1. Καγιά χαρά ντα καβά προνόμιος τθεράσα;

ΣΟ ΜΠΑΡΙ χαρά ντα σο μπαρό προνόμιος τθεράσα τι αβάς Μάρτυρες ι Ιεχωβάσκε! Ισινάμ υπηρέτες ι Ιεχωβάσκε ντα σικαβάσα ότι ισινάμ λέσκε Μάρτυρες κάνα κεράσα λάφι κο τζενέ ι Ντεβλέσκε ντα σικλιαράσα-λεν λέσκε. Αβέλα αμαρό γκι κάνα βοηθίνασα εκχέ τζενές “σο λέσκο γκι μανγκέλα τι σικλιόλ ι αλήθεια σο ντέλα ζωή για πάντα” τι πακιάλ. (Πράξ. 13:​48) Νιωθίνασα σαρ ο Ιησούς, σο «νιωσάλο μπουτ χαρούμενος επειδή τθερέλας ο άγιος πνεύμας» κάνα λέσκε μαθητές βακερντέ λέσκε καζόμ λατσσές γκιλέ-λεν κο έργος.​—Λουκ. 10:1, 17, 21.

2. Σαρ κα σικαβάς ότι ο έργος σο κεράσα ισί μπουτ σημαντικός αμένγκε;

² Ο έργος σο κεράσα ισί μπουτ σημαντικός αμένγκε. Ο απόστολος Παύλος βακερντάς ι Τιμοθεόσκε: «Μα τσσίναβ τι ντες προσοχή κο πράγματα σο τθερένα σχέση τι νεαυτόσαρ ντα με το τρόπος σο σικλιαρέσα». Σοράν ανταλέσταρ ο Παύλος βακερντάς: «Άμα κα κερές-λες ανταβά κα σώνες εμ τουτ εμ οντουλέν σο ασουνένα-τουτ». (1 Τιμ. 4:​16) Οτθάρ, αμαρό έργος σώνελα ζωές. Να τσσιναβάσα τι ντας προσοχή κο πράγματα σο τθερένα σχέση αμαρέ νεαυτόσαρ σόσκε ισινάμ τελάλ κατά Βασιλεία ι Ντεβλέσκι. Πρέπει πάντα οντουλά σο κεράσα τι δοξάνεν ι Ιεχωβάς ντα τι σικαβέν ότι πακιάσα ο λατσσέ αμπέρια σο βακεράσα. (Φιλιπ. 1:​27) Σικαβάσα ότι “ντάσα προσοχή κο πράγματα σο τθερένα σχέση με το τρόπος σο σικλιαράσα” κάνα προετοιμάνασα-αμέν λατσσές ι εργόσκε ντα κάνα μανγκάσα βοήθεια κατά Ιεχωβά πριν τι κεράς λάφι κο γιαβερά.

3. Κα ασουνέν σαρέ ο τζενέ ο λατσσέ αμπέρια ι Βασιλειάκε; Βακερέν εκ παράδειγμας.

³ Ατζέ-ντα κάνα κεράσα ο πο λατσσό κο έργος, μπουτ τζενέ αμαρέ τθανέστε μπέκιμ να μανγκένα τι ασουνέν ο λατσσέ  αμπέρια ι Βασιλειάκε. Ανέν τουμαρέ γκοντιάτε ι πφραλές Γκέιοργκ Λίνταλ, σο κερέλας έργος κορκορό σαρί κι Ισλανδία κατά 1929 μέχρι κο 1947. Ντινάς χιλιάδες έντυπα, αλλά καέκ τζενό να σικλιλό ι αλήθεια. Βοβ βακερντάς: «Ισί τζενέ σο ντικχίντιβελα ότι τζάνα κόντρα κι αλήθεια, αλλά ο πο μπουτ λένταρ απλώς να μανγκένα τι ασουνέν». Ατζέ-ντα αφού γκιλέ οτθέ ιεραπόστολοι κατά Γαλαάδ για τι βοηθίνεν κο έργος, νακχλέ ατζέκ εννιά μπρεσά μέχρι μερικοί Ισλανδοί τι ντεν πουμαρό λάφι τι τζουβντιόν ι Ιεχωβάσκε ντα τι μπολντιόν. *

4. Σαρ μπέκιμ τι νιωθίνασα κάνα ο τζενέ να ασουνένα ο λατσσέ αμπέρια;

