1. Manino ro mahafalifaly noho mampirengirengy antsika ty hoe Vavolombeloni-Jehovah?

FALIFALY biby tsika sady mirengirengy satria Vavolombeloni-Jehovah! Manday ty anarani-Jehovah tsika ka asehontsika amy fiainantsika hoe vavolombelony tsika lafa mitory noho mampianatsy mikasiky azy. Falifaly koa tsika lafa afaky manampy olo “nana fo soa mba hahazoa fiaina zisiky farany” ho lasa mpanomponi-Jehovah. (Asa. 13:48) Mitovy amy ty raha nitsapani-Jesosy ty raha tsapantsika. ‘Nifalifaly biby’ Jesosy lafa mpianatsiny rey nitantara taminy ty raha soa nihitan-drozy tamin-drozy nitory.​—Lioka 10:1, 17, 21.

2. Ino ty azontsika atao mba hampisehoa hoe tena vatan-draha amintsika ty asa fitoria?

² Tena vatan-draha amintsika ty asa fitoria. Hoy apostoly Paoly tamy Timoty: “Ambeno soa ty vatanao noho ty fampianaranao.” Hoy koa ty asany: “Laha manao ani-zay iha, le hanavotsy ty vatanao noho ze mijanjy anao.” (1 Tim. 4:16) Manavotsy ay zany ty asa fitoria ataontsika. Miamby soa amy ty vatantsika tsika satria vahoakini-Fanjakà-Ndranahary. Teantsika laha manome voninahitsy ani-Jehovah noho mifanaraky amy ty vaovao soa torintsika avao ty raha ataontsika. (Fil. 1:27) Asehontsika koa hoe ‘miamby soa amy ty fampianarantsika’ tsika, ka manoma soa noho mangataky fanampea amy Jehovah lafa hitory.

3. Kinto amy ty vaovao soani-Fanjakà iny va lafa kila olo? Manomeza ohatsy.

³ Ndre manao ze fara herintsika tsika mba hitoria amin’olo, le mety mbo tsy ho kinto amy ty vaovao soani-Fanjakà iny ty ankamaroan’olo amy faritanintsika eny. Eritsereto, ohatsy, ty raha niainani-Rahalahy Georg Lindal. Ie raiky avao ro nitory tamy faritsy maro an’Islandy any tamy 1929 zisiky 1947. Fa an’arivony ty boky nizaràny, fe tsy nisy lasa Vavolombeloni-Jehovah ty olo nandramby ani-raha rey. Hoy ty asany: “Fahitako azy, atao raha manohitsy ty raha resahini-Baiboly ty sisany amin’olo rey, fa ty ankamaroany tsy kinto avao.” Nisy misionera nahazo diplomy tamy sekolini-Gileada nalefa tany mba hanampy tamy asa fitoria. Fe mbo tsy de nahita olo nijanjy ty vaovao soa avao  rozy ndre fa nitory tanatini-tao maro. Fa sivy tao tafara atoy vo nisy olo nanoka ty vatany ho ani-Jehovah noho natao batisa tan’Islandy any. *

4. Mety hanao akory tsika lafa misy olo tsy mandramby ty vaovao soa?

⁴ Kivikivy tsika lafa tsy mandramby ty olo itoriantsika na tsy mandroso ty olo ampianarintsika Baiboly. Mety hitovy tamy raha nitsapani-Paoly ty raha tsapantsika. ‘Nalahelo biby noho nahatiaro nijaly’ ie, satria tsy ta hino mihintsy ty ankamaroani-Jiosy hoe Jesosy ro Mesia. (Rom. 9:1-3) Mety mana mpianatsy Baiboly koa iha. Miezaky mafy iha mba hahay hampianatsy sady mivavaky matetiky ho ani-mpianatsy iny. Fe tsy manoriky ty raha ianarany ie, ka mila ajano ty fianaranareo. Na mety mbo tsy nisy nivita batisa mihintsy ty olo ampianarinao. Fe midika va zay hoe aminao any ty fahadisoa sady tsy mankasitraky ty fanompoanao Jehovah? Hamaly ani-fanontanea roe retoa tsika amy lahatsoratsy toy ato: 1) Akory ty amantara hoe mahita vokatsy tsika amy fanompoa ataontsika? 2) Ino ty raha tokony fa hampoizintsika lafa tsika mitory?

