1. Eaa tatou i rekareka ai kia riro mai ei Au Kite no Iehova?

REKAREKA tikai tatou i te tikaanga kia riro mai ei Au Kite no Iehova! Ei iti tangata no Iehova, ka akapapu tatou e e Au Kite tatou nona na te tutu aere anga ki te tangata e te apii ia ratou no runga Iaia. Rekareka katoa tatou me tauturu i tetai tangata tei “akonoia no te ora mutu kore” kia riro mai ei taeake irinaki. (Anga. 13:48) Aite to tatou manako ki to Iesu. “Rekareka atura to Iesu vaerua” te oki anga mai tana au pipi mei te angaanga tutu aere.​—Luka 10:1, 17, 21.

2. Akapeea tatou me akaari e e puapinga tikai ta tatou angaanga tutu aere?

² E puapinga tikai te angaanga tutu aere kia tatou. Akamaroiroi te apotetoro ko Paulo ia Timoteo: “Kia matakite ia koe, e taau e apii ra.” Karanga katoa a Paulo: “E tamou tika rai i te reira: tei te akapera oki e oraʼi koe, e te aronga katoa e akarongo mai ia koe.” (1 Timo. 4:16) No reira ka ora mai te tangata i ta tatou angaanga tutu aere. Kia matakite katoa ia tatou uaorai no te mea e iti tangata tatou no te Patireia. Ka inangaro ua rai tatou i te rave i te au mea tei akapaapaa ia Iehova e tei rotai ki te nuti meitaki ta tatou ka tutu aere. (Phili. 1:27) Ka akaari katoa tatou e te ‘matakite ra i ta tatou e apii ra’ me akapapa meitaki no te angaanga tutu aere e te pati i ta Iehova tauturu i mua ake ka tutu aere ei ki te tangata.

3. Ka akarongo ainei te katoatoa ki te karere Patireia? Oronga i tetai akaraanga.

³ Noatu me tauta pakari tatou kia tutu aere ki te tangata, penei e iti ua te aronga i to tatou ngai tei inangaro i te akarongo ki te karere o te Patireia. Akamanako ana i tei tupu ki te Taeake Georg Lindal, koia anake ua tei tutu aere i Iceland mei te 1929 ki te 1947. E tauatini ua atu au puka tana i tuʼa aere; inara, kare okotai tangata i riro mai ei Kite. Tata aia: “Tetai pae kua patoi pakari i te tuatua mou, kareka te maataanga kare ratou e inangaro i te akarongo.” Noatu kua tae mai te au mitinari tei akaoti i te Apii Gileada no te tutu aere, kua roa ratou i te rave i te reira e kare rai e tangata i akarongo mai. I reira, e  iva mataiti i muri mai kua akatapu tetai aronga no Iceland i to ratou oraanga kia Iehova e kua papetitoia. *

4. Eaa to tatou manako me kare te tangata e inangaro i te akarongo ki te nuti meitaki?

⁴ Ka maromaroa tatou me kare te tangata e inangaro i te akarongo mai. Penei ka aite to tatou manako ki to Paulo, “e aue maata toku, e te mamae tukutuku kore i roto i toku ngakau” no te mea kare te maataanga o te ngati Iuda i inangaro i te irinaki e ko Iesu te Mesia tei taputouia. (Roma 9:1-3) Penei te apii ra koe i te Pipiria ki tetai tangata. Ka tauta pakari koe kia riro ei puapii meitaki e ka pure putuputu no te tangata apii. Kare ra aia e taangaanga i tana e apii ra e ka anoanoia koe kia akamutu i tana apii. Me kore, penei kare koe i apii ana i tetai tangata tei papetitoia. Ko te aiteanga ainei e noou te apa, e kare a Iehova e mareka ana i taau angaanga tutu aere? I teia atikara, ka pau tatou e rua uianga: (1) Eaa tei akariro i ta tatou angaanga tutu aere ei mea manuia? (2) Eaa ta tatou ka tapapa atu me tutu aere ki te tangata?

5. Eaa te tumu kare ta tatou angaanga na Iehova e akatupu ua rai i ta tatou ka inangaro?

⁵ Karanga te Pipiria no te tangata tei rave i te anoano o te Atua: “Ko tana katoa e rave ra, te meitaki ra ïa.” (Sala. 1:3) Inara, kare te aiteanga e ka tupu pouroa te au mea ta tatou ka inangaro i roto i te angaanga a Iehova. Kua kī te oraanga tangata “i te pekapeka,” no to tatou uaorai tu apa e to etai ke. (Iobu 14:1) Pera katoa, penei ka arai te aronga patoi i ta tatou angaanga tutu aere i te ngai tangata. (1 Kori. 16:9; 1 Tesa. 2:18) Akapeea i reira a Iehova me akara mai i ta tatou angaanga tutu aere ei mea puapinga? Akamanako i te au kaveinga Pipiria te ka pau i teia uianga.