⁴ Πφανγκιόλα αμαρό γκι κάνα ο τζενέ να ασουνένα ο λατσσέ αμπέρια. Μπέκιμ τι νιωθίνασα σαρ ο Παύλος, σο τθερέλας “μπαρί στεναχώρια ντα η ντουκχ να νασέλας λέσκε γκίσταρ” σόσκε ο πο μπουτ Ιουδαίοι να μανγκένας τι πακιάν ότι ο Ιησούς ισινέ ο Μεσσίας. (Ρωμ. 9:​1-3) Σο αβέλα-πες άμα, παρόλο σο μαρένα-τουμέν τι σικλιαρέν λατσσές ντα προσευχίντιβενα μπουτ ι τζενέσκε σο κερένα-λες μελέτη, βοβ να κερέλα οντουλά σο σικλιόλα ντα πρέπει τι τσσιναβέν τι κερέν-λες μελέτη; Ή σο κα βακεράς άμα να βοηθιντέν καεκχέ τζενές τι ερεσέλ κο μπολντιπέ; Μήπως ανταβά μανγκέλα τι βακερέλ ότι πρέπει τι χαν-τουμέν ο τύψεις, ντα ότι ο Ιεχωβά να ευλογιντάς τουμαρό έργος; Ανταλέ μαθημάστε, κα ντικχάς ντούι ερωτήσεις: (1) Σο σικαβέλα ότι τζάλα λατσσές ο έργος σο κεράσα; (2) Σο πρέπει τι μπεκλεντίνας κάνα κεράσα έργος;

5. Σόσκε ο έργος σο κεράσα ι Ιεχωβάσκε μπέκιμ μα τι τζάλα κάθε φαρ αντικάς σαρ μπεκλεντίναας;

⁵ Η Γραφή βακερέλα ι τζενέσκε σο κερέλα οντουβά σο μανγκέλα ο Ντεβέλ: «Σο-ντα κερέλα βοβ κα τζαλ λατσσές». (Ψαλμ. 1:3) Όμως, ανταβά να μανγκέλα τι βακερέλ ότι σο-ντα κεράσα ι Ιεχωβάσκε κα τζαλ αντικάς σαρ μανγκάσα. Ι τζενένγκι ζωή ισί πφερντί βάσανα κατά αμαρτία σο τθεράσα εμ αμέν εμ ο γιαβερά. (Ιώβ 14:1) Επίσης, οντουλά σο τζάνα αμέντζαρ κόντρα μπέκιμ για χάνικ βακίτι τι τσσιναβέν-αμέν τι κεράς ο έργος αντικάς σαρ ισινάμ σικλέ τι κεράς-λες. (1 Κορ. 16:9· 1 Θεσ. 2:​18) Αφού ισί αντικάς, σαρ αποφασίνελα ο Ιεχωβά άμα τζάλα λατσσές αμαρό έργος; Ντικχέν χάνικ αρχές ι Γραφιάκε σο βοηθίνενα-αμέν τι απαντίνας ανταλέ ερωτησιάτε.

6. Σαρ αποφασίνελα ο Ιεχωβά άμα τζάλα λατσσές ο έργος σο κεράσα λέσκε;

⁶ Ο Ιεχωβά ντικχέλα οντουλά σο κεράσα ντα αμαρί υπομονή. Αβέλα ο γκι ι Ιεχωβάσκο κάνα κεράσα έργος αντράλ αμαρέ γκίσταρ επειδή μανγκάσα-λες, ατζέ-ντα άμα ο τζενέ να μανγκένα τι ασουνέν. Ο Παύλος γραφιντάς: «Ο Ντεβέλ νανέ άδικος για τι μπιστρέλ οντουλά σο κερντέν ντα ι αγάπη σο σικαντέν λέσκε ναβέσκε, αφού υπηρετιντέν ντα συνεχίνενα τι υπηρετίνεν ι αγιόν». (Εβρ. 6:​10) Ο Ιεχωβά ντέλα-πες γκοντί αμαρό έργος  ντα αμαρί αγάπη, ατζέ-ντα άμα κεράσα μελέτη εκχέ τζενές σο να μπολντιόλα. Άρα, οντουβά σο βακερντάς ο Παύλος κο Χριστιανοί ισί μπαγιά τουμένγκε-ντα: «Τζανένα ότι να μαρένα-τουμέν ι Κυριόσκε σινανέ», ατζέ-ντα άμα οντουβά σο κερένας νανέ οντουβά σο μπεκλεντίνενας.​—1 Κορ. 15:58.

