö. (Yob. 14:1) Baero daʼö, tola manö mofozu niha si faʼudu khöda ba wanaisi yaʼita irege moguna tabini-biniʼö ita ba wamalua fanuriaigö. (1 Ko. 16:9; 1 Te. 2:18) Na simanö, hadia zuʼa-suʼa niʼogunaʼö Yehowa ba wotatugöi na no mofozu ita ba wanuriaigö mazui löʼö? Nehegö ösa goi-goi Zura Niʼamoniʼö sameʼe fanema li ba wanofu daʼö.

6. Hadia zuʼa-suʼa niʼogunaʼö Yehowa ba wotatugöi na no mofozu ita ba wanuriaigö mazui löʼö?

⁶ Inehe-nehegö Yehowa wamorege si no tafalua hegöi faʼanau gölöda. Ba wamaigi Yehowa, no mofozu ita ba wamalua halöwö nibeʼenia na tafalua daʼö si fao faʼowölö-ölö ba faʼomasi, gofu hewisa wanemaʼö niha. Imane Faulo, ”Tenga sa si lö atulö Lowalangi irege olifu ia halöwömi hegöi faʼomasimi börö döinia, me no mangai halöwö ami ba niha niʼamoniʼö ba lö miböhöli wamalua yaʼia.” (Heb. 6:10) Lö iʼolifugö Yehowa wamorege hegöi faʼomasi niforomaʼöda, hewaʼae na lö irai mofozu ita ba wanolo si samösa niha irege tebayagö ia idanö. Börö daʼö, simane niwaʼö Waulo ba niha Gorindro, ’tenga zaya-zaya gölö waʼerege dödöu ba wangai halöwö Lowalangi’ hewaʼae na lö ötema mbua simane si no ödöna-döna.​—1 Ko. 15:58.

7. Hadia wamahaʼö si tola tahalö moroi ba nitutunö Waulo sanandrösa ba halöwö fanuriaigö nifaluania?

⁷ No sahöli-höli dödöda halöwö fanuriaigö nifalua Waulo. Oya mbanua niha Keriso  nifasindronia ba mbanua si faböʼö-böʼö. Hewaʼae simanö, me so ösa niha sangumaʼö wa tenga samahaʼö si sökhi ia, lö itutunö khöra hawaʼato niha si no itolo tobali niha Keriso. Hizaʼi, imane Faulo, ”No uforege wohalöwö.” (2 Ko. 11:23) Simane Faulo, böi olifu ita hadia zabölö tohude ba wamaigi Yehowa, yaʼia daʼö famorege si no tafalua hegöi faʼanau gölöda.

8. Hadia zinangea tatörö tödöda sanandrösa ba halöwö fanuriaigö nifaluada?

⁸ Omuso dödö Yehowa ba halöwö fanuriaigö nifaluada. Me no aefa ifatenge Yesu ndra nifahaʼönia si 70 ba wanuriaigö turia somuso dödö sanandrösa ba Wamatörö Lowalangi, ’mangawuli ira si fao faʼomuso dödö’. Hana wa omuso sibai dödöra? Lamane wanutunö, ”Me maʼogunaʼö döimö, ba laʼoʼö niwaʼöma ira malaʼika si lö sökhi.” Hizaʼi, imane Yesu ba wangatulöʼö lala wangera-ngerara, ”Böi omuso dödömi me no laʼoʼö limi ira malaʼika si lö sökhi andrö, hizaʼi miʼomusoiʼö dödömi börö me no tesura döimi ba zorugo.” (Luk. 10:17-20) Aboto ba dödö Yesu wa tenga ero inötö latema mbua si sökhi simane daʼö ba wanuriaigö. Sindruhunia, lö taʼila hawaʼato niha nifalukhaisira si tobali niha Keriso ba gafuriata. Moguna aboto ba dödö ndra nifahaʼö wa tola omuso dödöra tenga ha börö me so niha somasi mamondrongo turia nifaʼemara, hizaʼi börö me laʼila wa omuso dödö Yehowa ba wamorege nifaluara.

