1. ¿Testigo de Jehovacunaca imamantataj cushilla sintirinchij?

TESTIGO DE JEHOVÁ cashcamanta paipaj shutita gentecunaman predicashpaca cushillami sintirinchij. Jehová Diosta sirvisha nij gentecunata ayudashpaca animarinchijmi (Hechos 13:48). Jesuspaj discipulocunaca achca gentecunamanmi huillashpa tigrarcacuna. Paicunaca huillanapi ima shina rishca experienciatami Jesusman parlarcacuna. Chaimi paica ‘jucha illaj espíritu cushichijpimi achcata cushicurca’ (Lucas 10:1, 17, 21).

2. ¿Ñucanchijpajca imamantataj predicanaca importante cana can?

² Ñucanchijpajca predicanami importante can. Apóstol Pabloca Timoteomanca: ‘Canllatajpish cuidaringui. Imata yachachicushcatapish alli yuyaringui. Chashna cashpami, canllatajpish quishpiringui, can yachachishcata uyajcunapish quishpiringacuna’ nircami (1 Timoteo 4:16). Cai shimicunata pajtachishpaca gentecuna quishpirichunmi ayudashun. Diospaj Gobiernomanta huillajcuna cashcamantami tucuipi alli comportarina canchij. Chashnami Jehová Diospaj shutita jatunyachishun, huillashcapipish crishcata ricuchishun (Filipenses 1:27). Gentecunaman predicangapajca alli allichirishunchij. Mana manchashpa predicangapajpish Jehová Diospaj ayudata mañashunchij.

3. ¿Diosmanta predicajpica tucui gentecunachu uyasha ningacuna?

³ Maipica huillangapaj sinchita esforzarijpipish huaquincunallami Diosmanta yachasha nincuna o maijancunacarin mana yachasha nincunachu. Huauqui Georg Lindalpaj ejemplota ricushun. Paica 1929-manta 1947-camami Islandia llajtapi predicarca. Gentecunamanca achca publicacioncunatami saquirca. Pero mana pi testigo de Jehová tucurcacunachu. Huauqui Georgca: “Huaquincunaca Jehová Diospaj contrami tucurcacuna. Maijancunacarin mana imata uyasha nircacunachu” nircami. Asha tiempo qꞌuipa huaquin misionerocuna Galaadmanta  predicanaman chayajpipish gentecunaca mana uyasha nircachu. Pero nueve huatacuna qꞌuipami gentecunaca Jehová Diosmanta rijsishpa bautizarircacuna. *

4. a) ¿Gentecunaman predicajpi paicuna mana uyajpi, mana pajtachijpica ima shinataj sintirinchij? b) ¿Cai yachaipica ima tapuicunatataj yachashun?

⁴ Gentecunaman predicajpi, paicuna mana uyasha nijpica maipica llaquillami sintirinchij. Apóstol Pablopish judiocuna Jesús Mesías cashcata mana chasquisha nijpica paica: “Ñucaca jatun llaquitami charini. Chai nanaica ñuca shungupi caticunllami” nircami (Romanos 9:1-3). Maipica maijancunaman Bibliamanta yachachijpica paicunaca mana cambiocunata rurasha nincunachu. Chaimantami paicunaman Bibliamanta yachachinata saquinchij. Maijancunacarin mana bautizarisha nincunachu. Chaica mana nisha ninchu predicashpa catichun Jehová Dios ñucanchijta mana ayudacushcata. Cai yachaipimi cai ishqui tapuicunata yachashun: ¿Ima shinataj alli predicajcuna cashcataca yachanchij? ¿huillacushpaca imatataj yuyaipi charina canchij?

5. ¿Jehová Diosta alli sirvisha nishpapish imacunahuantaj chꞌimbapuranchij?

⁵ Diospaj munaita rurajcunamanta parlashpaca Bibliapica: “Tucui imata pai rurashcapish allimi llujshinga” ninmi (Salmo 1:3). Pero causaipica achca problemacunami tiyan. Chaimantami maipica ñucanchij munashca shinaca Jehová Diostaca mana sirvi tucushun (Job 14:1). Shinallataj Jehovamanta ama huillachunmi Diospaj contracunaca maipica jarcaicunata churangacuna (1 Corintios 16:9; 1 Tesalonicenses 2:18). Chaimanta ¿Jehová Dios munashca shina alli predicangapajca imatataj rurana canchij? Cai tapuita alli intindingapajca Bibliamanta japishca huaquin yuyaicunatami ricushun.