7. Σο σικλιάσα οντουλένταρ σο βακερντάς ο απόστολος Παύλος ι εργόσκε σο κερέλας;

⁷ Ο απόστολος Παύλος ισινέ εκ μπουτ λατσσό ιεραπόστολος, σο κερντάς νεβέ κχανγκιριά μπουτέ τθανέντε. Αλλά κάνα μερικά τζενέ πρασάνας ι Παυλός ντα βακερένας ότι να σικλιαρέλας λατσσές, βοβ να βακερντάς καζόμ μπουτέ τζενέν βοηθιντάας τι αβέν Χριστιανοί. Οκιά μπάνταρ, ο Παύλος γραφιντάς: «Κερντόμ πο μπουτ έργος». (2 Κορ. 11:​23) Σαρ ο Παύλος, πρέπει τι ντας-αμέν γκοντί ότι ο πο σημαντικός ι Ιεχωβάσκε ισί τι κεράς σο νακχέλα αμαρέ βαστένταρ ντα τι κεράς υπομονή.

8. Σο πρέπει τι ντας-αμέν γκοντί ι εργόσκε σο κεράσα;

⁸ Αμαρό έργος κερέλα ο γκι ι Ιεχωβάσκο. Ο Ιησούς μπουτσσαντάς 70 μαθητέν τι βακερέν ι Βασιλειάκε, ντα βον «βουρτισάλε χαράσαρ». Σόσκε ισινέ αζόμ χαρούμενοι; Βακερντέ: «Ατζέ-ντα ο δαίμονες ντένα-αμέν καν κάνα βακεράσα λένγκε το ναβ». Όμως, ο Ιησούς ακαλέ λαφίντζαρ σικαντάς λένγκε ότι να ισινέ σωστός ανταβά: «Μα χαιρίνεν επειδή ο δαίμονες ντένα-τουμέν καν, αλλά τι χαιρίνεν επειδή τουμαρέ ναβά γραφισάλε κο ουρανός». (Λουκ. 10:​17-20) Ο Ιησούς τζανέλας ότι να κα αβέλας-πες πάντα ανταβά λένγκε εργόστε. Ντα ισί μπαγιά ότι να τζανάσα καζόμ τζενέ οντουλένταρ σο κερντέας λένγκε λάφι ο μαθητές ι Ιησούσκε αβιλέ Χριστιανοί. Ο μαθητές έπρεπε τι αγαβέν ότι να κα αβένας χαρούμενοι σάντε κάνα κα ασουνένας-λεν ο τζενέ. Ι πο μπαρί χαρά κα τθερένας-λα, άμα κα τζανένας ότι αβιλό ο γκι ι Ιεχωβάσκο σαρέ οντουλένταρ σο κερντέ.

9. Σο βακερένα ο εδάφια Γαλάτες 6:​7-9 ότι κα αβέλ-πες άμα να τσσιναβάσα τι κεράς έργος;

⁹ Άμα να τσσιναβάσα τι κεράς έργος, κα τθεράς ζωή για πάντα. Καζόμ κεράσα ο πο λατσσό για τι βακεράς ντα τι σικλιαράς ο λατσσέ αμπέρια, “τθεράσα αμαρέ γκοντιάτε ο πνεύμας” ντα αντικάς μουκχάσα ο άγιος πνεύμας ι Ντεβλέσκο τι κερέλ μπουτί αμαρέ ζωγιάτε. Άμα να κα «τσσιναβάς», ή γιαβέρσοϊ «να κα παρατίνας-λεν», ο Ιεχωβά ντέλα-αμέν πο λάφι ότι κα τθεράς ζωή για πάντα, ατζέ-ντα άμα να βοηθιντάμ καεκχέ τζενές τι μπολντιόλ.​—Διαβάνεν Γαλάτες 6:​7-9.

