1. Akin et malikeliket tan proud tayo ya sakey tayo ed Saray Tasi nen Jehova?

MALIKELIKET tan proud tayo ya sakey tayo ed Saray Tasi nen Jehova! Awi-awit tayo so ngaran na Dios tan papaneknekan tayo ya Tasi to itayo diad pampupulong tan pambabangat tayod totoo. Malikeliket tayo no say sakey ya toon “walaan na dugan kipapasen na puso” et natulongan tayon magmaliw met ya Tasi nen Jehova. (Gawa 13:48) Ontan met may alikna nen Jesus. Sikatoy “aliketan ya maong” nen inistorya ed sikato na saray disipulo to iray balibalin eksperiensya ra ed impanpulong da.—Luc. 10:1, 17, 21.

2. Panon tayon nipanengneng ya seseryosoen tayoy responsabilidad tayon manpulong?

² Seseryosoen tayoy responsabilidad tayon manpulong. Oniay bilin nen apostol Pablo ed si Timoteo: “Imanom a naynay so sarilim tan say ibabangat mo.” Akin et ontan so bilin nen Pablo? Oniay imbaga to: “Ta diad panggawam ed saya et niliktar moy sarilim tan saramay ondedengel ed sika.” (1 Tim. 4:16) On, bilay so nalalanor. Labay tayon ‘imanoen ya naynay so sarili tayo’ ta sakop itayo na Panarian na Dios. Seseguroen tayo ya nirarayew si Jehova ed ugali tayo, tan gagawaen tayon mismo so ipupulong tayo. (Fil. 1:27) Ipapanengneng tayo met ya ‘iimanoen tayoy ibabangat tayo’ no manpaparaan tayon maong antis tayon manpulong tan kekerewen tayoy bendisyon nen Aman Jehova.

3. Antoy reaksion na arum ed mensahen ipupulong tayo? Mangiter na alimbawa.

³ Pero no maminsan, dagdaiset odino anggapo ni ingen so naromog tayon interesado anggano mamapasya tayo lad panagpulong. Imanoen so eksperiensya nen Brother Georg Lindal, ya bukbukor toy nampulong ed interon Iceland manlapu nen 1929 anggad 1947. Masulok ya 26,000 ya libro so niyopresi to, pero anggapoy anggan sakey ya angawat ed katuaan. Insulat to: “Wala ray kontra ed ipupulong ko, pero maslak ya totoo et agan talaga interesado ed mensahe na Biblia.” Ag-abayag, wala ray imbakin  misionero ya nan-graduate ed Gilead School pian ontulong ed panagpulong diad Iceland. Pero linmabas ni siameran taon antis ya walay nagmaliw ya Tasi nen Jehova diman. *

4. Antoy nalikna tayo no ag-awaten na totoo so katuaan?

⁴ Natural labat ya nadismaya tayo no ag-awaten na totoo so katuaan. Ompan nalikna tayo met imay alikna nen Pablo. Sikatoy maer-ermen tan asakitan nen agmanisia so maslak ya Judio ya si Jesus so Mesias. (Roma 9:1-3) Panon to no walay Bible study’m ya pansasagpotan mon iyaralan tan lanang mon ipipikasi, pero agnin siansia onaaligwas kanian planom lan itunda? Odino panon to no anggapo nin balot so Bible study’m ya nampabautismo? No ontan so situasyon mo, kasin walay rason mon nakonsiensia? Labay to kasin ibaga, agbebendisyonan nen Jehova so ministeryom? Diad sayan artikulo, pantongtongan tayoy duaran tepet: (1) Antoy basiyan pian nibagan nagagawaan tayoy ministeryo tayo? (2) Anto ray nepeg tayon tandaan pian agtayo nadismaya ed ministeryo tayo?

5. Akin ya say resulta no maminsan na panlilingkor tayod si Jehova et duma ed samay labay tayon nagawa?

⁵ Ibabaga na Biblia ya no unoren tayo ray ganggan na Dios, “amin a gawaen [tayo] et onaligwas.” (Sal. 1:3) Siempre, labay tayo ya maong so resulta na panlilingkor tayod si Jehova. Pero no maminsan, say resulta et duma ed samay labay tayon nagawa. Akin ey? On ta aliwa tayon perpekto tan dakel so problema tayo—pati saray totoon pupulongan tayo. (Job 14:1) Wala met iray onkokontra tan mangibabawal ed panagpulong tayo. (1 Cor. 16:9; 1 Tes. 2:18) Anto sirin so basiyan nen Aman Jehova pian nibaga ton talagan nagagawaan tayoy ministeryo tayo? Aralen tayoy pigaran prinsipyo ed Biblia ya makatulong pian naebatan tayo itan ya tepet.

