1. Kodi ifepano tina mwayi uponi?

IFEPANO tina mwayi ukulu kwene-kwene wakukhala Mboni za Yahova! Ndife wanthu wa Yahova ndipo timbalatiza kuti ndife Mboni zace mwakupalizira wanthu winango na kuwapfunzisa pakulewa bza iye. Timbakomedwa tikathandiza munthu ‘omwe ana makumbukidwe yabwino yomwe yangamuthandize kukagumana moyo wakusaya kumala’ kuti akhale Mkristau. (Mabasa 13:48) Ndipo timbabvambo ninga momwe Jezu adabvera. Iye adakomedwa kwene-kwene pomwe anyakupfunza wace adamufotokozera bzinthu bzabwino bzomwe adagumana nabzo pomwe akhapalizira.—Luka 10:1, 17, 21.

2. Kodi tingalatize tani kuti basa lakupalizira ndakufunika kwene-kwene pa moyo wathu?

² Ifepano timbawona basa lakupalizira kuti ndakufunika kwene-kwene pa moyo wathu. Mpostolo Paulo adalimbikisa Timotio kuti: “Cita bzentse bzomwe ungakwanise kuti ukhale ciratizo cabwino na mpfunzisi wabwino.” Paulo adathimizira kulewa kuti: “Ukacita tenepo, un’dzabzipulumusa wekha pabodzi na wale omwe an’kutetekera.” (1 Timotio 4:16) Basa lathu lakupalizira limbapulumusa moyo wa wanthu. Ifepano timbacita bzentse bzomwe tingakwanise pa basa lakupalizira thangwe rakuti ndife nzika za Umambo bwa Mulungu. Ifepano nthawe zentse timbacita bzinthu bzomwe bzimbatumbizisa Yahova ndipo timbakhala na moyo wakubverana na mafala yabwino yomwe timbapalizira. (Afilipi 1:27) Timbalatiza kuti timbacita bzentse bzomwe tingakwanise pa basa lakupalizira mwa kuyamba kukonzekera na kukumbira Yahova kuti atisimbe pomwe tikanati kuyenda kukapalizira wanthu.

3. Kodi wanthu wentse ambafuna kubva mafala ya Umambo? Fotokozani.

³ Napo kuti ifepano timbacita nyongo pa basa lakupalizira, wanthu azinji ambafuna lini kutetekera mafala yabwino ya Umambo. Onani bzomwe bzidacitika na m’bale Georg Lindal, omwe adapalizira yekha mu dziko la Islândia mu gole la 1929 mpaka 1947. Iye adagawira mabukhu mazinji kwene-kwene, tsono palibe ne munthu m’bodzi omwe adakhala Mboni ya Yahova. Iye adalewa kuti: “Winango akhalatiza kuti akuipidwa na mafala ya m’Bibliya  pomwe azinji akhalibe nabzo basa.” Napo kuti amisiyonario wa Xikola ya Jileyade adafika aciyamba kupalizira ku Islândiako, padatenga magole mapfemba kuti wanthu winango wa ku Islândiako abzipereke kwa Yahova acibatizidwa. *

4. Kodi tin’funika kubzibva tani wanthu akalamba kubva mafala ya Mulungu?

⁴ Ifepano timbasunama wanthu akasaya kufuna kupfunza Bibliya. Ndipo timbabzibva ninga momwe Paulo adabvera. Iye adasunama kwene-kwene ndipo adabva “kuwawa mu mtima” mwace thangwe ra Adjuda omwe akhalamba kuti Jezu ni Mesiya. (Aroma 9:1-3) Kodi mungabzibve tani penu imwepo pambuyo pakucita nyongo yakupempherera nyakupfunza wanu kuti ayende patsogolo tsono palibe comwe cikucinja ndipo mun’funika kusiya kucitisa pfunzirolo? Ayai tani penu imwepo mukanati kupfunzisa munthu mpaka kufika pa kubatizidwa? Kodi mun’funika kubzipasa mulandu mucikumbuka kuti Yahova akusimba lini basa lanu? Mu nkhani ino, tin’tawira mibvunzo miwiri iyi: (1) Kodi n’ciyani cimbalatiza kuti utumiki bwathu bukufamba bwino? (2) Kodi n’ciyani comwe tin’funika kudikhirira pomwe tikucita basa lathu lakupalizira?

