مطالعے دا مضمون نمبر 43
ہمت نہ ہارو!
چنگے کم کرن چ ہمت نہ ہارو۔—گلتیوں 6:9۔
گیت نمبر 84 (خوشی نال گاؤ): خدمت لئی ہر پل تیار
مضمون تے اِک نظر *
1. سانوں کیس گل تے بڑا مان اے؟
ایہہ ساڈے لئی بڑے مان تے خوشی دی گل اے کہ اَسی یہوواہ دے گواہ واں۔ اوہدا ناں ساڈی پچھان اے تے اَسی مُنادی کر کے تے دُوجیاں نُوں تلیم دے کے ایہہ ثابت کرنے آں کہ اَسی اوہدے گواہ واں۔ سانوں اوہدوں بڑی خوشی ہوندی اے جدوں اَسی کسے ایہو جہے بندے دی مدد کرنے آں جیہڑا ہمیشاں دی زندگی دی راہ تے چلنا چاہندا اے۔ (اعمال 13:48) اَسی وی اُنج ای محسوس کرنے آں جِنج یسوع مسیح نے محسوس کیتا سی۔ اِک وار جدوں اوہدے شاگرداں نے آ کے اوہنوں دَسیا کہ اوہناں دا مُنادی دا کم کِنّاں ودھیا رہیا تے یسوع پاک روح نال بھر گیا تے بوہت خوش ہویا۔—لُوقا 10:1، 17، 21۔
2. اَسی ایہہ کیویں ظاہر کر سکنے آں کہ اَسی مُنادی دے کم نُوں بوہت اہم سمجھنے آں؟
2 اَسی مُنادی دے کم نُوں بوہت اہم سمجھنے آں۔ پولُس رسول نے تیمُتھیُس نُوں ایہہ نصیحت کیتی کہ اپنی شخصیت تے اوس تلیم تے دھیان دے جیہڑی تُوں دُوجیاں نُوں دینا ایں۔ اوہنے ایہہ وی کہیا: ایہناں کماں چ لگیا رہ کیونکہ ایس طرحاں تُوں اپنے آپ نُوں تے اوہناں لوکاں نُوں بچا لوَیں گا جیہڑے تیری گل سن دے نیں۔ (1-تیمُتھیُس 4:16) ایہدے توں ظاہر ہوندا اے کہ جدوں اَسی مُنادی کرنے آں تے ایہدے توں لوکاں دی زندگی بچ سکدی اے۔ اَسی اپنی تلیم تے ایس لئی دھیان دینے آں کیونکہ اَسی خدا دی بادشاہی دے شہری آں۔ اَسی ہمیشاں اوہ کم کرنا چاہنے آں جنہاں توں یہوواہ دی وڈیائی ہووے تے جنہاں توں ایہہ ظاہر ہووے کہ اَسی اوس خوشخبری تے پورا یقین رکھنے آں جیہڑی اَسی دُوجیاں نُوں سُنانے آں۔ (فلپیوں 1:27) جدوں اَسی مُنادی کرن توں پہلاں چنگی طرحاں تیاری کرنے آں تے دُوجیاں نُوں گواہی دین لئی یہوواہ کولوں مدد منگنے آں تے اَسی ظاہر کرنے آں کہ اَسی اوس تلیم تے دھیان دے رہے آں جیہڑی اَسی دُوجیاں نُوں دینے آں۔
3. کیہہ ہر بندہ بائبل دے پیغام چ دلچسپی لوَے گا؟ اِک مثال دَوو۔
3 شاید ساڈی بوہت کوشش دے بعد وی ساڈے علاقے دے لوک بادشاہی دے پیغام چ دلچسپی نہ لین۔ ذرا ایس بارے بھرا جارج لنڈول دے تجربے تے غور کرو جنہے 1929 توں لے کے 1947 تک ملک آئسلینڈ چ کلّے مُنادی کیتی۔ اوہنے لوکاں نُوں ہزاراں کتاباں دِتیاں پر اوہناں وچوں اِک وی یہوواہ دا گواہ نہ بنیا۔ اوہنے ساڈی برانچ نُوں اِک خط چ لکھیا: ”کجھ لوکاں نے بائبل دے پیغام دی مخالفت کیتی پر زیادہتر لوکاں نے ایہدے چ کوئی دلچسپی نئیں لئی۔“ جدوں گلئیڈ سکول توں تربیت حاصل کرن والے بھین بھراواں نُوں آئسلینڈ خدمت کرن لئی گھلیا گیا تے ایہدے 9 سال بعد کجھ لوکاں نے اپنی زندگی یہوواہ دے ناں کیتی تے بپتسمہ لے لیا۔
