1. Wanem nao mekem iumi for hapi?

IUMI hapi from iumi Olketa Jehovah’s Witness! Iumi pipol blo Jehovah, and iumi preach lo pipol and teachim olketa abaotem Jehovah. Iumi hapi for helpem olketa wea “showimaot olketa laekem laef olowe” for kam insaed lo truth. (Acts 13:48) Maet iumi feel olsem Jesus wea “hapi tumas” taem hem herem olketa gudfala report blo olketa disaepol abaotem preaching waka wea olketa duim.​—Luke 10:1, 17, 21.

2. Wanem nao showimaot iumi tinghae lo preaching waka?

² Iumi barava tinghae lo preaching waka. Paul sei lo Timothy: “Lukluk gud evritaem long iuseleva and long samting wea iu teachim.” Paul sei moa: “Wei for duim olsem bae mekem iu and olketa wea lisin long iu for kasem laef.” (1 Tim. 4:16) Preaching waka wea iumi duim helpem pipol for kasem laef. So iumi mas ‘lukluk gud long iumiseleva’ bikos iumi story abaotem Kingdom blo God lo pipol. Wei blo iumi shud mekhae lo Jehovah and showimaot iumi bilivim wanem iumi preach abaotem. (Phil. 1:27) And tu, iumi showimaot iumi ‘lukluk gud lo teaching’ blo iumi taem iumi prepare gud for duim ministry and prea lo Jehovah for helpem iumi lo datfala waka.

3. Waswe, bae evriwan interest lo message abaotem Kingdom? Storyim wanfala example.

³ Nomata iumi duim best for preach lo pipol lo territory blo iumi, maet staka no interest lo message abaotem Kingdom. Tingim wanem hem happen lo Brata Georg Lindal wea hemseleva preach nomoa lo Iceland from 1929 kasem 1947. Hem givimaot staka thousand pablikeson, bat no eniwan kam insaed lo truth. Hem sei: “Staka wea mi preach lo olketa no interest, and samfala againstim truth.” Lo 1947, samfala missionary wea graduate lo  Gilead Skul kam for help witim preaching waka. Bat nara naenfala year hem go pas bifor samfala lo Iceland dedicate lo Jehovah and baptaes. *

4. Hao nao maet iumi feel taem pipol no acceptim gud nius?

⁴ Iumi savve sorre taem pipol no laek acceptim gud nius. Maet iumi feel olsem Paul wea ‘sorre tumas and barava wari’ bikos staka Jew les for bilivim Jesus hem datfala Messiah. (Rome 9:1-3) Maet iumi waka hard for teachim Bible study blo iumi and prea for God helpem hem, bat hem no followim wanem hem lanem, and iumi luksavve hem taem for stopem study. Or maet iumi no garem chance for helpem samwan kamap baptaes. Waswe, diswan minim iumi no duim gud waka blo iumi and Jehovah no hapi lo wanem iumi duim? Lo disfala study, bae iumi ansarem tufala kwestin hia: (1) Wanem nao showimaot iumi no waka hard nating lo ministry? (2) Waswe, iumi shud expectim evriwan for acceptim gud nius?

5. Why nao samfala samting iumi laek duim for Jehovah hem no happen olsem iumi laekem?

⁵ Bible sei olsem lo olketa wea duim wanem God laekem: “Evrisamting wea olketa pipol ya i gohed fo duim i kamap gudfala.” (Sams 1:3) Sapos olsem, why nao samfala samting iumi laek duim for Jehovah hem no happen olsem iumi laekem? From iumi evriwan no perfect, iumi savve kasem “staka hadtaem.” (Job 14:1) And tu, olketa wea againstim iumi savve stopem iumi for duim preaching waka. (1 Cor. 16:9; 1 Thess. 2:18) So hao nao iumi savve sure Jehovah hem hapi lo wanem iumi duim? Bae iumi storyim samfala Bible principle wea ansarem datfala kwestin.

6. Hao nao iumi savve sure Jehovah hem hapi lo waka wea iumi duim lo ministry?

⁶ Jehovah luksavve iumi waka hard and no givap. Nomata pipol interest lo gud nius or nomoa, Jehovah hem hapi iumi duim best blo iumi lo preaching waka bikos iumi lovem hem. Paul sei: “God hem raeteous so hard for hem forgetim waka wea iufala duim and love wea iufala showimaot for nem bilong hem taem iufala helpem olketa holy wan and gohed for duim datwan.” (Heb. 6:10) Nomata no eniwan wea iumi study witim hem baptaes, Jehovah hapi from iumi duim best blo iumi. So wanem Paul talem olketa lo Corinth hem fitim iumi tu: “Iufala no waka hard nating taem iufala duim waka bilong Lord,” nomata pipol no laek for kam insaed lo truth.​—1 Cor. 15:58.