10. Σόσκε μερικά τζενέ ασουνένα οντουλά σο βακεράσα λένγκε ντα γιαβερά να ασουνένα;

¹⁰ Κι τζενένγκε βαστά ισί άμα κα ασουνέν ι αλήθεια ή να κα ασουνέν-λα. Ο Ιησούς βακερντάς ανταγιά αλήθεια κι ιστορία κι τζενέσκι σο τσσουντάς σπόρους σαβέ τι μανγκές τθανέντε κι τσικ, αλλά σάντε εκ σπόρος νικαντάς καρπός. (Λουκ. 8:​5-8) Κάνα ο Ιησούς κερντάς λάφι ανταλέσκε, μανγκέλας τι σικαβέλ ότι ο γκι ι κάθε τζενέσκο επηρεάντιβελα γιαβέρτουλους κατά «λάφι ι Ντεβλέσκο». (Λουκ. 8:​11-15) Σαρ ο τζενό σο σπειρίνελα, αντικάς αμέν-ντα ναστί κεράσα κάτι για τι μπαριαράς κο γκι κι τζενένγκο οντουλά σο βακερντάμ λένγκε. Αμαρί μπουτί ισί μα τι τσσιναβάς τι σπειρίνας ο λατσσό σπόρος ι Βασιλειάκο. Σαρ βακερντάς ο απόστολος Παύλος, «ο κάθε εκ κα λελ οντουβά σο αξίνελα λέσκε ανάλογα πι προσπαθειάσαρ», όχι ανάλογα με το αποτελέσματα σο κα τθερέν λέσκε προσπάθειες.​—1 Κορ. 3:8.

11. Σόσκε ισινέ ο Ιεχωβά μπουτ ευχαριστιμέ ι Νωέσαρ παρόλο σο ο τζενέ να ασουντέ-λες; (Ντικχέν ι φωτογραφία κι ανγκλαϊνί σελίδα)

¹¹ Κατά πουρανέ μπρεσά, μπουτ υπηρέτες ι Ιεχωβάσκε κερένας έργος τζενέντε σο να μανγκένας τι ασουνέν. Για παράδειγμας, ο Νώε «κερέλας λάφι για το δίκαια πράγματα  ι Ντεβλέσκε» 40 ή 50 μπρεσά. (2 Πέτρ. 2:5) Σίγουρα, μπεκλεντίνελας ότι κα ασουνένας-λες, αλλά ο Ιεχωβά να βακερντάς λέσκε ότι κα αβέλας-πες ανταβά. Οκιά μπάνταρ, κάνα βακερντάς κο Νώε τι κερέλ ι κιβωτός, βακερντάς λέσκε: «Πρέπει τι τσσουβές-τουτ αντρέ κι κιβωτός​—τούι, το τσσαβέ, τι ρομνί ντα ο ρομνιά τι τσσαβένγκε γιεκ τούσαρ». (Γέν. 6:​18) Ντα κάνα βακερντάς λέσκε ο Ιεχωβά καζόμ μπαρί τι κερέλ ι κιβωτός, ο Νώε μπέκιμ τι αγαντάς ότι να κα ασουνένας-λες μπουτ τζενέ σόσκε η κιβωτός να κα τθερέλας τθαν μπουτέ τζενένγκε. (Γέν. 6:​15) Σαρ τζανάσα, καέκ τζενό να ασουντάς ι Νωές. (Γέν. 7:7) Μήπως ο Ιεχωβά πακιάλας ότι ο Νώε να κερντάς αζόμ λατσσές ο έργος; Νάα! Ο Ιεχωβά ισινέ μπουτ ευχαριστιμέ ι Νωέσαρ σόσκε κερντάς ντιπ οντουβά σο μανγκλάας λέσταρ ο Ιεχωβά.​—Γέν. 6:22.

12. Σαρ αρακχέλας χαρά πι εργόστε ο προφήτης Ιερεμίας παρόλο σο ο τζενέ να ασουνένας-λες ντα τζάνας λέσαρ κόντρα;

¹² Ο προφήτης Ιερεμίας-ντα κερέλας έργος πο μπουτ από 40 μπρεσά παρόλο σο ο τζενέ να ασουνένας-λες ντα τζάνας λέσαρ κόντρα. Χασαρντάς αζόμ μπουτ πι ζορ επειδή “προσβαλίνενας-λες ντα πρασάνα-λες” οντουλά σο τζάνας λέσαρ κόντρα σο νακχλό λέσκε γκοντιάταρ τι τσσιναβέλ τι κερέλ λάφι ι Ιεχωβάσκε. (Ιερ. 20:8, 9) Αλλά ο Ιερεμίας να κερντάς-λες ανταβά! Σο βοηθιντάς-λες μα τι τσσιναβέλ πο έργος ντα τι αρακχέλ χαρά; Τθερέλας πι γκοντιάτε ντούι σημαντικές αλήθειες. Πρώτον, ο λάφια ι Ντεβλέσκε, σο βακερέλας ο Ιερεμίας κο τζενέ, κα ντένας-λεν «μέλλον ντα ελπίδα». (Ιερ. 29:​11) Δεύτερον, ο Ιεχωβά τσσουντάας πο ναβ οπράλ κο Ιερεμίας. (Ιερ. 15:​16) Αμέν-ντα βακεράσα κο τζενέ λάφια σο ντένα-λεν ελπίδα ντα, σαρ Μάρτυρες ι Ιεχωβάσκε, τθεράσα οπρ’ αμέντε λέσκο ναβ. Κάνα τθεράσα αμαρέ γκοντιάτε ανταλά ντούι σημαντικές αλήθειες, ισινάμ χαρούμενοι ατζέ-ντα άμα ο τζενέ να ασουνένα-αμέν.

