1. Kubayini sithaba besizikhakhazisa ngokuba boFakazi bakaJehova?

SIYATHABA besiyazikhakhazisa ngokuba boFakazi bakaJehova! Sibabantu bakaZimu, siyatjhumayela besifundise abantu ngoJehova. Siyathaba nasisize othileko ‘ozimisele ukufumana ukuphila okungapheliko’ ukuthi athande uJehova. (IzE. 13:48) Sizizwa njengoJesu, ‘owathaba khulu ngommoya ocwengileko’ lokha abafundi bakhe nababuya ejimeni lokutjhumayela.—Luk. 10:1, 17, 21.

2. Singatjengisa njani ukuthi ukutjhumayela kuqakathekile kithi?

² Umsebenzi wokutjhumayela uqakatheke khulu kithi. Umpostoli uPowula wakhuthaza uThimothi wathi: “Hlala uzitjhejile wena nokufundisa kwakho.” Wangezelela wathi: “Ngokwenza lokhu uzokusindisa kokubili wena nabakulalelako.” (1 Thim. 4:16) Yeke, ukutjhumayela kusindisa ukuphila kwabantu. Sihlala sizitjheja njengombana sizizakhamuzi zomBuso kaZimu. Sifuna ukuziphatha ngendlela eletha iphazimulo kuJehova nevumelana nalokhu esikutjhumayelako. (Flp. 1:27) Sitjengisa ukuthi ‘sihlala sitjheje ukufundisa kwethu’ ngokuthi silungiselele kuhle nasiya esimini besibawe nesibusiso sakaJehova ngaphambi kokuthi siyokutjhumayela.

3. Kghani boke abantu bazowuthabela na umlayezo weBhayibheli? Nikela isibonelo.

³ Nanyana senza koke esingakwenza ekutjhumayeleni, abantu abanengi abasilaleli la sitjhumayeka khona. Cabanga ngesibonelo sakaMfowethu u-Georg Lindal, owatjhumayela ayedwa eengcenyeni ezinengi ze-Iceland kusukela ngo-1929 kufikela ku-1947. Wakhambisa iincwadi ezinengi kodwana akakho namunye owaba nguFakazi kaJehova. Watlola wathi: “Abanye abantu bebaphikisana nomlayezo weBhayibheli kodwana inengi labo belinganakareko.” Kubhale nalokha kuthunyelwa iinthunywa zevangeli ezibandulwe e-Gilead ukuthi zizokuthuthukisa umsebenzi wokutjhumayela. Kwathatha iminyaka elithoba ngemva kokufika kwazo  ukuthi kube nabantu abazinikela kuJehova bebabhajadiswe e-Iceland. *

4. Singazizwa njani lokha abantu nabangazithabeli iindaba ezimnandi?

⁴ Kuyasidanisa lokha abantu nabangakuthabeli ukufunda iBhayibheli. Singazizwa njengoPowula, owathi “ngilisizi khulu begodu nginobuhlungu obungapheliko” ngebanga lokuthi amaJuda amanengi bewangafuni ukwamukela ukuthi uJesu unguMesiya othenjisiweko. (Rom. 9:1-3) Kuthiwani nangabe naphezu kwemizamo ebudisi yokufundisa nokuthandazela umuntu ofunda naye, solo akathuthuki begodu kufuze ulise ukufunda naye? Ithiwani-ke yokuthi solo wathoma ukutjhumayela, akhange ufunde nomuntu bekabhajadiswe? Kghani kufuze uzizwe umlandu bewucabange nokuthi uJehova akawubusisi umsebenzakho wokutjhumayela? Esihlokwenesi, sizokuphendula iimbuzo emibili ethi: (1) Khuyini etjengisa ukuthi siyaphumelela emsebenzini wokutjhumayela? (2) Khuyini esingayilindela nasitjhumayeza abanye?

5. Kubayini umsebenzi esiwenzela uJehova ngezinye iinkhathi ungekhe uphumelele?

⁵ IBhayibheli lithi umuntu owenza intando kaZimu: “Uyaphumelela kikho koke akwenzako.” (Rhu. 1:3) Nanyana kunjalo, lokhu akutjho ukuthi koke esikwenzela uJehova kuzokwenzeka ngendlela thina esikhanuka ukuthi kwenzeke ngayo. Ipilo “izele ngomtlhago” ngebanga lokuthi soke sinesono. (Job 14:1) Okhunye godu kukuthi abaphikisi bangaphumelela kwesikhatjhana ukuvimba iimzamwethu yokutjhumayela ngendlela ejayelekileko. (1 Kor. 16:9; 1 Thes. 2:18) UJehova uqunta njani ukuthi umsebenzethu wokutjhumayela uyipumelelo namkha awa? Cabanga ngeenkambisolawulo zeBhayibheli ezisisiza siphendule umbuzo lo.

