1. ¿Imanasqataq anchata kusikunchik testigo kasqanchikwan?

¡ANCHA kusikunapaqmi Jehova Diospa testigon kasqanchikqa! Runamasinchikkunaman willakuspanchikmi hinaspa yachachispanchikmi Diospa sutinta riqsichinchik. Anchatamá kusikunchik ‘wiñay kawsayta chaskinankupaq kallpanchakuqkunata’ Diosta servinankupaq yanapaspanchikqa (Hech. 13:48). Jesus hinam ñuqanchikpas tarikunchik, paymi anchallataña kusikurqa qatiqninkuna willakusqankumanta kusisqallaña kutiramuspanku tukuy imata willakusqankuwan (Luc. 10:1, 17, 21).

2. ¿Imaynatam qawachinchik willakuyninchik ancha allin kasqanta?

² Diosmanta willakuyqa imamantapas aswan allinmi. Apostol Pablom Timoteota nirqa: “Tukuy tiempoyá imayna kawsasqaykita qawarikuy, qawariytaqyá imam yachachisqaykitapas”, nispa. Nirqataqmi: “Chaynata ruwaspam kikikipas salvakunki chaynataq uyarisuqnikikunatapas salvanki”, nispa (1 Tim. 4:16). Bibliapa chayna nisqanmi yachachiwanchik runamasinchikkuna salvakunankupaq yanapananchikta, chaymi imayna kawsakusqanchikta qawarikunanchik Diospa gobiernonpi kawsakunanchikpaq akllasqa kasqanchikrayku. Arí, Diospa munasqanman hina hinaspa paymanta willakusqanchikman hina kawsakuytam munanchik (Filip. 1:27). Imayna yachachisqanchiktañataqmi qawarikunchik Diosmanta willakunapaq allinta preparakuspa hinaspa willakuyninchikpi yanapawananchikpaq Diosta mañakuspa.

3. ¿Llapallan runakunachu Diosmanta willakusqanchikta uyarinku? Willarimuy Islandia nacionmanta.

³ Diosmanta willakunapaq anchata kallpanchakuptinchikpas willakusqanchik sitiopi runamasinchikkunaqa manapaschá lliwchu uyariwasun. Georg Lindal sutiyuq iñiqmasinchikmi Islandia nacionpi Diosmanta sapallan willakurqa 1929 watamanta 1947 watakama. Waranqantin qillqanchikkunata runakunaman saqiptinpas manam hukllapas bautizakuymanqa  chayarqachu. Paymi nirqa: “Wakinmi Diosmanta willakunayta harkakurqaku, yaqa llapankum ichaqa mana kaqpaqpas hapirqakuchu”, nispa. Chaymanta qipatam Galaad escuelamanta lluqsiq iñiqmasinchikkuna rirqaku chaypi Diosmanta willakunankupaq. Runakunam ichaqa hina chaynalla karqaku. 9 wata qipamanñam wakin runamasinchikkuna chayraq bautizakurqaku. *

4. ¿Imaynataq tarikunchik Diosmanta willakusqanchikta runakuna mana uyariptinku?

⁴ Diosmanta willakusqanchikta runakuna mana uyariwaptinchikqa Pablo hinam tarikuchwan. ‘Paymi sunqunpi ancha llakisqa hinaspa llumpay hukmanyasqa tarikurqa’ Jesusqa Diospa akllasqan runa kasqanta judiokuna mana creeptinku (Rom. 9:1-3). ¿Imaynataq tarikunchik bibliamanta yachachisqanchik runamasinchik anchata kallpanchakuchkaptinchikpas chaynataq paypaq Diosta mañakuchkaptinchikpas mana ñawpariptin saqiruspanchikqa? ¿Imaynaraqtaq tarikunchik bautizakuyman chayananpaq chulla runallatapas mana yanapaspaqa? ¿Ñuqanchikpa huchanchik kasqantachu chaynataq Dios mana yanapawasqanchiktachu piensananchik? Kay yachachikuypim yachasun Diosmanta willakuyninchik imanasqa ancha allin kasqanmanta hinaspa mana hukmanyarunapaq imakuna yanapawananchikmanta.

5. ¿Imanasqataq Diospaq tukuy imapas ruwasqanchikkunaqa mana ñuqanchikpa munasqanchikman hinachu?