6. Akapeea ta tatou angaanga na Iehova i riro ei mea puapinga kiaia?

⁶ Te akara maira a Iehova i ta tatou tautaanga e te tu akakoromaki. Ka mareka mai a Iehova ia tatou me tutu maroiroi no to tatou inangaro iaia, noatu kare te tangata e inangaro i te akarongo. Tata a Paulo: “Kare te Atua i te Atua tuatua-tika kore, ka akangaro atu ei aia i ta kotou angaanga i rave, e to kotou anoano, i tona ingoa i akakite puia e kotou na, ko kotou i matuapuru i te aronga tapu, e te matuapuru ua ra oki kotou.” (Ebe. 6:10) Ka akamaara a Iehova i ta tatou angaanga e te aroa, noatu e kare tatou i apii i te Pipiria ki tetai tangata tei papetitoia. No reira, ka tau ta Paulo i tata ki to Korinetia kia koe: “Kare te mea puapinga kore te angaanga a te Atu, ta kotou e rave na,” noatu me kare taau angaanga pakari i akatupu i taau ka inangaro.​—1 Kori. 15:58.

7. Eaa ta tatou ka apii mei ta te apotetoro ko Paulo i tuatua no tana angaanga tutu aere?

⁷ E mitinari tukatau te apotetoro ko Paulo e  kua akamata aia i te au putuputuanga ou i roto i te au oire tukeke. Inara, te akaapa anga tetai aronga e kare a Paulo i te puapii meitaki, kare aia i akakite ana eia aronga tana i tauturu kia riro mai ei au Kerititiano. Mari ra, tata a Paulo: “E rai taku angaanga i rave.” (2 Kori. 11:23) Mei ia Paulo rai, e akamaara e ko ta tatou angaanga e te akakoromaki te mea puapinga kia Iehova.

8. Eaa ta tatou ka akamaara no te angaanga tutu aere?

⁸ Ka akamareka ta tatou angaanga tutu aere ia Iehova. Kua tono a Iesu e 70 pipi kia tutu aere i te karere Patireia, e i te openga o ta ratou angaanga tutu aere, kua oki mai ratou “ma te rekareka.” Eaa ratou i rekareka ai? Karanga ratou: “Kua vi katoa te au demoni ia matou i to ingoa na.” Inara, kua akatano a Iesu i to ratou manako i te na ko anga: “Auraka ra kotou e rekareka i te mea i vi te au vaerua kino ia kotou: e rekareka ra i to kotou ingoa i tataia ki runga i te ao ra.” (Luka 10:17-20) Kua kite a Iesu e kare teia au mea umere e tupu putuputu i roto i ta ratou angaanga tutu aere. Te tika, kare tatou i kite eia aronga tei komakoma ki te au pipi a Iesu tei riro mai ei au Kerititiano. Kua anoanoia te au pipi kia akamaara e kare te rekareka e tupu anake me akarongo mai te tangata mari ra, tei puapinga atu, kia mārama ratou e te mareka ra a Iehova i ta ratou angaanga pakari.

9. Ia Galatia 6:7-9, eaa te openga ka rauka mai me akakoromaki tatou i te rave i te angaanga tutu aere?

⁹ Me akakoromaki tatou i te rave tamou i te angaanga tutu aere, ka rauka te ora mutu kore. Me rave i ta tatou ka rauka kia tutu aere e kia apii i te nuti meitaki, ‘te ruru ra tatou i ta te vaerua’ na te akatika anga i te vaerua tapu o te Atua kia angaanga ua rai i roto i to tatou oraanga. “Auraka tatou e roiroi” e “kia kore tatou e akaparuparu.” Taputou mai a Iehova i te ora mutu kore no tatou noatu me kare tatou i tauturu i tetai tangata kia papetitoia.​—E tatau ia Galatia 6:7-9.