5. Manino ty fanompoantsika ani-Jehovah ro mety tsy hisy vokany araky ty nieritseretantsika azy?

⁵ Hoy ty Baiboly mikasiky ty olo manao ty sitrapo-Ndranahary: “Ho mety iaby ze raha ataony.” (Sal. 1:3) Fe tsy midika zay hoe hifanaraky amy ty raha eritseretintsika ze kila raha ataontsika ho ani-Jehovah. “Feno raha mampiasa loha” ty fiainantsika olombelo satria samby tsy lavorary iaby tsika. (Joba 14:1) Mety hanasarotsy na hanaka ty fitoria ataontsika koa kindraiky ty olo manohitsy antsika. (1 Kor. 16:9; 1 Tes. 2:18) Ka akory ty amaritani-Jehovah hoe mahita vokatsy tsika amy fitoria ataontsika? Ndao tsika handiniky torolala vitsivitsy baka amy Baiboly ao afaky manampy antsika hahay ty valini-fanontanea io.

6. Akory ty amaritani-Jehovah hoe mahita vokatsy tsika amy ty asa ataontsika ho azy?

⁶ Ty ezaky mafy ataontsika noho ty fiaretantsika ro ifantohani-Jehovah. Ndre tsy ta hijanjy antsika aza ty olo, le falifaly amintsika avao Jehovah laha mazoto mitory tsika sady tea azy. Hoy Paoly: “Ndranahary tsy hoe tsy marina ka hanalino ty raha nataonareo, noho ty fitiava nasehonareo ho ahi-ty anarany, tamy nikarakaranareo noho mbo ikarakaranareo ty olo masy.” (Heb. 6:10) Tiaroni-Jehovah ty raha ataontsika noho ty fitiavantsika azy, ndre tsy mana mpianatsy vita batisa aza tsika. Mety ho azonao orihy raha nivolanini-Paoly tamy Korintiana reo toy hoe “tsy misera ty asa mafy ataonareo amy Tompo ao.”​—1 Kor. 15:58.

7. Ino ty azontsika ianara baka amy raha nivolanini-apostoly Paoly mikasiky ty fanompoany?

⁷ Misionera tena nahita vokatsy apostoly Paoly satria nahavita nanory fiangona vaovao  tamy tanà maro. Fe lafa nisy olo nikinokino ani-Paoly noho nivola hoe tsy mahay mampianatsy ie, le tsy nanao ho zao ie hoe fa maro anè ty olo nampeako ho lasa Kristiana! Zao avao ty raha nivolaniny: “Nahavita asa maro aho.” (2 Kor. 11:23) Manahaky ani-Paoly, le tokony hotiarovintsika hoe ty ezaky mafy ataontsika noho ty fiaretantsika ro tena vatan-draha amy Jehovah.

8. Ino ty tokony hotiarovintsika mikasiky ty fanompoantsika?

⁸ Mahafalifaly ani-Jehovah ty fanompoantsika. Naniraky mpianatsy 70 Jesosy mba hitory ty vaovao soani-Fanjakà iny. Lafa nivita fitoria iny, le ‘nifalifaly rozy lafa nimpoly.’ Nanino tse moa rozy ro nifalifaly? Hoy ty asan-drozy: “Maneky anay iaby ndre ty demonia, lafa nampiasa ty anaranao zahay.” Fe nanity an-drozy Jesosy ka nivola hoe: “Ka mifalifaly satria hoe manjary maneky anareo ty fanahy raty, fa mifalifalea avao satria voasoratsy an-danitsy any ty anaranareo.” (Lioka 10:17-20) Haini-Jesosy fa tsy voatery hahita vokatsy manahaky an’iny avao rozy lafa manompo. Tsy haintsika hoe firy tamy olo niresahani-mpianatsini-Jesosy rey ro nilasa Kristiana. Soa ho haini-mpianatsy rey hoe tsy mianky amy ty fijanjinan’olo an-drozy avao ro hahavy an-drozy ho falifaly. Fa ty antony tokony hahafalifaly an-drozy, le ty fahaizan-drozy hoe mankasitraky ty ezaky mafy nataon-drozy Jehovah.