9. Moloʼö Galatia 6:7-9, hadia mbuania na lö atage ita ba wamalua halöwö fanuriaigö?

⁹ Na lö atage ita ba wamalua halöwö fanuriaigö, hasambalö tasöndra waʼauri si lö aetu. Na tafalua wondrege zi sökhi ba wanuriaigö hegöi ba wamahaʼö niha sanandrösa ba duria somuso dödö, no tobali ita ”sanaru ba geheha”. Hana wa tola tawaʼö zimanö? Börö me no taforomaʼö wa omasi ita tatema wanuturu lala moroi ba geheha niʼamoniʼö. Na lö ”atage” ita, ifabuʼu khöda Yehowa wa hasambalö ibeʼe khöda waʼauri si lö aetu hewaʼae na lö hadöi niha nifahaʼöda si tebayagö idanö.​—Baso Galatia 6:7-9.

10. Hana wa so ösa niha sanemaʼö turia nifaʼemada ba so göi zi löʼö?

¹⁰ Börö me faböʼö-böʼö dödö niha ero zamösana, so ösa niha sanemaʼö turia nifaʼemada ba so göi zi löʼö. No irai itutunö daʼö Yesu me ifaʼema gamaedola sanandrösa ba danömö zinanö nifazaewe zi samösa niha ba danö si faböʼö-böʼö. Moroi ba danömö nifazaewenia, ha tanömö saekhu ba danö si sökhi zowua. (Luk. 8:5-8) Itutunö Yesu wa tanö si faböʼö-böʼö yaʼia daʼö tödö niha sanemaʼö ’taromali Lowalangi’ ba lala si faböʼö-böʼö. (Luk. 8:11-15) Simane niha samazaewe tanömö zinanö andrö, tebai tatatugöi hadia mowua danömö zindruhu ba dödö niha mazui löʼö, börö me teʼodaligö daʼö moloʼö tödöra ero zamösana. Si tobali noro dödöda yaʼia daʼö enaʼö lö taböhöli wamazaewe tanömö zindruhu. Simane niwaʼö Waulo, ’tatema sa luoda zamösana balazi halöwöda’ tenga balazi waʼoya mbua moroi ba halöwöda.​—1 Ko. 3:8.

11. Hana wa mofozu Noakhi tobali ”sanuriaigö sindruhu”? (Faigi gambara ba guli majalah.)

¹¹ Iʼotarai mböröta, ato niha si lö omasi manemaʼö turia nifaʼema nono mbanua Yehowa. Duma-dumania Noakhi, sangai halöwö tobali ”sanuriaigö sindruhu” ba zi hauga wulu fakhe faʼara. (2 Fe. 2:5) Tatu manö, itötöna enaʼö lafondrondrongo duria nifaʼemania ira niha sato. Hizaʼi, lö niwaʼö Yehowa wa hasambalö alua daʼö. Imane Lowalangi me iʼoroisi khö Noakhi ba wamazökhi owo, ”Aeʼe bakha ba nowo andrö, ohe ndraonomö, foʼomou hegöi umönöu.” (1 Mo. 6:18) Baero daʼö, me ifatunö khönia Yehowa hawaʼebua nowo sinangea ifazökhi, tola manö aboto ba dödö Noakhi wa lö ato niha samondrondrongo turia nifaʼemania, börö me  lö monaha ira bakha ba nowo. (1 Mo. 6:15) Simane si no taʼila, samösa lö niha somasi mamondrongo turia nifaʼema Noakhi. (1 Mo. 7:7) Hadia iwaʼö Yehowa wa lö mofozu Noakhi ba wamalua halöwönia? Löʼö! Ba wamaigi Yehowa, no mofozu Noakhi ba wamalua halöwö tobali sanuriaigö börö me lö faröi ia ba wamalua hadia niwaʼö Yehowa khönia.​—1 Mo. 6:22.

12. Hewaʼae na lö adöni dödö niha ba duria nifaʼemania ba ato zanaisi yaʼia, hadia zangaʼasogö faʼomuso dödö khö Yeremia samaʼeleʼö?

