1. Sortu bigi grani wi abi?

WI LEKI Yehovah Kotoigi abi wan bigi grani di e gi wi prisiri! Wi na a pipel fu Yehovah. Te wi e du a preikiwroko èn te wi e meki disipel, dan wi e sori taki wi na Kotoigi fu en. Wi breiti srefisrefi te wi man yepi wan sma di „abi a yoisti denki fu man kisi têgo libi”, fu tron wan bribiman (Tori 13:48). Wi e firi a srefi leki Yesus. A ben „prisiri pasa marki èn santa yeye kon na en tapu” di den disipel fruteri en den moi sani di den ondrofeni na ini a preikiwroko.​—Luk. 10:1, 17, 21.

2. Fa wi kan sori taki a preikiwroko prenspari gi wi?

² A preikiwroko na wan prenspari sani gi wi. Na apostel Paulus ben taigi Timoteyus: „Tan poti prakseri na yusrefi èn na den sani di yu e leri sma.” Paulus ben taki tu: „Te yu du disi, dan yu o frulusu yusrefi nanga den sma di e arki yu” (1 Tim. 4:16). Sobun, sma kan lasi den libi efu wi no e preiki. Fu di wi e saka wisrefi ondro Gado Kownukondre, meki wi wani tan poti prakseri na wisrefi. Ala ten wi wani tyari wisrefi na wan fasi di e gi Yehovah glori èn di e sori taki wi e bribi a bun nyunsu di wi e fruteri sma (Fil. 1:27). Te wi e sreka bun gi a preikiwroko èn te wi e aksi Yehovah fu blesi a wroko fosi wi go preiki, dan wi e sori taki wi e ’tan poti prakseri na den sani di wi e leri sma’.

3. Na ala sma o arki te wi e preiki a Kownukondre boskopu? Gi wan eksempre.

³ Ma awinsi wi du ala san wi man fu preiki gi trawan, toku a kan taki furu sma na ini a birti fu wi no e poti prakseri na a bun nyunsu fu a Kownukondre. Luku na eksempre fu Brada Georg Lindal, di ben e preiki en wawan na ini heri IJsland fu 1929 te go miti 1947. A prati dusundusun buku gi sma, ma nowan sma ben wani tron Yehovah Kotoigi. A ben skrifi: „Son sma ben e gens a waarheid krinkrin, èn wan lo sma no ben e span nanga en srefisrefi.”  Bakaten den seni wan tu zendeling fu Gileadskoro go na IJsland fu yepi nanga a preikiwroko. Ma a teki ete neigi yari fosi wan tu sma na ini a kondre dati gi den libi abra na Yehovah èn teki dopu. *

4. Fa wi e firi son leisi te sma no wani studeri Bijbel?

⁴ A no de fu taki dati wi e sari te sma no wani studeri Bijbel. Kande wi e firi leki Paulus di ben e „firi bigi sari nanga wan pen di no wani gowe”, fu di den Dyu no ben wani teki Yesus leki a Mesias (Rom. 9:1-3). Kow taki dati yu e du muiti fu studeri nanga wan sma, yu e begi gi en, ma toch a no e go na fesi èn yu musu stop a studie? Noso kande noiti yu no studeri nanga wan sma teleki a dopu. Yu e firi leki yu no e du yu wroko bun, noso taki Yehovah no e blesi a wroko di yu e du? Na ini na artikel disi wi o luku tu aksi: (1) O ten wi kan taki dati wi du a preikiwroko bun? (2) San wi kan fruwakti te wi e preiki gi trawan?

5. A no ala ten a wroko di wi e du gi Yehovah o waka soleki fa wi wani. Fu san ede?

⁵ Bijbel e taki fu a sma di e du a wani fu Gado: ’Ala sani di a e du, o waka bun’ (Ps. 1:3). Ma disi no wani taki dati ala san wi e du gi Yehovah o waka soleki fa wi wani. Fu di wi alamala na sondusma, meki a libi fu wi èn a di fu trawan „lai problema” (Yob 14:1). Boiti dati, gensman kan tapu wi son leisi fu du wi preikiwroko (1 Kor. 16:9; 1 Tes. 2:18). Ma o ten wi kan taki dati wi du wi preikiwroko bun? Fa Yehovah e si a tori disi? Kow luku wan tu gronprakseri na ini Bijbel di kan yepi wi fu kisi piki tapu den aksi disi.

