1. Ndaŵa yanji ni mwai kunkhala Mboni za Yehova?

NI MWAI ukulu ngako kunkhala Mboni za Yehova. Tuonesha kuti nise Mboni zake mwa kulalikila uthenga uweme nouzhyako ayakine zokhuza yove. Tukondwela ngako tikayavya munthu wamene ali na ‘maganizo oyenelela’ kuti ayambe kutumikila Yehova. (Mac. 13:48) Ngati zoteti zacitika, tusangalala monga ni mwecisangalalila Yesu pavuli pakuti ophunzila ŵake amuuzhya zofumapo ziweme zecipeza pa nchito yolalikila.—Luka 10:1, 17, 21.

2. Ndaŵa yanji tuona kuti nchito yolalikila ni yofunika ngako?

² Tuona nchito yolalikila kunkhala yofunika ngako mu umoyo wasu. Mtumwi Paulo elimbikisha Timoteyo kuti: “Nthawi zonse ukosamala na zaucita koma soti zauphunzisa. Cifukwa ngati ucita izi, ukazipulumuse weka koma soti okumvwishila.” (1 Tim. 4:16) Miyoyo ya ŵanthu ili pa ngozi. Tetyo, tufunika kuŵauzhya uthenga uweme kuti akapulumuke. Ndipo tufunika kusamala na zatucita cifukwa nise nzika za Ufumu wa Mulungu. Tetyo nthawi zonse, tuyesayesa kuti zocita zasu zikotwala ulemelelo kwa Yehova na kuti zikokatizhyana na uthenga watulalikila. (Afil. 1:27) Kuyangizhyila apo, tuonesha kuti tusamala na zatuphunzisa mwa kukonzekela tikaliyoluta mu utumiki nosenga Yehova kuti atiyavye.

3. Kansi ni ŵanthu onse amene ocita cidwi na uthenga wasu? Fotokozani cisanzo.

³ Nthawi ziyakine, ŵanthu a m’gao yasu angocita lini cidwi na uthenga wasu olo kuti tuyesayesa kulalikila mwakhama. Ganizilani cisanzo ca mkwasu Georg Lindal. Kuyambila mu 1929 mpaka mu 1947, ni yove tyala wamene enze Mboni ya Yehova m’calo ca Iceland. Koma eyesayesa kulalikila mwakhama ku mbali zosiyanasiyana za m’calo ici. Mkwasu uyu egaŵila zofalisa masauzande anyinji ku ŵanthu, koma paliye olo m’mozi ephunzila cendi. Yove elaŵila kuti: “Ŵanthu ayakine enzosusha uthenga wenenzophunzisa ndipo ayakine enzeve cidwi. Pavuli pake, etumako amishonale amene esilizhya maphunzilo a Sukulu ya Giliyadi kuti akayavye pa nchito yolalikila ku calo ici. Koma pepita vyaka 9 kuti akwanishe kuyavya ayakine kuluta pasogolo mpaka kubatizika. *

4. Kansi tingamvwe tyani ngati ŵanthu ocita lini cidwi na uthenga wasu?

 ⁴ Nthawi ziyakine tingataye mtima ngati ŵanthu ocita lini cidwi na uthenga watulalikila. Izi zingaticitishe kumvwa cisoni monga ni mwecimvwila Paulo cifukwa Ayuda ekana kuvomelezhya kuti Yesu ni Mesiya. (Aro. 9:1-3) Payakine mwankhala muphunzila Baibo na munthu muyakine, ndipo muyesayesa kuphunzisa mwaluso nomupemphelela kuti alute pasogolo. Koma mwaona kuti ocinja lini umoyo wake ndipo muganiza zoleka kuphunzila naye. Olo payakine kufumila pemwebatizika mukaliyoyavyako munthu kuluta pasogolo mpaka kubatizika. Kansi izi zutanthauza kuti mucita lini khama mu utumiki? Olo zuonesha kuti Yehova odalisa lini kuyesayesa kwanu? Nkhani ino, iyankhe makonsho aŵili aya: (1) Kansi n’cinji cuonesha kuti khama yasu yuluta lini patyala mu utumiki? (2) Kansi tufunika kuyembekezela zinthu zotyani patulalikila?

