1. Thangwi yanji ife tisatsandzaya thangwi yakukhala Mboni za Yahova?

IFE tisatsandzaya kakamwe, pontho tisaona kuti ndi nkhombo kukhala Mboni za Yahova! Ife ndife atumiki a Yahova, pontho tisapangiza kuti ndife Mboni zace tingamwaza mphangwa kuna anango, mbatiapfundzisa pya iye. Ife tisatsandzaya tingakwanisa kuphedza munthu wakuti ‘asafuna kutawira undimomwene unapasa umaso wakukhonda mala’ mbatoma kutumikira Yahova. (Mabasa 13:48) Ife tisakhala na mabvero mabodzi ene ninga a Yezu wakuti “akomerwa kakamwe” pidapangwa iye na anyakupfundzace pinthu pyadidi pidagumanikana na iwo mu ndzidzi ukhamwaza iwo mphangwa.—Luka 10:1, 17, 21.

2. Tinapangiza tani kuti tisaona basa yathu yakumwaza mphangwa ninga yakufunika kakamwe?

² Basa yathu yakumwaza mphangwa ndi yakufunika kakamwe kuna ife. Mpostolo Paulu acenjeza Timoti: “Cita mphole-mphole thangwi ya iwe, pontho thangwi ya cipfundziso cinapereka iwe.” Paulu athimiza: “Ungacita pyenepi, unadzapulumusa umaso wako na wa ale anakubvesera.” (1 Tim. 4:16) Natenepa, basa yathu yakumwaza mphangwa isapulumusa umaso. Ndzidzi onsene tisafunika kucita mphole-mphole thangwi ndife anthu a Umambo wa Mulungu. Ndzidzi onsene ife tisafunika kucita pinthu pyakuti pinapasa mbiri Yahova, pontho pyakuti pisapangiza kuti tisakhulupira mphangwa zadidi zinamwaza ife. (Afil. 1:27) Ife tinapangiza kuti ‘tisacita mphole-mphole thangwi ya cipfundziso cinapereka ife’ tingakhunganyika mwadidi, pontho tingaphemba ciphedzo ca Yahova mbatidzati kuenda kamwaza mphangwa.

3. Kodi ndi anthu onsene anatawira mphangwa za Umambo? Perekani citsandzo.

³ Maseze ife ticite pyonsene pinakwanisa ife toera kumwaza mphangwa kuna anango, anthu azinji mucisa cathu panango nee anakomerwa na mphangwa zadidi za Umambo. Onani pidacitika kuna m’bale Georg Lindal, wakuti amwaza mphangwa ekhene mucisa ca ku Islandiya kutomera mu caka ca 1929 mpaka mu caka ca 1947. Iye agawira mabukhu mazinji kakamwe, mbwenye nee m’bodzi atawira undimomwene. Iye alemba: “Anthu akucepa ndiwo akhapangiza kuti akhatcinga undimomwene, mbwenye azinji nee akhafuna kubva mphangwa za undimomwene.” Maseze amisionaryo  anango adabuluka ku xikola ya Jiliyadhi aenda kweneko, anthu a ku Islandiya apitiriza kukhonda undimomwene. Mbwenye pidapita pyaka pipfemba kubulukira caka cidafika amisionaryo ku Islandiya anthu anango a ku Islandiya aperekeka kuna Yahova mbabatizwa. *

4. Ndi api mabvero anakhala na ife anthu angakhonda kubvesera mphangwa zadidi?

⁴ Ife tisatsukwala anthu angakhonda kupangiza cifuno cakupfundza Bhibhlya. Panango ife tisakhala na mabvero mabodzi ene ninga a mpostolo Paulu, wakuti ‘atsukwala kakamwe’ thangwi Ayuda azinji nee akhulupira kuti Yezu ndi Mesiya wakupikirwa. (Aroma 9:1-3) Ndiye tani khala imwe mukuwangisira kakamwe, pontho musacita phembero thangwi ya nyakupfundza wanu wa Bhibhlya mbwenye iye nee akuthambaruka, pontho musanyerezera kusiya kupfundza naye Bhibhlya? Peno, ndiye tani khala imwe cipo mwapfundzisa munthu Bhibhlya mpaka kubatizwa? Kodi imwe musafunika kupasika mulando mbamunyerezera kuti Yahova nee akupasa nkhombo basa yanu yakumwaza mphangwa? Mu nsolo uno, ife tinatawira mibvundzo miwiri: (1) Ninji pinacitisa kuti utumiki wathu ukhale wakutsandzayisa? (2) Mu ndzidzi unamwaza ife mphangwa kuna anango, tisafunika kudikhiranji?

