1. Haʼátʼíí baa ahééh daniidzingo nihił dahózhǫ́?

JIIHÓVAH YÁ HALNEʼÉ niidlı̨́įgi baa ahééh daniidzingo nihił dahózhǫ́! Jiihóvah bízhiʼ bee danihiʼdójí, éí biniinaa bá nidahwiilneʼ dóó ídahoołʼaahii ádeilneʼ. “Iiná doo ninítʼiʼii yíká ádaatʼı̨́ı̨́” łaʼ naniitingo áádóó oodląąhgo éí yéigo baa nihił hózhǫ́ǫ łeh. (Acts 13:48, NW) Jesus bídahoołʼaahii éí nidahasneʼdę́ę́ʼ bił dahózhǫ́ǫgo nákai, áko Jesus ałdóʼ ‘bił hóózhǫǫd.’—Luke 10:1, 17, 21.

2. Haitʼéego éí nahwiilneʼígíí ílı̨́įgo baa nitsíikees?

² Nidahwiilneʼígíí éí ílı̨́įgo baa nitsídeikees. Yilʼaadii Paul éí Timothy díí baa ákonínízin doo yidííniid: “Naʼnítinígíí ałdóʼ baa áhólyą́ągo yínítąʼ, háálá díí baa nanináago yisdádíínááł, índa danółtsʼą́ąʼii yisdádookah.” (1 Tim. 4:16) Nidahwiilneʼgo nidaʼniitinígíí binahjįʼ yisdáʼiildéehgo átʼé. Timothy ábiʼdooʼniid yę́ęgi átʼéego ádaa ádahwiilyą́, háálá God biNahatʼaʼ biyaa shijaaʼ. Haneʼ yáʼátʼéehii baa dahwiilneʼígíí deiniidlą́ągo índa bikʼehgo dahiniiʼnáago éí Jiihóvah bee baa dahwiiʼniihgo ádeitʼı̨́. (Phil. 1:27) Yáʼátʼéehgo naʼniitin doogo éí nahwiilneʼ biniyé hashtʼe díníitʼée doo. Tʼáá bítséedi éí Jiihóvah bichʼįʼ sodizin ádiilníiłgo nahwiilneʼígíí yikʼijidlíi doo.

3. Nahwiilneʼgo, God biNahatʼaʼ baa haneʼ yídaneedlínígíí daatsʼí łaʼ bikʼídiidááł? Łaʼ baa chʼíhoníʼaah.

³ God biNahatʼaʼ bitsʼą́ą́dóó haneʼ yáʼátʼéehii nizhónígo baa hwiilneʼ ndi, doo tʼáá ałtso haneʼ deinízin da. Nihibrother Georg Lindal ákótʼéego bił hazʼą́ą́ ńtʼééʼ. Éí  1929dóó 1947jįʼ Iceland hoolyéedi tʼáá sáhí nahojisneʼ. Akʼeʼjishchı̨́įgo ájíní: “Tʼáá aaníigo naʼnitin éí łaʼ tʼáá íiyisíí yikʼijįʼ danilı̨́, ląʼí éí doo yídaneedlı̨́į da.” Azhą́ Gilead missionaries ndaʼnitinígíí áadi áká ííjéeʼ ndi, náhástʼéí nááhaigo índa Icelandgi kéédahatʼínígíí łaʼ baptize ádabiʼdiilyaa.

4. Haneʼ yáʼátʼéehii doo deinízingóó éí bikʼee haaniitʼée doo?

⁴ Bił dahwiilneʼígíí haneʼ yáʼátʼéehii doo deinízingóó éí bikʼee nihąąh nááhákaʼ. Paul ałdóʼ ákójítʼéé ńtʼééʼ. Ląʼí Jew dineʼé éí Jesus Mesáíyah nilı̨́įgi doo dayoodlą́ą da, éí biniinaa Paul ájíní: “Tʼáá íiyisí bąąh shíniʼgo shijéí yineesgai.” (Rom. 9:1-3) Wołí bee ánítʼı̨́įgo łaʼda nanítin áádóó bá sodílzin ndi doo náás dighááhgóoshąʼ? Doodaiiʼ nanítinígíí doo łaʼ baptize ábiʼdilnééhgóoshąʼ? Nahashneʼígíí Jiihóvah doo shá yikʼijidlíi da daatsʼí nínízin doo? Naakigo naʼídíkid baa nídadíitʼįįł. Éí: (1) Nahwiilneʼ yáʼátʼéehgo íilʼínígíí éí haʼátʼíí bee bééhózin? (2) Nahwiilneʼgo, haʼátʼíí biniyé bohónéedzánígíí tʼéí naólní?

