1. Soske siem bahtale hem savi čest isi amen?

AMEN siem but bahtale hem isi amen bari čest so siem e Jehovaskere svedokija. Phiravaja e Devleskoro anav, hem živinaja sprema adava anav agjaar so propovedinaja hem keraja učenikija. But siem bahtale keda šaj te pomožina nesavenge „so ispravno dikhena ko večno životo“ te oven učenikija (Dela 13:48). Osetinaja amen isto sar o Isus. Ov sine but bahtalo keda leskere učenikija irangje pe tari služba hem vakergje leske kobor šuže iskustvija sine len (Luka 10:1, 17, 21).

2. Sar šaj te sikava kaj i služba amenge but važno?

² Amenge i služba tani but važno. O apostol Pavle pottikningja e Timotee: „Pazin šukar sar živinea hem sar sikavea“. Isto agjaar vakergja leske: „Kerindor adava ka spasine hem tut hem adalen so šunena tut “ (1. Tim. 4:16). Znači, amari služba spasinela životija. Pazinaja šukar sar živinaja, soske poddržinaja e Devleskoro Carstvo. Sekogaš mangaja te postapina ko način kova so anela slava e Jehovaske. Hem sikavaja kaj verujnaja ko šukar haberi kova so propovedinaja le (Fil. 1:27). Isto agjaar, pazinaja sar sikavaja agjaar so spreminaja amen angleder te dža ki služba, hem rodaja vodstvo taro Jehova angleder te svedočina e javerenge.

3. Sar šaj te reagirinen o manuša ko šukar haberi? Vaker primer.

³ Čak keda daja amaro najšukar šaj samo hari džene šunena, ili šaj nikoj na mangela te šunel o šukar haberi ko amaro podračje. Razmislin bašo iskustvo e phraleskoro Georg Lindal kova so korkori propovedinela sine ko Island, taro 1929 dži ko 1947 berš. Ov dengja poviše milja lila, ama nijekh na prifatingja o čačipe. Ov vakergja:  „Nesave manuša sikavena sine kaj sine protiv o čačipe, ama pobaro delo lendar na sikavena sine nisavo interes“. Čak o misionerija so ale tari škola Gilead mora sine te propovedinen panda enja berša, angleder nekoj te prifatinel o čačipe hem te krstinel pe.

4. Sar osetinaja amen keda o manuša na interesinena pe bašo šukar haberi?

⁴ Keda o manuša na sikavena interes bašo čačipe, amen razočarinaja amen. Šaj osetinaja amen isto sar o Pavle, kova so osetinela sine „bari žal hem dukh“ adaleske so but Evreija na mangena sine te prifatinen e Isuse sar Mesija (Rim. 9:1-3). So ako valjani te čhinave te proučine e interesentea, iako dea tutar sa hem molinea tut leske ama ov sepak na napredujnela? Ili, so ako nikogaš na pomožingjan nekaske te krstinel pe? Dali akava značinela kaj na kerea nešto sar so valjani, hem kaj o Jehova na dela tut bereketi ki tli služba? Ki akaja statija ka odgovorina ko duj pučiba: 1) So kerela te ovel amari služba uspešno? 2) So valjani te očekujne keda svedočinaja e javerenge?

5. Soske i služba nane te ovel sekogaš agjaar sar amen so očekujnaja?

⁵ I Biblija vakerela kaj okova so kerela e Devleskiri volja „ko sa so kerela ka ovel uspešno“ (Ps. 1:3). Ama adava na značinela kaj sa so keraja ki služba bašo Jehova ka ovel sar amen so mangaja. E manušengoro životo tano „pherdo problemencar“, soske sarine siem nesovršena (Jov 14:1). Isto agjaar, o protivnikija šaj ponekogaš te keren amenge popharo te dža ki služba (1. Kor. 16:9; 1. Sol. 2:18). Tegani, sar o Jehova odlučinela dali amari služba tani uspešno ili na? Te dikha nesave bibliska načelija kola so ka pomožinen amenge te arakha o odgovor.