4. جدوں لوک بائبل دے پیغام چ دلچسپی نئیں لیندے تے اَسی کیہہ کر سکنے آں؟
4 شاید اَسی اوس ویلے بوہت بےحوصلہ ہو جائیے جدوں لوک پاک کلام دی تلیم حاصل کرن چ کوئی دلچسپی نئیں لیندے۔ شاید اَسی وی پولُس وانگوں محسوس کرئیے جنہے کہیا: میں بوہت پریشان آں تے میرا دل بوہت دُکھی اے۔ اوہنے ایہہ گل ایس لئی کہی کیونکہ زیادہتر یہودیاں نے ایہہ منن توں اِنکار کر دِتا سی کہ یسوع ای مسیح اے۔ (رومیوں 9:1-3) جے تواڈیاں لکھاں کوششاں تے دُعاواں دے بعد وی تواڈا طالبِعلم یہوواہ دی عبادت کرن لئی کوئی قدم نئیں چُک دا تے ایس وجہ توں توانوں اوہدے نال بائبل کورس بند کرنا پیندا اے تے تُسی کیہہ کر سکدے او؟ یاں جے تُسی کدی کسے ایہو جہے بندے نُوں بائبل کورس نئیں کرایا جنہے بپتسمہ لے لیا اے تے تُسی کیہہ کر سکدے او؟ کیہہ توانوں ایہہ سوچنا چاہی دا اے کہ ایہدے چ تواڈی غلطی اے تے یہوواہ نے تواڈیاں کوششاں چ برکت نئیں پائی؟ ایس مضمون چ اَسی ایہناں سوالاں دے جواب حاصل کراں گے: (1) کیس گل توں ثابت ہوندا اے کہ اَسی مُنادی دے کم چ کامیاب ہوئے آں؟ (2) جدوں اَسی دُوجیاں نُوں گواہی دینے آں تے سانوں کیس گل دی توقع رکھنی چاہی دی اے؟
مُنادی دے کم چ کامیابی کیس گل توں ظاہر ہوندی اے؟
5. اَسی یہوواہ دی خدمت چ جو کجھ کرنے آں، کدی کدار اوہدا اوہ نتیجہ کیوں نئیں نکلدا جدی اَسی توقع کر رہے ہنے آں؟
5 بائبل چ دَسیا گیا اے کہ خدا دی مرضی تے چلن والا بندہ جو کجھ وی کرے گا اوہدے چ اوہ کامیاب ہوئے گا۔ (زبور 1:3) پر ایہدا مطلب ایہہ نئیں کہ اَسی یہوواہ لئی جو کجھ وی کراں گے اوہدا نتیجہ اوہی نکلے گا جیہڑا اَسی سوچیا ہوئے گا۔ اَسی ایہہ کیوں کہہ سکنے آں؟ ایہدی اِک وجہ تے ایہہ وے کہ عیبدار ہون دی وجہ توں ساڈی تے باقی سارے لوکاں دی زندگی دُکھ نال بھری ہوئی اے۔ (ایوب 14:1) ایہدے علاوہ کدی کدار ساڈی مخالفت کرن والے ساڈے سامنے ایہو جہیاں مشکلاں کھڑیاں کر دیندے نیں جنہاں دی وجہ توں ساڈے لئی کُھل کے مُنادی کرنا مشکل ہو جاندا اے۔ (1-کُرنتھیوں 16:9؛ 1-تھسلُنیکیوں 2:18) تے فیر یہوواہ ایس گل دا اندازہ کیویں لاندا اے کہ اَسی مُنادی دے کم چ کِنّے کوُ کامیاب ہوئے آں؟ ایس سوال دے جواب لئی آؤ بائبل دے کجھ اصولاں تے غور کرئیے۔
