1. ¿Imanirtan Jehoväpa testïgunkunaqa alläpa kushikuntsik?

¡JEHOVÄPA TESTÏGUN kanqantsikpitam alläpa kushikuntsik! Jutintam apantsik y nunakunata yachatsirninmi, Testïgunkuna kanqantsikta rikätsikuntsik. ‘Imëyaqpis kawakïta chaskiyänampaq kallpachakïkaqkunatam’, Jehoväpa sirweqninkuna kayänampaq yanapantsik (Hëch. 13:48). Diospita yachatsikuyanqampita qateqninkuna kutirir, imëkata pasayanqanta willayaptin santu espïritupa poderninwan Jesus alläpa kushikunqannömi, noqantsikpis kushikuntsik (Lüc. 10:1, 17, 21).

2. ¿Imanötan rikätsikuntsik Diospita yachatsikunqantsikta alläpa väloranqantsikta?

² Noqantsikpaqqa, Diospita yachatsikuyqa alläpam välin. Apostol Pabluqa Timoteutam kënö consejarqan: “Imanö kawëkanqëkita y imanö yachatsikïkanqëkita imëpis alleq rikë”. Jina kënöpis nirqanmi: “Tsëta rurarmi kikikita salvakunki y wiyashoqnikikunatapis salvanki” (1 Tim. 4:16). Tsëmi rikätsikun, yachatsikunqantsikpita nunakuna salvakuyta puëdiyanqanta. Y Diospa Gobiernunchö kawanantsik kaptinmi, alli portakunapaq kallpachakuntsik. Imanö kawanqantsikchömi, Jehoväta respetanqantsikta y alli noticiakunata willakunqantsikman creinqantsikta rikätsikunapaq kallpachakuntsik (Filip. 1:27). Y alli yachatsikoq kanapaqmi, puntallapitana alli preparakuntsik y pëpita parlanantsikpaq Jehoväta yanapëkamänapaq mañakuntsik.

3. Diospa Gobiernumpita yachatsikunqantsiktaqa, ¿imanötan itsapis nunakuna rikäyanman y imanirtan tsëta nintsik?

³ Peru Diospa Gobiernumpita alli yachatsikunapaq kallpachakushqapis, itsa markantsikchöqa wallkaqlla o ni jukpis wiyamäshuntsu. Wawqintsik Georg Lindal ruranqanman pensarishun.  Pëqa 1929 a 1947 watayaqmi, entëru Islandia nacionchö japallan yachatsikurqan. Mëtsika publicacionkunatam qarakurqan, peru manam ni pï Testïgu këman charqantsu. Pëmi kënö qellqarqan: “Wakinmi Bibliapita yachatsikunqäpa contran churakäyashqa, y wakinqa manam wiyakuyllatapis munayantsu”. Tsëpitanam Galaad escuëlapita yarqoqkunata mandayarqan, peru nunakunaqa manam yachakuyta munayaqtsu. Nuëvi wata pasanqanchöran, juk ishkë nunakuna Jehovällatana sirwiyänampaq bautizakuyarqan. *

4. Diospita yachatsikushqa mana wiyamashqaqa, ¿imatataq itsapis pensashwan?

⁴ Yachatsikunqantsikta wiyakuyta mana munayaptinqa llakikuntsikmi. Itsapis apostol Pablunö llakikushun. Pëmi, Diospa Akrashqan Jesus kanqanta judïukuna mana creiyaptin, ‘alläpa llakikunqanta y shonqunchö imëpis nanatsikunqanta’ nirqan (Rom. 9:1-3). Y alli yachatsinapaq kallpachakushqa y Diosman mañakushqapis, ¿yachëkätsinqantsik nuna Diosta mas sirwinampaq mana kallpachakuptin manana yachatsinapaq decidishqaqa? O ¿Bibliapita yachëkätsinqantsik nuna mana bautizakuptinqa? ¿Llakikurtsuraq Jehovä mana yanapëkämanqantsikta pensashwan? Këchömi kë ishkan tapukuypita yachakushun: ¿imanötan musyantsik Diospita yachatsikunqantsikchö alli yarqapakuykanqantsikta? y Diospita yachatsikurqa, ¿imatataq yarpänantsik?

5. ¿Imanirtan Jehoväpaq ruranqantsikkunaqa munanqantsiknötsu yarqun?

