1. Äwa waut kjenn wie brow sennen un ons freien?

 WIE sent schaftich un brow doamet, Jehova siene Zeijen to sennen! Wie sent Jehova sien Volkj un wie wiesen, daut wie siene Zeijen sent, wan wie aundre de goode Norecht prädjen un lieren. Wie freien ons, wan wie wäm halpen kjennen, waut “to daut eewje Läwen rajcht enjestalt” es (Apj. 13:48, NW). Wie feelen ons soo aus Jesus. Hee “freid . . . sikj em Heiljen Jeist”, aus siene Jinja trigjkjeemen un vetalden, waut see fa scheenet em Deenst beläft hauden (Luk. 10:1, 17, 21).

2. Woo kjenn wie wiesen, daut wie dän Deenst iernst nämen?

² Wie nämen onsen Deenst sea iernst. De Apostel Paulus säd to Timotäus: “Sorj . . . fa die selfst un fa diene Lia.” Dan säd Paulus noch: “Wan du daut doonen woascht, woascht du die selfst seelich moaken, un uk dee, dee die hieren” (1. Tim. 4:16). Daut Prädichtwoakj kaun de Menschen äa Läwen raden. Wie paussen opp, woo wie ons benämen, wiels wie unja Gott sien Kjennichrikj sent. Wie wellen ons emma soo vehoolen, daut Jehova sien Nomen doaderch jeieet woat un daut et met de goode Norecht tooppaust, waut wie prädjen (Filip. 1:27). Wie wiesen uk, daut wie fa onse Lia sorjen, wan wie ons fa dän Deenst fein reedmoaken un Jehova no sienen Säajen froagen, ea wie de Menschen Zeichnis jäwen.

3. Woaren aule no de goode Norecht horchen? Jeff een Biespel.

³ Mau rajcht wan wie ons bastet em Deenst doonen, kaun daut sennen, daut de mieeschte Menschen doawäajen nich no de goode Norecht vom Kjennichrikj horchen. Denkj wie mol aun daut Biespel von dän Brooda Georg Lindal, waut vonne 1929 bat de 1947 gaunz auleen en Ieslaunt prädjen deed. Hee jeef dusende Bieekja wajch, un doch wia doa  nich eena, waut de Woarheit aunneem. Hee schreef: “Daut späat sikj soo, daut eenje noch jäajen de Woarheit sent. Oba de mieeschte intressieet daut eefach nich.” Mau rajcht nodäm aus doa Missionoaren von de Gilead-School hanjeschekjt worden un doa met daut prädjen holpen, dieed daut noch näajen Joa, bat sikj doa eenje Jehova hanjeewen un deepen leeten. *

4. Woo feel wie ons veleicht, wan de Menschen nich no de goode Norecht horchen?

⁴ Wan de Menschen nich wellen de Bibel studieren, dan moakt ons daut mootloos. Dan feel wie ons veleicht soo aus Paulus, waut doa säd, daut am “daut Hoat Dach un Nacht wee[deed]”, wiels de Juden Jesus nich wullen aus dän vesproaknen Messias aunnämen (Reem. 9:1-3). Veleicht studieescht du met wäm de Bibel un du strenjst die sea aun een gooda Liera to sennen un fa dän to bäden. Oba dee kjemt daut nich no, waut dee lieet, un dan motst du veleicht opphieren, met dän to studieren. Ooda waut es, wan du noch kjeenmol met wäm studieet hast, waut sikj haft deepen loten? Saust du die dan schuldich feelen un veleicht soo denkjen, daut Jehova dienen Deenst nich säajnen deit? En disen Artikjel woa wie twee Froagen beauntwuaten: 1. Waut wiest, daut wie onsen Deenst fein doonen? 2. Met waut sell wie räakjnen, wan wie de Menschen prädjen?