6. Antoy nenengnengen tan papablien nen Jehova legan tayon gagawaen so ministeryo tayo?

⁶ Say nenengnengen nen Jehova et say pansasagpot tan panaanos tayon manpulong. Anggano ag-ondengel iray totoo, naliliketan si Jehova ed pampupulong tayo no nanenengneng to ya say rason no akin ya makulikuli tayod ministeryo et lapud panangaro tayod sikato. Insulat nen Pablo: “Say Dios et matunong kanian agto lingwanan so gawa yo tan say aro ya impanengneng yo parad ngaran to diad panlilingkor yo ed saray masanto tan diad pantultuloy yon panlingkor ed sikara.” (Heb. 6:10) Kanian no anggapo ni atulongan tayon manpabautismo anggano gagawaen tayo met so anggaay nayarian tayo, papablien nen Aman Jehova so pansasagpot tan panangaro tayo. Anggano agnagawa so iilaloan mo diad ministeryom, tandaan mo ya para met ed sika iyan insulat nen Pablo ed saray taga Corinto: “Aliwan andi-kakanaan so pansasagpot [mo] parad Katawan.”—1 Cor. 15:58.

7. Antoy naaralan tayo ed imbaga nen apostol Pablo tungkol ed ministeryo to?

 ⁷ Si apostol Pablo et marundunong ya misionero, tan diad tulong to et dakdakel ya kongregasyon so abuo ed nanduruman syudad. Pero imanoen no antoy imbaga to nen wala ray mamabalaw ed sikato ta aliwa kunon marunong ya manbangat. Imbes ya ilastog toy karakel na atulongan to ya magmaliw ya Kristiano, oniay insulat to tungkol ed ministeryo to: “Mas dakel so agawaan kon kimey.” (2 Cor. 11:23) Singa si Pablo, tandaan tayo ya say importante ed si Aman Jehova et say pansasagpot tan panaanos tayon manpulong.

8. Antoy talagan panliketan tayo ed ministeryo tayo?

⁸ Naliliketan si Jehova ed ministeryo tayo. Nen imbaki nen Jesus ya manpulong so 70 disipulo to, ‘malikeliket iran pinmawil.’ Akin ey? Oniay imbaga dad sikato: “Anggan saray demonyo et apatulok mi ra diad impangusar mid ngaran mo.” Pero oniay imbaga nen Jesus ed sikara: “Agyo panliliketan a napapatulok yo iray espiritu, noagta manliket kayo lapud nisulat lad tawen so kangaranan yo.” (Luc. 10:17-20) Ontan so imbaga nen Jesus ta amta to ya aliwan marakep ya lanang so resulta na ministeryo ra. Diad tua, agtayo amta no pigara labat ed saramay apulongan da so nagmaliw ya Kristiano. Kaukolan dan tandaan ya say liket da et ag-akadepende ed resulta na ministeryo ra. Say talagan panliketan da et amay napapaliket day Jehova.

9. Base ed Galacia 6:7-9, antoy resulta no ag-itayo ontundan manpulong?

⁹ No ag-itayo ontundan manpulong, awaten tayoy bilay ya andi-anggaan. No tuloytuloy tayon mantanem na bini na katuaan tan gagawaen tayoy anggaay nayarian tayon salogen itan, ‘mantatanem tayo met parad espiritu.’ Labay ton ibaga, lapud gagawaen tayoy panlabayan nen Aman Jehova, mabulbulos to tayon ikdan na masanton espiritu to. Impaseguro to met ya no ‘ag-itayo ontunda’ tan “ag-itayo onkesaw,” manani tayo na bilay ya andi-anggaan, balanglan walay atulongan tayon manpabautismo odino anggapo.—Basaen so Galacia 6:7-9.

