1. ¿Imaraykutaj maytapuni kusikunchej Jehovaj testigosnin kasqanchejmanta?

 MAYTAPUNI kusikunchej Jehovaj testigosnin kasqanchejmanta. Imajtinchus Diospa sutinta apanchej, testigosnin kasqanchejtataj rikuchinchej paymanta runasman willaspa, yachachispa ima. Mayta kusikunchej ‘wiñay kausayta japʼinankupaj allin sonqoyoj’ kajkunata Diospa kamachinman tukunankupaj yanapaspa (Hech. 13:48). Noqanchejqa Jesús jina kusikunchej. Payqa “espíritu santowan juntʼa kaspa mayta kusikorqa” discipulosnin predicacionmanta kutimojtinku, allin risqantataj willarejtinku (Luc. 10:1, 17, 21).

2. ¿Imaynamantá rikuchinchej predicacionta jatunpaj qhawasqanchejta?

² Noqanchejpajqa, predicación jina mana aswan sumaj ruway kanchu. Apóstol Pabloqa Timoteoman yuyaychashaspa ajinata nerqa: ‘Qan kikiykita, imatachus yachachisqaykitapis sapa kuti allinta qhawarikuy’, nispa. Chantá nillarqataj: ‘Imaraykuchus chayta ruwaspaqa, qan kikiykita salvakunki, jinallataj uyarisojkunatapis’, nispa (1 Tim. 4:16). Apóstol Pabloj nisqanqa reparachiwanchej, runas salvakunankupaj predicananchejpuni kasqanta. Kausayninchejta sumajta qhawarikunchej, imajtinchus Diospa Gobiernonpa kamachiyninpi kanchej. Jehová Diosta jatunchanapaj jinapuni kausayta munanchej, sumaj willaykunata willasqanchejpi creesqanchejman jinataj (Fili. 1:27). Chantapis imatachus yachachisqanchejtaqa allinta qhawarikunchej predicanapaj sumajta wakichikuspa, Jehovamantataj yanapata mañakuspa paymanta waj runasman parlarinapaj.

3. Diospa Gobiernonmanta willajtinchej, ¿runas uyariwanchejpunichu? Sutʼinchariy.

³ Willanapaj mayta kallpachakojtinchejpis, ichá wakenqa Diospa Gobiernonmanta manapuni uyariyta munawasunchu.  Hermano Georg Lindalmanta parlarina. Payqa 1929 watamanta 1947 watakama Islandiapi sapallan predicarqa. May chhika publicacionestataj runasman jaywarqa. Jinapis ni uj runa testigoman tukorqachu. Pay nerqa: “Wakenqa Bibliamanta willajtiy churanakuwaj kanku, wakintaj mana uyariyta munawajchu kanku”, nispa. Chaymantataj Galaad Escuelamanta misioneros Islandiaman chayarqanku predicacionpi yanapakunankupaj, runasqa ni paykunatapis uyarerqankuchu. Chaywanpis jisqʼon watasninmanqa wakin runas kausayninkuta Jehovaman qoporqanku, bautizakorqankutaj. *

4. ¿Imaynataj sientekunchej willasqanchejta runas mana uyarejtinku?

⁴ Runas mana Bibliamanta yachakuyta munajtinkoqa, llakikunchej. Ichapis Pablo jina kashasunman. Pay nerqa ‘llakiynin jatun kasqanta, sonqonpitaj mana tukukoj nanay kasqanta’. Imajtinchus ashkha judiosqa mana creeyta munarqankuchu Jesús Mesías kasqanta (Rom. 9:1-3). Ichá estudionchejta yanapanapaj mayta kallpachakunchej, Jehovamantataj sapa kuti paypaj mañapunchej. Manapuni kausayninta cambiajtintaj saqepunchej. Chayri ichá ni uj estudionchej bautismoman chayanchu. Chaymantataj llakikusunman mana allintachu ruwashasqanchejta yuyaspa. Ichá yuyasunman Jehová mana yanapashawasqanchejta. Kay yachaqanapeqa, kay tapuykunaman kutichisun: ¿imajtintaj kusiyllawanpuni predicananchej tiyan? Chanta, ¿predicajtinchej tukuy runaschu uyariwasun?

5. ¿Imajtintaj Jehovapaj tukuy imata ruwasqanchej mana munasqanchejman jinapunichu llojsin?

