1. Yihowa Farciˈraasine ikkankenni tashshi yaannonkehunna fenjeejjineemmohu mayiraati?

YIHOWA FARCIˈRAASINE ikkankenni lowo geeshsha tashshi yaannonke; qoleno tini ninkera lowo ayirrinyeeti! Ninke Maganu suˈmisinni woshshinonke mannaati; qoleno dancha duduwo dudumbenna manna rosaano assine suˈminke garinni heeˈneemmo. ‘Wodanisi hegere heeshsho aanno halaali widira dooino’ manchi ammanaancho ikkanno gede kaaˈlineemmo woyite tashshi yaannonke. (Soq. 13:48, NW) Ninkeno Yesuusi gede ikkineemmo. Isira rosaanosi sabbakkara fultinowa dancha woˈnaalsha afidhe higgu woyite “qullaawu ayyaaninni tashshi [yiinosi].”—Luq. 10:1, 17, 21.

2. Soqqanshonke ayirrinseemmota leellisha dandiineemmohu hiittoonniiti?

² Soqqanshonke lowo geeshsha ayirrinseemmo. Soqqamaasinchu Phaawuloosi Ximootewoosi, “Ateneenna rosiisatto roso seekkite agadhi” yee amaalino. Isi lede togo yiino: “Hatto assittoro, ateneenna macciishshitannohere gatisatto.” (1 Xim. 4:16) Konni daafira soqqanshonke manna gatissannote. Maganu Mangiste qansoota ikkinoommo daafira, ninkeneeto seekkine agadhineemmo. Woˈmanka woyite Yihowara ayirrinye abbanno garinninna dudumbeemmohu danchu duduwira hasiisino garinni heeˈrate sharrammeemmo. (Fil. 1:27) Soqqanshote seekkine qixxaambe hattono sabbankammora albaanni Yihowa kaaˈlannonke gede huuccatto assiˈne ‘rosiinseemmo roso seekkine agadhineemmota’ leellinsheemmo.

3. Maganu Mangiste sokka baalunku manni macciishshe adhanno? Lawishsha kuli.

³ Mannaho dancha duduwo kulate wolqanke assiture baala assinummoro nafa, qarqarinkera batinyu manni Maganu Mangiste sokka macciishsha giwara dandaanno. Hanni Ayisilaandete  gobbara addi addi qooxeessira 1929 kayise 1947 geeshsha callisi sabbakinohu Roduu Joorji Lindaali woˈnaalsha laˈno. Isi lowo kume ikkitanno borro mannaho elino; ikkirono halaale macciishshe adhinohu mittu manchino dino. Isi togo yee borreessino: “Mitootu halaale effidhe gibbino; rooru manni kayinni hasatto dinooho.” Giiliyaadi rosi mine maassantino misiyoone looso kaaˈlitara hakkiira sonkihu gedensaanni nafa, insano macciishshannohu gari manni nookkiha lowo diro sabbakkino. Boodu Ayisilaandete manni heeshshonsa Yihowara sayise oye cuuaminohu honsu diri gedensaanniiti.

4. Sabbankeemmo sokka mannu adha giwanno woyite mayi macciishshamankera dandaanno?

⁴ Mannu sabbankeemmo sokka macciishsha giwanno woyite dadillineemmo. Ninkeno Phaawuloosi gede ikkine dadillinammora dandiineemmo; isi rooru Ayihudete manni Yesuusi daanno yinoonni Mesihicha ikkinota ammana giweenna dadillino gara kulanni “Lowo dadillinna agurannokki qarri wodaniˈya giddo no” yiino. (Rom. 9:1-3) Mittu xiinxallisatto manchi dancha gede assite rosiissanni heedheenna hattono isi daafira huuccatto assitanni heedheenna ayyaanaamittetenni lopha hoogeenna xiinxallisa agura hasiissinohehalla ikki? Woy ati xiinxallisseenna cuuamate deerra iillinohu mittu manchino nookkihalla ikki? Yihowa soqqanshoˈya dimaassiˈrino yite ateneeto bushiisha hasiissannohe? Konni birxichira lame xaˈmora dawaro afiˈneemmo: (1) Soqqanshonke seekkino yinanni gede assannori maati? (2) Sabbankeemmo woyite maa heda hasiissannonke?

5. Yihowara loonseemmo loosi ninke hendoommo guma abba hoogara dandaannohu mayiraati?

⁵ Qullaawu Maxaafi, Maganu fajjo wonshanno manchira “Assiˈrannori baalu qinaannosi” yaanno. (Far. 1:3) Ikkollana, hatto yaa Yihowara assineemmori baalunkuri ninke hendoommo guma abbanno yaa diˈˈikkitino. Ninke baalunku guuntete xeˈne noonkere ikkinoommo daafira, mannu heeshsho “qarru woˈminote.” (Iyo. 14:1) Qoleno gibbannonkeri mito woyite faajjete sabbankeemmota hooltankera dandiitanno. (1 Qor. 16:9; 1 Tes. 2:18) Ikkina Yihowa soqqanshonke seekkino yaannohu maa laeeti? Hanni tenne xaˈmora dawaro afiˈrate kaaˈlannonkeha mito Qullaawu Maxaafiha xintu seera laˈno.

