1. Sose hijam bahtale?

BUT hijam bahtale so hijam e Jehovase svedokija. Amen akharaja e Devleso anav hem odoleja so propovedinaja hem sikavaja averen, mothovaja so hijam olese Svedokija. But bahtale hijam ked šaj te pomožina nekase ko isi le „ispravno stav premalo večno životi“ te ovel e Isuseso učenik (Dela 13:48). Osetinaja amen sar o Isus kova hine but bahtalo ked olese učenikija irinđe pe andi služba hem ked phenđe lese so hine len but šuže iskustvija (Luka 10:1, 17, 21).

2. Sar mothovaja soj tani amenđe važno i služba?

² Amari služba tani amenđe but važno. O Pavle phenđa e Timotejese: „Pazin šukar sar živineja hem sar sikaveja... sose ked ćereja odova ka spasine hem tut hem okolen so šunena tut“ (1. Tim. 4:16). Amari služba šaj te spasini e manušengo životi. Amen birinđam o Devel te ovel amaro vladari hem odolese pazinaja sar živinaja. Na mangaja te lađaćera e Devleso anav odoleja so ćeraja hem ićeraja amen ko odova so sikavaja averen (Fil. 1:27). Amen mothovaja so pazinaja sar sikavaja ađahar so šukar pripreminaja amen asi služba hem angleder te đa ki služba molinaja e Jehova te pomožini amen.

3. Da li sa o manuša ka prihvatinen i šukar vest? Vaćer jekh primer.

³ Čak hem ked daja sa amendar ki služba, but manuša šaj na ka mangen te šunen i šukar vest. Te dikha o primer ando amaro phral o Georg Lindal, kova kokri propovedinđa ko Island, kotar 1929. đi o 1947. berš. Iako dinđa nekobor hiljade ando amare publikacije, nijekh manuš na ulo e Jehovaso svedoko. Ov pisinđa: „Disave hine protivnikija,  ama but olendar samo na hine zainteresime.“ Čak hem ked alje o misionarija andi škola Galad, tek palo enja berš disave manuša ko Island predajinđe po životi e Jehovase hem krstinđe pe. *

4. Sar osetinaja amen ked o manuša na mangena te šunen i šukar vest?

⁴ Ked o manuša na mangena te šunen i šukar vest, amen šaj te obeshrabrina amen. Tegani, šaj osetinaja amen sar o apostol Pavle kova hine le „bari tuga hem dukh koja na nakhela“, odolese so disave Jevreja na verujinđe so o Isus tano o Mesija (Rimlj. 9:1-3). So ako proučineja nekasa ko na ćerela promene ko po životi, iako but trudineja tut hem molineja tut e Jehovase te pomožini lese? Hem so ako valjani te ćhinave o kurs? Ja so ako niked na proučinđan nekasa ko reslja đi o krštenje? Da li valjani te misline so tu hijan krivo hem so o Jehova nane zadovoljno odoleja so ćereja? Ko akava članko, ka dobina odgovor ko duj pućiba: (1) So mothovi so amari služba tani uspešno? (2) So valjani te očekujina ked propovedinaja e manušenđe?

5. Da li uvek sa ka ovel ađahar sar so amen mangljam?

⁵ I Biblija phenela so o manuš kova ćerela e Jehovasi volja „ka ovel uspešno“ (Ps. 1:3). Ama, odova na značini so sa ka ovel ađahar sar so ov mangela. Sose odova phenaja? Sar prvo, sar o manuša ko akava sveto hem amen hijam nesavršena. Odolese, isi amen problemija kola šaj te ćhinaven amen te ćera e Jehovase sa so mangaja (Jov 14:1). Sar dujto, podijekh puti o manuša šaj te zabraninen amare aktivnostija hem ađahar te ćhinaven amen te propovedina odobor kobor bi mangaja (1. Kor. 16:9; 1. Sol. 2:18). Odolese, sose šaj te phena so anglo e Devlese jaćha hijam uspešna ked ćeraja odova so ov mangela? Akana ka dikha disave načelija kola ka pomožinen amen te dobina odgovor ko odova pućibe.

6. Ked anglo e Jehovase jaćha amari služba tani uspešno?

⁶ O Jehova dikhela to trud hem ti istrajnost. Anglo e Jehovase jaćha amari služba tani uspešno ked revno propovedinaja, odolese so mangaja le, čak iako o manuša na mangena te šunen amen. O Pavle phenđa: „O Devel nane nepravedno te bistrel odova so ćerđen hem o mangipe kova mothovđen premalo oleso anav, ađahar so služinđen okolenđe kola tane sveta hem so pana služinena olenđe“ (Jevr. 6:10). O Jehova na bistrela to trud hem to mangipe, čak iako niked na proučinđan nekasa ko reslja đi o krštenje. Odova so o Pavle pisinđa e hrišćanenđe ko Korint odnosini pe  hem upro tute: „I buti koja ćereja e Jehovase na ka aćhol bizi nagrada“, čak iako ko krajo na hine ađahar sar so mangljan (1. Kor. 15:58).