5. Thangwi yanji basa yathu yakumwaza mphangwa ndzidzi onsene nee inafamba ninga munafuna ife?

⁵ Bhibhlya isalonga kuti munthu anacita pinafuna Mulungu: ‘Pyonsene pinacita iye pinadzanfambira mwadidi.’ (Masal. 1:3) Mbwenye, pyenepi nee pisabveka kuti pinthu pyonsene pinacitira ife Yahova pinadzafamba ninga munafuna ife. Thangwi yakusowa ungwiro, umaso wa anthu ‘wadzala na nyatwa,’ nyatwa zenezi ndi zathu peno za anango. (Yobe 14:1) Kusiyapo pyenepi, apingizi anakwanisa kutikhondesa kumwaza mphangwa ninga pinacita ife ndzidzi onsene. (1 Akor. 16:9; 1 Ates. 2:18) Mphapo Yahova asaona tani khala ife tikuphata mwadidi basa yakumwaza mphangwa peno nkhabe? Tendeni tione midida mingasi ya m’Bhibhlya yakuti isatawira mbvundzo unoyu.

6. Ninji cinacitisa Yahova kukomerwa na ife mu ndzidzi unacita ife basa yakumwaza mphangwa?

⁶ Yahova asaona kuwangisira kwathu na kupirira kwathu. Yahova asakomerwa na ife tingamwaza mphangwa mwaphinga thangwi ya ufuni uli na ife kuna iye, mwakukhonda tsalakana khala anthu anatibvesera peno nkhabe. Mpostolo Paulu alemba: “Mulungu nee ndi wakukhonda kulungama toera aduwale basa yanu na ufuni udapangiza imwe kuna dzina yace pakutumikira anthu akucena, mbamupitiriza kuatumikira.” (Aheb. 6:10) Yahova asakumbuka kuwangisira kwathu na ufuni unapangiza ife, maseze tikhonde kukhala na nyakupfundza wa Bhibhlya wakuti asankhula kubatizwa. Natenepa, mafala adalonga mpostolo Paulu kuna mpingo wa ku Korinto asaphata basa kuna imwe. Iye alonga: “Basa inaphata imwe mwaphinga, kuna Mbuya si yapezi tayu.” Mafala anewa asaphata basa kuna ife, maseze kuwangisira kwathu kukhonde kubweresa nkhombo.—1 Akor. 15:58.

7. Pinthu pidalonga mpostolo Paulu thangwi ya basa yace yakumwaza mphangwa pisatipfundzisanji?

 ⁷ Mpostolo Paulu akhali misionaryo wadidi kakamwe, wakuti akhazikisa mipingo ipswa m’mizinda mizinji. Mbwenye anthu anango pidampwaza iwo mbalonga kuti iye nee akhali mpfundzisi wadidi, mpostolo Paulu nee alonga kuti ndi anthu angasi adaphedza iye toera kukhala Akristu. M’mbuto mwakulonga kuti ndi anthu angasi adaphedza iye toera kukhala Akristu, Paulu alemba: “Ndaphata basa kakamwe.” (2 Akor. 11:23) Ninga Paulu, ife tisafunika kukumbuka kuti cakufunika kakamwe kuna Yahova ndi kuwangisira kwathu na kukhonda kubwerera nduli.