5. Haʼátʼíí biniinaa Jiihóvah bá neiilʼaʼgi doo tʼáá ałtso íiniidzinígíí bikʼehgo áhodooníił da?

⁵ Diyin íinízinii yikʼehgo ááníiłii kótʼéego bá haʼoodzííʼ: “Tʼáá ájoolíłígíí yáʼátʼéehgo há áánííł.” (Ps. 1:3) Ákótʼée ndi, Jiihóvah bá neiilʼaʼgi doo tʼáá ałtso íiniidzinígíí bikʼehgo áhodooníił da. Bílaʼashdlaʼii éí beʼiinaʼ ‘nantłʼago bił nahazʼą́,’ háálá danihishchíinii dóó nihí nidaʼiyiilzííh. (Job 14:1) Nidahwiilneʼ yikʼijįʼ danilínígíí ałdóʼ haashı̨́ı̨́ nízahjįʼ danółtłʼa łeh. (1 Cor. 16:9; 1 Thess. 2:18) Yáʼátʼéehgoósh nahwiilneʼ, éísh Jiihóvah haitʼéego yinéłʼı̨́? Diyin Bizaad binaʼnitin bikʼehgo díí naʼídíkid bééhodoozįįł, łaʼ dadíníilʼįįł.

6. Jiihóvah bá neiilʼaʼgi, éísh haitʼéego yee nihinéłʼı̨́?

⁶ Jiihóvah éí yéigo neiilnishgi índa bidiniilkaalgi yinéłʼı̨́. Azhą́ diné haneʼ yáʼátʼéehii doo deinízin da ndi, nahwiilneʼ bíniidlı̨́įgo éí Jiihóvah ayóóʼííníʼníigo íitʼı̨́, áko Jiihóvah nihaa bił hózhǫ́. Paul kótʼéego akʼeʼashchı̨́: “Háálá baa nidasoohkaígíí áádóó Diyin God [bízhiʼ ayóóʼádeínóhʼníigo] bidiyı̨́ı̨́ʼ ayóóʼádeínóhʼníigo bá nidasoołʼaʼígíí, kʼad éí Diyin God tʼáá ákogi éʼéłʼı̨́įgo tʼahdii bá nidaałʼaʼígíí doo yaa yoonéeh da.” (Heb. 6:10) Azhą́ naniitinígíí doo baptize ábiʼdiilyaa da ndi, Jiihóvah éí bá neiilʼaʼígíí doo yaa yoonéeh da. Paul éí Kórinth dineʼé áyidííniid yę́ę nídéétʼiʼgo ánílééh. Paul áháłní: “Doo tʼáadoo biniyéhígóó Bóhólníihii bá nidaałʼaʼ dago nihił béédahózin,” azhą́ áhodoonííł niidzin yę́ę doo tʼáá ałtso ádzaa da ndi.—1 Cor. 15:58.

7. Yilʼaadii Paul nahasneʼígíí yaa hoolneʼ yę́ę bitsʼą́ą́dóó haʼátʼíí bídahwiidiilʼááł?

 ⁷ Yilʼaadii Paul éí kin dah naazhjaaʼgóó congregation dah yikahgo ádeileʼ áádóó missionary nilı̨́įgi nizhónígo ííłʼı̨́ı̨́ ńtʼééʼ. Paul éí nazhʼnitin doo jiichįįh da hoʼdiʼní. Ákondi, bídę́ę́ʼ ádíchʼą́ą́h haadzíiʼgo éí diné kónéelą́ą́ʼ nanishtingo daʼoosdląąd doo níi da. Naanish ádajiilaii bee ádaa dahojiʼniihgo Paul áháłní: ‘Ląʼí binishishnishgo átʼé.’ (2 Cor. 11:23, NW) Naanish bidiniilkaalígíí éí Jiihóvah bił nilı̨́, Paul naashnish yę́ę ákótʼéego bił nilı̨́įgo yá yénálniih.