⁵ Diospa munayninta ruwaq runamantam biblia kaynata nin: ‘Tukuy ima ruwallasqanqa alli-allinpunim haykapipas lluqsiykun’, nispa (Sal. 1:3). ¿Chaywanqa nichkan Jehova Diospaq tukuy imapas ruwasqanchikkuna munasqanchikman hina kanantachu? Manam. Llapallanchik pantaq kasqanchikraykum sasachakuykunallaña kachkan (Job 14:1). Chaymantapas, chiqniwaqninchik runakunam Diosmanta willakunanchikta mana munanmankuchu (1 Cor. 16:9; 1 Tes. 2:18). Chaynaqa, ¿imataq Jehova Diospaq aswan allin paymanta willakuyninchikpi? Chaypaqyá bibliapa ima nisqankunamanta yachaykusun.

6. ¿Imataq Jehova Diospaq aswan allin paymanta willakuyninchikpi?

⁶ Jehova Diospaqqa kallpanchakusqanchikwan mana amiruspa willakusqanchikmi aswan allin. Runakuna uyariwaptinchikpas utaq mana uyariwaptinchikpas mana amiruspa kuyakuywan willakusqanchikmi Diospaqqa aswan allin. Apostol Pablom qillqarqa: “Diosqa manam mana allin ruwaqchu llamkasqaykichikta hinaspa sutin kuyasqaykichikrayku runankunata servisqaykichikta qunqarunanpaqqa, kunanpas runankunataqa chaynatam servichkankichik”, nispa (Heb. 6:10). Jehova Diosqa runakuna mana uyariwaptinchikpas kallpanchakusqanchiktawan  payta kuyasqanchiktaqa manam qunqanchu. Chaynaqa, Corinto llaqtayuq iñiqmasinkunaman Pablopa qillqasqanpi hinam Diospaq ‘llamkasqanchikqa mana yanqapaqchu’ (1 Cor. 15:58).

7. ¿Imatam Pablo nirqa Diosmanta willakuyninmanta? ¿Imatam chaymanta yachachwan?

⁷ Pabloqa Diosmanta allin willakuqmi karqa, chaymi iñiqkunapas achka llaqtakunapi mirarqa. Chaywanpas, wakin iñiqkunam aswan allinpaq hapikuspanku Diosmanta mana allin yachachiq kasqanta nirqaku. Chaynata nisqankuwan hayka runakunata bautizakunankupaq yanapasqanmanta ninanmantaqa kaynatam nirqa: “Ñuqaqa aswanraqmi llamkarqani”, nispa (2 Cor. 11:23). Pablotam qatipakunanchik, hinaspapas kallpanchakusqanchikwan mana amiruspa willakusqanchik Jehova Diospaq aswan allin kasqantam yuyarinanchik.

8. ¿Imatam yuyarinanchik Diosmanta willakuyninchikmanta?

⁸ Jehova Diosqa kusikunmi paymanta willakusqanchikwanqa. Jesusmi huk kutipi 70 qatiqninkunata Diosmanta willakunankupaq kacharqa. Bibliam niwanchik chay willakusqankumanta kusisqallaña kutimusqankuta. ¿Imanasqataq kusisqallañaqa kutimurqaku? Kikinkum Jesusta nirqaku: “Sutikita servichikuptiykum demoniokunapas kasuwanku”, nispa. Jesusmi ichaqa paykunata corregispan nirqa: “Amayá demoniokuna kasususqaykichikmantachu kusikuychikqa. Kusikuychikqa hanaq pachapi sutikichik qillqasqa kasqanmantayá”, nispa (Luc. 10:17-20). Jesusqa yacharqam Diosmanta willakuyninku mana chaynalla kananta. Manamá yachanchikchu Jesuspa qatiqninkunapa willakusqanta uyariq runakunamanta Diosta servinankupaq hayka tantiakusqankumantaqa. Jesuspa qatiqninkunaqa manam runakuna willakusqankuta uyariptillanchu kusisqaqa kananku karqa, aswanqa willakunankupaq kallpanchakusqankumanta Jehova Dios kusikusqanwanmi.

9. Galatas 6:7-9 nisqanman hinaqa, ¿imatam chaskisun hinalla Diosmanta willakuspaqa?

⁹ Diosmanta mana amiruspa willakuspanchikqa wiñaypaqmi kawsakusun. Diosmanta willakunanchikpaq hinaspa yachachinanchikpaq anchata kallpanchakuspanchikqa ‘espirituman hinam’ ruwachkanchik. Chaynataqa ninchik chuya espiritunwan Jehova Dios yanapawasqanchikraykum. Bautizakunankupaq pita mana yanapaptinchikpas hinalla ‘mana amiruspa’ willakuptinchikqa wiñay kawsaytam Jehova Diosqa quwasun (qaway Galatas 6:7-9).