10. Say pangawat na sakey ya too ed katuaan et akadepende ed anto?

¹⁰ Akadepende ed puso na sakey ya too no kasin awaten toy katuaan odino andi. Impaliwawa itan nen Jesus nen imbaga to so ilustrasyon tungkol ed laki ya angisibwag na bini ed nanduruman klase na dalin, tan samay nisibwag labat ed maong a dalin so nantultuloy ya tinmubo tan nambunga. (Luc. 8:5-8) Imbaga nen Jesus ya saramay nanduruman klase na dalin et irerepresenta to ray totoo ya nandurumay reaksion da ed “salita na Dios,” depende ed kondisyon na puso ra. (Luc. 8:11-15) Singa samay laki ya angisibwag na bini, agtayo napilit ya ontubo tan manbunga so intanem tayon bini na katuaan ta akadepende itan ed kondisyon na puso na saramay napupulongan tayo. Say responsabilidad tayo et mantanem lan mantanem na bini na katuaan. Imbaga nen apostol Pablo ya “kada sakey et mangawat na tumang to unong ed kinimeyan to,” aliwan unong ed resulta na kimey to.—1 Cor. 3:8.

11. Akin et aliketan si Aman Jehova ed impanpulong nen Noe anggano anggapon balot so dinmengel ed sikato? (Nengnengen so litrato ed apis.)

¹¹ Nensaman la et asali met na saray lingkor nen Jehova so nampulong ya anggapon balot so dinmengel. Singa bilang, si Noe et tinawag na Biblia ya “managpulong na inkatunong” tan posiblin nampulong diad loob na 40 anggad 50 taon. (2 Ped. 2:5) Siempre, labalabay nen Noe ya ondengel komon iray totoo, pero anggapoy imbaga nen Jehova ya ontan so nagawa. Diad tua, nen ingganggan toy Noe ya manggawa na biong, oniay imbaga na Dios: “Nepeg kan  onloob ed biong, sika, saray ananak mo, say asawam, tan saray kaasawaan na ananak mo.” (Gen. 6:18) Sakey ni, nen imbaga nen Jehova ed si Noe so kabaleg na biong, seguro naisip met la nen Noe ya ompan daiset labat so ondengel ta limitado labat so nakarga to may biong. (Gen. 6:15) Anta manaya, anggapon balot so ondengel! (Gen. 7:7) Labay to kasin ibaga, ag-amasya si Noe ed impanpulong to? Andi! Diad tua, ibabaga na Biblia ya “ginawa nen Noe so amin ya ingganggan na Dios ed sikato.” On, aliketan si Jehova ed impanpulong nen Noe anggano anggapon balot so dinmengel ed sikato.—Gen. 6:22.

12. Antoy akatulong ed si propetan Jeremias pian agnaandi so liket to anggano ag-ondengel tan kontra ni ingen iray pupulongan to?

¹² Masulok met ya 40 taon ya nampulong si propetan Jeremias, pero ngalngali anggapoy dinmengel tan kinontra da ni ingen. Sikatoy ‘inagew-agew ya iinsultoen tan babalawen’ na saray onkokontra. Kanian kinmapuy ya maong so liknaan to ya anggad punton labay to lay ontundan manpulong. (Jer. 20:8, 9) Pero agtinmunday Jeremias! Antoy akatulong ed sikato ya labanan so pakakadismaya to tan agnaandi so liket tod ministeryo? Walay duaran katuaan ya sankanonot to. Unona, say mensahe ya ipupulong to et mangiter na “maong ya arapen tan ilalo” ed saray totoo. (Jer. 29:11) Komadua, amta to ya sikatoy ‘atawag ed ngaran nen Jehova,’ ta si Jehova ya mismo so angibaki ed sikaton manpulong. (Jer. 15:16) Ontan tayo met natan. Amta tayo ya say mensahen ipupulong tayo so mangiter na ilalo ed totoo, tan awi-awit tayoy ngaran nen Jehova bilang Tasi to. No sankanonot tayo iyan duaran katuaan, agnaandi so liket tayo anggano ag-ondengel iray totoo.

13. Antoy naaralan tayo ed samay ilustrasyon nen Jesus ya nabasad Marcos 4:26-29?

¹³ Kalkalna so iyaligwas ed espiritual. Indanet itan nen Jesus diad samay ilustrasyon to tungkol ed tomatanem ya nanaugip. (Basaen so Marcos 4:26-29.) Diad satan ya ilustrasyon, kalkalna so imbaleg na saray bini ya insibwag na tomatanem tan anggapoy kontrol to ed kapeles na ibaleg da. Mipadpara, ompan kaukolan mo met ya palabasen so panaon antis mon nanengneng so iyaligwas na iyaaralan mo. No panon ya say dumaralos et agto nakontrol so kapeles na ibaleg na tanem to, agtayo met nakontrol so iyaligwas ed espiritual na saray iyaaralan tayo. Kanian agka nadidismaya tan agka onsusuko no say pakaliknam et singa matantan so iyaaligwas na Bible study’m. Singa saray dumaralos, kaukolan tayoy mananos diad kimey ya panagbangat.—Sant. 5:7, 8.