بھانویں اَسی کسے بندے نُوں مِل کے اوہنوں گواہی دَئیے یاں خط یاں فون دے ذریعے گواہی دَئیے، یہوواہ ساڈیاں کوششاں دی قدر کر دا اے۔ ( پیراگراف نمبر 6 نُوں ویکھو۔)
6. یہوواہ ایہہ اندازہ کیویں لاندا اے کہ اَسی اوہدی خدمت چ کامیاب ہوئے آں یاں نئیں؟
6 یہوواہ ساڈی محنت تے ثابت قدمی تے دھیان دیندا اے۔ یہوواہ دی نظر چ اَسی اوس ویلے کامیاب ہنے آں جدوں اَسی اوہ کم پوری محبت تے لگن نال کرنے آں جیہڑا اوہنے سانوں دِتا اے، فیر بھانویں لوک ساڈی گل سنن یاں نہ سنن۔ پولُس رسول نے کہیا: خدا بے انصاف نئیں اے۔ اوہ اوس محنت تے محبت نُوں کدی نئیں بُھلے گا جیہڑی تُسی مُقدساں دی خدمت کر کے اوہدے ناں لئی ظاہر کیتی اے تے ہُن وی کر رہے او۔ (عبرانیوں 6:10) یہوواہ ایس گل تے دھیان نئیں دیندا کہ ساڈی وجہ توں کسے نے بپتسمہ لیا اے یاں نئیں لیا سگوں اوہ ایس گل نُوں یاد رکھدا اے کہ اَسی کِنّی محنت تے محبت نال اوہدا کم کیتا اے۔ ایس لئی پولُس دی ایس گل نُوں یاد رکھو جیہڑی اوہنے کُرنتھس دے مسیحیاں نُوں کہی: تُسی مالک لئی جیہڑی خدمت کر رہے او اوہ فضول نئیں اے فیر بھانویں توانوں تواڈی محنت دا اوہ پھل نہ وی ملے جدی توانوں امید سی۔—1-کُرنتھیوں 15:58۔
7. پولُس رسول نے یہوواہ دی خدمت کرن بارے جو کجھ کہیا اوہدے توں اَسی کیہہ سکھنے آں؟
7 پولُس رسول اِک بوہت ای ودھیا مشنری سی جنہے بوہت سارے شہراں چ نوِیاں کلیسیاواں بنائیاں سن۔ پر جدوں لوکاں نے کہیا کہ اوہ اِک چنگا استاد نئیں اے تے پولُس نے ایس گل تے زور نئیں دِتا کہ اوہنے کِنّے زیادہ لوکاں دی مسیح دا شاگرد بنن چ مدد کیتی اے سگوں اوہنے ایس گل تے زور دِتا کہ اوہ یہوواہ دی کِنّی زیادہ خدمت کر رہیا اے۔ (2-کُرنتھیوں 11:23) پولُس رسول وانگوں سانوں وی ایہہ یاد رکھن دی لوڑ اے کہ یہوواہ دی نظر چ ایہہ گل زیادہ اہم اے کہ اَسی پوری لگن نال اوہدا کم کرئیے تے ایہہ کم کرن چ ہمت نہ ہاریئے۔
8. سانوں مُنادی کردے تے شاگرد بناندے ویلے کیہڑی گل یاد رکھنی چاہی دی اے؟