6. Yihowa soqqanshonke seekkino yaannohu maa laeeti?

⁶ Yihowa hexxo mudhinummokki diinaggaambe soqqammeemmota laˈˈanno. Mannu sokkanke macciishsha giwiro nafa, Yihowa banxeemmo daafira diinaggaambe sabbankeemmoha ikkiro, soqqanshonke isi albaanni seekkino yaate. Phaawuloosi togo yee borreessino: “Maganu halaalaancho yoo yaannoho; loosoˈnenna albano ikko xaano qullaawa manna kaaˈlatenni leellishshinoonnisi baxille dihawanno.” (Ibi. 6:10) Xiinxallinsoommo manchi ayyaanaamittetenni lophe cuuama hoogiro nafa, Yihowa loosonkenna baxillenke dihawanno. Konnira Phaawuloosi Qorontoosi Kiristaanira kulinori aterano kaaˈlannoreeti: Daafurikki halchootto guma abba hoogiro nafa, ‘Mootichaho soqqantanni  daafuratto daafuri mullawa digatanno.’—1 Qor. 15:58.

7. Soqqamaasinchu Phaawuloosi soqqanshosi daafira coyiˈrinorinni maa ronseemmo?

⁷ Soqqamaasinchu Phaawuloosi worba misiyoone ikke soqqamino; qoleno duuchu katamira haaro songuwa xintino. Ikkollana, mitootu iso worba rosiisaancho diˈˈikkino yite mishshusi woyite, isi worba soqqamaancho ikkinota leellishate ammanaasine ikkanno gede kaaˈlino manni kiiro dikulino. Hatteentenni isi umonsa bokkeessanno manni daafira coyiˈranni, “Insanni roore lowo yanna loosunni daafuroommo” yiino. (2 Qor. 11:23) Ninkeno Phaawuloosi gede, Yihowa albaanni roore waaga afidhinoti hexxo mudhinummokki diinaggaawe soqqama ikkitinota qaango.

8. Soqqanshonke daafira maa qaaga hasiissannonke?

⁸ Soqqanshonke Yihowa hagiirsiissanno. Yesuusi mitte hige 70 rosaano Maganu Mangiste sokka dudubbara soyino; insa soqqanshonsa guddu woyite ‘hagiirrunni higgino.’ Hagiidhitanno gede assinonsari maati? Insa togo yitino: “Mooticha, suˈmikkinni durriisu nafa hajajaminonke.” Yesuusi kayinni hedonsa biddi assidhanno gede togo yiinonsa: “Suˈmiˈne gordu taje giddo borreessamino daafira ikkinnina, durriisu hajajaminoˈnehura hagiidhitinoonte!” (Luq. 10:17-20) Yesuusi rosaanosi togooha dancha woˈnaalsha afiˈra hooggara dandiitanno woyiti noota afino. Isinni umo rosaano sabbakkanna macciishshi manni giddo ammanaasine ikkinohu mageeshshi mannaatiro dianfoonni. Yesuusi rosaano hagiidha hasiissannonsahu mannu sokkansa macciishshino daafira calla diˈˈikkino; roorenka hagiidha hasiissannonsahu Yihowa diinaggaabbe soqqantino soqqansho lae hagiidhannota affino daafiraati.

9. Galatiyu Sokka 6:7-9 kultanno garinni, hexxo mudhinummokki soqqammeemmoha ikkiro maa afiˈneemmo?

⁹ Hexxo mudhinummokki sabbankeemmoha ikkiro, hegere heeshsho afiˈneemmo. Maganu Mangiste halaale sabbakatenna rosiisate dandiinummore baala assineemmo woyite, ‘ayyaana hagiirsiisate wixiˈnanni heeˈnoommo’ yaate. Hatto yineemmohu mayiraati? Korkaatuno soqqammeemmo woyite, qullaawu ayyaani massagankera hasiˈneemmota leellinshanni heeˈnoommo. Mitto mancho xiinxallinse cuuamanno gede kaaˈla hoongummoro nafa, ‘hexxo mudha hoongummoronna’ ‘ceeˈmine dancha looso loosa’ agura hoongummoro, Yihowa hegere heeshsho aankera qaale eino.—Galatiyu Sokka 6:7-9 nabbawi.