⁵ Diospa voluntäninta ruraq nunapaq parlarmi, Bibliachö kënö nin: “Llapan ruranqanmi allilla yarqunqa” (Sal. 1:3, TNM). Peru tsëqa, manam Jehoväpaq llapan ruranqantsikkuna munanqantsiknö yarqunampaq kaqta ninantsu. Wakinkuna y kikintsik pantashqam, imëka problëmakunayoq kantsik (Job 14:1). Jina chikimaqnintsikkunapis Diospita yachatsikunatam juk tiempupa michämashwan (1 Cor. 16:9; 1 Tes. 2:18). Tsëqa, ¿imatataq Jehovä rikan pëpita yachatsikunqantsikchö alli yarqapakunqantsikta ninampaq? Tsëta musyanapaqqa, Bibliachö ima ninqanta rikärishun.

6. Pëpita yachatsikunqantsikchöqa, ¿imatataq Jehoväqa mas cuentaman churan?

⁶ Jehoväqa rikëkanmi kallpachakunqantsikta y mana qelananqantsikta. Nunakuna wiyamashqa o mana wiyamashqapis, pëta kuyarnin gänas gänaslla yachatsikunqantsikpitam Jehoväqa kushikun. Apostol Pablum kënö qellqarqan: “Diosqa manam mana alli kaqta ruraqtsu, qamkuna rurayanqëkikunata, y jutinta kuyarnin santu nunakunata sirwir kayanqëkita y sirwirnin sïguikäyanqëkita qonqarinampaqqa” (Heb. 6:10). Bibliapita yachatsinqantsik nuna mana bautizakuptimpis, Jehoväqa kuyanqantsikta y  kallpachakunqantsikta yarparëkanmi. Tsëmi Corintu markachö cristiänukunaman Pablu qellqanqanta yarpänantsik, pëmi kënö qellqarqan: rurëta munayanqëkinö mana yarqapakuyaptikipis, “qamkunaqa musyayankim Señorpa kaqchö rurënikikunaqa mana envänu kanqanta” (1 Cor. 15:58).

7. Diospita yachatsikunqampaq apostol Pablu parlanqampitaqa, ¿imatataq yachakuntsik?

⁷ Apostol Pabluqa alli yachatsikoqmi karqan y mëtsika markakunachömi congregacionkunata patsätsirqan. Pëpita mas alli kayanqanta y yachatsikuyta mana yachanqanta nir wakin cristiänukuna parlayaptimpis, Pabluqa manam ëkaqta bautizakuyänampaq yanapashqa kanqampita parlarqantsu. Tsëpa rantinqa, “mas trabäjutam rurarqö” nirqanllam (2 Cor. 11:23). Apostol Pablunöpis, kallpachakushun y ama qelanäshuntsu. Yarpäshun, Jehoväpaqqa tsëmi mas välin.

8. Diospita yachatsikunqantsikpitaqa, ¿imatataq yarpänantsik?

⁸ Pëpita yachatsikunqantsikpitam Jehoväqa kushikun. Juk kutichömi 70 qateqninkunata, Diospa Gobiernumpita yachatsikoq ëwayänampaq Jesus mandarqan. Y yachatsikur usharir kushishqa kutiyanqantam Bibliachö nin. ¿Imanirtan tsënöqa këkäyarqan? Pëkunam kënö niyarqan: “Teytë, hasta supëkunapis cäsuyämanmi jutikichö mandayaptï”. Peru Jesusqa kënömi nirqan: “Ama kushikuyëtsu mana alli espïritukuna cäsuyäshunqëkipitaqa, sinöqa kushikuyë jutikikuna ciëluchö qellqashqa kanqampita” (Lüc. 10:17-20). Jesusqa musyarqanmi Diospita yachatsikuyanqanchö imëpis allilla mana yarqapakuyänampaq kaqtaqa. Tsë wiyakoq nunakunapita cristiänu këman ëkaq chäyanqantaqa, manam musyantsiktsu. Jesuspa qateqninkunaqa, kallpachakuyanqanta rikar Jehovä kushikunqampitam kushikuyänan karqan, y manam nunakuna wiyakuyanqanllapitatsu.

9. Gälatas 6:7 a 9 ninqannö Diospita yachatsikuyta mana dejarqa, ¿imatataq lograshun?

⁹ Diospita yachatsikur sïguishqaqa mana wanushpam kawakushun. Alli noticiakunata willakunapaq y Diospita yachatsikunapaq kallpachakurqa, “santu espïrituman” yarpëkurmi yachatsikuntsik. Tsënöqa nintsik, tsë poderninwan Diosnintsik yanapamanqantsikpitam. Mana qelanashpa yachatsikurnin sïguishqaqa, bautizakunampaq ni pita mana yanapashqapis, imëyaqpis kawakunapaqmi Jehoväqa änimantsik (leyi Gälatas 6:7-9).