7. So sikljovaja ando odova so o apostol Pavle phenđa andi pi služba?

⁷ O apostol Pavle hine but šukar misionari. Ko but dizja osnujinđa neve skupštine. Ama, ked disave manuša kritikujinđe le hem phenđe so nane šukar učitelj, ov na vaćerđa so pomožinđa bute manušenđe te oven e Hristese učenikija. Umesto odova, ov phenđa so ćerđa but buća (2. Kor. 11:23). Sar o Pavle, ni amen na valjani te bistra so o Jehova cenini amaro trud hem amari istrajnost.

8. So valjani te ićera ki godi đi ćeraja amari služba?

⁸ Amari služba ćerela e Jehova bahtalo. Ked o Isus bićhalđa o 70 učenikija te propovedinen i šukar vest, on irinđe pe bahtale. Sose hine bahtale? On phenđe: „Čak hem o demonija šunena amen ked koristinaja to anav.“ Ama, o Isus phenđa lenđe: „Ma radujinen tumen sose o demonija šunena tumen, nego radujinen tumen sose tumaro anav tano pisimo ko nebo“ (Luka 10:17-20). O Isus đanđa so na ka ovel len uvek asavke šuže iskustvija ki služba. U stvari, amen ni na đanaja kobor ando odola manuša ulje e Hristese učenikija. On valjanđe te haljon so na valjani te oven bahtale sebepi so o manuša šunena len, već odolese so olengi služba ćerela e Jehova bahtalo.

9. Premalo Galatima 6:7-9, so ka dobina ako istrajinaja ki amari služba?

⁹ Ako istrajinaja ki amari služba, ka ovel amen večno životi. Ked daja sa amendar te propovedina hem te sikava averen, amen „sejinaja ko duho“ ađahar so dozvolinaja e Devleso duho te utičini upro amaro životi. O Jehova dela amen po lafi so ka dobina večno životi, čak iako nikase na pomožinđam te resel đi o krštenje. (Čitin Galatima 6:7-9.)

10. Sose disave manuša šunena i šukar vest, a avera na šunena?

¹⁰ Ando manuša zavisini da li ka prihvatinen i šukar vest. O Isus objasninđa odova ko poređenje ando sejači kova sejini o seme ko različita vrste kotar i phuv. Ama, samo i šukar phuv dinđa po plod (Luka 8:5-8). O Isus phenđa so o različita vrste kotar i phuv predstavinena e manušen kola različito reagujinena ked šunena i šukar vest (Luka 8:11-15). Sar o sejači, ni amen našti te utičina ko odova da li o manuša ka prihvatinen i šukar vest sose odova zavisini samo olendar. Amari odgovornost tani te sejina o seme ando Kraljevstvo. O Pavle phenđa so „svako ka dobini pi nagrada premalo po trud“, a na premalo rezultatija (1. Kor. 3:8).

11. Sose o Noje hine šukar „propovednik andi pravednost?“ (Dikh i slika ki naslovno strana.)

¹¹ Ko purano vreme, e Jehovase sluge propovedinđe e manušenđe kola na manglje te šunen. Na primer, o Noje beršencar hine „propovednik andi pravednost“ (2. Petr. 2:5). Ov nadinđa pe so o manuša ka šunen, ama o Jehova na phenđa so ka ovel ađahar. Umesto odova, ked vaćerđa lese te ćerel i arka, o Devel phenđa lese: „Khuv ki arka te ćhavencar, te romnjaja hem e romnjencar ando te ćhave“ (Post. 6:18). Ked phenđa lese kobor i arka valjani  te ovel bari, o Noje šaj haljilo so na ka šunen le but manuša (Post. 6:15). Sar so đanaja, nijekh manuš na šunđa le (Post. 7:7). Da li o Jehova mislinđa so o Noje na propovedinđa dovoljno? Naravno so na. Anglo e Devlese jaćha, o Noje but šukar ćerđa pi buti sose ćerđa sa so o Jehova phenđa lese te ćerel (Post. 6:22).

12. Sose o Jeremija hine bahtalo iako o manuša na manglje te šunen hem protivinđe pe olese?

¹² Isto ađahar, o prorok Jeremija beršencar propovedinđa e manušenđe kola na manglje te šunen hem kola protivinđe pe olese. Jekh vreme, ov hine odobor obeshrabrimo, sebepi so vređinđe le hem marđe lese muj, so više na manglja te propovedini (Jer. 20:8, 9). Ama, ov hem ponodri propovedinđa. So pomožinđa lese hem ponodri te propovedini hem te aćhol bahtalo? Ov razmislinđa ando duj važna buća. Sar prvo, e Devlesi poruka koja ov propovedinđa valjanđa te pomožini e manušenđe te haljon so ađićeri len diso pošukar (Jer. 29:11). Sar dujto, o Jehova birinđa e Jeremija te vaćeri ko oleso anav e manušenđe (Jer. 15:16). Isto ađahar, hem amen propovedinaja i poruka koja dela nada e manušenđe hem akharaja oleso anav. Ked razmislinaja ando akala duj buća, amen hijam bahtale, čak iako o manuša na mangena te prihvatinen i šukar vest.