6. San prenspari gi Yehovah te a e luku a preikiwroko fu wi?

⁶ San prenspari gi Yehovah, na taki wi e wroko tranga gi en èn taki wi e horidoro. Gi Yehovah, a preikiwroko fu wi bun te wi e preiki fayafaya fu di wi lobi en, awinsi sma no wani arki wi. Paulus skrifi: „Gado no e du sani di no reti. Dati meki a no o frigiti a wroko di unu du nanga a lobi di unu sori gi a nen fu en, fu di unu ben dini den santawan èn unu e tan dini den te now ete” (Hebr. 6:10). Yehovah no e frigiti a wroko di wi du gi en èn a lobi di wi sori, awinsi wi no ben man studeri nanga sma teleki den dopu. Sobun, awinsi sani no waka soleki fa yu ben denki, yu kan bribi san Paulus ben taigi den Korentesma: „A wroko di unu e du gi Masra no de fu soso.”​—1 Kor. 15:58.

7. San wi kan leri fu den sani di na apostel Paulus taki fu a preikiwroko fu en?

⁷ Na apostel Paulus ben de wan bun zendeling di ben seti gemeente na ini  furu foto. Ma di son sma krutu Paulus èn di den taki dati a no ben de wan bun leriman, dan a no bigin taki fu den someni sma di a yepi fu tron Kresten. Na presi fu dati, a taki: „Mi wroko moro tranga leki den” (2 Kor. 11:23). Neleki Paulus, wi musu hori na prakseri taki san prenspari gi Yehovah, na taki wi e wroko tranga èn taki wi e horidoro.

8. Sortu sani fu a preikiwroko wi musu hori na prakseri?

⁸ Yehovah breiti nanga a wroko di wi e du. Di Yesus seni 70 disipel fu preiki a Kownukondre boskopu, dan den „drai kon baka nanga prisiri”. Fu san ede den ben e prisiri so? Den taki: „Masra, srefi den ogri yeye e du san wi e taki, fu di wi e gebroiki yu nen.” Ma Yesus sori den taki a denki fu den no bun, di a taigi den: „Un no musu prisiri fu di den ogri yeye e du san unu e taki. Na presi fu dati un musu prisiri fu di un nen skrifi na ini hemel” (Luk. 10:17-20). Yesus ben sabi taki a no ala ten den ben o abi bun bakapisi na ini a preikiwroko. Fu taki en leti, wi no sabi omeni fu den sma di yere a boskopu fu den tron Kresten bakaten. Den disipel no ben musu prisiri nomo nanga den bun bakapisi di den ben abi na ini a preikiwroko. San ben musu gi den moro prisiri, na taki Yehovah ben breiti nanga a wroko di den ben du.

9. San o de a bakapisi te wi e horidoro na ini a preikiwroko, soleki fa Galasiasma 6:7-9 e sori?

⁹ Te wi e horidoro na ini a preikiwroko, dan wi o kisi têgo libi. Te wi e du ala muiti fu preiki a bun nyunsu èn fu gi sma leri, dan wi e „sai nanga a yeye na prakseri”, fu di wi e gi a santa yeye fu Gado na okasi fu wroko na wi tapu. Solanga wi ’no tapu’ fu du a wroko fu wi èn solanga wi „no kon weri”, Yehovah pramisi taki wi o kisi têgo libi, awinsi wi no ben man yepi sma fu gi densrefi abra na Gado.​—Leisi Galasiasma 6:7-9.