5. Thangwe ranyi basa lomwe tikucitira Yahova lin’dzacitika lini ninga momwe tikufunira ntsiku zentse?

⁵ Bibliya limbalewa kuti munthu omwe ambacita bzinthu bzomwe Mulungu ambafuna: ‘Bzakucita bzace bzentse bzin’dzamufambira bwino.’ (Salimo 1:3) Bzimwebzi bzin’funa lini kulewa kuti bzinthu bzentse bzomwe ifepano tingacitire Yahova bzin’dzacitika ninga momwe tikufunira. Moyo wathu na wa wanthu winango ‘ngwakudzala na mabvuto’ thangwe ra kuperewera. (Djobi 14:1) Wanthu omwe ambatinyoza angakwanise kutiletsa kucita basa lakupalizira. (1 Akolinto 16:9; 1 Atesalonika 2:18) Tsono, kodi Yahova ambawona tani kuti basa lathu likutifambira bwino? Mbatiwoneni nfundo za m’Bibliya zomwe zingatithandize kutawira mbvunzo umweyu.

6. Kodi n’ciyani comwe cimbacitisa Yahova kuwona kuti basa lomwe tikumucitira likutifambira bwino?

⁶ Yahova ambawona nyongo na kupirira kwathu. Yahova ambawona kuti basa lathu lakupalizira likutifambira bwino, tikambaliphata na mtima wathu wentse na lufoyi, bziribe basa penu wanthu an’titetekera ayai ne. Paulo adanemba kuti: “Mulungu ngwakulungama, iye an’dzayebwa lini basa lanu na lufoyi lomwe mudalatiza pa dzina lace, ndipo mumbalatiza bzimwebzi mwakutumikira anyakukhulupira anzanu mpaka pano.” (Ahebereu 6:10) Yahova ambawona nyongo na lufoyi lathu napo paleke kucitika bzinthu bzabwino pa nyongo yomwe tacitayo. Tenepo, mafala yomwe Paulo adanembera Akolinto yakuphatambo basa kwa imwepo. Iye adati: “Bzomwe mukucita mwa nyongo pa basa la Mbuyalo bzimbayenda lini papezi,” napo kuti bzikucitika lini bzomwe mukhadikhirira pa basa lomwe mukucitalo.—1 Akolinto 15:58.

7. Kodi tikupfunza ciyani na bzomwe mpostolo Paulo adalewa pa nkhani ya utumiki bwace?

⁷ Mpostolo Paulo adalatiza kuti akhali m’misiyonario wabwino mwa kuyambisa magwere m’mizinda mizinji. Pomwe wanthu winango adanyoza Paulo mwakulewa kuti iye ni mpfunzisi lini wabwino, iye alibe kulewa bza kuwanda kwa wanthu omwe adawathandiza kukhala Akristau. Koma pomwe iye akhagaza wanthu omwe akhamulewa kuipawo, iye adanemba kuti: “Ndaphata basa kwene-kwene.” (2 Akolinto 11:23) Ninga Paulo, kumbukirani kuti bzomwe Yahova ambakomedwa nabzo ni nyongo na kupirira kwathu.

8. Kodi n’ciyani comwe tin’funika kukumbukira pakulewa bza utumiki bwathu?

 ⁸ Yahova ambakomedwa na utumiki bwathu. Jezu adatuma anyakupfunza 70 kuti akapalizire mafala ya Umambo, ndipo pomwe adamala kupalizira, iwo “adabwerera mwakukondwa.” Thangwe ranyi iwo adakondwa? Iwo adalewa kuti: “Napo madimonyo yakhatibvera pomwe tikhaphatisa basa dzina lanu.” Tsono, Jezu adawathandiza kubvesesa kuti iwo akhafunika lini kukondwa thangwe ra bzimwebzo. Tenepo, iye adawauza kuti: “Lekani kukomedwa thangwe rakuti mizimu yakuipa yakubverani, koma komedwani thangwe madzina yanu yanembedwa kudzulu.” (Luka 10:17-20) Jezu akhadziwa kuti ni nthawe lini zentse pomwe bzinthu bzingadawafambira bwino mu utumiki bwawo. Bzimwebzi n’cadidi, thangwe rakuti tikudziwa lini kuti ni wanthu angasi omwe adakhala Akristau pa wanthu omwe anyakupfunzawo adawapalizira. Anyakupfunzawo akhafunika lini kukondwa thangwe ra bzinthu bzomwe adakwanisa kucita, koma akhafunika kukondwa thangwe ra kudziwa kuti Yahova adakomedwa na nyongo yawoyo.