10. Mannu sabbankeemmo sokka macciishshanno gede woy macciishshannokki gede assannonsari maati?

¹⁰ Mannu sokkanke macciishshanno gede woy macciishshannokki gede assannohu wodaninsa garaati. Yesuusi coyiˈrinohu addi addi gari bushshira wixa wixiˈrino manchire kulanno lawishshi tenne buuxisanno; hakkuyi wixi giddo guma laalinohu danchu bushshira winxoonni wixa callaho. (Luq. 8:5-8) Yesuusi addi addi gari bushshi, ‘Maganu qaalira’ addi addi lao noonsa manni wodanira lawishsha ikkinota xawisino. (Luq. 8:11-15) Wixa wixiˈranno manchinte gede, ninkeno sabbankeemmo manni wodanira halaalu wixi lophanno gede assa didandiineemmo. Ninke loosi dancha Maganu Mangiste wixa agurrummokki wixate. Phaawuloosi yiinonte gede, “mittu mittunku baˈraarsha adhannohu loosisi garinniiti” ikkinnina loosisi abbanno gumi garinni diˈˈikkino.—1 Qor. 3:8, NW.

11. Nohi sabbakeenna mannu macciishsha giwinoha ikkirono, Yihowa isinni hagiidhinohu mayiraati? (Aaniidi qoolira noo misile lai.)

¹¹ Hundinni kayisse batinye Maganu soqqamaasine macciishsha baxannokki mannira sabbakkino. Lawishshaho, Nohi 40 woy 50 meddi yaanno diro “keeraanchimmannire kulino.” (2 Phe. 2:5) Isi sabbakanno sokka mannu macciishshe adhanno yee hexxinoti dihuluullissannote;  Yihowa kayinni mannu macciishshe adhanno diyiino. Hatteentenni, Maganu Nohi markaawe seekkanno gede hajaji woyite togo yiinosi: “Atinna galtekki, oosokkinna oosokki seenni mitteenni markaawete giddora eˈe.” (Kal. 6:18) Qoleno, Nohi seekki yinoonnisi markaawe jilba mageeshshitero hedi woyite, sabbakanno sokka gari manni macciishshe adhannokkita wodanchinoha ikkara dandaanno. (Kal. 6:15) Gedensoonni ikkinori leellishannonte gede, hattee finqila alame giddonni Nohi kulino sokka macciishshe adhinohu mittu manchino dino. (Kal. 7:7) Yihowa Nohi dancha gede asse disabbakino yee hedinoni? Dihedino! Nohi Maganu assi yiinosire ammaname assino daafira, Yihowa isinni hagiidhino.—Kal. 6:22.

12. Masaalaanchu Ermiyaasi mannu sokkasi macciishsha giwirono hattono mitootu gibbusirono, soqqanshosinni hagiirre afiˈra dandiinohu hiittoonniiti?

¹² Masaalaanchu Ermiyaasino macciishsha hasiˈrannokki manniranna gibbannosirira 40 saˈˈanno diro sabbakino. Isi gibbannosiri ‘xontannosinna diqattannosi’ daafira hexxo mudhe loososi agurate nafa hedino. (Erm. 20:8, 9) Ikkirono Ermiyaasi hexxo mudhe baalankare facci asse diagurino! Isi agurikki sabbakanno gedenna soqqanshosinni hagiirraamo ikkanno gede kaaˈlinosiri maati? Isi lame qara coye illachishino. Umihunni, Ermiyaasi mannaho duduwannoti Maganu sokka “hexxo” uyitannote. (Erm. 29:11) Layinkihunni, Yihowa Ermiyaasi afoosi ikke sokkasi mannisira kulanno gede doodhinosi. (Erm. 15:16) Ninkeno dudumbeemmoti hexxo uyitanno sokkaati; qoleno Farciˈraasinesi ikkinoommo daafira Yihowa suˈminni woshshammeemmoreeti. Konne lame qara coye illachinsheemmoha ikkiro, mannu macciishshirono giwirono, soqqanshonkenni hagiirre afiˈra dandiineemmo.

13. Yesuusi Maarqoosi 4:26-29 coyiˈrino lawishshinni maa ronseemmo?

¹³ Ayyaanaamittete lopho leeltannohu sunu sununniiti. Yesuusi wixa wixe kae goxanno manchire kulanno lawishsha coyiˈri woyite, tini halaale ikkase buuxisino. (Maarqoosi 4:26-29 (NW) nabbawi. *) Kuni manchi wixa wixihu gedensaanni, wixu lophinohu sunu sununniiti; qoleno manchu wixu hakkii sae rahe lophanno gede assa didandaanno. Hatteente gede, ninkeno xiinxallinseemmo manchi ayyaanaamittetenni lophanna laˈˈate lowo yanna agara hasiissannonkeha ikkara dandaanno. Baatto loosiˈranno manchi kaasiˈrino kaashsho isi hasiˈrino garinni rahe lophanno gede assa dandaannokkinte gede, ninkeno Qullaawu Maxaafi rosaanonke ayyaanaamittetenni ninke hasiˈnoommo gede ikkite rakke lophitanno gede assa didandiineemmo. Qullaawa Maxaafa xiinxallissinanni manni ayyaanaamittetenni lophate kiˈne heddinoonni yannanni sae keeshshiro, hexxo mudhitinoonte. Baatto loosiˈranno manninte gede, manna rosaano assanno mannino cinca hasiissannonsa.—Yai. 5:7, 8.