10. ¿Pimantataq kanqa willakusqanchikta runakuna uyariyninku utaq mana uyariyninku?

¹⁰ Imayna sunquyuq kasqankuman hinam runakunaqa uyariwasunpas utaq manapas. Chayna kasqantam Jesus nirqa mugu tarpuq runamanta rimaspan. Tarpuptinmi muguqa wichirqa ñanman, ranra rumikunapa kasqanman, kichkakunapa kasqanman hinaspa allin allpaman. Chaywanpas allin allpaman wichiq mugukunallam rurunankamaqa wiñarqa (Luc. 8:5-8). Jesuspa nisqan sarupasqa allpaqa, ranra rumiyuqllaña allpaqa, kichkayuqllaña allpaqa hinaspa allin allpaqa Diosmanta willakuptinchik runakunapa sunqun imayna kasqanwanmi tupan (Luc. 8:11-15). Imaynam tarpuqpas kawsaynin apurawman rurunanpaqqa mana ima ruwaytapas atinmanchu, chaynam willakusqanchikta pi runamasinchikpas uyariwananchikpaqqa mana ima ruwaytapas atichwanchu. Chaywanpas hinallam Diospa gobiernonmantaqa  willakunanchik. Apostol Pablopa nisqanman hinam llamkasqanchikmanta sapakama pagonchikta chaskisun, manam hayka runata yanapasqanchikman hinachu (1 Cor. 3:8).

11. ¿Imanasqataq Noeypa willakusqanqa allin karqa mana uyariptinkupas? (Qaway qaranpi kaq dibujota).

¹¹ Ñawpaq tiempomantaraqmi runakunaqa Diospa serviqninkunapa willakusqankutaqa mana uyariqkuchu. Noeymi 40 wata masnin ‘Dios allin ruwaq kasqanmanta willakurqa’ (2 Ped. 2:5). Payqa yaqapaschá runakuna uyarinankuta piensarqa. Jehova Diospa nisqanwanmi ichaqa mana chayna kasqanta yachanman karqa. Paymi nirqa: “Buquemanmi yaykunqa qanwan kuska churikikuna, warmiki chaynataq churikikunapas warmintinkama”, nispa (Gen. 6:18). Chaymantapas, Noeyqa mayna sayayniyuq buque kananmanta Diospa nisqanwanmi cuentata qukunman karqa willakusqanta as runakunalla uyarinanta (Gen. 6:15). Arí, chaynamá karqa. Manamá chulla runallapas Noeypa willakusqantaqa uyarirqachu (Gen. 7:7). ¿Noeypa willakusqan yanqapaq kasqantachu Jehova Diosqa nirqa? Manam. Noeypa willakusqanqa ancha allinmi karqa Diospaqqa (Gen. 6:22).

12. ¿Imatam Jeremias yuyarirqa Diosmanta hinalla willakunanpaq?

¹² Jeremiaspas 40 wata masninmi willakurqa runakuna chiqniptinkupas chaynataq mana uyariyta munaptinkupas. Runakuna insultaptinku hinaspa burlakuptinkum Diosmanta willakuytaqa saqiruytaña piensarqa (Jer. 20:8, 9). Ichaqa manam saqirqachu. ¿Imam yanaparqa hinalla kusisqa willakunanpaq? Willakusqanta runakuna uyarispankuqa hawka kawsakunankutam yuyarirqa (Jer. 29:11). Yuyarirqataqmi Diosqa paymanta willakunanpaq akllasqantapas (Jer. 15:16). Ñuqanchikpas Jehova Diospa testigonkuna kasqanchikraykum runakuna hawka kawsakunankupaq willakunchik. Chayraykum runakuna uyariptinkupas utaq mana uyariptinkupas hinalla kusisqa willakunchik.

13. ¿Imatam yachachwan Marcos 4:26-29 nisqanpi Jesuspa yachachisqanmanta?

¹³ Runamasinchikkunaqa manam chayllachu Dios serviytaqa qallaykunqaku. Jesusmi chayta rimarqa tarpuq runawan tupachispan (qaway Marcos 4:26-29). Chay runapa tarpusqanqa pisi-pisimanta wiñaspanmi rururqa. Manam imatapas ruwayta atirqachu apurawman wiñananpaqqa. Chaynam bibliamanta yachachisqanchikpas yachasqanman hina pisi-pisimanta kawsakunqa. Imaynam tarpuqpas mana ima ruwaytapas atinmanchu tarpusqankuna apurawman wiñananpaq, chaynam runamasinchikkuna apurawman Dios serviyta qallaykunankupaqqa mana ima ruwaytapas atichwanchu. Chaywanqa amayá amirusunchu nitaq hukmanyarusunchu. Tarpuq hinam pacienciawan suyananchik yachachisqanchik runamasinchik bautizakuyman chayananpaqqa (Sant. 5:7, 8).