7. Wanem nao iumi savve lanem from samting wea aposol Paul talem abaotem ministry blo hem?

 ⁷ Aposol Paul hem wanfala missionary wea waka hard and startim olketa niu kongregeson lo staka taon. Bat taem samfala pipol sei hem no savve teach gud, hem no mekhae lo haomas pipol hem helpem for kamap Christian. Bat hem sei nomoa “mi duim staka waka.” (2 Cor. 11:23) Olsem Paul, hem gud for luksavve hao Jehovah barava tinghae lo hard waka wea iumi duim lo ministry and from iumi no givap.

8. Wanem nao iumi shud luksavve lo hem abaotem ministry wea iumi duim?

⁸ Jehovah hapi from iumi duim preaching waka. Jesus talem 70-fala disaepol blo hem for go preach abaotem Kingdom and taem olketa kam bak “olketa barava hapi.” Why nao olketa hapi? Olketa sei: “Nomata olketa demon tu bat obeyim mifala taem mifala iusim nem bilong iu.” Bat Jesus helpem olketa for luksavve lo samting wea important winim datwan taem hem sei: “Iufala mas no hapi bikos olketa demon obeyim iufala, bat iufala mas hapi bikos God hem raetem finis nem bilong iufala long heven.” (Luke 10:17-20) Jesus savve no evritaem bae olketa kasem kaen experience olsem lo ministry. And iumi no savve haomas pipol nao olketa helpem for kamap Christian. Hem gud olketa disaepol hapi from pipol lisin lo gud nius, bat main samting wea shud mekem olketa hapi hem from olketa savve Jehovah hapi lo waka blo olketa.

9. Wanem nao Galatia 6:7-9 sei iumi bae kasem sapos iumi no givap for duim ministry?

⁹ Sapos iumi no givap for duim ministry blo iumi, bae iumi kasem laef olowe. Taem iumi duim best for preachim gud nius and teachim narawan truth abaotem Kingdom, datwan showimaot iumi “followim spirit bilong God” wea minim iumi depend lo holy spirit blo God for helpem iumi. Sapos iumi “gohed” and “no givap” for duim ministry, Jehovah sei bae iumi kasem laef olowe, nomata iumi helpem samwan for kamap Jehovah’s Witness or nomoa.​—Readim Galatia 6:7-9.

10. Why nao samfala nomoa kam insaed lo truth?

¹⁰ Bihaen man herem gud nius hem nao bae disaed sapos hem bae duim samting followim datwan. Jesus explainim diswan lo wanfala tokpiksa abaotem man wea plantim seed lo olketa difren kaen graon, bat wanfala kaen graon nomoa mekem seed for grow. (Luke 8:5-8) Jesus sei olketa difren kaen graon piksarem wanem bae pipol duim bihaen olketa herem “message bilong God.” (Luke 8:11-15) Olsem man wea plantim seed no savve kontrolem which seed bae grow, iumi no savve kontrolem hu nao bae duim samting followim wanem hem herem. Waka blo iumi hem for gohed preach lo pipol. Olsem aposol Paul talem, “God bae blessim waka bilong man,” no haomas pipol hem helpem for kam insaed lo truth.​—1 Cor. 3:8.

11. Waswe, Noah duim gud waka blo hem for preach? (Lukim piksa lo front page.)

¹¹ Lo taem blo Bible, staka no laek herem message blo olketa wea preach. Olsem example, for staka year Noah “preach abaotem samting wea raeteous.” (2 Pet. 2:5) Masbi hem laekem pipol for lisin lo message blo hem, bat Jehovah no sei datwan bae happen. Taem Jehovah  givim instruction lo Noah lo hao for wakem ark, hem sei: ‘Yu mas go insaet long ark wetem waef blong yu, an trifala pikinini blong yu wetem trifala waef blong trifala.’ (Jenesis 6:18) And tu, Noah mas luksavve no staka pipol bae lisin bikos bae hard for staka pipol fit insaed lo ark bikos lo size wea God markem for ark. (Jenesis 6:15) Olsem iumi savve, no eniwan lisin lo Noah. (Jenesis 7:7) Waswe, Jehovah tingse Noah no duim gud waka blo hem for preach? Nomoa! Jehovah hapi lo Noah bikos hem faithful for duim wanem Jehovah laekem hem for duim.​—Jenesis 6:22.