6. Sar odlučinela o Jehova dali amari služba tani uspešno ili na?

⁶ O Jehova dikhela amaro trudo hem i istrajnost. Anglo e Jehovaskere jakhja, amari služba tani uspešno keda keraja la revno hem taro mangipe, bizi razlika sar ka reagirinen o manuša. O Pavle pišingja: „O Devel nane nepravedno pa te bistrel adava so kergjen, hem o mangipe so sikavgjen leskere anaveske agjaar so služingjen okolenge soj sveta hem ponadari da služinena lenge“ (Evr. 6:10). O Jehova na bistrela tlo trudo hem mangipe, iako šaj nane tut šukar rezultatija ki služba. Adaleske, adava so o Pavle vakergja e phralenge taro Korint važinela tuke da: „Tumaro trudo bašo Gospodari nane te ačhol bizi nagrada“, čak ako adava trudo na anela o rezultati kova so tu očekujngjan le (1. Kor. 15:58).

7. So šaj te sikljova taro adava so vakergja o apostol Pavle baši pli služba?

⁷ O apostol Pavle sine but šukar hem uspešno misioneri. Adava džanaja le soske kergja neve sobranija ko but dizja. Ama keda  nesave kritikujngje le hem vakerena sine kaj nane šukar učiteli, ov na istakningja plo uspeh adalea so vakergja kobor manušenge pomožingja te oven vernikija. Namesto adava, ov pišingja: „Me kergjum poviše buti“ (2. Kor. 11:23). Slično sar o Pavle, na valjani te bistra kaj o Jehova najviše so ceninela tano amaro trudo hem istrajnost.

8. So na valjani te bistra baši amari služba?

⁸ Amari služba kerela e Jehova bahtalo. O Isus bičhalgja 70 učenikon te propovedinen o haberi bašo Carstvo, hem keda irangje pe tari služba ola „sine but bahtale“. Soske sine bahtale? Ola vakergje: „Čak o demonija šunena amen keda naredinaja lenge ko tlo anav“. Ama, o Isus isprajngja lengoro razmisluvanje keda vakergja lenge: „Ma oven bahtale adaleske so o duhija šunena tumen, nego oven bahtale soske tumare anava tane pišime ko nebo“ (Luka 10:17-20). O Isus džanlja kaj nane sekogaš te nakhen doborom šukar ki služba. Ustvari, amen ni na džanaja kobor džene taro adala manuša so šungje e učenikon ule hristijanja. Ola na valjani sine te oven bahtale samo keda o javera ka šunen len. Nego soj považno, lengoro bahtalipe valjani sine te avel taro adava so džanena kaj o Jehova tano zadovolno taro lengoro trudo so dena le sine.

9. Sprema Galatite 6:7-9, so ka dobina ako istrajnaja ki amari služba?

⁹ Ako istrajnaja ki amari služba ka dobina večno životo. Džikote sejnaja o seme e čačipaskoro, amen „sejnaja ko duho“. Soske vakeraja agjaar? Keda džaja ki služba, amen dozvolinaja e Devleskoro duh te vodinel amen. Sa džikote na „otkažinaja amen“ ili na „umorinaja amen“, o Jehova vetinela amenge kaj ka del amen večno životo, bizi razlika dali pomožingjem nekaske te krstinel pe ili na. (Čitin Galatite 6:7-9.)