8. Tisafunika kukumbukanji thangwi ya utumiki wathu?

⁸ Utumiki wathu usatsandzayisa Yahova. Yezu atuma anyakupfundza 70 toera kuenda kamwaza mphangwa za Umambo. Mbwenye kunkhomo kwa basa yawo yakumwaza mphangwa iwo “abwerera mwakutsandzaya.” Thangwi yanji iwo atsandzaya? Iwo alonga: “Na madimonyo ene asatibvera thangwi yakuphatisira dzina yanu.” Mbwenye Yezu aasandika mbaapanga: “Lekani kukomerwa thangwi madimonyo asakubverani, mbwenye komerwani thangwi madzina anu alembwa kudzulu.” (Luka 10:17-20) Yezu akhapidziwa kuti iwo nee anakhala na pyakugumanikana napyo pyadidi ndzidzi onsene m’basa yawo yakumwaza mphangwa. Mwandimomwene, ife nkhabe kupidziwa kuti ndi angasi akuti adzakhaladi Akristu mwa ale adabva mphangwa zidamwaza anyakupfundza. Anyakupfundza akhafunika kutsandzaya tayu basi ene thangwi anthu aabvesera, mbwenye akhafunika kutsandzaya kakamwe thangwi yakudziwa kuti Yahova akhakomerwa thangwi yakuwangisira kukhacita iwo.

9. Mwakubverana na Agalata 6:7-9, tinadzatambiranji tingapirira mu utumiki wathu?

⁹ Tingapirira mu utumiki wathu, tinadzatambira umaso wakukhonda mala. Ife tingacita pyonsene pinakwanisa ife toera kumwaza mphangwa zadidi na kupfundzisa, ‘tisabzwala mukutsogolerwa na nzimu wakucena.’ Tingacita pyenepi tisatawirisa nzimu wa Mulungu toera uphate basa mu umaso wathu. Tingakhonda “kubwerera nduli” peno “kuneta,” Yahova asatipasa cinyindiro cakuti tinadzatambira umaso wakukhonda mala, maseze khala ife nee takwanisa kuphedza munthu mpaka kubatizwa.—Lerini Agalata 6:7-9.

10. Thangwi yanji anango asabvesera mphangwa zinamwaza ife, anango nkhabe?

¹⁰ Kutawira undimomwene peno kuukhonda pisanyindira ntima wa ale anabvesera mphangwa zinamwaza ife. Yezu apangiza undimomwene unoyu mu nsangani wace wa nyakubzwala wakuti abzwala mbeu m’mataka akusiyana, mbwenye mbeu zidamera mbazibala misapo basi ene ndi zire zidagwa pa mataka adidi. (Luka 8:5-8) Yezu alonga kuti mataka akusiyana asaimirira mitima ya anthu akuti asatawira munjira zakusiyana “mafala a Mulungu.” (Luka 8:11-15) Sawasawa na nyakubzwala, ife nee tinakwanisa kukulisa cinthu m’mitima ya anthu adamwazira ife mphangwa. Basa yathu ndi yakupitiriza kubzwala mbeu yadidi yakuti ndi mphangwa za Umambo. Ninga pidalonga mpostolo Paulu, “m’bodzi na m’bodzi anadzatambira muoni wace mwakubverana na basa yace,” tayu thangwi ya maphindu a basa yace.—1 Akor. 3:8.

11. Thangwi yanji Yahova akomerwa na basa idacita Nowa, maseze anthu nee abvesera mphangwa zikhamwaza iye? (Onani foto iri patsamba yakutoma.)

¹¹ Atumiki a Yahova azinji akale amwazambo mphangwa kuna anthu akuti nee akhafuna kubvesera mphangwa zenezi. Mwacitsandzo, Nowa ‘amwaza mphangwa zaulungami,’ mu pyaka 40 peno 50. (2 Ped. 2:5) Mwakukhonda penula, Nowa akhanyerezera kuti anthu mbadatawira mphangwa zikhamwaza iye, mbwenye Yahova nee akhadampanga kuti pyenepi mbapidacitika. M’mbuto mwace, mu ndzidzi ukhapereka iye pitsogolero kuna Nowa kuti anamanga tani arka, Mulungu ampanga: ‘Usafunika kupita mu arka pabodzi na anako, nkazako na akazi a anako.’ (Gen. 6:18) Pidalonga Yahova kukula  kwa arka, Nowa panango adzindikira kuti anthu azinji nee mbadatawira mphangwa zikhamwaza iye, thangwi anthu onsene nee mbadakwana mu arka. (Gen. 6:15) Ninga tisadziwa, nee munthu m’bodzi abvesera mphangwa zikhamwaza Nowa. (Gen. 7:7) Kodi Yahova aona kuti Nowa nee acita mwadidi basa yakumwaza mphangwa? Nkhabe! Yahova akomerwa kakamwe na Nowa thangwi acita pidapangwa iye.—Gen. 6:22.

