1. Mukunda natshi tuana khala nu gusuanguluga?

TUANA khala diago nu gusuanguluga luholo tudi Matemue a Yehowa! Ha gumonesa egi tudi akombeledi enji, tuana longesa athu ako ha gujiya jina dienji nu ha guabuisa alandudi. Tuana suanguluga muavula gula tuakuatesa muthu udi ‘nu mutshima watagana ha guheta monyo wa mayilago’ ha gubua mulandudi. (Makal. 13:48) Tuajiya gudivua gifua Yesu handaga ‘nyuma ya Nzambi yamuzalesele nu gusuanguluga’ tangua alandudi enji amuwambelele ndaga jiabonga akalegele mu mudimo wa gulongesa.—Luka 10:1, 17, 21.

2. Luholo lutshi tuajiya gumonesa egi tuana zula mudimo wa gulongesa nu ndando yavula?

² Tuana zula mudimo wa gulongesa nu ndando yavula. Mupostolo Phaula wawambelele Timote egi: ‘Khala watema mu luholo luaye lua guwenda nu mu malongo aye.’ Wazuelele luko egi: ‘Gula watshita ngenyi, mbawudihuluisa nu mbawuhuluisa nji athu adi gugutegelela.’ (1 Tim. 4:16) Mudimo wa gulongesa wana huluisa athu. Tuana monesa gutema mu luholo luetu lua guwenda handaga tudi athu a Ufumu wa Nzambi. Tuana kalagala yagasue ha gutumbuisa Yehowa nu ha gujinga mu gudivua nu ndaga tuana longesa. (Fili. 1:27) Tuana ‘monesa gutema mu malongo etu’ gula tudi gudilondega muabonga nu tudi mutoga ukuateshi wa Yehowa gutuama dia guya mu mudimo wa gulongesa.

3. Athu agasue ajiya gusuanguluga nu lukuma luabonga lua Ufumu ba? Hana gifezegeselo.

³ Ikhale tudi mutshita ngolo ha gulongesa athu lukuma luabonga lua Ufumu, avula mukatshi diawo ajiya gutuna gututegelela. Tutadilenu eksperianse ya phangi Georg Lindal. Walongesele hakhenji mu mafundo a gudisha a gu Islande, sendese mu 1929 uu nu mu 1947. Wahanele mikanda yavula, uvi nga muthu mumoshi gabuilego Temue wa Yehowa. Phangi muene wasonegele egi:  “Athu avula akhalelego diago musuanguluga nu lukuma luabonga, uvi ako akhalele diago mutuna.” Ba misionere akatugile gu khalasa dia Gileade ayile mulongesa nji mu membo ene uvi ahetelego athu avula. Gungima dia ivo 9 athu ako a mu membo ene atshiginyine giamatshidia nu abatijiwe. *

4. Luholo lutshi tuajiya gudivua gula athu adi mutuna gutegelela lukuma luabonga?

⁴ Muila wana gutuleba gula athu ashigo mutshigina gulonguga Biblia. Tuajiya gudivua gifua luholo luadivile Phaula tangua diazuelele muene egi: ‘Ngudi nu gikenene nu lamba diavula’ handaga enya Yuda avula ashigo mutshigina egi Yesu wakhalele Masiya watombewe. (Lomo 9:1-3) Tangiza gale egi wana longuga Biblia nu muthu mumoshi. Udi mutshita ngolo há gukhala mulongeshi wabonga nu wana kombelela muavula mukunda nu muthu muene. Uvi muthu muene gashigo mukalegela ndaga jidi muene mulonguga. Tudi naye gubemba gulonguga n’enji. Nga ndo, Yajiya gukhala nji egi khenji ukuateselego nga muthu mumoshi ha gubatijiwa. Udi naye guvua gikenene nga gutangiza egi Yehowa ganago gugukuatesa mu mudimo wa gulongesa ba? Mu longo edi tuza muhana mvutu gu mihu eyi mbadi: (1) Itshi yana monesa egi tuana kalagala mudimo wa gulongesa muabonga? (2) Itshi tudi naye gujiya tangua tudi mulongesa athu ako lukuma luabonga?

5. Mukunda natshi matangua ako mudimo wetu wa gulongesa wanago guzola mbuto gifua luholo tuakhalele mutangiza?

⁵ Biblia yana zuela egi muthu udi mutshita gutshigina gua Nzambi ‘mbawubinga mu ndaga jiagasue jidi muene mutshita.’ (Ngi. 1:3) Verse eyi ishigo muzuela egi ndaga jiagasue tudi mutshita mukunda nu Yehowa mbajikalegewa gifua luholo tudi mutangiza. Monyo wetu nu wa athu ako udi ‘wazala pha nu malamba’ handaga tushigo athu atagana. (Yobo 14:1) Luko, mbalagaji jietu jiajiya gututunyisa ha gulongesa lukuma luabonga mu tangua dimoshi ngenyi. (1 Kol. 16:9; 1 Tes. 2:18) Luholo lutshi Yehowa wana tadila mudimo wetu wa gulongesa? Tutadilenu malongo a Biblia ajiya gutukuatesa ha guheta mvutu gu muhu owu.