10. Taro so zavisinela dali o manuša ka šunen amen ki služba?

¹⁰ Dali o manuša ka prifatinen o čačipe ili na but zavisinela taro lengoro stavi ko vilo. O Isus objasningja akava ki pli sporedba bašo sejači. Akava manuš sejngja seme ko različna vrste phuv, ama samo o seme so pelo ki šukar phuv dengja plodi (Luka 8:5-8). O Isus vakergja kaj o različna vrste phuv pretstavinena e manušen kolengere vile različno reagirinena ko čačipe (Luka 8:11-15). Slično sar o sejači, amen nane amen kontrola upro plodi, adava zavisinela taro e manušengoro vilo. Amari odgovornost tani ponadari da te sejna o seme bašo Carstvo. Sar so vakergja o Pavle: „Sekoj ka dobinel pli nagrada bašo plo trudo“, a na bašo rezultati taro adava trudo (1. Kor. 3:8).

11. Soske o Noe sine uspešno propovedniko? (Dikh i slika ki naslovno strana.)

¹¹ E Jehovaskere sluge taro purano vreme propovedinena sine manušenge so na mangle te šunen. Na primer, o Noe „propovedinela sine i pravednost“, verojatno 40 ili 50 berš (2. Pet. 2:5). Sigurno ov očekujnela sine o javera te šunen le, ama o Jehova na vakergja leske kaj adava ka slučinel pe. Namesto adava, keda dengja le upatstvija sar te gradinel i arka, o Devel vakergja leske: „Khuv ki arka, tu, tli romni, te čhave hem te čhavengere romnja“ (1. Moj. 6:18). Hem keda vakergja leske kobor bari valjani sine te ovel i arka, o Noe verojatno halilo kaj nane but manuša te šunen le, soske nane te ovel sine bute dženenge than (1. Moj. 6:15). Hem čače sine agjaar, nijekh manuš taro adava nasilno sveto na šungja e Noe (1. Moj. 7:7). Dali o Jehova mislingja kaj o Noe na  uspejngja ki pli zadača? Ni hari. Anglo e Devleskere jakhja, o Noe sine uspešno propovedniko, soske ov verno kergja sa adava so rodingja lestar o Jehova te kerel (1. Moj. 6:22).

12. Sar ačhilo o Eremija bahtalo ki služba iako o manuša na šunena le sine hem sine protiv leste?

¹² O proroko o Eremija isto agjaar propovedingja poviše taro 40 berš, iako o manuša na mangle te šunen le hem protivinena pe sine leske. Ov doborom sine obeshrabrimo taro lengoro „asajbe hem vredžiba“ so manglja čak te otkažinel pe tari pli zadača (Erem. 20:8, 9). Ama o Eremija na otkažingja pe! So pomožingja leske te prodolžinel hem te ovel bahtalo ki služba? Ov koncentriringja pe ko duj važna bukja. Prvo, o Eremija vakerela sine e narodoske haberi kova so dela len sine nadež (Erem. 29:11). Dujto, o Jehova biringja le te kerel lafi leske ko anav (Erem. 15:16). Amen da avdive vakeraja haberi kova so dela nadež e manušenge, hem phiravaja e Jehovaskoro anav sar leskere Svedokija. Keda koncentririnaja amen ko akala duj važna bukja, amen šaj te ova bahtale, bizi razlika sar ka reagirinen o manuša.

13. So sikljovaja tari e Isuseskiri sporedba soj pišimi ko Marko 4:26-29?

¹³ Valjani vreme te šaj nekoj duhovno te napredujnel. O Isus objasningja akava fakti ki pli sporedba bašo sejači so sovela. (Čitin Marko 4:26-29.) O plodi taro e sejačeskoro trudo dikhjola pe sine hari pohari, hem na sine le kontrola upro adava kobor sigate ka bajrol. Tu da šaj ka valjani te adžikere but vreme te šaj te dikhe sar tlo interesenti primeninela adava so sikljovela. Isto sar jekh zemjodelco so našti te kerel silaja te bajrol adava so sejngja, amen da našti silaja te čhiva e interesente te napredujne doborom sigate kobor so mangaja. Adaleske, ma obeshrabrin tut, ili ma otkažin tut ako ola na napredujnena doborom sigate kobor so očekujngjan. Isto sar o zemjodelco, amen da valjani te ova strpliva (Jak. 5:7, 8).