8 یہوواہ ساڈے مُنادی کرن تے تلیم دین دے کم توں خوش ہوندا اے۔ اِک وار یسوع نے اپنے 70 شاگرداں نُوں بادشاہی دا پیغام سُنان لئی گھلیا۔ مُنادی دی مہم ختم کرن دے بعد اوہ سارے شاگرد خوشی خوشی واپس آئے۔ اوہناں دی خوشی دی وجہ کیہہ سی؟ اوہناں نے کہیا: مالک جدوں اَسی تواڈا ناں استمال کیتا تے بُرے فرشتیاں نے وی ساڈا حکم منیا۔ پر یسوع نے اوہناں دی سوچ نُوں صحی کیتا اے تے کہیا: ایس گلوں خوش نہ ہووو کہ بُرے فرشتے تواڈا حکم من دے نیں سگوں ایس گلوں خوش ہووو کہ تواڈے ناں اسمان تے لکھے گئے نیں۔ (لُوقا 10:17-20) یسوع مسیح نے ایہہ گل کیوں کہی؟ کیونکہ اوہنوں پتہ سی کہ اوہدے پیروکاراں نُوں مُنادی کردے ویلے ہمیشاں ایہو جہے چنگے تجربے نئیں ہون گے۔ نالے سانوں ایہہ وی نئیں پتہ کہ جیہڑے لوکاں نے شروع شروع چ شاگرداں دے پیغام نُوں سُنیا سی اوہناں وچوں کِنّے بعد چوں ایمان لے کے آئے سن۔ ایس لئی شاگرداں نُوں ایہہ گل سمجھن دی لوڑ سی کہ اوہناں نُوں صرف ایس گل تے خوش نئیں ہونا چاہی دا کہ لوکاں نے اوہناں دے پیغام نُوں سُنیا اے سگوں اوہناں دی خوشی دی سب توں وڈی وجہ ایہہ ہونی چاہی دی اے کہ یہوواہ اوہناں دی محنت توں خوش اے۔
9. گلتیوں 6:7-9 دے مطابق جے اَسی مُنادی کرن چ ہمت نئیں ہاراں گے تے ایہدا کیہہ نتیجہ نکلے گا؟
9 جے اَسی مُنادی دے کم چ ہمت نئیں ہاراں گے تے سانوں ہمیشاں دی زندگی ملے گی۔ جدوں اَسی پوری لگن نال بادشاہی دے بیہہ بونے آں تے اصل چ اَسی پاک روح دے مطابق بو رہے ہنے آں۔ اَسی ایہہ کیوں کیہہ سکنے آں؟ کیونکہ ایس کم دی وجہ توں خدا دی پاک روح ساڈی زندگی چ اثر کر رہی ہوندی اے۔ یہوواہ نے سانوں ضمانت دِتی اے کہ جے اَسی ہمت نئیں ہاراں گے تے ساڈے کول ہمیشاں دی زندگی حاصل کرن دی امید رہوے گی فیر بھانویں کوئی بندہ ساڈیاں لکھ کوششاں دے بعد وی بپتسمہ لوَے یاں نہ لوَے۔—گلتیوں 6:7-9 نُوں پڑھو۔
دُوجیاں نُوں گواہی دیندے ویلے سانوں کیس گل دی توقع کرنی چاہی دی اے؟
10. لوک بائبل دے پیغام لئی فرق فرق ردِعمل کیوں وکھاندے نیں؟
10 ایہہ لوکاں دی مرضی اے کہ اوہ سچائی نُوں قبول کرن گے یاں نئیں۔ ایہہ گل یسوع مسیح دی اِک مثال توں پتہ چلدی اے جدے چ بیہہ بون والا اِک بندہ فرق فرق طرحاں دی زمین تے بیہہ بوندا اے۔ پر صرف اِک ای زمین پھل لیاندی اے۔ (لُوقا 8:5-8) یسوع مسیح نے دَسیا کہ فرق فرق طرحاں دی زمین لوکاں وَل اشارہ کردی اے جنہاں دا دل خدا دے کلام لئی فرق فرق ردِعمل ظاہر کردا اے۔ (لُوقا 8:11-15) جیس طرحاں بیہہ بون والا بندہ بیہہ نُوں ودھا نئیں سکدا اوسے طرحاں اَسی وی اِک بندے دے دل چ سچائی دا بیہہ ودھا نئیں سکدے۔ ایہہ ہر بندے دی اپنی مرضی ہوندی اے کہ اوہ اپنے دل چ سچائی دے بیہہ نُوں ودھن دے گا یاں نئیں۔ ساڈی ذمےداری بس بادشاہی دا بیہہ بونا اے۔ پولُس رسول نے کہیا سی کہ ہر بندے نُوں اوہدی محنت دے مطابق اجر ملے گا نہ کہ محنت توں نِکلن والے نتیجے دے مطابق۔—1-کُرنتھیوں 3:8۔