10. Eaa te tumu ka akarongo tetai pae ki te nuti meitaki e kare tetai pae e akarongo?

¹⁰ Me āriki mai te tangata i te tuatua mou e me kare, tei runga i to ratou ngakau. Akamārama a Iesu i teia tuatua mou i roto i tana parapore no te tangata tei ruru i te ua ki runga i te one tukeke, e ko te one meitaki anake tei uua mai. (Luka 8:5-8) Karanga a Iesu e te akatutu ra te one tukeke i te ngakau o te tangata e akapeea ratou me ariu atu ki “te tuatua a te Atua.” (Luka 8:11-15) Mei te tangata ruru, kare e rauka ia tatou te akatupu i te ua i roto i te ngakau o te tangata ta tatou ka apii. Ta tatou angaanga, koia oki, kia ruru ua rai i te ua meitaki o te karere Patireia. Mei ta te apotetoro ko Paulo i karanga, “e rave tetai e tetai i tana uaorai tutaki e tau i tana uaorai angaanga” kare ko tei tupu mai no tana angaanga.​—1 Kori. 3:8.

11. Eaa a Iehova i mareka ai i te angaanga tutu aere a Noa noatu kare e tangata i akarongo mai kiaia? (Akara i te tutu i te kapi mua.)

¹¹ E maata te au tavini o Iehova i taito tei tutu aere ki te aronga kare i inangaro i te akarongo. Tetai akaraanga, ko Noa “te tangata i ako i te tuatua-tika,” penei no tetai 40 me kore 50 mataiti. (2 Pete. 2:5) Kare e ekoko, kua inangaro a Noa kia akarongo mai te tangata kiaia, kare ra a Iehova i karanga ana e ka tupu teia. Mari ra, te ikuiku anga te Atua ia Noa kia tarai i tetai araka, karanga aia: “Ka tae koe ki roto i te araka, ko koe, e taau tamariki, e taau vaine, e nga vaine a aau tamariki ra.” (Gene. 6:18) Pera katoa, te akakite anga a Iehova mei teaa te maata o te araka, penei kua kite mai a Noa e kare e maata te aronga ka akarongo mai no te mea kare e ngai e ō ei ratou ki roto i te  araka. (Gene. 6:15) Kua kite tatou e kare okotai tangata i akarongo ana kia Noa. (Gene. 7:7) Kua manako ainei a Iehova e kare a Noa i rave meitaki ana i te angaanga tutu aere? Kare rava! Kua mareka roa a Iehova ia Noa no te mea kua rave marie aia i te au mea katoa Tana i akaue iaia kia rave.​—Gene. 6:22.

12. Akapeea te peroveta ko Ieremia te rekareka anga i tana angaanga tutu aere noatu kare te tangata i akarongo mai e kua patoi iaia?

¹² Mei te reira katoa, kua tutu aere te peroveta ko Ieremia no tetai 40 tuma mataiti noatu kare te tangata i akarongo mai e kua patoi iaia. Kua taitaia roa aia no te mea kua riro tana tutu aere “ei akakino anga . . . e ei akavaavaa anga,” no reira kua manako aia kia akamutu i tana angaanga. (Iere. 20:8, 9) Kare ra a Ieremia i tuku i te ‘au! Eaa tei tauturu iaia kia rave ua atu i tana angaanga tutu aere e kia mataora i te rave anga i te reira? E rua tuatua mou puapinga tana i akamou ki runga. Mea mua, ka apai mai te karere a te Atua ta Ieremia e akakite ra i te manakonakoanga no te tuatau ki mua. (Iere. 29:11) Te rua, kua iki a Iehova ia Ieremia ei vaa tuatua Nona ei kave i Tana karere ki te tangata. (Iere. 15:16) Ka akakite katoa tatou i te karere manakonakoanga ki te tangata, e ka apai tatou i to Iehova ingoa ei Au Kite nona. Me akamou i to tatou manako ki runga i teia nga tuatua mou puapinga, ka rekareka tatou noatu ka akarongo mai te tangata e me kare.

13. Eaa ta tatou ka apii mei ta Iesu parapore ia Mareko 4:26-29?

¹³ Ka tupu marie te akarongo o te tangata. Apii a Iesu i teia tuatua mou i roto i tana parapore no te tangata ruru tei moe i te po. (E tatau ia Mareko 4:26-29.) Kua tupu marie te ua e kare e rauka i te tangata ruru i te akatupu viviki atu. Penei ka anoanoia koe kia tiaki no tetai tuatau roa i mua ake ka kite ei koe i taau tangata apii Pipiria e taangaanga ra i tana e apii maira. Kare e rauka i te tangata tanutanu i te akaviviki i te tupu anga o te ua. Kare katoa e rauka ia tatou i te akatupu viviki i te akarongo o ta tatou aronga apii Pipiria no reira, auraka e taitaia e auraka e tuku i te ‘au me roa koe te tiaki anga ia ratou kia tere ki mua. Mei te angaanga tanutanu rai, ka anoanoia tatou kia akakoromaki marie e kia tiaki no te tangata apii kia rave i tana uaorai ikianga kia tavini ia Iehova.​—Iako. 5:7, 8.