9. Mwakubverana na Agalatiya 6:7-9, kodi n’ciyani cin’dzacitika tikasaya kuneta kupalizira na kupfunzisa wanthu?

⁹ Tikambapirira mu utumiki bwathu, tin’dzatambira moyo wakusaya kumala. Tikambacita nyongo pa basa lakupalizira na kupfunzisa mafala ya Mulungu, timbakhala ‘tikubzala mwakubverana na mzimu wakucena’ ndipo timbakhala tikubvumambo kuti mzimu wa Mulunguyo uphate basa pa moyo wathu. “Tikasaya kuneta,” Yahova akutiuza kuti an’dzatipasa moyo wakusaya kumala, bziribe basa penu takwanisa kuthandiza anyakupfunza kubzipereka kwa Mulungu ayai ne.—Werengani Agalatiya 6:7-9.

10. Thangwe ranyi wanthu winango ambatetekera mafala yomwe timbawapalizira pomwe winango ne?

¹⁰ Penu wanthu anibva mafala yathu ayai ne, bzin’themba iwo. Jezu adafotokoza bza cadidi cimweci mu ciratizo cace ca munthu wakubzala mbeu pa mataka yakusiyana-siyana, koma mbeu yomwe ikhali pa mataka yabwino ndiyo idakula icibala bzisapo. (Luka 8:5-8) Jezu adalewa kuti mataka yakusiyana-siyana ni wanthu omwe ambacita bzinthu bzakusiyana-siyana akabva “fala la Mulungu.” (Luka 8:11-15) Ninga nyakubzala mbeu, ifepano tingakwanise lini kukulisa m’mitima mwa wanthu mafala yomwe tawapalizira. Basa lathu ndiro kupitiriza kubzala mbeu zabwino za mafala ya Umambo. Paulo adalewa kuti: “Ali-wentse an’dzatambira mabaibai yace mwakubverana na basa lace,” sikuti thangwe ra bzomwe akwanisa kucita.—1 Akolinto 3:8.

11. Thangwe ranyi Yahova adakomedwa na basa la Nowa napo kuti wanthu alibe kumutetekera? (Onani cithunzi-thunzi pa tsamba lakuyamba.)

¹¹ Kuyambira kale-kale atumiki wa Yahova ambapalizira wanthu omwe ambafuna lini kubva. Mwa ciratizo, Nowa adakhala “mpalizi wacirungamo,” pinango-pentse magole 40 ayai 50. (2 Pedru 2:5) Mwakusaya kupenukira, iye akhakumbuka kuti wanthu angadabvuma mafala yomwe akhapalizira, koma Yahova alibe kumuuza kuti wanthuwo angadabvuma. Tsono, pomwe adamuuza kuti iye amange cingalawa, Yahova adati: ‘Iwepo udzapite m’cigalawaco pabodzi na wana wako, mkazi wako na alowola wako.’ (Ciyambo 6:18) Kukumbukira kukula kwa cingalawa comwe Mulungu adamuuza kuti amange, pinango kudathandiza Nowa kudziwa kuti ni wanthu lini azinji omwe angadabvuma mafala yace. (Ciyambo  6:15) Ninga momwe tikudziwira, palibe ne munthu m’bodzi pa wanthu wakuipawo omwe adabvuma mafala ya Nowa. (Ciyambo 7:7) Kodi Yahova adawona Nowa kuti adatazira kupalizira? Ne, mpsimwebzo lini! Yahova adawona Nowa kuti akhali mpalizi wa nyongo thangwe rakuti iye adacita bzomwe Yahova adamuuza kuti acite mwakukhulupirika.—Ciyambo 6:22.