5. Wuarom woat daut nich emma soo utkomen, aus wie ons daut wenschen, waut wie fa Jehova doonen?

⁵ De Schreft sajcht von soonen, waut Gott sienen Wellen deit: “Am jelinjt wautemma hee deit” (Psa. 1:3). Oba daut bediet nich, daut aules, waut wie fa Jehova doonen, emma soo utkomen woat, aus wie ons daut wenschen. Wie haben “väl Trubbel”, wäajen wie onvolkomen sent un uk de aundre (Hiob 14:1). Un deejanje, waut jäajen ons sent, kjennen ons veleicht fa eene jewesse Tiet doavon aufhoolen, frie to prädjen (1. Kor. 16:9; 1. Tess. 2:18). Soo, no waut kjikjt Jehova dan, aus wie onsen Deenst fein doonen? Räd wie mol äwa eenje biblische Gruntsauzen, waut dise Froag beauntwuaten.

6. No waut kjikjt Jehova bie onsen Deenst?

⁶ Jehova kjikjt, woo wie ons aunstrenjen un nich oppjäwen. Jehova freit sikj äwa ons, wan wie aundre iewrich prädjen, wäajen wie am leewen, mau rajcht wan dee uk nich horchen wellen. Paulus schreef: “Gott es nich ojjerajcht, daut hee june Woakjen un june Leew vejäten deit, dee jie en sienen Nomen beweesen aus jie de heilje deenden un noch deenen” (Heb. 6:10). Jehova vejat nich onse Woakjen un onse Leew, mau rajcht wan wie uk nich een Bibelstudium haben, waut sikj deepen lat. Daut, waut Paulus to de Korinta säd, paust uk fa ons.  Hee säd: “June Oabeit fa onsen Harn [es] nich vejäfs”, endoont aus daut nu soo utkjemt, aus wie ons daut wenschen, ooda nich (1. Kor. 15:58).

7. Waut kjenn wie doavon lieren, waut Paulus äwa sienen Deenst säd?

⁷ De Apostel Paulus wia een sea gooda Missionoa, waut opp veschiedne Städen niee Vesaumlungen oppstald. Oba aus eenje säden, daut hee nich een gooda Liera wia, säd hee nich, woo väl Menschen hee aul jeholpen haud Christen to woaren. Enne Städ daut schreef hee: “Ekj hab mea jedeent” (2. Kor. 11:23). Well wie soo aus Paulus emma em Denkj hoolen, daut Jehova doano kjikjt, woo sea wie ons aunstrenjen un daut wie nich oppjäwen.

8. Waut sell wie bie onsen Deenst em Denkj hoolen?

⁸ Jehova freit sikj äwa onsen Deenst. Jesus schekjt 70 von siene Jinja ut, de goode Norecht vom Kjennichrikj bekaunttomoaken. Aus dee verecht hauden, “kjeemen de 70 froo trigj”. Wuarom freiden dee sikj? Dee säden: “En dienen Nomen sent ons soogoa de Soton unjadon.” Oba Jesus säd to dee: “June Freid saul nich doaräwa sennen, daut junt de Jeista unjadon sent. Freit junt doatoo, daut june Nomes em Himmel jeschräwen stonen” (Luk. 10:17-20). Jesus wist, daut dee em Deenst nich emma wudden soon goodet beläwen. Wie weeten nich, woo väle von dee, wua de Jinja met räden, werkjlich Christen worden. De Jinja musten daut lieren, nich bloos Freid doaraun to haben, wan de Menschen no an horchten, oba daut Jehova met an tofräd wia.

9. Waut woat no Galata 6:7-9 no doabie rutkomen, wan wie nich opphieren to prädjen?

⁹ Wan wie nich opphieren to prädjen, woa wie daut eewje Läwen kjrieen. Wan wie ons bastet doonen, aundre to prädjen un to lieren, dan sei wie “dän Jeist to jefaulen” un loten doaderch too, daut de heilja Jeist en ons Läwen schaufen kaun. Wan wie “nich meed” ooda “mootloos woaren”, vesprakjt Jehova ons daut eewje Läwen, endoont aus wie wäm halpen kjennen sikj deepen to loten ooda nich (läs Galata 6:7-9).