8. Nidahwiilneʼgo haʼátʼíí béédeiilniih doo?

⁸ Nidahwiilneʼígíí Jiihóvah yaa bił hózhǫ́. Ídahoołʼaahii 70 yiltʼéego nidahalneʼ biniyé Jesus abiisʼaʼ. Éí ‘hoł dahózhǫ́ǫgo níjíkai.’ Haʼátʼíí baa hoł dahózhǫ́? Ádajiní: “Bóhólníihii, níłchʼi bidaʼiiníziinii nidi nízhiʼ yee nihikʼeh dahółʼı̨́!” Jesus éí doo ákótʼéégóó nitsídaakees hodííniid. Áháłní: ‘Níłchʼi nihikʼeh dahółʼínígíí éí tʼáadoo baa nihił dahózhóní, nidi yáʼąąshdi nihízhiʼ bee akʼedaʼashchínígíí éí baa nihił dahózhǫ́.’ (Luke 10:17-20) Jesus bił bééhózingo éí nidahojilneʼígíí doo tʼáá áłahjįʼ kótʼéego baa hoł dahózhǫ́ǫ da doo. Íídą́ą́ʼ daʼíistsʼą́ąʼgo daʼoosdląąd yę́ę éí ánéelą́ʼígíí doo nihił béédahózin da. Ídahoołʼaahii éí bił dahózhǫ́ǫgo nidahasneʼ. Ákondi Jiihóvah yił dahóshǫ́ǫgi éí aláahdi yaa bił dahózhǫ́ǫ́ ńtʼééʼ.

9. Galatians 6:7-9 bikʼehgo naanish bizhdiilkaalgo haʼátʼíí ádá shóizhdoołtʼeeł?

⁹ Nahwiilneʼ bidinilkaalgo éí iiná doo ninítʼiʼii nídidiilyééł. God biNahatʼaʼ baa nahojilneʼgo éí “níłchʼi diyinii bitsʼą́ą́dóó iiná doo ninítʼiʼii ádá shóizhdoołtʼeeł.” Díí naanish ‘bidiniilkaalgo’ índa doo ‘chʼééh diidááhgóó’ éí Jiihóvah iiná doo ninítʼiʼii nihaididooʼáałgo yee nihoníʼą́. Diyin Bizaad bee naniitinii God yaa ádeetʼánígíí éí doo bikʼehgo iiná nídidiilyéeł da.—Galatians 6:7-9 yíníłtaʼ.

10. Haʼátʼíí biniinaa łaʼ danihíistsʼą́ą́ʼ, łaʼ éí ndagaʼ?

¹⁰ Diyin Bizaad yidiiztsʼą́ąʼgo yikʼeh hółʼı̨́ dooleełgo éí bijéí átʼéii bóhólnííh. Jesus éí díí naʼnitin bikʼidiʼdootı̨́įłgo áyiilaa. Kʼééʼdídléehii éí łeezh ałʼąą ádaatʼéii bikáaʼjįʼ álástsiiʼ kʼiidíílá, ákondi tʼááłaʼí tʼéí bineestʼąʼ hazlı̨́ı̨́ʼ. (Luke 8:5-8) Diyin Bizaad deidiitsʼı̨́įhgo bijéí haashı̨́ı̨́ yitʼéego yidiyoołnááł níigo Jesus éí díí łeezh ałʼąą ádaatʼéii yee naʼneeztą́ą́ʼ. (Luke 8:11-15) Diyin Bizaad yidiiztsʼą́ąʼgo bijéí biiʼ dínóoséełgo éí tʼáá bí tʼéí bee bóhólnííh. God biNahatʼaʼ baa hwiilneʼ dooígíí éí nihąąh silá. Yilʼaadii Paul ání: “Hanaanish silı̨́ʼígíí bikʼehgo Diyin God hachʼįʼ niʼdoolééł,” íhoołʼaahii ájiilaii éí doo bikʼehgo da.—1 Cor. 3:8.

11. Diné doo dabíistsʼą́ąʼ da ndi Nóah nahasneʼ yę́ę haʼátʼíí biniinaa Jiihóvah yaa bił hóózhǫǫd? (Naaltsoos bikááʼdę́ʼígíí níníłʼı̨́.)