14. Mangiter na alimbawa ya agtampol nanengneng so resulta na pampupulong tayo.

¹⁴ Diad arum ya lugar, linmabas ni dakel ya taon antis ya walay nagmaliw ya Tasi. Imanoen so eksperiensya na sanagin Gladys tan Ruby Allen. Nen 1959 et niyasain ira ya regular payunir ed sakey ya baley diad Quebec, Canada. * Anggapon balot so dinmengel ed sikara ta saray totoo ed teritorya ra et natatakot ed ibaga na kaabay da tan na saray pari no naamtaan da ya akitongtong ira ed saray Tasi. Oniay nanonotan nen Sister Gladys: “Diad loob na duay taon, inagew-agew ya waloy oras kamin manpupulong ed kaabungan, pero anggapon balot so akatongtong mi! No natakiling na totoo ya sikami so walad arap na abung da, onamot la ra. Pero agkami sinmuko.” Anguman lanlamang so ugali na saray totoo diman ya anggad wala la ray nagmaliw ya interesado. Natan et talora lay kongregasyon ed satan ya baley.—Isa. 60:22.

15. Antoy naaralan tayo ed 1 Corinto 3:6, 7 tungkol ed kimey ya panagpulong tan panagbangat?

¹⁵ Teamwork so kimey ya panagpulong tan panagbangat. Amin tayo ed kongregasyon et  walay nitulong to pian say sakey ya too et naamtaan toy katuaan tan onaligwas ya anggad nabautismoan. (Basaen so 1 Corinto 3:6, 7.) Singa bilang, ompan walay agi ya angiyopresi na tract o magasin ed sakey ya interesado. Pero a-realize to may agi ya agto napawil imay interesado diad oras ya labay to, kanian inendorso to ed sananey ya agi. Nen pinawil na agi imay interesado, nigapo to so Bible study. Manlapu lad saman, nanduruman agagi so itatagar ton mangiyaral, tan kada sakey et walay ibabaga o gagawaen to pian napaseseg imay Bible study. Kada agi ya nakakabat to et makakatulong pian nasalog so bini na katuaan ya tinmubo ed puso to. Kanian duga imay imbaga nen Jesus ya say nantanem tan say nanani et “parehon manliket” ta walay nitulong da ed espiritual ya panag-ani.—Juan 4:35-38.

16. Akin et wala nin siansiay rason tayon manliket anggano limitado lay nagagawaan tayod ministeryo?

¹⁶ Panon to no limitado lay nagagawaan mo ed ministeryo ta walay sakit mo tan onkakapuy lay laman mo? Diad tua, wala nin siansiay rason mon manliket ta antam ya iiter moy anggaay nayarian mo. Makaaral tayo ed ginawa nen Arin David nen sikato tan saray bataan to et akilaban pian nabawi da iray pamilya ra tan amin ya inala na saray tulisan ya Amalekita. Walay 200 ya bataan to ya naksawan lan maong kanian nampatilak la ra pian manbantay na saray bagahe. Analo ira di David tan dakel so asamsam da ed saray Amalekita. Nen panaapagan da la iratan, ingganggan nen David ya “say apag na samay akilan akilaban et mipara ed apag na samay atilak a nambantay na bagahe.” (1 Sam. 30:21-25) Ontan met ed kimey ya panagpulong tan panagbangat. Kada no walay too ya awaten toy katuaan tan onggapo lan manlingkor ed si Jehova, walay rason tayon manliket ta amta tayo ya iiter tayoy anggaay nayarian tayod sayan kimey.

17. Akin et misalsalamat tayod si Jehova?

¹⁷ Misalsalamat tayo ta si Aman Jehova et Dios ya maar-aro tan aapresyaen toy panlilingkor tayo. Amta to ya agtayo nakontrol so reaksion na totoo ed mensahen ipupulong tayo. Pero say nenengnengen to et say inkakuli tan say panangaro tayod sikato. Seguradon bendisyonan to itayo lapud satan. Ipapanonot tod sikatayo ya walay rason tayon manliket basta gagawaen tayoy anggaay nayarian tayo ed ministeryo. (Juan 14:12) On, makaseguro ka ya napapaliket moy Aman Jehova ta agka ontutundan manpupulong!