1. ¿Imanaqtinmi kusisqa kashananchis Jehová Diospa testigon kasqanchismanta?

¡NOQANCHISQA kusikunanchismi Jehová Diospa testigon kasqanchismantaqa! Diosninchispa sutintan apanchis, paypa testigon kasqanchistataq rikuchinchis runakunaman paymanta willaspa yachachispa ima. Chaymantapas kusisqan “wiñay kausayman apaq ñanninta llapa puriy” munaqkunata yanapanchis (Hech. 13:48). Juj kutinmi discipulonkuna Jesusman willaranku runakuna willasqankuta uyarikusqankumanta, chayta yachaspan Jesusqa santo espirituq junt’aykusqan kaspa anchata kusikuran (Luc. 10:1, 17, 21).

2. ¿Imakunata ruwaspan rikuchisunman Diosmanta yachachiyta ancha allinpaq qhawarisqanchista?

² Noqanchisqa ancha allinpaqmi qhawarinchis runakunaman Diosmanta yachachiytaqa. Apóstol Pablon Timoteota niran: “Allinta qhawarikuy imaynatachus kausashanki chayta, imaynatachus yachachishanki chaytapas [...]. Chayta ruwaspaqa qan kikiykitan salvakunki, uyarisuqniykikunapas salvasqallataqmi kanqaku”, nispa (1 Tim. 4:16). Chaypi nisqan jina, Diosmanta uyarikuspallan runakunaqa salvakuyta atinkuman. Chaymi Diosta jatunchananchispaq jina kausananchis, chaywanmi rikuchinchis yachachisqanchisman jina kausasqanchista (Filip. 1:27). Chaymantapas allinta yachachinanchispaqmi preparakunchis Diospa yanapaynintapas mañakunchis.

3. ¿Imaynapin yachanchis mana llapa runachu Diosmanta willasqanchista uyarikunankuta?

³ Allintaña kallpachakusunman runakunaman Diosmanta yachachinanchispaq chaypas, pisi runakunallan uyarikunqaku otaq manapas. Georg Lindal hermanonchismanta rimasun, payqa Islandia nacionpin 1929 watamanta 1947 watakama sapallan Diosmanta runakunaman willaran. Askha qelqakunatan rakiran, ichaqa manan pipas bautizakuranchu. Paymi  nin: “Wakinqa phiñakurankun paykunawan rimaqtiy, yaqa llapankutaqmi mana uyarikuyta munarankuchu”, nispa. Chay qhepamanmi Galaad escuelamanta wakin misionerokuna chay nacionpi yanapakuranku, chaywanpas runakunaqa manan uyarikurankuchu. Isqon watakuna qhepamanñan wakin runakuna Jehová Diosta servinankupaq bautizakuranku. *

4. ¿Iman pasawasunman Diosmanta willasqanchista runakuna mana uyarikuqtinku?

⁴ Diosmanta willasqanchista mana uyarikuyta munaqtinkuqa llakikusunmanmi. Yaqapaschá apóstol Pablo jina llakisqa kashanchis, payqa sinchi llakisqan kasharan yaqa llapa judiokuna Jesuspi mana iñisqankurayku (Rom. 9:1-3). Yaqapaschá unayña pimanpas yachachiranchis. Kallpachakuranchisña Diosmantaña mañakuranchis chaypas mana cambiaranchu, jinaspa saqepuranchis. Otaq yachachisqanchis runakuna mana jujllapas bautizakuranchu. Chhaynapi tarikuspaqa nisunmanpaschá: “Manachus jina Jehová Diosqa kusisqachu kashan llank’asqaywan”, nispa. Chaymi kunan yachasun kay tapuykunamanta: ¿Imaynapin yachasunman runakunaman willasqanchiswan Diosninchis kusisqa kashasqanta? ¿Imatan ruwananchis Diosmanta willasqanchista runakuna mana uyarikuqtinku?

5. ¿Imanaqtinmi Jehová Diospaq llank’asqanchis mana munasqanchisman jinachu kanman?

⁵ Bibliapiqa willawanchismi Diosta kasukuqpaqqa imapas ruwasqanqa allillanpuni kananta (Sal. 1:3). Ichaqa manan chayraykuchu Jehová Diospaq llank’asqanchisqa munasqanchisman jina kanqa. Noqanchispas jujkunapas juchayoq kasqanchisraykun imaymana sasachaykunapi tarikusunchis (Job 14:1). Chaymantapas enemigonchiskunaqa juj tiempon jark’awasunman Diosmanta willananchista (1 Cor. 16:9; 1 Tes. 2:18). Chhaynaqa, ¿imaynapin yachasunman Diosqa paypaq llank’asqanchiswan kusikusqanta? Chayta yachanapaq Bibliapi imatachus niwasqanchista qhawarisun.