6. Mukunda nu Yehowa, itshi yana monesa egi tudi mukalagala mudimo wetu muabonga?

⁶ Yehowa wana mona ngolo jietu nu khadilo dietu dia gukolesela. Ikhale athu ashigo gututegelela, Yehowa wana suanguluga nu esue gula tudi mulongesa nu gikhesa giagasue handaga tuana gumuzumba. Phaula wasonegele egi: ‘Nzambi gashigo muthu wabola ha gujimbila mudimo muakalegele nu guzumba muamonesele mukunda nu jina dienji, luholo muakalegele athu a gijila mudimo nu mudi mulandula guakalegela.’ (Heb. 6:10) Ikhale athu tuana longesa Biblia anago guzula desizio dia gubatijiwa, Yehowa wana mona ngolo nu guzumba guetu mukunda nu muene. Ndaga Phaula  wawambelele Aklisto a gu Kolinto jiajiya nji gutukuatesa. Wazuelele egi: ‘Mudimo wenu wakola mudi mukalagala mukunda nu Fumu ushigo wagithuhu,’ ikhale mudimo wene ushigo muzola mbuto gifua luholo tuakhalele mutangiza.—1 Kol. 15:58.

7. Longo ditshi tuajiya guzula mu ndaga jiazuelele mupostolo Phaula mukunda nu mudimo wa gulongesa?

⁷ Mupostolo Phaula wakhalele mukalagala mudimo wa gimisionere muabonga. Wazolele mahungu ahe-ahe mu membo avula. Tangua athu akhalele gumufeta egi gakhalelego mulongeshi wabonga, Phaula gaawambelelego gula athu guvula gutshi akuatesele muene ha gujiya giamatshidia. Uvi wasonegele egi: ‘Ngakalegele mudimo wavula.’ (2 Kol. 11:23) Gifua Phaula, tudi naye gujiya egi Yehowa wana zula mudimo wetu wakola nu khadilo dietu dia gukolesela nu ndando yavula.

8. Ndaga itshi tudi naye gujiya mukunda nu mudimo wetu wa gulongesa?

⁸ Mudimo wetu wa gulongesa wana suanguluisa Yehowa. Yesu watumine alandudi 70 ha guya mulongesa lukuma luabonga lua Ufumu, gungima ‘avutugile nu gusuanguluga.’ Itshi yaakuatesele ha gukhala nu gusuanguluga? Azuelele egi: ‘Nu bademo atutumagela tangua tuakalegela jina diaye.’ Uvi Yesu wawambelele egi: ‘Musuangulugago handaga nyuma jiabola jiamitumagela, uvi suangulugenu handaga majina enu asonegewa mu dilu.’ (Luka 10:17-20) Yesu wakhalele mujiya egi alandudi enji mbaashigo muzola mbuto jia luholo elu tangua diagasue mu mudimo wa gulongesa. Tushigo mujiya gula athu guvula gutshi abuile Aklisto mukatshi dia athu anyi alandudi a Yesu alongesele. Alandudi akotelesele egi ashigo naye gukhala nu gusuanguluga phamba gula athu a ategelela. Uvi asuangulugile nji muavula handaga ajiyile egi Yehowa wasuangulugile nu mudimo wawo wakola.

9. Ha gutadila Galatiya 6:7-9, gubonga gutshi mbatuheta gula tuakolesela mu mudimo wa gulongesa?

⁹ Gula tudi mukolesela mu mudimo wetu wa gulongesa, mbatuheta monyo wa ivo nu ivo. Gula tudi mukalagala ngolo ha gulongesa lukuma luabonga, ‘mbatukuna ha gusuanguluisa nyuma ya Nzambi’ tangua tudi mubemba egi nyuma yene yitukuatese mu monyo wetu. Gula tushigo ‘mubemba’ nga tushigo ‘muleba muila,’ Yehowa udi gutuwambela egi mbawutuhana monyo wa ivo nu ivo, ikhale muthu tuana longesa Biblia gazudilego desizio dia gubatijiwa.—Tanga Galatiya 6:7-9.

