1. Ke ka baka la’ng re thabela go ba Dihlatse tša Jehofa?

 RE THABIŠWA kudu ke go ba Dihlatse tša Jehofa! Ka ge re le Dihlatse tša Jehofa re bontšha seo ka go botša ba bangwe ditaba tše dibotse le go ba ruta ka yena. Re a thaba ge re thuša motho yo a nago le “tshekamelo e swanetšego ka bophelo bjo bo sa felego” gore a ithute ka Modimo. (Dit. 13:48) Re ikwa go swana le Jesu yoo a ilego a “thaba kudu” ge barutiwa ba gagwe ba be ba mmotša gore batho ba ile ba ba theetša ge ba be ba ba botša ditaba tše dibotse.—Luka 10:1, 17, 21.

2. Re ka bontšha bjang gore re lebelela modiro wo wa go bolela ditaba tše dibotse o le bohlokwa?

² Re lebelela modiro wa go bolela ditaba tše dibotse o le bohlokwa kudu. Moapostola Paulo o ile a kgothaletša Timotheo gore: “O itlhokomele ka mehla, o hlokomele le go ruta ga gago . . . ka go dira se o tla iphološa wa ba wa phološa bao ba go theetšago.” (1 Tim. 4:16) Ka gona modiro wa rena wa go bolela ditaba tše dibotse o phološa maphelo a batho. Ka ge re botša ba bangwe ka Mmušo wa Modimo, re swanetše go dula re itlhokomela. Le gona, re swanetše go dula re itshwara ka tsela yeo e tlago go dira gore batho ba bangwe ba rete Modimo le go phela ka go dumelelana le seo re se rutago batho. (Bafil. 1:27) Re swanetše go ‘hlokomela tsela yeo re rutago’ batho ba bangwe ka yona ka gore re lokišetše gabotse pele re eya tšhemong, le go kgopela Jehofa gore a re thuše go bolela le batho.

3. Batho ba bangwe ba ka arabela bjang ge re ba botša ditaba tše dibotse? Nea mohlala.

³ Le ge re ka dira sohle seo re ka se kgonago go botša batho ba bangwe ditaba tše dibotse, ga se batho ba bantši bao ba tlago go re theetša tšhemong ya gabo rena. A re boneng mohlala wa Ngwanabo rena Georg Lindal yoo a ilego a bolela ditaba tše dibotse a le noši kua Iceland go tloga ka 1929 go fihla ka 1947. O ile a nea batho dikgatišo tše dintši kudu eupša ga go motho yoo a ilego a ba yo mongwe wa Dihlatse tša Jehofa. O ngwadile gore: “Batho ba bangwe ba bonagala eka ba ganetša molaetša wa Beibele eupša bontši bja bona ba no ba ba sa nyake go theetša molaetša wa yona.”  Baromiwa bao ba bego ba alogile sekolong sa Gilead le bona ba ile ba ya moo gore ba botše batho ditaba tše dibotse eupša go be go no swana. Ka morago ga mengwaga e senyane batho ba bangwe ba moo ba ile ba kolobetšwa.

4. Re tlo ikwa bjang ge batho ba sa amogele ditaba tše dibotse?

⁴ Re a nyama ge batho ba sa amogele molaetša wa rena wa go bolela ditaba tše dibotse. Re ka ikwa go swana le Paulo, yoo a ilego a ‘nyama kudu le go kwa bohloko bjo bo sa kgaotšego’ ka gobane Bajuda ba bantši ba be ba sa dumele gore Jesu e be e le Mesia yo a holofeditšwego. (Rom. 9:1-3) Mohlomongwe o ka ba o leka ka thata gore o rute motho yo a itšego Beibele e bile o mo rapelela eupša motho yoo a sa dire tšwelopele, ke moka wa phetha ka gore o tlogele go ithuta Beibele le yena. Goba mohlomongwe ga se wa ka wa ruta motho yo a itšego Beibele go fihla a kolobetšwa. Na o swanetše go ipona molato gomme wa bona eka Jehofa ga a tšee modiro wa gago wa go bolela ditaba tše dibotse e se selo? Sehlogong se, re tlo araba dipotšišo tše pedi: (1) Ke’ng seo se bontšhago gore Jehofa o lebelela modiro wa rena wa go bolela ditaba tše dibotse o le bohlokwa? (2) Re swanetše go letela’ng ge re botša batho ba bangwe ditaba tše dibotse?