6. UJehova uyiqunta njani ipumelelo yomsebenzi esimenzela wona?

⁶ UJehova uqala ukukghodlhelela nemisebenzi ebudisi esimenzela yona. KuJehova, umsebenzethu uyaphumelela lokha nasiwenza ngetjiseko nangethando, nanyana abantu bangasilaleli. Powula watlola wathi: “UZimu akasingongakalungi bona angakhohlwa umsebenzenu nethando enilitjengise ebizweni lakhe ngokusiza abacwengileko.” (Heb. 6:10) UJehova uyikhumbula kuhle iimzamwethu ebudisi nethando esimtjengisa lona, ngitjho nanyana singakhenge sifunde nomuntu iBhayibheli abe abhajadiswe. Yeke, amazwi uPowula awatlolela beKorinte athi: “Ukusebenza budisi kwenu akusililize eKosini,” ayasebenza nakithi, kungayi ngokuthi sifumene umphumela ebesiwukhanukela namkha awa.—1 Kor. 15:58.

7. Khuyini esingayifunda endleleni umpostoli uPowula ahlathulula ngayo umsebenzakhe wokutjhumayela?

 ⁷ Umpostoli uPowula bekasithunywa sevangeli esiphumelelako, athoma amabandla emadorobheni amanengi. Nanyana kunjalo, lokha nabamsola ngokuthi akakwazi ukufundisa kuhle, akhange agijimele ukukhuluma ngenani labantu abasize ukuthi babemaKrestu. Kunokuthi aphikisane nalabo ebebathi benze umsebenzi ongcono ukumdlula, wathi: “Ngenze umsebenzi omnengi.” (2 Kor. 11:23) NjengoPowula, kufuze sikhumbule ukuthi into eqakatheke khulu kuJehova, msebenzi obudisi esimenzela wona nokungalahli itewu.

8. Khuyini ekufuze siyikhumbule ngomsebenzethu wokutjhumayela?

⁸ Ukutjhumayela kuyamthabisa uJehova. UJesu wathuma abafundi bakhe abama-70 ukuthi bayokutjhumayela ngomlayezo womBuso begodu ngemva kwejimelo, “babuya bathabile.” Khuyini ebeyibenza bathabe? Bathi: “Ngitjho namadimoni ayasilalela ngokusebenzisa ibizo lakho.” Nanyana kunjalo, uJesu walungisa indlela abacabanga ngayo, wathi: “Ningathatjiswa kukuthi imimoya iyanilalela, kunalokho thabani ngombana amabizo wenu atloliwe ezulwini.” (Luk. 10:17-20) UJesu bekazi ukuthi angekhe bahlale baphumelela emsebenzinabo wokutjhumayela. Kokwakho, abe asazi nokuthi bangakhi ababa maKrestu kilabo abatjhumayezwa bafundi ama-70. Abafundi bakaJesu bekufuze bazwisise ukuthi ithabo labo aliveli kilokho abakwenzileko kwaphela kodwana okuqakatheke khulu, livela ekwazini ukuthi bathabisa uJehova khulu ngemizamwabo.

9. Umtlolo webeGalatiya 6:7-9 uthi uzoba yini umphumela nasingalahli itewu ekutjhumayeleni?

⁹ Nasingalahli itewu ekutjhumayeleni, sizokutlonyeliswa ngokuphila okungapheliko. Nasenza koke esingakwenza ukuthi sitjhumayele besifundise ngeqiniso lomBuso, ‘sitjala ngombono wommoya’ ngokuvumela ummoya kaZimu ocwengileko usebenze ngokupheleleko ekuphileni kwethu. ‘Nasingapheli amandla’ namkha ‘singadinwa,’ uJehova usithembisa ukuphila okungapheliko, nanyana singakasizi namunye umuntu ukuthi azinikele kuye.—Funda kwebeGalatiya 6:7-9.