14. Eaa te akaraanga te akaari maira e ka roa te tuatau i mua ake ka akarongo ei te tangata ki te nuti meitaki?

¹⁴ I tetai au ngai, ka roa te tuatau i mua ake ka papetito ei tetai tangata. Akamanako ana i tei tupu kia Gladys e Ruby Allen, e teina tuakana raua tei tavini ei nga painia tamou i te 1959 i tetai oire i Quebec, i Kanata. * Kare te tangata i inangaro i te akarongo kia raua no te mea, e mataku to ratou i ta te tangata ka tuatua e ta te au orometua ka rave me komakoma ratou ki te Au Kite. Karanga a Gladys: “Kua aere atu maua mei tetai ngutupa ki tetai ngutupa e varu ora i te ra e rua mataiti kare tetai tangata i pau mai ana! Ka aere ua mai te au tangata ki te ngutupa e ka uuti i te tapoki ngutupa ki raro. Inara kare maua i akamutu ana.” Aere ua rai, kua oaoa mai te tangata e kua akamata i te akarongo. I teianei, e toru putuputuanga i roto i tera oire.​—Isa. 60:22.

15. Eaa ta 1 Korinetia 3:6, 7 e apii maira ia tatou no te angaanga akariro i te tangata ei pipi?

¹⁵ Ka anoanoia te tauturu a te katoatoa kia akariro i tetai tangata ei pipi. Ka tauturu te katoatoa i roto i te putuputuanga i tetai tangata kia papetitoia. (E tatau ia 1 Korinetia 3:6, 7.) Ei akaraanga, penei na tetai taeake i akaruke i te aenga pepa me kore makatini ki tetai tangata tei akarongo mai. Kare ra e rauka iaia  kia atoro akaou i te pu ngutuare i te ora tei tau kiaia, no reira kua pati aia i tetai taeake ke kia atoro akaou i te pu ngutuare. Na tera taeake i akamata i te apii Pipiria ki te pu ngutuare. E oti, kua pati te taeake i tetai au taeake e te tuaine kia aru iaia no te apii e ka akamaroiroi ratou i te tangata apii na roto i te au mataara tukeke. Ka tauturu te au taeake e te au tuaine tei aravei i te tangata apii kia akamatutu i tona akarongo. Na teia mataara, mei ta Iesu i tuatua, ka rekareka kapipiti te katoatoa tei tauturu i te tangata apii kia papetitoia.​—Ioa. 4:35-38.

16. Akapeea koe e rekareka ai i te angaanga tutu aere noatu kua apikepike te kopapa e kare koe e maroiroi akaou?

¹⁶ Penei kare e rauka ia koe te tutu aere e te apii i te tangata mei to mua ana rai no te tu apikepike o te kopapa e kare koe e maroiroi akaou. Ka rekareka rai koe i taau ka rauka i te rave i roto i te angaanga tutu aere. Akamanako ana i tei tupu ki te Ariki ko Davida te akaora anga aia e tona au vaeau i to ratou au ngutuare e te apinga mei te aronga tamaki o Amaleka. E rua anere tangata tei roiroi e kare i aere ki te tamaki, no reira kua noo ratou e kua tiaki i te apinga. Muri ake i te tamaki, kua akaue a Davida kia aiteite te tuanga tei tuʼaia no te aronga tamaki e te aronga tei noo i te tiaki i te apinga. (1 Samu. 30:21-25) Koia katoa ta tatou angaanga akariro i te tangata ei pipi. Ka rekareka kapipiti te katoatoa tei rave i ta ratou i rauka kia tutu aere e kia apii i te tangata tei papetitoia.

17. Ka akameitaki tatou ia Iehova no teaa?

¹⁷ Akameitaki tatou ia Iehova no te akara aroa mai i ta tatou tavini anga iaia. Kua kite aia e kare e rauka ia tatou i te māro i te tangata kia akarongo mai me kore kia akamori iaia. Noatu ra, te kite maira aia i ta tatou angaanga pakari e to tatou inangaro, e ka tutaki mai ia tatou. Apii katoa aia ia tatou kia mataora i ta tatou ka rauka i te rave i roto i te angaanga tutu aere. (Ioa. 14:12) Mea papu roa, ka mareka mai te Atua ia tatou me kare tatou e tuku i te ‘au!