14. Kova iskustvo sikavela kaj ponekogaš valjani te nakhel vreme te šaj te dikha o rezultatija tari amari služba?

¹⁴ Ko nesave podračja valjani te nakhel but vreme angleder te dikha o rezultatija tari amari služba. Razmislin bašo iskustvo e duje phenjengoro, i Gledis hem i Rubi Alen. Ola ko 1959 berš, sine dodelime te služinen sar opšta pionerija ki jekh diz ki Kanadsko provincija ko Kvebek. * Adaleske so but džene ladžana sine taro komšie hem darana sine so ka vakerel ili so ka kerel o svešteniko, but džene na mangena sine te šunen. I Gledis vakerela: „Duj berš džaja sine taro kher ko kher ofto saatija ko dive, ama nikoj na phravgja amenge o udar. O manuša avena sine dži ko udara hem phandena sine o roletne. Ama amen na otkažingjem amen“. Sar nakhela sine o vreme, o manuša kovlile hem počmingje te šunen amen. Akana ki adaja diz isi trin sobranija (Isa. 60:22).

15. So sikljovaja taro 1. Korinkjanite 3:6, 7, baši zadača te kerel pe učenikija?

¹⁵ Te šaj te keren pe učenikija valjani poviše džene te trudinen pe. Vakerela pe kaj te šaj nekoj te krstinel pe valjani celo sobranie te pomožinel. (Čitin 1. Korinkjanite 3:6, 7.) Na primer, jekh phral šaj mukhlja traktati ili spisanie nekaske so sikavela interes. Ama, o phral našti te džal te posetinel le ko vreme so odgovorinela e manušeske, adaleske zamolinela  javere phrale te džal ki adaja poseta. Adava phral počminela te proučinel e manušea, hem isto agjaar lela javere objavitelen ki adaja studija. A sekova jekh taro objavitelija ko različno način ohrabrinena e interesente. Agjaar, sekova phral ili phen kas so zapoznajnela o interesenti, pomožinela te čhivel pe pani ko seme e čačipaskoro. Hem tegani, sar so vakergja o Isus, hem o sejači hem okova so khedela, zaedno šaj te oven bahtale ki duhovno žetva (Jovan 4:35-38).

16. Soske šaj te ove bahtalo ki tli služba, čak ako tlo sastipe nane šukar ili nane tut dovolno sila?

¹⁶ Šaj našti propovedinea ili kerea učenikija doborom kobor so mangea, soske tlo sastipe nane šukar ili nane tut dovolno sila. Sepak, tu šaj te ove bahtalo bašo tlo delo so dea. Razmislin bašo biblisko izveštaj keda o cari o David hem leskere manuša spasingje pumare familien hem irangje pumaro imot taro Amaličanja. Dujšel taro leskere manuša našti sine te džan lea ki borba soske sine but umorna hem ačhile te arakhen o bukja so sine len. Otkeda pobedingje ki adaja borba, o David naredingja sarinenge te del pe isto delo taro bukja so lele len (1. Sam. 30:21-25). Akava izveštaj sikavela amen nešto baši amari zadača so isi amen te kera učenikija. Sarine so dena plo najšukar šaj isto te oven bahtale keda pomožinela pe nekaske te zapoznajnel e Jehova hem te krstinel pe.

17. Soske valjani te ova blagodarna e Jehovaske?

¹⁷ Blagodarna siem e Jehovaske bašo način sar dikhela ki amari služba. Ov džanela kaj nane amen kontrola upro adava dali o manuša ka šunen hem ka počminen te obožavinen le. Ama, ov dikhela kaj trudinaja amen, kaj but mangaja le hem nagradinela amen bašo adava. Isto agjaar, sikavela amen sar te ova bahtale bašo amaro delo so daja le ki služba (Jovan 14:12). Šaj te ova sigurna kaj o Jehova ka ovel zadovolno amendar, sa džikote na otkažinaja amen!