13. Σο σικλιάσα κατά ιστορία ι Ιησούσκι για τον σπορέα σο σοβέλα σο ισί γραμμέ κο εδάφια Μάρκος 4:​26-29;

¹³ Να μπαριόλα η πίστη εκχέ τζενέσκι αντρέ εκχέ ντιβεσέστε. Ο Ιησούς σικλιαρντάς ανταγιά αλήθεια κι ιστορία σο βακερντάς για τον σπορέα σο σοβέλα. (Διαβάνεν Μάρκος 4:​26-29) Αφού ο ο τζενό σπειριντάς, ο σπόροι μπαριλέ χάνικ χάνικ ντα ο σπορέας ναστί κερέλας τίποτα για τι μπαριόν πο σουγκό. Μπέκιμ τουμέν-ντα τι μπεκλεντίνενα μπουτ βακίτι για τι ντικχέν ι τζενές σο κερένα-λες μελέτη τι κερέλ οντουλά σο σικλιόλα. Σαρ εκ γεωργός ναστί κερέλα πο φυτά τι μπαριόν αζόμ σουγκό καζόμ μανγκέλα βοβ, αντικάς αμέν-ντα ναστί κεράσα ι πίστη ι τζενένγκι σο κεράσα-λεν μελέτη τι μπαριόλ αζόμ σουγκό καζόμ κα μανγκάας αμέν. Οτθάρ, μα χασαρέν τουμαρί ζορ άμα ντικχένα ότι η πίστη ι τζενέσκι σο κερένα-λες μελέτη να μπαριόλα αζόμ σουγκό καζόμ κα μανγκένας. Σαρ εκ γεωργός, πρέπει τι μπεκλεντίνας μέχρι τι αποφασίνελ ο τζενό σο κεράσα-λες μελέτη τι μπολντιόλ.​—Ιακ. 5:7, 8.

14. Καβά παράδειγμας σικαβέλα ότι μπέκιμ τι νακχέν μπουτ μπρεσά για τι ασουνέν-αμέν ο τζενέ;

¹⁴ Μερικέ τθανέντε, μπέκιμ τι νακχένα μπουτ μπρεσά μέχρι τι μπολντιόλ εκ τζενό. Ντικχέν σο αβιλό-πες κι Γκλάντις ντα κι Ρούμπι Άλεν, σο ισινέ πφενιά ο εκ ι γιαβεράσαρ ντα σο κο 1959 μπουτσσαντέ-λεν σαρ σκαπάνισσες εκχέ τθανέστε κο Κεμπέκ σο ισί κο Καναδάς. * Επειδή ο τζενέ νταρένας οντουλένταρ σο κα βακερένας ή κα κερένας ο γείτονες λένγκε ή ο παπάζια, να κερένας λάφι ι Ιεχωβάσκε Μαρτυρέντζαρ. Η Γκλάντις βακερντάς: «Τζάας κχερ κχερέστε οχτώ σαάτια κο ντιβές για ντούι μπρεσά ντα καέκ τζενό να κερέλας αμέντζαρ λάφι! Ο τζενέ αβένας κι πόρτα, ντικχένας-αμέν ντα νασένας. Αλλά αμέν να τσσιναντάμ αμαρό έργος». Σοράν, ο τζενέ κοβλιλέ ντα μερικοί ασουνένας.  Ακανά, ισί τριν κχανγκιριά οντουτθέ.​—Ησ. 60:22.