10. Wuarom horchen eenje Menschen, wan wie dee prädjen, un aundre wada nich?

¹⁰ Aus de Menschen de Woarheit aunnämen ooda nich es doano, woo dee äa Hoat es. Jesus vetald von dit en sien Jlikjnis von dän Maun, waut doa opp veschiedne Städen seien deed. Bloos daut von de goode Ieed brocht dan Frucht (Luk. 8:5-8). Dit Jlikjnis wiest, daut “Gott sien Wuat” nich en jieda Hoat äwareen waust (Luk. 8:11-15). Soo aus de Maun, waut doa seien deed, hab wie nich de Kontroll doaräwa, aus de Woarheit en dee äare Hoaten waussen woat, waut wie prädjen. Onse Veauntwuatunk es, de Woarheitssot wieda to seien. De Apostel Paulus säd: “Gott woat eenem jiedren doano beloonen, aus hee jeoabeit haft”, un nich doano, waut doabie rutjekomen es (1. Kor. 3:8).

11. Wuarom wia Jehova schaftich äwa Noah, wan de Menschen uk nich no am horchten? (See daut Bilt oppe väaschte Sied.)

¹¹ Aul en de Bibeltiet horchten de Menschen nich, waut Gott siene Deena prädjen deeden. Noah wia biejlikj eena, dee woomäajlich fa Joaren “Jerajchtichkjeit prädijd” (2. Pet. 2:5). Secha hopt hee doaropp, daut de Menschen no am horchen wudden, oba Jehova haud nich jesajcht, daut dee wudden. Aus Jehova to Noah säd, daut hee sull dän Kausten buen, säd hee: “Ekj woa die un diene Säns, un diene  Fru, un diene Säns äare Frues en daut Schepp nenn nämen” (1. Mo. 6:18). Un aus Jehova to Noah säd, woo groot de Kausten sennen sull, haft dee secha kunt vestonen, daut doa nich väle Menschen horchen wudden, wiels dee doa goanich aula wudden Rum haben (1. Mo. 6:15). Un soo aus wie weeten, horcht doa nich eena no daut, waut Noah prädjen deed (1. Mo. 7:7). Docht Jehova nu, daut Noah goanich sien bastet jedonen haud? Nä. Jehova wia sea schaftich äwa Noah, wiels dee haud krakjt daut jedonen, wua Jehova am no jefroacht haud (1. Mo. 6:22).

12. Woo kunn de Profeet Jeremia Freid en sienen Deenst haben, wan de Menschen uk nich horchen wullen?

¹² De Profeet Jeremia prädijd de Menschen äwa 40 Joa, wan dee uk jäajen am wieren un nich horchen wullen. Hee wort soo mootloos, wäajen hee “veacht un vespott” wort, daut hee sienen Deenst oppjäwen wull (Jer. 20:8-9). Oba hee jeef nich opp! Waut jeef am de Krauft, wiedatomoaken un Freid en sienen Deenst to haben? Hee kjikjt no twee wichtje Sachen. Ieeschtens: De Norecht von Gott, waut Jeremia bekauntmuak, jeef de Menschen “eene Tookunft un Hopninj” (Jer. 29:11). Tweedens haud Jehova Jeremia utjewält, om de Menschen to prädjen (Jer. 15:16). Wie brinjen de Menschen uk eene Norecht, waut Hopninj jeft, un Jehova haft ons aus siene Zeijen utjewält. Wan wie dise twee wichtje Sachen em Denkj hoolen, woa wie en onsen Deenst Freid haben, aus de Menschen nu horchen wellen ooda nich.

13. Waut lia wie von Jesus sien Jlikjnis en Markus 4:26-29?

¹³ Daut dieet lang, bat doa wäa em jeisteljen veraunkjemt. Von dit räd Jesus en een Jlikjnis von eenen Seimaun, waut doa schleep (läs Markus 4:26-29). Nodäm de Maun jeseit haud, woss daut soo bie sacht un hee kunn nuscht doaraun doonen, daut daut bosja woss. Soo mott wie veleicht uk fa eene lange Tiet wachten, bat ons Bibelstudium daut nokjemt, waut dee lieet. Een Foarma kaun de Plaunten nich bemotten, bosja to waussen, un wie kjennen de Bibelstudiums nich bemotten, soo bosich verauntokomen, aus wie wudden jleichen. Woa nich mootloos un jeff nich opp, wan daut uk nich soo bosich jeit, aus du die wurscht jewenscht haben. Soo, een Foarma mott jeduldich sennen un wie motten jeduldich sennen biem Jinja moaken (Jak. 5:7-8).