9. Laha hentea ty Galatianina 6:7-9, ino ty raha mandiny antsika laha tsy kivy tsika fa mitory avao?

⁹ Hahazo fiaina mandrakizay tsika laha miaritsy amy fanompoantsika. Laha manao ze fara herintsika tsika ka mitory noho mampianatsy ty vaovao soa, le “mamafy ho ani-fanahy.” Manino tsika ro mivola ani-zay? Satria lafa manompo tsika le mampiseho hoe ta hotarihini-fanahy masi-Ndranahary. Ka laha “tsy vozaky” tsika na “tsy mokotsy”, le mampitamà Jehovah fa hanome fiaina mandrakizay antsika, ndre tsy nisy nivita batisa aza ty olo nampianarintsika.​—Vakio Galatianina 6:7-9.

10. Manino ro mijanjy ty olo sisany lafa tsika mitory le manino ty ilany ro tsy mijanjy?

¹⁰ Mianky amy ty raha am-pon’olo ao ro hahavy azy hijanjy na tsy hijanjy ty fahamarina. Nanazava ani-fahamarina io Jesosy tamy fanohara raiky niresahiny. Nisy mpamboly, hoasany, namafy voa tamy tany sankarazany, fe ze voa tamy tany soa teo iny avao ro namokatsy. (Lioka 8:5-8) Nivola Jesosy fa manahaky tany sankarazany rey ty fon’olo satria samby hafa ty fomba andrambesany ty “safà-Ndranahary.” (Lioka 8:11-15) Tsy afaky niforosè ani-voa namboleny rey hitombo mpamboly iny. Mitovy amy zay koa tsika. Tsy afaky hampitombo ty raha am-pon’olo nitoriantsika rey ao tsika. Ka ino ty andraikitsintsika? Tsy tokony hieny tsika fa hamafy ty vaovao soani-Fanjakà iny avao. Nivola Paoly hoe “ty olo kiraidraiky le samby hahazo ty valisoany araky ty asa nataony”, fa tsy araky ty vokatsini-asa nataony.​—1 Kor. 3:8.

11. Nanino Jehovah ro nifalifaly tamy fitoria nataoni-Noa ndre tsy nijanjy azy aza ty olo? (Henteo sary amy fononi-gazety toy.)

¹¹ Maro ty mpanomponi-Jehovah taloha tany nitory tamin’olo tsy nijanjy. Noa, ohatsy, “mpitory ty fahamarina” tanatini-40 tao na 50 tao teo ho eo. (2 Pet. 2:5) Azo antoky fa nitamà ie hoe hijanjy azy ty olo, fe tsy nivola Jehovah hoe zay ty raha hiseho. Ho zao aza ty raha nivolaniny tamy Noa lafa ie nampamboatsy ani-sambofiara iny: “Milira anaty sambofiara ao iha noho anakilahinao reo, noho valinao, noho valini-anakilahinao reo.” (Gen. 6:18) Lafa nivola taminy ty refini-sambofiara iny Jehovah, le mety nieritseritsy Noa hoe tsy ho maro ty olo hijanjy azy satria tsy ho tendriky  an-drozy sambo iny. (Gen. 6:15) Fe haintsika soa moa tantara iny. Tsy nisy tamin’olo rey ndre raiky nijanjy ani-Noa. (Gen. 7:7) Nanao akory ty fahitani-Jehovah ani-Noa? Nanao ho zao va ie hoe tsy nidary ty asa fitoria nampanaovy azy Noa? Tsy zay mihintsy! Nifalifaly tamy Noa Jehovah satria nanao ze raha nampanaovini-Jehovah azy ie.​—Gen. 6:22.