12. Mprofeta Yeremiya akhala tani wakutsandzaya mu utumiki wace maseze anthu akhan’tcinga mbakhonda kubvesera mphangwa zikhamwaza iye?

¹² Mprofeta Yeremiya amwaza mphangwa mu pyaka pyakupiringana 40 maseze anthu akhakhonda kubvesera mphangwa zikhamwaza iye, pontho akhan’tcinga. Iye atsukwala kakamwe thangwi ‘yakutikanwa na kupwazwa’ na anyamalwa ace, mbanyerezera kusiya basa yace yakumwaza mphangwa. (Yer. 20:8, 9) Mbwenye Yeremiya nee abwerera nduli! Ninji cidam’phedza toera kukunda manyerezero ace akuphonyeka, mbakhala wakutsandzaya m’basa yace yakumwaza mphangwa? Ndi thangwi yakuti iye akhanyerezera pinthu piwiri pyakufunika. Cakutoma, mphangwa za Mulungu zikhamwaza Yeremiya zikhapereka ‘cidikhiro na tsogolo yadidi’ kuna anthu. (Yer. 29:11) Caciwiri, Yeremiya akhamwaza mphangwa mu dzina ya Yahova. (Yer. 15:16) Ife tisamwaza mphangwa zakuti zisapereka cidikhiro kuna anthu, pontho tisamwaza mphangwa mu dzina ya Yahova ninga Mboni zace. Tingakumbuka pinthu pyenepi piwiri pyakufunika, tinakwanisa kukhala akutsandzaya mwakukhonda tsalakana khala anthu anatawira mphangwa zinamwaza ife peno nkhabe.

13. Tisapfundzanji na nsangani wa Yezu unagumanika pa Marko 4:26-29?

¹³ Pasapita ndzidzi uzinji toera munthu akhale na cikhulupiro. Yezu apfundzisa undimomwene unoyu mu nsangani wace wa munthu wakuti abzwala mbeu mbaenda kagona. (Lerini Marko 4:26-29.) Pidamala iye kubzwala mbeu zenezi, izo zakula pang’ono-pang’ono, pontho nyakubzwala nee mbadakwanisa kucita cinthu toera mbeu zenezi zikule mwakucimbiza. Ninga nyakubzwala unoyu, panango panapita ndzidzi uzinji kakamwe toera nyakupfundza wanu wa Bhibhlya atome kuphatisira pinapfundza iye. Ninga nyakubzwala wakuti nee anakwanisa kucimbizisa kukula kwa mbeu, ifembo nee tinakwanisa kucimbizisa kuthambaruka mwauzimu kwa anyakupfundza athu a Bhibhlya ninga munafunira ife. Natenepa, lekani kutsukwala peno kubwerera nduli khala anyakupfundza anu a Bhibhlya nee akuthambaruka mwakucimbiza. Ninga nyakulima, basa yakucita anyakupfundza isaphemba kupirira.—Tiya. 5:7, 8.

14. Ndi citsandzo cipi cinapangiza kuti pasapita ndzidzi uzinji toera anthu atome kubva mphangwa zadidi?

¹⁴ M’mbuto zinango, pasapita ndzidzi uzinji toera munthu abatizwe. Onani pidacitika kuna alongo awiri akuti ndi ubale wawo, mulongo Gladys na Ruby Allen, akuti akhazikiswa ninga apainiya a ndzidzi onsene mu caka ca 1959 mbatumizwa mu nzinda ung’ono wa Quebec wa ku Kanadha. * Nakuti anthu a kweneko akhagopa ale akakhala dhuzi na iwo, pontho akhagopa mafala akhafuna kulonga anyantsembe awo peno pinthu pikhafuna kucita iwo angaagumana mbakalonga na Mboni za Yahova, iwo akakhonda kubva mphangwa zikhalonga alongo anewa. Mulongo Gladys alonga: “Ife tamala pyaka piwiri pyamumphu mbatikafamba ntsiku zonsene nyumba na nyumba mbwenye nee m’bodzi akhafuna kutibvesera! Anthu akhafungula nsuwo, mbwenye angaona kuti ndife akhaufunga mbabwerera pyawo. Mbwenye ife nee tabwerera nduli.” Mwapang’ono na pang’ono anthu adzatoma kukhala auxamwali mbatoma kubva mphangwa zadidi. Cincino mu nzinda unoyu muli na mipingo mitatu.—Iza. 60:22.