6. ¿Jehová Diosca paimanta huillangapaj, yachachingapaj esforzarishcataca valorangachu?

⁶ Gentecuna uyajpipish mana uyajpipish mana shaicushpa huillangapaj esforzarishcataca Jehová Diosca achcatami valoran. Apóstol Pabloca: “Diosca cashcata ruraj cashcamantaca, cancunapaj rurashcacunata paipaj shutipi cꞌuyaihuan trabajashpa ricuchishcata, jucha illajcunapajta rurashpa cunancamapish ruracushcamantaca manataj cungaringachu” nircami (Hebreos 6:10). Bibliamanta yachacujcuna mana bautizarijpi ñucanchij paicunata yachachingapaj esforzarishcataca Jehová Diosca manataj cungaringachu. Apóstol Pablo Corinto llajtapi Diosta sirvijcunaman ima nishcatami yuyaipi chari tucunchij. Paica: “Cancuna Mandaj Jesuspi shujlla tucushpa paipajta trabajashca mana yanga cashcataca yachanguichijmi” nircami (1 Corintios 15:58). Jehová Diosca paita sirvingapaj esforzarishcataca manataj cungaringachu.

7. ¿Apóstol Pablopaj ejemplomantaca imatataj yachai tucunchij?

 ⁷ Apóstol Pabloca alli huillangapajmi esforzarirca. Shinallataj congregacioncuna tiyachunpishmi ayudarca. Pai chashna sinchita predicajpipish Diosta huaquin sirvijcunaca gentecunata bautizarichunpish mana ayudashcachu nishpami juzgarcacuna. Pero Pabloca mashna gentecunata bautizarichun ayudashcataca mana huillarcachu. Chaipaj randica ñucaca Jehová Diospajca sinchitami ‘trabajashcani’ nircami (2 Corintios 11:23). Gentecunata ayudangapaj tucui pudishcata rurajpi Jehová Dios manataj cungarinataca allimi yachana canchij.

8. ¿Predicacushpaca imatataj mana cungarina canchij?

⁸ Gentecunaman predicashpaca Jehová Diostami cushichinchij. Jesús cai Allpapi cashpaca paipaj 70 discipulocunatami Diospaj Gobiernomanta huillanaman cacharca. Paicunaca huillanamanta tigrashca qꞌuipaca cushillami sintirircacuna. ¿Imamantataj chashna sintirircacuna? Paicunaca: “¡Mandaj Jesús, cambaj shutipi rimajpica supaicunapish cazunllami!” nircacunami. Chaimi Jesusca cashna nishpa corregirca: “Cancunaca supaicunata cazuchishpallaca ama cushicuichijchu. Ashtahuanpish cancunapaj shuticuna jahua pacha libropi quillcashca cashcamanta cushicuichij” nircami (Lucas 10:17-20). Jesusca allimi yacharca huillanapica mana tucuipi alli llujshina cashcata. Shinallataj Jesuspaj discipulocunata uyajcunaca mashnacuna Diosta sirvi callarishcataca mana yachanchijchu. Jesusta catijcunaca gentecuna uyajllapi cushilla sintirinapaj randica Jehová Dios paicunapaj esfuerzota valorashcamanta cushilla sintirinatami yachana carcacuna.

9. Gálatas 6:7 al 9-pi nishca shinaca ¿huillanata manataj saquishpaca ima bendicioncunatataj charishun?

⁹ Predicanata manataj saquishpaca huiñai causaitami charishun. Gentecunata predicangapaj, yachachingapaj esforzarishpaca Jehová Dios paipaj espíritu santohuan ñucanchijta ayudachunmi saquinchij. Gentecunata bautizarichun mana ayudashpapish mana shaicushpa huillajpica Jehová Diosca ñucanchijmanca huiñai causaitami cunga (Gálatas 6:7-9-ta liyipai).

10. ¿Imamantataj huaquin gentecunaca predicajpica uyancuna, cutin shujtajcunaca mana uyancuna?