14. Mannu sokkanke macciishshe adhara albaanni lowo diri saˈˈara dandaannota leellishanno lawishsha kuli.

¹⁴ Mitu qooxeessira mannu sokkanke macciishshe cuuamara albaanni lowo diri saˈˈara dandaanno. Hanni 1959nni Kanaadaho, Kiwubeeki qoqqowira noohu mittu katamira woˈma yanna suwisaano ikke soqqamara sonkoonniri Gilaadiysi Aleninna Rubii Aleni yinanni roduuwi woˈnaalsha laˈno. * Mannu qachinsa mannanna Kaatolikete beetekiristaane waajjino daafira Maganu Mangiste sokka macciishsha dihasiˈrino. Gilaadiysi hakkawaro ikkinore kultanni togo yitino: “Lame diro woˈma barru barrunku sette  saate minunni mine haˈne soqqammoommoha ikkirono, macciishshannoha mitto manchono diafiˈnoommo! Mannu xullo daye ninke ikkinoommota laˈˈanno woyite cuqqino yiikki agure minira higanno. Ikkirono hexxo dimudhinoommo.” Yannate gedensaanni mannu akati soorrameenna, mitootu sokkanke macciishsha hanaffino. Xa hakko katamira sase songo no.—Isa. 60:22.

15. Umi Qorontoosi 3:6, 7 noo hedonni manna rosaano assate loosi daafira maa ronseemmo?

¹⁵ Manna rosaano assa kaaˈlamme loonsanni loosooti. Mittu manchi cuuame Kiristaancho ikkanno gede kaaˈlitannoti songote. (1 Qorontoosi 3:6, 7 nabbawi.) Lawishshaho, mittu halashshaanchi hasatto noosi manchira tiraakte woy metseete elara dandaanno. Hakkiinni kuni rodii hakkonne mancho galagale hasaawisate yanna hooge, wolu rodii hasaawisanno gede assara dandaanno. Gedensiidi rodii hakkonne mancho hasaawise Qullaawu Maxaafi xiinxallo hanafisiisi. Hakkiinni isi wole addi addi roduuwa xiinxallote koyiseenna, mittu mittunku rodii konne rosaancho addi addi garinni jawaachishisi. Konne rosaancho xiinxallissara koyinsi roduuwi baalunku halaalu wixira waa hayikkisa kaaˈlitino. Konni garinni, Yesuusi yiinonte gede wixihuno midihuno konni loosinni mitteenni hagiidha dandiitanno.—Yoh. 4:35-38.

16. Fayyimmate hoonginni woy dhuku anjenni kainohunni albi geeshsha sabbaka dandaattokkiha ikkiro nafa hagiidha dandaattohu mayiraati?

¹⁶ Fayyimmate hoonginni woy dhuku anjenni kainohunni sabbakatenna rosiisate looso albi geeshsha loosa dandoottokkihalla ikki? Assa dandoottorinni hagiidha dandaatto. Hanni Moote Daawitinna mannisi maatensanna jajjansa Amaaleqootu anganni gatissu yannara ikkinore laˈno. Hakkawoyite lamu xibbi labballi lowo geeshsha daafurte olama hooggino daafira, uduunne agarte gattino. Daawitinna mannisi ola qeeltuhu gedensaanni, isi qafadde abbitinore baalunku taalo beeqqitanno gede hajajino. (1 Sam. 30:21-25) Alamete doyichohu manna rosaano assate loosinkeno hattooti. Konne looso loosate dandaaminsare baala assitannori baalunku, mittu manchi Yihowa afe cuuami kiiro taalo hagiidha dandiitanno.

17. Yihowa maaho galata hasiissannonke?

¹⁷ Yihowa soqqanshonkenni hagiidhanno daafira lowo geeshsha galaxxineemmosi. Isi mannu halaale macciishshanno gede woy iso magansiˈranno gede giddeessa dandiineemmokkita afino. Ikkirono Yihowa isira noonke baxillenna diinaggaambe soqqammeemmosi gara laˈˈanno. Qoleno isi sabbakate loosira dandiinummore assine hagiidhineemmo gara rosiisannonke. (Yoh. 14:12) Hexxo mudhine agura hoongummo geeshsha Yihowa ninkenni hagiidhannota addaxxa dandiineemmo!