12. Kodi mpolofeta Jeremiya adakhala tani wakukondwa napo kuti wanthu akhamuseka na kumunyoza pomwe akhapalizira?

¹² Mpsibodzi-bodzimbo na mpolofeta Jeremiya. Iye adapalizira magole 40 napo kuti wanthu akhamutetekera lini ndipo akhamunyoza. Iye adamala mphanvu thangwe ra ‘kutukanidwa na kunyozedwa’ na wanthu, mpaka adakumbuka bzakusiya utumiki bwace. (Jeremiya 20:8, 9) Tsono Jeremiya alibe kubwerera m’mbuyo! Kodi n’ciyani comwe cidamuthandiza kukunda makumbukidwe yakuphonyeka acikhala wakukondwa mu utumiki bwace? Iye adakumbukira bzinthu bziwiri bzakufunika. Cakuyamba, mafala ya Mulungu, yomwe Jeremiya akhapalizira, yakhapasa wanthu ‘cidikhiro cabwino na tsogolo labwino.’ (Jeremiya 29:11) Caciwiri, Yahova adasankhula Jeremiya kuti akauze wanthu pakulewa bza iye. (Jeremiya 15:16) Ifepano timbauza wanthu mafala ya cidikhiro ndipo timbadziwisa dzina la Yahova ninga Mboni zace. Tikambakumbukira bzinthu bziwiri bzakufunikabzi, tin’dzakhala wakukondwa, bziribe basa penu wanthu anibva mafala yomwe tiniwauza ayai ne.

13. Kodi tikupfunza ciyani na ciratizo ca Jezu comwe ciri pa Marko 4:26-29?

¹³ Pambatenga nthawe kuti munthu akhale na cikhulupiro cakulimba. Jezu adapfunzisa cadidi cimweci mwa kufotokoza ciratizo ca nyakubzala mbeu omwe akamala kubzala mbeu ambayenda kukagona. (Werengani Marko 4:26-29.) Nyakubzala mbeuyo akamala kubzala mbeu zace, mbeuzo zimbakula pang’ono pang’ono, ndipo palibe comwe nyakubzala mbeuyo angacite kuti mbeuzo zikule mwakamfulumize. Imwepombo mungamale nthawe izinji kuti mukwanise kuwona kuti nyakupfunza wanu akuphatisa basa bzomwe akupfunza. Ninga mulimi omwe angakwanise lini kucitisa kuti mbeu zace zikule mwakamfulumize ninga momwe akufunira, ifepanombo tingakwanise lini kucitisa nyakupfunza wathu wa Bibliya kukhala na cikhulupiro cakulimba mwakamfulumize ninga momwe tikufunira. Tenepo, lekani kubva utofu ayai kubwerera m’mbuyo mukawona kuti anyakupfunza wanu akutenga nthawe ikulu kuti ayende patsogolo kuposa momwe mukhadikhirira. Ninga kulima, kupfunzisa wanthu kuti akhale anyakupfunza kumbafuna kupirira.—Tiyago 5:7, 8.

14. Kodi ni ciratizo ciponi comwe cikuwonesa kuti pangatenge nthawe ikulu kuti wanthu abvume kutitetekera?

¹⁴ Ku mbuto zinango, pambatenga nthawe kuti munthu afike pa kubatizidwa. Onani ciratizo ca mpfumakazi Gladys na Ruby Allen, omwe bukhali ubale bwawo. Iwo akhali apainiya wakukhazikika ndipo mu 1959 adatumizidwa kuti akatumikire mu mzinda wa Quebec ku Canadá. * Wanthu wa kumweko akhafuna lini kubva mafala ya Umambo thangwe ra kugopa avizinyu wawo na apadre. Mpfumakazi Gladys idalewa kuti: “Tidamala magole mawiri tikupalizira ndipo pa ntsiku tikhambamala maora masere tikupalizira mui na mui, tsono palibe ne munthu m’bodzi omwe adabvuma kuti ticeze naye! Tikafika pamui pa munthu, mwenekaciro muiyo akhabwera kudzafungula msuwo. Akatiwona, iye akhabwerereratu. Tsono ifepano tiribe kusiya kupalizira.” Pang’ono na pang’ono wanthu adakhala wakucezeka ndipo winango wa iwo adayamba kutetekera. Tsapano mu mzinda umweyo muna magwere matatu.—Zaiya 60:22.