⁵ Diospa munayninta ruwaj runamanta Bibliaqa nin: ‘Tukuy ima ruwasqanpi allin renqa’, nispa (Sal. 1:3). Chaytaj mana niyta munanchu Jehovapaj tukuy imata ruwasqanchej munasqanchejman jinapuni llojsinanta. Tukuy pantaj runas kasqanchejrayku, ‘manchayta ñakʼarinchej’ (Job 14:1). Chantapis enemigosninchejqa ichá mana saqewasunchu uj tiempota predicajta (1 Cor. 16:9; 1 Tes. 2:18). Chanta, ¿imajtintaj predicasqanchejta Jehová allinpaj qhawan? Kay tapuyman kutichinapajqa, Bibliaj yuyaychaykunasninta qhawarina.

6. ¿Imajtintaj Jehová predicasqanchejta allinpaj qhawan?

⁶ Jehovaqa kallpachakusqanchejta, aguantasqanchejta ima sumajta yachan. Payqa mayta kusikun payta munakusqanchejrayku predicajtinchej, runas mana uyariwajtinchejpis. Pablo nerqa: ‘Diosqa cheqan, manataj qonqaponqachu ruwasqaykichejta, sutinta munakusqaykichejtapis. Chaytataj Diospaj tʼaqasqa kajkunata yanapaspa rikucherqankichej, kunanpis yanapashallankichejpuni’, nispa (Heb. 6:10). Jehovaqa ni pita bautismoman chayachejtinchejpis kallpachakusqanchejta,  munakusqanchejta ima mana qonqapunchu. Pabloqa Corintomanta cristianosman nerqa: ‘Señorpaj llankʼasqaykichejqa, mana qhasipajchu’, nispa (1 Cor. 15:58). Pablo chayta nisqanqa, noqanchejtapis kallpachallawanchejtaj ruwasqanchej mana suyasqanchejman jinapunichu llojsejtinpis.

7. ¿Imatataj yachakunchej apóstol Pablo ‘astawan llankʼarqani’ nisqanmanta?

⁷ Apóstol Pabloqa sumaj misionero karqa, ashkha llajtaspitaj congregacionesta sayaricherqa. Wakin cristianosqa jatunchakusqankurayku Pablota pisipaj qhawaj kanku, mana sumajtachu yachachisqantataj nej kanku. Jinapis payqa mana parlarqachu mashkha runastachus bautizakunankupaj yanapasqanmanta. Astawanpis mana manchachikuspa paykunata nerqa: ‘Astawan llankʼarqani’, nispa (2 Cor. 11:23). Noqanchejpis Pablo jina, yuyarikuna Jehovaqa kallpachakusqanchejta, aguantasqanchejta ima allinpaj qhawasqanta.

8. ¿Imatataj Jehová allinpaj qhawan?

⁸ Jehovaqa, paymanta willajtinchej kusikun. Uj pacha Jesusqa 70 discipulosninta kacharqa wajkunaman Diospa Gobiernonmanta willamunankupaj. Paykunataj tukuytawan kusisqa kutinporqanku. ¿Imaraykutaj kusisqa kasharqanku? Paykuna nerqanku: “Supaykunapis kasuwayku sutiykipi paykunata kamachejtiykoqa”, nispa. Jinapis Jesusqa paykunata nerqa: “Ama kusikuychejchu supaykuna kasususqaykichejmanta, astawanpis kusikuychej sutiykichej cielopi qhelqasqa kasqanmanta”, nispa (Luc. 10:17-20). Jesusqa yacharqa mana sapa kutichu runas ajinata uyarinankuta. Chantapis ni yachanchejchu Jesuspa discipulosninta uyarejkunamanta mashkhachus cristianoman tukusqankuta. Jesuspa discipulosnenqa, runas uyarisqankumanta kusikuspapis, astawanraj kusikunanku karqa kallpachakusqankuta Jehová may allinpaj qhawasqanmanta.

9. Gálatas 6:7-9 nisqanman jina, ¿imatataj japʼisun predicallasunpuni chay?

⁹ Predicallasunpuni chayqa wiñay kausayta japʼisun. Sumaj willaykunata willanapaj, yachachinapaj ima kallpachakuspaqa, ‘Diospa atiyninman jina’ kausanchej. Imajtinchus saqenchej chay atiy yanapanawanchejta. ‘Mana saykʼojtinchejqa’, Jehová wiñay kausayta qowasun, ni pita bautismoman chayananpaj yanapajtinchejpis (Gálatas 6:7-9 leey).

10. ¿Imamantataj kashan runas willasqanchejta japʼikunanku?