6. ¿Imata qhawaspan Jehová Dios allinpaq qhawarin paypaq llank’asqanchista?

⁶ Jehová Diosqa kallpachakunanchista aguantananchistan munan. Manaña runakuna uyarikuqtinkupas Jehová Diosqa kusisqan noqanchiswan kashanqa paymanta willamunanchispaq kallpachakushallaqtinchisqa. Apóstol Pablon niran: “Diosqa chaninpunin, payqa manapunin qonqanqachu imachus ruwasqaykichista sutinta munakusqaykichistapas, chaytan qankunaqa rikuchishankichis iñiqmasikunata kunankama servispa”, nispa (Heb. 6:10). Diosqa payta munakuspa kallpachakusqanchista  rikumuspan kusikun manaña yachachisqanchis runa bautizakuranchu chaypas. Chaymi apóstol Pabloq nisqanta yuyarinanchis, paymi niran: “Señorpaq llank’asqaykichisqa manan yanqapaqchu”, nispa (1 Cor. 15:58). Chay jinaqa Diosqa allinpaqmi llank’asqanchista qhawarin runakunaña mana uyarikuqtinkupas.

7. ¿Imatan yachasunman apóstol Pabloq nisqanmanta?

⁷ Apóstol Pabloqa askha nacionkunapin runakunata Diosmanta yachachimuran, jinaspa askha llaqtakunapi iñiq t’aqakunata jatarichiran. Chaywanpas wakin cristianokunan paymanta niranku: “Manan allin yachachiqchu”, nispa. Pabloqa defiendekunanpaqqa manan willaranchu jayk’a runatachus bautizakunankama yanapasqantaqa. Aswanpas niranmi: “Paykunamanta mastaraqmi llank’ani”, nispa (2 Cor. 11:23). Chhaynaqa Jehová Diosqa astawanqa qhawamushan kallpachakusqanchista aguantasqanchista iman.

8. ¿Diosta servispa ima ruwasqanchiswanmi astawanqa kusikunanchis?

⁸ Jehová Diosqa kusisqan kashan jujkunaman paymanta willasqanchiswan. Juj kutipin Jesusqa qanchis chunka discipulonkunata kacharan runamasinkuman Diospa gobiernonmanta willamunankupaq. Chay ruwasqankumanta kutimuspan paykunaqa kusisqa kasharanku. ¿Imaraykun kusisqa kasharanku? Paykunan niranku: “Señor, sutiykipi kamachiqtiykuqa supaykunaraqmi kasukuwanku”, nispa. Chayta niqtinkun Jesusqa paykunata niran: “Ama espiritukunaq kasukusqasuykichisraykuchu kusikuychis, aswanpas kusikuychis sutiykichis janaq pachapi qelqasqa kasqanrayku”, nispa (Luc. 10:17-20). Jesusqa yacharanmi juj kutikunapi chaykuna mana pasananta. Manataqmi yachasunmanchu chay kutipi uyarikuq runakunamanta jayk’achus Jesuspa qatikuqnin kapuranku chaytaqa. Chaymi paykunaqa mana jujkuna uyarikusqankuraykullachu kusikunanku karan, aswanpas astawanqa kusikunanku karan kallpachakusqankuta Jehová Dios rikumusqanwanmi.

9. Gálatas 6:7-9 nisqanman jina, ¿imatan Dios qowasunchis mana pisipaspa runakunaman willamuqtinchis?

⁹ Mana pisipaspa Diosmanta willasun chayqa, wiñay kausaytan chaskisunchis. Sichus tukuy atisqanchista ruwasun runakunaman Diosmanta willamunanchispaq yachachinanchispaq ima chayqa, Diospa santo espiritunwanmi junt’a kasun. Chaymantapas “mana pisipaspa chayta ruwashallasun” chayqa, Jehová Diosmi prometewanchis wiñay kausayta qowananchispaq manaña pitapas yanaparanchischu bautizakunankama chaypas (leey Gálatas 6:7-9).

10. ¿Imanaqtinmi Diosmanta willasqanchista wakin runakuna uyarikunku wakintaq mana?