12. Nanino Jeremia mpaminany ro nifalifaly tamy fanompoany avao ndre tsy nijanjy noho nanohitsy azy ty olo?

¹² Eritsereto koa Jeremia mpaminany. Nitory avao ie tanatini-40 tao mahery, ndre tsy nijanjy noho nanohitsy azy aza ty olo. Nahakivy azy ty ‘fanambania noho kizakizaky’ nataoni-mpanohitsy azy rey, ka nieritseritsy ie hoe tsy ho vitany ty asa nanendrea azy. (Jer. 20:8, 9) Fe tsy hoe nikivy teo avao Jeremia! Ino ty nanampy azy hanohy avao ty fanompoany sady ho falifaly? Nisy raha bevata roe tena nifantohany. Voalohany, hafatsi-Ndranahary niresahini-Jeremia io ro hahavy ty olo ‘hana ty hoavin-drozy noho hana raha tamany.’ (Jer. 29:11) Faharoe, nifilìni-Jehovah ie mba hisolo tena azy hanambara ty hafatsiny amin’olo. (Jer. 15:16) Manday hafatsy manome raha tamany ty olo koa tsika henanizao sady manday ty anarani-Jehovah satria Vavolombelony. Laha tsika mifantoky amy antony bevata roe reo, le ho falifaly avao tsika ndre mijanjy antsika ty olo ndre tsy mijanjy.

13. Ino ty ianarantsika baka amy fanoharani-Jesosy amy Marka 4:26-29 ao iny?

¹³ Elaela ty olo sisany vo manam-pinoa. Nampianatsy ani-fahamarina io Jesosy tamy fanohara niresahiny mikasiky mpamboly niroro iny. (Vakio Marka 4:26-29.) Lafa baka namafy ani-voa rey mpamboly iny, le nitombo tsikelikely raha rey. Tsy nisy ndre ino ino azoni-mpamboly iny natao mba hampitomboa ani-voa rey malakilaky. Manahaky ani-mpamboly iny, le tsy maintsy mandiny elaela vasa iha alohani-hahitanao hoe manoriky ty raha ianarany va mpianatsinao iny. Tsy afaky niforosè ani-voa namboleny rey hitombo malakilaky araky ty itiavany azy mpamboly iny. Manahaky ani-zay koa fa tsy afaky miforosè ty finoani-mpianatsy iny hitombo malakilaky araky ty itiavantsika azy tsika. Ka kivy zany laha somary elaela mpianatsy iny vo mandroso, fa tsy araky ty nieritseretanao azy. Mila mahaliny manahaky mpamboly io tsika, zisiky handrambesani-mpianatsy iny fanapahan-kevitsy hoe hanompo ani-Jehovah.​—Jak. 5:7, 8.

14. Ino ty ohatsy ahità hoe mety handiny elaela ty olo zay vo hijanjy antsika?

¹⁴ Amy faritsy sisany, mety ho elaela ty olo vo hanapa-kevitsy hoe hatao batisa. Diniho, ohatsy, ty raha niainani-Gladys noho Ruby Allen. Mpirahavavy rozy roe. Nivoatendry ho mpisava lala maharitsy amy faritanini-Québec, a Kanadà any rozy, tamy 1959. * Tsy nahasaky niresaky tamy Vavolombeloni-Jehovah ty olo satria natahotsy an’olo tanà raiky amin-drozy noho mpitariky fivavaha rey. Farany, tsy nijanjy ty vaovao soa mikasiky Fanjakà iny rozy. Hoy Gladys: “Nandeha nitory santrano valo lera sanandro zahay tanatini-roe tao, fe tsy nisy olo niresaky taminay ndre raiky! Le namoha varavara rozy, fe lafa hitan-drozy hoe zahay ro teo, le lasa rozy. Fe tsy nikivy zahay.” Lafa nandeha ty fotoa, le niova olo rey ka niazo ifampiresaha avao. Nisy olo sisany koa nanomboky nijanjy. Misy fiangona telo henanizao amy tanà io ao.​—Isaia 60:22.