¹¹ Ałkʼidą́ą́ʼ Jiihóvah yá ndahalneʼ yę́ę, diné doo dabíistsʼą́ąʼ da ńtʼééʼ. Nóah éí “tsʼídá tʼáá ákogi éʼétʼé yaa halneʼii” nilı̨́įgo ląʼí nááhai. (2 Pet. 2:5) Baa hashneʼígíí bił yáʼádaatʼéeh doo jinízin ndi, Jiihóvah éí doo kóhodoonííł níi da. Nóah ark ííléehgo, God ábíłní: “Ni áádóó niyeʼké áádóó neʼasdzą́ą́ índa niyeʼké bidaʼasdzą́ą́ ałdóʼ, éí bił yah adííkah.” (Gen. 6:18) Ark biyiʼ nijíiztą́ą dooleeł góneʼ áhoołtsʼísí, áko Nóah baa ákozhniizı̨́įʼgo  doo ląʼí daʼiidoodląął da. (Gen. 6:15) Nóah nahojisneʼ ndi, díí tsiʼadeesdeeʼígíí bitahdóó tʼáadoo łaʼ oosdląąd da. (Gen. 7:7) Daʼ ákoósh Jiihóvah éí Nóah doo hazhóʼó nahasneʼgóó haa nitsékees? Nda shı̨́ı̨́! Nóah éí God yikʼeh hółʼı̨́įgo nizhónígo nahasneʼ, áko nahojisneʼígíí Jiihóvah yaa bił hózhǫ́.—Gen. 6:22.

12. Jeremáíyah bikʼijįʼ ídlı̨́į ndi haitʼéego nahalneʼ yaa bił hózhǫ́ǫ́ ńtʼééʼ?

¹² Jiihóvah yá halneʼii Jeremáíyah ałdóʼ bikʼijįʼ ídlı̨́įgo ląʼí nááhai. “Shá nidahałtʼiʼgo shaa nídiikai, áádóó shąąh nidayiiłhaał” jiníigo bikʼee hąąh nááhákaʼ áádóó nahashneʼ neʼ ádeeshłííł jinízin. (Jer. 20:8, 9) Ákondi tʼáadoo ákójiidzaa da. Haʼátʼíí háká eelwodgo doo ákogi átʼéégóó nitsíjíkees yę́ę łahgo ádzaa áádóó nahojilneʼ baa hoł hózhǫ́ jizlı̨́ı̨́ʼ? Naakigo hazʼą́ągi áhánígo baa tsízdeezkééz. Áłtsé éí, God nihaa nitséskees nínígíí diné bee bił hojilneʼ, áko náásgóó ‘bił chodahooʼı̨́į doo.’ (Jer. 29:11) Naaki góneʼ éí, Jiihóvah bízhiʼ yee hóózhiʼ. (Jer. 15:16) Jiihóvah bízhiʼ bee danihiʼdójíigo ił chohooʼı̨́ baa dahwiilneʼ. Díí naakigo hazʼánígíí baa nitsíikeesgo éí nahwiilneʼígíí baa nihił hózhǫ́ǫ doo, azhą́ diné doo danihíistsʼą́ąʼ da ndi.

13. Mark 4:26-29 bikʼehgo, Jesus aneestʼąʼ yinahjįʼ naʼneeztą́ą́ʼ yę́ę bitsʼą́ą́dóó haʼátʼíí bíhwiidiilʼááł?

¹³ Oodląʼ nooséełgi éí bił nahalzhiish. Jesus éí kʼiʼdííláhígíí ałhoshgo kóhoodzaa níigo halneʼ. (Mark 4:26-29 yíníłtaʼ.) Kʼizhdííláhígíí éí neestʼą́ doo tsı̨́įłgo nooséełgo ázhdoolíił da. Tʼáá ákótʼéego Diyin Bizaad bee nanítinígíí éí yíhoołʼaahígíí doo tsı̨́įłgo yikʼeh átʼée da doo. Azhą́ beʼoodląʼ tsı̨́įłgo dínóosééł niidzin ndi, kʼidoolyáhígíí hazhóʼógo nooséeł doo. Áko tʼáadoo bikʼee nihąąh nááhákaʼí. Kʼidoolyáhígíí bineestʼąʼ bibaʼ ájítʼéhígi átʼéego Diyin Bizaad bee nazhnitinígíí baptize áshidiʼdoolnííł dínóozįįłígíí bibaʼ ániitʼée doo.—Jas. 5:7, 8.