نوح نے کئی سالاں تک لوکاں نُوں خدا دا پیغام سُنایا۔ پر اوہدی بیوی، پُتراں تے پُتراں دِیاں بیویاں دے علاوہ کسے نے وی اوہدی گل تے دھیان نہ دِتا۔ ایہدے باوجود نوح نے یہوواہ خدا دا کہنا منیا تے اوہ کم پورا کیتا جیہڑا اوہنے اوہنوں دِتا سی۔ (پیراگراف نمبر 11 نُوں ویکھو۔)
11. بھانویں کہ لوکاں نے نوح دے پیغام تے دھیان نئیں دِتا فیر وی یہوواہ نوح توں خوش کیوں سی؟ (پہلے صفحے دی تصویر نُوں ویکھو۔)
11 شروع توں ای اِنج ہوندا آیا اے کہ جدوں وی خدا دے بندیاں نے لوکاں نُوں اوہدا پیغام سُنایا تے زیادہتر لوکاں نے اوہناں دی گل نئیں سنی۔ مثال لئی، نوح نے تقریباً 40 یاں 50 سال تک لوکاں چ نیکی دی مُنادی کیتی۔ (2-پطرس 2:5) یقیناً اوہنوں ایس گل دی امید سی کہ لوک اوہدے پیغام نُوں قبول کر لین گے۔ پر یہوواہ نے ایس گل دی کوئی ضمانت نئیں دِتی سی۔ اصل چ جدوں یہوواہ نے نوح نُوں کشتی بنان بارے ہدیتاں دِتیاں تے اوہنے اوہنوں کہیا: تُوں کشتی چ جائیں۔ تُوں تے تیرے نال تیرے پُتر تے تیری بیوی تے تیرے پُتراں دِیاں بیویاں۔ ( پیدایش 6:18) ایہدے علاوہ خدا نے نوح نُوں کشتی دا جیہڑا سائز دَسیا سی، اوہدے توں وی شاید اوہنوں اندازہ ہو گیا ہوئے گا کہ بوہت سارے لوک اوہدی گل نئیں سُنن گے۔ (پیدایش 6:15) تے اَگے جو کجھ ہویا اوہ تے سانوں پتہ ای اے۔ اِک وی بندے نے نوح دی گل نئیں سنی۔ ( پیدایش 7:7) کیہہ یہوواہ نے ایہہ سوچیا کہ نوح نے لوکاں نُوں چنگی طرحاں مُنادی نئیں کیتی؟ بالکل نئیں۔ خدا نوح توں بوہت خوش سی کیونکہ نوح نے اوہ سب کجھ کیتا جو یہوواہ نے اوہنوں کرن لئی کہیا سی۔—پیدایش 6:22۔
12. بھانویں کہ لوکاں نے یرمیاہ دا پیغام نہ سُنیا تے اوہدی مخالفت کیتی پر اوہ کیہڑیاں گلاں دی وجہ توں خوش رہیا؟
12 ہُن ذرا یرمیاہ نبی دی مثال تے وی غور کرو۔ اوہنے وی 40 سال توں زیادہ عرصے تک ایہو جہے لوکاں چ مُنادی کیتی جنہاں نے اوہدی گل تے دھیان نئیں دِتا تے اوہدی مخالفت کیتی۔ اِک وقت آیا کہ یرمیاہ لوکاں وَلّوں ملامت تے مخول دی وجہ توں ایناں بےحوصلہ ہو گیا کہ اوہ یہوواہ دا کم چھڈن بارے سوچن لگ پیا۔ (یرمیاہ 20:8، 9) پر اوہنے اِنج نہ کیتا۔