5. Ndaŵa yanji ni nthawi lini zonse pamene utumiki wasu ungankhale na zofumapo ziweme monga ni mwatufunila?

⁵ Ponena za munthu wamene ocita cifunilo ca Mulungu, Baibo yulaŵila kuti: “Zocita zake zonse zumuyendela bwino.” (Sal. 1:3) Koma izi zutanthauza lini kuti zilizonse zatucita potumikila Yehova, zikonkhala na zofumapo zabwino monga ni mwatufunila. Talaŵila teti cifukwa tonse tiliye ungwilo ndipo umoyo ni “wozula na mavuto.” (Yobu 14:1) Kuyangizhyila apo, ŵanthu amene otisusha angaleshe nchito yasu yolalikila. (1 Akor. 16:9; 1 Ates. 2:18) Lomba ndaŵa yanji Yehova oyamikila zilizonse zatucita mu utumiki olo kuti tingankhale lini na zofumapo ziweme monga ni mwatufunila? Tiyeni tilaŵizhyane mfundo za m’Baibo zamene zingatiyavye kuyankha konsho iyi.

6. Ndaŵa yanji Yehova oyamikila zilizonse zatucita pomutumikila?

⁶ Yehova oona khama yatucita na kupilila kwasu. Yove osangalala ngako ngati tucita khama pa nchito yolalikila cifukwa comukonda, mosasamala kanthu kuti ŵanthu omvwishila uthenga wasu olo yai. Mtumwi Paulo ekamba kuti: “Mulungu ni wolungama ndipo angaluŵe lini nchito yanu na cikondi cemweonesha pa zina yake mwa kutumikila atuŵa ndipo mupitilizhya kuŵatumikila.” (Aheb. 6:10) Yehova oluŵa lini cikondi catuonesha pa zina yake na khama yatucita mu utumiki, olo kuti kufumila petabatizika tikaliyoyavyako munthu kuluta pasogolo mpaka kubatizika. Tetyo, nase tingalimbikishiwe na mau yecilaŵila mtumwi Paulo kwa Akhristu a ku Korinto. Yove eciti: “Zonse zamucita m’nchito ya Asikulu zuluta lini patyala.”—1 Akor. 15:58.

7. Kansi tuphunzilapo cinji pa zecilaŵila mtumwi Paulo zokhuza utumiki wake?

⁷ Mtumwi Paulo enze m’mishonale wakhama ndipo eyavya kuti mipingo inyinji inkhazikishiwe m’mizinda yosiyanasiyana. Koma ŵanthu ayakine penzomunena kuti enze lini mphunzisi waluso, yove aliyolaŵile ciŵelengelo ca ŵanthu ŵeciyavya kunkhala Akhristu. M’malomwake, eŵayankha kuti: “Nacita nchito zinyinji.” (2 Akor. 11:23) Molingana na Paulo, tikokumbukila kuti cofunika ngako kwa Yehova ni  khama yatucita na kupilila kwasu, osati ciŵelengelo ca ŵanthu ŵatayavya kuwela m’gulu yake.

8. Kansi n’cinji cufunika kutipasa cimwemwe patulalikila?

⁸ Yehova osangalala ngati tucita khama pa nchito yolalikila. Pa nthawi iyakine, Yesu etuma ophunzila ŵake 70 kuti akalalikile uthenga wa Ufumu. Pecisilizhya kulalikila, ophunzila aŵa ewelako apo n’kuti ‘ni osangalala.’ Kansi n’cinji cecitisha kuti asangalale? Ove elaŵila kuti: “Olo viŵanda vatigonjela petenzoseŵenzesha zina yanu.” Koma Yesu eongolela maganizo ŵao mwa kuŵauzhya kuti: “Musakondwele kuti mizimu yakugonjelani, koma kondwelani cifukwa mazina yanu yalembewa kululu.” (Luka 10:17-20) Yesu eziŵa kuti ni nthawi lini zonse pamene ophunzila ŵake akonkhala na zofumapo ziweme mu utumiki. Ndipo Baibo yulaŵila lini kuti ni angati mwa ŵanthu ŵecilalikila ophunzila aŵa amene enkhala Akhristu. Tetyo, ophunzila aŵa enzofunika lini tyala kukondwela cifukwa enkhala na zofumapo ziweme mu utumiki. Koma kupambana zonse enzofunika kusangalala poziŵa kuti Yehova ekondwela na khama yecicita.