10. Gima gitshi giana tuma athu ako ha gutegelela tangua tuana longesa, uvi ako ndo?

¹⁰ Gima gia thomo giana tuma athu ha gutshigina lukuma luabonga idi ndaga jidi mu mitshima yawo. Yesu wakotelesele ndaga yene mu gifezegeselo gia muthu mumoshi wayile mukuna mbuto. Wakunyine mbuto jiene mu mavu a gudisha, uvi phamba mbuto jinyi jiabuile mu mavu abonga jiene jiahagele mabundu. (Luka 8:5-8) Yesu wazuelele egi mavu a gudisha adi mumonesa athu adi mutegelela ‘mbimbi ya Nzambi’ mu maluholo a gudisha. (Luka 8:11-15) Luholo mukunyi wa mbuto gajiyilego gukudisa mbuto jienji, esue nji tuajiyilego gukudisa giamatshidia mu mitshima ya athu tuana longesa. Ginemo gietu gidi gia gukuna mbuto jiabonga jia Ufumu. Mupostolo Phaula wazuelele egi: ‘Muthu nu muthu mbawuheta gishimbigo gienji gifua mudi mudimo udi muene mukalagala,’ uvi ishigo mukunda nu guvula gua athu alongesa muene.—1 Kol. 3:8.

11. Mukunda natshi Yehowa wasuangulugile nu mudimo wa Nowa ikhale athu akhalelego gumutegelela? (Tala gifuanesa holu dia gizula.)

¹¹ Sendese mualeha, athu avula ana tshiginago gutegelela akombeledi a Yehowa tangua ana  gualongesa. Ha gufezegesa, Nowa wakhalele ‘mulongeshi wa ndaga jiabonga.’ Yajiya gukhala egi walongesele ivo hehi nu 40 nga 50. (2 Phet. 2:5) Nowa wakhalele gudifelela egi athu mbaamutegelela muabonga, uvi Yehowa gamuwambelelego nga gima mukunda nu ndaga yene. Tangua Yehowa wamuwambelele egi atunge masuwa, wamulezele egi: ‘Udi naye gungina mu masuwa nu aye nu mukaji’aye nu an’aye a mala nu akaji’awo.’ (Gis. 6:18) Nowa wakotelesele egi athu avula mbaashigo gumutegelela handaga Nzambi wamuwambelele ha gutunga masuwa azonda; mbagushigo mukhala fundo mukunda nu athu ene. (Gis. 6:15) Gifua luholo tudi guyijiya muabonga, gushigo nga muthu mumoshi wategelele Nowa hakhalele muene mulongesa. (Gis. 7:7) Yehowa watangijile egi Nowa gakhalelego mulongesa muabonga ba? Ndo sha! Yehowa wasuangulugile muavula nu Nowa handaga watshitshile diago ndaga jiamuwambelele muene ha gukalagala.—Gis. 6:22.

12. Itshi yakuatesele Yelemiya ha gukhala nu gusuanguluga mu mudimo wa gulongesa ikhale athu akhalelego mutshigina gumutegelela nu akhalele n’enji umbalagaji?

¹² Profete Yelemiya walongesele ivo yavula uvi athu akhalelego gumutegelela, amubuishile nji mbalagaji yawo. Walebele muila nu watshiginyile gubemba mudimo wa Yehowa handaga mbalagaji jienji jiakhalele ‘gumushinga nu gumulela.’ (Yel. 20:8, 9) Uvi Yelemiya gabembelego gulongesa! Itshi yamukuatesele ha gutuna guleba muila nu ha gukhala nu gusuanguluga mu mudimo wa gulongesa? Ndaga mbadi jia mukuatesele. Thomo, mbimbi ya Nzambi yakhalele mulongesa Yelemiya, yakhalele muhana athu ‘felela mukunda nu masugu adi muza.’ (Yel. 29:11) Ya mbadi, Yehowa watombele Yelemiya ha gulongesa mbimbi yenji gudi athu. (Yel. 15:16) Esue nji tuana longesa lukuma ludi muhana felela gudi athu. Tuana longesa jina dia Yehowa handaga tudi Matemue enji. Gula tudi musha matangi’etu gu ndaga eji jia ndando mbadi, tuajiya guheta gusuanguluga ikhale athu ashigo mutshigina gututegelela.

13. Gifezegeselo gia Yesu gidi mu Mako 4:26-29 gidi gutulongesa itshi?

¹³ Muthu wana kula mu nyuma mage-mage. Yesu wazuelele ndaga yene mu gifezegeselo gia mukunyi wa mbuto yonu wakhalele gu tulo. (Tanga Mako 4:26-29.) Mbuto jiakunyile mukunyi wa mbuto jiakhalele mukula mage-mage, uvi muene gakhalelego mujiya luholo jiakhalele mukula. Luholo lumoshi nji, yajiya gutoga egi tangua diavula dibalega hagula muthu tuana longesa Biblia asendese gukalegela ndaga jidi muene mulonguga. Luholo muthu wana kuna mbuto gajiyilego gukudisa mbuto muphushi, esue nji tuajiyilego gushinjiga athu tuana longesa Biblia ha gukula muphushi mu nyuma gifua luholo tudi mutshigina. Hene tushigo naye guleba muila, gula athu ene ashigo mukula mu nyuma muphushi. Tudi naye gukhala nu guhuiminyina mu mudimo wa gubuisa athu alandudi gifua mukunyi wa mbuto.—Yak. 5:7, 8.