14. Baa hóoneʼígíí bikʼehgo, haʼátʼíí biniinaa łaʼ doo tsı̨́įłgo daʼoosdląąd da?

¹⁴ Nidahwiilneʼgóó łahda Diyin Bizaad deidiitsʼaʼígíí doo tsı̨́įłgo daʼiidoodląął da. Ruby Allen dóó bideezhí Gladys éí 1959 yę́ędą́ą́ʼ Canadadi hahoodzo Quebec hoolyéejįʼ regular pioneer jílı̨́įgo hoʼdoolʼaad. Ákwii bídahólníhígíí dóó Catholic church ádaanínígíí dayíistsʼą́ąʼgo God biNahatʼaʼ baa haneʼ doo deinízin da. Gladys ájíní: “Hootahgóó nahwiilneʼgo naaki nááhai, ndi doo łaʼ nihíistsʼą́ą́ʼ da! Tsésǫʼdę́ę́ʼ tʼóó danihinéłʼı̨́į łeh, dáádílkał doo ąą ádeiléeh da. Ákondi nahwiilneʼígíí tʼáadoo neʼ kwíilyaa da.” Tʼahádóó éí nihichʼįʼ kʼé danízin daazlı̨́ı̨́ʼ áádóó danihíistsʼą́ą́ʼ. Kʼad éí díí kin dah shijaaʼgi congregations tááʼ dah yikah.—Isa. 60:22.

15. 1 Corinthians 3:6, 7 éí íhoołʼaahii álnéehgi haitʼéego yee naʼnitin?

¹⁵ Áłká aníjíjahgo łaʼda íhoołʼaahii yileeh. Congregation tʼáá átʼé áká anájahgo íhoołʼaahii baptize ábiʼdiilʼįįh. (1 Corinthians 3:6, 7 yíníłtaʼ.) Haneʼ bízhneedlínígíí éí brother naaltsoos hainíłtsooz. Brother haa náádoodááł doo bá bíighah da áko nahalneʼé náánáłaʼ yeidiníʼą́. Díí nahalneʼé éí haneʼ yíneedlínígíí Diyin Bizaad yee neinitingo hayííłtʼiʼ. Naʼnitingóó brothers dóó sisters łaʼ bił ałnáádaakah, díí éí íhoołʼaahii saad bee haʼahóní yił chʼídeiʼááh.  Kʼidoolyá yę́ę tó baa nákaah nahalingo tʼáá ałtso íhoołʼaahii yíká anájah. Díí íhoołʼaahígíí baptize ábiʼdiilyaago éí kʼééʼdídléhígíí índa ayizhii tʼáá áłah tʼáá íiyisí bił hózhǫ́ǫ dooleeł.—John 4:35-38.

16. Nąąh dahazʼą́ doodaiiʼ nahólneʼ doo bichʼįʼ nidziil da ndi, haitʼéego nahólneʼ baa nił hózhǫ́ǫ doo?

¹⁶ Nąąh dahazʼą́ doodaiiʼ nahólneʼ doo bichʼįʼ nidziil dagoshąʼ? Nił hózhǫ́ǫgo áká adiilwołgo átʼé. Naatʼáanii David dóó hastóí yił naakai yę́ę éí Ámalek dineʼé bikʼinéiijahgo bitsʼąą haghan índa hanaalyeʼé baa ádahojilyą́ ńtʼééʼ. Hastóí naakidi neeznádiin yiltʼéego éí chʼééh dadeeskaigo tʼáadoo nidaazbaaʼ da, ndi naalyéhé yaa ádahalyą́. David dóó hastóí yił naakaiígíí akʼeh dadeesdlı̨́įʼgo naalyéhé áłah ádajiilaaígíí éí tʼáá ájíłtso aheełtʼéego hataadidootʼááł níigo David yee nihoníʼą́. (1 Sam. 30:21-25) Dííshjı̨́įdi íhoołʼaahii ádaalneʼgi tʼáá ákótʼé. Łaʼda íhoołʼą́ą́ʼ dóó iiná yáʼátʼééhjí dah diiyáago, tʼáá ájíłtso aheełtʼéego baa hoł dahózhǫ́ǫ doo.

17. Jiihóvah bichʼįʼ haʼátʼíí baa ahééh daniidzin doo?

¹⁷ Jiihóvah ayóóʼánihóʼníigo bá neiilʼaʼgi nihá yaa ákonízin, éí bichʼįʼ baa ahééh daniidzin. Bił hwiilneʼígíí daatsʼí nihíistsʼą́ąʼ dooleeł, éí doo bee nihíhólníih da. Nahashneʼ nizhónígo áshʼı̨́į doo niidzinígíí Jiihóvah nihá yaa ákonízin, áko iiná doo ninítʼiʼii nihaidoolééł. Nahaneʼ haitʼéego shı̨́ı̨́ bee áká anéiilwoʼígíí baa nihił hózhǫ́ǫ doo nihóʼní. (John 14:12) Nahwiilneʼígíí bidinilkaalgo éí God nihaa bił hózhǫ́ǫ doo!