12. Wanem nao helpem Jeremiah for hapi lo ministry, nomata pipol no laek lisin and againstim hem?

¹² Jeremiah tu preach for staka year and pipol againstim hem and no laek lisin lo message blo hem. Olketa barava “mekfan long [hem], an tokspoelem [hem].” Datwan mekem hem wikdaon and ting for givap. (Jeremaea 20:8, 9) Bat Jeremiah no givap! Wanem nao helpem Jeremiah for gohed hapi for duim ministry blo hem? Hem tingim tufala important samting. First wan, message blo God wea Jeremiah storyim hem givim hope lo pipol. (Jeremaea 29:11) Mek-tu samting, Jehovah chusim Jeremiah for story for hem. (Jeremaea 15:16) Iumi tu talem message lo pipol wea givim olketa hope, and Jehovah chusim iumi for witness for hem. Taem iumi tingim tufala important samting hia, datwan savve helpem iumi for gohed hapi nomata maet pipol no laek herem message blo iumi.

13. Wanem nao iumi lanem from tokpiksa blo Jesus lo Mark 4:26-29?

¹³ Hem savve tek taem for samwan garem faith. Jesus mekhae lo datfala point lo tokpiksa blo hem abaotem man wea torowem seed lo graon and then hem sleep. (Readim Mark 4:26-29.) Man hia savve olketa seed bae isisi grow and hem no savve kontrolem datwan. Olsem tu, taem iumi study witim samwan, iumi mas patient bikos hem savve tek taem for Bible study followim wanem hem lanem. Man wea plantim seed no savve forcem seed for grow kwiktaem, iumi tu no savve forcem Bible study for garem faith kwiktaem. So no givap sapos Bible study hem isisi changem samfala samting lo laef blo hem. Man wea plantim seed mas patient and iumi tu mas olsem.​—Jas. 5:7, 8.

14. Storyim example wea showimaot lo samfala ples hem tek longtaem for pipol kam insaed lo truth.

¹⁴ Lo samfala ples, hem tek longtaem bifor pipol start for interest lo truth. Tingim experience blo Gladys and Ruby Allen. Lo 1959 tufala really sista hia kasem assignment for duim regular pioneer waka lo wanfala taon lo Quebec, Canada. * From olketa lo datfala taon fraetem olketa bigman blo Catholic Church and no laekem narawan for ting daonem olketa, olketa no lisin lo Kingdom message. Gladys sei: “For tufala year mitufala preach eit hour evriday, bat no eniwan laek story witim mifala! Bihaen mitufala noknok olketa bae chek for hu nao kam, and taem olketa lukim mitufala olketa bae no openem door nao. Bat mitufala no givap.” Isisi samfala start for change and start for lisin lo tufala. Distaem thrifala kongregeson nao stap lo datfala taon.​—Isa. 60:22, NW.

15. Olsem tokpiksa lo 1 Corinth 3:6, 7 storyim, hu nao helpem samwan for kamap disaepol?

 ¹⁵ Olketa pablisa savve helpem samwan for kamap disaepol. Evriwan lo kongregeson savve duim samting for helpem samwan for kamap fit for baptaes. (Readim 1 Corinth 3:6, 7.) Olsem example, wanfala pablisa givim tract or magasin lo samwan wea interest. Datfala pablisa no savve duim return visit lo taem wea fitim haosholder, so hem askem nara pablisa for visitim hem. Datfala pablisa startim Bible study witim haosholder. Hem askem olketa difren brata and sista for kam lo study and olketa storyim samting for encouragem datfala Bible study. Evri brata and sista hia duim samting for helpem datfala Bible study gohed gud. Olsem story blo Jesus abaotem man wea plantim seed and man wea harvestim frut, evriwan wea helpem Bible study kamap fit for baptaes savve barava hapi.​—John 4:35-38.

16. Nomata iumi sik or olo, why nao iumi savve hapi lo ministry wea iumi duim?

¹⁶ Sapos iumi no savve duim staka samting lo ministry from iumi sik or olo, iumi savve hapi bikos iumi duim samting lo ministry. Tingim wanem hem happen lo taem blo King David. Olketa Amalekite tekem famili and olketa nara samting blo David and olketa man blo hem. Tu handred man blo David no garem strong for go faet, so olketa stap for lukaftarem evri samting taem David and olketa narawan go faetem olketa Amalekite. Bihaen olketa winim datfala faet, David sei for sharem evri samting wea olketa tekem witim olketa wea no go faet. (Fas Samuel 30:21-25) Olketa wea stap for lukaftarem olketa samting blo David kasem gud samting. Olsem tu, sapos iumi duim best blo iumi lo ministry iumi savve hapi taem samfala savve lo Jehovah and gogo olketa baptaes.

17. Hao nao Jehovah ting lo ministry blo iumi?

¹⁷ Iumi hapi from Jehovah tinghae lo evri samting iumi duim lo ministry. Hem savve no evriwan bae interest lo gud nius. Nomata olsem, hem luksavve iumi traem best blo iumi and hem bae rewardim iumi. And tu, hem laekem iumi for hapi lo wanem iumi fit for duim lo preaching waka. (John 14:12) Iumi savve sure Jehovah bae hapi witim iumi sapos iumi gohed and no givap!