14. ¿Imanasqataq mana chayllachu willakusqanchikta uyarinku? Willarimuy iñiqmasinchikkunamanta.

¹⁴ Wakin llaqtakunapi runamasinchikkunaqa unay watamantam bautizakuymanqa chayanku. Canada nacionniyuq Gladys * hinaspa Ruby sutiyuq iñiqmasinchikkunatam 1959 watapi nirqaku Quebec llaqtapi precursora kanankupaq. Chay llaqtapi runakunaqa curakuna hinaspa wakin llaqtamasinku ima ninankuta manchakuspankum chay iñiqmasinchikkunapa willakusqankutaqa mana uyariyta munaqkuchu. Gladysmi willakun: “Iskay watapunim sapa punchaw wasin-wasin willakurqaniku achikyaqmanta tutaykuqkama.  Ichaqa manam pipas uyariwarqakuchu. Runakunaqa rikuramuwaspankum punkunkuta wichqakaykamuqku. Chaywanpas ñuqaykuqa hinallam willakurqaniku”, nispa. Chaymanta qipamanmi runakunaqa uyariytaña qallaykurqaku. Kunanqa kimsa hawaqpiñam chaypi iñiqmasinchikkunaqa huñunakunku (Is. 60:22).

15. ¿Imatam 1 Corintios 3:6, 7 nisqan yachachiwanchik runamasinchikkunaman yachachiymanta?

¹⁵ Manam sapallanchikchu runamasinchikkunataqa yanapanchik. Iñiqmasinchikkunapas yanapawachwanmi yachachisqanchik runamasinchikkuna bautizakuyman chayanankupaqqa (qaway 1 Corintios 3:6, 7). Mayqan iñiqmasinchikpas bibliamanta yachay munaqmanqa saqiykunmanmi ima qillqanchiktapas. Chay iñiqmasinchik kaqmanta kutinanpaq mana tiempon kaptinqa huk iñiqmasinchiktam ninqa chay runamasinchikta yanapananpaq. Payñataqmi huk iñiqmasinchikkunapiwanña bibliamanta yachachiyta qallaykunqa. Sapa riysiqninmi bibliamanta yachaqtaqa parquchkaq hina kallpanchanku. Chaynapim Jesuspa nisqanman hina tarpuqpas chaynataq cosechaqpas kuskanku kusikunqaku (Juan 4:35-38).

16. Yuyaqña utaq unquq kaspanchikpas, ¿imanasqataq kusisqa tarikunanchik willakuypi ruway atisqanchikwan?

¹⁶ Yuyaqña kasqanchikrayku utaq unqusqanchikrayku Diosmanta willakuyta hinaspa yachachiyta mana atispanchikpas ruway atisqanchikkunawanmi kusisqa tarikuchwan. Huk kutipim Davidwan runankuna Amalec runakunata wañurachimuspanku kutichimurqaku familiankutawan tukuy ima apakusqankuta. Ichaqa iskay pachak runankunam pisipasqa kaspanku tukuy imata cuidaspa qiparurqaku. Chaywanpas kamachiq Davidmi nirqa imapas qichumusqankutaqa igualninkalla llapanku rakinakunankupaq (1 Sam. 30:21-25). Chaynam kunan tiempopi Diosmanta willakuyninchikwanpas. Chulla runallapas bautizakuptinqa yanapakuspanchikpas utaq mana yanapakuspanchikpas llapanchikmi anchata kusikunchik.

17. ¿Imanasqataq Diosta anchata agradecekunchik?

¹⁷ Jehova Diostam anchata agradecekunchik atisqallanchikta ruwasqanchikwanpas kusisqa kasqanmanta. Diosqa allintapunim yachan runamasinchikkuna payta servinankupaq mana ima ruwaytapas atisqanchiktaqa. Chaywanpas, payqa kuyakuywan willakunapaq anchata kallpanchakusqanchikraykum bendeciwasun. Niwanchiktaqmi paymanta willakuypi imapas ruway atisqanchikwan kusisqa kanapaqpas (Juan 14:12). Amayá iskayrayasunchu: Jehova Diosqa bendeciwasunmi mana amiruspa hinalla willakuptinchikqa.