5. Ke ka baka la’ng modiro wa rena wa go bolela ditaba tše dibotse o sa dule o atlega ka tsela yeo re letetšego ka yona?

⁵ Beibele e re ge motho a dira thato ya Modimo, selo “se sengwe le se sengwe seo a se dirago se tla atlega.” (Ps. 1:3) Eupša seo ga se bolele gore dilo ka moka tšeo re di direlago Jehofa di tlo atlega ka tsela yeo re nyakago ka yona. Batho ba na le ‘mathata a mantši’ ka ge ba sa phethagala. (Job 14:1) Le gona, ka dinako tše dingwe batho bao ba re ganetšago ge re bolela ditaba tše dibotse ba ka atlega. (1 Bakor. 16:9; 1 Bathes. 2:18) Ka gona, ke’ng seo Jehofa a se lebelelago ge re bolela ditaba tše dibotse? A re boneng melao e mengwe ya motheo yeo e tlago go re thuša go araba potšišo ye.

6. Jehofa o lebelela modiro wa rena wa go bolela ditaba tše dibotse go fihla bokgoleng bofe?

⁶ Jehofa o a bona gore re šoma ka thata le gore re a kgotlelela. Jehofa o a thaba ge a bona gore re dira modiro wa rena wa go bolela ditaba tše dibotse ka mafolofolo le ka gobane re mo rata, go sa šetšwe gore batho ba bangwe ba a re theetša goba ga ba re theetše. Paulo o ngwadile gore: “Modimo ga se yo a sa lokago moo a ka lebalago modiro wa lena le lerato leo le le bontšhitšego leineng la gagwe, ka ge le hlanketše bakgethwa e bile le tšwela pele le ba hlankela.” (Baheb. 6:10) Jehofa a ka se tsoge a lebetše tsela yeo re mo hlankelago ka yona le yeo re mo ratago ka yona gaešita le ge go se na batho bao re ba thušitšego gore ba kolobetšwe. Ge re šoma ka thata eupša dilo di sa direge ka tsela yeo re nyakago ka yona, re ka diriša keletšo yeo Paulo a ilego a e nea Bakorinthe, yeo e rego: “Boitapišo bja lena ga se bja lefeela moreneng.”—1 Bakor. 15:58.

7. Re ka ithuta’ng go seo moapostola Paulo a ilego a se bolela ka modiro wa gagwe wa go bolela ditaba tše dibotse?

⁷ Moapostola Paulo e be e le moromiwa yoo a bego a na le bokgoni, yoo a ilego a hloma  diphuthego ditoropong tše dintši. Eupša ge batho ba bangwe ba be ba mo kwera e bile ba mmotša gore ga a kgone go ruta, ga se a ka a bolela gore o thušitše batho ba bakae gore e be Bakriste. Ge a fetola batho bao ba bego ba mo kwera o ile a re: “Ke dirile modiro o montši.” (2 Bakor. 11:23) Go no swana le Paulo, re swanetše go gopola gore Jehofa o lebelela maiteko a rena le go kgotlelela ga rena go le bohlokwa kudu.