¹⁰ Gentecunaca Jehová Diosmanta uyanata, mana uyanataca paicunallatajmi decidincuna. Jesusca caita intindichingapajca shuj chꞌimbapuraitami parlarca. Shuj runaca chꞌican chꞌican allpacunapimi tarpurca. Pero alli allpapi tarpushcallami granota pꞌucurca (Lucas 8:5-8). Jesusca chꞌican chꞌican allpacunaca gentecunapaj shungutami ricuchin nircami. Chaimi maijan gentecunaca Diosmanta uyanata o mana uyanata decidincuna (Lucas 8:11-15). Shuj tarpuj runaca planta huiñachunca mana imata rurai tucunchu. Chashnallatajmi predicajcunapish gentecuna paicunapaj shungupi Diospaj yachachishcacunata pajtachichunca mana imata rurai tucuncuna. Pero Diospaj Gobiernomanta huillashpami ñaupajman catina canchij. Pabloca sinchita trabajashpaca: “Cada quiquin imata rurashca shinallatajmi japinga” nircami (1 Corintios 3:8).

11. ¿Noé alli predicaj cashcataca ima shinataj yachanchij? (Párrafo 1-pi tiyaj fotota ricui).

¹¹ Ñaupa punllacunamantami Diosta sirvijcunaca gentecunaman predicashcacuna. Pero gentecunaca mana uyashcacunachu. Por ejemplo, Noeca achca huatacunatami Diosmanta predicarca (2 Pedro 2:5). Noeca predicashcata gentecuna uyachunmi munaj carca. Pero Jehová Diosca Noeman shuj arcata rurachun mandashpaca: “Chaimanta canpish, cambaj  churicunapish, cambaj huarmipish, cambaj churicunapaj huarmicunapish chai jatun huambuj huasiman yaicunguichij” nircami (Génesis 6:18). Noeca Jehová Dios ima laya arcata rurachun mandashcata yachashpami paica chai arcapi mana tucui gentecuna yaicuna cashcata cuentata curca (Génesis 6:15). Chai punllacunapica Noé, paipaj familiacunallami quishpirirca (Génesis 7:7). ¿Jehová Diosca Noetaca canca mana alli yachachij mana alli predicajmi cangui nishpachu nirca? Mana. Ashtahuanpish Noé cazushcatami Jehová Diosca valorarca (Génesis 6:22).

12. ¿Profeta Jeremiasca gentecuna uyajpipish mana uyajpipish ima shinataj cushilla huillashpa catirca?

¹² Profeta Jeremiaspish 40 huatacunata yallimi Jehová Diosmanta predicarca. Pero gentecunaca mana uyarcacunachu. Paicuna mana uyasha nijpi mana alli tratajpica Jeremiasca desanimarircami (Jeremías 20:8, 9). ¿Shinapish desanimarishca saquirinapaj randica paica imatataj rurarca? Paica gentecuna alli causaita charichunmi Jehová Diosmanta predicarca (Jeremías 29:11). Jehová paipaj shutimanta huillachun agllashcatapishmi yuyarirca (Jeremías 15:16). Cunan punllacunapish gentecunaca amsapi shinami causacuncuna. Ñucanchijca testigo de Jehová cashcamantami Jeremías shinallataj gentecunaman huillana canchij. Huillangapaj esforzarishpaca gentecuna uyajpipish mana uyajpipish mana desanimarishunchu.

13. ¿Marcos 4:26 al 29-pi Jesús parlashca chꞌimbapuraimantaca imatataj yachanchij?

¹³ Bibliamanta yachacujcunapaj fe sinchi cachunca maipica tiempomi minishtirin. Jesusca tarpuj runapaj chꞌimbapuraimanta parlashpami caimanta yachachirca (Marcos 4:26-29-ta liyipai). Tarpuj runaca granocuna rato pꞌucuchunca imata mana rurai tucunchu. Ashtahuanpish asha asha pꞌucuchunmi shuyana can. Chashnallatajmi Bibliamanta yachacujcuna paicunapaj causaipi Bibliamanta imata yachashcata asha asha pajtachichunca tiempo minishtirin. Tarpuj runaca grano rato pꞌucuchunca mana obligai tucunchu. Ñucanchijpish Bibliamanta yachacujcuna paicuna rato Biblia yachachishcacunata pajtachichun, Diosta sirvichunca mana obligai tucunchijchu. Chaimanta Bibliamanta yachacujcuna mana utca bautizarijpica mana desanimarinachu canchij. Chaipaj randica paicuna bautizaringacamami pacienciahuan shuyana canchij (Santiago 5:7, 8).

14. ¿Pani Gladys, pani Ruby Allen nishca shinaca maipica gentecunaca paicunaman predicajpica ima shinataj chasquincuna?