¹⁰ Willayninchejta runas japʼikunankoqa paykunamanta kashan. Jesusqa chayta sutʼincharqa tarpoj runamanta kikinchayninpi. Chay tarpoj runaqa imaymana jallpʼaman mujuta tʼakasqa. Jinapis sumaj jallpʼaman tʼakasqa mujulla allinta poqosqa (Luc. 8:5-8). Jesusqa, nerqa chay imaymana jallpʼa, runaspa sonqonkuwan ninakusqanta. Imajtinchus paykunaqa “Diospa palabranta” mana kikintachu japʼikunku (Luc. 8:11-15). Chay tarpoj runa jina, noqanchejpis mana atinchejchu predicasqanchej runasta tanqayta Diospa llajtanpi usqhayllata ñauparinankupaj. Imajtinchus chayqa kashan imayna sonqoyojchus kasqankumanta. Jinapis Diospa Gobiernonmanta mujuta tarpunallanchejpuni tiyan. Imajtinchus Pablo nisqanman jinaqa ‘sapa uj ruwasqanman jina tʼinkanta japʼenqa’, nitaj mashkhatachus ruwasqanman jinachu (1 Cor. 3:8).

11. ¿Imajtintaj Jehová Noej predicasqanta allinpaj qhawarqa runas mana uyarejtinkupis? (Tapapi dibujota qhawariy).

¹¹ Watas pasasqanman jina, Jehovaj kamachisnenqa  runas mana uyarejtinkupis predicallarqankupuni. Noeqa 50 watasta jina ‘cheqan kajta’ willarqa (2 Ped. 2:5). Payqa runas uyarinankuta suyarqa, jinapis Jehovaqa mana nerqachu tukuy runaspuni uyarinankuta. Astawanpis Jehovaqa Noeman arcata ruwananpaj kamachishaspa, nerqa: “Qanqa arcaman yaykuy, yaykullachunkutaj wawasniyki, warmiyki, ñojchʼasniykipis”, nispa (Gén. 6:18). Noeqa, may chhikanchus arca kananta Jehová nishajtin, repararqachá pisi runaslla uyarinankuta (Gén. 6:15). Ajinapunitaj karqa. Imajtinchus chay tiempopeqa mana uj runallapis Noeta uyarerqachu (Gén. 7:7). Jinapis Jehovaqa ni imarayku yuyarqachu Noé mana allintachu ruwasqanta. Astawanpis Noej willasqantaqa allinpaj qhawarqa. Imajtinchus Noeqa ruwarqa Jehová imaynatachus nisqanman jinapuni (Gén. 6:22).

12. ¿Imajtintaj Jeremías kusisqallapuni predicarqa runas mana uyarejtinku, churanakojtinku ima?

¹² Profeta Jeremiaspis 40 watas kurajta jina predicarqa runas mana uyarejtinkupis, churanakojtinkupis. Runasqa Jeremiasta insultaj kanku, burlakojtaj kanku. Chayrayku payqa manaña Diospa sutinpi parlayta munasharqachu (Jer. 20:8, 9). Jinapis payqa mana saykʼuporqachu. ¿Imataj yanaparqa mana saykʼupunanpaj, kusisqallapunitaj predicananpaj? Jeremiasqa iskay imaspi piensarerqa. Ñaupajtaqa, Diosmanta willasqan, runasta ‘aswan qhepaman allinta kausakunankupaj’ yanapananpi (Jer. 29:11). Chantapis, Jehová payta ajllasqanpi sutinta apananpaj (Jer. 15:16). Noqanchejpis kay laqha mundopi kausakoj runasman allin kausayta tarinankupaj Diosmanta willanchej. Jehovaj sutinwantaj rejsisqa kanchej, testigosnin kasqanchejrayku. Chaykunapi piensarisun chayqa, runas mana uyariwajtinchejpis kusisqallapuni predicasun.

13. Marcos 4:26-29 versiculospi, ¿imatataj yachakunchej tarpoj runamanta?

¹³ Bibliamanta yachakojqa mana uj ratopichu ñauparin. Jesusqa chayta yachacherqa tarpoj runamanta kikinchayninpi (Marcos 4:26-29 leey). Chay runaj tarpusqanqa pisimanta pisi puñunankama wiñarqa. Payqa ni imata ruwayta aterqachu usqhayllata, munasqanman jinataj wiñachinanpaj. Ajinallatataj estudionchejpis ichá pisimanta pisi yachakusqanman jina kausakunanpaj cambianqa. Nitaj atinchejchu payta tanqayta usqhayllata, munasqanchejman jinataj cambiananpaj. Chayrayku ama anchata llakikunachu, nitaj saykʼupunachu estudiosninchej mana suyasqanchejman jinapunichu ñauparejtinku. Uj estudio Jesuspa discipulonman tukunanpajqa, tarpoj runa jina pacienciakunanchej tiyan (Sant. 5:7, 8).