10. ¿Imanö kayanqampitataq yachatsikunqantsikta nunakuna wiyakuyanqa?

¹⁰ Nunakunaqa shonqunkunachö ima kanqampitam yachatsikunqantsikta wiyakuyanqa. Murukoq nunapaq parlarmi Jesus tsëta entienditsikurqan. Parlanqan igualatsikuychöqa, tsë nuna murunqanqa tukuy allpamanmi shikwarqan, peru alli allpaman shikwaqkunallam wayuyarqan (Lüc. 8:5-8). Jesusqa, Diospita yachatsikunqantsikta nunakuna imanö wiyakuyanqampita ima allpanö shonqunkuna kanqantam rikätsikuyänan karqan (Lüc. 8:11-15). Imanömi juk murukoq nuna ima allpaman murukuna shikwanqanta musyantsu, tsënöllam noqantsikpis musyantsiktsu nunakuna imanö shonquyoq kayanqanta. Tsëmi Diospita yachatsikur sïguikänantsik. Apostol Pablu ninqannömi, “cada nunam rurëninmannö premiun chaskinqa”, y manam ëkaqta yanapanqampitatsu (1 Cor. 3:8).

11. ¿Imanirtan nintsik “alli kaq rurëkunapita willakoq” Noëqa alli yarqapakunqanta? (Rikäri jana qaranchö dibüjuta).

¹¹ Jehoväta sirweqkunaqa, unëpita patsëmi mana wiyakoq nunakunata Diospita yachatsiyashqa. Noëllaman yarpärishun: itsa pëqa mëtsika  watakunapa “alli kaq rurëkunapita willakoq” nuna karqan (2 Pëd. 2:5). Pëqa, tsë nunakuna wiyakuyänantachi shuyararqan, peru Jehoväqa manam tsënö kanampaq kaqtatsu nirqan. Tsëpa rantinqa, arcata imanö ruranampaq y tsëman warmin, wamrankuna y wamrankunapa warminkuna yëkuyänampaqmi nirqan (Gen. 6:18). Y arca mëtsikan kanampaq kaqta Jehovä ninqanchöqa, mëtsikaq nunakuna mana wiyakuyänampaq kaqtachi Noëqa cuentata qokurqan (Gen. 6:15). Y tsënömi karqan, tsë mana alli nunakunaqa manam ni mëqan wiyakuyarqantsu (Gen. 7:7). ¿Jehoväqa Noë ruranqan envänu kanqantaku pensarqan? Manam. Mandanqannölla llapanta rurashqa kaptinmi, Jehoväpaqqa Noë alli yarqapakurqan (Gen. 6:22).

12. Nunakuna mana wiyakuyaptin y michäkuyaptimpis, ¿imatan Jeremïasta yanaparqan Diospita willakunampaq?

¹² Nunakuna mana wiyakuykäyaptin y michäkuykäyaptimpis, Diospa willakoqnin Jeremïasqa mëtsika watakunapam willakurqan. Insultayaptin y pëpita burlakuyaptinmi, Diospita willakuyta dejarita munarqan (Jer. 20:8, 9). ¿Imatan yanaparqan mana alli pensëkunaman mana yarparäkunampaq y Diospita kushishqa yachatsikur sïguinampaq? Këkunamanmi yarparqan: juk, willakunqanqa nunakunatam yanapanan karqan, shamoq tiempuchö imapis alliyänampaq kaqta shuyaräyänampaq (Jer. 29:11). Y ishkë, pëpita willakunampaqmi Jehoväqa pëta akrashqa karqan (Jer. 15:16). Noqantsikpis, shamoq tiempuchö imëkapis alliyänampaq kaqta y Testïgunkuna karmi yachatsikuntsik. Tsëkunaman yarpararqa, mana wiyamashqapis kushishqam yachatsikushun.

13. Marcus 4:26 a 29 ninqanchö Jesus yachatsikunqanqa, ¿imatataq yachatsimantsik?

¹³ Diospitaqa, tiempuwanran mas yachakuyanqa. Jesusqa murukoq nuna pununqampaq parlarmi tsëta yachatsikurqan (leyi Marcus 4:26-29). Tsë nunaqa, plantakuna mas ras winayänampaqqa manam ima rurëta puëdirqantsu. Tsënöllam Bibliapita yachakuykaq nunapis, tiempuwanraq yachakunqanmannö kawar qallanqa. Imanöllam murukoq nuna plantakuna ras winayänampaq ima rurëtapis puëdintsu, tsënöllam Bibliata estudiëkätsinqantsik nuna cambianampaqpis obliguëta puëdintsiktsu. Tsëqa, munanqantsiknö ras mana cambiaptinqa, ama qelanäkurishuntsu. Murukuychönöllam, Diospita yachatsikunqantsikchöpis pacienciayoq kanantsik (Sant. 5:7, 8).