15. Kodi lemba ya 1 Akorinto 3:6, 7 isatipfundzisanji thangwi ya basa yakucita anyakupfundza?

¹⁵ Toera munthu akhale nyakupfundza asafunika kuphedzwa na anthu azinji. Anthu onsene  mu mpingo anakwanisa kuphedzera toera munthu abatizwe. (Lerini 1 Akorinto 3:6, 7.) Mwacitsandzo, m’bale agawira tratadho peno revista kuna munthu adapangiza cifuno. Mbwenye m’bale unoyu acimwana kuenda kacita ulendo wakubwereza kuna munthu adapangiza cifuno thangwi aphatika na mabasa anango, natenepa iye aphemba m’mwazi mphangwa unango toera aende kacita ulendo wakubwereza kuna munthu adasiyira iye revista. M’mwazi mphangwa akwanisa kutomesa pfundziro ya Bhibhlya na munthu unoyu adapangiza cifuno. M’mwazi mphangwa unoyu apanga abale na alongo anango toera kuenda naye pabodzi ku pfundziro yace, pontho m’bodzi na m’bodzi wa abale na alongo anewa awangisa nyakupfundza unoyu munjira zakusiyana-siyana. M’bale peno mulongo anafuna kugumanikana na nyakupfundza unoyu, anam’phedza toera kupfundza pizinji thangwi ya Yahova. Munjira ineyi, anthu onsene adaphata basa mwakuwanga toera kuphedza nyakupfundza unoyu, anakhala akutsandzaya angamuona mbakabatizwa.—Juwau 4:35-38.

16. Munakwanisa tani kutsandzaya mu utumiki maseze nee muli na ungumi wadidi peno ndimwe wakusowa mphambvu?

¹⁶ Mphapo ndiye tani khala imwe nee musakwanisa kucita pizinji m’basa ya kumwaza mphangwa na kupfundzisa anthu Bhibhlya thangwi ya ungumi wanu peno thangwi yakusowa mphambvu? Ngakhale tenepo, imwe munakwanisa kukhala wakutsandzaya thangwi ya pinakwanisa imwe kucita. Onani pidacita Mambo Dhavidhi pidaenda iye na anyankhondo ace kamenyana na Amaleki toera kuombola mabanja awo na pinthu pyawo. Anyankhondo ace 200 akhadaneta kakamwe mbacimwana kumenya nkhondo, natenepa iwo asala nduli toera kuonera mitolo. Pidamala iwo kumenya nkhondo mbawina, Dhavidhi apereka ntemo wakuti pinthu pidakwata iwo kunkhondo pisafunika kugawiwa sawasawa kuna anyankhondo onsene. (1 Sam. 30:21-25) Pyenepi pisatipfundzisa cinthu thangwi ya basa yathu yakucita anyakupfundza. Panango imwe nee munakwanisa kucita pizinji m’basa yakumwaza mphangwa na kucita anyakupfundza. Mbwenye mungawangisira, munakwanisa kutsandzaya kakamwe mungaona munthu adziwa Yahova mbabatizwa.

17. Thangwi yanji tisafunika kupereka takhuta kuna Yahova?

¹⁷ Ife tisapereka takhuta kuna Yahova thangwi iye asaona mwaufuni basa inacita ife kuna iye. Iye asadziwa kuti nee tinakwanisa kukakamiza anthu toera abvesere mphangwa zinamwaza ife peno toera atome kumulambira. Ngakhale tenepo, iye asaona kuwangisira kwathu na ufuni unapangiza ife kuna iye, pontho asatipasa nkhombo. Kusiyapo pyenepi, iye asatipfundzisa toera kukhala akutsandzaya na pire pinakwanisa ife kucita m’basa ineyi yakumwaza mphangwa. (Juwau 14:12) Ife tiri na cinyindiro cakuti tingakhonda kubwerera nduli Mulungu anakomerwa na ife!