9. Molingana na Agalatiya 6:7-9, kansi Yehova watilonjeza kuti akatipase cinji ngati tupitilizhya kulalikila mwakhama?

⁹ Ngati tupilila patucita nchito yolalikila, tikapeze moyo wosasila. Tetyo, tufunika kucita khama pa nchito yolalikila nopanga ophunzila. Ngati tucita izi, tulola mzimu utuŵa kutisogolela pa umoyo wasu. Mosasamala kanthu kuti kufumila petebatizika tikaliyoyavyako munthu kuluta pasogolo mpaka kubatizika, Yehova otilonjeza kuti akatipase moyo wosasila ngati tupitilizhya kucita khama pa nchito yolalikila.—Ŵelengani Agalatiya 6:7-9.

10. Ndaŵa yanji ayakine omvwishila uthenga wasu pamene ayakine okana?

¹⁰ Munthu aliyense, omvwishila olo kukana uthenga wasu kulingana na mwaulili mtima wake. Yesu efotokoza mfundo iyi pecilaŵila fanizo ya munthu wamene ekomola mbeu pa nthaka zosiyanasiyana. Koma ni mbeu tyala yeponela pa nthaka iweme yamene yenkhala na vitwalo. (Luka 8:5-8) M’fanizo iyi, Yesu elaŵila kuti nthaka zosiyanasiyana zupanamila mitima ya ŵanthu osiyanasiyana na zakucita akalandila “Mau a Mulungu.” (Luka 8:11-15) Munthu wa m’fanizo iyi, enzeve mphamvu zocitisha kuti mbeu zecikomola zikule. Molingana na izi, nase tiliye mphamvu zocitisha kuti ŵanthu ŵatulalikila akule mwauzimu, cifukwa zudalila mwaulili mtima wao. Seo tufunika tyala kucita mbali yasu yamene ni kukomola mbeu za Ufumu ndipo Mulungu niye okulisha. Mtumwi Paulo elaŵila kuti: “Aliyense payeka akalandile mphoto yake molingana na nchito yake,” osati molingana na zofumapo zake.—1 Akor. 3:8.

11. Ndaŵa yanji Yehova eona kuti Nowa enze mlaliki wakhama olo kuti ŵanthu aliyomvwishile uthenga wake? (Onani cithunzithunzi pacikuto.)

¹¹ M’Baibo muli visanzo va atumiki a Mulungu amene enzocita khama pa nchito yolalikila olo kuti ŵanthu enzomvwishila lini uthenga wao. Mwacisanzo, Nowa enze “mlaliki wacilungamo,” ndipo elalikila kwa vyaka pafupifupi 40 olo 50. (2 Pet. 2:5) Mosakaikila, yove enzoyembekezela kuti ŵanthu ayakine amvwishile uthenga wake nocitapo kanthu. Koma Yehova enzoziŵa kuti paliye munthu olo m’mozi wati amvwishile uthenga wake. Talaŵila teti cifukwa pecisilizhya kum’pasa malangizo okhuza momangila cingalawa, Yehova emuuzhya kuti: “Weo ukaloŵe m’cingalawa camene ico pamozi na ŵana ŵako, mkazi wako na azinakazi a ŵana ŵako.” (Gen. 6:18) Ndipo Yehova peenzomuuzhya kukula kwa cingalawa ceenzofunika kumanga, payakine Nowa ezindikila kuti ngati pangankhale ŵanthu amene angamvwishile uthenga wake, niye kuti ni atontho cifukwa malo sembe aliyokwanile. (Gen. 6:15) Monga ni mwatuziŵila, paliye olo munthu m’mozi wamene emvwishila uthenga weenzolalikila Nowa. (Gen. 7:7) Kansi Yehova eona kuti  Nowa aliyocite khama pa nchito yolalikila? Yai. Pamenso pa Mulungu, Nowa enze mlaliki wakhama cifukwa ecita ndendende monga ni mwecimuuzhyila.—Gen. 6:22.