14. Ishkan panintsikkuna pasayanqanqa, ¿imatataq yarpätsimantsik?

¹⁴ Wakin markakunachöqa, mëtsika watakunapa yachatsikushqapis manam wiyakuyantsu. Canadä nacionchö täraq Gladys y Ruby Allen panintsikkuna pasayanqanta rikärishun. Quebec provinciapa juk markanmanmi, 1959 watachö precursor regular kayänampaq mandayarqan. * Tsëchö täraqkunaqa, cürakunata mantsarmi panintsikkuna yachatsikuyanqanta wiyakuyaqtsu. Gladysmi kënö willakun: “Ishkë watapam patsa waranqampita Inti o Rupay jeqanqanyaq yachatsikuyaq kayä. Peru manam ni pï yachakuyta munarqantsu. Nunakunaqa punkupa ventänampa rikärayämarnïmi kichapuyämaqnatsu. Peru manam qelanäriyarqätsu”. Mas watakunataqa, nunakunaqa cambiariyarqanmi y yachakuytanam munayarqan. Kananqa tsë markachö kima congregacionkunam kan (Is. 60:22).

15. Nunakuna bautizakuyänampaq yanapakuychöqa, ¿imatataq 1 Corintius 3:6 y 7 ninqampita yachakuntsik?

¹⁵ Juk nuna Diosta sirwinampaqqa, llapantsikmi yanapanakuntsik. Pasaqkunachö  yachakunqantsiknöpis, Bibliata estudiëkaq nuna bautizakunampaqqa, llapantsikmi yanapakuntsik (leyi 1 Corintius 3:6, 7). Këllaman pensarishun: itsa Bibliapita maslla yachakuyta munaq nunata, juk wawqi tratädun o revistam qararin. Peru itsa tsë wawqiqa yapë kutita mana puëdinampaq kaqta musyar, juk wawqita nirin watukarinampaq. Y kë wawqiqa, tsë nunawan Bibliapita estudiar qallëkun y juk wawqi panikunata yanaqäyänampaq nin. Y yanaqaqninkunaqa, Bibliata estudiëkaq nunatam juknöpa juknöpa yanapayan. Tsë nunata reqeq wawqi panikunam, Diospita maslla yachakunampaq yanapayan. Tsënö yanapakuyanqampitam, Bibliata estudiëkaq nuna bautizakuriptin llapankuna kushikuyan (Juan 4:35-38).

16. Puntatanöna mana kallpayoq kar o qeshyapäkurnimpis, ¿imanirtan puëdinqëkimannö Diospita yachatsikuychö yanapakunqëkipita kushikunkiman?

¹⁶ ¿Puntatanö kallpayoq manana kar o qeshyapäkurnin unënö manana yachatsikuyta puëdirninqa? Tsënö kaptimpis, kushishqam kanki puëdinqëkimannö yanapakurninqa. Juk kutim, rey Davidpa y soldädunkunapa familiankunata y llapan kayäpunqanta Amalequïta suwa nunakuna apakuyarqan. Pëkunata qocheq ëwar imapa pasayanqanta rikärishun. Soldädunkunapita 200 nunakuna utishqa o pishipashqa karninmi, pelyaq ëwëta puëdiyarqannatsu. Tsëmi qepikunata cuidarnin quedakuyarqan. Tsënö kaptimpis, chikeqninkunata vencirnin qochiyanqanta llapankuna igual rakipänakuyänampaqmi David nirqan (1 Sam. 30:21-25). Kanan witsampis, Diospita yachatsikunqantsikchöqa tsë cuentallam pasakun. Juk nuna bautizakuriptinqa, qam y Jehoväta llapan sirweqkunam imanöllapis yanapanqantsikpita kushikuntsik.

17. ¿Imanirtan Jehoväta agradecikushwan?

¹⁷ Pëta sirwinqantsikchö ruranqantsikta cuentaman churanqampitam Jehoväta agradecikuntsik. Pëqa musyanmi Bibliata estudiayänampaq o Jehoväta adorayänampaq nunakunata obliguëta mana puëdinqantsikta. Peru imëkanöpa kallpachakunqantsikta y alläpa kuyanqantsiktam rikan, y bendicimantsikmi. Jina puëdinqantsikmannö yachatsikurnin kushishqa kanapaqmi yanapamantsik (Juan 14:12). Yarpäshun, tsëta ruranqantsikpitam Jehoväqa noqantsikwan kushishqa këkanqa.