8. Ke’ng seo re swanetšego go se gopola ge re botša batho ditaba tše dibotse?

⁸ Jehofa o a thaba ge re botša batho ditaba tše dibotse. Jesu o ile a roma barutiwa ba gagwe ba 70 gore ba yo bolela ditaba tše dibotse tša Mmušo wa Modimo gomme ba ile ba “boa ba thabile.” Ke ka baka la’ng ba be ba thabile? Ba itše: “Re laola gaešita le batemona ka go diriša leina la gago.” Eupša Jesu o ile a ba botša gore: “Le se ke la thabišwa ke gore le laola meoya e mebe, eupša thabang gobane maina a lena a ngwadilwe magodimong.” (Luka 10:17-20) Jesu o be a tseba gore ba be ba ka se dule ba atlega ge ba botša batho ditaba tše dibotse. Ge e le gabotse, ga re tsebe gore batho bao balatedi ba Jesu ba ilego ba ba botša ditaba tše dibotse la mathomo, ke ba bakae bao e ilego ya ba Bakriste. Barutiwa ba Jesu ba be ba sa swanela ke go thabišwa feela ke gore batho ba be ba amogetše molaetša wa bona eupša ba be ba swanetše go thabišwa kudu ke go tseba gore Jehofa o be a thaba ge a bona gore ba šoma ka thata.

9. Go ya ka Bagalatia 6:7-9, re tlo hwetša’ng ge re kgotlelela modirong wa go bolela ditaba tše dibotse?

⁹ Ge re kgotlelela modirong wa go bolela ditaba tše dibotse re tlo phela go ya go ile. Ge re dumelela moya o mokgethwa o re thuša go dira sohle seo re ka se kgonago go bolela ditaba tše dibotse le go ruta ba bangwe, re tla be re ‘bjala moyeng.’ Le gona ge e ba re ka se “fele matla” goba ra se “lape,” Jehofa o re kgonthišetša gore re tlo phela go ya go ile, go sa šetšwe gore re thušitše batho ba bakae gore ba kolobetšwe goba ga se ra ba thuša.—Bala Bagalatia 6:7-9.

10. Ke ka baka la’ng batho ba bangwe ba amogela molaetša wa rena mola ba bangwe ba sa o amogele?

¹⁰ Batho ba ikgethela ge e ba ba nyaka go theetša molaetša wa rena goba ba sa nyake go o theetša. Jesu o ile a hlalosa taba ye gabotse papišong ya gagwe ya mobjadi yoo a bjalago peu ya gagwe mobung wa go se swane. Eupša e bile peu e tee feela yeo e ilego ya enywa dienywa. (Luka 8:5-8) Jesu o itše mobu wa go se swane o swantšhetša batho bao ba arabelago “lentšu la Modimo” ka ditsela tša go se swane. (Luka 8:11-15) Go no swana le mobjadi, re ka se gapeletše batho bao re ba rutago gore ba diriše seo re ba rutago sona, eupša bona ka bobona ba swanetše go ikgethela. Mošomo wa rena ke go tšwela pele re bjala peu e botse ya ditaba tše dibotse tša Mmušo wa Modimo ka dipelong tša batho. Moapostola Paulo o itše: “Motho yo mongwe le yo mongwe o tla amogela moputso wa gagwe go ya ka boitapišo bja gagwe,” e sego go ya ka gore o thušitše batho ba bakae.—1 Bakor. 3:8.

11. Ke ka baka la’ng Jehofa a ile a thaba ge Noa a be a botša batho molaetša wo o tšwago go Modimo le ge ba be ba sa nyake go mo theetša? (Bona seswantšho sa letlakala la ka ntle.)

¹¹ Bahlanka ba Jehofa ba nakong e fetilego le bona ba ile ba botša batho ka molaetša wa Modimo le ge ba be ba sa nyake go ba theetša. Ka mohlala, Noa o bile “mmoledi wa toko,” ka mengwaga e ka bago e 40 goba e 50. (2 Pet. 2:5) Mohlomongwe o be a nagana gore batho ba bangwe ba be ba tla mo theetša, eupša Jehofa ga se a mmotša gore ba be ba tla mo theetša. Go e na le moo, ge Jehofa a be a botša Noa gore a age areka, o ile a re: “[Tsena] ka arekeng, wena le barwa ba gago le mosadi wa gago gotee le basadi ba barwa ba gago.” (Gen. 6:18) Ka gona ge Jehofa a be a laela Noa gore a age areka e kaakang, mohlomongwe Noa a ka ba a ile a nagana gore batho ba bantši ba ka se mo theetše ka ge a be a ka  nagana gore ba ka se kgone go felela ka arekeng. (Gen. 6:15) Ka ge re tseba, ga go na motho yoo a ilego a theetša Noa. (Gen. 7:7) Na Jehofa o ile a nagana gore Noa ga se a botša batho ka moka ditaba tše dibotse? Aowa! Jehofa o ile a thabišwa kudu ke gore Noa o ile a dira dilo tšeo a mo kgopetšego tšona.—Gen. 6:22.