14. ¿Imaynapí yachanchej unaymantaraj runas willasqanchejta uyarinankuta? Sutʼinchariy.

¹⁴ Wakin lugarespeqa ashkha watastaña predicajtinchejpis ni pi Jehovaj testigonman tukunchu. Canadamanta iskay hermanasninchejmanta parlarina. Paykunaqa kanku Gladys Allen, Ruby Allen ima. Paykunataqa 1959 watapi precursoras regularesta jina, provincia Quebecpa ujnin llajtitanman kacharqanku. * Chay lugarmanta runasqa, Iglesia catolicamanta curasta, vecinosninkuta ima manchachikusqankurayku, hermanasninchejtaqa mana uyariyta munajchu kanku. Gladys nin: “Sapa día wasimanta wasi ocho horasta predicaj kayku, nitaj pipis uyariwajchu kayku. Ajinata iskay watata predicarqayku. Runasqa ventanamanta chayri punkumanta qhawarimuspa wisqʼaykakamoj kanku. Jinapis mana saykʼuspa predicallarqaykupuni”, nispa. Aswan qhepamantaj chay lugarmanta runasqa  aswan kʼachasman tukorqanku, Bibliamantapis uyariyta munallarqankuña. Kunanqa chaypi kinsa congregaciones tiyan (Isa. 60:22).

15. ¿Imatá yachakunchej 1 Corintios 3:6, 7 versiculospi, runasta Jesuspa discipulosninman tukuchiymanta?

¹⁵ Tukuy yanapakunchej uj runa Jesuspa discipulonman tukunanpaj. Uj estudio bautismoman chayananpajqa, congregacionmanta tukuy hermanos yanapakunchej (1 Corintios 3:6, 7 leey). Kaypi piensarina. Ichá uj hermanoqa Bibliamanta yachakuyta munaj runaman uj tratadota chayri revistata saqenman, reparakunmantaj mana kutiyta atinanta. Chayrayku waj hermanota kachanman chay runata waturinanpaj. Chay hermanotaj Bibliamanta yachachiyta qallarin, waj hermanoswantaj acompañachikun. Sapa ujtaj imaynallamantapis Bibliamanta yachakojta kallpacharinku, yanaparinkutaj astawan Jehovamanta yachakunanpaj. Ajinamanta chay estudio bautizakojtenqa, tukuy yanapajkuna kusikunku (Juan 4:35-38).

16. Onqosqa kasqaykirayku chayri kallpayki pisiyasqanrayku manaña ñaupajta jinachu predicaspapis, ¿imaraykutaj kusikuwaj atisqaykiman jina yanapakusqaykimanta?

¹⁶ Ichapis onqosqa kasqaykirayku chayri kallpayki pisiyasqanrayku manaña ñaupajta jinachu predicayta, yachachiyta ima atinki. Jinapis atisqaykiman jina yanapakuspaqa, kusisqa kawaj. Rey Davidmanta parlarina. Paywan runasninwanqa Amalecmanta suwa runasta maqanakupi atipamorqanku. Familiaresninkuta, tukuy ima suwasqankutataj qhechukanporqanku. Iskay pachaj runasnintaj saykʼusqa kashasqankurayku mana maqanakuman rerqankuchu, qʼepista qhawaspataj qhepakorqanku. Davidqa maqanakumanta kutimuytawan, qhechukanpusqanku imasta tukuyninku uj rejta japʼinankuta nerqa (1 Sam. 30:21-25). Ajinallataj uj runa Jesuspa discipulonman tukojtinpis. Tukuy kusikunchej uj runa Diosmanta yachakojtin, bautizakojtin ima atisqanchejman jina yanapakusqanchejmanta.

17. ¿Imamantataj Diosman agradecekunchej?

¹⁷ Jehovataqa mayta agradecekunchej payta sirvisqanchejta may allinpaj qhawasqanmanta. Yachakunchej jina, runastaqa mana tanqayta atisunmanchu willasqanchejta uyarinankupaj chayri Diosta yupaychanankupaj. Jinapis Jehovaqa allinpaj qhawan mayta kallpachakusqanchejta, paytataj munakusqanchejta. Chayraykutaj bendeciwanchej. Chantapis kusisqa kayta yachachiwanchej atisqanchejman jina predicacionpi yanapakusqanchejwan (Juan 14:12). Mana saykʼojtinchejqa, Jehová maytapuni kusikonqa.