15. Kodi 1 Akolinto 3:6, 7 ambatipfunzisa ciyani pakulewa bza basa lakupalizira na kupfunzisa wanthu?

¹⁵ Pambafunika wanthu azinji kuti athandize munthu kuti afike pa kubatizidwa. Ali-wentse  m’gwere angathandize munthu kuti afike pa kubatizidwa. (Werengani 1 Akolinto 3:6, 7.) Mwa ciratizo, mpalizi angagawire katsamba ayai revista kuna munthu omwe akufuna kudziwa bzizinji. Ndipo patsogolo pace, iye akawona kuti mwakubverana na m’ndandanda wace, an’kwanisa lini kubwerera kumui kwa munthuyo kuti akaceze naye pomwe, iye angakumbire mpalizi munango kuti ayende kukamuzungira munthuyo. Mpaliziyo angakwanise kuyambisa pfunziro la Bibliya. Na kupita kwa nthawe, angacemere abale winango pabodzi na mpfumakazi kuti akakhale naye pabodzi pa pfunzirolo. Ndipo wentsenewo angalimbikise nyakupfunzayo mu njira zakusiyana-siyana. M’bale ayai mpfumakazi ali-wentse omwe angaceze na nyakupfunzayo angakwanise kumuthandiza kukulisa cikhulupiro cace. Wentse omwe athandiza munthuyo angakhale wakukondwa pa kumuwona akubatizidwa.—Juwau 4:35-38.

16. Kodi mungakhale tani wakukondwa mu utumiki bwanu penu mukukwanisa lini kucita bzizinji thangwe ra kuduwala ayai thangwe ra kumala mphanvu?

¹⁶ Tani penu mukukwanisa lini kupalizira kwene-kwene ninga momwe mukhacitira kale-kale thangwe ra kuduwala ayai kumala mphanvu? Imwepo mungakhale wakukondwa thangwe ra bzomwe mukukwanisa kucita pa basa lakupalizira. Kumbukirani bzomwe bzidacitika pomwe Mambo Davide na acikunda wace adalombola mabanja yawo yomwe yakhadatengedwa na Amaleki na kubambo bzinthu bzawo. Acikunda 200 akhadaneta kwene-kwene ndipo angadakwanisa lini kumenya nkhondo. Tenepo, iwo adasala kuti alindire bzinthu bzawo. Pambuyo pakukunda nkhondoyo, Davide adauza wanthu wace kuti agawane bzinthu bzomwe adatengera Amalekiwo ndendende na omwe akhadasalawo. (1 Samuweri 30:21-25) Bzimwebzi bzikundendemeranambo na basa lathu lakupalizira na kupfunzisa wanthu lomwe likucitika pa dziko lentse la pantsi. Wale omwe ambakwanisa lini kucita bzizinji na omwe ambacita bzizinji, wentse ambakomedwa akawona kuti nyakupfunza wa Bibliya afika pa kubatizidwa.

17. Thangwe ranyi tin’funika kumbatenda Yahova?

¹⁷ Timbatenda kwene-kwene Yahova thangwe ra momwe ambawonera basa lathu. Iye ambadziwa kuti tingakwanise lini kungingimiza wanthu kuti atitetekere ayai kuti amunamate. Napo bziri tenepo, iye ambawona momwe timbacitira nyongo pa basa lace na momwe timbamufunira ndipo iye ambatisimba. Iye ambatipfunzisambo momwe tingakhalire wakukondwa pa cinthu ciri-centse comwe tingacite pa basa lakupalizira. (Juwau 14:12) Tenepo, mbatitsimikizeni kuti Mulungu an’dzakomedwa na bzomwe tikucita tikaleka kubwerera m’mbuyo!