12. Ke’ng seo se ilego sa thuša moporofeta Jeremia gore a thabele go botša batho ditaba tše dibotse gaešita le ge ba be ba sa mo theetše e bile ba mo ganetša?

¹² Moporofeta Jeremia le yena o ile a botša batho ditaba tše dibotse ka mengwaga e mentši eupša ba sa mo theetše e bile ba mo ganetša. O ile a nyama ge batho bao ba bego ba mo ganetša ba be ba mo ‘goboša e bile ba mo kwera’ moo a ilego a ikwa eka a ka tlogela kabelo ya gagwe. (Jer. 20:8, 9) Eupša Jeremia ga se a ka a fela matla! Ke’ng seo se ilego sa mo thuša gore a tšwele pele a botša batho ditaba tše dibotse le go dula a thabile? O ile a nagana ka dilo tše pedi tše bohlokwa. Sa pele, molaetša woo Modimo a bego a kgopetše Jeremia gore a o botše batho, o be o tlo ba thuša gore ba be le “bokamoso le kholofelo.” (Jer. 29:11) Sa bobedi, Jehofa o be a kgethile Jeremia gore a botše batho molaetša wa gagwe. (Jer. 15:16) Le rena re botša batho molaetša woo o tlago go ba thuša gore ba be le kholofelo, e bile re hlatsela seo Jehofa a se boletšego ka gobane re bitšwa ka leina la gagwe. Ge re dula re nagana ka dilo tše tše pedi tše bohlokwa, re tlo thabela go botša batho ditaba tše dibotse go sa šetšwe gore ba a re theetša goba ga ba re theetše.

13. Re ithuta’ng papišong ya Jesu yeo e lego go Mareka 4:26-29?

¹³ Go ka tšea nako gore motho yo re ithutago le yena Beibele a dire tšwelopele. Jesu o ile a re thuša go kwešiša se papišong ya motho yoo a ilego a bjala peu gomme a robala. (Bala Mareka 4:26-29.) Ka morago ga gore a bjale dipeu, dibjalo tša gagwe di ile tša gola ganyenyane-ganyenyane le gona o be a ka se kgone go di thuša gore di gole kapela. Le rena go ka re tšea nako gore batho bao re ithutago Beibele le bona ba diriše seo ba ithutago sona. Mobjadi a ka se kgone go gapeletša dibjalo tša gagwe gore di gole ka nako yeo yena a nyakago ka yona. Ka mo go swanago, le rena re ka se kgone go gapeletša barutwana ba Beibele gore ba dire tšwelopele ka nako yeo re nyakago ka yona. Ka gona o se ke wa nyama goba wa fela matla ge batho bao o ithutago le bona Beibele ba sa dire tšwelopele kapela. Go swana le babjadi, ga se ra swanela go fela pelo ya gore batho bao re ithutago le bona Beibele ba kolobetšwe.—Jak. 5:7, 8.

14. Ke mohlala ofe woo o bontšhago gore go ka tšea nako gore batho ba thome go theetša molaetša wa rena?

¹⁴ Mafelong a mangwe go ka tšea nako e telele gore motho a feleletše a kolobeditšwe. Nagana ka mohlala wa kgaetšedi Gladys le kgaetšedi Ruby Allen, e lego bana ba motho bao ba ilego ba fiwa kabelo ya gore e be babulamadibogo ba ka mehla ka 1959 profenseng ya Quebec kua Canada. * Ka ge batho ba moo ba be ba tšhaba gore baagišani ba bona le baruti ba bona ba tla reng, ba be ba sa theetše ditaba tše dibotse. Gladys o re: “Re feditše mengwaga e mebedi re eya ka ntlo le ntlo, re šoma tšhemo diiri tše seswai ka letšatši eupša go se na motho yo a boledišanago le rena! Batho ba be ba no tla monyako ba re hlodimela gomme ba gomela morago. Eupša ga se ra ka ra fela matla.” Ge nako e dutše e eya, batho ba ile ba thoma go fetoga ganyenyane-ganyenyane, ke moka ba thoma go theetša. Gona bjale toropong yeo go na le diphuthego tše tharo.—Jes. 60:22.