14. Hana gifezegeselo gidi mumonesa egi yajiya gutoga matangua avula gutuama egi athu ategelele lukuma luabonga?

¹⁴ Mu mafundo ako, hagula athu azule desizio dia gubatijiwa, yana zula tangua diavula. Tutadilenu gifezegeselo gia Gladys nu phangi’enji Ruby Allen. Aphangi awa atumiwe mu dimbo dimoshi dia provense ya Québec, gu Canada ha gutshita mudimo wa muvundji wa njila wa tangua diagasue mu 1959. * Athu akhalele mutuna gutegelela lukuma luabonga lua Ufumu handaga akhalele muvua woma wa athu ako nu wa enya Katolika. Gladys udi muzuela egi: “Tuakhalele mulongesa inzo nu inzo ivo mbadi. Tuakhalele mutshita matangua nage lusugu nu lusugu, uvi nga muthu mumoshi gakhalelego gututegelela! Athu akhalele muza ha mufulo,  uvi gula atumona, ajidiga mufulo wene. Uvi tuabembelego gulongesa.” Gungima athu ene asombegesele matangi awo, asendesele gutegelela lukuma luabonga. Mangino dimbo diene didi nu mahungu mutatu.—Yesh. 60:22.

15. Mukanda wa 1 Kolinto 3:6, 7 udi gutulongesa itshi mukunda nu mudimo wa gubuisa athu alandudi?

¹⁵ Athu avula mu hungu ajiya gukuatesa muthu ha gubua mulandudi. Phangi wagasue mu hungu wajiya gukuatesa muthu wana longuga Biblia ha gubatijiwa. (Tanga 1 Kolinto 3:6, 7.) Ha gufezegesa, phangi mumoshi wajiya guhana muthu wasuanguluga nu giamatshidia trakte nga zulunalu. Phangi muene wajiya gutoga mulongeshi muko ha guvutugila muthu muene gula programe yenji ishigo gumuhana njila ya gumuvutugila. Mulongeshi muene wasendesa gulonguga Biblia nu muthu muene. Wajiya guya nu aphangi a mu hungu ha gulonguga n’enji. Ngenyi aphangi ajiya gumukuatesa mu maluholo agudisha. Ajiya gumukuatesa ha gujiya ndaga jiavula jiatadila Yehowa. Ngenyi, aphangi agasue akuatesele muthu muene ajiya gukhala nu gusuanguluga gula wabatijiwa.—Yone 4:35-38.

16. Mukunda natshi wajiya gukhala nu gusuanguluga Ikhale ushigo luko mulongesa gifua ha thomo?

¹⁶ Yajiya gukhala egi wana longesa luko ndo muavula gifua ha thomo handaga udi mukata nga ndo ushigo luko nu ngolo jiavula. Ikhale ngenyi, wajiya gulandula gukhala nu gusuanguluga mu mudimo waye wa gulongesa. Tutadilenu ndaga yakalegele Fumu Davidi nu athu enji tangua ahuluishile enya fami jiawo nu ima yawo ha mago a enya Amaleke. Mala 200 mukatshi dia athu a Davidi ayilego mulua ita handaga akhalele aguhuila, asalele mubamba ima. Davidi nu athu enji abingile ita, atambudile ima yavula ya ndando gudi mbalagaji jiawo. Gungima Davidi wawambelele athu enji egi adi naye gukhapha ima luholo lumoshi nu athu asalele mubamba ima. (1 Sam. 30:21-25) Lumene lua Davidi ludi gutuhana longo diatadila mudimo wetu wa gubuisa athu alandudi. Ikhale ushigo luko mulongesa gifua luholo wakhalele mulongesa thomo, wajiya gukhala nu gusuanguluga gifua alongeshi ako gula muthu mumoshi wajiya Yehowa nu wabatijiwa.

17. Mukunda natshi tuana hana Yehowa mersi?

¹⁷ Tuana hana Yehowa mersi handaga wana suanguluga nu mudimo tuana gumukalegela. Tuajiyilego gushinjiga athu ha gututegelela nga ha gukombelela Yehowa. Yehowa wana mona ngolo tuana kalagala mu mudimo wenji, wana jiya nji egi tuana gumuzumba muavula, wana gutukuatesa diago. Wana gutulongesa nji luholo tuajiya gukhala nu gusuanguluga ikhale tudi mulongesa muavula nga ndo. (Yone 14:12) Tuajiya gusha mutshima egi Nzambi wana suanguluga diago nu mudimo wetu gula tushigo mu bemba gulongesa.