12. Kansi n’cinji ceyavya mneneli Yeremiya kupitilizhya kulalikila mwacimwemwe olo kuti ŵanthu enzomvwishila lini uthenga wake?

¹² Molingana na Nowa, mneneli Yeremiya elalikila kwa vyaka vopitilila 40. Koma ŵanthu aliyomvwishile uthenga wake ndipo ayakine enzomususha. Ŵanthu anyinji ‘enzomunyoza nomutonzhya.’ Izi zecitisha kuti afooke ndipo eganiza kuti cenze bwino kuti aleke kulalikila. (Yer. 20:8, 9) Koma mneneli Yeremiya aliyotaye mtima. Kansi n’cinji cemuyavya kuti apitilizhye kulalikila mwacimwemwe? Coyamba, ekumbukila kuti uthenga wenzolalikila wenzopasa ŵanthu ‘ciyembekezo ndipo sembe weŵayavya kuti ankhale na sogolo yabwino.’ (Yer. 29:11) Caciŵili, ekumbukila kuti Yehova niye emusankha kuti akouzhya ŵanthu uthenga wake. (Yer. 15:16) Molingana na Yeremiya, nase tulalikila uthenga wamene upasa ŵanthu ciyembekezo. Ndipo Yehova niye etisankha kuti tikoziŵika na zina yake na kuti tikocitila umboni za yove. Ngati nthawi zonse tuyesayesa kukumbukila mfundo izi, tipitilizhye kulalikila mwacimwemwe olo kuti ŵanthu omvwishila lini uthenga wasu.

13. Kansi tuphunzilapo cinji pa fanizo yecifotokoza Yesu yupezeka pa Maliko 4:26-29?

¹³ Zutola nthawi kuti munthu akule mwauzimu. Yesu ephunzisa mfundo iyi pecilaŵila fanizo ya munthu wamene ekomola mbeu noyona. (Ŵelengani Maliko 4:26-29.) Mbeu izi zeyamba kukula patontho-patontho, ndipo yove enzeve mphamvu zocitisha kuti zikule kamangu-kamangu. Molingana na munthu wa m’fanizo iyi, nase tingafunike kuleza mtima patuyembekezela kuti munthu watuphunzila naye Baibo, ayambe kuseŵenzesha zakuphunzila. Monga ni mwazilili kuti mlimi aliye mphamvu zocitisha kuti mbeu zikule kamangu-kamangu monga ni mwakufunila, nase tiliye mphamvu zocitisha kuti wophunzila Baibo wasu alute pasogolo kamangu-kamangu monga ni mwatufunila. Tetyo, tufunika lini kufooka ngati oluta lini pasogolo monga ni mwetenzoyembekezela. Molingana na mlimi, tufunika kunkhala oleza mtima noyembekezela kuti apange cosankha pa yove yeka noyamba kutumikila Yehova.—Yak. 5:7, 8.

14. Fotokozani cisanzo cuonesha kuti zingatole nthawi kuti ŵanthu ayambe kumvwishila uthenga wasu.

¹⁴ Magao ayakine ni ayumu ndipo zingatole nthawi itali kuti tiyavye munthu kufwika mpaka pobatizika. Ganizilani cisanzo ca kalongosi Gladys na Ruby Allen, amene ni pokwao. * Mu 1959, ove etumizhyiwa kuti akatumikile monga apainiya apadela mumzinda wa Quebec ku Canada. Ŵanthu a mumzinda uyu, enzokana kulaŵizhyana na a Mboni za Yehova cifukwa enzoyopa kuti maneba ŵao na ansembe acikatolika akaŵaona, angayambe kuŵanyoza olo kuŵavutisha. Kalongosi Gladys elaŵila kuti: “Kwa vyaka viŵili, tenzocita ulaliki wa ng’anda na ng’anda kwa maola 8 pa siku, koma paliye olo munthu m’mozi evomela kulaŵizhyana nase. Tenzocita kuti tikagogoda pa ng’anda ya munthu, akangotiona kuti nise a Mboni za Yehova, basi enzovalako monga kuti aliyotione. Koma tiliyotaye mtima.” M’kuluta kwa nthawi, ŵanthu eyamba kucinja maganizo ŵao ndipo ayakine eyamba kumvwishila uthenga wa Ufumu. Lomba, m’tauni iyi muli mipingo itatu.—Yes. 60:22.