10. Kubayini abanye abantu basilalela nasitjhumayelako, kukulapho abanye bangasilaleli?

¹⁰ Kusemntwini ukuthi uyalamukela iqiniso namkha awa. UJesu wahlathulula iqinisweli emfanekiswenakhe womtjali owarhatjha imbewu ehlabathini engafaniko, yimbewu yinye kwaphela eyathela iinthelo. (Luk. 8:5-8) UJesu wathi ihlabathi engafaniko le ijamele iinhliziyo zabantu abamukela ngeendlela ezingafaniko “ilizwi lakaZimu.” (Luk. 8:11-15) Njengomtjali lo, nathi angekhe salawula ukuthi ukutjhumayela kwethu kuthela njani namkha kangangani ngombana lokho kuya ngehliziyo yomuntu. Thina kwethu kukuthi siragele phambili sitjala imbewu yomlayezo womBuso. Kunjengombana umpostoli uPowula atjho nakathi, “umuntu ngamunye uzokufumana umvuzwakhe ngokuvumelana nomsebenzakhe,” ingasi ngomphumela womsebenzakhe.—1 Kor. 3:8.

11. Kubayini uNowa ‘bekamtjhumayeli wokulunga’ ophumelelako? (Qala isithombe esingaphandle.)

¹¹ Umlando utjengisa ukuthi abantu bakaJehova bebatjhumayeza abantu abangafuni ukulalela. Ngokwesibonelo,uNowa ‘bekamtjhumayeli wokulunga’ isikhathi eside. (2 Pit. 2:5) Asinakuzaza ukuthi bekanethemba lokobana abanye bazomlalela kodwana uJehova akhenge athi kuzokuba  njalo. Kunalokho, lokha uZimu nakalayela uNowa ukuthi akhe umkhumbi, wathi: “Wena nomkakho, amadodanakho kanye nabomalukazana bakho kuzakufanela bona ningene emkhunjini.” (Gen. 6:18) UJehova nakamtjela ukuthi akhe umkhumbi ongangani, uNowa kungenzeka walemuka ukuthi akusibo boke ebebazomlalela ngombana bengekhe wabalingana boke. (Gen. 6:15) Njengoba sazi, akekho namunye owalalelako ekutjhumayelenokho. (Gen. 7:7) Kghani uJehova wathi uNowa uhlulekile? Awa akusinjalo! KuJehova, uNowa bekaphumelele ngombana ngokuthembeka, wenza patsi ngendlela amyale ngayo.—Gen. 6:22.

12. Khuyini eyasiza umphorofidi uJoromiya wahlala athabile nanyana bekaphikiswa begodu angalalelwa?

¹² Ngokufanako, umphorofidi uJoromiya watjhumayela iminyaka engaphezu kwema-40 kodwana nanyana kunjalo, akhenge bamlalele begodu bebamphikisa. Waphela amandla ngebanga ‘lehlamba neenhloni’ zabaphikisi bewafuna nokunghala isabelo sakhe. (Jor. 20:8, 9) Nanyana kunjalo, akhenge alahle itewu! Khuyini eyamsiza aragele phambili athabile emsebenzinakhe wokutjhumayela? Wadzimelela emaphuzwini amabili. Kokuthoma, umlayezo kaJoromiya bewunikela “ingomuso nethemba.” (Jor. 29:11) Kwesibili, bekamkhulumeli kaJehova. (Jor. 15:16) Ngendlela efanako, nathi siphethe umlayezo wethemba ephasini elonakelekweli begodu sikhulumela uJehova njengaboFakazi bakhe. Nasidzimelela emaphuzwini amabili la, sizokufumana ithabo nanyana abantu basilalela namkha awa.

13. Khuyini esiyifundako emfanekisweni kaJesu osemtlolweni kaMarkosi 4:26-29?

¹³ Ukukholwa kukhula kancanikancani. UJesu ufundise amaqiniso la emfaniswenakhe womtjali orhatjha imbewu. (Funda uMarkosi 4:26-29.) Ngemva kokurhatjha imbewu, ikhula kancanikancani begodu umtjali angeze ayirhabise bona ikhule msinya. Nawe kufuze ulinde isikhatjhana nawuzakubona ituthuko yomuntu ofunda naye. Njengombana umtjali angeze akatelela iintjalo zakhe ukuthi zikhule msinya ngendlela yena akhanuka ngayo, nathi angeze sakatelela ituthuko yabantu esifunda nabo iBhayibheli ngendlela thina esikhanuka ngayo. Ungapheli amandla namkha ulahle itewu lokha umuntu ofunda naye nakathatha isikhathi ukuthuthuka. Njengokutjala, ukwenza abafundi kutlhoga ukubekezela.—Jak. 5:7, 8.