15. Bakorinthe ba Pele 3:6, 7 e re ruta’ng ka modiro wa go dira batho barutiwa?

¹⁵ Go hlokega batho ba bantši gore ba thuše morutwana gore a feleletše a kolobeditšwe. Yo mongwe le yo mongwe ka phuthegong a ka kgona go thuša thuto ya Beibele gore e feleletše e kolobeditšwe. (Bala 1 Bakorinthe 3:6, 7.) Ka mohlala, ngwanabo rena a ka nea motho yo a thabelago pampišana goba makasine. Ke moka ngwanabo rena yoo a hwetša gore maemo a gagwe ga a  mo dumelele gore a dire leeto la go boela go motho yoo. Ka gona a kgopela ngwanabo rena yo mongwe gore a boele go yena. Ke moka ngwanabo rena yoo a boetšego go motho yoo, a thoma thuto ya Beibele le yena. Ka morago, yena a mema bana babo rena le dikgaetšedi ba bangwe ge a eya go ithuta le motho yoo. Ke moka ba kgothatša morutwana ka ditsela tša go se swane. Ngwanabo rena goba kgaetšedi yo mongwe le yo mongwe, o tlo thuša morutwana yoo gore a ithute ka mo go oketšegilego ka Jehofa. Mafelelong ka moka ga bona ba tlo thaba ge morutwana yoo a kolobetšwa.—Joh. 4:35-38.

16. Ke ka baka la’ng o swanetše go thabela go botša batho ditaba tše dibotse gaešita le ge o babja goba o se sa na matla?

¹⁶ Mohlomongwe ga o sa kgona go botša batho ditaba tše dibotse le go ba ruta go swana le mathomong ka gobane o babja goba o se sa na matla. Eupša o ka thaba le ge maemo a fetogile. Nagana ka Kgoši Dafida yoo yena le banna ba gagwe ba ilego ba ya ba phološa malapa a bona go Baamaleke le go ba tšeela dilo tša bona. Banna ba 200 bao ba bego ba sepela le Dafida ba be ba lapišitšwe ke go lwa gomme ba ithaopela go šala le merwalo. Dafida le banna ba gagwe ba ile ba fenya ntweng gomme ba tšeela banna bao ba bego ba elwa le bona dilo tše bohlokwa kudu. Ka gona Dafida a laela gore banna bao a bego a na le bona ntweng go akaretša le bao ba bego ba šetše le merwalo, ba tla hwetša dilo tša go lekana. (1 Sam. 30:21-25) Taba ye e swana le modiro wa rena wa go bolela ditaba tše dibotse lefaseng ka moka. Yo mongwe le yo mongwe yoo a šomago ka thata go botša batho ditaba tše dibotse, a ka thabišwa ke gore o thuša batho gore ba tsebe Jehofa le go kolobetšwa.

17. Ke ka baka la’ng re swanetše go leboga Jehofa?

¹⁷ Re leboga Jehofa ka gobane o lebelela modiro wa rena wa go bolela ditaba tše dibotse ka tsela e lerato. O a tseba gore re ka se gapeletše batho gore ba thome go mo hlankela. Eupša o a bona gore re šoma ka thata le gore re a mo rata e bile o a re šegofatša. Le gona o re ruta gore re ka dira eng gore re thabe ge re dutše re ruta batho ditaba tše dibotse. (Joh. 14:12) Re ka kgodišega gore Jehofa o tla thabela seo re mo direlago sona ge e ba re sa fele matla!