¹⁰ Sonqonku imayna kashasqanmantan uyariwasunpas manapas. Jesusmi muju t’akaqwan Diosmanta willasqanchista tupanachiran. Juj runaq muju t’akasqansi imaymana clase allpaman chayaran, ichaqa allin allpaman chayaq mujullas wiñaspa rururan (Luc. 8:5-8). Jesusqa sapanka allpatan runakunaq sonqonwan tupanachiran, chaymi runakunaqa mana kaqllatachu Diospa siminta chaskikunku (Luc. 8:11-15). Chaymi noqanchisqa mana runamasinchista obligasunmanchu Diosmanta uyarikunankutaqa, paykunaq sonqonku imayna kashasqanmantan chayqa kanqa. Noqanchismi ichaqa Diospa gobiernonmanta willashanallanchis. Apóstol Pabloq nisqan jina, llank’asqanchismantan premiotaqa chaskisunchis (1 Cor. 3:8).

11. Noepa willasqanta manaña jujkuna uyarikurankuchu chaypas, ¿imaynapin yachasunman Jehová Dios paypa ruwasqanwan kusisqa kasqanta? (Tapanpi kaq dibujota qhaway.)

 ¹¹ Ñaupaq tiempopipas Diosta askha serviqkunan runamasinkuman Diospa siminta willaranku, paykunan ichaqa mana uyarikurankuchu. Noemanta rimasun, payqa chanin kausaymantan runakunaman askha watakuna willaran (2 Ped. 2:5). Payqa munaranchá willasqanta uyarinankuta. Jehová Diosmi ichaqa arcata ruwananpaq kamachishaqtin kayta niran: “Qanmi arcaman jaykunki warmiykiwan, jinallataq churiykikunapas warmintinkama qanwan kuska jaykunqa”, nispa (Gén. 6:18). Chaymantapas Diosqa willaranmi arcaq sayaynin mana nishu jatunchu kananta, chaywanqa Noeqa repararanchá pisi runalla salvakunanta (Gén. 6:15). Chhaynan karan, chay millay tiempopi kausaq runakunamantaqa manan jujllapas paytaqa uyarirankuchu (Gén. 7:7). Chhaynaqa, ¿mana allinpaqchu Jehová Dios Noepa llank’asqanta qhawariran? Manan. Noeqa Diospa kamachisqanman jinapunin imatapas ruwaran, chaymi Diosqa paypa llank’asqanwan kusikuran (Gén. 6:22).

12. ¿Iman Jeremiasta yanaparan Diospa siminta kusisqa willananpaq jujkunaña mana uyarikuqtinkupas?

¹² Profeta Jeremiaspas askha watakunan mana uyarikuq millay runakunaman Diospa siminta willaran. Paytaqa millaytan k’amiranku, asipayaranku, maqaranku ima; chaymi mana munaranñachu Diospa kamachisqanta ruwayta (Jer. 20:8, 9). Ichaqa manan pisiparanchu. ¿Iman yanaparan chaykunata aguantananpaq? Payqa yacharanmi willasqanta uyarikuq runakuna jamuq tiempopi sumaq kausay kananmanta uyarispa kusikunankuta (Jer. 29:11). Chaymantapas Jehová Diosmi Jeremiastaqa ajllaran paypa siminta jujkunaman willamunanpaq, chaytan payqa allinta yacharan (Jer. 15:16). Noqanchispas llakisqa sonqoyoq runakunamanmi sumaq kausay kananmanta willamushanchis, chaymantapas Diospunin kamachiwaranchis paymanta willamunanchispaq. Chayta allinta sonqonchispi jap’ikusun chayqa, kusisqan willamusun manaña uyarikuqtinkupas.

13. ¿Imatan yachasunman Marcos 4:26-29 rijch’anachiypi Jesuspa willasqanmanta?

¹³ Manan pipas ratollaqa Diospiqa iñinmanchu. Jesusmi juj rijch’anachiyta willaran muju t’akaq puñushanankama mujuq wiñamusqanmanta (leey Marcos 4:26-29). Mujuta t’akaqqa yachanmi t’akasqan mujuqa pisi-pisimanta wiñamunanta, payqa manan imatapas ruwayta atinmanchu t’akasqan muju ratolla wiñamunanpaqqa. Chay jinallataqmi yachachisqanchis runakunapas unay tiempopiraq yachasqankuman jina ruwayta qallarinkuman. Chay muju t’akaq jinan noqanchispas yachachisqanchis runakunataqa mana obligasunmanchu ratolla iñiyninkupi wiñanankutaqa. Chaymi yachachisqanchis runakunawan pacienciakunanchis paykunallamanta bautizakuyta munanankukama (Sant. 5:7, 8).