14. Ngisiphi isibonelo esitjengisa ukuthi abantu bangathatha isikhathi ngaphambi kobana basilalele?

¹⁴ Kezinye iindawo, kuthatha isikhathi eside khulu ngaphambi kokuthi kube nomuntu obhajadiswako. Cabanga ngalokho okwenzeka ku-Gladys no-Ruby Allen, abantwana bomuntu ebabamaphayona wesikhathi esizeleko ngo-1959 e-Canada esifundeni se-Quebec. * Ngebanga lokuthi abantu balapho bebalalela lokho okutjhiwo bomakhelwana babo nabaphristi, akhenge bawulalele umlayezo womBuso. U-Gladys wathi: “Kwaphela iimnyaka emibili sikhamba umuzi nomuzi, ama-awara abunane qobe langa, kungekho ofuna ukukhuluma nathi! Abantu bebeza emnyango bese nababona ukuthi ngithi, bajike. Akhenge silahle ithemba.” Ngokukhamba kwesikhathi, abantu bathoma ukusijayela, kwathi abanye bathoma ukusilalela. Sikhuluma nje, sekunamabandla amathathu endaweni leyo.—Isa. 60:22.

15. Umtlolo woku-1 webeKorinte 3:6, 7 usifundisani ngomsebenzi wokwenza abafundi?

 ¹⁵ Kutlhogeka abantu abanengi ukwenza umuntu abe mfundi weBhayibheli. Woke umuntu ebandleni unesandla ekusizeni umuntu agcine abhajadisiwe. (Funda yoku-1 kwebeKorinte 3:6, 7.) Otjhumayelako angatjhiya iphetjhana namkha incwadi emntwini onekareko. Umfowethu lo angalemuka ukuthi angeze akghona ukwenza ibuyelo bese abawe omunye ukuthi amenzele ibuyelwelo. Umfowethu abambawe ukuthi enze ibuyelo, uyaphumelela ukuthomisa isifundo seBhayibheli. Naye, ngokuzako, ubawa abafowethu ukuthi bakhambe naye esifundweni sakhe bese ngamunye wabo akwazi ukukhuthaza isifundo sakhe ngeendlela ezingafaniko. Ngamunye wabafowethu uzokusiza isifundo seBhayibheli sithuthuke. Kuzokuba njengombana uJesu atjho nakathi bazokuthaba boke.—Jwa. 4:35-38.

16. Ungalifumana njani ithabo emsebenzini wokutjhumayela nanyana sele ugula namkha ungasenamandla?

¹⁶ Kuthiwani nangabe mhlamunye awusakghoni ukutjhumayela nokufundisa ngendlela ebewenza ngayo ngaphambilini ngebanga lokuthi uyagula namkha awusenamandla? Ungafumana ithabo ngokufaka isandla emsebenzini wokutjhumayela ngendlela okghona ngayo. Cabanga ngesibonelo seKosi uDavida namadoda ebekakhamba nawo, abasindisa imindeni nepahla kuma-Amaleki. Amadoda amakhulu amabili bewadinwe khulu ukuthi angaya epini, yeke asala agade ipahla. Ngemva kokuthumba, uDavida wayala ukuthi ipahla leya ihlukaniswe ngokulingana hlangana kwamadoda ebakasepini nalawo ebakasele agade ipahla. (1 Sam. 30:21-25) Kuyafana nomsebenzi wethu wephasi loke wokwenza abafundi. Kungenzeka ungakghoni ukutjhumayela nokufundisa ngendlela ofuna ngayo kodwana nakubhajadiswa umuntu, nawe uyathaba.

17. Kubayini sithokoza uJehova?

¹⁷ Siyamthokoza uJehova ngendlelakhe enethando aqala ngayo umsebenzethu wokutjhumayela. Uyazi ukuthi angeze sakatelela abantu ukuthi bamlalele namkha bamlotjhe. Uyawubona umsebenzethu obudisi nokuthi simthanda kangangani bewuyasibusisa. Usifundisa indlela esingafumana ngayo ithabo emsebenzinethu wokutjhumayela. (Jwa. 14:12) Siyaqiniseka ukuthi uZimu uyathaba ngathi, ikani nasingalahli itewu!