13. So sikljovaja ando e Isuseso poređenje ando Marko 4:26-29?

¹³ Valjani vreme te šaj neko te ovel le vera. O Isus objasninđa odova ko poređenje ando sejači kova sovela. (Čitin Marko 4:26-29.) Palo odova so o sejači sejini o seme, odova seme barjola hari pohari. Ov našti te utičini upro odova kobor sigate o seme ka barjol. Isto ađahar, hem amen šaj ka valjani te ađićera but vreme te šaj i osoba te primenini odova so sikljola. Sar so o zemljoradniko našti zorjeja te ćhivel o biljke sigate te barjon, ađahar ni amen našti zorjeja te ćhiva e manušen sigate te napredujinen. Odolese, na obeshrabrinaja amen hem na vazdaja amare vasta olendar ako on na napredujinena sigate. Sar o zemljoradniko, hem amen strpljivo ađićeraja sa đi i osoba kokri na odlučini te služini e Jehovase (Jak. 5:7, 8).

14. Sar akava primer mothovi so e manušenđe valjani vreme te menjinen po stav?

¹⁴ Ko disave thana, e manušenđe valjani but vreme te aven đi o krštenje. Te dikha o primer andi Gledis hem Rubi Alen. Ko 1959. berš, on duj dobinđe te služinen sar stalna pionirija ki jekh diz ki Kanada, ko Kvibek. * O manuša uduri darandilje so ka phenen olenge komšije hem o sveštenikija hem odolese na manglje te vaćeren olencar. I Gledis phenela: „Svako dive, duj berš đeljam po ofto satija kotar ćher ko ćher, ama niko na manglja te šunel amen. O manuša bi avena đi o udara, bi dikhena amen hem na bi phravena. Ama, amen hem ponodri propovedinđam.“ Sar đelo o vreme, o manuša menjinđe pe hem počminđe te šunen i šukar vest. Akana, ko odova than isi trin skupštine (Is. 60:22).

15. So sikljovaja andi 1. Korinćanima 3:6, 7?

¹⁵ Našti samo jekh manuš te pomožini nekase te ovel e Isuseso učenik. Sa o phralja hem o phenja šaj te pomožinen nekase te krstini pe. (Čitin 1. Korinćanima 3:6, 7.) Na primer, jekh objavitelj dela jekh traktati  ja časopis jekhe zainteresime manušese. Palo odova, ov haljilo so na ka ovel le vreme te đal ko odova manuš. Odolese, pućela jekhe avere objavitelje te đal koro leste. Odova objavitelj počmini te proučini odole manušeja. Sar đala o vreme, ov vićini bute phralen hem phenjen ko odova kurs hem svako olendar ohrabrini odole manuše ko različita načinija. On pomožinena le pobuter te sikljol ando Jehova. Ađahar, sare kola pomožinđe le šaj te radujinen pe ked ov ka krstini pe (Jov. 4:35-38).

16. Sose šaj te ove bahtalo iako akana našti te propovedine sar angleder?

¹⁶ So ako sebepi to sastipe ja sebepi so više nane tut snaga našti te propovedine sar angleder? Ipak, šaj te ove bahtalo sebepi o buća kola šaj te ćere. Te dikha so ćerđe o David hem olese manuša ked đelje te spasinen pe porodicen hem te len pe buća ando Amaličanija. Dušel manuša hine but ćhinde hem odolese aćhilje te arakhen o buća. Ama, o David hem avera manuša đelje ko maribe. On pobedinđe hem lelje but vredna buća. Palo odova, o David phenđa so odova so lelje valjani te del pe hem okolenđe so đelje te borinen pe hem okolenđe so aćhilje te arakhen o buća (1. Sam. 30:21-25). Ando akava izveštaj sikljovaja diso andi amari služba. Šaj akana sebepi to sastipe našti te propovedine sar angleder. Ama, ako ćereja sa so šaj hem tu šaj te radujine tut ked neko krstini pe.

17. Sose valjani te ova zahvalna e Jehovase?

¹⁷ Amen hijam zahvalna e Jehovase sebepi odova sar ov dikhela ki amari služba. Ov đanela so amen našti zorjeja te ćhiva e manušen te prihvatinen i šukar vest hem te služinen olese. Ama, ov dikhela kobor trudinaja amen hem kobor mangaja le hem odolese ka nagradini amen. Sikavi amen sar te ova bahtale bizo obzir kobor šaj te ćera ki amari služba (Jov. 14:12). Šaj te ova sigurna so o Jehova ka ovel zadovoljno amencar ako na ćhinavaja te ćera odova soj tano šukar.