15. Kansi 1 Akorinto 3:6, 7 yutiphunzisanji pa nkhani yopanga ophunzila?

¹⁵ Pofunika khama ya ŵanthu anyinji kuti munthu ankhale wophunzila. Izi zuonesha kuti tonse mumpingo tufunika kucita khama kuti tiyavye wophunzila Baibo kuluta pasogolo nobatizika. (Ŵelengani 1 Akorinto 3:6, 7.) Mwacisanzo, mkwasu angagaŵile katrakiti olo magazini ku munthu wacidwi. Koma cifukwa cotangwanika na zinthu ziyakine, angasenge wofalisa  muyakine kuti akacite ulwendo wowelelako. Pavuli pocita ulwendo wowelelako, wofalisa uyu angankhazikishe phunzilo ya Baibo. Posogoza phunzilo, yove angotolako ofalisa osiyanasiyana ku phunzilo iyi. Ndipo wofalisa aliyense angolimbikisha phunzilo iyi kuti ikule mwauzimu. Izi zingacitishe kuti aliyense mumpingo asangalale ngati wophunzila wabatizika.—Yoh. 4:35-38.

16. Ndaŵa yanji tufunika kupitilizhya kulalikila mwacimwemwe olo kuti tucita lini zinyinji cifukwa ca matenda olo ukulukazi?

¹⁶ Nanga tyani ngati mucita lini zinyinji pa nchito yolalikila nophunzisa cifukwa ca matenda olo ukulukazi? Musataye mtima. Tukulimbikishani kuti mupitilizhye kulalikila mwacimwemwe poziŵa kuti Yehova oyamikila zilizonse zamukwanisha kucita. Ganizilani cisanzo ca Mfumu Davide na masoja ŵake. Pa nthawi iyakine peenze ku nkhondo, Aamaleki eloŵa m’misasa yao noŵatolela katundu pamozi na mabanja ŵao. Peciona izi, Davide na masoja ŵake eganiza zakuti aŵakonkhe kuti apulumuse katundu na mabanja ŵao. Koma masoja ayakine 200 enze eŵeŵa ngako cakuti aliyokwanishe kuluta ku nkhondo iyi. Ndipo esala m’misasa kuti akolonda katundu yecisiyako Aamaleki. Davide na masoja ŵake ekwanisha kugonjesa Aamaleki ndipo eŵalonda katundu wao unyinji. Koma pecifwika ku misasa, Davide elamula kuti masoja eluta ku nkhondo kuyangizhyilapo na ŵala esala m’misasa, onse apasiwe katundu wolingana. (1 Sam. 30:21-25) Nkhani iyi, yutiphunzisa mfundo yofunika ngako pa nchito yopanga ophunzila. Payakine mucita lini zinyinji pa nchito iyi cifukwa ca matenda olo ukulukazi. Koma ngati mucita zonse zamungakwanishe, mukonkhala wosangalala ngati wophunzila Baibo wabatizika.

17. Kansi tufunika kuyamikila Yehova cifukwa ca cinji?

¹⁷ Tuyamikila Yehova cifukwa osangalala na zilizonse zatucita pa nchito yolalikila. Yove oziŵa kuti tingakwanishe lini kukakamizhya ŵanthu kuti amvwishile uthenga wasu noyamba kumutumikila. Olo n’tetyo, oyamikila ngako ngati tucita khama mu utumiki cifukwa comukonda ndipo otidalisa. Kuyangizhyila apo, otiphunzisa zatingacite kuti tikophunzisa ŵanthu mokata mtima. Izi zutiyavya kuti tikocita nchito iyi mwacimwemwe. (Yoh. 14:12) Tetyo, tingankhale osimikizhya kuti Yehova apitilizhye kutidalisa ngati tutaya lini mtima.