¹² Lö iböhöli wanuriaigö Yeremia samaʼeleʼö ba zi töra 40 fakhe faʼara, hewaʼae na lö hadöi niha sadöni tödö ba ato zanaisi yaʼia. Börö me ”laʼoʼaya ba laʼailasi” ia ira niha si faʼudu khönia, irasoi waʼide-ide dödö irege edöna iböhöli wamalua halöwönia. (Yer. 20:8, 9) Hizaʼi, lö atage Yeremia! Hadia zanolo yaʼia irege lö tebulö ifalua halöwönia si fao faʼomuso dödö? So dombua ngawalö zi lö tebulö itörö tödönia. Si oföna, tola latema ”dötönafö si sökhi ba zi so föna” ira niha sato börö duria nifaʼemania andrö. (Yer. 29:11) Si dua, no ifili ia Yehowa tobali salahinia. (Yer. 15:16) Simanö göi ita, tafaʼema duria sangaʼasogö tötönafö ba niha sato, ba taʼotöigö döi Yehowa tobali Samaduhuʼö khönia. Na lö tebulö tatörö tödöda zi dombua ngawalö andre, tola tarasoi waʼomuso dödö gofu hewisa wanemaʼö niha turia nifaʼemada.

13. Hadia wamahaʼö nihalöda moroi ba gamaedola Yesu nisura ba Mareko 4:26-29?

¹³ Moguna ginötö ba niha ba wangoromaʼö faʼatedou ba wamati. Daʼö wamahaʼö nifaʼema Yesu me itutunö gamaedola sanandrösa khö zamazaewe tanömö zinanö si no mörö. (Baso Mareko 4:26-29.) Lö iʼanemaiʼö tedou danömö zinanö nifazaewenia, ba lö hadöi si tola ifalua ba wamangaösö faʼatedou zinanö andrö. Simanö göi, tola manö lö iʼanemaiʼö taʼila waʼatedou niha nifahaʼöda ba Zura Niʼamoniʼö, börö me moguna khönia ginötö ba wamalua hadia zi no ifahaʼö yaʼia. Tebai ifangaösö waʼatedou danömö zinanö nifazaewenia si samösa sohalöwö ba danö. Simanö göi ita, tebai tafaso niha nifahaʼöda ba Zura Niʼamoniʼö enaʼö tedou ia ba wamati simane faʼalio nitötönada. Börö daʼö, böi ide-ide dödöu mazui atage ndraʼugö na ara sibai tedou ba wamati niha nifahaʼöu ba Zura Niʼamoniʼö. Simane sohalöwö ba danö, moguna khöda waʼebolo dödö wamalua halöwö fombaliʼö nifahaʼö.​—Yak. 5:7, 8.

14. Beʼe duma-duma sangoromaʼö wa tola manö moguna ginötö fatua lö ibörögö lafondrondrongo duria nifaʼemada ira niha sato.

¹⁴ Ba zi hawaʼoya mbanua, te no manuriaigö ndra talifusöda ba zi hauga fakhe faʼara, hizaʼi samösa lö si tebayagö idanö. Nehegö atö zi no irai alua khö zi darua si fatalifusö sotöi Gladys hegöi Ruby Allen. Me 1959, mufataro ira tobali perintis biasa ba zi sambua banua si so ba provinsi Quebec, Kanada. * Lö omasi niha si so ba daʼö fahuhuo khö ndra Samaduhuʼö Yehowa, börö me ataʼu ira ba niha böʼö hegöi khö ndra sondröniaʼö ba agama Katolik. Imane Gladys, ”Ba zi dua fakhe faʼara, möiga manuriaigö ba nomo-omo misa mato walu za ero maʼökhö. Hizaʼi, samösa lö samokai bawandruhö. Si toʼölönia, möi ira föna mbawandruhö ba iʼanemaiʼö lalau mofanö me laʼila wa yaʼaga zi tohare. Hewaʼae simanö, lö awuwu ndraʼaga.” Arara manö, ibörögö alö waʼafatuwu niha khö ndra Samaduhuʼö Yehowa ba so ösa zomasi mamondrongo turia nifaʼemada. Iadaʼa, so tölu mbanua niha Keriso nifasindro ba daʼö.​—Yes. 60:22.