14. Waut fa een Biespel wiest, daut daut eenjemol lang dieet, bat de Menschen no ons horchen?

¹⁴ Opp eenje Städen dieet daut lang, bat sikj doa wäa deepen lat. Daut beläwden twee Sestren, Gladys un Ruby Allen. * Dee worden aune 1959 aus Pionieren no eene Staut en Kanada jeschekjt en de Prowins Quebec. Wäajen de Menschen doa Angst hauden, waut äare Nobasch ooda de Priestasch sajen wudden, wan see met de Zeijen räden, horchten dee nich too. Gladys sajcht: “Fa twee Joa jinj wie jieda Dach acht Stund von Hus to Hus, onen daut doa wäa toohorcht. De Menschen kjeemen eefach no de Däa kjikjen, wäa doa wia, un muaken de Gardienen too. Oba wie jeewen nich opp!” Met de Tiet worden de Menschen dan frintelja un eenje fungen aun tootohorchen. Nu jeft daut en dee Staut dree Vesaumlungen (Jes. 60:22).

15. Waut lieet 1. Korinta 3:6-7 ons äwa daut Jinja moaken?

¹⁵ Daut brukt een deel Menschen, om wäm to halpen een Jinja to woaren. Jieda  eena en de Vesaumlunk kaun waut doatoo doonen, daut sikj wäa deepen lat (läs 1. Korinta 3:6-7). Saj wie mol, een Brooda jeft wäm een Zeichnisblaut ooda eene Tietschreft, waut intressieet es. Dis Brooda woat oba en, daut hee nich woat Tiet haben, sikj wieda om dän to kjemren, un äwajeft daut dan eenen aundren Vekjindja. Dee kaun dan aunfangen, met dän de Bibel to studieren. Hee nemt veschiedne Breeda un Sestren met no daut Bibelstudium un jieda eena sprakjt dän opp eene aundre Wajch Moot too. Jieda Brooda un Sesta, waut dis Bibelschiela kjanen lieet, kaun am halpen em jeisteljen to waussen. Soo kjennen dee, waut doa seit, un dee, waut doa arnt, sikj toop freien, soo aus Jesus säd (Joh. 4:35-38).

16. Wuarom kjenn wie Freid aum Deenst haben, wan wie uk nich soo väl doonen kjennen wäajen onse Jesuntheit ooda wäajen onse Krauft?

¹⁶ Veleicht kaust du nich mea soo väl prädjen un lieren, wäajen du nich soo jesunt best un nich de Krauft hast waut ea. Du kaust doawäajen Freid doaraun haben, waut du doonen kaust. See wie mol, waut de Kjennich David un siene Mana deeden, aus de Amalekita an äare Famieljes un daut Hab un Goot wajchneemen. Tweehundat von de Mana wieren too meed toom kjamfen. Soo, dee bleewen bie de Sachen un pausten doa opp. Aus David un de aundre Mana jäajen de Amalekita jewonnen un dee väl wieetvolle Sachen fuatneemen, säd David, daut aule Mana sullen jlikjen väl von daut kjrieen (1. Sam. 30:21-25). Biejlikj soo es daut uk bie daut Jinja moaken oppe gaunze Welt. Wan wie ons bastet doonen, dan kjenn wie ons äwa jieda eenen freien, waut Jehova kjanen lieet un sikj deepen lat.

17. Fa waut kjenn wie Jehova dankboa sennen?

¹⁷ Wie danken Jehova doafäa, daut hee soo leeftolich to ons es. Hee weet, daut wie de Menschen nich bemotten kjennen no ons to horchen ooda am to deenen. Hee kjikjt bie ons doano, woo sea wie ons aunstrenjen un woo sea wie am leewen, un beloont ons doafäa. Hee lieet ons uk, woo wie kjennen Freid doaraun haben, waut wie perseenlich em Deenst doonen kjennen (Joh. 14:12). Wie kjennen ons secha sennen, daut Gott sikj äwa ons freit, wan wie nich oppjäwen!