15. Σο σικλιαρένα-αμέν ο εδάφια 1 Κορινθίους 3:6, 7 ι εργόσκε σο κεράσα για τι βακεράς ο λατσσέ αμπέρια ντα τι κεράς μαθητέν;

¹⁵ Μπουτ τζενέ πρέπει τι βοηθίνεν εκχέ τζενές για τι αβέλ μαθητής. Σαρί η κχανγκιρί βοηθίνελα τι ερεσέλ εκ τζενό κο μπολντιπέ. (Διαβάνεν 1 Κορινθίους 3:6, 7) Για παράδειγμας, εκ πφραλ μουκχέλα εκ φυλλάδιος ή εκ περιοδικός εκχέ τζενέσκε σο μανγκέλα τι σικλιόλ. Σοράν, ο πφραλ αγαβέλα ότι λέσκο πρόγραμμας να μουκχέλα-λες τι τζαλ ατζέκ φαρ κο τζενό σο μανγκέλα τι σικλιόλ, οτθάρ μανγκέλα εκχέ γιαβερέ πφραλέσταρ τι τζαλ. Οντουβά πφραλ μπορισάλο τι κερέλ-λες μελέτη. Λέλα γιαβερέ-ντα πφραλέν ντα πφενίν κι μελέτη, ντα ο κάθε εκ λένταρ ντέλα-λες ζορ γιαβερέ τροπόσαρ. Κάθε πφραλ ή πφεν σο σικλιόλα ο τζενό βοηθίνελα-λες τι σικλιόλ πο μπουτ ι Ιεχωβάσκε. Αντικάς, σαρέ οντουλά σο μαρντέ-πες για τι βοηθίνεν εκχέ τζενές χαιρίνενα κάνα ο τζενό μπολντιόλα.​—Ιωάν. 4:​35-38.

16. Σόσκε μπορίνενα τι αρακχέν χαρά κο έργος ατζέ-ντα άμα ισινέν νασφαλέ ή μπίζουρανε;

¹⁶ Μπέκιμ ναστί βακερένα ντα σικλιαρένα ο λατσσέ αμπέρια σαρ κερένας ανγκλέ σόσκε ισινέν νασφαλέ ή μπίζουρανε. Μπορίνενα όμως τι αβέν χαρούμενοι οντουλένγκε σο κερένα. Ανέν τουμαρέ γκοντιάτε οντουβά σο αβιλό-πες κο βασιλιάς Δαβίδ κάνα βοβ ντα λέσκε μουρσά σωντέ πουμαρέ φαμιλίν ντα λιντέ παλάλ πουμαρέ πολύτιμα πράγματα κατά Αμαληκίτες. Ντούσελ λέσκε μουρσένταρ ισινέ αζόμ κχινέ σο ναστί κερένας τζένγκι, οτθάρ ατσσιλέ παλάλ για τι αρακχαβέν ο πράγματα. Κάνα κερδιντέ ο τζένγκι, ο Δαβίδ βακερντάς τι ιλιάντιβεν σαριλέντε ο πολύτιμα πράγματα σο λιντέ κατά ντουσμάνια. (1 Σαμ. 30:​21-25) Ανταγιά ιστορία σικλιαρέλα-αμέν κάτι ι εργόσκε σο κεράσα για τι βακεράς ο λατσσέ αμπέρια ντα τι κεράς μαθητέν. Μπέκιμ ναστί κεράσα αζόμ μπουτ καζόμ κα μανγκάας τι κεράς κο έργος. Αλλά άμα κεράσα σο νακχέλα αμαρέ βαστένταρ, κα τθεράς μπαρί χαρά κάθε φαρ σο εκ τζενό σικλιόλα ι Ιεχωβάσκε ντα μπολντιόλα.

17. Καλέ πραγμάσκε πρέπει τι βακεράς ευχαριστώ κο Ιεχωβά;

¹⁷ Βακεράσα ευχαριστώ κο Ιεχωβά σο μπεϊντίνελα σαρέ οντουλά σο κεράσα λέσκε για τι ντας-λες λατρεία. Τζανέλα ότι ναστί κεράσα ι τζενέν τι ασουνέν-αμέν ή τι αρχίνεν τι υπηρετίνεν-λες. Αλλά ντικχέλα καζόμ μπουτ μαράσα-αμέν ντα καζόμ μπουτ μανγκάσα-λες, ντα ευλογίνελα-αμέν ανταλέσκε. Επίσης, σικλιαρέλα-αμέν σαρ τι αρακχάς χαρά οντουλέντε σο μπορίνασα τι κεράς κο έργος. (Ιωάν. 14:​12) Ισινάμ σίγουροι ότι κα αβέλ ι Ντεβλέσκο γκι άμα να τσσιναβάσα τι κεράς ο πο λατσσό!