اوہ اپنی سوچ نُوں صحی رکھن تے خوش رہن دے قابل کیویں ہویا؟ اوہنے اپنا دھیان دو خاص گلاں تے رکھیا۔ پہلی گل ایہہ کہ اوہنے اپنا دھیان اوس پیغام تے رکھیا جیہڑا اوہ لوکاں نُوں دے رہیا سی تے جدے ذریعے لوکاں نُوں نیک انجام دی امید ملنی سی۔ (یرمیاہ 29:11) دُوجی گل ایہہ کہ اوہ یہوواہ دے ناں توں پچھانیا جاندا سی۔ (یرمیاہ 15:16) یرمیاہ وانگوں اَسی وی لوکاں نُوں امید دا پیغام دینے آں تے یہوواہ دے ناں توں پچھانے جانے آں۔ جدوں اَسی اپنا دھیان ایہناں دو خاص گلاں تے رکھنے آں تے اَسی اوس ویلے وی خوش رہنے آں جدوں لوک ساڈے پیغام نُوں نئیں سُن دے۔
13. یسوع مسیح نے مرقس 4:26-29 ایتاں چ جیہڑی مثال دِتی اَسی اوہدے توں کیہہ سکھ سکنے آں؟
13 لوکاں دا ایمان ودھن چ وقت لگدا اے۔ یسوع مسیح نے ایہہ گل اِک مثال دے ذریعے سمجھائی جدے چ اِک بندہ بیہہ بوندا اے تے ہر رات نُوں سوندا تے ہر دن نُوں اُٹھدا اے۔ (مرقس 4: 26-29 نُوں پڑھو۔) ایس دوران بیہہ ہولی ہولی ودھدے نیں۔ اوہ ایہناں نُوں چھیتی چھیتی ودھان لئی کجھ نئیں کر سکدا۔ جیس طرحاں بیہہ بون والے بندے نُوں اپنی محنت دے نتیجے فوراً نظر نئیں آندے اوسے طرحاں ہو سکدا اے کہ جیس بندے نُوں اَسی بائبل کورس کرا رہے آں اوہ وی پاک کلام چوں سکھیاں گلاں تے فوراً عمل نہ کرے۔ جیس طرحاں ایہہ بیہہ بون والے دے ہتھ چ نئیں ہوندا کہ فصل اوہدی مرضی مطابق فوراً ودھ جائے اوسے طرحاں ایہہ ساڈے ہتھ چ وی نئیں ہوندا کہ اِک طالبِعلم دے دل چ ایمان ساڈی مرضی دے مطابق فوراً ودھ جائے۔ ایس لئی ہمت نہ ہارو۔ جیس طرحاں بیہہ بون والے نُوں فصل دے ودھن تک صبر نال کم لینا پیندا اے اوسے طرحاں دُوجیاں دے دل چ سچائی دا بیہہ ودھن تک سانوں وی صبر نال کم لین دی لوڑ اے۔—یعقوب 5:7، 8۔
14. کیہڑی مثال توں ظاہر ہوندا اے کہ مُنادی دے چنگے نتیجے نِکلن چ کافی وقت لگ سکدا اے؟
14 کجھ علاقیاں چ لوکاں نُوں بائبل دا پیغام قبول کرن تے بپتسمہ لین چ بوہت وقت لگ جاندا اے۔ایس بارے ذرا دو سگیاں بھیناں دی مثال تے غور کرو جنہاں دے ناں گلیڈیس ایلن تے روبی ایلن نیں۔ ایہناں دونواں بھیناں نُوں 1959 چ کینیڈا دے صوبے کوبیک چ پہلکاراں دے طور تے گھلیا گیا۔ * اوتھے لوکاں نے ایس لئی بادشاہی دا پیغام نہ سُنیا کیونکہ اوہناں نُوں ایس گل دا ڈر سی کہ جے اوہ یہوواہ دے گواہواں نال گل کرن گے تے اوہناں دے گوانڈھی تے پادری اوہناں توں خوش نئیں ہون گے تے اوہناں دے نال بھیڑا سلوک کرن گے۔ بھین گلیڈیس نے دَسیا: ”اَسی دو سال تک ہر روز اَٹھ اَٹھ گھنٹے گھر گھر مُنادی کیتی۔پر کسے نے وی اپنا دروازہ نہ کھولیا۔ لوک بس ایہہ ویکھن لئی دروازے تک آندے سن کہ کون آیا اے پر جدوں اوہ سانوں ویکھدے سن تے واپس چلے جاندے سن۔ پر اَسی ہمت نہ ہاری۔“ وقت لنگھن دے نال نال لوکاں دا رویہ بدل گیا تے اوہناں وچوں کجھ نے بائبل دا پیغام سُنیا۔ ہُن اوس شہر چ یہوواہ دے گواہواں دِیاں تِن کلیسیاواں نیں۔—یسعیاہ 60:22۔
15. اَسی 1-کُرنتھیوں 3:6، 7 توں شاگرد بنان دے کم بارے کیہڑی گل سکھنے آں؟
15 کسے نُوں مسیح دا شاگرد بنان چ بوہت سارے لوکاں دی محنت شامل ہوندی اے۔ کہیا جاندا اے کہ کسے بندے نُوں بپتسمہ لین دے لائق بنان چ پوری کلیسیا دا ہتھ ہوندا اے۔ (1-کُرنتھیوں 3:6، 7 نُوں پڑھو۔) مثال لئی، اِک بھرا بائبل دے پیغام چ دلچسپی لین والے بندے نُوں ساڈا کوئی پرچہ یاں رسالہ دیندا اے۔ بعد چ اوہ بھرا ویکھدا اے کہ اوہدے لئی اوس بندے نُوں اوس وقت تے ملنا ممکن نئیں اے جدوں اوہ بندہ چاہندا اے۔ ایس لئی اوہ بھرا کسے ہور بھرا نُوں اوس بندے نال واپسی ملاقات کرن لئی کہندا اے تے فیر اوہ بھرا اوس بندے نال بائبل کورس شروع کر لیندا اے۔ ایہہ بھرا فرق فرق بھین بھراواں نُوں اپنے نال اوس بندے نُوں بائبل کورس کران لئی لے کے جاندا اے۔ ہر بھین تے بھرا فرق فرق طریقے نال اوس بندے دا حوصلہ ودھاندا اے۔ جیہڑے جیہڑے بھین بھرا اوس طالبِعلم نُوں مِلدے نیں، اوہ سارے اوہدے دل چ سچائی دے بیہہ نُوں پانی دیندے نیں۔ فیر جدوں اوہ طالبِعلم بپتسمہ لے لیندا اے تے یسوع مسیح دی گل دے مطابق بیہہ بون والا تے فصل کٹن والا مل کے خوشی مناندے نیں۔—یوحنا 4:35-38۔
16. جے تُسی صحت دے کسے مسئلے دی وجہ توں ہُن مُنادی کرن تے تلیم دین دے کم چ پہلے جِنّاں حصہ نئیں لے سکدے تے فیر وی تُسی خوش کیویں رہ سکدے او؟
16 جے تُسی صحت دے کسے مسئلے دی وجہ توں ہُن مُنادی کرن تے تلیم دین دے کم چ پہلے جِنّاں حصہ نئیں لے سکدے تے تُسی کیہہ کر سکدے او ؟ تُسی حالے وی ایس کم چ حصہ لین لئی بوہت کجھ کر سکدے او۔ ذرا بادشاہ داؤد دی زندگی دے اوس واقعے تے غور کرو جدوں اوہنے تے اوہدے ساتھیاں نیں اپنے گھر والیاں تے اپنیاں ساریاں چیزاں نُوں عمالیقیاں دے قبضے توں چھڈایا سی۔ داؤد دے 200 ساتھی اینے تھک گئے سن کہ اوہناں چ لڑن دی طاقت نئیں رہی سی۔ ایس لئی داؤد نے اوہناں نُوں کہیا کہ اوہ پچھے رہ کے سامان دی حفاظت کرن۔ جدوں داؤد تے اوہدے ساتھی جنگ جت کے واپس آئے تے اوہ دُشمناں کولوں بوہت سارا قیمتی مال وی لٹ کے لیائے۔ داؤد نے حکم دِتا کہ جیہڑے آدمی جنگ لڑن گئے سن تے جیہڑے آدمی سامان دی حفاظت کرن لئی پچھے رُکے سن، اوہ سارے ایس مال نُوں آپس چ برابر ونڈ لین۔ (1-سموئیل 30:21-25) ایس واقعے توں اَسی شاگرد بنان دے کم بارے اِک گل سکھنے آں۔ ایہہ سچ اے کہ ہُن شاید تُسی مُنادی کرن تے تلیم دین دے کم چ اوناں حصہ نئیں لے سکدے جِنّاں تُسی پہلاں لیندے ہوندے سو۔ پر جے تُسی اپنی صحت تے حالات دے مطابق ایس کم چ اپنے وَلّوں پورا حصہ لوَو گے تے توانوں وی اوس ویلے بڑی خوشی ملے گی جدوں کوئی بندہ یہوواہ بارے سکھے گا تے بپتسمہ لوَے گا۔
17. اَسی کیہڑی گل لئی یہوواہ دے بڑے شکرگزار آں؟
17 اَسی یہوواہ دے بڑے شکرگزار آں کہ اَسی مُنادی کرن تے تلیم دین دے کم چ جِنّی وی محنت کرنے آں، اوہ اوہدی قدر کردا اے۔ اوہنوں پتہ اے کہ ایہہ ساڈے وَس چ نئیں کہ لوک ساڈے پیغام نُوں سنن گے یاں نئیں۔اوہ ایس گل تے دھیان دیندا اے کہ اَسی اوہدی خدمت کرن لئی کِنّی محنت کر رہے آں تے اوہدے نال کِنّاں پیار کرنے آں۔ تے اوہ ایہدے لئی سانوں اجر دیندا اے۔ اوہ سانوں ایہہ وی سکھاندا اے کہ اَسی فصل دی کٹائی لئی جو کجھ وی کر رہے آں اَسی اوہدے توں خوشی کیویں حاصل کر سکنے آں۔ (یوحنا 14:12) ایس لئی اَسی ایس گل دا پکا یقین رکھ سکنے آں کہ جے اَسی یہوواہ دی خدمت چ ہمت نئیں ہاراں گے تے اوہ ساڈے توں بوہت خوش ہوئے گا۔
گیت نمبر 64 (خوشی نال گاؤ): خوشی نال واڈھی کرو
^ پیراگراف 5 جدوں لوک خوشخبری نُوں قبول کردے نیں تے سانوں بوہت چنگا لگدا اے۔ پر جدوں اوہ اِنج نئیں کردے تے اَسی مایوس ہو جانے آں۔ پر جے تُسی کسے بندے نُوں بائبل کورس کرا رہے او تے اوہ روحانی طور تے اَگے نئیں ودھ رہیا تے تُسی کیہہ کر سکدے او؟ یاں جے تُسی کدی کسے ایہو جہے بندے نُوں بائبل کورس نئیں کرایا جنہے بپتسمہ لے لیا اے تے تُسی کیہہ کر سکدے او؟ کیہہ ایہناں گلاں دی وجہ توں توانوں ایہہ سوچنا چاہی دا اے کہ تُسی شاگرد بنان دے کم چ ناکام ہو گئے او؟ ایس مضمون چ اَسی ویکھاں گے کہ جدوں لوک ساڈے پیغام چ دلچسپی نئیں لیندے تے اَسی فیر وی شاگرد بنان دے کم چ کامیاب کیویں ہو سکنے آں تے خوش کیویں رہ سکنے آں۔
^ پیراگراف 14 اُردو زبان چ مینارِنگہبانی، 1 ستمبر 2002ء چ بھین گلیڈیس ایلن دی آپبیتی ”میں کوئی تبدیلی نہیں چاہونگی!“ نُوں پڑھو۔