10. Fu san ede a no ala sma e arki a boskopu fu wi?

¹⁰ Sma o arki a boskopu fu wi, soso te den ati bun. Yesus ben tyari a tori disi kon na krin na ini na agersitori fu a man di ben sai na tapu difrenti sortu gron. A ben sori taki na soso a siri di fadon na tapu bun gron ben o meki nyanyan (Luk. 8:5-8). Yesus ben taki dati den difrenti sortu gron na a ati fu sma. Den sani di den sma ben o du te den yere „a wortu fu Gado” ben o sori na tapu sortu gron a siri sai (Luk. 8:11-15). Neleki a saiman, wi srefi no man meki a siri gro na ini na ati fu den sma di e arki wi te wi e preiki. A frantwortu di wi abi, na fu tan sai Kownukondre siri. Na apostel Paulus ben taki dati ibri sma „o kisi en eigi pai fu a wroko di a du”. A no e taki dati wi o kisi pai fu den bakapisi fu a wroko di wi du.​—1 Kor. 3:8.

11. Fu san ede wi kan taki dati Noa ben de „wan preikiman fu retidu” di du en wroko bun? (Luku a fowtow na tapu a kafti.)

¹¹ Na ini ala den hondrohondro yari di pasa, furu futuboi fu Yehovah preiki gi sma aladi den sma no ben wani arki. Fu eksempre, sowan 40 noso 50 yari langa Noa ben de „wan preikiman fu retidu” (2 Petr. 2:5). A no de fu taki dati a ben howpu taki sma ben o arki en, ma Yehovah no ben taigi en taki na dati ben o pasa. Di Gado taigi Noa fu bow na ark, a taki tu: „Yu musu go na ini na ark, yu, makandra nanga den manpikin fu yu, a  wefi fu yu, nanga den wefi fu yu manpikin” (Gen. 6:18). Di Gado taigi Noa o bigi na ark ben o de, dan kande Noa ben frustan kaba taki furu sma no ben o arki en fu di na ark no ben o man hori so furu sma (Gen. 6:15). Soleki fa wi sabi, dan nowan sma na ini na ogri grontapu dati ben arki di Noa preiki gi den (Gen. 7:7). Ma yu denki taki Yehovah ben feni taki Noa no du en preikiwroko bun? No, a no ben denki so! Yehovah ben breiti nanga Noa fu di a tan du san Yehovah ben aksi en fu du.​—Gen. 6:22.

12. Fa a profeiti Yeremia ben man prisiri nanga a preikiwroko fu en aladi sma no ben wani arki en èn den ben e gens en?

¹² A profeiti Yeremia ben preiki 40 yari tu aladi sma no ben wani arki en èn den ben e gens en. Di ’sma ben e kosi en èn spotu en’, dan a ben e firi brokosaka so te, taki a ben wani tapu nanga a wroko fu en (Yer. 20:8, 9). Ma toku Yeremia no gi abra! San yepi en fu du en wroko go doro èn fu prisiri nanga a preikiwroko fu en? A ben hori tu prenspari sani na prakseri. A fosiwan, na taki a boskopu di a ben musu tyari gi den sma ben de wan pramisi fu Yehovah taki ’sani ben o waka bun gi den na ini a ten di e kon’ èn taki den ben o ’abi howpu’ (Yer. 29:11). A di fu tu, na taki a ben e tyari a nen fu Yehovah (Yer. 15:16). Wi srefi e tyari wan boskopu fu howpu gi den sma èn wi e tyari a nen fu Yehovah leki Kotoigi fu en. Te wi e poti prakseri na den tu prenspari sani disi, dan wi kan abi prisiri na ini a preikiwroko awinsi sma no wani arki wi.

13. San wi e leri fu na agersitori fu Yesus di skrifi na Markus 4:26-29?

¹³ A e teki wan heri pisi ten fosi wan sma e kon abi bribi. Yesus ben leri wi a sani disi na ini na agersitori fu a saiman di e sribi. (Leisi Markus 4:26-29.) Baka di a saiman sai a siri, a siri gro safrisafri èn a saiman no ben man meki a siri gro moro esi. Neleki a saiman, a kan taki yu o abi fu wakti wan heri pisi ten fosi yu e si taki a Bijbelstudie fu yu e du san a e leri. Neleki fa a saiman no man meki den siri di a sai gro moro esi, na so wi no man meki a bribi fu den Bijbelstudie fu wi gro moro esi tu. Dati meki yu no musu lasi-ati èn yu no musu gi abra te yu e si taki den e teki moro langa fu go na fesi. Neleki a saiman, wi musu abi pasensi èn wi musu wakti teleki a Bijbelstudie fu wi e teki a bosroiti fu dini Yehovah.​—Yak. 5:7, 8.