15. Hadia wamahaʼö nihalöda moroi ba 1 Korindro 3:6, 7 sanandrösa ba halöwö fombaliʼö nifahaʼö?

¹⁵ Moguna falulu fohalöwö ita ba wombaliʼö nifahaʼö. Fefu niha ba mbanua niha Keriso tola fao ira ba wanolo si samösa niha enaʼö tebayagö ia idanö. (Baso 1 Korindro 3:6, 7.)  Duma-dumania, so samösa dalifusöda ira matua sameʼe risalah mazui majalah ba niha sadöni tödö. Hizaʼi, börö me tebai ifuli ifalukhaisi niha daʼö, iʼandrö tolo khö dalifusöda tanö böʼö. Talifusöda andrö zamörögö famahaʼö ba Zura Niʼamoniʼö khönia. Aefa daʼö, iʼohe ndra talifusöda tanö böʼö wefao awönia ba wondröniaʼö famahaʼö ba Zura Niʼamoniʼö, ba labeʼe wamarou dödö ba niha nifahaʼönia andrö ba lala si faböʼö-böʼö. Fefu ndra talifusöda si falukha khönia tola fao ira ba wombuwui tanömö zindruhu ba dödönia. Börö daʼö, simane niwaʼö Yesu, omuso dödö zanaru hegöi samasi na tebayagö idanö niha nitolora.​—Yoh. 4:35-38.

16. Hewaʼae na lö oya zi tola öfalua ba wanuriaigö börö me mofökhö mazui tebai ndraʼugö, hana wa tola örasoi waʼomuso dödö?

¹⁶ Hewisa na lö oya zi tola öfalua ba wanuriaigö hegöi ba wamahaʼö niha börö me mofökhö mazui tebai ndraʼugö? Lö tebulö örasoi waʼomuso dödö börö me tola fao ndraʼugö ba halöwö fombaliʼö nifahaʼö nifalua ba zi sagörö ulidanö. Nehegö atö zi no irai alua khö Razo Dawido. Me möi ia hegöi ono buania ba wangefaʼö ösi nomora hegöi okhötara moroi ba niha Gamaleki, so 200 moroi ba gotalua nono buania si no marase sibai. Börö daʼö, lö fao ira fasuwö ba iʼandrö khöra Dawido enaʼö latarogö gama-gama. Me no möna ia awö nono buania, itatugöi Dawido enaʼö fagölö-gölö gurakha nitemara, he si möi fasuwö hegöi sanarogö gama-gama. (1 Sa. 30:21-25) Simane daʼö göi halöwö nifaluada ba wombaliʼö nifahaʼö. Te lö oya zi tola öfalua ba wanuriaigö hegöi ba wamahaʼö. Hewaʼae simanö, na öfalua wondrege zi sökhi, tola örasoi waʼomuso dödö ero na so niha sanöndra faʼaboto ba dödö sanandrösa khö Yehowa ba si tebayagö idanö.

17. Hana wa taʼandrö sibai saohagölö khö Yehowa?

¹⁷ Aboto ba dödö Yehowa wa tebai tafaso niha ba wamosumange yaʼia. Hewaʼae simanö, inehe-nehegö waʼowölö-ölöda hegöi faʼomasida khönia, ba ifahowuʼö ita. Tatu taʼandrö sibai saohagölö khö Yehowa börö waʼomasi niforomaʼönia moroi ba lala wamaiginia halöwö nifaluada. Ifahaʼö göi ita hewisa lala enaʼö tarasoi waʼomuso dödö gofu hawaʼoya zi tola tafalua ba wanuriaigö. (Yoh. 14:12) Tola faduhu dödöda wa hasambalö omuso dödö Lowalangi khöda na lö atage ita!