¹⁴ Huaquin lugarcunapica huatacuna pasajpipish gentecunaca Diosmantaca mana uyasha nincunachu. Canadá llajtamanta pani Gladys, pani Ruby Allenpaj experienciamanta ricushun. Paicunataca 1959 huatapimi Quebec * llajtapi precursores cachun agllarcacuna. Gentecunaca chai llajtapica curacunata manchashcamanta, paicunaca imatashi ningacuna nishpami mana Jehová Diosmanta uyajcuna carca. Pani Gladysca: “Casi ishqui huatacunatami cada punlla casi ocho horascunata predicaj carcanchij. Pero gentecunaca mana Diosmanta uyasha nircacunachu. Maijancunacarin ventanaman llujshishpapish pero mana uyajcunachu carca. Paicuna mana uyajpipish huillanataca manataj saquircanchijchu” ninmi. Tiempo qꞌuipaca gentecunaca Jehová Diosmantami uyai callarircacuna. Cunan punllacunapica chai lugarpica quimsa congregacioncunami tiyan (Isaías 60:22).

15. 1 Corintios 3:6, 7-pi nishca shinaca ¿gentecuna bautizarichunca ima shinataj ayudai tucunchij?

¹⁵ Bibliamanta yachacujcuna bautizarichunca  tucui huauqui panicunami ayudai tucunchij (1 Corintios 3:6, 7-ta liyipai). Por ejemplo, shuj publicadorchari shuj huasiyujmanca tratadota o revistata saquin. Cai huasiyujca Bibliamantachari ashtahuan yachanata munan. Pero publicador huauquica chai huasiyujta mana visitai tucushcatami cuentata cun. Chaimantachari shujtaj huauquita o panita huasiyujta visitachun mañan. Huasiyujman Bibliamanta yachachishpa callaringapajca yachachijca mana pai solochu rin. Huaquin huauqui panicunatami cada yachaipi acompañachun invitan. Bibliamanta yachachijta acompañajcunaca yachacuj ashtahuan Bibliamanta yachashpa catichunmi animancuna. Jesús nishca shinaca gentecuna bautizarijpica tarpujpish, cosechajpish tucuicunami cushilla sintirincuna (Juan 4:35-38).

16. ¿Fuerza illaj cashpapish, mana alli saludta charishpapish imamantataj cushilla huillashpa cati tucunchij?

¹⁶ Tal vez canca fuerza illaj cashcamanta o mana alli saludta charishcamantachari ña mana tanto huillai tucungui. Pero Jehová Diosta sirvingapaj tucui pudishcata rurashcamantami cushilla sintiringui. Davidhuan ima tucushcapi yuyashun. Shuj cutinca Davipaj familiata, paipaj runacunapaj familiacunataca ima charishca cosascunatami amalequitacunaca shuhuashpa rircacuna. Chaimi Davidca paipaj runacunahuan amalequitacuna shuhuashcata cutin tigra apamurcacuna. David amalequitacunata catishpa risha nijpica 200 runacunaca shaicushcami canchij. Paicunahuanca mana macanacui tucunchijchu nircacunami. Chaimi Davidca huaquin cosascunata cuidashpa saquirichij nirca. Amalequitacunata mishashpa tigrashpaca Davidca tucuicunamanmi imalla cosascunataca igual chaupishpa curca (1 Samuel 30:21-25). Cunan punllacunapish huaquin huauqui panicunaca fuerza illaj cashpapish, mana alli saludta charishpapish huillangapajmi tucui pudishcata rurancuna. Chashna rurashpaca gentecuna Jehová Diosta rijsijpi, paicuna Yayitu Diosman mingarishpa bautizarijpica tucuicunami cushilla sintirishun.

17. ¿Imamantataj Jehová Diostaca agradicina canchij?

¹⁷ Jehová Dios paita sirvingapaj esforzarijpi ñucanchijta valorashcamantami achcata agradicinchij. Paica allimi yachan ñucanchijca gentecuna bautizarichun o Jehová Diosta sirvichun mana obligai tucushcata. Pero gentecunaman yachachingapaj sinchita esforzarijpica paica ñucanchijtami bendicianga. Huillanapi tucui pudishcata rurashpaca cushillami sintirishun (Juan 14:12). Jehová Diospish paita sirvingapaj esforzarishcamantami cushilla sintiringa.