14. Sortu eksempre e sori taki a kan teki langa fosi sma arki a boskopu fu wi?

¹⁴ Na son presi a e teki wan heri pisi ten fosi wan sma dopu. Luku na ondrofenitori fu Gladys nanga Ruby Allen. Na ini 1959 den tu sisa disi go dini leki gewoon pionier na ini a foto Kibek na Kanada. * Fu di den sma drape ben e frede san den birtisma nanga den priester ben o taki, meki den no ben wani arki a Kownukondre boskopu fu wi. Gladys taki: „Wi ben e wroko oso fu oso aiti yuru langa wan dei èn wi du dati tu yari langa sondro taki wan sma ben wani arki wi! Den sma ben e kon na a doro, ma te den ben si taki na wi, dan den ben e waka gowe. Ma wi no gi abra.” Te fu kaba den sma drape kon kenki èn sonwan fu den bigin arki a boskopu. Now dri gemeente de na ini a foto dati.​—Yes. 60:22.

15. San 1 Korentesma 3:6, 7 e leri wi fu a wroko di wi e du fu meki disipel?

 ¹⁵ Furu sma de fanowdu fu yepi wan sma fu tron wan disipel. Ala sma na ini a gemeente kan yepi wan sma fu teki dopu. (Leisi 1 Korentesma 3:6, 7.) Kande wan brada e libi wan traktaat noso wan tijdschrift gi wan sma di wani kon sabi moro. Bakaten a brada e si taki a no o man go baka na a sma fu taki moro fara nanga en fu a tori. Sobun, a e aksi wan tra preikiman fu tyari wan gobaka na a sma dati. A preikiman dati man bigin studeri Bijbel nanga a sma. Bakaten a e aksi difrenti brada nanga sisa fu kon nanga en na a studie èn ibriwan fu den e gi a studenti deki-ati na wan tra fasi. Ibri brada noso sisa di a studenti miti o yepi en fu kon sabi moro fu Yehovah. Na so ala den sma di ben wroko tranga fu yepi a studenti dati kan prisiri te a dopu.​—Yoh. 4:35-38.

16. Fu san ede yu kan abi prisiri na ini a preikiwroko awinsi yu e siki noso yu no abi so furu krakti moro?

¹⁶ Kande yu no man preiki so furu moro fu di yu kon siki, noso fu di yu no abi so furu krakti moro. Ma toku yu kan prisiri ete nanga san yu man du. Luku na ondrofenitori fu Kownu David. Di den Amalèksma ben kon teki den gudu nanga den osofamiri fu David nanga den man fu en, dan tu hondro fu den man fu en ben weri tumusi fu go feti. Dati meki den tan na baka fu luku den lai. Baka di David wini a feti, dan a taigi den man di ben go feti nanga en taki den ben musu prati ala sani nanga den man di ben tan na baka (1 Sam. 30:21-25). Na so a de tu nanga a wroko di wi e du fu meki disipel. Ibri sma di e du ala muiti fu yepi nanga a wroko disi kan prisiri te wan nyun sma e leri sabi Yehovah èn te a e bigin waka tapu a pasi di e tyari sma go na libi.

17. Gi san wi musu taki Yehovah tangi?

¹⁷ Wi e taki Yehovah tangi taki a e warderi a wroko di wi e du gi en. A sabi taki wi no kan dwengi sma fu arki wi noso fu anbegi en. Toku a e si a muiti di wi e meki nanga a lobi di wi e sori gi en èn a e blesi wi gi dati. A e leri wi tu fa wi kan feni prisiri te wi e yepi fu du a bigi kotiwroko (Yoh. 14:12). Wi kan de seiker taki Gado o feni a wroko fu wi bun solanga wi no e gi abra!