15. Ino ty azontsika ianara mikasiky ty asa fanaova mpianatsy, laha hentea ty 1 Korintianina 3:6, 7?

¹⁵ Tsy vitan’olo raiky ty hanampy olo ho lasa mpianatsy. Afaky miaraky miasa ty olo iaby amy fiangona eo mba hanampea olo ho vita batisa. (Vakio 1 Korintianina 3:6, 7.) Eritsereto  hoe misy rahalahy nanome taratasy mivalo na gazety olo raiky kinto. Fe hitani-rahalahy iny hoe tsy ahafahany hitsidiky ani-olo iny ty fandaharam-potoany, farany niangavy rahalahy hafa ie mba himpoly any. Afaky nampianatsy ani-olo iny rahalahy iny. Bakeo ie nitao rahalahy noho anabavy samby hafa hiaraky aminy hampianatsy. Mpitory rey koa moa samby nampahery ani-mpianatsy iny tamy fomba samby hafa. Ze rahalahy na anabavy nifankahita tamy mpianatsy iny, le nanampy azy hahay raha maro mikasiky ani-Jehovah. Ka lafa atao batisa mpianatsy iny, le samby ho falifaly, hoasani-Jesosy, ze olo iaby niezaky mafy nanampy azy.​—Jaona 4:35-38.

16. Mety ho voafetra ty fanompoa vitanao satria marary iha na mihareraky, fe manino iha ro mbo afaky ho falifaly avao?

¹⁶ Mety fa tsy de afaky mitory noho mampianatsy manahaky ty taloha sasy iha satria tsy salama na fa mihareraky. Mbo afaky ho falifaly avao iha satria mbo manao ze azonao atao. Eritsereto, ohatsy, tantarani-Davida Mpanjaka toy. Nandesini-Amalekita rey ty fianakavian-drozy noho ty hananan-drozy. Nanea ani-Amalekita rey amy zay rozy miaraky amy lahilahy namany rey. Fe tsy afaky nialy ty roanjato amy lahilahy rey satria nivozaky biby, ka farany rozy nipetraky niamby ani-entan-drozy rey. Nandresy ry Davida noho lahilahy niaraky taminy rey, sady nahazo raha maro lafovily baka amy fahavalon-drozy rey. Fe nandidy Davida hoe tokony samby hahazo anjara mitovy baka amy raha niazon-drozy rey ty olo iaby, ndre nandeha tan’aly any ndre tsy tany. (1 Sam. 30:21-25) Misy itovizany amy asa fampianara ataontsika ty raha resahini-tantara io. Mety fa tsy hahavita be sasy iha amy asa fitoria noho fampianara, ndre teanao aza ty hanao ani-zay. Fe laha iha manao ze fara herinao, le mbo ho falifaly avao iha saky misy olo vaovao lasa mahay ani-Jehovah noho atao batisa.

17. Ino ro tokony hisaorantsika ani-Jehovah?

¹⁷ Tena misaotsy ani-Jehovah tsika satria be fitiava ie ka mandanjalanja lafa manenty ty fanompoa ataontsika. Hainy fa tsy afaky hiforosè olo hijanjy antsika tsika na hiforosè olo hanompo azy. Fe hitany ty ezaky mafy ataontsika noho ty fitiavantsika azy, ka mamaly soa antsika ie. Mampianatsy antsika koa ie mba ho falifaly avao amy ze raha iaby ataontsika amy asa fitoria. (Jaona 14:12) Afaky matoky tsika hoe ho falifaly amintsika avao Ndranahary laha tsy kivy mihintsy tsika!