14. ¿Imaynapin yachanchis wakin runakunaqa unay tiempomanta uyarikuyta munasqankuta?

¹⁴ Wakin llaqtakunapiqa askha watakuna qhepamanñan wakinqa Dios serviyta munankuman. Rimasunchis Canadá nacionmanta Gladys hermananchismanta Ruby hermananchismantawan. Paykunaqa 1959 watapin precursora regular jina Quebec llaqtapi llank’aranku. * Chay tiempopiqa runakunaqa nishutan curakunata juj runakunatapas manchakuqku, chaymi mana pipas paykunata uyariqkuchu. Hermananchis Gladysmi nin: “Sapa p’unchaymi pusaq horasta  jina wasin-wasinta Diosmanta willarayku, iskay watañan chayta ruwasharayku, manataqmi pipas uyarikuyta munaranchu. Runakunaqa ventanankumanta qhawamuspan punkunkuta manaña kichamuqkuchu. Chaywanpas manan pisiparaykuchu”, nispa. Watakunaq pasasqanman jinan ichaqa uyarikuyta qallariranku. Chaymi kunanqa chay llaqtapi kinsa iñiq t’aqakuna kashan (Isa. 60:22).

15. ¿Imatan yachasunman 1 Corintios 3:6, 7 textomanta?

¹⁵ Askha iñiqmasikunaq yanapaynintan necesitanchis pipas bautizakunanpaqqa. Iñiq t’aqapiqa llapallanchismi yanapakusunman pipas Diosta servinanpaqqa (leey 1 Corintios 3:6, 7). Yaqapaschá juj iñiqmasinchis uyarikuq runaman juj qelqata saqeran. Jinaspa chay iñiqmasinchisqa chay runata jujmanta visitananpaq tiempon mana kaqtin juj iñiqmasita nin visitananpaq. Chay iñiqmasitaq chay runata yachachimunanpaq sapa kuti visitaspa juj iñiqmasikunata invitan, jinan iñiqmasikunaqa chay runata sumaqta kallpachanku. Chayta ruwaspan sapanka iñiqmasikuna yanapakushanku chay runaq sonqonpi Diospa simin wiñananpaq. Chaymi payta yanapaq iñiqmasikunaqa kusikunku chay runa Diosta servinanpaq bautizakuqtinqa (Juan 4:35-38).

16. Manaña ñaupaqpi jinachu kallpanchis kanman chaypas, ¿imanaqtinmi kusikunanchis Diospaq llank’aspa?

¹⁶ Yaqapaschá kuraq otaq onqosqa kasqaykirayku manaña ñaupaqpi jinañachu Diosmanta willashanki yachachishankipas. Chhaynaña kaqtinpas kusikunaykin chay llank’aypi yanapakusqaykimanta. Rimasun rey Davidmanta. Amalec runakunan paypa familiantapas runankunaq familiantapas kaqninkunantinta apapuranku, jinan Davidqa runankunawan chayta qechumpuranku. Ichaqa iskay pachaj runankunan sinchi sayk’usqa kaspa mana maqanakuq rirankuchu, aswanmi cosasninkuta qhawaspa qhepakuranku. Maqanakuymanta kutimpuspataq Davidqa qechumusqankuta llapallankuman igualta rakiran (1 Sam. 30:21-25). Kunanpas runakunaman yachachiypiqa llapanchismi tukuy atisqanchista ruwashanchis, chaymi llapallanchis kusikunanchis pillapas wiñay kausay ñanman jaykumuqtinqa.

17. ¿Imanaqtinmi Jehová Diosta agradecekunanchis?

¹⁷ Diosqa kusisqan kashan paypaq llank’asqanchismanta. Noqanchisqa manan pitapas obligasunmanchu Diosta servinanpaqqa, Diosmi ichaqa kusikun tukuy sonqowan llank’asqanchista rikuspa, chaymi sumaq premiota qowasunchis. Chaymantapas Diosqa munanmi runakunata yachachinapaq imallapipas yanapakusqanchiswan kusikunanchista (Juan 14:12). Chay jinaqa ama qonqasunchu, Diosqa kusisqan noqanchiswan kashanqa mana pisipaqtinchisqa.